ଉପର ପଡ଼ିଆରେ ହେବ ବାଲିଯାତ୍ରା। ଉପର ପଡ଼ିଆରେ ବାଲିଯାତ୍ରାକୁ ମିଳିଲା ଅନୁମତି। ଉପର ପଡ଼ିଆ ବାଲିଯାତ୍ରାକୁ ଅନୁମତି ଦେଇଛନ୍ତି ହାଇକୋର୍ଟ। ପୂର୍ବରୁ କେବଳ ତଳ ପଡ଼ିଆରେ ବାଲିଯାତ୍ରା କରିବାକୁ ନିଷ୍ପତ୍ତି ହୋଇଥିଲା। ନିଷ୍ପତ୍ତିର ପୁନର୍ବିଚାର ପାଇଁ ପ୍ରଶାସନକୁ କରାଯାଇଥିଲା ଅନୁରୋଧ। ସବୁ ମହଲରୁ ପ୍ରଶାସନକୁ ଅନୁରୋଧ କରାଯାଇଥିଲା। ଆଜି ହାଇକୋର୍ଟ ଉପର ପଡ଼ିଆରେ ବାଲିଯାତ୍ରା କରିବାକୁ ଅନୁମତି ଦେଇଛନ୍ତି।
ସ୍ତ୍ରୀ ଓ ପୁଅକୁ ହତ୍ୟା କରି ଝୁଲିପଡିଲା ସ୍ୱାମୀ
ନନ୍ଦିଘୋଷ ବ୍ୟୁରୋ : ସ୍ତ୍ରୀ ଓ ପୁଅକୁ ହତ୍ୟା କରିବା ପରେ ଆତ୍ମହତ୍ୟା କଲା ସ୍ୱାମୀ । ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲା ବେଲଡାଙ୍ଗା ଥାନା ଆଣ୍ଡିରନ ହାଲଦାରପଡାରେ ଘଟିଛି ଏଭଳି ଘଟଣା । ସଞ୍ଜିତ ହାଲଦାର ତାଙ୍କ ଘରେ ସ୍ତ୍ରୀ ଏବଂ ପୁଅର ଗଳା କାଟି ହତ୍ୟା କରିଥିବା ଅଭିଯୋଗ ହୋଇଛି । ତା’ପରେ ସେ ସିଲିଂ ଫ୍ୟାନରେ ଝୁଲି ଆତ୍ମହତ୍ୟା କରିଛନ୍ତି । ସକାଳେ ସଞ୍ଜିତ ହାଲଦାରଙ୍କ ମାଆ ବାଥରୁମକୁ ଯାଇ ତାଙ୍କ ପୁଅକୁ ଝୁଲୁଥିବାର ଦେଖିଥିଲେ । ସେ ଶୀଘ୍ର ପଡ଼ୋଶୀମାନଙ୍କୁ ଡାକିବା ପରେ ପଡ଼ୋଶୀମାନେ କବାଟ ଖୋଲିଥିଲେ । ପରେ ସ୍ତ୍ରୀ ଓ ପୁଅର ଗଳାକଟା ମୃତଦେହ ଉଦ୍ଧାର କରାଯାଇଛି । ବେଲଡାଙ୍ଗା ଥାନା ପୋଲିସ ମୃତଦେହ ଉଦ୍ଧାର କରି ତଦନ୍ତ କରୁଛନ୍ତି । ଘଟଣାରେ ଅନ୍ୟ କୌଣସି କାରଣ ଜଡିତ ଅଛି କି ନାହିଁ ତାହା ବେଲଡାଙ୍ଗା ଥାନାର ପୁଲିସ ତଦନ୍ତ କରୁଛି। ତେବେ, ସଞ୍ଜିତ ହାଲଦାରଙ୍କ ମାଆ କହିଛନ୍ତି ଯେ ସଞ୍ଜିତ ହାଲଦାରଙ୍କ ସ୍ତ୍ରୀ କାରଣରୁ ଏହି ଘଟଣା ଘଟିଛି।
