ସାର ପାଇଁ ଚାଷୀଙ୍କ ଲମ୍ବା ଲାଇନ। କଳାହାଣ୍ଡି ଜିଲ୍ଲାରେ ସାର ସଙ୍କଟ। ସକାଳୁ ସକାଳୁ କେସିଙ୍ଗା ବ୍ଳକ ପଷ୍ଟିଗୁଡ଼ି ସମବାୟ ସମିତି ସମ୍ମୁଖରେ ସାର ପାଇଁ ଚାଷୀଙ୍କ ଲମ୍ବା ଲାଇନ। ଆବଶ୍ୟକତା ଠାରୁ କମ ପରିମାଣର ସାର୍ ଆସିଥିବା ବେଳେ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳୁଛି।
ପୁରୀ ବେଳାଭୂମିରେ ପର୍ଯ୍ୟଟକଙ୍କୁ ଲୁଟ୍
ପୁରୀ ବେଳାଭୂମିରେ ପର୍ଯ୍ୟଟକଙ୍କୁ ଲୁଟ୍। 100 କି 200 ଟଙ୍କା ନୁହେଁ ହଜାରହଜାର ଟଙ୍କା ଲୁଟ୍ କରି ଧରାପଡିଛନ୍ତି ଭିକ୍ଷାବୃତ୍ତି କରୁଥିବା ଜଣେ ମହିଳା ଓ ଜଣେ ପୁରୁଷ। ଦୁଇରୁ ତିନି ଜଣ ପର୍ଯ୍ୟଟକ ପୁରୀ ବେଳାଭୂମିକୁ ବୁଲିବାକୁ ଆସିଥିଲେ। ସେମାନେ ଜଣେ ମହିଳାଙ୍କୁ ମଦ ଆଣିବାକୁ ଟଙ୍କା ଦେଇଥିଲେ। ସମ୍ପୃକ୍ତ ମହିଳା ସେମାନଙ୍କ ପାଇଁ ମଦ ଆଣି ଦେଇଥିଲେ।ପର୍ଯ୍ୟଟକମାନେ ମଦ ପିଇ ସାରି ବେଳାଭୂମିରେ ଶୋଇପଡିଥିଲେ।ଏହାର ସୁଯୋଗ ନେଇ ସମ୍ପୃକ୍ତ ମହିଳା ଓ ଜଣେ ପୁରୁଷ ପର୍ଯ୍ୟଟକମାନଙ୍କ ଠାରୁ ହଜାର ହଜାର ଟଙ୍କା ଲୁଟ୍ କରିଥିଲେ। କିନ୍ତୁ ବେଳାଭୂମିରେ ଥିବା କିଛି ଲାଇଫଗାର୍ଡ ଏ ସମ୍ପର୍କରେ ଜାଣି ସମ୍ପୃକ୍ତ ଲୁଟେରା ମହିଳା ଓ ପୁରୁଷଙ୍କୁ ଧରିଥିଲେ। ତାଙ୍କଠାରୁ ଲୁଟ୍ ଟଙ୍କା ଜବତ କରି ପର୍ଯ୍ୟଟକ ମାନଙ୍କୁ ଫେରାଇଥିଲେ। ସବୁବେଳେ ପର୍ଯ୍ୟଟକଙ୍କ ପାଇଁ ବେଳାଭୂମିରେ ମୁତୟନ ହୋଇଥିବା ଲାଇଫଗାର୍ଡ କେବଳ ଯେ ଗଭୀର ସମୁଦ୍ରରୁ ସେମାନଙ୍କୁ ବଞ୍ଚାଇଥାନ୍ତି ତା ନୁହେଁ ବରଂ ପର୍ଯ୍ୟଟକଙ୍କ ଠାରୁ ଟଙ୍କା ଲୁଟ୍ ହୋଇଥିବା ଟଙ୍କା ଲୁଟେରାଙ୍କଠାରୁ ଜବତ କରି ଫେରାଇଥିବାରୁ ସାଧାରଣରେ ଲାଇଫଗାର୍ଡଙ୍କୁ ବେଶ୍ ପ୍ରଶଂସା କରାଯାଇଛି।
ଲଘୁଚାପଜନିତ ବର୍ଷାରେ ଫୁଲିବାରେ ଲାଗିଛି ୪ ନଦୀ
ଲଘୁଚାପଜନିତ ବର୍ଷାରେ ଫୁଲିବାରେ ଲାଗିଛି ବୈତରଣୀ, ସାଳନ୍ଦୀ, ରେଵ ଓ କପାଳୀ ନଦୀ। ଭଦ୍ରକ ଜିଲ୍ଲା ଚାନ୍ଦବାଲିର ୪ପଞ୍ଚାୟତ, ଧାମନଗରର ୮ ପଞ୍ଚାୟତ ଓ ତିହିଡିର ୫ ପଞ୍ଚାୟତରେ ବନ୍ୟା ସ୍ଥିତି ଲାଗି ରହିଛି। ହଜାର ହଜାର ହେକ୍ଟର ଚାଷଜମିରେ ମାଡି ଚାଲିଛି ବନ୍ୟାପାଣି। ଗତ ବନ୍ୟାରେ ଯାହା କିଛି ଧାନତଳି ରହିଥିଲା ଚଳିତ ବନ୍ୟାରେ ପଚିସଢି ଯିବା ଆଶଙ୍କା ସୃଷ୍ଟି ହୋଇଛି। ଆଖଣ୍ଡଳମଣି -କୁଆଖିଆ ୨୦ନମ୍ଵର ଜାତୀୟ ରାଜପଥର ବୋଡକ ଠାରେ ରାସ୍ତା ଉପରେ ୨ ଫୁଟ ଉଚ୍ଚରେ ବନ୍ୟାପାଣି ପ୍ରବାହିତ ହେଉଛି। ଫଳରେ ଯାତାୟାତ ବାଧାପ୍ରାପ୍ତ ହୋଇଛି।