ନନ୍ଦିଘୋଷ ବ୍ୟୁରୋ : ପୁରୀ ପୋଲିସର ‘ଅପରେସନ ଚକ୍ର’ ଅଭିଯାନରେ ଜୁଆଡିଙ୍କ ଉପରେ ଚଢ଼ାଉ l ହୋଟେଲ ଶୁଭମ ବିଚରେ ଚଢ଼ାଉ କରି ୬ ଜଣ ଜୁଆଡିଙ୍କୁ ଗିରଫ କରିଛି ସମୁଦ୍ରକୂଳ ଥାନା ପୋଲିସ । ପ୍ରାୟ୯୦ ହଜାର ନଗଦ ଟଙ୍କା ସହ ଖେଳ ସାମଗ୍ରୀ ଜବତ ହୋଇଛି । ନିଜ ଅଞ୍ଚଳରେ ଏଭଳି ଜୁଆ ଖେଳ ଚାଲିଥିବା ଦେଖିଲେ ତୁରନ୍ତ ୧୧୨କୁ କଲ କରନ୍ତୁ ଓ ନିକଟସ୍ଥ ଥାନାରେ ଜଣାଇବାକୁ ପୁରୀ ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି l ଅପରେସନ ଚକ୍ର ଅଭିଯାନରେ ଏଯାଏଁ ପ୍ରାୟ ୮୦ ଜଣ ଜୁଆଡିଙ୍କୁ ଗିରଫ କରିଛି ପୋଲିସ। ସେମାନଙ୍କ ଠାରୁ ୫ ଲକ୍ଷ ୯୧ ହଜାର ଟଙ୍କା ଜବତ କରାଯାଇଛି। ପୁରୀ ଏସ୍ପିଙ୍କ ନିର୍ଦେଶ କ୍ରମେ ଏହି ଅଭିଯାନରେ ଜୁଆ ଖେଳ ଉପରେ ଦୃଢ଼ କାର୍ଯାନୁଷ୍ଠାନ ଜାରି ରହିଛି।
ବିହାର ବିଧାନସଭା ନିର୍ବାଚନ ; ଆଜି ଏନଡିଏରେ ସିଟ ଭାଗବଣ୍ଟା ନେଇ ବିଧିବଦ୍ଧ ଘୋଷଣା
ନନ୍ଦିଘୋଷ ବ୍ୟୁରୋ : ବିହାର ବିଧାନସଭା ନିର୍ବାଚନ। ଏନଡିଏ ଓ ଜେଡିୟୁ ମଧ୍ୟରେ ସିଟ ଭାଗବଣ୍ଟା ପ୍ରାୟ ଚୂଡାନ୍ତ ହୋଇଛି। ଆଜି ଏନଡିଏରେ ସିଟ ଭାଗବଣ୍ଟା ନେଇ ବିଧିବଦ୍ଧ ଘୋଷଣା ହେବ। ମୋଟ ୨୪୩ ଆସନ ମଧ୍ୟରୁ ଜେଡିୟୁକୁ ସର୍ବାଧିକ ୧୦୨ ଆସନ ମିଳିଥିବା ଚର୍ଚା ହେଉଛି। ଦ୍ଵିତୀୟରେ ରହିଛି ବିଜେପି। ବିଜେପିକୁ ଜେଡିୟୁରୁ ଗୋଟିଏ କମ ୧୦୧ ଆସନରେ ଲଢିବ । ଚିରାଗ ପାଶୱାନଙ୍କ ଏଲଜେପିକୁ ୨୫ ଆସନ ଦିଆଯାଇଛି। ସେହିପରି ଜିତନ ରାମ ମାଂଝୀଙ୍କ ହାମକୁ ୮ ଆସନରେ ଲଢିବ। ଉପେନ୍ଦ୍ର କୁଶୱାହଙ୍କ ଦଳ ଆରଏଲଏମକୁ ୭ ଆସନ ଦିଆଯାଇଛି। ଗତକାଲିଠାରୁ ବିହାରରେ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଲାଗି ନାମାଙ୍କନ ପ୍ରକ୍ରିୟା ଆରମ୍ଭ ହୋଇଥିବାବେଳେ ଆଜି ଏନଡିଏ ପକ୍ଷରୁ ହୋଇପାରେ ବିଧିବଦ୍ଧ ଘୋଷଣା। ଜେଡିୟୁ ସର୍ବାଧିକ ସଂଖ୍ୟକ ଆସନରେ ପ୍ରତିଦ୍ୱନ୍ଦ୍ୱିତା କରିବ। ନାମାଙ୍କନ ପ୍ରତ୍ୟାହାରର ଶେଷ ତାରିଖ ଅକ୍ଟୋବର ୨୦ ରହିଛି। ବିଜ୍ଞପ୍ତି ଅନୁଯାୟୀ, ପ୍ରାର୍ଥୀମାନେ ନିର୍ବାଚନର ପ୍ରଥମ ପର୍ଯ୍ୟାୟ ପାଇଁ ଅକ୍ଟୋବର ୧୭ ତାରିଖ ପର୍ଯ୍ୟନ୍ତ ସେମାନଙ୍କର ନାମାଙ୍କନ ପତ୍ର ଦାଖଲ କରିପାରିବେ। ଏବଂ ପରଦିନ ଯାଞ୍ଚ କରାଯିବ। ନାମାଙ୍କନ ପ୍ରତ୍ୟାହାରର ଶେଷ ତାରିଖ ଅକ୍ଟୋବର ୨୦ ତାରିଖ ରହିଛି। ବିହାରରେ ପ୍ରଥମ ପର୍ଯ୍ୟାୟ ମତଦାନ ନଭେମ୍ବର ୬ରେ ଅନୁଷ୍ଠିତ ହେବ। ଏହି ପର୍ଯ୍ୟାୟରେ ୧୨୧ଟି ନିର୍ବାଚନମଣ୍ଡଳୀରେ ମତଦାନ ହେବ। ନିର୍ବାଚନ କମିଶନ ଏଥିପାଇଁ ପ୍ରସ୍ତୁତି ଚୂଡ଼ାନ୍ତ କରୁଛନ୍ତି। ଏହି ପ୍ରଥମ ପର୍ଯ୍ୟାୟରେ ଯେଉଁ ଜିଲ୍ଲାଗୁଡ଼ିକରେ ମତଦାନ ହେବ ସେଗୁଡ଼ିକ ମଧ୍ୟରେ ପାଟନା, ମୁଜାଫରପୁର, ଦରଭଙ୍ଗା, ସହରସା, ମାଧେପୁରା, ଗୋପାଳଗଞ୍ଜ, ସିୱାନ, ସାରଣ, ବୈଶାଳୀ, ସମସ୍ତିପୁର, ବେଗୁସରାଇ, ଲଖିସରାଇ, ମୁଙ୍ଗେର, ଶେଖପୁରା, ନାଳନ୍ଦା, ବକ୍ସର ଏବଂ ଭୋଜପୁର ଅନ୍ତର୍ଭୁକ୍ତ। ବିହାରରେ ଦ୍ୱିତୀୟ ତଥା ଶେଷ ପର୍ଯ୍ୟାୟ ଭୋଟ୍ ନଭେମ୍ବର ୧୧ ତାରିଖରେ ଅନୁଷ୍ଠିତ ହେବ। ଏହି ଦ୍ୱିତୀୟ ପର୍ଯ୍ୟାୟରେ ୧୨୨ଟି ବିଧାନସଭା ଆସନରେ ମତଦାନ ହେବ। ଭୋଟ୍ ଗଣତି ନଭେମ୍ବର ୧୪ ତାରିଖରେ ହେବ।
