ସାଉଥ୍ ଅଭିନେତା ଅଲ୍ଲୁ ଅର୍ଜୁନଙ୍କ ପାଇଁ ଆସିଛି ଏକ ଦୁଃଖ ଖବର । ଅଭିନେତାଙ୍କ ଦାଦୀ ଅଲ୍ଲୁ କନକାରତ୍ନମଙ୍କ ପରଲୋକ ଘଟିଛି । ମୃତ୍ୟୁ ବେଳକୁ ତାଙ୍କୁ ୯୪ ବର୍ଷ ବୟସ ହୋଇଥିଲା । ଅଲ୍ଲୁ ଅର୍ଜୁନଙ୍କ ଦାଦୀ ଦୀର୍ଘଦିନ ଧରି ବୟସଜନିତ ସ୍ବାସ୍ଥ୍ୟ ସମସ୍ୟା ଦେଇ ଗତି କରୁଥିଲେ । ତାଙ୍କର ବିୟୋଗରେ ସାରା ପରିବାରରେ ଦୁଃଖର ଲହରୀ ଖେଳିଯାଇଛି । ଗତକାଲି ରାତି ପାଖାପାଖି ୧.୪୫ ସମୟରେ ଅଭିନେତାଙ୍କ ଦାଦୀ ଇହଧାମ ସମ୍ବରଣ କରିଥିଲେ । ଏହି ଖବର ଶୁଣିବା ପରେ ଅଲ୍ଲୁଙ୍କ ଅଗଣିତ ଫ୍ୟାନ୍ସଙ୍କ ଝଟକା ଲାଗିଛି । ଫିଲ୍ମ ଇଣ୍ଡଷ୍ଟ୍ରିର ବହୁ ବଡ଼ ବଡ଼ କଳାକାରମାନେ ଅଭିନେତାଙ୍କ ଘରେ ପହଞ୍ଚି ଦାଦୀଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । ଆଜି କୋକାପେଟରେ ଅଲ୍ଲୁ ଅର୍ଜୁନଙ୍କ ଦାଦୀଙ୍କ ଅନ୍ତିମ ସଂସ୍କାର କରାଯିବ ।
ସୁବର୍ଣ୍ଣରେଖାରେ ବନ୍ୟା ଗଲା କିନ୍ତୁ ଆଜି ବି ଦୁର୍ଦ୍ଦଶା ଭୋଗୁଛନ୍ତି ତଳିଆ ଅଞ୍ଚଳ ବାସିନ୍ଦା
ସୁବର୍ଣ୍ଣରେଖାରେ ବନ୍ୟା ଗଲା କିନ୍ତୁ ଆଜିବି ଦୁର୍ଦ୍ଦଶା ଭୋଗୁଛନ୍ତି ତଳିଆ ଅଞ୍ଚଳ ବାସିନ୍ଦା। ସୁବର୍ଣ୍ଣରେଖା ନଦୀକୁ ପାଣି ନିଷ୍କାସନର ଡ୍ରେନ୍ ବ୍ୟବସ୍ଥା ନ ଥିବାରୁ ଆଜି ବି ପାଣି ଘେରରେ ରହିଛି ଭୋଗରାଇର ଚକ ପାରୁଳିଆ ଗାଁ। ରାସ୍ତା ଉପରେ ପାଣି ଜମିରହିବାରୁ ଲୋକେ ହନ୍ତସନ୍ତ ହେଉଛନ୍ତି। ଆଜିକି ୬ ଦିନ ହେବ ପାଣି ଘେରରେ ଥିବା ବେଳେ ସେମାନଙ୍କ ପାଇଁ ପ୍ରଶାସନ ପକ୍ଷରୁ ନା ଅଛି ଡଙ୍ଗା ର ବ୍ୟବସ୍ଥା ନା ମିଳିଛି କି ସୁଖିଲା ଖାଦ୍ୟ । ଚଳିତ ଥର ବନ୍ୟାରେ କେହି ସରକାରୀ ଅଧିକାରୀ ତାଙ୍କ ପାଖରେ ପହଞ୍ଚି ନାହାନ୍ତି କି କିଛି ସାହାଯ୍ୟ ମିଳିନାହିଁ। ଅନ୍ୟ ପରେ ଧାର ଉଧାର କରି ଚାଷ କରିଥିବା ଜମିରେ ପାଣି ଜମି ରହିବାରୁ ଚାଷ ସଂପୁର୍ଣ୍ଣ ପଚି ସଡି ଯାଇଛି। ସେଥିପାଇଁ ଚିନ୍ତାରେ ଚାଷୀକୂଳ।