ବନ୍ୟା ପାଣି ରାସ୍ତା ପାର ହୋଇ ଚାଷ ଜମିକୁ ବୁଡାଇବା ସହ ତଳିଆ ଅଞ୍ଚଳକୁ ପ୍ରବେଶ କରିବାରେ ଲାଗିଛି। ଯାହାଫଳରେ ତଳିଆ ଅଞ୍ଚଳ ଲୋକମାନେ ଭୟଭିତ ହୋଇପଡିଛନ୍ତି। ବୈତରଣୀ ନଦୀରେ ଏହା ତୃତୀୟ ବନ୍ୟା ହୋଇଥିବାରୁ ଚାନ୍ଦବାଲି, ଧାମନଗର, ତିହିଡି ପଞ୍ଚାୟତର ଚାଷ ସମ୍ପୁର୍ଣ୍ଣ ଉଜୁଡିଯିଵାର ଆଶଙ୍କା ଦେଖାଦେଇଛି।
’ମୋଦୀ ଓ ମୁଁ ସର୍ବଦା ବନ୍ଧୁ ହୋଇ ରହିବୁ…..’: ଭାରତ-ଚୀନ ହାତ ମିଳାଇବା ପରେ ବଦଳିଲା ଟ୍ରମ୍ପଙ୍କ ସ୍ବର
ଭାରତ ଓ ଆମେରିକା ମଧ୍ୟରେ ବର୍ତ୍ତମାନ ସମୟରେ ବିବାଦ ଦେଖିବାକୁ ମିଳିଛି । ଋଷରୁ ତେଲ କରିବାକୁ ନେଇ ଆମେରିକା ଭାରତ ଉପରେ ଅତିରକ୍ତ ୨୫ ପ୍ରତିଶତ ଟାରିଫ ଲଗାଇଛି । ଏପରି ଭାବେ ଆମେରିକା ଭାରତ ଉପରେ ମୋଟ ୫୦ ପ୍ରତିଶତ ଟାରିଫ ଲଗାଇଛି । ଏପରି ସ୍ଥିତିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମ୍ପର୍କରେ ଏକ ବଡ଼ ବୟାନ ଦେଇଛନ୍ତି ।
ଟ୍ରମ୍ପ କହିଛନ୍ତି, ଭାରତ ଓ ଆମେରିକା ସମ୍ବନ୍ଧରେ କିଛିଟା ତିକ୍ତତା ଆସିଥିଲେ ବି ମୁଁ ଓ ମୋଦୀ ବନ୍ଧୁ ହୋଇ ରହିବୁ । ମୋଦୀ ଜଣେ ଉଚ୍ଚକୋଟୀର ପ୍ରଧାନମନ୍ତ୍ରୀ । ସେ ମହାନ ଅଟନ୍ତି । ମାତ୍ର ବର୍ତ୍ତମାନ ସମୟରେ ମୋଦୀ ଯାହା କରୁଛନ୍ତି, ତାହା ମୋତେ ପସନ୍ଦ ନୁହେଁ । ମାତ୍ର ଭାରତ-ଆମେରିକା ସମ୍ପକର୍ ବହୁତ ସ୍ବତନ୍ତ୍ର । ଏହାକୁ ନେଇ ଚିନ୍ତା କରିବାର କୌଣସି ଆବଶ୍ୟକତା ନାହିଁ । ଦୁଇ ଦେଶ ମଧ୍ୟରେ କେବେ କେବେ ଏପରି ପରିସ୍ଥିତି ଦେଖିବାକୁ ମିଳିଥାଏ ।
ଧୀରେ ଧୀରେ ଖସୁଛି ଜଳକା ନଦୀର ଜଳସ୍ତର
ଧୀରେ ଧୀରେ ଖସୁଛି ଜଳକା ନଦୀର ଜଳସ୍ତର। ଜଳକା ନଦୀର ଉପର ମୁଣ୍ଡରେ ଲଗାଣ ବର୍ଷା କାରଣରୁ ବିପଦ ସଙ୍କେତ ଅତିକ୍ରମ କରିଥିଲା। କିନ୍ତୁ ଗତକାଲିଠୁୁ ଏହି ନଦୀ ଧୀରେ ଧୀରେ କମୁଛି। ଉପରେ ମୁଣ୍ଡାରେ ବର୍ଷା ନ ଥିବାରୁ ଗାଁ ରୁ ପାଣି ଖସୁଛି। ବନ୍ୟା ସ୍ଥିତି ସୁଧାର ଆସିଛି। କିନ୍ତୁ ଜମି ରହିଛି ଚାଷ ଜମିରେ ପାଣି। ଯାହାକୁ ନେଇ ଚିନ୍ତା ରେ ଚାଷୀ। ଲଗାଣ ବର୍ଷା