ବ୍ରହ୍ମପୁର ଟାଟା ବେଞ୍ଜ ଛକରୁ କମାପଲ୍ଲୀ ପର୍ଯ୍ୟନ୍ତ ଜବର ଦଖଲ ଉଚ୍ଛେଦ ଆରମ୍ଭ ହୋଇଛି। ଉପଜିଲ୍ଲାପାଳଙ୍କ ଉପସ୍ଥିତିରେ ଏହି ଉଛେଦ ଆରମ୍ଭ ହୋଇଥିବା ବେଳେ ସମସ୍ତ ଦୋକାନର ବୋର୍ଡ ସବୁ ହଟା ଯାଉଛି। ଏହା ହେଉଛି ସହରର ଏକ ମୁଖ୍ୟ ରାସ୍ତା। ଜବର ଦଖଲ ଯୋଗୁଁ ସବୁବେଳେ ଟ୍ରାଫିକ ସମସ୍ୟା ଦେଖାଯାଉଛି। ଏହାର ସମାଧାନ ପାଇଁ ଆଜି ପ୍ରଶାସନ ପକ୍ଷରୁ ଜବର ଦଖଲ ଉଚ୍ଛେଦ କରାଯାଉଛି।
ଅନଲାଇନ ଠକକୁ ଗିରଫ କଲା କମିଶନରେଟ ପୋଲିସ: ଠକି ନେଇଥିଲା ୧୩ ଲକ୍ଷ
ଅନଲାଇନ ଠକକୁ ଗିରଫ କଲା କମିଶନରେଟ ପୋଲିସ। କଟକ ଜଗତପୁର ବହୁଗ୍ରାମ ଅଂଚଳ ର ସୁବାସ ଚନ୍ଦ୍ର ଜେନାଙ୍କ ଠାରୁ ଅନଲାଇନ ରେ 13 ଲକ୍ଷ 72 ହଜାର 70 ଟଙ୍କା ଠକେଇ କରିଥିବା ଜଣେ ଯୁବକକୁ କମିଶନରେଟ ପୋଲିସ ଗିରଫ କରିଛି।। ଅଭିଯୁକ୍ତ ଝାରସୁଗୁଡା ବେଲପାହାଡ ଅଂଚଳ ର ଅନୁରାଗ ପଟ୍ଟନାୟକ। ଗତ ମେ 16 ତାରିଖରୁ 29 ତାରିଖ ମଧ୍ଯ ରେ ନିବେଶ ଟଙ୍କା ଦୁଇ ଗୁଣା ହେବ ବୋଲି ଲୋଭ ଦେଖାଇ ଏହି ଟଙ୍କା ଠକି ନେଇଥିଲା। ପରେ ନିବେଶକାରୀ ଠକେଇର ଶୀକାର ହୋଇ ଥିବା ଜାଣି ସାଇବର ଥାନାର ଦ୍ବାରସ୍ଥ ହୋଇଥିଲେ। ପୋଲିସ ତଦନ୍ତ କରି ଝାରସୁଗୁଡାର ଏହି ଅଭିଯୁକ୍ତ ଯୁବକକୁ ଗିରଫ କରିଛି। ତାଠାରୁ ପୋଲିସ ଗୋଟିଏ ମୋବାଇଲ, ଆଧାର କାର୍ଡ, ପ୍ୟାନ କାର୍ଡ ଓ ଏକ ଘରୋଇ ବ୍ୟାଙ୍କର ଚେକ୍ ବୁକ ଜବତ କରିଛି।
ଆଜିଠାରୁ ଆରମ୍ଭ ହେଲା ପିତୃପକ୍ଷ
ଆଜିଠାରୁ ଆରମ୍ଭ ହେଲା ପିତୃପକ୍ଷ । ଜ୍ୟୋତିଷ ଶାସ୍ତ୍ର ଅନୁସାରେ ଆଶ୍ଵୀନ କୃଷ୍ଣ ପକ୍ଷ ପ୍ରତିପଦାରୁ ଅମାବାସ୍ୟା ପର୍ଯ୍ୟନ୍ତ ପିତୃପକ୍ଷ ବା ଅପରପକ୍ଷ ଭାବେ ପାଳନ କରାଯିବାର ବିଧି ରହିଛି । ହିନ୍ଦୁ ଧର୍ମରେ ଏହାର ବିଶେଷ ମହତ୍ବ ରହିଥିବା ବେଳେ ଏହି ସମୟରେ ପିତୃ ପୁରୁଷଙ୍କ ଉଦ୍ଦେଶ୍ୟରେ ତିଳ ତର୍ପଣ, ଶ୍ରାଦ୍ଧ ଏବଂ ପିଣ୍ଡଦାନ କରାଯାଇଥାଏ । ୧୫ ଦିନ ପର୍ଯ୍ୟନ୍ତ ନିୟମ ନିଷ୍ଠାରେ ଏହି ପକ୍ଷ ପାଳନ କଲେ ପିତୃ ପୁରୁଷଙ୍କ ପରିବାର ଉପରେ ଆଶୀର୍ବାଦ ପ୍ରାପ୍ତି ହୋଇଥାଏ ବୋଲି ବିଶ୍ୱାସ ରହିଛି । ନିୟମ ନିଷ୍ଠାର ସହ ଏହି ଅପରପକ୍ଷ ବା ପିତୃପକ୍ଷକୁ ପାଳନ କରନ୍ତି ଶ୍ରଦ୍ଧାଳୁ । ପିତୃପକ୍ଷ ସମୟରେ ଖିଅର ହେବା ସମ୍ପୂର୍ଣ୍ଣ ନିଷିଦ୍ଧ ରହିଥିବା ବେଳେ ଏହି ସମୟରେ ନଖ ମଧ୍ୟ କଟାଯିବା ବାରଣ । ଏପରିକି ଅପର ପାଗରେ ଅର୍ଥାତ ବାହାରେ ଭୋଜନ କରିବା ସମ୍ପୂର୍ଣ ନିଷିଦ୍ଧ କରାଯାଇଛି । ସେହିପରି ତିଳ ତର୍ପଣ, ଶ୍ରାଦ୍ଧ ଓ ପିଣ୍ଡଦାନ କରିବା ସମୟରେ ସମ୍ପୂର୍ଣ୍ଣ ଶୁଦ୍ଧପୂତ ଭାବେ ରହିବାକୁ ଶାସ୍ତ୍ରରେ ବର୍ଣ୍ଣନା କରାଯାଇଛି ।
ବେଙ୍ଗଲ ଫାଇଲ୍ସକୁ ନେଇ ବଢି଼ଲା ବିବାଦ: ଆଜି ଶୁଣାଣି କରିବେ ହାଇକୋର୍ଟ
ବେଙ୍ଗଲ ଫାଇଲ୍ସକୁ ନେଇ ବଢି଼ଲା ବିବାଦ। ସ୍ବାଧୀନତା ସଂଗ୍ରାମୀ ତଥା କିମ୍ବଦନ୍ତୀ ବ୍ୟକ୍ତିତ୍ବ ଗୋପାଳ ମୁଖାର୍ଜୀ ଓରଫ ଗୋପାଳ ପାଠାଙ୍କ ନାତି ଶାନ୍ତନୁ ମୁଖାର୍ଜୀଙ୍କ ଆବେଦନର ଶୁଣାଣି ଆଜି କରିବେ କଲିକତା ହାଇକୋର୍ଟ। ଅଗଷ୍ଟ ୧୯୪୬ରେ କେନ୍ଦ୍ରୀୟ କଲିକତାର ହିନ୍ଦୁମାନଙ୍କ ସୁରକ୍ଷାରେ ସେ ନେଇଥିଲେ ପ୍ରମୁଖ ଭୂମିକା। ବେଙ୍ଗଲ ଫାଇଲ୍ସରେ ଥିବା କିଛି ଦୃଶ୍ୟକୁ ପୁନଃସମ୍ପାଦନ ଓ କିଛି ଦୃଶ୍ୟକୁ କାଟିବା ଲାଗି ଆବେଦନ କରିଛନ୍ତି ଶାନ୍ତନୁ। ଏହି ସଂଗ୍ରାମୀଙ୍କୁ ଏକ ନିର୍ଦ୍ଦିଷ୍ଟ ଧାର୍ମିକ ସମ୍ପ୍ରଦାୟର ଲୋକଙ୍କ ହତ୍ୟାକାରୀ ବୋଲି ଫିଲ୍ମରେ ଭୁଲ ଭାବେ ଦର୍ଶାଯାଇଥିବା ଅଭିଯୋଗ କରିଛନ୍ତି ଶାନ୍ତନୁ। ପରିବାରର ଅଭିଯୋଗ- ଫିଲ୍ମରେ ଏକ ସଂଖ୍ୟାଲଘୁ ସମ୍ପ୍ରଦାୟକୁ ଗଣହତ୍ୟା କରିବା ଲାଗି ଗୋପାଳ ପାଠାଙ୍କୁ ଚିତ୍ରଣ କରାଯାଇଛି। ଗୋପାଳଙ୍କ ପରିବାର ପକ୍ଷରୁ ଲଢୁଛନ୍ତି ଆଇନଜୀବୀ ଦେବାଞ୍ଜନ ମୁଖାର୍ଜୀ। ଜଷ୍ଟିସ ଅମ୍ରିତା ସିହ୍ନାଙ୍କୁ ନେଇ ଗଠିତ ଜଣିକିଆ ଖଣ୍ଡପୀଠ ମାମଲାର ଶୁଣାଣି କରିବେ। ଗତ ଅଗଷ୍ଟରେ ବେଙ୍ଗଳ ଫାଇଲ୍ସ ପ୍ରଯୋଜକ ବିବେକ ଅଗ୍ନିହୋତ୍ରୀଙ୍କ ନାଁରେ ବାଓବଜାର ଥାନାରେ ଏତଲା ଦେଇଥିଲେ ଶାନ୍ତନୁ। ତାଙ୍କର ଅଭିଯୋଗ ଥିଲା ଫିଲ୍ମ ନିର୍ମାଣ କରିବା ପୂର୍ବରୁ ଗୋପାଳଙ୍କ ସମ୍ପର୍କରେ ଅନୁମତି ନେଇଥିଲେ ଅଗ୍ନିହୋତ୍ରୀ।
ଆଜିଠାରୁ ମଣିପୁରରେ ନାଗା ପରିଷଦର ବାଣିଜ୍ୟିକ ଅବରୋଧ ଆନ୍ଦୋଳନ
ଆଜିଠାରୁ ମଣିପୁରରେ ନାଗା ସଂଗଠନ ସଂଯୁକ୍ତ ନାଗା ପରିଷଦର ବାଣିଜ୍ୟିକ ଅବରୋଧ ଆନ୍ଦୋଳନ। ଅବାଧ ଚଳପ୍ରଚଳ ବ୍ୟବସ୍ଥା ବା ଏଫଏମଆର ଉପରେ ଲଗାଯାଇଥିବା ନିଷେଧାଦେଶ ହଟାଇବା ଏବଂ ଭାରତ-ମିଆଁମାର ସୀମାରେ ତାରବାଡ଼ ଲଗାଇବାକୁ ବିରୋଧ କରି ଏହି ଆନ୍ଦୋଳନ ହେବ। ଏହି ଆନ୍ଦୋଳନ ଯୋଗୁ ନାଗା ଅଧ୍ୟୁଷିତ ସେନାପତି, ଉଖରୁଲ, ଚାନ୍ଦେଲ, ତାମଙ୍ଗଲଙ୍ଗ, କାମଜୋଙ୍ଗ ଓ ମନି ଅଞ୍ଚଳ ଦେଇ ଯାଇଥିବା ଜାତୀୟ ରାଜପଥଗୁଡିକରେ ଯାନବାହନ ଚଳାଚଳକୁ ଅବରୋଧ କରାଯିବ। ନାଗା ସଂଗଠନର ଆନ୍ଦୋଳନ ଯୋଗୁ ଜାତୀୟ ରାଜପଥ ୨ ଓ ଜାତୀୟ ରାଜପଥ ୩୭ରେ ଯାନବାହନ ଚଳାଚଳ ପ୍ରଭାବିତ ହେବ। ପରବର୍ତ୍ତୀ ଘୋଷଣା ଯାଏ ଏହି ଆନ୍ଦୋଳନ ଚାଲିବ ବୋଲି କହିଛି ସଂଗଠନ। ଏଫଏମଆରକୁ ରଦ୍ଦ କରିବା ଏବଂ ସୀମାରେ ତାରବାଡ଼ ଲଗାଇବା ଯୋଗୁ ନାଗାମାନେ ଉତ୍ତ୍ୟକ୍ତ ହୋଇଛନ୍ତି। ସୀମାରେ ତାରବାଡ଼ ଲାଗି କେନ୍ଦ୍ର ସରକାର ୩୦ ହଜାର କୋଟି ଟଙ୍କା ବ୍ୟୟ କରିଥିବାବେଳେ ମୋଟ ୧ ହଜାର ୬୨୪ କିଲୋମିଟର ତାରବାଡ଼ କରାଯିବ। ପ୍ରତିବାଦରେ ବହୁ ଆନ୍ଦୋଳନ ଓ ଧାରଣା କରିଛନ୍ତି ନାଗା ସଂଗଠନ। ମିଆଁମାର ସହ ମଣିପୁରର ସୀମା ରହିଛି ୩୯୮ କିଲୋମିଟର।
ବିହାର ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗ: ଆଜି ଶୁଣାଣି କରିବେ ସୁପ୍ରିମକୋର୍ଟ
