ନନ୍ଦିଘୋଷ ବ୍ୟୁରୋ : ପାକିସ୍ତାନ କରୁଛି ଆଣବିକ ବୋମା ପରୀକ୍ଷଣ। ଏହି ବିସ୍ଫୋରକ ବୟାନ ଦେଇଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସେ କହିଛନ୍ତି, ପାକିସ୍ତାନ ସମେତ ଅନେକ ଦେଶ ଆଣବିକ ବୋମା ପରୀକ୍ଷଣ କରୁଛନ୍ତି। ରୁଷିଆ, ଚୀନ, ଉତ୍ତର କୋରିଆ ପରି ଦେଶ ଆଣବିକ ପରୀକ୍ଷଣ କରୁଛନ୍ତି। ଏଥିପାଇଁ ମୃଦୁ ଭୂମିକମ୍ପ ହେଉଛି। ଏ ସଂପର୍କରେ କିନ୍ତୁ ଚୀନ କି ରୁଷିଆ କିଛି କହୁ ନାହାନ୍ତି। ମାଟି ତଳେ କେଉଁଠି ଟେଷ୍ଟ କରାଯାଉଛି, ତାହା ଜଣାପଡୁନି। ଆମେରିକା ବି ଏପରି ଟେଷ୍ଟ କରିବା ଦରକାର ବୋଲି କହିଛନ୍ତି ଟ୍ରମ୍ପ। ଆମେ ଯଦି ଟେଷ୍ଟ କରିବୁ, ତାହା କହିବୁ। ଅନ୍ୟ ଦେଶ ଯେହେତୁ ଆଣବିକ ପରୀକ୍ଷା କରୁଛନ୍ତି, ଆମେରିକା ବି ଏପରି କରିବ ବୋଲି କହିଛନ୍ତି ଟ୍ରମ୍ପ। କିଛି ତିନ ତଳେ ରୁଷିଆ ଆଣବିକ ଶକ୍ତି ସଂପନ୍ନ ମିସାଇଲ ଟେଷ୍ଟ କରିଥିଲା। ଏହା ପରେ ସାରା ବିଶ୍ଵରେ ପୁଣି ଥରେ ଆଣବିକ ଅସ୍ତ୍ର ପ୍ରତିଯୋଗିତା ଆରମ୍ଭ ହୋଇଯିବ ବୋଲି ଆଶଙ୍କା ପ୍ରକାଶ ପାଇଛି। ରୁଷିଆର ପରୀକ୍ଷଣ ପରେ ଟ୍ରମ୍ପ କହିଲେଣି ୩୦ ବର୍ଷ ପରେ ପୁଣି ଆମେରିକା ବି ଏପରି ଟେଷ୍ଟ କରିବ। ତେବେ ବିଶ୍ଵରେ ଯେତେ ଆଣବିକ ଅସ୍ତ୍ର ଅଛି, ତାହା ସାରା ବିଶ୍ଵକୁ ଶତାଧିକ ଥର ଧ୍ଵଂସ କରିପାରିବ। ତେଣୁ ବିଶ୍ଵକୁ ଆଣବିକ ନିରସ୍ତ୍ରୀକରଣ ପାଇଁ ମଧ୍ୟ ଆହ୍ଵାନ ଦେଇଛନ୍ତି ଟ୍ରମ୍ପ। ଏ ସଂପର୍କରେ ସେ ରୁଷିଆ ଓ ଚୀନ ରାଷ୍ଟ୍ରପତିଙ୍କ ସହିତ ଆଲୋଚନା କରିଥିବା କହିଛନ୍ତି ଟ୍ରମ୍ପ।
ଆଗରୁ ଭୋଟ ଚୋରି କରି ସରକାର କରିଥିଲେ, ଆଉ ଏବେ ପ୍ରାର୍ଥୀ ଚୋରି କରିଛନ୍ତି : ନବୀନ
ତରବୋଡା(ନୂଆପଡ଼ା ): ଆଜି ନୂଆପଡା ପ୍ରଚାର ମଇଦାନକୁ ଓହ୍ଲାଇ ବିଜେଡି ସୁପ୍ରିମୋ ନବୀନ ପଟ୍ଟନାୟକ ବିଜେପି ସରକାର ଉପରେ ଜୋରଦାର ଆକ୍ରମଣ କରିଛନ୍ତି । ସେ କହିଛନ୍ତି ଯେ, ଆଗରୁ ଭୋଟ ଚୋରି କରି ସରକାର କରିଥିଲେ,ଆଉ ଏବେ ପ୍ରାର୍ଥୀ ଚୋରି କରିଛନ୍ତି ।ବିଜେପି ସରକାର ପବ୍ଲିସିଟିରେ ହିରୋ, କାମରେ ଜିରୋ ।
କୋମନା ତରବୋଡାରେ ନୂଆପଡାବାସୀଙ୍କୁ ନବୀନ ସମ୍ବୋଧନ କରି ଏଭଳି ଜୋରଦାର ଆକ୍ରମଣ କରିଛନ୍ତି । ଜୟ ମା’ ମାଣିକେଶ୍ଵରୀ ସମ୍ବୋଧନ ସହ ଆରମ୍ଭ ହୋଇଥିଲା ନବୀନଙ୍କ ଆକ୍ରମଣ ।ସେ କହିଥିଲେ, ନୂଆପଡ଼ା ଆସିଲେ ବିଜୁବାବୁଙ୍କ କଥା ମନେପଡ଼େ । ବିଜୁବାବୁ ହିଁ ନୂଆପଡ଼ା ଜିଲ୍ଲା ଗଢ଼ିଥିଲେ । ବିଜେଡି ସରକାରରେ ନୂଆପଡ଼ାର ବିକାଶ ଯୋଡ଼ି ହୋଇଥିଲା । ଆମ ସରକାର ସମୟରେ ବିଜୁ ଏକ୍ସପ୍ରେସ ୱେ ହୋଇଥିଲା । ୧୦ ହଜାରରୁ ଅଧିକ ହେକ୍ଟର ଜମି ଜଳସେଚିତ ହୋଇଥିଲା । ଲୋକଙ୍କ ଲାଗି ବିଶୁଦ୍ଧ ପାନୀୟ ଜଳ ବ୍ୟବସ୍ଥା ହୋଇଥିଲା । ପିଲାଙ୍କ ପାଠପଢ଼ା ଲାଗି ଭଲ ସ୍କୁଲ ନିର୍ମାଣ ହେବା ସହ ଆଦିବାସୀ ଭାଇ ଓ ଭଉଣୀଙ୍କୁ ଜଙ୍ଗଲ ଜମି ଅଧିକାର ମିଳିଥିଲା । ମିଶନ ଶକ୍ତି ମହିଳାଙ୍କୁ ଋଣ ପ୍ରଦାନ କରାଯାଇଥିଲା ।
ବିଜେପିକୁ ଆକ୍ରମଣ କରି ସେ କହିଥିଲେ ଯେ, ଆଗରୁ ଭୋଟ ଚୋରି କରି ସରକାର କରିଥିଲେ,ଆଉ ଏବେ ପ୍ରାର୍ଥୀ ଚୋରି କରିଛନ୍ତି ।ବିଜେପି ସରକାର ପବ୍ଲିସିଟିରେ ହିରୋ, କାମରେ ଜିରୋ । ବିଜେପି ସରକାରରେ ବିକାଶ କିଛି ନାହିଁ । ଏହା ସହ ସେ ବିଜେପିକୁ ଅନେକ ପ୍ରଶ୍ନ ପଚାରିଥିଲେ ।
ନବୀନଙ୍କ ପ୍ରଶ୍ନ ମଧ୍ୟରେ ପ୍ରମ୍ମୁଖ ଥିଲା :
-୩ ଶହ ୟୁନିଟ ମାଗଣା ବିଜୁଳି କୁଆଡ଼େ ଗଲା ?