ଯୋଗୁଁ ବାଲେଶ୍ଵରର ବସ୍ତା ବ୍ଲକ ଓ ସଦର ବ୍ଲକର ଅନେକ ପଞ୍ଚାୟତରେ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା। ଅନେକ ଗାଁ ଜଳବନ୍ଦୀ ହୋଇଥିଲେ। ସେହିପରି ଭଦ୍ରକ ଜିଲ୍ଲାର ଚାନ୍ଦବାଲି ଓ ଧାମନଗର ବ୍ଲକରେ ମଧ୍ୟ ସ୍ଥିତିରେ ସୁଧାର ଆସିଛି। ବୈତରଣୀ ନଦୀର ପାଣି କମିଥିବାରୁ ଏହି ଗାଁରୁ ପାଣି ଛାଡ଼ିବାରେ ଲାଗିଛି। କିନ୍ତୁ ଲୋକଙ୍କ ଦୁର୍ଦ୍ଦଶା କମି ନାହିଁ। କାରଣ ବହୁ ଅଞ୍ଚଳ ଏବେ ବି ପାଣି ଘେରରେ ରହିଛି।
ହୀରାକୁଦର ୨୪ଟି ଗେଟ୍ ଖୋଲିବା ପରେ ବ୍ରିଜ ଉପରେ ତିନି ଫୁଟ୍ ର ପାଣି
ହୀରାକୁଦର ୨୪ଟି ଗେଟ୍ ଖୋଲିବା ପରେ ସମ୍ବଲପୁର ନିକଟ ଗୁଣ୍ଡେରପୁର ବ୍ରିଜ ଉପରେ ତିନି ଫୁଟ୍ ର ପାଣି ଚାଲୁଛି। ସମ୍ବଲପୁର-ସୋନପୁର ମୁଖ୍ୟ ରାସ୍ତାରେ ମହାନଦୀ ପାଣି ଚାଲୁଛି। ଏହା ଦ୍ଵାରା ଯାତାୟତ ବାଧାପ୍ରାପ୍ତ ହୋଇଛି।ସେପଟେ ସମ୍ବଲପୁର ସହର ପାଣି ମଧ୍ୟ ନଦୀକୁ ନିଷ୍କାସିତ ହୋଇପାରୁନି। ଏହି କାରଣରୁ କେତେକ ସ୍ଥାନରେ ପାଣି ଜମିଛି। ଯଦି ଆହୁରି ବର୍ଷା ହେଉ ଓ ହୀରାକୁଦର ଅଧିକ ଗେଟ୍ ଖୋଲାଯାଏ, ତେବେ ସମ୍ବୂଲପୁର ସହରର ତଳିଆ ଅଞ୍ଚଳରେ ରହୁଥିବା ଲୋକଙ୍କ ଘରେ ପାଣି ପଶିବାର ଆଶଙ୍କା ଅଛି।
ଗୁରୁ ଦିବସରେ ଜାତୀୟ ଶିକ୍ଷା ନୀତି ବିରୋଧରେ ଲଢେଇ ପାଇଁ ରଣନୀତି ପ୍ରସ୍ତୁତ
ନନ୍ଦିଘୋଷ ବ୍ୟୁରୋ: ଗୁରୁ ଦିବସରେ ଜାତୀୟ ଶିକ୍ଷା ନୀତି ବିରୋଧରେ ଲଢେଇ ପାଇଁ ରଣନୀତି ପ୍ରସ୍ତୁତ । ମନଇଚ୍ଛା ଜାତୀୟ ଶିକ୍ଷା ନୀତି ଲାଗୁ ଯୋଗୁଁ ପ୍ରାଥମିକ ଶିକ୍ଷାରୁ ଆରମ୍ଭ କରି ବିଶ୍ୱବିଦ୍ୟାଳୟ ଶିକ୍ଷା ବିପର୍ଯ୍ୟସ୍ତ ହୋଇଥିବା ଅଭିଯୋଗ ହୋଇଛି । ପ୍ରତିବାଦ କରି ନିଖିଳ ଉତ୍କଳ ଶିକ୍ଷକ ମହାସଂଘ ବ୍ୟାନରରେ ଏକାଠି ହୋଇଛନ୍ତି ଶିକ୍ଷକ ସଂଗଠନ, ଶିକ୍ଷାବିତ, ଛାତ୍ର ସଂଗଠନ ତଥା ବିଭିନ୍ନ ବର୍ଗର ଲୋକେ । ଜାତୀୟ ସ୍ତରରେ ରାଜ୍ୟ ବିଶ୍ୱବିଦ୍ୟାଳୟର ମାନ ଖସୁଥିବା ବେଳେ ପ୍ରାକ ପ୍ରାଥମିକ ଶିକ୍ଷାରେ ଶିଶୁ ବାଟିକା ବି ଫେଲ ମାରିଛି । ଜାତୀୟ ଶିକ୍ଷା ନୀତି ସମ୍ପର୍କରେ ସରକାର ତୁରନ୍ତ ଅଂଶୀଦାରଙ୍କ ସହ ଆଲୋଚନା କରିବାକୁ ଦାବି ସହ ଆଗାମୀ ଦିନରେ ଆନ୍ଦୋଳନାତ୍ମକ କାର୍ଯ୍ୟକ୍ରମ ସମ୍ପର୍କରେ ଯୋଜନା ପ୍ରସ୍ତୁତ ହୋଇଛି ।