ଚୀନ ବିରୋଧରେ ଟ୍ରମ୍ପଙ୍କ ବଡ଼ ପଦକ୍ଷେପ ; ନଭେମ୍ବର ୧ରୁ ଚୀନ ବିରୋଧରେ ଲାଗୁ ହେବ ୧୦୦ ପ୍ରତିଶତ ଟାରିଫ
ନନ୍ଦିଘୋଷ ବ୍ୟୁରୋ : ଚୀନ ବିରୋଧରେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଆଉ ଏକ ବଡ଼ ପଦକ୍ଷେପ। ଆସନ୍ତା ନଭେମ୍ବର ୧ରୁ ଚୀନ ବିରୋଧରେ ଆମେରିକା ଲାଗୁ କରିବ ୧୦୦ ପ୍ରତିଶତ ଟାରିଫ। ଏହି ଘୋଷଣା ଯୋଗୁ ପ୍ରଭାବିତ ହେବ ଚୀନର ରପ୍ତାନି। ଟ୍ରମ୍ପଙ୍କ ଏହି ଘୋଷଣା ପରେ ଦୁଇ ଦେଶ ମଧ୍ୟରେ କୂଟନୈତିକ ଓ ବାଣିଜ୍ୟିକ ଉତ୍ତେଜନା ଅଧିକ ହେବା ଆଶଙ୍କା କରାଯାଉଛି। ବାଣିଜ୍ୟ କ୍ଷେତ୍ରରେ ଚୀନ ଅନେକ ବିରୋଧାତ୍ମକ ପଦକ୍ଷେପ ନେଉଥିବା ପ୍ରତିବାଦରେ ଆମେରିକା ଏହି ନିଷ୍ପତ୍ତି ନେଇଛି ବୋଲି କହିଛନ୍ତି ଟ୍ରମ୍ପ। ସୋସିଆଲ ମିଡିଆରେ ଟ୍ରମ୍ପ କହିଛନ୍ତି- ବର୍ତ୍ତମାନ ଯେଉଁ ହାରରେ ଚୀନ ଟାରିଫ ପ୍ରଦାନ କରୁଛି ଆସନ୍ତା ନଭେମ୍ବର ୧ରୁ ତାହା ଉପରେ ଅଧିକ ୧୦୦ ପ୍ରତିଶତ ଟାରିଫ ଦେବ। ନିଜ ଦେଶରେ ପ୍ରସ୍ତୁତ ସାମଗ୍ରୀ ଉପରେ ରପ୍ତାନି କଟକଣା ଲଗାଇବା ଲାଗି ଚୀନ ଯୋଜନା କରୁଥିବା ସୂଚନା ମିଳିବା ପରେ ଟ୍ରମ୍ପ ଏହି ନିର୍ଦ୍ଦେଶ ଦେଇଛନ୍ତି।
କିଏ ମାରିବ ନୂଆପଡ଼ା ବାଜି: ଉପନିର୍ବାଚନ ତାରିଖ ଘୋଷଣା ପରେ ଉଷ୍ମ ରାଜନୀତି
ନନ୍ଦିଘୋଷ ବ୍ୟୁରୋ: ନୂଆପଡା ଉପନିର୍ବାଚନ ପାଇଁ ତାରିଖ ଘୋଷାଣା ପରେ ନିର୍ବାଚନୀ ରାଜନୀତି ବେଳକୁ ବେଳ ଉଷ୍ମ ହେବାରେ ଲାଗିଛି । ବିଜେଡି ସଭାପତି ନବୀନ ପଟ୍ଟନାୟକ ଖୁବଶୀଘ୍ର ପ୍ରାର୍ଥୀ ଘୋଷଣା କରିବେ ବୋଲି ବିଜେଡି ବିଧାୟକ ଅଶ୍ବିନୀ ପାତ୍ର କହିଛନ୍ତି । ନୂଆପଡାର ଦିବଂଗତ ବିଧାୟକ ରାଜେନ୍ଦ୍ର ଢୋଲକିଆଙ୍କ ପ୍ରତି ନୂଆପଡାବାସୀଙ୍କ ଭଲପାଇବା ରହିଛି । ତେଣୁ ବିଜେଡିର ବିଜୟ ହେବ ବୋଲି ଦଳ କହିଛି । ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ନୂଆପଡାରେ ବିଜୟବାନା ଉଡାଇବେ ବୋଲି ଦମ୍ଭୋକ୍ତି ପ୍ରକାଶ କରିଛନ୍ତି । ପରୀକ୍ଷା ପୂର୍ବରୁ ନୂଆପଡା ପାସ ଫେଲକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି ।
କାହାର ହେବ ନୂଆପଡା ? କେଉଁ ଦଳକୁ ଆଶୀର୍ବାଦ କରିବେ ନୂଆପଡାବାସୀ । ଉପନିର୍ବାଚନ ତାରିଖ ଘୋଷଣା ପରେ ରାଜନୈତିକ ଦଳ ଆରମ୍ଭ କରିଦେଲେଣି ବୟାନବାଜି । କଂଗ୍ରେସ ପ୍ରାର୍ଥୀ ଘୋଷଣା କରିସାରିଥିବାବେଳେ ବିଜେପି ଓ ବିଜେଡି କାହାକୁ ପ୍ରାର୍ଥୀ କରିବେ ସେନେଇ ସସପେନ୍ସ ଜାରି ରହିଛି । ନଭେମ୍ବର ୧୧ ତାରିଖରେ ନୂଆପଡାରେ ଉପ ନିର୍ବାଚନ ହେବାକୁ ଯାଉଛି । ବିଜେଡି ବିଧାୟକ ଅଶ୍ବିନୀ ପାତ୍ର କହିଛନ୍ତି ବିଜେଡି ପ୍ରାର୍ଥୀ ଚୂଡାନ୍ତ କରି ସାରିଛି । ଦଳର ସଭାପତି ନବୀନ ପଟ୍ଟନାୟକ କିଏ ପ୍ରାର୍ଥୀ ହେବ ତାହା ଘୋଷଣା କରିବେ । ଢୋଲକିଆ ପରିବାରରୁ ପ୍ରାର୍ଥୀ କରିବା ଆଲୋଚନା ହେଉଛି । ୨୦୨୪ ନିର୍ବାଚନରେ ନୂଆପଡ଼ାରେ ବିଜେଡି ବିଜୟ ହୋଇଥିଲା । ତେଣୁ ଉପନିର୍ବାଚନରେ ନୂଆପଡାବାସୀ ପୁଣି ଥରେ ବିଜେଡିକୁ ବିଜୟ ମୁକୁଟ ପିନ୍ଧାଇବେ । ଗତ ନିର୍ବାଚନରେ ଶାସକ ବିଜେପି ନୂଆପଡ଼ାରେ ତୃତୀୟ ସ୍ଥାନରେ ଥିଲା । ଲୋକ ନବୀନ ପଟ୍ଟନାୟକଙ୍କ ସପକ୍ଷରେ ଅଛନ୍ତି । ନବୀନ ଲୋକଙ୍କ ହୃଦୟରେ ଅଛନ୍ତି, ତାଙ୍କର ବିକଳ୍ପ ନାହିଁ । ବିଧାୟକଙ୍କ ପରିବାରରୁ ଜଣଙ୍କୁ ପ୍ରାର୍ଥୀ କରାଯିବ ବୋଲି ଆଶା କରୁଛୁ ବୋଲି ଅଶ୍ବିନୀ କହିଛନ୍ତି ।