-ସବୁ ବରିଷ୍ଠ ନାଗରିକଙ୍କୁ ୩,୫୦୦ ଟଙ୍କାର ପେନସନ ମିଳୁଛି କି ?
-କଟନୀ ଛଟନୀ ବନ୍ଦ ହେଲା କି ?
-ଗାଁ ଗାଁରେ କେତେ ଯୁବକ ଚାକିରି ପାଇଛନ୍ତି ?
-ମିଶନ ଶକ୍ତି ମାଆମାନଙ୍କୁ ଋଣ ମିଳୁଛି କି ?
-BSKY ଭଲ ଥିଲା ନା ଆୟୁଷ୍ମାନ ?
– ଆଇନଶୃଙ୍ଖଳା ପରିସ୍ଥିତ କଥା ନକହିବା ଭଲ ?
-ରାଜ୍ୟରେ କେତେ ସୁରକ୍ଷିତ ମହିଳା
-ସମସ୍ତ ଚାଷୀ ଭାଇଙ୍କୁ ସାର ମିଳିଛି କି ?
ଶେଷରେ ସେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ଶଙ୍ଖ ଚିହ୍ନରେ ଭୋଟ ଦେବା ପାଇଁ ନିବେଦନ କରି କହିଥିଲେ ଯେ, ଆପଣ ମାନେ ବିଜୁ ଜନତା ଦଳକୁ ଆଶୀର୍ବାଦ କରନ୍ତୁ । ମାଆ ମାନଙ୍କୁ ମୋର ଗୁହାରୀ, ମୋତେ ଆଶୀର୍ବାଦ କରନ୍ତୁ । ଶେଷ ଜୀବନ ଯାଏଁ ମୁଁ ଓଡ଼ିଶା ମାଆର ସେବା ଜାରି ରଖିବି ।
#ବିଜେପି_ସରକାରରେ_ବିକାଶ_କିଛି_ନାହିଁ
ବିଜେପି ସରକାର ପବ୍ଲିସିଟିରେ ହିରୋ, କାମରେ ଜିରୋ । ବିଜେପି ସରକାରରେ ବିକାଶ କିଛି ନାହିଁ । ବିଜେପି ସରକାର ବେଇମାନିର ଉତ୍ତର ଭୋଟର ଦେବେ : ନବୀନ ପଟ୍ଟନାୟକ#NaveenPatnaik #nuapadabyelection #NuapadaBypoll #BJD #Odisha #NandighoshaTV pic.twitter.com/endzg84Kjb— NandighoshaTV (@NandighoshaTV) November 3, 2025
ଚଳନ୍ତା ଟ୍ରେନରେ ବିଶାଳ ଅଜଗର ସାପ
ନନ୍ଦିଘୋଷ ବ୍ୟୁରୋ : ଚଳନ୍ତା ଟ୍ରେନରେ ବିଶାଳ ଅଜଗର ସାପ । ଚେନ୍ନାଇ-ହାୱଡା ମେଲ ଟ୍ରେନରେ ଦେଖିବାକୁ ମିଳିଛି ଏହି ସାପ । ଟ୍ରେନର ଅଗ୍ନି ନିର୍ବାପକ ସିଲିଣ୍ଡର ରଖାଯାଇଥିବା ସ୍ଥାନରେ ସାପଟି ଚଢୁଥିବାର ଦେଖିବାକୁ ପାଇଥିଲେ ଯାତ୍ରୀ । ଫଳରେ ଟ୍ରେନରେ ଆତଙ୍କ ସୃଷ୍ଟି ହୋଇଯାଇଥିଲା । ତୁରନ୍ତ ଟ୍ରେନର ଇମରଜେନ୍ସି ଚେନକୁ ଟାଣି ଟ୍ରେନକୁ ରଖାଯାଇଥିଲା । ଆରପିଏଫ ଏବଂ ବନବିଭାଗର କର୍ମଚାରୀ ପହଞ୍ଚି ସାପଟିକୁ ଉଦ୍ଧାର କରିଛନ୍ତି । ପ୍ରାୟ ଅଧ ଘଣ୍ଟାର ପରିଶ୍ରମ ପରେ ସାପକୁ ଉଦ୍ଧାର କରାଯାଇଛି । ସାପଟିର ଲମ୍ବ ପ୍ରାୟ ୧୦ ଫୁଟ ହେବ । ସାପକୁ ଉଦ୍ଧାର କରାଯିବା ପରେ ଜଙ୍ଗଲରେ ଛଡାଯାଇଛି । ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।…
#ଚଳନ୍ତା_ଟ୍ରେନରେ_ପଶିଲା_ଅଜଗର
ଚଳନ୍ତା ଟ୍ରେନରେ ବିଶାଳ ଅଜଗର ସାପ । ଚେନ୍ନାଇ-ହାୱଡା ମେଲ ଟ୍ରେନର ଦେଖିବାକୁ ମିଳିଥିଲା ସାପ । ଟ୍ରେନର ଅଗ୍ନି ନିର୍ବାପକ ସିଲିଣ୍ଡର ରଖାଯାଇଥିବା ସ୍ଥାନରେ ସାପଟି ଚଢୁଥିବାର ଦେଖିବାକୁ ପାଇଥିଲେ ଯାତ୍ରୀ । ଫଳରେ ଟ୍ରେନରେ ଆତଙ୍କ ସୃଷ୍ଟି ହୋଇଯାଇଥିଲା ।#snakevideo #train… pic.twitter.com/nXry9rpDCM— NandighoshaTV (@NandighoshaTV) November 3, 2025
ବିଶ୍ୱକପ୍ ଜିତିବା ପରେ ହରମନପ୍ରୀତ କୌର କାହାକୁ କ୍ଷମା ମାଗିଥିଲେ?
