ନନ୍ଦିଘୋଷ ବ୍ୟୁରୋ : ଦିନକ ପରେ ଆରମ୍ଭ ହେବ ବିଧାନସଭାର ମୌସୁମୀ ଅଧିବେଶନ। ତା ପୂର୍ବରୁ ଆଜି ବସୁଛି ସର୍ବଦଳୀୟ ବୈଠକ। ଏହି ବୈଠକରେ ଉଭୟ ଶାସକ ଓ ବିରୋଧୀ ଦଳର ପ୍ରତିିନିଧିମାନେ ଯୋଗ ଦେବେ। କେମିତି ଗୃହରେ ସବୁ ପ୍ରସଙ୍ଗରେ ଆଲୋଚନା ହେବ, ବିରୋଧୀଙ୍କୁ ଉପଯୁକ୍ତ ସମୟ ମିଳିବ, ପ୍ରସଙ୍ଗ ଉଠାଇବାକୁ ସୁଯୋଗ ମିଳିବ, ସୁରୁଖୁରୁରେ ଗୃହ ଚାଲିବ, ତାକୁ ନେଇ ଆଲୋଚନା ହେବ ବୋଲି ଜଣାପଡ଼ିଛି। ଆଜି ସର୍ବଦଳୀୟ ବୈଠକ ପରେ ଆସନ୍ତାକାଲି ଉଭୟ ଶାସକ ଓ ବିରୋଧୀ ଦଳର ଅଲଗା ଅଲଗା ବିଧାୟକ ଦଳ ବୈଠକ ହେବ। ଅଧିବେଶନ ପାଇଁ ରଣନୀତି ପ୍ରସ୍ତୁତ କରିବେ ସମସ୍ତେ। ବିଧାନସଭାର ମୌସୁମୀ ଅଧିବେଶନ ୧୮ ତାରିଖରୁ ଆରମ୍ଭ ହୋଇ ୨୫ ତାରିଖରେ ଶେଷ ହେବ। ଏହି ଅଳ୍ପ ଦିନର ଅଧିବେଶନରେ ସାର ଅଭାବ, ଚାଷୀ ସମସ୍ୟା, ଆଇନ ଶୃଙ୍ଖଳା ପରିସ୍ଥିତି ପରି ଅନେକ ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉଠାଇ ପାରନ୍ତି ବିରୋଧୀ।
ଗର୍ଭରେ ଯାଆଁଳା, ପ୍ରସବ ଗୋଟିଏ ପିଲା ! ପ୍ରସବ ହେଉ ହେଉ ପିଲା ଚୋରି ଅଭିଯୋଗ
ନନ୍ଦିଘୋଷ ବ୍ୟୁରୋ : ସୋନୋଗ୍ରାଫି ବେଳେ ଡାକ୍ତର କହିଥିଲେ, ଜାଆଁଳା ସନ୍ତାନ ହେବ। କିନ୍ତୁ ପ୍ରସବ ହେଲା ଗୋଟିଏ ପିଲା। ଏହା ପରେ ପରିବାର ଲୋକେ ପ୍ରଶ୍ନ କରିଛନ୍ତି, ଆଉ ଗୋଟିଏ ପିଲା କୁଆଡ଼େ ଗଲା। ଏପରିକି ସେମାନେ ନବରଙ୍ଗପୁର ଉମରକୋଟ ଥାନାରେ ଅଭିଯୋଗ ମଧ୍ୟ କରିଛନ୍ତି। ଏହି ଅଭିଯୋଗ କରିଛନ୍ତି, ନବରଙ୍ଗପୁର ଜିଲ୍ଲା ରାଇଘର ବ୍ଲକ ଆଦିପାରା ଗାଁର ରାକେଶ ଗଣ୍ଡ। ସେ କହିଛନ୍ତି, ତାଙ୍କ ସ୍ତ୍ରୀଙ୍କ ଗର୍ଭରେ ଯାଆଁଳା ସନ୍ତାନ ଥିବା କହିଥିଲେ ଡାକ୍ତର।