ନୂଆପଡା ନିର୍ବାଚନରେ ଶାସକ ବିଜେପି କାହାକୁ ପ୍ରାର୍ଥୀ କରିବ ସେ ନେଇ କସରତ ଜାରି ରଖିଛି । ଓଡିଶାରୁ ଦିଲ୍ଲୀ ଯାଏଁ ବିଜେପିର ପ୍ରାର୍ଥୀ କସରତ ଚାଲିଛି । ବିଜେପି ବିଧାୟକ ଟଙ୍କଧର ତ୍ରିପାଠୀ କହିଛନ୍ତି, କିଏ ପ୍ରାର୍ଥୀ ହେବେ ସେ ନେଇ ଦଳ ଭିତରେ ଆଲୋଚନା ଚାଲିଛି । ପ୍ରାର୍ଥୀକୁ ନେଇ କୌଣସି ଦ୍ବନ୍ଦ୍ବ ନାହିଁ । କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି କହିଛନ୍ତି ନୂଆପଡାରେ କଂଗ୍ରେସ ପ୍ରାର୍ଥୀ ଘୋଷଣା କରି ପ୍ରଚାର ଆରମ୍ଭ କରିଦେଇଛି । କଂଗ୍ରେସର ହିଁ ବିଜୟ ହେବ । ତେବେ ଭୋଟ ଚୋରି ହୋଇପାରେ ବୋଲି କଂଗ୍ରେସ ସନ୍ଦେହ କରିଛି । ଇଭିଏମ ଚିନ୍ତା ଘାରିଛି ବୋଲି କହିଛନ୍ତି ବିଧାୟକ ତାରା ପ୍ରସାଦ ବାହିନୀପତି ।
ନିର୍ବାଚନ ତାରିଖ ଯେତେ ପାଖେଇ ଆସୁଛି ନୂଆପଡାରେ ପ୍ରଚାର ସେତେ ଦୁଲୁକୁଛି । ୩ ପ୍ରମୁଖ ଦଳର ହେଭିଓ୍ବେଟ ନେତାମାନେ ଦଳକୁ ବିଜୟ କରିବାକୁ ପାଇଁ ଅଣ୍ଟା ଭିଡିଛନ୍ତି । ୨୦୧୯ ଓ ୨୦୨୪ରେ ବିଜେଡି ନୂଆପଡା ଦଖଲ କରିଥିଲା । ଉପ ନିର୍ବାଚନରେ ବିଜେପି ଓ କଂଗ୍ରେସ ବିଜେଡି ଗଡରେ ଭାଙ୍ଗିବାକୁ ଉଦ୍ଯମ କରିଛନ୍ତି ।
ସନ୍ଦେହର ଦୋଛକିରେ ବ୍ରହ୍ମପୁର ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲା
ନନ୍ଦିଘୋଷ ବ୍ୟୁରୋ: ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ ଘଟଣାକୁ ପୂରିଲାଣି ୯୨ ଘଣ୍ଟା । ହେଲେ ପୋଲିସ ହାତରେ ଧରା ପଡିନାହାନ୍ତି ଅପରାଧୀ । ବିଭିନ୍ନ ଦିଗକୁ ନେଇ ତଦନ୍ତ ଆଗକୁ ବଢିଛି । ପ୍ରାୟ ୫୦ ଜଣଙ୍କୁ ପଚରାଉଚରା କରାଯାଇଥିବା ବେଳେ ୭ ଜଣଙ୍କୁ ଅଟକ ରଖି ଜେରା କରୁଛି ପୋଲିସ । ‘ସିଡିଆର’ ଓ ‘ସିସିଟିଭି’ ଫୁଟେଜ ଆଧାରରେ ବି ତଦନ୍ତ ଜାରି ରହିଛି । ଯାଞ୍ଚ ବେଳେ ପୋଲିସ ସନ୍ଦେହରେ ଥିବା କିଛି ଗାଡ଼ିକୁ ଚିହ୍ନଟ କରାଯାଇଛି । ଏବେ ପୋଲିସ ହାତରେ ଲାଗିଛି ପୀତବାସଙ୍କ ମୋବାଇଲ କଲ ଡିଟେଲ୍ସ ଓ ବ୍ୟବଚ୍ଛେଦ ରିପୋର୍ଟ ।
ସନ୍ଦେହର ଦୋଛକିରେ ବ୍ରହ୍ମପୁର ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲା । ଘଟଣାକୁ ୫ ଦିନ ବିତିଥିଲେ ବି ପୋଲିସ ହାତରେ ଲାଗିନି ଠୋସ ସୁରାକ । ଏବେ ବି ଅନ୍ଧାରରେ ବାଡ଼ି ବୁଲାଉଛି ତଦନ୍ତକାରୀ ଦଳ । ପ୍ରାୟ ୫୦ ଜଣଙ୍କୁ ପଚରାଉଚରା, ୭ ଜଣଙ୍କୁ ଅଟକ ରଖି ଜେରା କରୁଛି ପୋଲିସ । ସେମାନଙ୍କ ମଧ୍ୟରେ ଜଣେ ସିଆଇଏଏଫ୍ ଯବାନ ଓ ଜଣେ ଅଷ୍ଟମ ବାଟାଲିୟନର ଜଣେ ଯବାନ ଥିବା ଜଣାପଡ଼ିଛି । ସମସ୍ତଙ୍କୁ ଆମ୍ବପୁଆରେ ଥିବା ରିଜର୍ଭ ପୋଲିସ ବାରାକରେ ଜେରା କରାଯାଉଥିବା ସୂଚନା ମିଳିଛି । ଅଟକ ଥିବା ଯୁବକମାନେ ଦିଗପହଣ୍ଡି, ହିଞ୍ଜିଳି ଓ ପିତଳ ଅଞ୍ଚଳର। ଶୀଘ୍ର ଅପରାଧୀଙ୍କୁ ଧରାଯିବ କହିଛନ୍ତି ଏସପି ସରବଣା ବିବେକ. ଏମ । କିଏ, କ’ଣ ପାଇଁ, କେତେବେଳେ ଆସିଥିଲେ ତାହାର ତଦନ୍ତ କରାଯାଉଛି । ୬ଟି ସ୍ବତନ୍ତ୍ର ଟିମ୍ ବିଭିନ୍ନ ସ୍ଥାନରେ ଛାନବିନ କରୁଛି । ଘଟଣା ଦିନ ଅର୍ଥାତ କୁମାର ପୂର୍ଣ୍ଣିମା ରାତିରେ ପୀତବାସ ନିଜ କାମ ସାରି ନୂଆ ବସଷ୍ଟାଣ୍ଡ ସ୍ଥିତ ଏକ ହୋଟେଲକୁ ଖାଇବା ସାମଗ୍ରୀ ଆଣିବାକୁ ଯାଇଥିଲେ । ପୀତବାସ ହୋଟେଲରୁ ଖାଇବା ନେଇ ଘରକୁ ଯିବା ବେଳେ ଦୁଇଜଣ ହେଲମେଟଧାରୀ ସୁପାରି କିଲର୍ ପୀତବାସଙ୍କୁ ଗନ ପଏଣ୍ଟରୁ ଗୁଳି କରି ହତ୍ୟା କରିଥିଲେ । ପୋଲିସ ହାତରେ ଲାଗିଛି ‘ସିଡିଆର’ ଓ ‘ସିସିଟିଭି’ ଫୁଟେଜ୍ । ଏହା ହିଁ ପୋଲିସକୁ ସୁରାକ ଦେଇଥିବା କହିଛନ୍ତି ଏସପି । ହେଲେ କୌଣସି ସ୍ପଷ୍ଟ ସୂଚନା ଦେଇନାହାନ୍ତି ଏସପି ।