୩୧ରୁ ପୁଣି ବଢିବ ବର୍ଷା: ୨୦ ଜିଲ୍ଲାକୁ ୟେଲୋ ୱାର୍ଣ୍ଣିଂ
ଟ୍ରପ ଲାଇନ ପ୍ରଭାବରେ ରାଜ୍ୟରେ ଜାରି ରହିଛି ବର୍ଷା। ଆଜି ପାଇଁ ୨୦ ଜିଲ୍ଲାକୁ ବିଜୁଳି ଘଡଘଡି ବର୍ଷା ନେଇ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ କେନ୍ଦ୍ର। ଉତ୍ତର ଓ ଉପକୂଳ ଓଡ଼ିଶାର କିଛି ଅଂଚଳରେ ହାଲୁକରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି।ଏହିସବୁ ଜିଲ୍ଲାରେ ୩୦ ରୁ ୪୦ କିମି ପବନ ବହିବାର ସମ୍ଭାବନା ରହିଛି। ତେବେ ୩୧ ତାରିଖରୁ ବଢିବ ବର୍ଷାର ପରିମାଣ। ଏକ ତାରିଖରୁ ବଙ୍ଗୋପ ସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହେବା ସମ୍ଭାବନା ରହିଛି। ଉତ୍ତର ପଶ୍ଚିମ ବଙ୍ଗୋପସାଗର ଓ ଉତ୍ତର ଓଡିଶା ଉପକୁଳରେ ପୁଣି ଏକ ଘୂର୍ଣ୍ଣି ବଳୟ ସୃଷ୍ଟି ନେଇ ସମ୍ଭାବନା ରହିଛି। ଏହାର ପ୍ରଭାବରେ ଆସନ୍ତାକାଲିଠାରୁ ସାରା ଓଡ଼ିଶାରେ ହଳୁକାରୁ ମଧ୍ୟମ ଧରଣର ବର୍ଷା ସହ କୋରାପୁଟ ମାଲକାନଗିରି ରାୟଗଡା କେନ୍ଦୁଝର ଓ ମୟୁରଭଞ୍ଜ ଜିଲ୍ଲାରେ ପ୍ରବଳ ବର୍ଷା ନେଇ ୟେଲୋ ଓ୍ବାର୍ଣ୍ଣିଂ ଜାରି କରାଯାଇଛି। ୩ ତାରିଖ ଯାଏ ଏହାର ପ୍ରଭାବ ରହିବ। ଆସନ୍ତା ୨୪ ଘଣ୍ଟା ମଧ୍ୟରେ ବଲାଙ୍ଗୀରରେ ସର୍ବାଧିକ ୩୬.୬ ମିଲିମିଟର ବର୍ଷା ରେକର୍ଡ କରାଯାଇଛି।
ବିଜେଡିର ସାଙ୍ଗଠନିକ ବୈଠକ ଅନୁଷ୍ଠିତ