ବିହାର ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗ। ଆଜି ବିଭିନ୍ନ ରାଜନୈତିକ ଦଳ ପକ୍ଷରୁ ଆଗତ ହୋଇଥିବା ବହୁ ପିଟିସନର ଶୁଣାଣି କରିବେ ସୁପ୍ରିମକୋର୍ଟ। ବିହାରରେ ଏସଆଇଆର ଲାଗି ଗତ ଜୁନ ୨୪ରେ ନିର୍ବାଚନ କମିଶନ ଜାରି କରିଥିବା ବିଜ୍ଞପ୍ତିକୁ ବିରୋଧ କରିଥିଲେ ବହୁ ରାଜନୈତିକ ଦଳ। ଏସଆଇଆର ପ୍ରକ୍ରିୟାରେ ରାଜ୍ୟର ୭ କୋଟି ୨୪ ଲକ୍ଷ ଭୋଟରଙ୍କ ମଧ୍ୟରୁ ଚିଠା ଭୋଟର ତାଲିକାରେ ୯୯.୫ ପ୍ରତିଶତ ଭୋଟର ସେମାନଙ୍କ ବୈଧ ନଥିପତ୍ର ଦାଖଲ କରିଛନ୍ତି ବୋଲି ନିର୍ବାଚନ କମିଶନ ଯେଉଁ ଯୁକ୍ତି ଦର୍ଶାଇଛନ୍ତି ତାହାରି ଉପରେ ଶୁଣାଣି କରିବେ ସୁପ୍ରିମକୋର୍ଟ। ଇସିଆଇଙ୍କ ଏହି ଯୁକ୍ତି ପ୍ରସଙ୍ଗରେ ସୁପ୍ରିମକୋର୍ଟରେ ଆବେଦନ କରିଥିଲେ ଆରଜେଡି, ଏଆଇଏମଆଇଏମ ଓ ଅନ୍ୟାନ୍ୟ ପକ୍ଷ। ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଜୟମାଲ୍ୟ ବାଗଚୀଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରିବେ। ଏସଆଇଆରର ଡେଡଲାଇନ ବଢାଇବା ପ୍ରସଙ୍ଗରେ ଗତ ସେପ୍ଟେମ୍ବର ୧ରେ ମାମଲାର ଶୁଣାଣି ବେଳେ ଇସିଆଇ କହିଥିଲେ- ସେପ୍ଟେମ୍ବର ୧ ପରେ ବି ଭୋଟରମାନେ ବିଭିନ୍ନ ଦାବି ଓ ସଂଶୋଧନ କରିପାରିବେ। ତେବେ ଭୋଟର ତାଲିକା ଚୂଡ଼ାନ୍ତ ହେବା ପରେ ଏହାକୁ ବିଚାରକୁ ନିଆଯିବ। ବିଧାନସଭା ନିର୍ବାଚନରେ ପ୍ରାର୍ଥୀ ପତ୍ରର ଦାଖଲର ଶେଷ ତାରିଖ ଯାଏ ଚିଠା ଭୋଟର ତାଲିକା ପ୍ରସଙ୍ଗରେ ଦାବି ଓ ସଂଶୋଧନ ପ୍ରସ୍ତାବ ଦିଆଯାଇପାରିବ। ଏସଆଇଆର ଯୋଗୁ ବିହାରର ମୋଟ ଭୋଟର ସଂଖ୍ୟା ୭ କୋଟି ୯୦ ଲକ୍ଷରୁ ହ୍ରାସ ପାଇ ୭ କୋଟି ୨୪ ଲକ୍ଷ ହୋଇଥିବା ସୂଚନା ମିଳିଛି।
ଭାରତୀୟ ଟିମକୁ ଅଭିନନ୍ଦନ ଜଣାଇଲେ ନବୀନ