କ୍ରିକେଟର ରିଙ୍କୁ ସିଂହଙ୍କୁ ଡି- କମ୍ପାନୀରୁ ଧମକ, ୧୦ କୋଟି ଟଙ୍କା ଦାବି
ନନ୍ଦିଘୋଷ ବ୍ୟୁରୋ : ଭାରତୀୟ କ୍ରିକେଟର ରିଙ୍କୁ ସିଂହଙ୍କ ସମ୍ପର୍କରେ ଏକ ବଡ଼ ଘଟଣା ସାମ୍ନାକୁ ଆସିଛି । ସାଉଦ ଇବ୍ରାହିମର ଡି- କମ୍ପାନୀ ନାଁ ନେଇ ତାଙ୍କୁ ୧୦ କୋଟି ଟଙ୍କା ଦେବା ପାଇଁ ଦାବି କରିଛି । ତେବେ ପୋଲିସ ଏହି ମାମଲାରେ ରିଙ୍କୁ ସିଂହଙ୍କୁ ଧମକ ଦେଇଥିବା ବ୍ୟକ୍ତିକୁ ଗିରଫ କରି ପଚାରାଉଚରା କରିଛି । ଯାହା ଫଳରେ ଏହି ଘଟଣାର ପର୍ଦ୍ଦାଫାଶ ହୋଇଛି ।
ପୋଲିସର ସୂଚନା ମୁତାବକ, ଅଭିଯୁକ୍ତ ନୌଶାଦ ପଚରାଉଚରା ବେଳେ ଭାରତୀୟ ଖେଳାଳି ରଙ୍କୁ ସିଂହଙ୍କୁ ୧୦ କୋଟି ଟଙ୍କା ଦେବାକୁ ଧମକ ଦେବା କଥା ସ୍ୱୀକାର କରିଛି । ଖାଲି ଏତିକି ନୁହେଁ ସେ ରିଙ୍କୁଙ୍କ ଇଭେଣ୍ଟ ମ୍ୟାନେଜରଙ୍କୁ ମଧ୍ୟ ଧକମ ପୂର୍ଣ୍ଣ ଇମେଲ୍ ପଠାଉଥିବା କଥା ଜଣା ପଡିଛି । ଏଥିରେ ସେ ନିଜକୁ ଡି-କମ୍ପାନୀର ସଦସ୍ୟ ବୋଲି ପରିଚୟ ଦେଇ ଟଙ୍କା ନଦେଲେ ହତ୍ୟା ନେଇ ଧମକ ଦେଇଥିଲା । ତେବେ ମୁମ୍ୱାଇ ପୋଲିସ ଏହି ମାମଲା ନେଇ ପ୍ରଥମ ଥର ବଡ଼ କାର୍ଯ୍ୟାନୁଷ୍ଠାନ ନେଇଛି । ବିହାର ଦରଭଙ୍ଗାର ଅଧିବାସୀ ୩୩ ବର୍ଷୀୟ ମହମ୍ମଦ ଦିଲଶାଦ ନୌଶାଦକୁ ଗିରଫ କରିଛି ।
ବଦଳିଲେ ବ୍ରହ୍ମପୁରର ଅତିରିକ୍ତ ଏସପି
ନନ୍ଦିଘୋଷ ବ୍ୟୁରୋ : ବଦଳିଲେ ବ୍ରହ୍ମପୁରର ଅତିରିକ୍ତ ଏସପି । ବ୍ରହ୍ମପୁରର ଅତିରିକ୍ତ ଏସପି ସୀମା ସ୍ଵାଇଁଙ୍କୁ ବଦଳି କରିଛନ୍ତି ରାଜ୍ୟ ସରକାର। ତାଙ୍କ ସ୍ଥାନରେ ଆଲୋକ ଜେନାଙ୍କୁ ଅତିରିକ୍ତ ଏସପି ଭାବେ ବ୍ରହ୍ମପୁରରେ ଅବସ୍ଥାପିତ କରାଯାଇଛି। ଆଲୋକ ଜେନା ବଲାଙ୍ଗିରର ଅତିରିକ୍ତ ଏସପି ଥିଲେ। ସୀମା ସ୍ଵାଇଁଙ୍କୁ ତାଳଚେରର ଅତିରିକ୍ତି ଏସପି ଭାବେ ବଦଳି କରାଯାଇଛି। ଏହା ସହିତ ୧୯ ଜଣ ଅତିରିକ୍ତ ଏସପିଙ୍କୁ ବିଭିନ୍ନ ସ୍ଥାନକୁ ବଦଳି କରାଯାଇଛି।
ମସଜିଦ ନିକଟରେ ସ୍କୁଟି ବ୍ଲାଷ୍ଟ ଘଟଣା ଆତଙ୍କବାଦୀ ଆକ୍ରମଣ ନୁହେଁ ; ପୋଲିସ ଜଣାଇଲେ ପ୍ରକୃତ ସତ
ନନ୍ଦିଘୋଷ ବ୍ୟୁରୋ : ମସଜିଦ ସାମ୍ନାରେ ବିସ୍ଫୋରଣ ଘଟଣା ପର୍ଦ୍ଦାଫାଶ । ଏବେ ଏହା ପଛର ପ୍ରକୃତ କାରଣ ସାମ୍ନାକୁ ଆସିଛି । ବୁଧବାର ବିଳମ୍ବିତ ସନ୍ଧ୍ୟାରେ, କାନପୁରର ମିଶ୍ରି ବଜାରରେ ଥିବା ଏକ ମସଜିଦଠାରୁ ଅଳ୍ପ ଦୂରରେ ଦୁଇଟି ସ୍କୁଟରରେ ଏକ ବିସ୍ଫୋରଣ ଘଟିଥିଲା, ଯାହା ଫଳରେ ଅଞ୍ଚଳରେ ଆତଙ୍କ ଖେଳିଯାଇଥିଲା । ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ନିକଟ ଦୋକାନୀ ଏବଂ ପଥଚାରୀମାନେ ଭୟଭୀତ ହୋଇଯାଇଥିଲେ। ବିସ୍ଫୋରଣରେ ପାଞ୍ଚ ଜଣ ଆହତ ହୋଇଥିଲେ ଏବଂ ସେମାନଙ୍କୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି କରାଯାଇଛି। ଏହି ସମୟରେ, ଘଟଣା ସମ୍ପର୍କରେ ସୋସିଆଲ ମିଡିଆରେ ବିଭିନ୍ନ ଗୁଜବ ପ୍ରଚାର ହେବା ଆରମ୍ଭ ହୋଇ ଯାଇଥିଲା। ତଥାପି, ପୋଲିସ ସ୍ପଷ୍ଟ କରିଛି ଯେ ଏହା କୌଣସି ଆତଙ୍କବାଦୀ ଆକ୍ରମଣ ନୁହେଁ, ବରଂ ବାଣ ଯୋଗୁଁ ବିସ୍ଫୋରଣ ହୋଇଥିଲା।
ଅନ୍ୟପଟେ ପୋଲିସ କହିଛି ଯେ, ଘଟଣାସ୍ଥଳରୁ ଉଦ୍ଧାର ହୋଇଥିବା ପ୍ରମାଣ ସ୍ପଷ୍ଟ ଭାବରେ ସୂଚିତ କରୁଛି ଯେ ବିସ୍ଫୋରଣ ବାଣ ସହିତ ଜଡିତ ଥିଲା। ଘଟଣା ପରେ, କାନପୁର ପୋଲିସ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରି ଅଞ୍ଚଳର ୧୮ଟି ଦୋକାନ ଏବଂ ଗୋଦାମରେ ଖୋଳତାଳ ଚଳାଇଛି। ଏପର୍ଯ୍ୟନ୍ତ, ବେଆଇନ ବାଣ ଥିବା ଦୁଇଟି ଗୋଦାମକୁ ସିଲ୍ କରାଯାଇଛି।