ସହରର ଅନ୍ୟତମ ପ୍ରବେଶପଥ ଫାଷ୍ଟ ଗେଟଠାରୁ ଆରମ୍ଭ କରି ବଡ଼ବଜାର ଥାନା, ବିଜୁ ପଟ୍ଟନାୟକ ପାର୍କ, ମାର୍କେଟର ମଧ୍ୟ ଭାଗରେ ଥିବା ପୀତବାସଙ୍କ ଚାମ୍ବର, ଗେଟବଜାର, ଲୋଚାପୋଡା ରୋଡ଼ ସମେତ ସହରର ୬୦ରୁ ଅଧିକ ସିସିଟିଭି ଫୁଟେଜକୁ ଯାଞ୍ଚ କରୁଛି ପୋଲିସ । ଯାଞ୍ଚ ବେଳେ ପୋଲିସ ସନ୍ଦେହରେ ଥିବା କିଛି ଗାଡ଼ିକୁ ଚିହ୍ନଟ କରାଯାଇଛି । ପୋଲିସ ହାତରେ ଲାଗିଛି ପୀତବାସଙ୍କ ମୋବାଇଲ କଲ ଡିଟେଲ୍ସ । କିଏ, କେତେବେଳେ, କେତେ ସମୟ କଥା ହୋଇଥିଲେ ତାହାର ବିସ୍ତୃତ ତଥ୍ୟ ପୋଲିସ ହାତରେ ଲାଗିଛି ।
ତଦନ୍ତର ମନ୍ଥର ଗତି ମଧ୍ୟରେ ପୀତବାସଙ୍କ ପୋଷ୍ଟମର୍ଟମ ରିପୋର୍ଟ ପୋଲିସର ହସ୍ତଗତ ହୋଇଛି । ରିପୋର୍ଟରେ କ’ଣ ଉଲ୍ଲେଖ ରହିଛି ତାହା ଗୁପ୍ତ ରଖା ଯାଇଛି । କେଉଁ ପିସ୍ତଲରୁ ଗୁଳି କରାଯାଇଛି ସେନେଇ ବାଲାଷ୍ଟିକ ରିପୋର୍ଟକୁ ଅପେକ୍ଷା କରାଯାଇଛି । ପ୍ରଚୁର ରକ୍ତ ସ୍ରାବ ଯୋଗୁଁ ଘଟଣାସ୍ଥଳରେ ହିଁ ପୀତବାସଙ୍କ ମୃତ୍ୟୁ ହୋଇଥିବା କହିଛନ୍ତି ଏମକେସିଜି ଏଫଏମଟି ବିଭାଗୀୟ ମୁଖ୍ୟ ଡାକ୍ତର ପ୍ରଫେସର ସୁଦୀପା ଦାସ ।
ବରିଷ୍ଠ ଆଇନଜୀବୀଙ୍କୁ ଗନ ପଏଣ୍ଟରେ ହତ୍ୟା ମାମଲାରେ କେଉଁ ମାନେ ସମ୍ପୃକ୍ତ ? ହତ୍ୟା ପଛରେ କାହାର ଆହତ ରହିଛି କି ? ଘଟଣା ପଛର ପକୃତ କାରଣ କ’ଣ ? ରାଜନୈତିକ ନା ବ୍ୟବସାୟୀକ ଶତ୍ରୁତା ? ଘଟଣା ପଛରେ ଏଭଳି ମାଳ ମାଳ ପ୍ରଶ୍ନ ଛିଡା ହୋଇଥିବା ବେଳେ ପୋଲିସର କେବେ ରହସ୍ୟ ଉନ୍ମୋଚନ କରିବ ତା’ଉପରେ ସମସ୍ତଙ୍କ ନଜର ।
୧୧ ଦିନ ବିତିଲା, ଧରାପଡ଼ିଲେନି SI କେଳେଙ୍କାରୀର ମାଷ୍ଟରମାଇଣ୍ଡ
ନନ୍ଦିଘୋଷ ବ୍ୟୁରୋ: କୁଆଡେ ଗଲା ଶଙ୍କର ପୃଷ୍ଟି ? କୁଆଡେ ଗଲା ମୁନା ମହାନ୍ତି ? କେବେ ଧରାହେବେ ଏସଆଇ ନିଯୁକ୍ତି କେଳେଙ୍କାରୀର ମାଷ୍ଟରମାଇଣ୍ଡ ? ପୋଲିସ ଚାକିରି ବିକ୍ରି ଘଟଣାରେ ୧୧୪ ଆଶାୟୀଙ୍କୁ ବାନ୍ଧି ବାହାବା ନେଉଛନ୍ତି ପୋଲିସ ଓ କ୍ରାଇମବ୍ରାଞ୍ଚ । ତଦନ୍ତ କେବଳ ସିଲିକନ, ପଞ୍ଚସଫ୍ ଲିମିଟେଡ ଭିତରେ ଅଟକି ଯାଇଛି । ଧରାପଡ଼ିଛନ୍ତି ମାତ୍ର ୫ ଜଣ ଦଲାଲ । ଗୁଜରାଟର ITI ଲିମିଟେଡ ବେଆଇନ ଭାବେ ସବଲେଟିଂ କଲା । ସବୁ ଜାଣିଥିଲା ଓପିଆରବି । ହେଲେ ଏପର୍ଯ୍ୟନ୍ତ ନା ଆଇଟିଆଇ ଲିମିଟେଡର କୌଣସି ଅଧିକାରୀଙ୍କୁ ପଚାରିଲାଣି ନା ଓପିଆରବିର ମୁଖିଆ ଓ ଅଧିକାରୀଙ୍କୁ ତଦନ୍ତ ପରିସରକୁ ଅଣାଗଲାଣି । ବଡ଼ବଡ଼ିଆଙ୍କ ସମ୍ପୃକ୍ତି ଥିବାରୁ ସିବିଆଇ ତଦନ୍ତ ନେଇ ବିରୋଧୀ ଦାବି କରି ଆସୁଛନ୍ତି । ସେପଟେ ସିବିଆଇ ତଦନ୍ତ ନେଇ ଆଦେଶ ଦେବାକୁ ହାଇକୋର୍ଟରେ ଦାଏର ହୋଇଛି ଜନସ୍ଵାର୍ଥ ମାମଲା । ତଥାପି ନିଘୋଡ଼ ନିଦରେ ସରକାର ।