ବିଜେଡିର ସାଙ୍ଗଠନିକ ବୈଠକ ଅନୁଷ୍ଠିତ। ଗଞ୍ଜାମ କବିସୂର୍ଯ୍ୟନଗର ବ୍ଲକ ତଥା ଆସ୍କା ନିର୍ବାଚନ ମଣ୍ଡଳୀର ୧୨ ଟି ପଂଚାୟତକୁ ନେଇ ବୈଠକ। ଯମୁନା ଶିଦ୍ଧେଶ୍ୱର ପୀଠରେ ବୈଠକ ଅନୁଷ୍ଠିତ ହୋଇଛି । ଏହି ସାଂଗଠନିକ ବୈଠକରେ ଗଞ୍ଜାମ ବିଜେଡି ଜୋନ ସଭାପତି ନଚିକେତା ସ୍ୱାଇଁଙ୍କ ନେତୃତ୍ୱରେ ପୂର୍ବତନ ବିଧାୟିକା ମଞ୍ଜୁଳା ସ୍ୱାଇଁଙ୍କ ନିର୍ଦେଶ କ୍ରମେ ୧୨ ଟି ପଂଚାୟତର ବିଜେଡି ସରପଞ୍ଚ ଓ ସମିତି ସଭ୍ୟ ଉପସ୍ଥିତ ରହି ଦଳକୁ କିଭଳି ଭାବେ ଗ୍ରାସ ରୁଟରେ ସୁଦୃଢ ହେବ ସେ ସମ୍ପର୍କରେ ଆଲୋଚନା ହୋଇଥିଲା l କବିସୂର୍ଯ୍ୟନଗର ବ୍ଲକର ସମସ୍ତ ପଂଚାୟତରେ ଦୀର୍ଘ ଦେଢ଼ବର୍ଷ ହେବ ବିକାଶ ମୂଳକ କାର୍ଯ୍ୟ ଠପ ହୋଇଛି। ଯାହାକୁ ନେଇ ତାତିଛନ୍ତି ଲୋକେ। ଅନ୍ୟପଟେ ବୈଠକରେ କବିସୂର୍ଯ୍ୟନଗର ବ୍ଲକ ବିଜେଡ଼ି ସଭାପତି ଭାବେ ସୁରଥ ଚନ୍ଦ୍ର ପ୍ରଧାନଙ୍କୁ ଦଳ ପକ୍ଷରୁ ସଭାପତି କରିବାକୁ ସର୍ବ ସମ୍ମତି ହୋଇଛି। କାର୍ଯ୍ୟକ୍ରମରେ ବିଜେଡିର ଶତାଧିକ କର୍ମୀ ଉପସ୍ଥିତ ଥିଲେ ।
ଭୁଶୁଡୁଛି ମାଓ ଦୁର୍ଗ: ପୋଲିସ-ମାଓବାଦୀ ଗୁଳିବିନିମୟ
ଭୁଶୁଡୁଛି ମାଓ ଦୁର୍ଗ । ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ ନାରାୟଣପୁର ଅବୁଝମାଡ ଜଙ୍ଗଲରେ ପୋଲିସ-ମାଓବାଦୀ ଗୁଳିବିନିମୟ । କିଛି ମାଓବାଦୀ ମୃତାହତ ହୋଇଥିବା ସୂଚନା ମିଳିଛି । ଅପରେସନ ବେଳେ ଘଟଣା ସ୍ଥଳରୁ ଶତାଧିକ ଅତ୍ୟାଧୁନିକ ବନ୍ଧୁକ ସହ ବିପୁଳ ପରିମାଣର ବିସ୍ପୋରକ ସାମଗ୍ରୀ ଜବତ ହୋଇଛି । LMG , AK-47 ରାଇଫଲ୍, INSAS, SLR, ଷ୍ଟେନ୍ ଗନ୍ ସହିତ BGL ସେଲ୍, ଡେଟୋନେଟର, କାର୍ଡେକ୍ସ ଭଳି ଅତ୍ୟାଧୁନିକ ଅସ୍ତ୍ରଶସ୍ତ୍ର ଏବଂ ୩୦୦ ରୁ ଅଧିକ ସାମଗ୍ରୀ ଜବତ ହୋଇଛି । ଏଥିସହ DRG, STF ଏବଂ ITBP ଯବାନଙ୍କ ମିଳିତ ଅପରେସନ ବେଳେ ଏହି ସଫଳତା ମିଳିଛି । ଅବୁଝମାଡ ଜଙ୍ଗଲରେ ପ୍ରବଳ ବର୍ଷା ସତ୍ତ୍ୱେ, ସୁରକ୍ଷା ବାହିନୀ ଲଗାତାର ୫ ଦିନ ଧରି ଅପରେସନ୍ ଚଳାଇଥିଲେ ।।