ଭୁବନେଶ୍ବର : ଭାରତ ଚତୁର୍ଥ ଥର ପାଇଁ ପୁରୁଷ ଏସିଆ କପ ହକି ଚାମ୍ପିଅନ ହେବା ପରେ ଭାରତୀୟ ଟିମକୁ ଅଭିନନ୍ଦନ ଜଣାଇଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ବିହାରର ରାଜଗିର ହକି ଷ୍ଟାଡିଅମରେ ଅନୁଷ୍ଠିତ ମ୍ୟାଚରେ ଦକ୍ଷିଣ କୋରିଆକୁ ୪-୧ ଗୋଲରେ ଭାରତ ପରାସ୍ତ କରିବା ପରେ ଟିମକୁ ନବୀନ ଜଣାଇଛନ୍ତି ଶୁଭେଚ୍ଛା। ସେ କହିଛନ୍ତି- ଭାରତ କେବଳ ଚତୁର୍ଥ ଥର ଲାଗି କପ୍ ହାସଲ କରିନାହିଁ ବରଂ ବିଶ୍ବକପ ୨୦୨୬ ଲାଗି ଯୋଗ୍ୟତା ଅର୍ଜନ କରିଛି। ଭାରତୀୟ ଟିମର ଉଜ୍ବଳ ଭବିଷ୍ୟତ କାମନା କରିଛନ୍ତି ନବୀନ।
ଭାରତ ଚତୁର୍ଥ ଥର ପାଇଁ ପୁରୁଷ ଏସିଆ କପ ହକି ଚାମ୍ପିଅନ ହେବା ପରେ ଭାରତୀୟ ଟିମକୁ ଶୁଭେଚ୍ଛା ଜଣାଇଛନ୍ତି ରାଜ୍ୟସଭା ସାଂସଦ ମାନସ ମଙ୍ଗରାଜ। ଦମଦାର ବିଜୟ ସହ ୨୦୨୬ ବିଶ୍ବକପ୍ ଲାଗି ଭାରତ ଯୋଗ୍ୟତା ଅର୍ଜନ ହାସଲ କରିଥିବାରୁ ଭାରତୀୟ ଟିମକୁ ଅଭିନନ୍ଦନ ଜଣାଇଛନ୍ତି ସାଂସଦ ମାନସ ମଙ୍ଗରାଜ। ଅପୂର୍ବ ସାହସ ଓ ଟିମଗତ ପରିଚାଳନା ଯୋଗୁ ଏହି ସଫଳତା ହାସଲ ହୋଇପାରିଛି ବୋଲି ସେ କହିଛନ୍ତି। ସେହିପରି ଏହି ସଫଳତା ଲାଗି ଭାରତୀୟ ଟିମକୁ ଅଭିନନ୍ଦନ ଜଣାଇଛନ୍ତି ବିଜୁ ଜନତା ଦଳ ଉପସଭାପତି ପ୍ରଣବ ପ୍ରକାଶ ଦାସ।
ଭାରତ ଚତୁର୍ଥ ଥର ପାଇଁ ପୁରୁଷ ଏସିଆ କପ୍ ହକି ଚାମ୍ପିଅନ୍
ନନ୍ଦିଘୋଷ ବ୍ୟୁରୋ : ଭାରତ ଚତୁର୍ଥ ଥର ପାଇଁ ପୁରୁଷ ଏସିଆ କପ ହକି ଚାମ୍ପିଅନ। ଗତ ଥରର ବିଜେତା ଦକ୍ଷିଣ କୋରିଆକୁ ୪-୧ ଗୋଲରେ ପରାସ୍ତ କଲା ଭାରତ । ହରମନପ୍ରୀତ ସିଂହଙ୍କ ଅଧିନାୟକତ୍ୱରେ ଭାରତୀୟ ଦଳ ଦୀର୍ଘ ୮ ବର୍ଷ ଅପେକ୍ଷା ପରେ ପୁରୁଷ ହକି ଏସିଆ କପ୍ ଟାଇଟଲ ଜିତିଛି। ରାଜଗିରରେ ଖେଳାଯାଇଥିବା ଟୁର୍ଣ୍ଣାମେଣ୍ଟର ଫାଇନାଲରେ, ଭାରତୀୟ ଦଳ ଡିଫେଣ୍ଡିଂ ଚାମ୍ପିଅନ୍ ଦକ୍ଷିଣ କୋରିଆକୁ ଏକତରଫା ଭାବରେ ୪-୧ ଗୋଲରେ ପରାସ୍ତ କରିଥିଲା ।ଏହା ସହିତ ଚତୁର୍ଥ ଥର ପାଇଁ ଏହି ଟୁର୍ଣ୍ଣାମେଣ୍ଟର ଟାଇଟଲ ଜିତିଥିଲା। ଏହି ବିଜୟ ସହିତ, ଟିମ୍ ଇଣ୍ଡିଆ ନେଦରଲ୍ୟାଣ୍ଡ ଏବଂ ବେଲଜିୟମରେ ଖେଳାଯିବାକୁ ଥିବା FIH ପୁରୁଷ ବିଶ୍ୱକପ୍ ୨୦୨୬ ପାଇଁ ମଧ୍ୟ ଯୋଗ୍ୟତା ଅର୍ଜନ କରିଛି।