ନନ୍ଦିଘୋଷ ବ୍ୟୁରୋ : ଭାରତୀୟ ମହିଳା ଦଳ ବିଶ୍ବକପ ବିଜେତା ହୋଇଛନ୍ତି । ଏହି ସ୍ୱପ୍ନ ଶେଷରେ ନଭେମ୍ବର ୨ ତାରିଖରେ ନଭି ମୁମ୍ବାଇର ଡିୱାଇ ପାଟିଲ ଷ୍ଟାଡିୟମରେ ସାକାର ହେଲା। ଫାଇନାଲରେ ଦକ୍ଷିଣ ଆଫ୍ରିକାକୁ ପରାସ୍ତ କରିବା ପରେ, ଟିମ୍ ଇଣ୍ଡିଆର ଖେଳାଳିମାନେ ସେଲିବ୍ରେସନ କଲେ । ଏଥିରେ ପୂର୍ବତନ ଭାରତୀୟ ମହିଳା ଖେଳାଳିମାନଙ୍କୁ ମଧ୍ୟ ସାମିଲ କରିଥିଲେ। ଅଧିନାୟକ ହରମନପ୍ରୀତ କୌର ସେମାନଙ୍କୁ ଟ୍ରଫି ପ୍ରଦାନ କରି କହିଥିଲେ, “ଦିଦି, ଏହା ତୁମ ପାଇଁ ଥିଲା।” ଭାରତୀୟ ଅଧିନାୟକ ସମାରୋହ ସମୟରେ କାହାକୁ କ୍ଷମା ମଧ୍ୟ ମାଗିଥିଲେ। ଭିଡିଓଟି ସୋସିଆଲ ମିଡିଆରେ ଭାଇରାଲ ହେଉଛି।
ICC ଅଧ୍ୟକ୍ଷ ଜୟ ଶାହଙ୍କଠାରୁ ଟ୍ରଫି ଗ୍ରହଣ କରିବା ପରେ, ଅଧିନାୟକ ହରମନପ୍ରୀତ କୌର ପ୍ରଥମେ ତାଙ୍କ ସାଥୀ ଖେଳାଳିଙ୍କ ସହ ଉତ୍ସବ ପାଳନ କରିଥିଲେ। ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେଉଛି । ଯେଉଁଥିରେ ଭାରତୀୟ ଅଧିନାୟକ ଏବଂ ସାଥୀ ଖେଳାଳିମାନେ ପୂର୍ବତନ ଭାରତୀୟ ଖେଳାଳି ଅଞ୍ଜୁମ ଚୋପ୍ରା, ମିତାଲି ରାଜ ଏବଂ ଝୁଲଣ ଗୋସ୍ୱାମୀଙ୍କୁ ବିଶ୍ୱକପ୍ ଟ୍ରଫି ପ୍ରଦାନ କରୁଥିବାର ଦେଖାଯାଉଛି। ଏହା ଅଭିଜ୍ଞ ଖେଳାଳିଙ୍କୁ ଭାବପ୍ରବଣ କରିଦେଇଛି।
ସମସ୍ତ ଖେଳାଳିମାନେ ପର୍ବତନ ଖେଳାଳିମାନଙ୍କୁ ଆଲିଙ୍ଗନ କରିବା ସମୟ ଏକ ସ୍ମରଣୀୟ ମୁହୂର୍ତ୍ତ ଥିଲା। ହରମନପ୍ରୀତ କୌର କହିଥିଲେ, ଦିଦି, ଏହା ତୁମ ପାଇଁ ଥିଲା। ହରମନପ୍ରୀତ କୌର ଏବଂ ସ୍ମୃତି ମନ୍ଧାନା ଝୁଲନ ଗୋସ୍ୱାମୀଙ୍କୁ କହିଥିଲେ, ଗତ ଥର ତୁମ ପାଇଁ ବିଶ୍ୱକପ୍ ଜିତିପାରି ନ ଥିବାରୁ ମୁଁ କ୍ଷମା ପ୍ରାର୍ଥନା କରୁଛି। ମ୍ୟାଚ୍ ସମୟରେ ସମସ୍ତ ଖେଳାଳି ଭାବପ୍ରବଣ ହୋଇଯାଇଥିଲେ। ଝୁଲନ ଗୋସ୍ୱାମୀ ସୋସିଆଲ ମିଡିଆରେ ତାଙ୍କର ଭାବନା ପ୍ରକାଶ କରିଥିଲେ।
ଭାରତୀୟ ମହିଳା ଦଳ ଟାଇଟଲ ଜିତିବା ପରେ ପୂର୍ବତନ ଭାରତୀୟ ମହିଳା ଦଳର କିମ୍ବଦନ୍ତୀ ଝୁଲଣ ଗୋସ୍ୱାମୀ ଭାବପ୍ରବଣ ହୋଇଯାଇଥିଲେ। ସେ ସୋସିଆଲ ମିଡିଆରେ ଲେଖିଛନ୍ତି, “ଏହା ମୋର ସ୍ୱପ୍ନ ଥିଲା, ଏବଂ ତୁମେ ଏହାକୁ ସାକାର କରିଦେଲ। ଶଫାଲି ବର୍ମାଙ୍କ ୭୦ ରନ ଏବଂ ଦୁଇଟି ବଡ଼ ୱିକେଟ୍, ଦୀପ୍ତି ଶର୍ମାଙ୍କ ଅର୍ଦ୍ଧଶତକ ଏବଂ ପାଞ୍ଚଟି ୱିକେଟ୍… ଉଭୟ ଚମତ୍କାର। ଟ୍ରଫି ଏବେ ଆମର।”