ଜଙ୍ଗଲରେ ମାଓବାଦୀଙ୍କ କୁତୁଲ ଏରିଆ କମିଟି ସୁରକ୍ଷାକର୍ମୀ ଦେଖି ଆଖିବୁଜା ଗୁଳି ଚାଳନା କରିଥିଲେ । ଯାହାର ପାଲଟା ଜବାବ ଦେଇଥିଲେ ସୁରକ୍ଷା କର୍ମୀ । ଘଟଣାରେ କିଛି ମାଓବାଦୀ ପ୍ରାଣ ହରାଇଥିବା ଆଶଙ୍କା କରୁଛି ପୋଲିସ ।ଏନକାଉଣ୍ଟର ପରେ ସର୍ଚ୍ଚ ଅପରେସନ ଜାରି ରହିଛି ।
ଶ୍ରୀମନ୍ଦିର ଭିତର ଫଟୋ ସୋସିଆଲ ମିଡିଆରେ ଅପଲୋଡ୍
ଶ୍ରୀମନ୍ଦିର ଭିତର ଫଟୋ ସୋସିଆଲ ମିଡିଆରେ ଅପଲୋଡ୍। ସିକିମ ମୁଖ୍ୟମନ୍ତ୍ରୀଙ୍କ ସୋସିଆଲ ମିଡିଆ ଆଇଡିରୁ ଏହି ଫଟୋ ଅପଲୋଡ୍ ହୋଇଛି। ଶ୍ରୀମନ୍ଦିର ପରିସର ମା’ ବିମଳା ମନ୍ଦିର ନିକଟର କିଛି ଫଟୋ ଅପଲୋଡ ହୋଇଛି। ତେବେ କିପରି ମୁଖ୍ୟମନ୍ତ୍ରୀଙ୍କ ସୋସିଆଲ ସାଇଟକୁ ଫଟୋ ଅପଲୋଡ ହେଲା ଏହାକୁ ନେଇ ନିନ୍ଦା କରିଛି ଆମ ଆଦମୀ ପାର୍ଟି। ସିକିମ ମୁଖ୍ୟମନ୍ତ୍ରୀ ଶ୍ରୀମନ୍ଦିର ଦର୍ଶନ ପାଇଁ ଆସିଥିଲେ। ତାଙ୍କ ସହ ଜିଲ୍ଲାପାଳ,ଏସପି, ପରିଚାଳନା କମିଟି ସଦସ୍ୟଙ୍କ ସହ ବିଜେପିର ଦଳୀୟ କର୍ମୀ ଓ ସୁରକ୍ଷା ବାହିନୀ ଉପସ୍ଥିତ ଥିଲେ । ତେବେ ଏତେ ସୁରକ୍ଷା ଥାଇ ମଧ୍ୟ ଏ ଫୋଟୋ ଉଠିଲା କିପରି ଓ ଖୋଦ ମୁଖ୍ୟମନ୍ତ୍ରୀଙ୍କ idରେ ଉପଲୋଡ ହେଲା କିପରି ଏହାକୁ ନେଇ ପ୍ରଶ୍ନ ଉଠାଇଛି ଆମ ଆଦମୀ ପାର୍ଟି।ପରିଚାଳନା କମିଟି ସଦସ୍ୟ ଥାଇ ମଧ୍ୟ ତାଙ୍କ ସହ ଥାଇ ଏହା କିପରି ହେଲା? ଲଗାତାର ଏଭଳି ଘଟଣା ସାମ୍ନାକୁ ଆସୁଥିବାରୁ ମନ୍ଦିର ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ସ୍କୁଟର ଡିକିରେ ଢ଼ମଣା ସାପ: ଦେଢ଼ ଫୁଟର ସାପକୁ ଉଦ୍ଧାର କଲା ସ୍ନେକ ହେଲ୍ପ ଲାଇନ