ଜାତୀୟ ଶିକ୍ଷା ନୀତି ଲାଗୁ ପରେ ରାଜ୍ୟର ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଥିବା ଅଭିଯୋଗ ହୋଇଛି । ପ୍ରାକ ପ୍ରାଥମିକ ଶିକ୍ଷାରେ ଶିଶୁ ବାଟୀକାଠାରୁ ଆରମ୍ଭ କରି ବିଶ୍ୱବିଦ୍ୟାଳୟ ଶିକ୍ଷା ମଧ୍ୟ ନଷ୍ଟ ହୋଇଛି । ରାଜ୍ୟର ଶିକ୍ଷା ଭିତ୍ତିଭୂମି ଓ ସ୍ଥିତିକୁ ନଦେଖି ମନଇଚ୍ଛା କେନ୍ଦ୍ରର ଜାତୀୟ ଶିକ୍ଷା ନୀତି ଲାଗୁ କରାଗଲା । ଜୋର ଜବରଦସ୍ତ ଲାଗୁ କରିବାରୁ ଏଭଳି ସ୍ଥିତି ସୃଷ୍ଟି ହୋଇଥିଵା ଅଭିଯୋଗ କରିଛନ୍ତି ଶିକ୍ଷାବିତ ଓ ଶିକ୍ଷକ ସଂଗଠନ । ବିଭିନ୍ନ ବର୍ଗର ବିଶେଷଜ୍ଞ ଏକାଠି ହୋଇ କିଭଳି ରାଜ୍ୟର ଶିକ୍ଷା ବ୍ୟବସ୍ଥାକୁ ରକ୍ଷା କରିହେବ ସେ ନେଇ ରଣନୀତି ପ୍ରସ୍ତୁତ କରିଛନ୍ତି ।
ଜାତୀୟ ଶିକ୍ଷା ନୀତି ଆଧାରରେ ସରକାର ତରବରିଆ ଭାବେ ପ୍ରାଥମିକ ବିଦ୍ୟାଳୟରେ ଶିଶୁ ବାଟୀକା ଖୋଲିଥିବାବେଳେ ସେଠାରେ ସ୍ୱତନ୍ତ୍ର ପ୍ରଶିକ୍ଷିତ ଶିକ୍ଷକ ମଧ୍ୟ ନିଯୁକ୍ତି ଦେଇନାହାନ୍ତି । ହେଲେ ଆଗୁଆ ଶିଶୁ ସେବିକା ନିଯୁକ୍ତି ଦେବାକୁ ନିଷ୍ପତ୍ତି ନେଇଛନ୍ତି । ଯାହାକୁ ନେଇ ଶିକ୍ଷକମାନେ ରାସ୍ତାକୁ ଓଲ୍ହାଇଛନ୍ତି । ବିଶ୍ୱବିଦ୍ୟାଳୟଗୁଡିକର ମନମୁତାବକ କାର୍ଯ୍ୟ ଯୋଗୁଁ ଜାତୀୟ ସ୍ତରରେ ବିଶ୍ୱବିଦ୍ୟାଳୟ ମାନ କମୁଛି । ଶିକ୍ଷାର ବ୍ୟବସାୟୀକରଣ କରିବାକୁ ଏଭଳି ଚକ୍ରାନ୍ତ ବୋଲି ଅଭିଯୋଗ ହୋଇଛି । ଏହାକୁ ନେଇ ସମାଜର ସମସ୍ତ ବର୍ଗଙ୍କୁ ନେଇ ଆଗକୁ ଆନ୍ଦୋଳନ ବ୍ୟାପକ କରାଯିବ ବୋଲି ଚେତାବନୀ ଦେଇଛନ୍ତି । ଛାତ୍ର ସଂଗଠନଗୁଡ଼ିକ ରାଜ୍ୟଵ୍ୟାପୀ ବିଶାଳ ଆନ୍ଦୋଳନ ପାଇଁ ଘୋଷଣା କରିଛନ୍ତି । ଜାତୀୟ ଶିକ୍ଷା ନୀତି ବିରୋଧରେ ଆସନ୍ତା ୧୩ରେ ବାରାଣସୀରେ ବିଶାଳ ଧାରଣା ସହ ୭ ତାରିଖରେ ଓଡ଼ିଶାରେ ବିଶାଳ ସଭା କରାଯିବାକୁ ନିଷ୍ପତ୍ତି ହୋଇଛି ।
ଗୁରୁ ଦିବସରେ ରାଜରାସ୍ତାରେ ଗୁରୁ: ୫ ଦଫା ଦାବି ନେଇ ଭୁବନେଶ୍ବର ଗାନ୍ଧୀ ମାର୍ଗରେ ଚାଲିଛି ଆନ୍ଦୋଳନ
ନନ୍ଦିଘୋଷ ବ୍ୟୁରୋ: ଓଡ଼ିଶା ସ୍କୁଲ୍ କଲେଜ୍ ଶିକ୍ଷକ ଓ କର୍ମଚାରୀ ସମନ୍ଵୟ ସମିତି ପକ୍ଷରୁ ଭୁବନେଶ୍ବର ଗାନ୍ଧୀ ମାର୍ଗରେ ଆନ୍ଦୋଳନ । ଏକାଠି ହେଲେ ହଜାର ହଜାର ଶିକ୍ଷକ । ୫ ଦଫା ଦାବି ନେଇ ରାଜରାସ୍ତା ହକ୍ ମାଗିଲେ ଗୁରୁ । ସମସ୍ତ ଯୋଗ୍ୟ ଅନୁଦାନ ପ୍ରାପ୍ତ ବିଦ୍ୟାଳୟ ଓ ମହାବିଦ୍ୟାଳୟକୁ ତୁରନ୍ତ ଅନୁଦାନ ପ୍ରଦାନ କରିବା, ଅବସର ପରେ ଶିକ୍ଷକଙ୍କୁ ପେନସନ୍, ଚାକିରି ସର୍ତ୍ତାବଳୀ ସହ ବୟସ ସୀମା ୬୦ ରୁ ୬୨କୁ ବୃଦ୍ଧି ନେଇ ସରକାରଙ୍କୁ ଘେରିଛନ୍ତି ଶିକ୍ଷକ ।