ପୂର୍ବତନ ଭାରତୀୟ ଅଧିନାୟକ ମିତାଲି ରାଜ ଇନଷ୍ଟାଗ୍ରାମରେ ଲେଖିଛନ୍ତି, ଦୁଇ ଦଶନ୍ଧିରୁ ଅଧିକ ସମୟ ଧରି ମୁଁ ଭାରତୀୟ ମହିଳାମାନଙ୍କୁ ବିଶ୍ୱକପ୍ ଟ୍ରଫି ଉଠାଇବାର ସ୍ୱପ୍ନ ଦେଖିଥିଲି। ଆଜି ରାତିରେ, ସେହି ସ୍ୱପ୍ନ ଶେଷରେ ସତ ହୋଇଛି। ୨୦୦୫ର ହୃଦୟ ବିଦାରକ ଘଟଣାରୁ ୨୦୧୭ର ସଂଘର୍ଷ ପର୍ଯ୍ୟନ୍ତ, ପ୍ରତ୍ୟେକ ଲୁହ, ପ୍ରତ୍ୟେକ ବଳିଦାନ, ପ୍ରତ୍ୟେକ ଯୁବତୀ ଯେଉଁମାନେ ବ୍ୟାଟ୍ ଉଠାଇଥିଲେ । ବିଶ୍ୱାସ କରୁଥିଲେ ଯେ ଆମେ ଏଠାରେ ଅଛୁ, ଏସବୁ ଏହି ମୁହୂର୍ତ୍ତକୁ ନେଇଗଲା। ବିଶ୍ୱ କ୍ରିକେଟର ନୂତନ ଚାମ୍ପିଅନମାନେ, ତୁମେ କେବଳ ଏକ ଟ୍ରଫି ଜିତିନାହଁ, ତୁମେ ଭାରତୀୟ ମହିଳା କ୍ରିକେଟ ପାଇଁ ସ୍ପନ୍ଦିତ ହେଉଥିବା ପ୍ରତ୍ୟେକ ହୃଦୟକୁ ଜିତିଛ। ଜୟ ହିନ୍ଦ।
ଅଞ୍ଜୁମ ଚୋପ୍ରା କହିଛନ୍ତି ଯେ ଝିଅମାନେ ଆମର ସ୍ୱପ୍ନକୁ ସାକାର କରିଛନ୍ତି ଏବଂ ଆମେ ଏକ ସୁନ୍ଦର ନୂତନ ଯୁଗର ଅପେକ୍ଷାରେ ଅଛୁ।
ଅମନଜୋତ କୌରଙ୍କ କ୍ୟାଚ୍ ନଥିଲା, ଏହା ବିଶ୍ୱକପ୍ ଥିଲା…
ନନ୍ଦିଘୋଷ ବ୍ୟୁରୋ : ମହିଳା ବିଶ୍ବକପ ଫାଇନାଲ ମ୍ୟାଚରେ ଯେତେବେଳେ ଭାରତୀୟ ଅଲରାଉଣ୍ଡର ଅମନଜୋତ କୌର ଏକ ଅବିସ୍ମରଣୀୟ କ୍ୟାଚ୍ ନେଇଥିଲେ । ଏହି କ୍ୟାଚ୍ ଫାଇନାଲ୍ ମ୍ୟାଚର ଗତି ବଦଳାଇ ଦେଇଥିଲା । ଏହାକୁ ଦେଖି, ଏହା ଏକ କ୍ୟାଚ୍ ନୁହେଁ, ବରଂ ବିଶ୍ୱକପ୍ ଥିଲା ବୋଲି ବୁଝିବା କିମ୍ବା ଗ୍ରହଣ କରିବାରେ କୌଣସି ଦ୍ୱିଧା ନଥିଲା। ଏହା ପରେ, ଫାଇନାଲ୍ ମ୍ୟାଚ୍ ଦୃଢ଼ ଭାବରେ ଭାରତର କବଜାରେ ଥିଲା।
ଭାରତୀୟ ଅଲରାଉଣ୍ଡର ଅମନଜୋତ କୌର ଦକ୍ଷିଣ ଆଫ୍ରିକାର ଅଧିନାୟିକା ଓ ବ୍ୟାଟ୍ସମ୍ୟାନ୍ ଲୌରା ୱଲଭାର୍ଟଙ୍କ ସେହି କ୍ୟାଚ୍ ନେଇଥିଲେ। ସେମିଫାଇନାଲରେ ଇଂଲଣ୍ଡ ବିପକ୍ଷରେ ୱଲଭାର୍ଟ ଯେଉଁ ସଫଳତା ହାସଲ କରି ତାଙ୍କ ଦଳକୁ ଫାଇନାଲରେ ସ୍ଥାନ ପକ୍କା କରିଥିଲେ । ସେହି ସମାନ ସଫଳତାକୁ ସେ ବର୍ତ୍ତମାନ ଭାରତ ବିପକ୍ଷରେ ଫାଇନାଲ ଜିତିବା ପାଇଁ ବ୍ୟବହାର କରୁଥିଲେ। ସେମିଫାଇନାଲରେ ଶତକ ହାସଲ କରିବା ପରେ, ୱଲଭାର୍ଟ ଫାଇନାଲରେ ମଧ୍ୟ ଶତକ ହାସଲ କରିଥିଲେ। ଯଦି ଭାରତ ଚାମ୍ପିଅନ୍ ହେବାକୁ ଚାହୁଁଥିଲା, ତେବେ ୱଲଭାର୍ଟଙ୍କୁ ଆଉଟ୍ କରିବା ଜରୁରୀ ଥିଲା।
ଗୋଟିଏ ପଟେ, ୱଲଭାର୍ଟ ତାଙ୍କ ଦଳକୁ ବିଜୟ ଆଡ଼କୁ ନେଇଯିବା ପାଇଁ ଦୃଢ଼ ସଂକଳ୍ପବଦ୍ଧ ଥିଲେ, ଅନ୍ୟପଟେ, ଭାରତୀୟ ଦଳ ତାଙ୍କୁ ଆଉଟ୍ କରିବା ପାଇଁ ଏକ ଉପାୟ ଖୋଜୁଥିଲା। ଶେଷରେ, ଦକ୍ଷିଣ ଆଫ୍ରିକା ଇନିଂସର ୪୨ତମ ଓଭରରେ ସୁଯୋଗ ଆସିଲା। ୱଲଭାର୍ଟ ଦୀପ୍ତି ଶର୍ମାଙ୍କ ଓଭରର ପ୍ରଥମ ବଲରେ ଏକ ବଡ଼ ସଟ୍ ମାରିବା ପାଇଁ ଚେଷ୍ଟା କରିଥିଲେ, ଯାହା ଭାରତ ପାଇଁ ଏକ ସୁଯୋଗ ସୃଷ୍ଟି କରିଥିଲା।