ବିହାରର ରାଜଗିରରେ ପ୍ରଥମ ଥର ପାଇଁ ଖେଳାଯାଇଥିବା ଏହି ଟୁର୍ଣ୍ଣାମେଣ୍ଟରେ, ଟିମ୍ ଇଣ୍ଡିଆକୁ ଆରମ୍ଭରୁ ଟାଇଟଲ୍ ପାଇଁ ଦାବିଦାର ବିବେଚନା କରାଯାଉଥିଲା। ପ୍ରଶିକ୍ଷକ କ୍ରେଗ୍ ଫୁଲଟନଙ୍କ ଦଳ ଏହି ଆଶାକୁ ସଠିକ୍ ପ୍ରମାଣିତ କରିଥିଲେ । ସମଗ୍ର ଟୁର୍ଣ୍ଣାମେଣ୍ଟରେ ଗୋଟିଏ ବି ମ୍ୟାଚ୍ ନ ହାରି ଟାଇଟଲ୍ ଜିତିଥିଲେ। ଟିମ୍ ଇଣ୍ଡିଆ ପୁଲ୍ ପର୍ଯ୍ୟାୟରେ ଏହାର ତିନୋଟି ମ୍ୟାଚ୍ ଜିତିଥିଲା। ତା’ପରେ ସୁପର-୪ରେ, ଏହା ୩ଟି ମ୍ୟାଚ୍ ମଧ୍ୟରୁ ୨ଟି ଜିତିଥିଲା। ଭାରତକୁ କେବଳ ଗୋଟିଏ ମ୍ୟାଚ୍ ଡ୍ରରେ ସନ୍ତୁଷ୍ଟ ହେବାକୁ ପଡିଥିଲା ଏବଂ ଏହି ମ୍ୟାଚ୍ କୋରିଆ ବିପକ୍ଷରେ ଥିଲା, ଯାହା ୨-୨ରେ ଶେଷ ହୋଇଥିଲା।
ରବିବାର, ସେପ୍ଟେମ୍ବର ୭ତାରିଖରେ ଅନୁଷ୍ଠିତ ଏହି ଫାଇନାଲରେ, ଟିମ୍ ଇଣ୍ଡିଆ ଏକ ମହାନ ଆରମ୍ଭ କରିଥିଲା ଓ ପ୍ରଥମ ମିନିଟ୍ରେ ହିଁ ଏକ ଗୋଲ ସ୍କୋର କରି ୧-୦ରେ ଆଗୁଆ ହୋଇଥିଲା। ଟୁର୍ଣ୍ଣାମେଣ୍ଟରେ ନିରନ୍ତର ଭଲ ପ୍ରଦର୍ଶନ କରିଆସୁଥିବା ସୁଖଜିତ୍ ଟିମ୍ ଇଣ୍ଡିଆ ପାଇଁ ଖାତା ଖୋଲିଥିଲେ। ତଥାପି, ଦ୍ୱିତୀୟ ଗୋଲ ପାଇଁ ଦଳକୁ ବହୁତ ସମୟ ଅପେକ୍ଷା କରିବାକୁ ପଡିଥିଲା ଏବଂ ପ୍ରଥମାର୍ଦ୍ଧ ଶେଷ ହେବାର ୨ ମିନିଟ୍ ପୂର୍ବରୁ, ଦିଲପ୍ରୀତ ସିଂହ ସ୍କୋରକୁ ୨-୦କରି ଦଳକୁ ଆଶ୍ୱସ୍ତି ଦେଇଥିଲେ।