୧୧ ଦିନ ବିତିଲା, ଧରାପଡ଼ିଲେନି SI କେଳେଙ୍କାରୀର ମାଷ୍ଟରମାଇଣ୍ଡ । କ୍ରାଇମବ୍ରାଞ୍ଚ ମୁଖ୍ୟ ଅଭିଯୁକ୍ତ ପଞ୍ଚସଫ୍ଟ ମାଲିକ ଶଙ୍କର ପୃଷ୍ଟିଙ୍କ ଏବେ ସୁଦ୍ଧା ଟେର ପାଉନି। ସେପଟେ ସହଯୋଗୀ ମୁନା ମହାନ୍ତି ବି ଫେରାର। କ୍ରାଇମବ୍ରାଞ୍ଚ କେବଳ ଗୋଟିଏ ଦୁଇଟି ପ୍ରେସ ବିଜ୍ଞପ୍ତି ଜାରି କରି କାମ ସାରିଦେଇଛି । ଗୁରୁତ୍ଵପୂର୍ଣ୍ଣ କଥା ହେଉଛି କ୍ରାଇମବ୍ରାଞ୍ଚର ତଦନ୍ତ କେବଳ ସିଲିକନ ଟେକ୍ ଲ୍ୟାବ ଓ ପଞ୍ଚସଫ୍ଟ ଲିମିଟେଡ ପାଖରେ ଅଟକି ଯାଇଛି । ନିଯୁକ୍ତି ପରୀକ୍ଷା କେଳେଙ୍କାରୀ ପାଇଁ ଗତ ଜାନୁଆରୀରୁ ହୋଇଥିଲା ଏକ ପ୍ରକାର ଷଡ଼ଯନ୍ତ୍ର । ଗୁଜୁରାଟର ଆଇଟିଆଇ ଲିମିଟେଡକୁ ପରୀକ୍ଷା ପରିଚାଳନା ପାଇଁ ଚୁକ୍ତି କରିଥିଲା ଓପିଆରବି । ଚୁକ୍ତିପତ୍ରରେ ସବଲେଟିଂ ପାଇଁ କୌଣସି ପ୍ରକାର ବ୍ୟବସ୍ଥା ନଥିଲା । କିନ୍ତୁ ଗୁଜରାଟର ଆଇଟିଆଇ ପାଖରୁ ରିଚ୍ ମାଇଣ୍ଡସ୍ ଓ ବେଆଇନ ଭାବେ ସିଲିକନ ଟେକ୍ ଲ୍ୟାବକୁ ପରିଚାଳନା ଦାୟିତ୍ଵ ଟେକି ଦେଲା । ଯାହାକୁ ନେଇ ସରକାର ଓ ଓପିଆରବି ମଧ୍ୟରେ ହୋଇଥିଲା ଆଭ୍ୟନ୍ତରୀଣ କନ୍ଦଳ । ଏଥିଲାଗି ଗତ ମାର୍ଚ୍ଚରେ ହେବାକୁ ଥିବା ପରୀକ୍ଷା ହୋଇପାରି ନଥିଲା । ଗହନ କଥା ହେଉଛି ଚାକିରି ବିକ୍ରି ଷଡ଼ଯନ୍ତ୍ର ନେଇ ଆଇଟିଆଇଠାରୁ ଠିକା ପାଇଥିବା ରିଚ୍ ମାଇଣ୍ଡସ୍ ଅଂଶୀଦାରଙ୍କ ମଧ୍ୟରେ ଦେଖାଦେଇଥିଲା ବିବାଦ । ଜଣେ ଅଂଶୀଦାରଙ୍କ ଅଭିଯୋଗ ଆଧାରରେ ରିଚ୍ ମାଇଣ୍ଡସକୁ ପରୀକ୍ଷା ପରିଚାଳନା ଦାୟିତ୍ଵରୁ ବାଦ ଦିଆଯାଇଥିଲା । ଘଟଣାର ତଦନ୍ତ ପାଇଁ ଓପିଆରବି ଏକ ଆଭ୍ୟନ୍ତରୀଣ କମିଟି ଗଠନ କରିଥିଲେ । କିନ୍ତୁ କମିଟି କ’ଣ ରିପୋର୍ଟ ଦେଲା ତାହା ଆଜି ଯାଏଁ ସାର୍ବଜନୀନ ହେଲାନାହିଁ । ଅନ୍ୟପଟେ ଚାକିରି ବିକ୍ରି ଷଡ଼ଯନ୍ତ୍ର ସମ୍ପର୍କରେ ସୁରାକ ପାଇବା ପରେ ତତ୍କାଳୀନ ଓପିଆରବି ଅଧ୍ୟକ୍ଷ ସନ୍ତୋଷ କୁମାର ଉପାଧ୍ୟାୟ ଅଧ୍ୟକ୍ଷ ପଦରୁ ଓହରି ଯାଇଥିଲେ । ଆଇଟିଆଇ କେନ୍ଦ୍ରୀୟ ପିଏସୟୁ ହୋଇଥିବାରୁ କ୍ରାଇମବ୍ରାଞ୍ଚ କ’ଣ ତା’ର ଅଧିକାରୀଙ୍କୁ ଜେରା କରିପାରୁନି କି ?
ଗତ ମାର୍ଚ୍ଚ ୮ ଓ ୯ ତାରିଖରେ ଏସଆଇ ପରୀକ୍ଷା ପାଇଁ ଧାର୍ଯ୍ୟ ହୋଇଥିଲା । ହେଲେ ଆଡମିଟ୍ କାର୍ଡ ଜାରି କରାଯିବା ପୂର୍ବରୁ ପରୀକ୍ଷାକୁ ବାତିଲ କରାଯାଇଥିଲା । ମାର୍ଚ୍ଚ ପ୍ରଥମ ସପ୍ତାହରେ ଅନେକ ପରୀକ୍ଷାର୍ଥୀ ପ୍ରଶ୍ନପତ୍ର ଅଭ୍ୟାସ ପାଇଁ ରାଜ୍ୟ ବାହାରକୁ ଚାଲିଯାଇଥିଲେ । ମାର୍ଚ୍ଚ ୩ ତାରିଖରୁ ଉଭାନ ହୋଇଯାଇଥିବା ପରୀକ୍ଷାର୍ଥୀଙ୍କ ସାଙ୍ଗ ସାଥିମାନେ ଏ ସଂକ୍ରାନ୍ତରେ ସୋସିଆଲ ମିଡିଆରେ ଭିଡିଓ ଅପଲୋଡ କରିଥିଲେ ମଧ୍ୟ ତାକୁ ସେତେଟା ଗୁରୁତ୍ଵ ଦିଆଯାଇଥିଲା । ପ୍ରଶ୍ନପତ୍ର ଲିକ୍ କରି ଚାକିରି ବିକ୍ରି କରିବା ଯୋଜନାରେ ବହୁ ବରିଷ୍ଠ ଅଧିକାରୀ ସାମିଲ ବୋଲି ରିଚ୍ ମାଇଣ୍ଡ୍ କମ୍ପାନୀର ଜଣେ ଅଂଶୀଦାର ପ୍ରଥମେ ମୌଖିକ ଓ ପରେ ବିଧିବଦ୍ଧ ଅଭିଯୋଗ କରିବାରୁ ଯୋଜନା ପଣ୍ଡ ହୋଇଥିଲା । କମ୍ପାନୀ ସହ ଜଡ଼ିତ ଅନ୍ୟ ଜଣେ ବ୍ୟକ୍ତି ଓଡ଼ିଶାରେ ପରୀକ୍ଷା ପରିଚାଳନା କରୁଥିବା ନେଇ ଜଣାପଡିଥିଲା । ସମ୍ପୃକ୍ତ ବ୍ୟକ୍ତିଙ୍କ ସହ କିଛି ପୋଲିସ ଅଧିକାରୀ ସାମିଲ ଥିବା ନେଇ ଅଂଶୀଦାର ମଧ୍ୟ ଅଭିଯୋଗ କରିଥିଲେ । ଅଭିଯୋଗ ଅଧାରରେ ତଦନ୍ତ ନିର୍ଦ୍ଦେଶ ମଧ୍ୟ ଦିଆଯାଇଥିଲା । ଜଣେ ବରିଷ୍ଠ ପୋଲିସ ଅଧିକାରୀଙ୍କୁ ତଲବ କରାଯାଇଥିଲା । ହେଲେ ସେ ଅଧିକାରୀ ଜଣକ ଉତ୍ତର ରଖିଲେ କି ନାହିଁ ଆଜି ଯାଏଁ ଜଣାପଡିନାହିଁ ।
