ସ୍କୁଟି ଡିକି ଭାଙ୍ଗି ୧୦ ଲକ୍ଷ ଲୁଟ। କଟକ ଟାଙ୍ଗୀ ଅଂଚଳରେ ଘର ସାମ୍ନାରୁ ସ୍କୁଟି ଡିକି ଭାଙ୍ଗି ୧୦ ଲକ୍ଷ ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି। ଏ ନେଇ ଟାଙ୍ଗୀ ଥାନାରେ ଅଭିଯୋଗ ହୋଇଛି। ନପଙ୍ଗ ପଞ୍ଚାୟତ ଇଟୁଆ କୋରକର ଗାଁର ରବୀନ୍ଦ୍ର ତ୍ରିପାଠୀ ଜମି କିଣିବା ଲାଗି ଟାଙ୍ଗୀ ଷ୍ଟେଟବ୍ୟାଙ୍କରୁ ୧୦ଲକ୍ଷ ଟଙ୍କା ଉଠାଇ ଘରକୁ ଆସିଥିଲେ। ଗାଡ଼ି ଘର ଆଗରେ ରଖି ଘର ଭିତରକୁ ଯାଇ ବାହାରକୁ ଆସିବା ସମୟରେ ତାଙ୍କ ଘର ସାମ୍ନାରୁ ସ୍କୁଟି ଡିକି ତାଡି ୧୦ ଲକ୍ଷ ଲୁଟେରା ମାନେ ନେଇଯାଇଥିଲେ। ଦୁଇଟି ବାଇକରେ ୪ ଜଣ ଆସି ଏହି ଲୁଟ କରିଥିବା ଅଭିଯୋଗକାରୀ କହିଛନ୍ତି। ଏନେଇ ଟାଙ୍ଗୀ ଥାନାରେ ଅଭିଯୋଗ ହେବା ପରେ ପୋଲିସ ସିସିଟିଭି ଠାରୁ ଆରମ୍ଭ କରି ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଛି
ସ୍ୱାଭାବିକ ହେଲା ପ୍ରଭୁ ଲିଙ୍ଗରାଜଙ୍କ ନୀତିକାନ୍ତି
ସ୍ୱାଭାବିକ ହେଲା ପ୍ରଭୁ ଲିଙ୍ଗରାଜଙ୍କ ନୀତିକାନ୍ତି । ସକାଳୁ ସକାଳୁ ପ୍ରଭୁ ଲିଙ୍ଗରାଜଙ୍କ ମଙ୍ଗଳ ଆଳତୀ ସହ ଅବକାଶ ସରିଛି । କିଛି ସମୟ ଭିତରେ ଆରମ୍ଭ ହେବ କୋଠ ଭୋଗ ପ୍ରକ୍ରିୟା । ଗତକାଲି ସମର୍ଥା ନିଯୋଗ ସେବାୟତ ବନ୍ଦ କରିଥିଲେ ନୀତିକାନ୍ତି । ବ୍ରାହ୍ମଣ ନିଯୋଗ ସମ୍ପାଦକ ବିରଞ୍ଚି ନାରାୟଣ ପତି ସୂଚନା ଦେଇଛନ୍ତି ।
ଜୟଦେବ ଭବନରେ ଆୟୋଜିତ ହୋଇଛି ଫଟୋଚିତ୍ର ପ୍ରଦର୍ଶନୀ