SHO ସମେତ ୫ ପୋଲିସ କର୍ମଚାରୀ ନିଲମ୍ବିତ
ବିସ୍ଫୋରଣ ପରେ, ପୋଲିସ ପ୍ରଶାସନ ଅବହେଳା କରିଥିବା ଅଧିକାରୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଷ୍ଟେସନ ହାଉସ ଅଫିସର (SHO) ସମେତ ପାଞ୍ଚ ଜଣ ପୋଲିସ କର୍ମଚାରୀଙ୍କୁ ନିଲମ୍ବିତ କରାଯାଇଛି। ଏହା ବ୍ୟତୀତ, ସର୍କଲର ACPଙ୍କୁ ମଧ୍ୟ ହଟାଇ ଦିଆଯାଇଛି। ଅଭିଯୋଗ ହୋଇଛି ଯେ ଘଟଣାସ୍ଥଳରୁ ଷ୍ଟେସନ ଅଳ୍ପ ଦୂରରେ ଅବସ୍ଥିତ ଥିଲେ ମଧ୍ୟ, ଅଞ୍ଚଳରେ ପର୍ଯ୍ୟାପ୍ତ ନଜର ରଖାଯାଇ ନଥିଲା, ଯାହା ଫଳରେ ବେଆଇନ ଫାଇବର ଗଚ୍ଛିତ ରଖାଯାଇଥିଲା।
ଏହି ଘଟଣାରେ ଆହତ ମହମ୍ମଦ ମୁରସାଲିନ୍ କହିଛନ୍ତି ଯେ ବିସ୍ଫୋରଣ ଅତ୍ୟନ୍ତ ଶକ୍ତିଶାଳୀ ଥିଲା। ତାଙ୍କ ଗୋଡ ଏବଂ ହାତ ଗୁରୁତର ଭାବରେ ପୋଡ଼ି ଯାଇଛି। ସେ ଅନ୍ଧତ୍ୱର ଶିକାର ହୋଇଛନ୍ତି ଏବଂ ଏବେ ବି ତାଙ୍କର ଗମ୍ଭୀର ଶ୍ରବଣ ସମସ୍ୟା ଦେଖାଦେଇଛି ।
ବର୍ତ୍ତମାନ ପୋଲିସ ୧୨ ଜଣ ସନ୍ଦିଗ୍ଧଙ୍କୁ ଅଟକ ରଖି ପଚରାଉଚରା ଆରମ୍ଭ କରିଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ କାନପୁର ଭଳି ଏକ ବ୍ୟସ୍ତବହୁଳ ଏବଂ ଘନ ଜନବସତି ଅଞ୍ଚଳରେ ଏପରି ଘଟଣା ସୁରକ୍ଷା ଉପରେ ପ୍ରଶ୍ନ ଉଠାଇଛି। ଭବିଷ୍ୟତରେ ଏପରି ଘଟଣା ରୋକିବା ପାଇଁ ପୋଲିସ ଏବେ ମିଶ୍ରି ବଜାର ଏବଂ ଆଖପାଖ ଅଞ୍ଚଳରେ ସୁରକ୍ଷା ବୃଦ୍ଧି କରିବାକୁ ପ୍ରସ୍ତୁତ ହେଉଛି।
ଶିକ୍ଷୟତ୍ରୀଙ୍କ ବେକରୁ ଝାମ୍ପି ନେଲେ ଦୁର୍ବୁତ୍ତ ସୁନା ଚେନ