ସ୍କୁଟର ଡିକିରେ ଢ଼ମଣା ସାପ। ଦେଢ଼ ଫୁଟର ସାପକୁ ଉଦ୍ଧାର କଲା ସ୍ନେକ ହେଲ୍ପ ଲାଇନ। ଭୁବନେଶ୍ଵର ଚନ୍ଦ୍ରଶେଖରପୁର ସୁଜିତ୍ ଗିରି ନିଜର ସ୍କୁଟର ଧରି ରାଜମହଲ ଛକକୁ ମେଡିସିନ ଆଣିବା ପାଇଁ ଯାଇଥିଲେ। ମେଡିସିନ ରଖିବା ପାଇଁ ସ୍କୁଟର ଡିକି ଖୋଲିବା ମାତ୍ରେ ଏକ ସାପ ତା ଭିତରେ ଦେଖିଥିଲେ। ଭୟରେ ତାଙ୍କ ହାତରୁ ସିଟ ଖସି ପଡିଲା।ବିକଳରେ ସିଟକୁ ଲକ୍ କରି ଦେଇ ସ୍ନେକ୍ ହେଲ୍ପ ଲାଇନକୁ ଉଦ୍ଧାର ପାଇଁ ଫୋନ୍ କରିଥିଲେ। ଖବର ପାଇ ସ୍ନେକ୍ ହେଲ୍ପ ଲାଇନ ସଦସ୍ୟ ଆଶିଷ ବେହେରା ଘଟଣାସ୍ଥଳରେ ପହଞ୍ଚି, ସିଟକୁ ଟେକିବା ବେଳକୁ ସାପଟି ଚାପି ହୋଇ ରହିଥିବା ଦେଖିବାକୁ ପାଇଥିଲେ। ସୁଜିତ ଲକ୍ କରି ଦେବା ଫଳରେ ସାପଟି ଆଉ କୁଆଡେ ଯିବାର ସୁଯୋଗ ହିଁ ନଥିଲା। ପ୍ରାୟ ଦେଢ଼ ଫୁଟ ଲମ୍ବର ଢମଣା ସାପ ଛୁଆକୁ ଆଶିଷ ଉଦ୍ଧାର କରିଥିଲେ। ସାପଟିର ଲାଞ୍ଜ ପଟକୁ ସିଟ ଚାପି ହୋଇଥିବାରୁ ସାପଟିର ବିଶେଷ କିଛି କ୍ଷତି ହୋଇ ନଥିଲା।ସାପଟିକୁ ସହର ବାହାରେ ଏକ ପ୍ରାକୃତିକ ଆବାସସ୍ଥଳୀରେ ଛାଡ଼ି ଦିଆଯାଇଛି।
ଭସାଣିରେ କଟକଣାକୁ ବେଖାତିର ! କଟକଣା ସତ୍ତ୍ଵେ ଶୁଭିଲା ଡିଜେର ବିକଟାଳ ଶବ୍ଦ
କଟକଣା ସତ୍ଵେ ଶୁଭିଲା ଡିଜେର ବିକଟାଳ ଶବ୍ଦ। ଡିଜେରୁ ବର୍ତ୍ତିଲାନି ବାଲେଶ୍ୱର ମେଡିକାଲ। ଗତକାଲି ରାତିରେ ବାଲେଶ୍ୱର ସହରରେ ପ୍ରଥମ ପର୍ଯ୍ୟାୟ ଗଣେଶ ଭସାଣି ଚାଲିଥିବା ବେଳେ ବାଲେଶ୍ୱର ମେଡିକାଲର ଦ୍ୱିତୀୟ ଫାଟକ ନିକଟରେ କିଛି ଏପରି ଦୃଶ୍ୟ ଦେଖିବାକୁ ମିଳିଥିଲା। ଡିଜେର ବିକଟାଳ ଶବ୍ଦର କମ୍ପି ଉଠିଥିଲା ମେଡିକାଲ ପରିସର।