ମହାତ୍ମାଗାନ୍ଧୀ ମାର୍ଗରେ ହକ ପାଇଁ ଆନ୍ଦୋଳନ । ମହା ସମାବେଶ ଓ ଅହରାତ୍ର ଧାରଣା । ଗୁରୁ ଦିବସରେ ସ୍କୁଲରେ ପୂଜା ପାଇବା ବଦଳରେ ରାଜରାସ୍ତାରେ ନିଜର ହକ୍ ପାଇଁ ଗର୍ଜୁଛନ୍ତି ଶିକ୍ଷକ ଶିକ୍ଷୟିତ୍ରୀ । ଅନୁଦାନ ଯୋଗ୍ୟ ବିଦ୍ୟାଳୟ ଓ ମହାବିଦ୍ୟାଳୟକୁ ଅନୁଦାନ ପ୍ରଦାନ, ଅବସର ପରେ ଶିକ୍ଷକଙ୍କୁ ପେନସନ୍, ଗ୍ରେଡ ପେ’ରେ ଥିବା ଅସଙ୍ଗିତ ଦୂରୀକରଣ, ଅବସର ବୟସ ସୀମା ୬୦ରୁ ୬୨କୁ ବୃଦ୍ଧି, ନୂତନ ପେନସନକୁ ବାତିଲ କରି ପୂର୍ବ ପ୍ରଚଳିତ ପୁରୁଣା ପେନସନ ଲାଗୁ କରିବା, ଉଚ୍ଚନ୍ୟାୟଳୟଙ୍କ ନିର୍ଦ୍ଦେଶକୁ ପାଳନ କରି ଶିକ୍ଷକ ଓ କର୍ମଚାରୀଙ୍କୁ ନ୍ୟାୟ ପ୍ରଦାନ, ୨୦୦୪ରୁ ୧୩ ମଧ୍ୟରେ ନିଯୁକ୍ତି ପାଇଥିବା ଚୁକ୍ତିଭିତ୍ତିକ ଶିକ୍ଷକଙ୍କୁ ୬ଟି ନ୍ୟାସନାଲ ଇନକ୍ରିମେଣ୍ଟ ସହିତ ବରିଷ୍ଠତା ପ୍ରଦାନ ଭଳି ୫ ଦଫା ଦାବି ନେଇ ରାଜରାସ୍ତାକୁ ଓହ୍ଲାଇଛନ୍ତି ଶିକ୍ଷକ ।
ଓଡ଼ିଶା ସ୍କୁଲ୍ କଲେଜ୍ ଶିକ୍ଷକ ଓ କର୍ମଚାରୀ ସମନ୍ଵୟ ସମିତି ପକ୍ଷରୁ ଭୁବନେଶ୍ବର ଗାନ୍ଧୀ ମାର୍ଗରେ ଚାଲିଥିବା ଏହି ଆନ୍ଦୋଳନରେ ଓଷ୍ଟା, ନିଖିଳ ନିମ୍ନ ମାଧ୍ୟମିକ ଶିକ୍ଷକ ସଂଘ, ନିଖିଳ ଉତ୍କଳ ସଂସ୍କୃତ ମହାସଂଘ, ନିଖିଳ ଉତ୍କଳ ମାଦ୍ରାସା ଶିକ୍ଷକ ସଂଘ, ଅବସରପ୍ରାପ୍ତ ଶିକ୍ଷକ କର୍ମଚାରୀ ସଂଘ, ୬୬୨ ଓ ୪୮୮ ବର୍ଗ କେଲଜ କର୍ମଚାରୀ ସଂଘ, ଅଣଅନୁଦାନ ପ୍ରାପ୍ତ ଶିକ୍ଷକ ସଂଘ, ନୂତନ ଅନୁଦାନ ପ୍ରାପ୍ତ ଶିକ୍ଷକ ସଂଘ ଓ ଅବସର ପ୍ରାପ୍ତ ସଂଘ ସାମିଲ ହୋଇଛନ୍ତି । ସେପଟେ ଆଗାମୀ ଦିନରେ ରାଜ୍ୟ ସରକାର ୪୪ ହଜାର ୪୩୩ ଶିକ୍ଷକ ନିଯୁକ୍ତି ଦେବାକୁ ଯାଉଛନ୍ତି । ସେହିପରି ପ୍ରତିବର୍ଷ ୧୫ ହଜାର ଶିକ୍ଷକ ନିଯୁକ୍ତି କରିବା ପାଇଁ ବି ନିଷ୍ପତ୍ତି ନେଇଛନ୍ତି । ଏହାଦ୍ବାର ଶିକ୍ଷକ ଅଭାବର ସମାଧାନ ହେବ ବୋଲି କହିଛନ୍ତି ମନ୍ତ୍ରୀ ।
