ଆମେରିକା ସହ ଭାରତ ଏକ ଐତିହାସିକ LPG ଡିଲ୍ କରିଛି । ଏହାଫଳରେ ଏଲପିଜି ସପ୍ଲାଇରେ କୌଣସି ସମସ୍ୟା ଦେଖାଦେବ ନାହିଁ । ଏହି ଡିଲକୁ ନେଇ ବହୁଦିନ ଧରି ଚର୍ଚ୍ଚା ଚାଲିଆସୁଥିଲା । ଆମେରିକା ସହ ଏକ ବଡ଼ ଏନର୍ଜି ଡିଲ ଉପରେ ପ୍ରସ୍ତୁତି ଚାଲିଥିବା ନେଇ ଭାରତ ପକ୍ଷରୁ କୁହାଯାଉଥିଲା । କେନ୍ଦ୍ରୀୟ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂହ ପୁରୀ ଘୋଷଣା କରିଛନ୍ତି ଯେ, ଭାରତୀୟ ପବ୍ଲିକ ସେକ୍ଟରର ତୈଳ କମ୍ପାନୀମାନେ ପ୍ରଥମ ଥର ସଂଯୁକ୍ତ ରାଜ୍ୟ ଆମେରିକାରୁ ଏଲପିଜି ଆମଦାନୀ କରିବା ପାଇଁ ଏକ ବର୍ଷର ବୁଝାମଣା କରିଛନ୍ତି ।
ମନ୍ତ୍ରୀ ଶ୍ରୀ ପୁରୀ ଏକ ସୋସିଆଲ ମିଡ଼ିଆ ପୋଷ୍ଟ ଜରିଆରେ ଏହି ଡିଲ ବାବଦରେ ସୂଚନା ଦେଇଛନ୍ତି । ସେ କହିଛନ୍ତି ଏହି ଡିଲ ଦେଶର ଏଲପିଜି ବଜାର ପାଇଁ ଏକ ’ଐତିହାସିକ ପଦକ୍ଷେପ’ । ବିଶ୍ବର ସର୍ବବୃହତ ଏଲପିଜି ବଜାର ମଧ୍ୟରେ ଅନ୍ୟତମ ଭାରତ ଏବେ ଆମେରିକା ପାଇଁ ଖୋଲି ଯାଇଛି । ଭାରତର ଲୋକଙ୍କୁ ସୁରକ୍ଷିତ ଏଲପିଜି ପ୍ରଦାନ ପାଇଁ ପ୍ରୟାସ କରାଯାଇଛି । ଆମେ ନିଜର ଏଲପିଜି ଉତ୍ସରେ ବିବିଧତା ଆଣୁଛୁ । ଏକ ମହତ୍ତ୍ବପୂର୍ଣ୍ଣ ଘଟଣାକ୍ରମେ, ଭାରତର ସରକାରୀ ତୈଳ କମ୍ପାନୀମାନେ ପାଖାପାଖି ୨.୨ ମେଟ୍ରିକ ଟନ ପ୍ରତିବର୍ଷ ଏଲପିଜି ଆମଦାନୀ କରିବା ପାଇଁ ୧ ବର୍ଷର ବୁଝାମଣା ସଫଳତାପୂର୍ବକ ପୂରା କରିଛନ୍ତି ।
ଗତବର୍ଷ ବିଶ୍ବ ସ୍ତରରେ ରୋଷେଇ ଗ୍ୟାସର ଦର ୬୦ ପ୍ରତିଶତରୁ ଅଧିକ ବୃଦ୍ଧି ହେବା ପରେ ବି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଜ୍ଜ୍ବଳା ଗ୍ରାହକଙ୍କୁ ପ୍ରତି ସିଲିଣ୍ଡର କେବଳ ୫୦୦-୫୫୦ ଟଙ୍କାରେ ଯୋଗାଇ ଦେଇଥିଲେ । ଉକ୍ତ ସିଲିଣ୍ଡର ପିଛା ବାସ୍ତବିକ ମୂଲ୍ୟ ୧,୧୦୦ରୁ ଅଧିକ ରହିଥିଲା । ଅନ୍ତରାଷ୍ଟ୍ରୀୟ ମୂଲ୍ୟ ଝଟକାରୁ ଗ୍ରାହକଙ୍କୁ ବଞ୍ଚାଇବା ପାଇଁ ଭାରତ ସରକାର ପ୍ରତିବର୍ଷ ୪୦ ହଜାର କୋଟିରୁ ଅଧିକ ଟଙ୍କାର ବୋଝ ଉଠାଉଛନ୍ତି ବୋଲି କେନ୍ଦ୍ରମନ୍ତ୍ରୀ କହିଛନ୍ତି ।