ନନ୍ଦିଘୋଷ ବ୍ୟୁରୋ : ଶିକ୍ଷୟତ୍ରୀଙ୍କ ବେକରୁ ସୁନା ଚେନ ଝାମ୍ପି ନେଲେ ଦୁର୍ବୁତ୍ତ। ଝାରସୁଗୁଡା ଜିଲ୍ଲା ବେଲପାହାଡ ଅଞ୍ଚଳରୁ ଲୁଟ। ସିସିଟିଭିରେ କଏଦ ହୋଇଛି ଲୁଟ ବେଳର ଦୃଶ୍ୟ। ଗତକାଲି ଦୁଇ ଜଣ ଦୁର୍ବୁତ୍ତ ବାଇକରେ ଆସି ସୁନା ଚେନ ଝାମ୍ପି ନେଇ ଫେରାର ହୋଇଛନ୍ତି l ପିଏମଶ୍ରୀ ଗିରଧରଲାଲ ହାଇସ୍କୁଲର ଶିକ୍ଷୟତ୍ରୀ କମଳା ସରାଫ ସ୍କୁଲ ଛୁଟି ହେବା ପରେ ଚାଲିଚାଲି ଘରକୁ ଫେରୁଥିବାବେଳେ ଦୁଇ ଜଣ ଦୁର୍ବୁତ୍ତ ବାଇକରେ ଆସି ସୁନା ଚେନ ଝାମ୍ପି ନେଇଛନ୍ତି। ଶିକ୍ଷୟତ୍ରୀ ଜଣକ ଏନେଇ ବେଲପାହାଡ ଥାନାରେ ଅଭିଯୋଗ କଲା ପରେ ପୋଲିସ ତଦନ୍ତ ଆରମ୍ଭ କରିଛି ।
ବର୍ଷା ଘଡ଼ଘଡ଼ିରେ ଜଳିଗଲା ଲିଙ୍ଗରାଜଙ୍କ ବାନା
ନନ୍ଦିଘୋଷ ବ୍ୟୁରୋ : ବଜ୍ରପାତରେ ଜଳିଗଲା ଲିଙ୍ଗରାଜଙ୍କ ବାନା । ଗତକାଲି ପ୍ରବଳ ବର୍ଷା ଓ ଘଡ଼ଘଡ଼ିରେ ଏପରି ହୋଇଥିବା ଜଣାପଡ଼ିଛି। ଲିଙ୍ଗରାଜ ମନ୍ଦିରର ବାନା ପୋଡ଼ି ଯାଇଛି। ବଜ୍ରପାତରେ କିଛି ସିସିଟିଭି ମଧ୍ୟ ନଷ୍ଟ ହୋଇଥିବା ଜଣାପଡ଼ିଛି। ଏପରିକି ଗର୍ଭଗୃହରେ ଲାଗିଥିବା ବିଜୁଳି ବଲ୍ ବି ପୋଡ଼ି ଯାଇଛି। ଆଜି ସକାଳେ ମନ୍ଦିର ସେବାୟତ ସବୁ ଯାଞ୍ଚ କରିବା ପରେ ଏହା ଜଣାପଡ଼ିଛି। ଲିଙ୍ଗରାଜ ମନ୍ଦିରରେ ମୋଟ ୩୫ଟି ସିସିଟିଭି କ୍ୟାମେରା ଲାଗିଛି । ବଜ୍ରପାତରେ କେତେ କ୍ୟାମେରା ନଷ୍ଟ ହୋଇଛି ତାହା ସ୍ପଷ୍ଟ ହୋଇନି। ବାନା ପୋଡ଼ି ଯିବା ପରେ ଏଏସଆଇ ଟିମ୍ ଲିଙ୍ଗରାଜ ମନ୍ଦିରକୁ ଯାଇ ଅନୁଧ୍ୟାନ କରିଛି।
ବିହାର ନିର୍ବାଚନ ତାରିଖ ଘୋଷଣା ପରେ ସରୁନି ଏସଆଇଆର ବିବାଦ ; ଆଜି ତଥ୍ୟ ଦାଖଲ କରିବେ ଇସି