ଗତ ମାସ ଅଗଷ୍ଟ ୧୬ ତାରିଖରେ ହଜାର ହଜାର ଶିକ୍ଷକ ଓ ଶିକ୍ଷୟତ୍ରୀ ଗାନ୍ଧୀମାର୍ଗରେ ମହାସାମବେଶରେ ଏକାଠି ହୋଇଥିଲେ । ସରାକରୀ ଦଳର ଦୁଇ ବିଧାୟକ ୫ ଦଫା ଦାବି ପତ୍ରକୁ ଗ୍ରହଣ କରି ବିଚାର କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ହେଲେ ଏବେ ପୁଣି ଥରେ ଗାନ୍ଧୀମାର୍ଗରେ ଗୁର ।
ଓଡ଼ିଶାର ସି ଫୁଡ, ହସ୍ତଶିଳ୍ପ ଓ ବୟନ ଶିଳ୍ପ ଉପରେ ଟ୍ରମ୍ପଙ୍କ ଟାରିଫର ପ୍ରଭାବ
ନନ୍ଦିଘୋଷ ବ୍ୟୁରୋ: ଓଡ଼ିଶାରୁ ବର୍ଷକୁ ପ୍ରାୟ ୫ ହଜାର କୋଟି ଟଙ୍କାର ମେରାଇନ ପ୍ରଡକ୍ଟ ଆମେରିକାକୁ ରପ୍ତାନୀ ହେଉଛି । ଭାରତୀୟ ଦ୍ରବ୍ୟ ଉପରେ ଟ୍ରମ୍ପ ଟାରିଫ ୫୦ ପ୍ରତିଶତ ଲାଗିବା ପରେ ଚିନ୍ତାରେ ସି’ ଫୁଡ଼ ଇଣ୍ଡଷ୍ଟ୍ରି । କେବଳ କମ୍ପାନୀ ମାଲିକ ନୁହଁନ୍ତି, ଏହାଦ୍ବାରା ଚିଙ୍ଗୁଡ଼ି ଚାଷୀ, ଶ୍ରମିକ, ବରଫ କଳ, ମତ୍ସ୍ୟଜୀବୀ ସମସ୍ତେ ପ୍ରଭାବିତ ହେବେ । ଏବେ ଏହାର ବିକଳ୍ପ ଚିନ୍ତା ଚାଲିଛି । କେବଳ ସି ଫୁଡ୍ ନୁହେଁ, ହସ୍ତଶିଳ୍ପ ଓ ବୟନ ଶିଳ୍ପ କ୍ଷେତ୍ର ବି ପ୍ରଭାବିତ ହେବ । ଟ୍ରମ୍ପ ଟାରିଫରୁ ମୁକୁଳିବା ପାଇଁ ବିଶ୍ବସ୍ତରରେ ଆଲୋଚନା ଚାଲିଥିବା ବେଳେ, ତିନି ପ୍ରମୁଖ ଶକ୍ତି ଭାରତ, ଚୀନ ଓ ଋଷ ଏକାଠି ହେବା ଏକ ଶୁଭ ସଙ୍କେତ ଦେଉଛି ।
ଆମେରିକା ଓ ଭାରତର ବ୍ୟବସାୟିକ ସମ୍ପର୍କ ଖୁବ୍ ପୁରୁଣା । ଏବେ ଟ୍ରମ୍ପଙ୍କ ଟାରିଫ ଯୋଗୁଁ ଭୟଙ୍କର ଭାବେ ହେଲାଣି ପ୍ରଭାବିତ । ଓଡ଼ିଶା ମଧ୍ୟ ଟାରିଫ ଓ୍ବାରର ହୋଇଛି ଶିକାର । ବିଶେଷ କରି ମେରାଇନ ପ୍ରଡକ୍ଟ ଆମେରିକାକୁ ରପ୍ତାନୀ ଏକ ପ୍ରକାର ଅସମ୍ଭବ ହେଲାଣି । ୨୦୦୪ରେ ଓଡ଼ିଶାରୁ ଆମେରିକାକୁ ୩୬୦ କୋଟି ଟଙ୍କାର ମେରାଇନ ପ୍ରଡକ୍ଟ ଯାଉଥିବା ବେଳେ, ଏବେ ଏହା ୫ ହଜାର କୋଟିରେ ପହଞ୍ଚିଛି । ତେବେ ଟ୍ରମ୍ପଙ୍କ ଟାରିଫ ଯୋଗୁଁ ରପ୍ତାନୀ ପୂର୍ବରୁ ଏକ୍ସପୋର୍ଟର ପ୍ରଥମେ ୫୦ ପ୍ରତିଶତ ଡ୍ୟୁଟି ଦେବାକୁ ପଡ଼ିବ । ଯାହା ଓଡ଼ିଶା ଉଦ୍ୟୋଗୀଙ୍କ ପାଇଁ କଷ୍ଟକର । ଏକ୍ସପୋର୍ଟ ପ୍ରଭାବିତ ହେଲେ ଚିଙ୍ଗୁଡ଼ି ଚାଷୀ, ମତ୍ସ୍ୟଜୀବୀ, ବରଫ କଳ ମାଲିକ ଓ ଶ୍ରମିକଙ୍କ ସହ ଅନେକଙ୍କ ଉପରେ ଏହାର ପ୍ରଭାବ ପଡ଼ିବ । ଏବେ ଏହାର ବିକଳ୍ପ ଚିନ୍ତା କରାଯାଉଛି । ହେଲେ ଆମେରିକା ବ୍ୟତୀତ ୟୁରୋପୀୟ ଦେଶକୁ ରପ୍ତାନୀ କରିବା ବି ଏତେ ସହଜ ନୁହେଁ । ଭାରତରେ ଚିଙ୍ଗୁଡ଼ିର ଆଦର ବଢ଼ିଲେ ଉତ୍ପାଦିତ ଦ୍ରବ୍ୟ ବ୍ୟବହୃତ ହୋଇପାରିବ । ତେଣୁ ସେନାରେ ମେରାଇନ ପ୍ରଡକ୍ଟ ବ୍ୟବହାର ପାଇଁ ପ୍ରଧାନମନ୍ତ୍ରୀଙ୍କୁ ଚିଠି ଲେଖାଯାଇଛି ।