ଭୁବନେଶ୍ୱର ଜୟଦେବ ଭବନରେ ଆୟୋଜିତ ହୋଇଛି ଫଟୋଚିତ୍ର ପ୍ରଦର୍ଶନୀ । ବରିଷ୍ଠ ଫୋଟ ସାମ୍ବାଦିକ ଅତୁଲ୍ୟ ମହାନ୍ତି ମହାବାତ୍ୟାର ଫଟୋ ନିଜ କ୍ୟାମେରା ଲେନ୍ସରେ ଉତ୍ତୋଳନ କରିଥିଲେ । ୧୯୯୯ ମସିହା ମହାବାତ୍ୟା ପରେ ଓଡ଼ିଶାରେ ତାଣ୍ଡବ ରଚିଥିବା ଅନେକ ବାତ୍ୟା, ବନ୍ୟା ଓ ପ୍ରକୃତି ବିପର୍ଯ୍ୟୟ ସମୟର ଫଟୋଚିତ୍ରକୁ ନିଜ କ୍ୟାମେରାରେ ଉଠାଇଥିଲେ । ଦୀର୍ଘ ୨୫ ବର୍ଷର ଫଟୋ ସାମ୍ବାଦିକତା ମଧ୍ୟରେ ସେ ଦେଖିଥିବା ବାତ୍ୟା ଫାଇଲିନ୍, ହୁଡୁହୁଡୁ, ତିତିଲି, ଫନି, ୟାସ, ଦାନା ପରି ବାତ୍ୟାକୁ କ୍ୟାମେରାରେ ଉତ୍ତୋଳନ କରିଛନ୍ତି । ଗ୍ରାଉଣ୍ଡ ଜିରୋରୁ ଉଠାଇଥିବା ଭୟଙ୍କର, ହୃଦୟ ବିଦାରକ ଚିତ୍ର ଓ ଦୁଃଖଦ ଚିତ୍ର ସବୁକୁ ଆଗାମୀ ପିଢ଼ିକୁ ଦେଖିବାର ସୁଯୋଗ ପାଇବେ ।
ଚଳିତ ଥର ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରାରେ ଦର୍ଶକ ଦେଖିବେ ନୂଆଁ କଂସ
ଚଳିତ ଥର ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରାରେ ଦର୍ଶକ ଦେଖିବେ ନୂଆଁ କଂସ । କିଏ ହେବ ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରାର କଂସ। କାହାର ଅଟ୍ଟହାସ୍ୟରେ ଥରିବ ମଥୁରା। ଏନେଇ ଏବେଠୁ ଉତ୍ସୁକତା ବଢ଼ିବାରେ ଲାଗିଛି। ଏଥର କଂସ କଳାକାର ସମେତ ଅନ୍ୟ କଳାକାର ମାନ ମଧ୍ୟ ଚୟନ କରାଯିବାର ନିଷ୍ପତି ନିଆଯାଇଛି। ତେବେ କଳାକାର ମାନେ ବରଗଡ଼ ଜିଲ୍ଲାପାଲ ଅଫିସ୍ ପହଞ୍ଚି ରେଜିଷ୍ଟେସନ କରିବା ସହ ଅଳ୍ପକେ ନିଜର ନିଖୁଣ ଅଭିନୟ ପ୍ରଦର୍ଶନ କରୁଛନ୍ତି।
ଲଗାଣ ବର୍ଷାରେ ଭୁଷୁଡ଼ି ପଡିଲା ଘର: କାନ୍ଥ ତଳେ ଚାପି ହୋଇ ଚାଲିଗଲା ବୃଦ୍ଧାଙ୍କ ଜୀବନ