ଗତ ଜୁନ ମାସ ୫ ତାରିଖରେ ହୋଇଥିବା ସୋନୋଗ୍ରାଫିରୁ ଏହା ଜଣାପଡି଼ଥିବା ତାଙ୍କୁ କୁହାଯାଇଥିଲା। ଯାଆଁଳା ପିଲା ପାଇଁ କୁନ୍ତୀଙ୍କୁ ରେଡକାର୍ଡ ସହ ସ୍ୱତନ୍ତ୍ର ଚିକିତ୍ସାର ବ୍ୟବସ୍ଥା କରାଯାଇଥିଲା। ଏଇ ମାସ ୩ ତାରିଖରେ ଗର୍ଭଯନ୍ତ୍ରଣା ହେବାରୁ କୁନ୍ତୀଙ୍କୁ ପ୍ରଥମେ ହାଟଭରଣ୍ଡୀ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଥିଲା। ରେଡ କାର୍ଡ ଓ ଜାଆଁଳା ଛୁଆ ଥିବା ଯୋଗୁଁ ତାଙ୍କୁ ଉମରକୋଟ ଉପଖଣ୍ଡ ସ୍ୱାସ୍ଥ୍ୟ କେନ୍ଦ୍ରକୁ ରେଫର କରିଥିଲେ ଡାକ୍ତର। କିନ୍ତୁ ଉମରକୋଟରେ ପ୍ରସବ ପରେ ମେଡିକାଲ କର୍ତ୍ତୃପକ୍ଷ କହିଥିଲେ, ଗୋଟିଏ ପିଲା ପ୍ରସବ ହୋଇଛି। ପରିବାର ଲୋକେ ଏବେ ପ୍ରଶ୍ନ କରିଛନ୍ତି, ଆଗରୁ ତ ଯାଆଁଳା ପିଲା ଥିବା କୁହାଯାଇଥିଲା। ଆଉ ଏକ ପିଲା କୁଆଡ଼େ ଗଲା। ପ୍ରସବ ପରେ ଡାକ୍ତରଖାନାରୁ ଗୋଟିଏ ପିଲାକୁ ଚୋରି କିମ୍ବା ବିକ୍ରି କରି ଦିଆଯାଇଥିବା ସେମାନେ ଅଭିଯୋଗ କରିଛନ୍ତି। ଉମରକୋଟ ଥାନାରେ ଛୁଆ ଚୋରି ଅଭିଯୋଗ ନେଇ ଏତଲା ମଧ୍ୟ ଦେଇଛନ୍ତି। ଏ ସଂପର୍କରେ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାକ୍ତର ସନ୍ତୋଷ ପଣ୍ଡା କହିଛନ୍ତି, ମୋ ପାଖରେ ସେମିତି କୌଣସି ଅଭିଯୋଗ ଆସିନାହିଁ।
ମେଡିକାଲରୁ ନବଜାତ ଉଭାନ; ଅଢେଇ ମାସ ହେଲାଣି ମିଳୁନି ନବଜାତର ସନ୍ଧାନ
ନନ୍ଦିଘୋଷ ବ୍ୟୁରୋ : ମେଡିକାଲରୁ ନବଜାତ ଉଭାନ । ଅଢେଇ ମାସ ହେଲାଣି ମିଳୁନି ନବଜାତର ସନ୍ଧାନ । ଏଭଳି ଘଟଣା ଦେଖିବାକୁ ମିଳିଛି ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ । ନବଜାତ ଶିଶୁର ସନ୍ଧାନ ପାଇଁ ମାଥିଲି ସବଡିଭିଜନ ମେଡିକାଲର ଭାରପ୍ରାପ୍ତ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କ ଦ୍ବାରସ୍ଥ ହୋଇ ଲିଖିତ ଅଭିଯୋଗ କରିଛନ୍ତି ପରିବାର ଲୋକ । କମାରପାଲି ଗାଁର ଲସୁ କବାସୀଙ୍କ ସ୍ତ୍ରୀ ଆଡମେ ପଡିଆମୀ ଗତ ଜୁଲାଇ ୧୮ ତାରିଖରେ ପ୍ରସବ ଯନ୍ତ୍ରଣାରେ ମାଥିଲି ସବଡିଭିଜନ ମେଡିକାଲରେ ଭର୍ତ୍ତି ହୋଇଥିଲେ । ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ହେବାରୁ ମାଲକାନଗିରି ମୁଖ୍ୟ ଚିକିତ୍ସାଳୟକୁ ଡାକ୍ତର ସ୍ଥାନାନ୍ତର କରିଥିଲେ । ସେଠାରେ ନବଜାତ ଶିଶୁକୁ ଜନ୍ମ ଦେଇଥିଲେ । ପ୍ରସବ ପରେ ଆଉ ନବଜାତକୁ ପରିବାର ଲୋକଙ୍କୁ ସ୍ବାସ୍ଥ୍ୟକେନ୍ଦ୍ର ହସ୍ତାନ୍ତର କରିନଥିବା ଅଭିଯୋଗ କରିଛନ୍ତି ଆଡମେଙ୍କ ସ୍ବାମୀ ଲସୁ କବାସୀ । ସେହି ଦିନରୁ ଆଉ ନବଜାତର ସନ୍ଧାନ ମିଳିପାରୁନାହିଁ । ଜିଲା ମୁଖ୍ୟ ଚିକିତ୍ସାଳୟରୁ ଶିଶୁ ନିଖୋଜକୁ ନେଇ ତଦନ୍ତ ପାଇଁ ଲିଖିତ ଅଭିଯୋଗ କରିଛନ୍ତି ପରିବାର ଲୋକେ ।
କାଳ ହୋଇ ମାଡି ଆସିଲା ଟ୍ରକ୍ , ୧୨ରୁ ୧୫ ଜଣଙ୍କୁ ଚକାତଳେ ଚାପିଦେଲା
ନନ୍ଦିଘୋଷ ବ୍ୟୁରୋ : ୧୦ରୁ ୧୫ ଜଣଙ୍କୁ ଚାପିଦେଲା ଦ୍ରୁତଗାମୀ ଟ୍ରକ୍ । ୨ ଜଣଙ୍କ ମୃତ୍ୟୁ, ଅନେକ ଆହତ । ମଧ୍ୟପ୍ରଦେଶର ଇନ୍ଦୋରର ଏୟାରପୋର୍ଟ ରୋଡ୍ର ଶିକ୍ଷକ ନଗରରେ ଘଟିଛି ଏହି ଭୟଙ୍କର ଦୁର୍ଘଟଣା । ସୋମବାର ସନ୍ଧ୍ୟାରେ ଘଟିଛି ଏହି ଦୁର୍ଘଟଣା । ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା କରାଯାଉଛି। ଦୁର୍ଘଟଣା ସମୟରେ ଏକ ବାଇକ୍ ଟ୍ରକ୍ ତଳେ ଫସି ଯାଇଥିଲା । ଟ୍ରକ୍ ଟି ବାଇକ୍କୁ ବହୁତ ଦୂର ପର୍ଯ୍ୟନ୍ତ ଟାଣି ନେଇଥିଲା । ଯାହା ଫଳରେ ବାଇକଟିରେ ନିଆଁ ଲାଗି ଟ୍ରକଟି ମଧ୍ୟ ଜଳିଯାଇଥିଲା । ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ଏବଂ ଅଗ୍ନିଶମ ବାହିନୀ ଦଳ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହିତ ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରିଛି । ବର୍ତ୍ତମାନ ପୋଲିସ ଅଞ୍ଚଳକୁ ଘେରାବନ୍ଦୀ କରି ପରିସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରୁଛି ।