ନନ୍ଦିଘୋଷ ବ୍ୟୁରୋ : ବିହାର ବିଧାନସଭା ନିର୍ବାଚନ ତାରିଖ ଘୋଷଣା ପରେ ସରୁନି ଏସଆଇଆର ବିବାଦ । ଭୋଟର ତାଲିକାରୁ ବାଦ୍ ପଡ଼ିଥିବା ୩ ଲକ୍ଷ ୬୬ହଜାର ଭୋଟରଙ୍କ ସମ୍ପର୍କରେ ଆଜି ସୁପ୍ରିମକୋର୍ଟ ନିକଟରେ ସବିଶେଷ ତଥ୍ୟ ଦାଖଲ କରିବେ ନିର୍ବାଚନ କମିଶନ । ଆସୋସିଏସନ ଫର ଡେମୋକ୍ରାଟିକ ରିଫର୍ମସ୍ ପକ୍ଷରୁ ଆଗତ ପିଟିସନର ଶୁଣାଣି ନେଇ ଏହି ନିର୍ଦ୍ଦେଶ ଦେଇଥିଲେ ଅଦାଲତ ।
ଏସଆଇଆରର ଚୂଡ଼ାନ୍ତ ତାଲିକାରେ ୨୧ ଲକ୍ଷ ୫୩ ହଜାର ନୂଆ ଭୋଟରଙ୍କୁ ସ୍ଥାନୀତ କରାଯାଇଥିବାବେଳେ ୩ ଲକ୍ଷ ୬୬ ହଜାର ଭୋଟରଙ୍କୁ ବାଦ୍ ଦିଆଯାଇଥିଲା । ଏସଆଇଆର ପୂର୍ବରୁ ଅର୍ଥାତ ଜାନୁଆରୀରେ ଥିବା ମୂଳ ଭୋଟର ତାଲିକା ସହ ଏହାକୁ ତୁଳନା କରିବା ଲାଗି କୋର୍ଟ ନିକଟରେ ଦର୍ଶାଇଥିଲେ ଆଡଭୋକେଟ ପ୍ରଶାନ୍ତ କିଶୋର । ମାମଲାର ଶୁଣାଣି କରୁଛନ୍ତି ଜଷ୍ଟିସ ସୂର୍ଯ୍ୟ କାନ୍ତ ଓ ଜଷ୍ଟିସ ଜୟମାଲ୍ୟ ବାଗଚୀ ।
ଜୁନ ସୁଦ୍ଧା ବିହାରର ମୋଟ ଭୋଟର ଥିଲେ ୭ କୋଟି ୮୯ ଲକ୍ଷ । ୧ ଅଗଷ୍ଟ ୨୦୨୫ ପ୍ରକାଶିତ ଚିଠା ଭୋଟର ତାଲିକାରେ ୬୫ ଲକ୍ଷ ଭୋଟର ବାଦ୍ ପଡ଼ିଥିଲେ । ଫଳରେ ମୋଟ ଭୋଟର ସଂଖ୍ୟା ହୋଇଥିଲେ ୭ କୋଟି ୨୪ ଲକ୍ଷ । ଏସଆଇଆର ପ୍ରକ୍ରିୟାରେ ସାମିଲ ହୋଇଥିଲେ ୨୧ ଲକ୍ଷ ୫୩ ହଜାର ଭୋଟର ଏବଂ ବାଦ୍ ପଡିଥିଲେ ୩ ଲକ୍ଷ ୬୬ ହଜାର ଭୋଟର । ଫଳରେ ୩୦ ସେପ୍ଟେମ୍ବରରେ ପ୍ରକାଶିତ ଚୂଡ଼ାନ୍ତ ଏସଆଇଆରରେ ମୋଟ ଭୋଟର ସଂଖ୍ୟା ହୋଇଥିଲେ ୭ କୋଟି ୪୨ ଲକ୍ଷ । ଅର୍ଥାତ ମୂଳ ଭୋଟର ତାଲିକାରୁ ସମୁଦାୟ ବାଦ୍ ପଡିଲେ ୪୭ ଲକ୍ଷ ଭୋଟର ।