ଫଳରେ ଅତିଷ୍ଠ ହୋଇ ରୋଗୀ ଓ ସମ୍ପର୍କୀୟ ବାହାରକୁ ବାହାରି ଆସିଥିଲେ। ମେଡିକାଲ ପରିସର ଓ ଏହାର ସମ୍ମୁଖ ରାସ୍ତା ସାଇଲେଣ୍ଟ ଜୋନ ହୋଇଥିବାବେଳେ ପୋଲିସ ପ୍ରଶାସନ ଏପରି କାର୍ଯ୍ୟକୁ କାହିଁକି ବନ୍ଦ କଲାନାହିଁ ତାକୁ ନେଇ ଉଠିଛି ପ୍ରଶ୍ନ। ଠାକୁର ବିସର୍ଜନ ସମୟରେ ପ୍ରଚଣ୍ଡ ଡ଼ିଜେ ଶବ୍ଦରେ ସହର ଥରହର ହେବା ନେଇ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଛନ୍ତି। ଜିଲ୍ଲା ପ୍ରଶାସନର ଏନେଇ ପୂର୍ବ ନିଷ୍ପତ୍ତି ଅନୁସାରେ ମୂର୍ତ୍ତିର ଉଚ୍ଚତା, ରାତି ୧୦ ସୁଦ୍ଧା ଭସାଣ ଶେଷ କରିବାକୁ ଆଲୋଚନା ଦିଗହରା ହୋଇପଡିଛି। ବରିଷ୍ଠ ପୋଲିସ ଅଧିକାରୀ ଶବ୍ଦ ପ୍ରଦୂଷଣ ନେଇ ନୀରବ କାହିଁକି ? ନାଚଗୀତକୁ କେହି ବିରୋଧ କରୁନାହାନ୍ତି କିନ୍ତୁ ଉଚ୍ଚ ଶବ୍ଦରେ ଡିଜେ ବଜାଇବାକୁ ନେଇ ବିରକ୍ତି ପ୍ରକାଶ କରିଛନ୍ତି। ବିଶେଷକରି ହୃଦରୋଗୀ, ଶିଶୁ, ପ୍ରସୂତି ଏବଂ ବୟସ୍କଙ୍କ କ୍ଷେତ୍ରରେ ଉଚ୍ଚ ଶବ୍ଦ ଅତ୍ୟନ୍ତ ବିପଦ ସାଜିପାରେ ବୋଲି ମତପ୍ରକାଶ ପାଇଛି।
ରାଜ୍ୟରେ ସାର ଯୋଗାଣରେ ଅବ୍ୟବସ୍ଥା ସମ୍ପର୍କରେ କେନ୍ଦ୍ର ସାର ମନ୍ତ୍ରୀଙ୍କୁ ଚିଠି ଲେଖିଲେ ବିରୋଧୀ ଦଳ ନେତା
ରାଜ୍ୟରେ ସାର ଯୋଗାଣରେ ଅବ୍ୟବସ୍ଥା ସମ୍ପର୍କରେ କେନ୍ଦ୍ର ରସାୟନ ଓ ସାର ମନ୍ତ୍ରୀଙ୍କୁ ଚିଠି ଲେଖିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ। ସାରା ରାଜ୍ୟରେ ସାର ଯୋଗାଣରେ ବ୍ୟାପକ ଅବ୍ୟବସ୍ଥା ଦେଖାଦେଇଛି। କଳାବଜାର, ଅପମିଶ୍ରଣ ଏବଂ ବଜାରରେ ୟୁରିଆ ମିଳୁ ନଥିବାରୁ ଚାଷୀକୁଳ ହନ୍ତସନ୍ତ ହେଉଛନ୍ତି। ବିଭିନ୍ନ ସ୍ଥାନରେ ବିଶେଷ କରି ଆଦିବାସୀ ବହୁଳ ଜିଲ୍ଲାରେ ସାର ସମସ୍ୟା ଉତ୍କଟ ହୋଇଛି। ଚାଷୀ କୁଳର ଏ ସମସ୍ୟା ନେଇ ଉଦବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। କେନ୍ଦ୍ର ସାର ଓ ରସାୟନ ମନ୍ତ୍ରୀ ଜେପି