ଅମନଜୋତ କୌର ଯେତେବେଳେ ବଲକୁ କ୍ୟାଚ କରିବାକୁ ଚେଷ୍ଟା କଲେ, ସେତେବେଳେ ବଲ୍ ଟି ଥରେ ନୁହେଁ ବରଂ ଦୁଇଥର ଅମନଜୋତଙ୍କ ହାତରୁ ଖସିଗଲା। କିନ୍ତୁ ଭୂମିରେ ପଡ଼ିବା ପୂର୍ବରୁ ସେ ଏହାକୁ ଧରି ପକାଇଲେ। ଏହି କ୍ୟାଚ୍ ୧୦୧ ରନ୍ ରେ ଖେଳୁଥିବା ଲୌରା ୱଲଭାର୍ଟଙ୍କ ଇନିଂସର ଅନ୍ତ ଘଟାଇ ଦେଇଥିଲା । ଭାରତୀୟ ମହିଳା କ୍ରିକେଟ୍ ଦଳର ବିଶ୍ୱକପ୍ ବିଜୟ ପାଇଁ ଅପେକ୍ଷାର ଅନ୍ତ ହେବାର ସମ୍ଭାବନା ମଧ୍ୟ ବୃଦ୍ଧି କରିଥିଲା।
Amanjot Kaur gave every Indian fan a mini heart attack but finally held on to the catch on her third attempt! 😟#INDvSA #CWC25 pic.twitter.com/y7uVIAaPUT
— ICC Asia Cricket (@ICCAsiaCricket) November 2, 2025
୨୦୨୫ ମହିଳା ଦିନିକିଆ ବିଶ୍ୱକପରେ ଅମନଜୋତ କୌରଙ୍କ କ୍ୟାଚ୍ ୧୯୮୩ ପୁରୁଷ ଦିନିକିଆ ବିଶ୍ୱକପରେ ଭିଭ ରିଚାର୍ଡସଙ୍କ ବିପକ୍ଷରେ କପିଲ ଦେବ ଏବଂ ୨୦୨୪ ପୁରୁଷ ଟି୨୦ ବିଶ୍ୱକପରେ ଡେଭିଡ ମିଲରଙ୍କ ବିପକ୍ଷରେ ସୂର୍ଯ୍ୟକୁମାର ଯାଦବଙ୍କ ବିପକ୍ଷରେ ନେଇଥିବା କ୍ୟାଚ୍ ସହିତ ସମାନ ଥିଲା। କପିଲଙ୍କ ଏହି କ୍ୟାଚ୍ ପୁରୁଷ ଦିନିକିଆ ବିଶ୍ୱକପରେ ଭାରତର ଟାଇଟଲ ବିଜୟର ଅପେକ୍ଷାର ଅନ୍ତ ଘଟାଇଥିଲା। ସୂର୍ଯ୍ୟକୁମାର ଯାଦବଙ୍କ ଏହି କ୍ୟାଚ୍ ଭାରତର ଆଇସିସି ଟ୍ରଫି ପାଇଁ ୧୧ ବର୍ଷର ଅପେକ୍ଷାର ଅନ୍ତ ଘଟାଇଥିଲା । ଏବେ, ଅମନଜୋତଙ୍କ ଏହି କ୍ୟାଚ୍ ପାଇଁ, ଭାରତୀୟ ମହିଳା କ୍ରିକେଟ ଦଳର ଦିନିକିଆ ବିଶ୍ୱକପ୍ ବିଜୟର ଅପେକ୍ଷାର ଅନ୍ତ ଘଟିଛି।
ବୁଡ଼ ପକାଇବାକୁ ଯାଇ ଦୁଇ ମୃତ
ଦିଗପହଣ୍ଡି : ବୁଡ଼ ପକାଇବାକୁ ଯାଇ ଦୁଇ ମହିଳା ମୃତ । ପଞ୍ଚୁକ ବୁଡ଼ ପାଇଁ ନଦୀକୁ ଯାଇଥିବା ବେଳେ ନଦୀରେ ଭାସିଯାଇ ୨ ମହିଳାଙ୍କ ମୃତ୍ୟୁ ହୋଇଛି। ମୃତକ ହେଲେ ସବିତା ଗୌଡ଼ ଓ ଲଳିତ ପାଢ଼ୀ । ଦିଗପହଣ୍ଡି ଖମାରିଗାଁ ପଞ୍ଚାୟତ ସେବକ ଟିକରପଡା ଅଞ୍ଚଳର ଘଟଣା। ଘୋଡ଼ାହାଡ଼ ନଦୀରେ ବୁଡ଼ ପକାଉ ଥିବା ବେଳେ ଭାସି ଯାଇଥିଲେ ମହିଳା ।
ଖବର ପାଇ ଦିଗପହଣ୍ଡି ଅଗ୍ନିଶମ ବାହିନୀ ପହଞ୍ଚି ନଦୀରୁ ଉଦ୍ଧାର କରିଥିଲେ । ଦିଗପହଣ୍ଡି ହସ୍ପିଟାଲରେ ମୃତ ଘୋଷଣା କରିଛନ୍ତି ଡାକ୍ତର। ରାତି ତିନିଟାରେ ବୁଡ଼ ପାଇଁ ୪୦ଜଣ ମହିଳା ନଦୀକୁ ଯାଇଥିବା ବେଳେ ନଦୀ ଗଣ୍ଡରେ ଭାସି ଯାଇଥିଲେ । ଘଟଣାକୁ ନେଇ ଟିକରପଡ଼ା ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ତେଲେଙ୍ଗାନାରେ ଭୟଙ୍କର ଦୁର୍ଘଟଣା, ୨୦ ମୃତ
ନନ୍ଦିଘୋଷ ବ୍ୟୁରୋ : ତେଲେଙ୍ଗାନାର ରଙ୍ଗାରେଡ୍ଡି ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣା । ୨୦ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ରଙ୍ଗାରେଡ୍ଡି ଜିଲ୍ଲାର ଚେଭେଲା ମଣ୍ଡଳ ଅଞ୍ଚଳର ମିର୍ଜାଗୁଡ଼ା ନିକଟରେ ଏହି ଦୁର୍ଘଟଣା ଘଟିଛି। ହାଇଦ୍ରାବାଦ-ବିଜାପୁର ରାଜପଥରେ ଏକ ଦ୍ରୁତଗାମୀ ଟିପ୍ପର ଏକ ଯାତ୍ରୀବାହୀ ବସ୍ ସହିତ ଧକ୍କା ଦେଇଥିଲା। ଧକ୍କା ଏତେ ଜୋରରେ ଥିଲା ଯେ ଟିପ୍ପରଟି ଓଲଟି ପଡ଼ି ବସ୍ ଉପରେ ପଡ଼ିଗଲା, ଟ୍ରକରେ ବୋଝେଇ ପଥର ତଳେ ଅନେକ ଯାତ୍ରୀ ଫସି ଯାଇଥିଲେ।
ଘଟଣା ପରେ ସ୍ଥାନୀୟ ଲୋକମାନେ ଘଟଣାସ୍ଥଳରେ ପହଞ୍ଚି ଯାତ୍ରୀମାନଙ୍କୁ ଉଦ୍ଧାର କରିବାରେ ସାହାଯ୍ୟ କରିଥିଲେ। ପୋଲିସ ପହଞ୍ଚି ଆହତମାନଙ୍କୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରିଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ ଟ୍ରକଟି ଦ୍ରୁତ ଗତିରେ ଯାଉଥିଲା। ହଠାତ୍ ମୋଡ଼ ନେବା ସମୟରେ ଡ୍ରାଇଭର ନିୟନ୍ତ୍ରଣ ହରାଇବାରୁ ଦୁର୍ଘଟଣା ଘଟିଥିଲା।
ଦୁର୍ଘଟଣାଗ୍ରସ୍ତ ବସଟି ତନ୍ଦୁର ଡିପୋର ଥିଲା । ଏଥିରେ ପ୍ରାୟ ୪୦ ଜଣ ଯାତ୍ରୀ ଥିଲେ। ଦୁର୍ଘଟଣା ଯୋଗୁଁ ଚେଭେଲା ଏବଂ ଭିକାରାବାଦ ମଧ୍ୟରେ ଯାତାୟାତ ବାଧାପ୍ରାପ୍ତ ହୋଇଥିଲା। ଆହତମାନଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ରହିଛି। ମୃତକଙ୍କ ସଂଖ୍ୟା ବୃଦ୍ଧି ପାଇପାରେ ବୋଲି ଅଧିକାରୀମାନେ ଆଶଙ୍କା କରୁଛନ୍ତି।
ଟ୍ରେଲରକୁ ଧକ୍କା ଦେଲା ବସ୍, ୧୫ ମୃତ
ନନ୍ଦିଘୋଷ ବ୍ୟୁରୋ : ଟ୍ରେଲରକୁ ଧକ୍କା ଦେଲା ବସ । ୧୫ ଜଣଙ୍କ ମୃତ୍ୟୁ ହୋଇଛନ୍ତି । ରାଜସ୍ଥାନର ଯୋଧପୁରରେ ଏହି ସଡ଼କ ଦୁର୍ଘଟଣା ଘଟିଛି । ଅନ୍ୟ ଦୁଇଜଣ ଗୁରୁତର ଆହତ ହୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ରାସ୍ତା କଡ଼ରେ ଛିଡ଼ା ହୋଇଥିବା ଏକ ଟ୍ରେଲର ସହିତ ଏକ ଯାତ୍ରା ବସ୍ ଧକ୍କା ହେବା ଫଳରେ ଏହି ଦୁର୍ଘଟଣା ଘଟିଥିଲା। ଧକ୍କା ଏତେ ଜୋରଦାର ଥିଲା ଯେ ଯାତ୍ରା ବସ୍ର ଆଗ ଭାଗ ପୂରା ଭାଙ୍ଗି ଯାଇଛି ।
ଭାରତମାଳା ଏକ୍ସପ୍ରେସୱେରେ ଯୋଧପୁରର ବାପିନି ଉପଖଣ୍ଡର ମାଟୋଡା ଗାଁ ନିକଟରେ ଏହି ଘଟଣା ଘଟିଛି । ସମସ୍ତ ମୃତକ ଯୋଧପୁରର ଚାନ୍ଦପୋଲ ବଡ଼ ରାମଦେବରା ନିକଟସ୍ଥ ନୈଞ୍ଚି ବାଗର ବାସିନ୍ଦା। ସେମାନେ ଏକାଦଶୀ ଅବସରରେ ପୂଜାର୍ଚ୍ଚନା କରି ଫେରୁଥିଲେ। ଯୋଧପୁର ପହଞ୍ଚିବା ପୂର୍ବରୁ ପ୍ରାୟ ୮୦ କିଲୋମିଟର ପୂର୍ବରୁ ଦୁର୍ଘଟଣା ଘଟିଥିଲା।
ଅନିଲ ଅମ୍ବାନୀଙ୍କ ବିରୋଧରେ EDର ବଡ଼ କାର୍ଯ୍ୟାନୁଷ୍ଠାନ, ୩୦୦୦ କୋଟି ଟଙ୍କାରୁ ଅଧିକ ମୂଲ୍ୟର ସମ୍ପତ୍ତି ଜବତ..