ଦ୍ରୁତ ଗତିରେ ଆସୁଥିବା ଟ୍ରକଟି ନିୟନ୍ତ୍ରଣ ହରାଇ ପ୍ରଥମେ ଏକ ଇ-ରିକ୍ସା ସମେତ ଅନେକ ଗାଡ଼ିକୁ ଧକ୍କା ଦେଇଥିଲା। ପରେ ଏକ ବାଇକ ଟ୍ରକତଳେ ରହି ଘୋଷଡି ହୋଇ କିଛି ବାଟ ଯିବାରୁ ଜଳିଯାଇଥିଲା । ସେଥରୁ ନିଆଁ ବାହାରି ଟ୍ରକ ଟି ବି ଜଳିଯାଇଥିଲା । ଜଣେ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ଟ୍ରକର ବ୍ରେକ୍ କାମ କରୁନଥିଲା ଏବଂ ଡ୍ରାଇଭର ମଦ୍ୟପ ଅବସ୍ଥାରେ ଥିଲେ । ହଠାତ୍ ଟ୍ରକର ଟାୟାରରୁ ଧୂଆଁ ଏବଂ ନିଆଁ ବାହାରିବାକୁ ଲାଗିଲା । ଯାହା ପରେ ଏହା ଲୋକଙ୍କୁ ଧକ୍କା ଦେବା ଆରମ୍ଭ କଲା। ଅନେକ ଲୋକ ତଳେ ପଡ଼ିଗଲେ। ଦୁର୍ଘଟଣାଟି ଏତେ ଭୟଙ୍କର ଥିଲା ଯେ ମୃତଦେହ ରାସ୍ତାରେ ବିଛାଡି ହୋଇ ପଡିଥିଲା । ମୁଖ୍ୟମନ୍ତ୍ରୀ ମୋହନ ଯାଦବ ଇନ୍ଦୋରରେ ଟ୍ରକ ଦୁର୍ଘଟଣା ପାଇଁ ଦୁଃଖ ପ୍ରକାଶ କରିଛନ୍ତି । ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦେବା ସହ ଆହତଙ୍କ ମାଗଣା ଚିକିତ୍ସା ପାଇଁ ନିର୍ଦ୍ଦେଶ ଦେଇଛନ୍ତି ।
ବ୍ରହ୍ମଗିରି ବାଲିହରିଚଣ୍ଡୀ ପୀଠ ଜଙ୍ଗଲରେ ଚାଞ୍ଚଲ୍ୟ, ପ୍ରେମିକକୁ ଗଛରେ ବାନ୍ଧି ପ୍ରେମିକାକୁ ଗଣଦୁଷ୍କର୍ମ ଅଭିଯୋଗ
ନନ୍ଦିଘୋଷ ବ୍ୟୁରୋ : ପ୍ରେମିକକୁ ଗଛରେ ବାନ୍ଧି ପ୍ରେମିକାକୁ ଗଣଦୁଷ୍କର୍ମ। ବ୍ରହ୍ମଗିରି ପ୍ରସିଦ୍ଧ ଶକ୍ତିପୀଠ ମା’ ବାଲିହରିଚଣ୍ଡୀ ପୀଠ ନିକଟ ଜଙ୍ଗଲରେ ଘଟିଛି ଏହି ଲଜ୍ଜାଜନକ ଘଟଣା। ଏ ସଂପର୍କରେ କିନ୍ତୁ ମୁହଁ ଖୋଲୁନି ପୋଲିସ। ଘଟଣାରେ ବ୍ରହ୍ମଗିରି ଓ ସଦର ଥାନା ପୋଲିସ ୩ ଜଣଙ୍କୁ ଥାନାରେ ଅଟକ ରଖିଥିବା ବେଳେ, ଆଉ ଜଣେ ଫେରାର୍ ଥିବା ସୂଚନା ମିଳିଛି। ଅପରପକ୍ଷେ, ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ପୀଡ଼ିତାଙ୍କ ଡାକ୍ତରୀମାଇନା କରାଯାଇଛି।
ସ୍ଥାନୀୟ ଲୋକଙ୍କ କହିବା ଅନୁସାରେ, ଗତ ଶନିବାର ଦିନ ୧୧ଟାରେ ପ୍ରେମୀଯୁଗଳ ବାଲିହରଚଣ୍ଡୀ ବୁଲିବାକୁ ଆସିଥିଲେ। ମା’ଙ୍କୁ ଦର୍ଶନ କରିସାରିବା ପରେ ସମୁଦ୍ର କୂଳକୁ ବୁଲିବାକୁ ଯାଇଥିଲେ। ଏହି ସମୟରେ ୪ଜଣ ଦୁର୍ବୃତ୍ତ ସେମାନଙ୍କୁ ପିଛା କରିଥିଲେ। ସମୁଦ୍ର