ଏସଆଇ କେଳେଙ୍କାରୀରେ ଗତ ୨୯ ସେପ୍ଟେମ୍ବରରେ ଶ୍ରୀକାକୁଲମରୁ ଧରାପଡ଼ିଥିଲେ ୧୧୪ ପରୀକ୍ଷାର୍ଥୀଙ୍କ ସହ ୩ ଦଲାଲ । କେବେ ଧରା ହେବେ ମାଷ୍ଟରମାଇଣ୍ଡ ଏବଂ କାହିଁକି ଚୁପ ପୋଲିସ ମୁଖିଆ ? ଏପର୍ଯ୍ୟନ୍ତ OPRBକୁ କ୍ରାଇମବ୍ରାଞ୍ଚ ଜେରା କରିନି । କେବେ ବଡ଼ ବଡ଼ ଅଧିକାରୀଙ୍କୁ ପାଖରେ କ୍ରାଇମବ୍ରାଞ୍ଚ ପହଞ୍ଚିପାରିବ ନା ସବୁକିଛି ପୁଣିଥରେ ନାଲି ଫିତା ତଳେ ଚାପି ହୋଇଯିବ ତାହା ଦେଖିବାକୁ ବାକି ରହିଛି ।
ଟ୍ରମ୍ପ ହତାଶ, ମିଳିଲାନି ନୋବେଲ ଶାନ୍ତି ପୁରସ୍କାର
ନନ୍ଦିଘୋଷ ବ୍ୟୁରୋ: ଫୁସକିଗଲା ଆମେରିକା ରାଷ୍ଟ୍ରପତି ଟ୍ରମ୍ପ, ପାକିସ୍ତାନ ପ୍ରଧାନମନ୍ତ୍ରୀ ସରିଫ ଓ ଇସ୍ରାଏଲ ପ୍ରଧାନମନ୍ତ୍ରୀ ନେତନ୍ୟାହୁଙ୍କୁ ବାହାଦୁରୀ । ୭ଟି ଯୁଦ୍ଧ ବନ୍ଦ କରିଥିବାରୁ ନୋବେଲ ଲାଗି ହକଦାର ଦାବି କରୁଥିବା ଟ୍ରମ୍ପଙ୍କୁ ମିଳିଲାନି ନୋବେଲ ଶାନ୍ତି ପୁରସ୍କାର । ଛଡ଼ାଇ ନେଇଛନ୍ତି ଭେନେଜୁଏଲାର ଗଣତନ୍ତ୍ରବାଦୀ ନେତ୍ରୀ ମାରିଆ କୋରିନା ମାଚୋଡ଼ୋ । ଏକଛତ୍ରବାଦ ବିରୋଧରେ କରିଆସିଛନ୍ତି ଶାଣିତ ସଂଗ୍ରାମ ।
ଘୋଷଣା ହେଲା ନୋବେଲ ଶାନ୍ତି ପୁରସ୍କାର । ଫୁସକି ଗଲା ଟ୍ରମ୍ପ, ସରିଫ ଓ ନେତନ୍ୟାହୁଙ୍କ ବାହସ୍ଫୋଟ । ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କୁ ମିଳିଲାନ ନୋବେଲ । ସର୍ବୋଚ୍ଚ ପୁରସ୍କାର ଲାଗି ନିଜକୁ ଯୋଗ୍ୟ ବୋଲି ଡିଣ୍ଡିମ ପିଟୁଥିବା ଟ୍ରମ୍ପଙ୍କ ନାଁ କାଟି ଦେଲେ ନୋବେଲ କମିଟି । ମିଳାଇଗଲା ୭ ମାସରେ ୭ଟି ଯୁଦ୍ଧ ବନ୍ଦ କରିବାର ବାହାଦୂରୀ । ଭାରତ-ପାକିସ୍ତାନ, ଇସ୍ରାଏଲ-ଇରାନ, ରାୱାଣ୍ଡା- କଙ୍ଗୋ, ଥାଇଲାଣ୍ଡ-କାମ୍ବୋଡିଆ, ଆର୍ମେନିଆ-ଅଜରବୈଜାନ, ଇଜିପ୍ଟ-ଇଥିଓପିଆ ଏବଂ ସର୍ବିଆ-କୋସୋଭୋ ଯୁଦ୍ଧ ବନ୍ଦ କରିଥିବାରୁ ନୋବେଲ ଲାଗି ସେ ଉପଯୁକ୍ତ ବୋଲି କହିଆସୁଥିଲେ ଟ୍ରମ୍ପ । କେବଳ ଏତିକି ନୁହେଁ ଟ୍ରମ୍ପଙ୍କ ମୁଖପାତ୍ର ସାଜିଥିବା ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଓ ଫିଲ୍ଡ ମାର୍ଶାଲ ଅସୀମ ମୁନିର, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ ହୋଇଛନ୍ତି ଭାଣ୍ଡିଆ । ଗତ ଜୁଲାଇରେ ନେତନ୍ୟାହୁ ହ୍ୱାଇଟ୍ ହାଉସରେ ଟ୍ରମ୍ପଙ୍କ ସହ ବୈଠକ ବେଳେ ପ୍ରଦାନ କରିଥିଲେ ମନୋନୟନ ପତ୍ର । ଅପରେସନ ସିନ୍ଦୂର ବେଳେ ଯୁଦ୍ଧ ବନ୍ଦ ଲାଗି ଟ୍ରମ୍ପଙ୍କ ସହ ଭାରତ ସରକାର କଥା ହୋଇ ନଥିଲେ ବୋଲି କେନ୍ଦ୍ର ସରକାର ଯୁକ୍ତି କରୁଥିଲେ ବି ଏହି ପ୍ରସଙ୍ଗରେ ବାହସ୍ଫୋଟ ମାରିଚାଲିଛନ୍ତି ଟ୍ରମ୍ପ । ଏପରିକି ନୋବେଲ ଘୋଷଣାର କିଛି ସମୟ ପୂର୍ବରୁ ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କୁ ସମାଲୋଚନା କରିବାକୁ ପଛାଇ ନଥିଲେ ଟ୍ରମ୍ପ । କହିଥିଲେ- କିଛି କରି ନଥିବା ଲୋକଙ୍କୁ ୨୦୦୯ରେ ମିଳିଥିଲା ନୋବେଲ । ଟ୍ରମ୍ପଙ୍କ ନାମକୁ ସୁପାରିସ କରିଥିଲେ ଇସ୍ରାଏଲ, ପାକିସ୍ତାନ, ଆଜରବୈଜାନ, ଆର୍ମେନିଆ, ଥାଇଲାଣ୍ଡ ଓ କାମ୍ବୋଡିଆ ।