ଟିମ୍ ଇଣ୍ଡିଆ ମ୍ୟାଚ୍ରେ ପ୍ରାଧାନ୍ୟ ବିସ୍ତାର କରିଚାଲିଥିଲା କିନ୍ତୁ କୋରିଆନ୍ର ପ୍ରତିରକ୍ଷାକୁ ଭାଙ୍ଗିବା ଏତେ ସହଜ ନଥିଲା। ଏହି କାରଣରୁ ତୃତୀୟ ଗୋଲ ପାଇଁ ସମୟ ଲାଗିଥିଲା କିନ୍ତୁ ଯେତେବେଳେ ୪୫ତମ ମିନିଟରେ ସଫଳତା ଆସିଲା, ସେତେବେଳେ ଦିଲପ୍ରୀତ ସିଂହ ପୁଣି ଥରେ ଗୋଲ ଦେଇଥିଲେ। ଏହା ଦିଲପ୍ରୀତଙ୍କ ମ୍ୟାଚ୍ରେ ଦ୍ୱିତୀୟ ଗୋଲ ଥିଲା। ତା’ପରେ ଦକ୍ଷିଣ ଆଫ୍ରିକାର ପ୍ରତ୍ୟାବର୍ତ୍ତନ ପ୍ରାୟ ଅସମ୍ଭବ ହୋଇଗଲା । ଅମିତ ରୋହିଦାସଙ୍କ ଗୋଲ ବଳକା ଆଶାକୁ ଶେଷ କରିଦେଲା। ଦକ୍ଷିଣ କୋରିଆ ୫୭ତମ ମିନିଟରେ ଏକ ଗୋଲ କରିଥିଲା କିନ୍ତୁ ଏହା ସ୍କୋରଲାଇନରେ ସାମାନ୍ୟ ପରିବର୍ତ୍ତନ ଆଣିବା ପାଇଁ ଯଥେଷ୍ଟ ପ୍ରମାଣିତ ହେଲା।
୯ମ ଫାଇନାଲ୍ ଖେଳି ଭାରତୀୟ ଦଳ ଚତୁର୍ଥ ଥର ପାଇଁ ଏସିଆ କପ୍ ଟାଇଟଲ୍ ଜିତିଛି। ଟିମ୍ ଇଣ୍ଡିଆର ଶେଷ ଟାଇଟଲ୍ ୮ ବର୍ଷ ପୂର୍ବେ ୨୦୧୭ରେ ଆସିଥିଲା। ଏବେ କେବଳ ଦକ୍ଷିଣ କୋରିଆ ପାଖରେ ଏହାଠାରୁ ଅଧିକ ଟାଇଟଲ୍ ଅଛି। ଫାଇନାଲରେ, ଭାରତ ଦକ୍ଷିଣ କୋରିଆ ବିପକ୍ଷରେ ଏହାର ସ୍କୋର ୨-୨ରେ ସମାନ କରିଥିଲା। ପୂର୍ବରୁ, ଦୁଇ ଦେଶ ମଧ୍ୟରେ ୩ଟି ଫାଇନାଲ୍ ଖେଳାଯାଇଥିଲା, ଯେଉଁଥିରେ ୨ଟି ଦକ୍ଷିଣ କୋରିଆ ଏବଂ ଗୋଟିଏ ଭାରତ ଜିତିଥିଲା। କେବଳ ଏତିକି ନୁହେଁ, ଏହି ଟାଇଟଲ୍ ବିଜୟ ସହିତ, ଟିମ୍ ଇଣ୍ଡିଆ ବେଲଜିୟମ ଏବଂ ନେଦରଲ୍ୟାଣ୍ଡରେ ଅନୁଷ୍ଠିତ ହେବାକୁ ଥିବା ୨୦୨୬ ବିଶ୍ୱକପ୍ ପାଇଁ ସିଧାସଳଖ ଯୋଗ୍ୟତା ଅର୍ଜନ କରିଛି।
‘ବିହାରରେ ମହିଳାଙ୍କ ଲାଗି କିଛି କରିନାହାନ୍ତି ଜେଡିୟୁ ସରକାର’
ନନ୍ଦିଘୋଷ ବ୍ୟୁରୋ : ବିହାରରେ ମହିଳାଙ୍କ ଲାଗି କିଛି କରିନାହାନ୍ତି ଜେଡିୟୁ ସରକାର। ଜେଡିୟୁ ଓ ବିଜେପିର ମେଣ୍ଟ ସରକାର ରାଜ୍ୟରେ ଥିବାବେଳେ ମହିଳାମାନେ ଉପେକ୍ଷିତ ହୋଇଛନ୍ତି। ସେପଟେ ଆରଜେଡି ସାଂସଦ ସଞ୍ଜୟ ଯାଦବ କହିଛନ୍ତି- ୧୦ ମାସ ତଳେ ଆରଜେଡି ନେତା ତେଜସ୍ବୀ ଯାଦବ କରିଥିଲେ ଏକ ବଡ଼ ଘୋଷଣା। ସେ କହିଥିଲେ ଯଦି ବିହାରରେ ମହାଗଠବନ୍ଧନ ସରକାର କରେ ତେବେ ପ୍ରତିମାସରେ ମହିଳାଙ୍କୁ ମାସିକ ୨ ହଜାର ୫୦୦ ଟଙ୍କା ଦିଆଯିବ। ଏଥିଲାଗି ଆରଜେଡି କର୍ମୀମାନେ ଫର୍ମ ସଂଗ୍ରହ କରୁଛନ୍ତି। ରାଜ୍ୟବାସୀଙ୍କ ଅର୍ଥନୈତିକ ଅଭିବୃଦ୍ଧି ଲାଗି ଆରଜେଡି ପ୍ରତିଶ୍ରୁତିବଦ୍ଧ। ପ୍ରତିଦିନ ଲକ୍ଷ ଲକ୍ଷ ବିହାରବାସୀ ମହାଗଠବନ୍ଧନରେ ସାମିଲ ହେଉଛନ୍ତି ବୋଲି ସେ କହିଛନ୍ତି। ସେପଟେ କିଷନଗଞ୍ଜରେ ଆୟୋଜିତ ଏକ ମୁସଲିମ ସମ୍ମିଳନୀରେ ସ୍ବଚ୍ଛ ଶାସନର ପ୍ରତିଶ୍ରୁତି ଦେଇଛନ୍ତି ଜନସୂରାଜ ପାର୍ଟି ନେତା ପ୍ରଶାନ୍ତ କିଶୋର। ସେ କହିଛନ୍ତି- ଜନ ସୂରାଜ ପାର୍ଟି କ୍ଷମତାକୁ ଆସିଲେ ସମସ୍ତଙ୍କୁ ନ୍ୟାୟ ମିଳିବ। ରାଜ୍ୟର ବିକାଶ ଘଟିବ
ପାଣିରେ ବୁଡିଲା ୩ଶହରୁ ଅଧିକ କାର୍
ନନ୍ଦିଘୋଷ ବ୍ୟୁରୋ ; ହରିଆଣାରେ ବର୍ଷା ତାଣ୍ଡବ। ଅଧିକାଂଶ ଅଞ୍ଚଳ ଜଳବନ୍ଦୀ। ସେପଟେ ଝାଜର ଜିଲ୍ଲା ଅନ୍ତର୍ଗତ ବାହାଦୂରଗଡ଼ରେ ଭରି ରହିଛି ପାଣି। ବାହାଦୂରଗଡ଼ରେ ପାଣି ଜମି ରହିଥିବାବେଳେ ଶିଳ୍ପାଞ୍ଚଳ ସ୍ଥିତି ସଂଗୀନ ହୋଇଛି। ଏଠାରେ ଥିବା ମାରୁତି ଗୋଦାମରେ ପାଣି ପଶିଯିବାରୁ ୩ଶହରୁ ଅଧିକ କାର୍ ବୁଡ଼ିଯାଇଛି। ସେଠାରେ ଜଳ ପରିମାଣ ବଢ଼ିବା ପରିଲକ୍ଷିତ ହୋଇଥିବା ସତ୍ତ୍ବେ ଏତେ ସଂଖ୍ୟକ କାରକୁ ପଦାକୁ ଅଣାଯାଇପାରି ନଥିଲେ। କାରଗୁଡିକ ମଧ୍ୟରେ ରହିଛି ଅଲଟୋ, ୱାଗନର, ଭିତାରା, ବ୍ରିଜା, ଇନଭିକ୍ଟୋ ଆଦି କାର। ଘାଗର ନଦୀର ଜଳପତ୍ତନ ବୃଦ୍ଧି ପାଉଥିବାରୁ ନଦୀ ପ୍ରବାହିତ ଅଞ୍ଚଳ ଜଳମଗ୍ନ ହୋଇଛି। ଲଗାତାର ପ୍ରବଳ ବର୍ଷା ଯୋଗୁ ଜନଜୀବନ ଗୁରୁତର ପ୍ରଭାବିତ ହୋଇଛି। ହାଥନିକୁଣ୍ଡ ବ୍ୟାରେଜରୁ ଜଳ ନିଷ୍କାସନ କରାଯାଉଥିବାରୁ ଏହାର ପ୍ରଭାବ ଗୁରୁଗ୍ରାମରେ ପଡିଛି। ବିଭିନ୍ନ ତଳିଆ ଅଞ୍ଚଳ ଲାଗି ଆଲର୍ଟ ଜାରି କରାଯାଇଛି। ଲୋହାପୁଲ ଅଞ୍ଚଳରେ ଯମୁନା ନଦୀର ଜଳସ୍ତର ବୃଦ୍ଧି ପାଇବା ହେତୁ ଗୁରୁଗ୍ରାମର ଅନେକ ତଳିଆ ଅଞ୍ଚଳ ଜଳବନ୍ଦୀ ହୋଇଛି।