କୂଳକୁ ଯିବାକୁ ହେଲେ ଏକ ନଦୀ ପାର୍ ହେବାକୁ ପଡ଼ିଥାଏ। ସମ୍ପୃକ୍ତ ଯୁବକମାନେ ଉଭୟଙ୍କୁ ଡଙ୍ଗାରେ ନଦୀ ପାର୍ କରାଇଥିଲେ। କିନ୍ତୁ ନଦୀ ଅପରପାର୍ଶ୍ବରେ ପହଞ୍ଚିବା ପରେ ଯୁବକଙ୍କ ସ୍ୱଭାବ ବଦଳି ଯାଇଥିଲା। ସେମାନେ ପ୍ରେମିକକୁ ଏକ ଗଛରେ ବାନ୍ଧି ତାଙ୍କ ସାମ୍ନାରେ ପ୍ରେମିକାକୁ ଗଣଦୁଷ୍କର୍ମ କରିଥିବା ଅଭିଯୋଗ ହୋଇଛି।
ପ୍ରେମୀଯୁଗଳ ଯେତେ କାକୁତିମିନତି ହୋଇଥିଲେ ମଧ୍ୟ ସେମାନେ କିଛି ଶୁଣିନଥିଲେ। ପ୍ରାୟ ଅଧଘଣ୍ଟ ଧରି ୪ ଯୁବକ ପାଶବିକ ଅତ୍ୟାଚାର କରି ଚାଲିଥିଲେ। ଏହାପରେ ଯୁବକମାନେ ସେଠାରୁ ପଳାଇ ଯାଇଥିଲେ। ପରେ ପ୍ରେମୀଯୁଗଳ ବାଲିହରଚଣ୍ଡୀ ପୀଠକୁ ଆସି ଏ ବାବଦରେ ସ୍ଥାନୀୟ ଲୋକଙ୍କୁ ଜଣାଇଥିଲେ। ଖବର ପାଇ ସଦର ଏସ୍ଡିପିଓ ରବିନାରାୟଣ ଭଞ୍ଜ, ସ୍ପେଶାଲ ସ୍କ୍ୱାଡ୍, ବ୍ରହ୍ମଗିରି ଓ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଛାନବିନ କରିଥିଲେ। ଅଭିଯୁକ୍ତଙ୍କ ମଧ୍ୟରୁ ପୋଲିସ ୩ଜଣଙ୍କୁ କାବୁ କରିଥିବା ବେଳେ, ଅନ୍ୟ ଜଣେ ଯୁବକ ଫେରାର୍ ହୋଇଯାଇଛି।
ପୋଲିସ ମଧ୍ୟ ଯଥାସମ୍ଭବ ଏହି ଘଟଣାକୁ ଚାପିଦେବାକୁ ଉଦ୍ୟମ କରୁଥିବା ନେଇ ଚର୍ଚ୍ଚା ହେଉଛି। ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି ବିଜେଡି ଉପସଭାପତି ସଞ୍ଜୟ ଦାସ ବର୍ମା। ବିଜେପି ସରକାରରେ ମହିଳା ସୁରକ୍ଷିତ ନଥିବା ଅଭିଯୋଗ କରିଛନ୍ତି ସଞ୍ଜୟ। ରାଜ୍ୟରେ ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଥିବା ବେଳେ, ପ୍ରତିଦିନ ବଢ଼ି ଚାଲିଛି ଅପରାଦ। ବାଲେଶ୍ୱର, ପୁରୀ ଓ ବଳଙ୍ଗା ଘଟଣା ପରେ ବ୍ରହ୍ମଗିର ଅଞ୍ଚଳର ଏହି ଭୟଙ୍କର ଖବର ସାରା ରାଜ୍ୟକୁ ସ୍ତବ୍ଧ କରିଦେଇଛି। ପୁରୀ ଜିଲ୍ଲା ବାଲିହରଚଣ୍ଡୀ ଆଜି ନିରାପଦ ନୁହେଁ। ତେଣୁ ଏଠାରେ ଏକ ଫାଣ୍ଡି ପ୍ରତିଷ୍ଠା କରିବାକୁ ଦାବି କରିଛନ୍ତି ସଞ୍ଜୟ ଦାସ ବର୍ମା।