ଲଗାଣ ବର୍ଷାରେ ଭୁଷୁଡ଼ି ପଡିଲା କାନ୍ଥ । କାନ୍ଥ ତଳେ ଚାପି ହୋଇ ଚାଲିଗଲା ବୃଦ୍ଧାଙ୍କ ଜୀବନ । ଏଭଳି ଦୁଃଖଦ ଘଟଣା ଘଟିଛି ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ରେକର୍ଡଚୁଆ ଗ୍ରାମରେ । ଏହି ଗ୍ରାମର ବାସନ୍ତୀ କିସ୍କୁ ଘରେ ଏକୁଟିଆ ଥିବା ବେଳେ ଅପରାହ୍ନ ସମୟରେ ଘର ବାରଣ୍ଡାରେ ଶୋଇଥିଲେ । ଏହି ସମୟରେ ଜୋରରେ ପବନ ହେବା ସହିତ ବର୍ଷା ହୋଇଥିଲା । ଯାହା ଫଳରେ ଘର ଆଜବେଷ୍ଟସ ଏବଂ କାନ୍ଥ ଦବିଯାଇଥିଲା। ଏହି ଶବ୍ଦ ଶୁଣି ବାସନ୍ତୀ ଉଠି ବାହାରିବାକୁ ଚେଷ୍ଟା କରୁଥିବା ବେଳେ କାନ୍ଥ ତଳେ ଚାପି ହୋଇ ଯାଇଥିଲେ । ପରିବାର ଲୋକେ ତୁରନ୍ତ ତାଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଉଦଳା ମେଡିକାଲରେ ଭର୍ତ୍ତି କରିଥିଲେ । ମେଡିକାଲରେ କିଛି ସମୟ ଚିକିତ୍ସା ହେବା ପରେ ତାଙ୍କର ମୃତ୍ୟୁ ହୋଇଥିଲା । ଖବର ପାଇ କପ୍ତିପଦା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଦିଲ୍ଲୀ ପ୍ରଦୂଷଣ ବଢାଇଛି ଚିନ୍ତା: କଠୋର ନିଷ୍ପତ୍ତି ନେବାକୁ ବାଧ୍ୟ ହେଉଛନ୍ତି ଦିଲ୍ଲୀ ସରକାର
ଦିଲ୍ଲୀ ପ୍ରଦୂଷଣ ବଢାଇଛି ଚିନ୍ତା । ଗୋଟିଏ ପରେ ଗୋଟିଏ କଠୋର ନିଷ୍ପତ୍ତି ନେବାକୁ ବାଧ୍ୟ ହେଉଛନ୍ତି ଦିଲ୍ଲୀ ସରକାର । ଏବେ ଜାତୀୟ ରାଜପଥ ପ୍ରଶାସନ NDMC ପାର୍କିଂ ଫିକୁ ଦୁଇଗୁଣ କରିବାକୁ ନିଷ୍ପତ୍ତି ନେଇଛି। ଏହି ନିଷ୍ପତ୍ତି ଦିଲ୍ଲୀବାସୀଙ୍କ ପାଇଁ ଅସୁବିଧା ବଢ଼ାଇପାରେ, କାରଣ ସେମାନଙ୍କୁ ଏବେ NDMCରେ ପାର୍କିଂ ପାଇଁ ଅଧିକ ଦେୟ ଦେବାକୁ ପଡିବ। ଏନଡିଏମସି ରାସ୍ତାରେ ଯାନବାହନ ସଂଖ୍ୟା ହ୍ରାସ କରିବାକୁ ଲକ୍ଷ୍ୟ ରଖିଛି। ଯାହା ପ୍ରଦୂଷଣ ନିୟନ୍ତ୍ରଣ କରିବାରେ ସାହାଯ୍ୟ କରିବ। ସରକାର ସାର୍ବଜନୀନ ପରିବହନକୁ ପ୍ରୋତ୍ସାହିତ କରିବା ଭଳି ଅନ୍ୟାନ୍ୟ ପଦକ୍ଷେପ ମଧ୍ୟ ନେଉଛନ୍ତି। କନଟ୍ ପ୍ଲେସ୍ ସମେତ ବିଭିନ୍ନ ସ୍ଥାନରେ NDMCର ୧୨୮ ଟି ପାର୍କିଂ ସ୍ଥାନ ଅଛି।