କଫ ସିରପ ଖାଇ ୨୦ ପିଲାଙ୍କ ମୃତ୍ୟୁ ଘଟଣାରେ ବଡ଼ ଆକ୍ସନ : ‘ଶ୍ରୀସନ ମେଡିକାଲ୍ସ’ ମାଲିକ ଗିରଫ
ନନ୍ଦିଘୋଷ ବ୍ୟୁରୋ : ମଧ୍ୟପ୍ରଦେଶର ଛିନ୍ଦୱାଡାରେ କଫ ସିରପ ଖାଇ ୨୦ ପିଲାଙ୍କ ମୃତ୍ୟୁ ଘଟଣାରେ, ଏମପି ଏସଆଇଟିର ବଡ଼ କାର୍ଯ୍ୟାନୁଷ୍ଠାନ । କଫ ସିରପ ନିର୍ମାତା କଂପାନୀ ‘ଶ୍ରୀସନ ମେଡିକାଲ୍ସ’ ମାଲିକ ରଙ୍ଗନାଥନ ଗୋବିନ୍ଦନଙ୍କୁ ଅଟକ ରଖିଛି ପୋଲିସ । ଏହି କାର୍ଯ୍ୟାନୁଷ୍ଠାନ ଅକ୍ଟୋବର ୮ ତାରିଖ ରାତିରେ ନିଆଯାଇଥିଲା। ଗିରଫ ହେବା ପରେ, ଏମପି ଏସଆଇଟି ଅଭିଯୁକ୍ତଙ୍କୁ ଟ୍ରାଞ୍ଜିଟ ରିମାଣ୍ଡରେ ମଧ୍ୟପ୍ରଦେଶ ଆଣିବ। ସଂକ୍ରମିତ କଫ ସିରପ ଖାଇବା ପରେ ଛିନ୍ଦୱାଡାରେ ଏପର୍ଯ୍ୟନ୍ତ ମୋଟ ୨୦ ଜଣ ଶିଶୁଙ୍କ ମୃତ୍ୟୁ ହୋଇଛି। ରଙ୍ଗନାଥନ ଗୋବିନ୍ଦନଙ୍କୁ ଧରିବା ପାଇଁ କୋଡ଼ିଏ ହଜାର ଟଙ୍କାର ପୁରସ୍କାର ଘୋଷଣା କରାଯାଇଥିଲା।
କଫ ସିରପ୍ ସହିତ ଜଡିତ ମୃତ୍ୟୁ ପ୍ରଥମେ ମଧ୍ୟପ୍ରଦେଶର ଛିନ୍ଦୱାଡା ଏବଂ ବେତୁଲ ଜିଲ୍ଲାରେ ଦେଖାଯାଇଥିଲା, ଯେଉଁଠାରେ ଗତ ଦୁଇ ସପ୍ତାହ ମଧ୍ୟରେ ଅନେକ ପିଲାଙ୍କ ମୃତ୍ୟୁ ହୋଇଥିଲା। ପରବର୍ତ୍ତୀ ସମୟରେ, ରାଜସ୍ଥାନର କିଛି ଅଞ୍ଚଳରେ ସମାନ ସିରପ୍ ସହିତ ଜଡିତ ଘଟଣା ସାମ୍ନାକୁ ଆସିଥିଲା । ଛିନ୍ଦୱାଡା ପ୍ରଶାସନ ଅନୁଯାୟୀ, ଥଣ୍ଡା ସିରପ୍ ଖାଇବା ପରେ ପିଲାମାନେ ବାନ୍ତି, ପରିସ୍ରା କରିବାରେ କଷ୍ଟ ଏବଂ ଉଚ୍ଚ ଜ୍ୱର ଭଳି ଲକ୍ଷଣ ଦେଖାଦେଇଥିଲା। ଏହା ପରେ ପିଲାମାନଙ୍କର କିଡନୀ ଫେଲ ହୋଇଥିବା ନେଇ ଡାକ୍ତର ସୂଚନା ଦେଇଥିଲେ । ସମସ୍ତ ମୃତ ପିଲାଙ୍କ ବୟସ ଦୁଇରୁ ପାଞ୍ଚ ବର୍ଷ ମଧ୍ୟରେ ଥିଲା। ଅନେକଙ୍କୁ ନାଗପୁର ଏବଂ ଭୋପାଳର ହସ୍ପିଟାଲରେ ଭର୍ତ୍ତି କରାଯାଇଥିଲା ।