ଉତ୍କଳ ଚାମ୍ବର ଅଫ୍ କମର୍ସ ପକ୍ଷରୁ ଟ୍ରମ୍ପ ଟାରିଫର ପ୍ରଭାବ ଓ ବିକଳ୍ପ ନେଇ କରାଯାଇଛି ଆଲୋଚନା । ମେରାଇନ ପ୍ରଡକ୍ଟ ସହ ଓଡ଼ିଶାର ହସ୍ତଶିଳ୍ପ ବି ଟାରିଫା ମାଡ଼ର ଶିକାର ହୋଇଛି । ସେହିପରି ଇସ୍ପାତ କ୍ଷେତ୍ରର ପ୍ରଭାବ ନେଇ ଚର୍ଚ୍ଚା ହେଉଥିଲେ ବି ଏହା ନଗଣ୍ୟ । ବିକଳ୍ପ ଭାବେ ପ୍ରସେସେଡ଼ ଫୁଡ ଉତ୍ପାଦନ ଉପରେ ଗୁରୁତ୍ବ ଦେବାକୁ ମତ ପ୍ରକାଶ ପାଇଛି । ଏଥିପାଇଁ କେବଳ ଧାନ ନୁହେଁ, ଅତ୍ୟାଧୁନିକ ଜ୍ଞାନ କୌଶଳରେ ପନିପରିବା ଚାଷ ଜରୁରୀ । ତେବେ ଟ୍ରମ୍ପଙ୍କ ନିଷ୍ପତ୍ତି କେତେଦିନ ରହିବ, ତାକୁ ନେଇ ବି ଆଲୋଚନା ହୋଇଛି । ଅକ୍ଟୋବରରେ ପ୍ରସ୍ତାବିତ କ୍ବାଡ଼ ସମ୍ମିଳନୀରେ କିଛି ବାଟ ବାହାରିବାର ସମ୍ଭାବନା ରହିଛି । ଅଷ୍ଟ୍ରେଲିଆ, ଜାପାନ, ଆମେରିକା ଓ ଭାରତକୁ ନେଇ ହେବ ଗୁରୁତ୍ବପୂର୍ଣ୍ଣ ଆଲୋଚନା । ଏଥର ଭାରତ ସମ୍ମିଳନୀ ଆୟୋଜନ କରୁଥିବାରୁ ଟ୍ରମ୍ପ-ମୋଦି ସିଧାସଳଖ କଥା ହେବାର ସମ୍ଭାବନା ରହିଛି ।
ଟ୍ରମ୍ପ ଟାରିଫର ସମାଧାନ ନ ହେଲେ ଆମେରିକାକୁ ଓଡ଼ିଶାର ଚିଙ୍ଗୁଡ଼ି ଯିବା ମୁସ୍କିଲ ହୋଇପଡ଼ିବ । ଚାନ୍ଦୁଆ, ବାନ୍ଧକଳା, ପାଟଶାଢୀ ରପ୍ତାନୀ ବି ପ୍ରଭାବିତ ହେବ। ସାଂଘାଇ ସମ୍ମିଳନୀରେ ଚୀନ-ଭାରତ-ରଷିଆ ଭଳି ବଡ଼ ବଡ଼ ରାଷ୍ଟ୍ର ଏକାଠି ହୋଇ ଏହା ଉପରେ ଆଲୋଚନା କରିଥିବାରୁ, ଟ୍ରମ୍ପ ଟାରିଫକୁ ଟକ୍କର ଦେବା ପାଇଁ କିଛି ବାଟ ବାହାରିବା ନେଇ ଆଲୋଚନା ହେଉଛି ।
ମହିଳାଙ୍କ ହକ ଓ ସୁରକ୍ଷା ପାଇଁ ନବୀନଙ୍କ ମହିଳା ବ୍ରିଗେଡଙ୍କ ରଣହୁଙ୍କାର
ନନ୍ଦିଘୋଷ ବ୍ୟୁରୋ: ମହିଳାଙ୍କ ସୁରକ୍ଷା ପାଇଁ ସଂକଳ୍ପ ନେଇଛି ବିଜୁ ମହିଳା ଜନତା ଦଳ । ଦିନକୁ ଦିନ ରାଜ୍ୟରେ ମହିଳା ଅସୁରକ୍ଷିତ ହୋଇପଡିଥିବାରୁ ମହିଳାଙ୍କ ହକ ଓ ଅଧିକାର ପାଇଁ ଦଳ ଲଢେଇ କରିବ । ବିଜୁ ମହିଳା ଜନତା ଦଳ ସଭାନେତ୍ରୀ ସ୍ନେହାଙ୍ଗିନୀ ଛୁରିଆ ଓ ୧୫ ଜଣିଆ ମହିଳା ବ୍ୟାପାର ଟିମ ଦାୟିତ୍ବ ନେବା ପରେ ସରକାରଙ୍କ ବିରୋଧରେ ଦେଇଛନ୍ତି ରଣହୁଙ୍କାର । ଦଳର ସଭାପତି ମହିଳା ନେତ୍ରୀମାନଙ୍କ ଉପରେ ବିଶ୍ବାସ ଓ ଭରସା କରିଥିବାରୁ ନେତ୍ରୀମାନେ ସଭାପତିଙ୍କୁ ଧନ୍ୟବାଦ ଜଣାଇଛନ୍ତି ।