ଦିଲ୍ଲୀର ବାୟୁମଣ୍ଡଳରେ ପ୍ରଦୂଷଣ ବୃଦ୍ଧି ପାଇବାରେ ଲାଗିଛି। ପ୍ରତିବର୍ଷ ଅକ୍ଟୋବରରେ, ଦିଲ୍ଲୀର ପ୍ରଦୂଷଣ ସ୍ଥିତି ଆହୁରି ଖରାପ ହେଉଛି। ଦୀପାବଳି ଉତ୍ସବ ସରିଗଲେ, ଏଠାରେ ବାୟୁ ଗୁଣବତ୍ତା ସାଧାରଣ ବ୍ୟକ୍ତିଙ୍କ ପାଇଁ ମୁକାବିଲା କରିବା ଏକ ଚ୍ୟାଲେଞ୍ଜ ହୋଇଛି। ବୃଦ୍ଧି ପାଉଥିବା ପ୍ରଦୂଷଣ ଋତୁକାଳୀନ, ମାନବୀୟ ଏବଂ ଭୌଗୋଳିକ କାରଣ ଦ୍ୱାରା ପରିଚାଳିତ। ଯାନବାହାନ ନିର୍ଗମନ, ନଡ଼ା ଜାଳିବା, ବାୟୋମାସ ଜାଳିବା, ରାସ୍ତା ଧୂଳି ଏବଂ ନିର୍ମାଣ, ଶିଳ୍ପରୁ ବାହାରୁଥିବା ଧୂଆ ଏବଂ ଦୀପାବଳି ଆତସବାଜି ଦିଲ୍ଲୀରେ ବୃଦ୍ଧି ପାଉଥିବା ପ୍ରଦୂଷଣ ପାଇଁ ଦାୟୀ। ଏହି ବର୍ଷ, ଦୀପାବଳି ପରେ, ଦିଲ୍ଲୀର AQI ୩୫୬ ରେ ପହଞ୍ଚିଛି। ଏହା ଲୋକଙ୍କ ସ୍ୱାସ୍ଥ୍ୟ ଉପରେ ଗୁରୁତ୍ୱପୂର୍ଣ୍ଣ ପ୍ରଭାବ ପକାଇଥାଏ । ଯାହା ଶ୍ୱାସକ୍ରିୟା ରୋଗ ଏବଂ ହୃଦରୋଗର ଆଶଙ୍କା ବୃଦ୍ଧି କରିଥାଏ।
ଆଜି ମହିଳା ଦିନିକିଆ ବିଶ୍ୱକପରେ ଭାରତ-ଅଷ୍ଟ୍ରେଲିଆ ସେମି ଲଢ଼େଇ
ଆଜି ମହିଳା ଦିନିକିଆ ବିଶ୍ୱକପରେ ଭାରତ-ଅଷ୍ଟ୍ରେଲିଆ ସେମି ଲଢ଼େଇ। ମୁମ୍ବାଇରେ ଦିନ ତିନିଟାରେ ଖେଳାଯିବ ଏହି ମ୍ୟାଚ। ପରାଜୟର ପ୍ରତିଶୋଧ ନେବାକୁ ଭାରତ ପୁରା ପସ୍ତୁତ ରହିଥିବା ଦେଖବାକୁ ମିଳିଛି। ହେଲେ ଏଲିସ ହେଲୀଙ୍କ ଅଷ୍ଟ୍ରେଲିଆକୁ ହରାଇବା ସହଜ ହେବନି। ଗ୍ରୁପ ପର୍ଯ୍ୟାୟରେ ଅଷ୍ଟ୍ରେଲିଆ ଗୋଟିଏ ଥର ଭାରତକୁ ପରାସ୍ତ କରିସାରିଛି। ଏସବୁ ଭିତରେ ଭାରତୀୟ ମହିଳା କ୍ରିକେଟ ଟିମର ଷ୍ଟାର ବ୍ୟାଟର