ଗଣତନ୍ତ୍ର ପ୍ରତିଷ୍ଠା କ୍ଷେତ୍ରରେ ଉଲ୍ଲେଖନୀୟ ଅବଦାନ ଲାଗି ଚଳିତବର୍ଷ ନୋବେଲ ଶାନ୍ତି ପୁରସ୍କାର ପାଇଛନ୍ତି ଭେନେଜୁଏଲାର ମାରିଆ କୋରିନା ମାଚୋଡ଼ୋ । ଏକଛତ୍ରବାଦ ହଟାଇ ଗଣତନ୍ତ୍ର ପ୍ରତିଷ୍ଠାରେ ନେଇଥିଲେ ପ୍ରମୁଖ ଭୂମିକା । ଆଇରନ ଲେଡି ଭାବେ ଜଣାଶୁଣା ମାରିଆ ଗତ ୨୦୨୫ରେ ଟାଇମ୍ସ ମାଗାଜିନରେ ସର୍ବାଧିକ ୧୦୦ ପ୍ରଭାବଶାଳୀ ବ୍ୟକ୍ତି ତାଲିକାରେ ପାଇଥିଲେ ସ୍ଥାନ । ସମଗ୍ର ଲାଟିନ ଆମେରିକାରେ ଗଣତନ୍ତ୍ରର ଦୂତ ସାଜିଥିଲେ ମାରିଆ । ନିକୋଲାସ ମାଦୁରୋଙ୍କ ଏକଛତ୍ର ଶାସନ ବିରୋଧରେ କରିଥିଲେ ସଂଗ୍ରାମ । ମାନବାଧିକାର ପ୍ରସଙ୍ଗରେ ୨୦୧୪ରେ ସଂସଦରୁ ବହିଷ୍କୃତ ହୋଇଥିଲେ ମାରିଆ ।
ଚଳିତ ବର୍ଷ ନୋବେଲ ଶାନ୍ତି ପୁରସ୍କାର ଲାଗି ଆସିଥିଲା ୩୩୮ ମନୋନୟନ । ସେଥିରେ ଥିଲେ ୨୪୪ ବ୍ୟକ୍ତି ବିଶେଷ ଓ ୯୪ଟି ସଂଗଠନ ।
ଦିଲ୍ଲୀରୁ ଫେରିଲେ ନବୀନ ପଟ୍ଟନାୟକ
ନନ୍ଦିଘୋଷ ବ୍ୟୁରୋ: ଦିଲ୍ଲୀରୁ ଫେରିଲେ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ବ୍ୟକ୍ତିଗତ କାର୍ଯ୍ୟରେ ସେ ଗତ କିଛିଦିନ ଧରି ଦିଲ୍ଲୀରେ ଥିଲେ । ନୂଆପଡ଼ା ଉପନିର୍ବାଚନ ପାଇଁ ଦଳୀୟ ପ୍ରସ୍ତୁତି ଜୋରଦାର ହୋଇଥିବାବେଳେ ଦଳର ଜନସମ୍ପର୍କ ପଦଯାତ୍ରା ମଧ୍ୟ ଆରମ୍ଭ ହୋଇଛି । ନବୀନ ଦିଲ୍ଲୀରେ ଫେରିବା ପରେ ଏବେ ନୂଆପଡ଼ା ଉପନିର୍ବାଚନ ଓ ପଦଯାତ୍ରା କାର୍ଯ୍ୟକ୍ରମ ଆଗକୁ ସରଗରମ ହେବ ।
ପ୍ରାୟ ଦେଢ ମାସ ତଳେ ମୁମ୍ବାଇର କୋକିଳାବେନ ଧିରୁଭାଇ ଅମ୍ବାନୀ ହସ୍ପିଟାଲରେ ସର୍ଭିକାଲ ଆର୍ଥ୍ରାଇଟିସ୍ ଅପରେସନରୁ ସୁସ୍ଥ ହୋଇ ନବୀନ ନବାସ ଫେରିଥିଲେ । କିଛି ଦିନ ଦଳୀୟ ନେତା ଓ କର୍ମୀଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ । ପରେ ସେ କିଛି ଦିନ ପାଇଁ ବ୍ୟକ୍ତିଗତ କାର୍ଯ୍ୟରେ ଦିଲ୍ଲୀ ଯାଇଥିଲେ । ସେଠାରେ ସେ ନିଜ ବନ୍ଧୁଙ୍କୁ ଭେଟିବା ସହ ପରିବାର ସହ ରହିଥିଲେ । ଦିଲ୍ଲୀରେ ଥିବା ସମୟରେ ସେ ବିକାନେର ହାଉସରେ ଆୟୋଜିତ ୱାଇଲ୍ଡ ଲାଇଫ ଚାରିଟି ଏକଜିବିସନ ବୁଲି ଦେଖିଥିଲେ । ଦିଲ୍ଲୀରୁ ସେ ରାଜ୍ୟବାସୀଙ୍କୁ ଦଶହରାର ଶୁଭେଚ୍ଛା ଦେବା ସହ ରାଜ୍ୟର ବିଭିନ୍ନ ସାମାଜିକ ଓ ରାଜନୈତିକ ପ୍ରସଙ୍ଗରେ ମଧ୍ୟ ମତ ରଖୁଥିଲେ ।
ଓଡ଼ିଶା ସ୍କୁଲ ତୀରନ୍ଦାଜୀ ଚାମ୍ପିଅନସିପରେ ୧୨ ପଦକ ସହ ବେଦାନ୍ତ ଆଲୁମିନିୟମର ଖେଳାଳି ଚାମ୍ପିଅନ
ନନ୍ଦିଘୋଷ ବ୍ୟୁରୋ: ଲାଞ୍ଜିଗଡ଼ ବେଦାନ୍ତ ଆଲୁମିନିୟମର ପ୍ରୟାସ । କଳାହାଣ୍ଡି ଜିଲ୍ଲାର ତୀରନ୍ଦାଜଙ୍କ ସଫଳତା । ବେଦାନ୍ତର ତୃଣମୂଳ କ୍ରୀଡା ପଦକ୍ଷେପ ଯୋଗୁଁ ଯୁବ ତୀରନ୍ଦାଜମାନେ ଓଡ଼ିଶା ସ୍କୁଲ ତୀରନ୍ଦାଜ ଚାମ୍ପିଅନସିପରେ ୧୨ ପଦକ ସହ ଚାମ୍ପିଅନ ହୋଇଛି । ସୁନ୍ଦରଗଡ଼ରେ ଭାରତୀୟ ସ୍କୁଲ ଗେମ୍ସ ଫେଡେରେସନ (SGFI) ଦ୍ୱାରା ଆୟୋଜିତ ଏହି ପ୍ରତିଯୋଗିତାରେ କଳାହାଣ୍ଡି ଜିଲ୍ଲାର ତୀରନ୍ଦାଜମାନେ ମିଳିତ ଭାବରେ ମୋଟ ୮ଟି ସ୍ୱର୍ଣ୍ଣ, ୩ଟି ରୌପ୍ୟ ଓ ଗୋଟିଏ କାଂସ୍ୟ ପଦକ ହାସଲ କରି ନିଜ ପ୍ରତିଭା ଦେଖାଇଛନ୍ତି ।
ବେଦାନ୍ତ ଲାଞ୍ଜିଗଡ଼ର ପ୍ରମୁଖ କ୍ରୀଡା ତାଲିମ ପଦକ୍ଷେପ ଯୁବ ତୀରନ୍ଦାଜମାନଙ୍କୁ ବିଶେଷଜ୍ଞ ପ୍ରଶିକ୍ଷଣ, ବିଶ୍ୱସ୍ତରୀୟ ଉପକରଣ ଓ ପ୍ରତିଯୋଗିତାମୂଳକ ପ୍ରଦର୍ଶନ ସହିତ ସମର୍ଥନ କରେ । ଯାହା ସ୍ଥାନୀୟ ପ୍ରତିଭାକୁ ପୋଷଣ କରିବା ପାଇଁ ବେଦାନ୍ତର ପ୍ରତିବଦ୍ଧତାକୁ ସ୍ପଷ୍ଟ କରୁଛି ।