ନଡ୍ଡାଙ୍କୁ ପତ୍ର ଲେଖି ସାର ଯୋଗାଣରେ ଅବ୍ୟବସ୍ଥା ସମ୍ପର୍କରେ ଅବଗତ କରାଇଛନ୍ତି। ଏହାସହ ଓଡିଶା ଚାଷୀ କୂଳର ବୃହତ୍ତର ସ୍ୱାର୍ଥ ଦୃଷ୍ଟିରୁ ତୁରନ୍ତ ଆବଶ୍ୟକ ୟୁରିଆ ଯୋଗାଣ ସୁନିଶ୍ଚିତ କରିବାକୁ ଦାବି କରିଛନ୍ତି। କୃଷି ଓଡିଶା ଅର୍ଥନୀତିର ମୁଖ୍ୟ ଆଧାର। ଆମର ୭୦ ଭାଗରୁ ଅଧିକ ଲୋକଙ୍କ କୃଷି ହିଁ ଜୀବିକା ଯୋଗାଇଥାଏ। ଗତ ଦୁଇ ଦଶନ୍ଧିରେ ଓଡିଶା କୃଷି କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଥିଲା। ୨୦୦୦ମସିହାରେ ଚାଉଳ ପାଇଁ ଅନ୍ୟ ଉପରେ ନିର୍ଭର କରୁଥିବା ଓଡିଶା ଆଜି ଦେଶର ସାଧାରଣ ବଣ୍ଟନ ବ୍ୟବସ୍ଥାକୁ ଚାଉଳ ଯୋଗାଣରେ ଏକ ପ୍ରମୁଖ ରାଜ୍ୟ ହୋଇ ପାରିଛି। କୃଷି କ୍ଷେତ୍ରରେ ବୈଷୟିକ ଜ୍ଞାନର ପ୍ରୟୋଗ ଓ ସାର ବିହନ ଆଦିର ଉତ୍ତମ ବଣ୍ଟନ ଓଡିଶାକୁ ଏ ସଫଳତା ଆଣି ଦେଇଥିଲା।
ଓଡିଶାରେ ୭.୯୪ ଲକ୍ଷ ଟନ ସାର ମହଜୁଦ ଥିବା ରାଜ୍ୟ ସରକାର ଦାବୀ କରୁଥିବା ବେଳେ ଚାଷୀ କିନ୍ତୁ ସାର ପାଉନି। ୟୁରିଆ ସରକାରୀ ଦର ଠାରୁ ଅଧିକ ଦାମରେ ବିକ୍ରି ହେଉଛି। ଓଡିଶା ସରକାରଙ୍କ ସଂସ୍ଥା Markfed ଚାଷୀଙ୍କ ବଦଳରେ ଘରୋଇ ଡିଲରଙ୍କୁ ରିହାତି ଦରରେ ସାର ବିକୁଛି। ତେଣୁ ଚାଷୀ ଖରିଫ ଋତୁରେ ଚାଷ କାମ ଛାଡି ସାର ପାଇଁ ରାଜ ରାସ୍ତାକୁ ଓଲ୍ହାଇବା ଚିନ୍ତାର ବିଷୟ ବୋଲି କହିଛନ୍ତି ନବୀନ ପଟ୍ଟନାୟକ। ଯୋଗାଣ ବ୍ୟବସ୍ଥାକୁ ପରିଚାଳନା ସହିତ ସାର ଅଭାବ ଓ ଦୁର୍ନୀତି ଯୋଗୁଁ ଚାଷୀକୁ ଆଜି ଏ ଅବସ୍ଥାର ସମ୍ମୁଖୀନ ହେବାକୁ ପଡୁଛି ବୋଲି ଉଦବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ନବୀନ। ୨୦୧୮ରେ ଶିଳାନ୍ୟାସ କରାଯାଇଥିବା ତାଳଚେର ସାର କାରଖାନା ୩୬ ମାସରେ ଶେଷ ହେବ ବୋଲି ଘୋଷଣା କରାଯାଇଥିଲେ ବି ସାତ ବର୍ଷ ପରେ ବି କାର୍ଯ୍ୟକ୍ଷମ ହୋଇ ନ ପାରିବା ଦୁଃଖର ବିଷୟ। ଖରିଫ ଋତୁ ଆରମ୍ଭରେ ସାର ଅଭାବ ତଥା ଯୋଗାଣରେ ଚାଲଥିବା ଅବ୍ୟବସ୍ଥାକୁ ରୋକିବାକୁ ଯଦି ପଦକ୍ଷେପ ନିଆ ନଯାଏ ତେଵେ କୃଷି ଉତ୍ପାଦନରେ ବ୍ୟାଘାତ ସୃଷ୍ଟି ସହ ଚାଷୀ ଭାଇ ଭଉଣୀଙ୍କ ଜୀବିକାକୁ ମଧ୍ୟ ଏହା ପ୍ରଭାବିତ କରିବ ବୋଲି ସତର୍କ କରିଛନ୍ତି ବିରୋଧୀ ଦଳ ନେତା।
ପୁଣି ଚର୍ଚ୍ଚାରେ ପୂର୍ବତନ ଉପରାଷ୍ଟ୍ରପତି: ପେନସନ୍ ପାଇଁ ଆବେଦନ କଲେ ଜଗଦୀପ ଧନଖଡ଼
ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ ପୁଣି ଥରେ ଚର୍ଚ୍ଚାକୁ ଆସିଛନ୍ତି । ଧନଖଡ଼ ରାଜସ୍ଥାନ ବିଧାନସଭାରେ ପେନସନ ପାଇଁ ଆବେଦନ କରିଛନ୍ତି । ୧୯୯୩ରେ କଂଗ୍ରେସ ଟିକେଟରେ ଆଜମେର ଜିଲ୍ଲାର କିଶନଗଢ଼ ଆସନରୁ ଧନଖଡ଼ ବିଧାୟକ ଭାବେ ନିର୍ବାଚିତ ହୋଇଥିଲେ । ବିଧାୟକ ରହିଥିବାରୁ ଏବେ ତାଙ୍କୁ ବିଧାନସଭାରୁ ପେନସନ ମିଳିବାର ଅଧିକାର ରହିଛି । ଧନଖଡ଼ ଏବେ ୭୪ ବର୍ଷ ବୟସରେ ଉପନୀତ ହୋଇଥିବା ବେଳେ ନିୟମ ମୁତାବକ, ତାଙ୍କୁ ରାଜସ୍ଥାନ ବିଧାନସଭାରୁ ପାଖାପାଖି ୪୨ ହଜାର ଟଙ୍କା ପେନସନ ମିଳିବ । ରାଜସ୍ଥାନରେ ନେତାଙ୍କ ପାଇଁ ଦ୍ବିତୀୟ ଓ ତୃତୀୟ ପେନସନ ବ୍ୟବସ୍ଥା ରହିଛି । ଅର୍ଥାତ ଯଦି କୌଣସି ବ୍ୟକ୍ତି ସାଂସଦ ଓ ବିଧାୟକ ଉଭୟ ପଦରେ ରହିଥିବେ, ତେବେ ସେ ଉଭୟ ପଦ ପାଇଁ ପେନସନ ପାଇ ପାରନ୍ତି । ସେହି କାରଣରୁ ଅନେକ ପୂର୍ବତନ ନେତା ଏକସଙ୍ଗେ ଅଲଗା ଅଲଗା ପଦ ପାଇଁ ପେନସନର ଫାଇଦା ଉଠାଉଛନ୍ତି । ଧନଖଡ଼ଙ୍କ ପେନସନ ଆବେଦନ ପାଇବା ପରେ ପ୍ରକ୍ରିୟା ଆରମ୍ଭ ଜାରି ରହିଥିବା ବିଧାନସଭାର ଅଧ୍ୟକ୍ଷ ସୂଚନା ଦେଇଛନ୍ତି ।