ସ୍ମୃତି ମନ୍ଧାନା ନିଜର ଅଭ୍ୟାସକୁ ଜୋରଦାର କରିଛନ୍ତି। ଘରୋଇ ମାଟିରେ ମହିଳା ଦିନିକିଆ ବିଶ୍ୱକପରେ ମଧ୍ୟ ମନ୍ଧାନା ଦମଦାର ପ୍ରଦର୍ଶନ କରି ଚାଲିଛନ୍ତି। ସେ ଏବେ ଚଳିତ ବିଶ୍ୱକପରେ ସର୍ବାଧିକ ରନ ହାସଲକାରୀ ମଧ୍ୟ ହୋଇ ରହିଛନ୍ତି। ବାମହାତୀ ବ୍ୟାଟର ସ୍ମୃତି ମନ୍ଧାନା ବିଶ୍ୱକପର ଶେଷ ଦୁଇ ମ୍ୟାଚ୍ରେ ନ୍ୟୁଜିଲ୍ୟାଣ୍ଡ ବିପକ୍ଷରେ ୧୦୯ ଓ ବାଂଲାଦେଶ ବିପକ୍ଷରେ ଅପରାଜିତ ୩୪ ରନର ଇନିଂସ ଖେଳିଥିଲେ। ଏହାପରେ ସେ ନିଜ କ୍ୟାରିୟରର ଶ୍ରେଷ୍ଠ ରେଟିଂ ସହ ଦିନିକିଆ ବ୍ୟାଟିଂ ରାଙ୍କିଙ୍ଗରେ ପୂର୍ବଭଳି ୧ନଂ ସ୍ଥାନରେ ରହିଛନ୍ତି।
ଚେତିଲେନି ରେଭେନ୍ସା କର୍ତ୍ତୃପକ୍ଷ: ପୁଣି ହଷ୍ଟେଲରେ ବ୍ୟାପିଲା ଝାଡ଼ାବାନ୍ତି
ଚେତିଲେନି ରେଭେନ୍ସା କର୍ତ୍ତୃପକ୍ଷ । ପୁଣି ହଷ୍ଟେଲରେ ବ୍ୟାପିଲା ଝାଡ଼ାବାନ୍ତି । ଇଷ୍ଟ ହଷ୍ଟେଲର ୧୫ରୁ ଛାତ୍ର ଆକ୍ରାନ୍ତ । ଏସସିବି ଟ୍ରମା କେୟାର ସେଣ୍ଟରରେ ଚାଲିଛି ଚିକିତ୍ସା । ଗତ ଜୁଲାଇ ମାସରେ ନ୍ୟୁ ପିଜି ଓ ଧର୍ମପଦ ଛାତ୍ରାବାସରେ ବ୍ୟାପିଥିଲା ଝାଡ଼ାବାନ୍ତି । ପ୍ରାଥମିକ ତଦନ୍ତରୁ ଦୂଷିତ ପାଣିକୁ ଦାୟି କଲେ କର୍ତ୍ତୃପକ୍ଷ । କଟକ ରେଭେନ୍ସାର ଇଷ୍ଟ ହଷ୍ଟେଲରେ ରାତିରେ ରୁଟି ଅଣ୍ଡା ତଡ଼କା ଖାଇବା ପରେ ଆକ୍ରାନ୍ତ ହୋଇଥିଲେ । ଏକାଧିକ ଛାତ୍ରଙ୍କ ପେଟ କାଟିବା ସହ ବାନ୍ତି ହୋଇଥିଲା । ୧୫ରୁ ଅଧିକ ଛାତ୍ରଙ୍କୁ ତୁରନ୍ତ ଏସସିବି ମେଡିକାଲ ନିଆଯାଇଥିଲା । ସେମାନଙ୍କୁ ଟ୍ରମାକେୟାର ସେଣ୍ଟରରେ ରଖାଯାଇ ଚିକିତ୍ସା ପରେ କିଛି ଛାତ୍ର ସୁସ୍ଥ ହୋଇଛନ୍ତି । ହଷ୍ଟେଲର ଦୂଷିତ ପାଣି ଯୋଗୁଁ ସଂକ୍ରମଣ ହୋଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । ହଷ୍ଟେଲରେ ୮ଟି ଆକ୍ବାଗାର୍ଡ ଲାଗିଥିଲେ ବି ସେଥିରୁ ଅଧିକାଂଶ କାମ କରୁ ନଥିବା କହିଛନ୍ତି ଅସୁସ୍ଥ ଛାତ୍ର।