ଗାଜାକୁ ଫେରିବ ଶାନ୍ତି ; ଇସ୍ରାଏଲ ଏବଂ ହମାସ ମଧ୍ୟରେ ଶାନ୍ତି ଯୋଜନା ସ୍ୱାକ୍ଷର
ନନ୍ଦିଘୋଷ ବ୍ୟୁରୋ : ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧକୁ ଶେଷ କରିବାକୁ ନିରନ୍ତର ଚେଷ୍ଟା କରୁଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଏହି ସମୟରେ, ସେ ଏକ ବଡ଼ ଘୋଷଣା କରିଛନ୍ତି। ଟ୍ରମ୍ପ କହିଛନ୍ତି ଯେ ଇସ୍ରାଏଲ ଏବଂ ହମାସ ଆମେରିକା ମଧ୍ୟସ୍ଥତାରେ ହୋଇଥିବା ଶାନ୍ତି ଯୋଜନାର ପ୍ରଥମ ପର୍ଯ୍ୟାୟରେ ସହମତ ହୋଇଛନ୍ତି। ସେ କହିଛନ୍ତି ଯେ ଇସ୍ରାଏଲ ଏବଂ ହମାସ ଶାନ୍ତି ଯୋଜନାର ପ୍ରଥମ ପର୍ଯ୍ୟାୟରେ ସ୍ୱାକ୍ଷର କରିଛନ୍ତି। ଟ୍ରମ୍ପ ଏହାକୁ ଗାଜାରେ ଯୁଦ୍ଧ ଶେଷ କରିବା ଦିଗରେ ଏକ ଐତିହାସିକ ଏବଂ ଅଭୂତପୂର୍ବ ଘଟଣା ଭାବରେ ବର୍ଣ୍ଣନା କରିଛନ୍ତି। ଟ୍ରମ୍ପଙ୍କ ଘୋଷଣା ଗାଜାରେ ଏକ ଉତ୍ସବମୁଖୀ ପରିବେଶ ସୃଷ୍ଟି କରିଛି। ଲୋକମାନେ ଘରୁ ବାହାରକୁ ଆସି ରାସ୍ତା ଉପରେ ସେମାନଙ୍କର ଆନନ୍ଦ ପ୍ରକାଶ କରୁଛନ୍ତି।
ଏହି ଚୁକ୍ତିନାମା ଗାଜାରେ ଯୁଦ୍ଧ ବନ୍ଦ କରିବା ଏବଂ ବନ୍ଧକ ଏବଂ ବନ୍ଦୀମାନଙ୍କୁ ମୁକ୍ତ କରିବା ସୁନିଶ୍ଚିତ କରିବା ପାଇଁ ଉଦ୍ଦିଷ୍ଟ। ହମାସ ଗାଜା ଚୁକ୍ତିନାମାରେ ରାଜି ହୋଇଛି, ଯାହା ଗୁରୁବାର ଇଜିପ୍ଟରେ ସ୍ୱାକ୍ଷରିତ ହେବ। ଏହି ଚୁକ୍ତିନାମାରେ ମାନବିକ ସହାୟତା ପାଇଁ ଗାଜାରେ ପାଞ୍ଚଟି କ୍ରସିଂ ତୁରନ୍ତ ଖୋଲିବା, ଗାଜା ପ୍ରତ୍ୟାହାର ମାନଚିତ୍ରରେ ପରିବର୍ତ୍ତନ ଏବଂ ପ୍ରଥମ ପର୍ଯ୍ୟାୟରେ ୨୦ ଜଣ ଇସ୍ରାଏଲୀ ବନ୍ଦୀଙ୍କୁ ଜୀବିତ ମୁକ୍ତ କରିବା ଅନ୍ତର୍ଭୁକ୍ତ ଅଛି।