ସଫଳତାକୁ ନେଇ ବେଦାନ୍ତ ଆଲୁମିନା ବ୍ୟବସାୟର ସିଇଓ ପ୍ରଣବ କୁମାର ଭଟ୍ଟାଚାର୍ଯ୍ୟ କହିଛନ୍ତି, ‘ବେଦାନ୍ତ ଲାଞ୍ଜିଗଡ଼ରେ, ଆମେ ବିଶ୍ୱାସ କରୁ ଯେ ପ୍ରକୃତ ପ୍ରଗତି ସମ୍ପ୍ରଦାୟ ନିମନ୍ତେ ଆମେ ସୃଷ୍ଟି କରୁଥିବା ସୁଯୋଗ ଦ୍ୱାରା ମାପ କରାଯାଏ । ଆମର ଯୁବ ତୀରନ୍ଦାଜମାନଙ୍କ ଉଲ୍ଲେଖନୀୟ ସଫଳତା ତୃଣମୂଳ ସ୍ତରର ପଦକ୍ଷେପଗୁଡ଼ିକର ପରିବର୍ତ୍ତନକାରୀ ଶକ୍ତିକୁ ପ୍ରତିଫଳିତ କରେ ଯାହା ଲୁକ୍କାୟିତ ସମ୍ଭାବନାକୁ ଉନ୍ମୁକ୍ତ କରିପାରିବା ସହ ଚାମ୍ପିଅନଙ୍କୁ ବିଶ୍ୱସ୍ତରରେ ଠିଆ କରିବ । ଆମେ କଳାହାଣ୍ଡିର ଯୁବ ପ୍ରତିଭାକୁ ସଶକ୍ତ କରିବା, ସେମାନଙ୍କୁ ଆତ୍ମବିଶ୍ୱାସ ସୃଷ୍ଟି କରିବା ଓ ଉତ୍କର୍ଷତା ହାସଲ କରିବାରେ ସାହାଯ୍ୟ କରିବା ପାଇଁ ପ୍ରତିବଦ୍ଧ ।’
୨୦୧୮ରେ ଆରମ୍ଭ ହୋଇଥିବା, ବେଦାନ୍ତର କ୍ରୀଡା ତାଲିମ ପଦକ୍ଷେପ ସ୍ଥାନୀୟ ସମ୍ପ୍ରଦାୟରୁ କ୍ରୀଡା ପ୍ରତିଭାକୁ ଚିହ୍ନଟ ଓ ପ୍ରୋତ୍ସାହିତ କରେ । ଗୁଣାତ୍ମକ ଉପକରଣ ଏବଂ ତାଲିମ ଭିତ୍ତିଭୂମିର ପ୍ରବେଶ ସହିତ ତୀରନ୍ଦାଜୀ ଏବଂ ଆଥଲେଟିକ୍ସରେ ବିଶେଷଜ୍ଞଙ୍କ ନେତୃତ୍ୱରେ ତାଲିମ ପ୍ରଦାନ କରାଯାଉଛି । ଏହି ପଦକ୍ଷେପ ଦେଶବ୍ୟାପୀ ପ୍ରତିଯୋଗିତାରେ ଅଂଶଗ୍ରହଣକୁ ମଧ୍ୟ ସହଜ କରିଥାଏ । ଆଜି ପର୍ଯ୍ୟନ୍ତ, ଏହି କାର୍ଯ୍ୟକ୍ରମ ଅଧୀନରେ ୧୦୦ରୁ ଅଧିକ ଯୁବ ତୀରନ୍ଦାଜଙ୍କୁ ତାଲିମ ଦିଆଯାଇଛି । ଯେଉଁମାନେ ଗତବର୍ଷ ରାଜ୍ୟ ଓ ଜାତୀୟ ଚାମ୍ପିଅନସିପରେ ସାମୂହିକ ଭାବରେ ୫୦ରୁ ଅଧିକ ପଦକ ଜିତିଛନ୍ତି । ଯାହା ତୃଣମୂଳ ସ୍ତରର କ୍ରୀଡା ବିକାଶ ପ୍ରତି ବେଦାନ୍ତର ନିରନ୍ତର ପ୍ରତିବଦ୍ଧତାକୁ ପ୍ରଦର୍ଶନ କରୁଛି ।
ଆସାମ ଗାୟକ ଜୁବିନ ଗର୍ଗ ମୃତ୍ୟୁ ମାମଲା ; ଦୁଇ ପିଏସଓ ଗିରଫ
ନନ୍ଦିଘୋଷ ବ୍ୟୁରୋ: ଦିନକୁ ଦିନ ବଡ଼ ହେବାରେ ଲାଗିଛି ଆସାମ ଗାୟକ ଜୁବିନ ଗର୍ଗ ମୃତ୍ୟୁ ମାମଲା। ଜୁବିନଙ୍କ ଦୁଇ ବ୍ୟକ୍ତିଗତ ନିରାପତ୍ତା ଅଧିକାରୀଙ୍କୁ ଗିରଫ କରିଛି ଆସାମ ପୋଲିସ। ସେମାନେ ହେଲେ ନନ୍ଦେଶ୍ବର ବୋରା ଓ ପରେଶ ବୈଶ୍ୟ। ଦୀର୍ଘ ଦିନ ଧରି ଜୁବିନଙ୍କ ସୁରକ୍ଷାରେ ସେମାନେ ଥିଲେ ନିୟୋଜିତ। ସେମାନଙ୍କୁ ଚିଫ ଜୁଡିସିଆଲ ମାଜିଷ୍ଟ୍ରେଟଙ୍କ ନିକଟରେ ହାଜର କରାଯାଇଛି। ସେମାନଙ୍କ ବିରୋଧରେ କିଛି ଆର୍ଥିକ ଅନିୟମିତତା ଅଭିଯୋଗ ଆସିବା ପରେ ସେମାନଙ୍କୁ ସସପେଣ୍ଡ କରାଯାଇଥିଲା। ଗତ ୪ରୁ ୫ ବର୍ଷ ମଧ୍ୟରେ ସେମାନେ ପ୍ରାୟ ୧ କୋଟି ଟଙ୍କାର କାରବାର କରିଥିଲେ। ବୋରାଙ୍କ ଆକାଉଣ୍ଟରେ ୭୦ ଲକ୍ଷ ଟଙ୍କା ଓ ବୈଶ୍ୟଙ୍କ ଆକାଉଣ୍ଟରେ ୪୦ ଲକ୍ଷ ଟଙ୍କା ଥିବା ସୂଚନା ମିଳିଥିଲା। ଗରିବ ଓ ଅସହାୟ ଲୋକଙ୍କୁ ସହାୟତା କରିବା ଲାଗି ଏହି ଦୁଇ ଜଣଙ୍କ ଆକାଉଣ୍ଟରେ ଜୁବିନ ଟଙ୍କା ରଖିଥିବା ଜଣାଯାଇଛି। ଜୁବିନଙ୍କ ପତ୍ନୀ ଗରିମା ସାଇକିଆ ଗର୍ଗ କହିଛନ୍ତି- ସାମାଜିକ କାର୍ଯ୍ଯ ଲାଗି ଏହି ଟଙ୍କା ଜମା ରଖାଯାଇଥିଲା ଏବଂ ଏହାର ଖର୍ଚ୍ଚକୁ ସେମାନେ ଡାଏରୀରେ ଲିପିବଦ୍ଧ କରୁଥିଲେ। ଏହି ଦୁଇ ଅଫିସର ଜୁବିନଙ୍କ ସହ ପ୍ରାୟ ୧୦ ବର୍ଷ ଧରି ରହିଥିଲେ। ଜୁବିନଙ୍କୁ ଉଲଫା ସଂଗଠନର ଧମକ ପରେ ଏହି ଦୁଇ ଅଫିସରଙ୍କୁ ନିଯୁକ୍ତି ଦେଇଥିଲା ଆସାମ ପୋଲିସ। ତେଣେ ଜୁବିନ ମାମଲାରେ ନ୍ୟାୟ ମାଗିଛନ୍ତି ତାଙ୍କ ଭଉଣୀ ପାମେ ବୋର୍ଥାକୁର।