ଗତ ଜୁଲାଇ ୧୪ରେ ବିଶ୍ବବିଦ୍ୟାଳୟର ନ୍ୟୁ ପିଜି ଓ ଧର୍ମପଦ ଛାତ୍ରାବାସରେ ବ୍ଯାପିଥିଲା ଝାଡ଼ାବାନ୍ତି । ୪୪ ଜଣ ଛାତ୍ର ଅସୁସ୍ଥ ହେବାପରେ ଜିଲ୍ଲା ଜନସ୍ବାସ୍ଥ୍ୟ ଅଧିକାରୀ ହଷ୍ଟେଲରେ ପହଞ୍ଚି ସଫେଇ କାମର ଅନୁଧ୍ଯାନ କରିବା ସହ ସମୀକ୍ଷା କରିଥିଲେ । ନୂଆ ଭେଣ୍ଡରକୁ ଏସଓପି ମାନି ଖାଦ୍ଯ ଯୋଗାଇ ଦେବାକୁ ତାଗିଦ ମଧ୍ଯ କରାଯାଇଥିଲା । ଏହେସତ୍ତ୍ବ ମଧ୍ଯ କର୍ତ୍ତୃପକ୍ଷ ନ ଚେତିବାରୁ ପୁଣି ଏପରି ସ୍ଥତି ଉପୁଜିଥିବା ଅଭିଯୋଗ ହୋଇଛି । ସେପଟେ ଘଟଣା ପରେ କୁଳପତି ସଂଜୟ ନାୟକ, ହଷ୍ଟେଲ ୱାଡେନ ଓ ପୂର୍ବତନ ବିଧାୟକ ପ୍ରଭାତ ବିଶ୍ଵାଳ ଅସୁସ୍ଥ ଛାତ୍ରଙ୍କୁ ଭେଟି ଆଲୋଚନା କରିଛନ୍ତି । ଛାତ୍ରମାନେ ସୁସ୍ଥ ହେବା ପରେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ଓ ଜନସ୍ବାସ୍ଥ୍ୟ ବିଭାଗ ସହିତ ଏକ ମିଳିତ ବୈଠକ କରି ଘଟଣାର ସ୍ଥାୟୀ ସମାଧାନ କରିବାକୁ ଛାତ୍ରମାନେ ଦାବି କରିଛନ୍ତି ।
ତେଜିଲା ଗାଡ଼କଣ ଅଳିଆ ଗଦା ହଟାଅ ଦାବି: ଆରମ୍ଭ ହେଲା ଆମରଣ ଅନଶନ
ତେଜିଲା ଗାଡ଼କଣ ଅଳିଆ ଗଦା ହଟାଅ ଦାବି । ଆରମ୍ଭ ହେଲା ଆମରଣ ଅନଶନ । ରାଜ୍ଯ ସରକାରଙ୍କ ଦୋମୁହାଁ ନୀତି ନେଇ ବର୍ଷିଲା ଅଭିଯାନ । ବିଏମସି ବେଆଇନ ଅଳିଗଦା କରୁଥିବା ଅଭିଯୋଗ । ଗାଡକଣରୁ ଅଳିଆ ଗଦା ହଟାଇବା ଦାବିରେ ରାଜ୍ଯ ପ୍ରଦୂଷଣ ନିୟନ୍ତ୍ରଣ ବୋର୍ଡ ଆଗରେ ଆମରଣ ଅନଶନରେ ବସିଲା ସୌନିକ ସ୍କୁଲ ବଞ୍ଚାଓ, ଅଳିଆ ଗଦା ହଟାଓ ଅଭିଯାନ । କିଏ ମଜୁରୀ ବନ୍ଦ କରିଛି ତ, ଆଉ କିଏ ଛୋଟ ଛୁଆଙ୍କୁ ଧରି ବସିଛି । ସ୍ୱାସ୍ଥ୍ୟ, ବିପଦକୁ ଅଣଦେଖା ଓ ନିୟମ ଉଲ୍ଲଂଘନ ସତ୍ତ୍ବେ BMCକୁ CTO ଜାରି କରିଛି ପଲ୍ୟୁସନ କଣ୍ଟ୍ରୋଲ ବୋର୍ଡ । ବୋର୍ଡର ଆଞ୍ଚଳିକ ଅଧିକାରୀ ଏଥିପାଇଁ ଦାୟୀ । ଦୀର୍ଘଦିନ ଧରି ବେଆଇନ ଭାବରେ ଅଳିଆ ପ୍ରକ୍ରିୟାକରଣ ହେଉଥିଲା । ଏଠାକାର ୱିଣ୍ଡୋ କମ୍ପୋଷ୍ଟିଂ, ମାଇକ୍ରୋ କମ୍ପୋଷ୍ଟିଂ ସେଣ୍ଟର, ରିସାଇକ୍ଲିଂ ପ୍ଲାଣ୍ଟ ଏବଂ ଫ୍ଲୁଏଣ୍ଟ ଟ୍ରିଟମେଣ୍ଟ ପ୍ଲାଣ୍ଟ ସମୂହକୁ ଅଗଷ୍ଟ ୧୨ରେ ପ୍ରଦୂଷଣ ବୋର୍ଡ ଆଞ୍ଚଳିକ କାର୍ଯ୍ୟାଳୟ ପରିଚାଳନା କରିବାକୁ BMCକୁ ସମ୍ମତି ପ୍ରଦାନ କରିଛି । କାର୍ଯ୍ୟାନୁଷ୍ଠାନ ନେବା ପରିବର୍ତ୍ତେ ପ୍ରୋତ୍ସାହନ ଦିଆଯାଇଥିବା ଅଭିଯୋଗ କରି ଦାବିପତ୍ର ପ୍ରଦାନ କରିଛି ଅଭିଯାନ।
ଗାଡକଣ ଅଳିଆ ଗଦା ନେଇ ଅକ୍ଟୋବର ୩୦ ସୁଦ୍ଧା ବିଏମସିକୁ ରିପୋର୍ଟ ଦେବାକୁ କହିଥିଲା OPCB । ରାତି ପାହିଲେ କଣ୍ଟ ପୂରିବ । ହେଲେ ବିଏମସି ପକ୍ଷରୁ କୌଣସି ଉତ୍ତର ମିଳିନି । ହାଇକୋର୍ଟରେ ରହିଛି ମାମଲା । କଣ ପଦକ୍ଷେପ ନିଆଯାଇଛି ଓ ନିଆଯିବ, ସେ ବାବଦରେ ନଗର ଉନ୍ନୟନ ବିଭାଗ ସହ ମଧ୍ୟ ଆଲୋଚନା ଚାଲିଛି । ତେବେ ସେଠାରେ ଥିବା ପ୍ରୋସେସିଂ ୟୁନିଟ ମାଧ୍ୟମରେ ଅଳିଆର ପ୍ରୋସେସିଂ ହେବ ଏବଂ ଅଳିଆ ହଟିବା ନେଇ ପ୍ରସ୍ତୁତି ଆରମ୍ଭ ହେବ ବୋଲି କହିଛନ୍ତି OPCBର ବରିଷ୍ଠ ବୈଜ୍ଞାନିକ। ବାରମ୍ବାର ଆନ୍ଦୋଳନ, ପ୍ରତିବାଦ ସତ୍ତ୍ବେ ଏଯାଏଁ ହଟି ପାରୁନି ଅଳିଆଗଦା । ବାଦି ପୂରଣ ନ ହେଲେ ଆମରଣ ଅନଶନ ଜାରି ରହିବ ବୋଲି ଅଭିଯାନ ପକ୍ଷରୁ ଚେତାବନୀ ଦିଆଯାଇଛି ।
ପ୍ରତିଶ୍ରୁତି ଦେଇ ପ୍ରତାରଣା: ରାଉରକେଲା ଏୟାରପୋର୍ଟକୁ ଅଣଦେଖା
ପ୍ରତିଶ୍ରୁତି ଦେଇ ପ୍ରତାରଣା । ରାଉରକେଲା ଏୟାରପୋର୍ଟକୁ ଅଣଦେଖା । ବିମାନ ସେବା ବନ୍ଦ, ଯାତ୍ରୀ ହନ୍ତସନ୍ତ । ILS, NLS ଓ ମାଲିକାନା ପରିବର୍ତ୍ତନ ଦାବି । ପଦକ୍ଷେପ ନନେଲେ ନୂଆବର୍ଷରୁ ଧାରଣା ପ୍ରତିବାଦ । ରାଉରକେଲାରୁ ଭାରତର ବିଭିନ୍ନ ପ୍ରାନ୍ତକୁ ବିମାନ ସେବା ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲା କେନ୍ଦ୍ର । ହେଲେ ବିମାନ ସେବାତ ଦୂରର କଥା ଗତ ୩ ମାସ ହେଲା କୋଲକାତା ଓ ଭୁବନେଶ୍ବରକୁ ଚାଲୁଥିବା ବିମାନ ମଧ୍ଯ ସମ୍ପୂର୍ଣ୍ଣ ବନ୍ଦ ରହିଛି । ଯାହାକୁ ନେଇ ତେଜୁଛି ପ୍ରତିବାଦ । ନିୟମିତ ବିମାନ ଚଳାଚଳ, ଇନଷ୍ଟ୍ରୁମେଣ୍ଟ ଲାଣ୍ଡିଙ୍ଗ ସିଷ୍ଟମ ଓ ନାଇଟ ଲାଣ୍ଡିଙ୍ଗ ସିଷ୍ଟମ ସହ ବିମାନ ବନ୍ଦରର ମାଲିକାନା ସେଲ ଠାରୁ ଏୟାର ପୋର୍ଟ ଅଥରିଟିକୁ ଦେବା ପାଇଁ ଦାବି କରିଛି ରାଉରକେଲା ଏୟାପୋର୍ଟ ଆକସନ କମିଟି ।
ପ୍ରତିବାଦରେ ସୋମବାର ଦିନ ଏୟାରପୋର୍ଟ ଆଗରେ ପରିବା ବିକ୍ରି କରି ଅଭିନବ ପ୍ରତିବାଦ କରାଯାଇଥିଲା । ବିମାନବନ୍ଦର ଆଗରେ ଜରିପାଲ ପକାଇ ପରିବା ବିକ୍ରି କରିଥିଲେ ଆକ୍ସନ କମିଟି ସଦସ୍ଯ । ତେବେ ଆନ୍ଦୋଳନକାରୀଙ୍କୁ ଛେଣ୍ଡ ଥାନା ପୋଲିସ ଉଠାଇ ନେଇ ଛେଣ୍ଡ ଥାନାରେ ଅଟକ ରଖିଥିଲା । ତେବେ ଦାବି ପୂରଣ ନହେଲେ ସରକାରଙ୍କୁ ଦାବିପତ୍ର ପ୍ରଦାନ କରିବା ସହ ଜାନୁଆରୀ ଏକ ତାରିଖ ଠାରୁ ଫେବୃଆରୀ ଏକ ତାରିଖ ଯାଏଁ ଆନ୍ଦୋଳନ କରାଯିବ ବୋଲି କମଟି ଚେତାବନୀ ଦେଇଛି । ଆନ୍ଦୋଳନରେ ବିଭିନ୍ନ ରାଜନୈତିକ ଦଳ, ଗଣ ସଂଗଠନ, ଶ୍ରମିକ ସଂଗଠନ ଓ ସହରବାସୀ ସାମିଲ ହେବେ ।