ମହିଳାଙ୍କୁ ପ୍ରତାରଣା କରିଛି ବିଜେପି ସରକାର । ଦିନକୁ ଦିନ ରାଜ୍ୟରେ ଅସୁରକ୍ଷିତ ହୋଇପଡୁଛନ୍ତି ମହିଳା । ଶିକ୍ଷାନୁଷ୍ଠାନରୁ ଆରମ୍ଭ କରି ପର୍ଯ୍ୟଟନସ୍ଥଳୀ ଯାଏଁ କେଉଁଠି ବି ସୁରକ୍ଷିତ ନୁହନ୍ତି ମହିଳା । ନାରୀ ନିର୍ଯାତନା, ଦୁଷ୍କର୍ମ ମାମଲା ହୁହୁ ହୋଇ ବଢୁଛି, ନ୍ୟାୟ ପାଉନାହିଁ ମାଆ । ଘର ବାହାରିବାକୁ ଭୟ ଲାଗୁଛି । ଏପରି ସ୍ଥିତିରେ ମହିଳାଙ୍କୁ ସୁରକ୍ଷା ଦେବାକୁ ସଂକଳ୍ପ ନେଇଛି ବିଜୁ ମହିଳା ଜନତା ଦଳ । ବିଜେଡି ସଭାପତି ନବୀନ ପଟ୍ଟନାୟକ ବିଜୁ ମହିଳା ଜନତା ଦଳର ପୁନର୍ଗଠନ କରି ମହିଳା ସଂଗଠନର ମଙ୍ଗ ଧରାଇଛନ୍ତି ପୂର୍ବତନ ମନ୍ତ୍ରୀ ତଥା ଦଳର ବରିଷ୍ଠ ନେତ୍ରୀ ସ୍ନେହାଙ୍ଗିନୀ ଛୁରିଆଙ୍କୁ । ଦାୟିତ୍ବ ନେବାର ପ୍ରଥମ ଦିନରୁ ଟିମର ସଦସ୍ୟମାନେ ଶଙ୍ଖଭବନରେ ଏକାଠି ହୋଇ ମହିଳାଙ୍କ ହକ ଓ ଅଧିକାର ପାଇଁ ଲଢେଇ କରିବାକୁ ସଂକଳ୍ପ ନେଇଛନ୍ତି । ପ୍ରଥମ ଦିନରୁ ରାଜ୍ୟ ସରକାରଙ୍କ ମହିଳା ବିରୋଧୀ ଆଭିମୁଖ୍ୟ ବିରୋଧରେ ମିଳିତ ସାମ୍ବାଦିକ ସମ୍ମିଳନୀ କରି ବର୍ଷିଛନ୍ତି ନେତ୍ରୀମାନେ ।
ନବୀନ ପଟ୍ଟନାୟକଙ୍କ ନେତୃତ୍ବରେ ରାଜ୍ୟରେ ମହିଳାମାନେ ସଶକ୍ତ ଓ ସ୍ବାବାଲମ୍ବୀ ହୋଇଥିଲେ । ୭୦ ଲକ୍ଷ ମହିଳା ମିଶନ ଶକ୍ତି ଜରିଆରେ ଆର୍ଥିକ ଓ ସାମାଜିକ ସ୍ତରରେ ସଶକ୍ତ ହୋଇଥିଲେ । ରାଜନୈତିକ କ୍ଷେତ୍ରରେ ମଧ୍ୟ ମହିଳାଙ୍କୁ ଗୁରୁତ୍ବ ଦେଉଥିଲେ ନବୀନ । ଘରର ଚାରିକାନ୍ଥରୁ ବାହାରି ବିଦେଶ ବୁଲିବାର ସ୍ବପ୍ନକୁ ସାକାର କରିଥିଲେ । ବିଜେପି ସରକାର ଆସିବା ପରେ ପ୍ରଥମେ ସୁଭଦ୍ରା ଯୋଜନା ନାଁରେ ପ୍ରତାରଣାର ଶିକାର ହେଲେ । ମାତ୍ର ୫ ହଜାର ଟଙ୍କାରେ ମହିଳାମାନେ କିପରି ଲକ୍ଷପତି ଦିଦି ହେଲେ ବୋଲି ବିଜେଡି ପ୍ରଶ୍ନ କରିଛି । ନବୀନ ପଟ୍ଟନାୟକ ଯେଉଁ ଆଶା ଓ ବିଶ୍ବାସ ମହିଳାଙ୍କ ମନରେ ଭରିଥିଲେ ତାହା କିପରି ଅତୁଟ ରହିବ ସେ ଦିଗରେ ବିଜୁ ମହିଳା ଜନତା ଦଳ କାମ କରିବ ।
ଆଗକୁ ପଞ୍ଚାୟତ ଓ ପୌର ନିର୍ବାଚନ । ଏହାପୂର୍ବରୁ ବିଜୁ ମହିଳା ଜନତା ଦଳର ପୁନର୍ଗଠନ କରି ତୃଣମୂଳ ସ୍ତରରେ ମହିଳା ସଂଗଠନକୁ ଅଧିକ ଶକ୍ତିଶାଳୀ କରିବାକୁ ବିଜେଡି ଲକ୍ଷ୍ୟ ରଖିଛି ।