ନନ୍ଦିଘୋଷ ବ୍ୟୁରୋ : ଶିଳ୍ପପତି ଅନିଲ ଅମ୍ବାନୀଙ୍କ ରିଲାଏନ୍ସ ଗ୍ରୁପ୍ ସହିତ ଜଡିତ ସମ୍ପତ୍ତି ବିରୁଦ୍ଧରେ ପ୍ରବର୍ତ୍ତନ ନିର୍ଦ୍ଦେଶାଳୟ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ୩୦୮୪ କୋଟିରୁ ଅଧିକ ମୂଲ୍ୟର ସମ୍ପତ୍ତିକୁ ଅସ୍ଥାୟୀ ଭାବରେ ଆଟାଚ୍ କରାଯାଇଛି। ED ୩୧ ଅକ୍ଟୋବର, ୨୦୨୫ରେ ପିଏମଏଲଏ ଅଧୀନରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।
ଜବତ ହୋଇଥିବା ସମ୍ପତ୍ତିର ତାଲିକାରେ ମୁମ୍ବାଇର ବାନ୍ଦ୍ରାରେ ଥିବା ତାଙ୍କର ଆରାମଦାୟକ ପାଲି ହିଲ୍ ବାସଭବନ ଓ ଦିଲ୍ଲୀର ପ୍ରମୁଖ ରିଲାଏନ୍ସ ସେଣ୍ଟର ଅନ୍ତର୍ଭୁକ୍ତ। ଏହା ସହିତ, ଦିଲ୍ଲୀ, ନୋଏଡା, ଗାଜିଆବାଦ, ମୁମ୍ବାଇ, ପୁଣେ, ଥାଣେ, ହାଇଦ୍ରାବାଦ, ଚେନ୍ନାଇ, କାଞ୍ଚିପୁରମ ଓ ପୂର୍ବ ଗୋଦାବରୀ ଭଳି ପ୍ରମୁଖ ସହରରେ ଅବସ୍ଥିତ ଅନେକ ଜମି, କାର୍ଯ୍ୟାଳୟ ଏବଂ ଫ୍ଲାଟକୁ ମଧ୍ୟ ଆଟାଚ୍ କରାଯାଇଛି। ମୋଟ ଉପରେ, ଅନିଲ ଅମ୍ବାନୀ ଗ୍ରୁପର ୪୦ରୁ ଅଧିକ ସମ୍ପତ୍ତି ବିରୁଦ୍ଧରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି।
ଇଡିର ତଦନ୍ତ ଦୁଇଟି ରିଲାଏନ୍ସ ଗ୍ରୁପ୍ ଆର୍ଥିକ କମ୍ପାନୀ – ରିଲାଏନ୍ସ ହୋମ୍ ଫାଇନାନ୍ସ ଲିମିଟେଡ୍ ଓ ରିଲାଏନ୍ସ କମର୍ସିଆଲ୍ ଫାଇନାନ୍ସ ଲିମିଟେଡ୍ ଉପରେ କେନ୍ଦ୍ରିତ। ତଦନ୍ତ ଅନୁଯାୟୀ, ଏହି କମ୍ପାନୀଗୁଡ଼ିକ ଜନସାଧାରଣ ଏବଂ ବ୍ୟାଙ୍କଗୁଡ଼ିକରୁ ପ୍ରାପ୍ତ ପାଣ୍ଠିର ଅପବ୍ୟବହାର କରିଥିବା ଅଭିଯୋଗ ହୋଇଛି। ଏହି ମାମଲାଟି ୨୦୧୭ ଏବଂ ୨୦୧୯ ମସିହାର। ଏହି ସମୟ ମଧ୍ୟରେ, ୟେସ୍ ବ୍ୟାଙ୍କ RHFL ରେ ପ୍ରାୟ ୨୯୬୫ କୋଟି ଏବଂ RCFL ରେ ୨୦୪୫ କୋଟିର ଗୁରୁତ୍ୱପୂର୍ଣ୍ଣ ନିବେଶ କରିଥିଲା। ଏହି ନିବେଶଗୁଡ଼ିକ ପରବର୍ତ୍ତୀ ସମୟରେ ଦେବାଳିଆ ହୋଇଗଲା, ଯାହା ଫଳରେ ଉଭୟ କମ୍ପାନୀ ଉପରେ ହଜାର ହଜାର କୋଟି ଟଙ୍କାର ଋଣ ବାକି ପଡ଼ିଲା।
ତଦନ୍ତରୁ ଏହା ମଧ୍ୟ ଜଣାପଡିଛି ଯେ, ଭାରତୀୟ ପ୍ରତିଭୂତି ଓ ବିନିମୟ ବୋର୍ଡ ନିୟମାବଳୀର ଉଲ୍ଲଂଘନ କରି, ମ୍ୟୁଚୁଆଲ୍ ଫଣ୍ଡ ମାଧ୍ୟମରେ ସଂଗୃହୀତ ସାଧାରଣ ପାଣ୍ଠିକୁ ପରୋକ୍ଷ ଭାବରେ ରିଲାଏନ୍ସ ଗ୍ରୁପର ନିଜସ୍ୱ କମ୍ପାନୀଗୁଡ଼ିକୁ ସ୍ଥାନାନ୍ତର କରାଯାଇଥିଲା। ତା’ପରେ ଏହି ପାଣ୍ଠିକୁ ୟେସ୍ ବ୍ୟାଙ୍କ ମାଧ୍ୟମରେ ଏହି କମ୍ପାନୀଗୁଡ଼ିକରେ ବିନିଯୋଗ କରାଯାଇଥିଲା।
ଏହି ପାଣ୍ଠି ସ୍ଥାନାନ୍ତର ପାଇଁ ଏକ ସୁଚିନ୍ତିତ ଯୋଜନା ପ୍ରସ୍ତୁତ କରାଯାଇଥିଲା ବୋଲି ଇଡି ଅଭିଯୋଗ କରିଛି। ଏଜେନ୍ସି ଅନେକ ଗୁରୁତର ଅନିୟମିତତା ଉଲ୍ଲେଖ କରିଛି।
କର୍ପୋରେଟ୍ ଋଣର ପରିବର୍ତ୍ତନ: କମ୍ପାନୀଗୁଡ଼ିକ ଦ୍ୱାରା ନିଆଯାଇଥିବା କର୍ପୋରେଟ୍ ଋଣକୁ ସେମାନଙ୍କ ନିଜ ଗୋଷ୍ଠୀର ଅନ୍ୟ କମ୍ପାନୀଗୁଡ଼ିକୁ ପଠାଯାଇଥିଲା।
ପ୍ରକ୍ରିୟାର ଉଲ୍ଲଂଘନ: ଅନେକ ଋଣ ଉପଯୁକ୍ତ ଡକ୍ୟୁମେଣ୍ଟେସନ୍, ସମ୍ପୂର୍ଣ୍ଣ ଆବଶ୍ୟକୀୟ ପରୀକ୍ଷା ବିନା ଏବଂ ଗୋଟିଏ ଦିନରେ ଅନୁମୋଦନ କରାଯାଇଥିଲା।
ଅଗ୍ରିମ ଦେୟ: କିଛି ମାମଲା ମଧ୍ୟ ମିଳିଛି ଯେଉଁଠାରେ ଋଣ ମଞ୍ଜୁର ହେବା ପୂର୍ବରୁ ଋଣଗ୍ରହୀତାକୁ ଟଙ୍କା ଦିଆଯାଇଥିଲା।
ଦୁର୍ବଳ ଋଣଗ୍ରହୀତା: ଅନେକ ଋଣଗ୍ରହୀତା ଏପରି କମ୍ପାନୀ ଥିଲେ ଯାହାର ଆର୍ଥିକ ସ୍ଥିତି ପୂର୍ବରୁ ଦୁର୍ବଳ ଥିଲା।
ଉଦ୍ଦେଶ୍ୟରୁ ବିଚ୍ୟୁତି: ଋଣ ଯେଉଁ ଉଦ୍ଦେଶ୍ୟରେ ନିଆଯାଇଥିଲା ତାହା ପାଇଁ ବ୍ୟବହାର କରାଯାଇ ନଥିଲା।
ଇଡି ଦାବି କରିଛି ଯେ ଏହା ଏକ ବଡ଼ ଧରଣର ପାଣ୍ଠି ସ୍ଥାନାନ୍ତର ଥିଲା।
ଏହା ସହିତ, ଇଡି ରିଲାଏନ୍ସ କମ୍ୟୁନିକେସନ୍ସ ମାମଲାରେ ତଦନ୍ତକୁ ଜୋରଦାର କରିଛି। ଏହି ମାମଲାରେ, କମ୍ପାନୀଗୁଡ଼ିକ ଗୋଷ୍ଠୀ କମ୍ପାନୀଗୁଡ଼ିକୁ ବିପୁଳ ପରିମାଣର ଟଙ୍କା ପଠାଇବା ଓ ଠକେଇମୂଳକ ଋଣ ବଜାୟ ରଖିବା ସମେତ ମୋଟ ୧୩୬୦୦ କୋଟିରୁ ଅଧିକ ଟଙ୍କାର ପାଣ୍ଠିକୁ ଅପବ୍ୟବହାର କରିଥିବା ଅଭିଯୋଗ ହୋଇଛି। ଇଡି କହିଛି ଯେ ଏହି କାର୍ଯ୍ୟ ସାଧାରଣ ଜନତା ଏବଂ ଆର୍ଥିକ ପ୍ରତିଷ୍ଠାନର ହୋଇଥିବାରୁ ସାର୍ବଜନୀନ ପାଣ୍ଠି ପୁନରୁଦ୍ଧାରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
ସୁପରମାର୍କେଟରେ ଅଗ୍ନିକାଣ୍ଡ, ୨୩ ମୃତ
ନନ୍ଦିଘୋଷ ବ୍ୟୁରୋ : ଉତ୍ତର-ପଶ୍ଚିମ ମେକ୍ସିକୋର ଏକ ସୁପରମାର୍କେଟରେ ଅଗ୍ନିକାଣ୍ଡ । ଏଥିରେ ୨୩ ଜଣଙ୍କର ମୃତ୍ୟୁ ହେଶିଥିବା ବେଳେ ୧୨ ଜଣ ଆହତ ହୋଇଛନ୍ତି। ସୋନୋରା ରାଜ୍ୟର ରାଜଧାନୀ ହର୍ମୋସିଲୋ ସହରରେ ଶନିବାର ଅଗ୍ନିକାଣ୍ଡ ଘଟିଥିବା ସୋନୋରା ରାଜ୍ୟପାଳ ଆଲଫୋନ୍ସୋ ଡୁରାଜୋ ସୋସିଆଲ ମିଡିଆରେ ପୋଷ୍ଟ କରାଯାଇଥିବା ଏକ ଭିଡିଓରେ କହିଛନ୍ତି।
ସୋନୋରା ପବ୍ଲିକ ପ୍ରସିକ୍ୟୁଟରଙ୍କ କାର୍ଯ୍ୟାଳୟ ଅନୁଯାୟୀ, ଛଅ ଜଣ ଲୋକ ହସ୍ପିଟାଲରେ ଭର୍ତ୍ତି ହୋଇଛନ୍ତି। ସୋନୋରା ଆଟର୍ଣ୍ଣି ଜେନେରାଲ ଗୁସ୍ତାଭୋ ସାଲାସ ଚାଭେଜ୍ କହିଛନ୍ତି ଯେ ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ମୃତ୍ୟୁ ବିଷାକ୍ତ ଗ୍ୟାସ୍ ନିଶ୍ୱାସ ନେବା ଯୋଗୁଁ ହୋଇଛି।
ସୋସିଆଲ ମିଡିଆରେ ପ୍ରସାରିତ ହେଉଥିବା ଫଟୋଗୁଡ଼ିକ ୱାଲଡୋ ଷ୍ଟୋରକୁ ଏକ ବିରାଟ ଅଗ୍ନିକାଣ୍ଡର ଶିକାର ହୋଇଥିବାର ଦେଖାଯାଉଛି। ଏକ ଭିଡିଓରେ ଜଣେ ପୋଡ଼ିଯାଇଥିବା ବ୍ୟକ୍ତି ଦୋକାନର ପ୍ରବେଶ ଦ୍ୱାରରୁ କିଛି ମିଟର ଦୂରରେ ପିଚୁ ଉପରେ ପଡ଼ିଥିବାର ଦେଖାଯାଉଛି। ପବ୍ଲିକ ପ୍ରସିକ୍ୟୁଟରମାନେ କହିଛନ୍ତି ଯେ ସେମାନେ ବିଶ୍ୱାସ କରନ୍ତି ଯେ ନିଆଁ ଏକ ଟ୍ରାନ୍ସଫର୍ମରରୁ ଲାଗିଥିଲା । ଘଟଣାର ତଦନ୍ତ କରାଯାଉଛି ।