’ବରିଷ୍ଠ ନେତାମାନେ ଏକଜୁଟ ହୋଇ ଦଳ ପାଇଁ କାମ କଲେ ରାଜ୍ୟରେ କଂଗ୍ରେସ କ୍ଷମତାକୁ ଫେରିବ’
କଂଗ୍ରେସକୁ ବରିଷ୍ଠ କଣ୍ଟା । ସୁଧୁରି ଯିବାକୁ ବେଣୁଗୋପାଳଙ୍କ ପରାମର୍ଶ । ଭକ୍ତ କହିଲେ, ସଙ୍ଗଠିତ ହୁଅନ୍ତୁ ବରିଷ୍ଠ । ଜୟଦେବ ଓ କାଡାମ ମିଳାଇଲେ ସ୍ବର । ରାଜ୍ୟରେ ୨୫ ବର୍ଷ ହେବ କ୍ଷମତା ବାହାରେ କଂଗ୍ରେସ। ଦଳର ଭୋଟହାର ୩୩ ପ୍ରତିଶତରୁ ଖସି ୧୩ ପ୍ରତିଶତରେ ପହଞ୍ଚିଛି। ସଙ୍ଗଠନ ଅଛି, ହେଲେ ଦଳରେ ନାହିଁ ଏକତା। ଯାହା କଂଗ୍ରେସ କ୍ଷମତାକୁ ଫେରିବାରେ ବାଧକ ସାଜୁଛି। ବରିଷ୍ଠ ନେତାମାନେ ଏକଜୁଟ ହୋଇ ଦଳ ପାଇଁ କାମ କଲେ ରାଜ୍ୟରେ କଂଗ୍ରେସ ଶକ୍ତିଶାଳୀ ହେବ ଓ କ୍ଷମତାକୁ ଫେରିବ। ସୃଜନ ଅଭିଯାନ ଶେଷ ପରେ ସାଙ୍ଗଠନିକ ସ୍ଥିତିର ସମୀକ୍ଷା କରି ଏପରି ବାର୍ତ୍ତା ଦେଇଛନ୍ତି ଏଆଇସିସି ସାଧାରଣ ସମ୍ପାଦକ କେ.ସି ବେଣୁଗୋପାଳ। ତାଙ୍କ କହିବା କଥା, ଦଳରେ କେହି ବଡ଼ କି ଛୋଟ ନେତା ନାହାନ୍ତି। ସେହିପରି ବରିଷ୍ଠ ନେତା ଏକାଠି ହୋଇ କାମ କରିବା ଉପରେ ଫୋକସ ଦେଇଛନ୍ତି ପିସିସି ସଭାପତି। ସଙ୍ଗଠିତ ହୋଇ କାମ କଲେ ଦଳ ଆଗକୁ ବଢ଼ିବ ବୋଲି କହିଛନ୍ତି ଭକ୍ତ ଦାସ।
ସେପ୍ଟେମ୍ବର ୩୦ ତାରିଖ ସୁଦ୍ଧା ଜିଲ୍ଲା ସଭାପତିଙ୍କ ନାଁ ଘୋଷଣା କରିବ କଂଗ୍ରେସ। ଏହାପରେ ବ୍ଲକ ଓ ନଗର ସଭାପତିଙ୍କ ନାଁ ଚୂଡାନ୍ତ କରାଯିବ। ଏଆଇସିସି ଫୋକସରେ ଓଡ଼ିଶା ଥିବାରୁ ରାହୁଲ ଗାନ୍ଧି, କଂଗ୍ରେସ ଅଧ୍ୟକ୍ଷ ଓ ଦଳର ବରିଷ୍ଠ ନେତା ବାରମ୍ବାର ଓଡ଼ିଶା ଗସ୍ତରେ ଆସୁଛନ୍ତି। ତେଣୁ ବରିଷ୍ଠ ନେତାମାନେ ଏକଜୁଟ ହେବାର ଆବଶ୍ୟକତା ରହିଛି ବୋଲି ମତ ରଖିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ଓ ପୂର୍ବତନ ପିସିସି ସଭାପତି ଜୟଦେବ ଜେନା। ଗୁଜରାଟ ଢାଞ୍ଚାରେ ରାହୁଲ ଗାନ୍ଧି ଓଡ଼ିଶାରେ ସଙ୍ଗଠନ ସୃଜନ ଅଭିଯାନ ଜରିଆରେ ତୃଣମୂଳ ସ୍ତରରେ ଦଳକୁ ମଜବୁତ କରିବାକୁ ଅଣ୍ଟା ଭିଡିଛନ୍ତି। ହେଲେ ଓଡ଼ିଶାରେ ବରିଷ୍ଠ ନେତାଙ୍କ ମନ ଏକ ହୋଇ ପାରୁନଥିବାରୁ, ଚିନ୍ତାରେ ପଡ଼ିଛି ଏଆଇସିସି।
ଏକାବେଳେ ୨୭ଟି ଶିଳ୍ପାନୁଷ୍ଠାନର ଭିତ୍ତି ପ୍ରସ୍ତର ସ୍ଥାପନ: ୫୨ ହଜାର ନିଯୁକ୍ତି ସୁଯୋଗ
ଏକାବେଳେ ୨୭ଟି ଶିଳ୍ପାନୁଷ୍ଠାନର ଭିତ୍ତି ପ୍ରସ୍ତର ସ୍ଥାପନ । ୨୫ ହଜାର ୩୮୦ କୋଟି ଟଙ୍କାର ପୁଞ୍ଜି ନିବେଶ । ୫୨ ହଜାର ନିଯୁକ୍ତି ସୁଯୋଗ । ୧୨ ଜିଲ୍ଲାରେ କେମିକାଲ, ଟେକ୍ସଟାଇଲ, ପ୍ଲାଷ୍ଟିକ, ସିମେଣ୍ଟ, ଫୁଡ୍ ପ୍ରୋସେସିଂ, ଫାର୍ମା ଭଳି କମ୍ପାନୀ ପ୍ରତିଷ୍ଠା ହେବ। ୧୫ମାସରେ ୧ ଲକ୍ଷ ୭ହଜାର ନିଯୁକ୍ତି ଦେଲେଣି ବୋଲି ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି । ୩୦ ହଜାର ସରକାରୀ ପଦବୀରେ ନିଯୁକ୍ତି ମିଳିଥିବା ବେଳେ, ଘରୋଇ କ୍ଷେତ୍ରରେ ୭୭ ହଜାର ନିଯୁକ୍ତି ଦିଆଯାଇଛି । ସରକାରଙ୍କ ସୁଦୃଢ ଭିତ୍ତିଭୂମି, ରାଜ୍ୟର ଦକ୍ଷ ମାନବସମ୍ବଳ, ସ୍ବତନ୍ତ୍ର ପଲିସି ଯୋଗୁ ଓଡ଼ିଶାକୁ ପସନ୍ଦ କରୁଛନ୍ତି ପୁଞ୍ଜିନିବେଶକାରୀ। ୪ ମାସରେ ଶିଳ୍ପ ପ୍ରତିଷ୍ଠା କରିବାର ସୁଯୋଗ ମିଳିଥିବାରୁ ସରକାରଙ୍କୁ ଧନ୍ୟବାଦ ଦେଇଛନ୍ତି ଏସ୍ଆରଏଫ୍ କମ୍ପାନୀ ମୁଖ୍ୟ।
୨୭ଟି ଶିଳ୍ପ ମଧ୍ୟରେ ଏସଆରଏଫ ଲିମିଟେଡ୍ କମ୍ପାନୀ ଗଞ୍ଜାମରେ ୧୦ ହଜାର କୋଟି ଟଙ୍କାର ପୁଞ୍ଜିନିବେଶ କରିବାକୁ ଯାଉଛି । ଏହାଦ୍ୱାରା ୨୦ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ । ସେହିଭଳି ଏପସିଲନ କାର୍ବନ ଝାରସୁଗୁଡାରେ ୫ ହଜାର ୮୦୬ କୋଟି ଟଙ୍କାର ପୁଞ୍ଜିନିବେଶ କରିବ । ଯେଉଁଥିରେ ୨୫୦୦ ଜଣ ନିଯୁକ୍ତି ପାଇପାରିବେ। ଶ୍ରୀ ବଜରଙ୍ଗ ପାୱାର ଆଣ୍ଡ ମେଟାଲିକ୍ସ ଲିମିଟେଡ୍ ଖୋର୍ଦ୍ଧା ଜିଲ୍ଲାରେ ରେୟାର ଆର୍ଥ ମିନେରାଲ ଶିଳ୍ପ ପ୍ରତିଷ୍ଠା କରିବ । ସାହସପୁର, ଗେଡିଆପଲ୍ଲୀ ଏବଂ ସାନ୍ତରାପୁରଠାରେ ୨ ହଜାର ୯୬ କୋଟି ଟଙ୍କାର ପୁଞ୍ଜିନିବେଶ କରିବ ଶ୍ରୀ ବଜରଙ୍ଗ ପାୱାର ଆଣ୍ଡ ମେଟାଲିକ୍ସ ଲିମିଟେଡ୍ । ଏବେ ଇଜ ଅଫ ଡୁଇଙ୍ଗ ବଦଳରେ ସ୍ପିଡ୍ ଅଫ୍ ଡୁଇଙ୍ଗ ଧାରାରେ ସରକାର ଚାଲୁଛି। ବିଜେପି ସରକାରରେ ଶିଳ୍ପ କ୍ଷେତ୍ରରେ ୭୭ ହଜାର ୮୯୪ ନିଯୁକ୍ତି ସୃଷ୍ଟି ହୋଇଥିବା ବେଳେ, ସେଥିରୁ ୫୬ ହଜାର ୮୫୯ ଓଡ଼ିଆ ଯୁବକ ଯୁବତୀ ନିଯୁକ୍ତି ହୋଇଛନ୍ତି । ଉତ୍କର୍ଷ ଓଡ଼ିଶାରୁ ୩ ଲକ୍ଷ ୭୫ ହଜାର ନିଯୁକ୍ତି ଲକ୍ଷ୍ୟ ଥିବା ବେଳେ ଏବେ ସୁଦ୍ଧା ୨୦ ପ୍ରତିଶତ ଲକ୍ଷ୍ୟ ହାସଲ କରିଛନ୍ତି ସରକାର । ୧୬ ମାସରେ ୧୬ ବୈଠକ କରି ୨୬୯ଟି ପ୍ରକଳ୍ପକୁ ଅନୁମୋଦନ କରିଛନ୍ତି ମୁଖ୍ୟମନ୍ତ୍ରୀ ।
ଜଗା ଦର୍ଶନ ହେଲା ଶେଷ ଦର୍ଶନ: ବାଇଶି ପାହାଚରେ ଚାଲିଗଲା ଜଣେ ଭକ୍ତଙ୍କ ଜୀବନ
ଜଗା ଦର୍ଶନ ହେଲା ଶେଷ ଦର୍ଶନ । ଦର୍ଶନ କରିବାକୁ ଯାଉଥିବା ସମୟରେ ଜଣେ ଭକ୍ତଙ୍କ ଚାଲିଗଲା ଜୀବନ ।l ମୃତ ଶ୍ରଦ୍ଧାଳୁ ହେଲେ ଖଣ୍ଡପଡା ଅଞ୍ଚଳର ମନ୍ଦାକିନୀ ସାହୁ । ଶ୍ରୀକ୍ଷେତ୍ରରେ ପିଣ୍ଡଦାନ ସହ ମହାପ୍ରଭୁଙ୍କ ଦର୍ଶନ କରିବାକୁ ପରିବାର ସହ ଆସିଥିଲେ ମନ୍ଦାକିନୀ । ଆଜି ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ କରି ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀମନ୍ଦିରକୁ ଯାଇଥିଲେ । ଶ୍ରୀମନ୍ଦିର ଯିବାବେଳେ ବାଇଶି ପାହାଚରେ ମନ୍ଦାକିନୀ ଟଳିପଡିଥିଲେ । ଏହାପରେ ତାଙ୍କୁ ତୁରନ୍ତ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ତେବେ ସଦର ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
ବିଧାନସଭା ବେଳେ ରାଜରାସ୍ତାରେ ଗର୍ଜିବେ ଶିକ୍ଷକ
ବିଧାନସଭାବେଳେ ରାଜରାସ୍ତାରେ ଗର୍ଜିବେ ଶିକ୍ଷକ । ପ୍ରତିଶୃତି ଦେଇ ପ୍ରତାରଣାର ବିକଳ ଚିତ୍ର ଦେଖିବେ ଓଡି଼ଶାବାସୀ । ଶିକ୍ଷାନୁଷ୍ଠାନ ଛାଡି ରାଜଧାନୀର ରାଜରାସ୍ତାରେ ଏକାଠି ହେବେ ସବୁ ବର୍ଗର ଶିକ୍ଷକ-ଶିକ୍ଷୟିତ୍ରୀ, ଅଧ୍ୟାପକ-ଅଧ୍ୟାପିକା ଓ କର୍ମଚାରୀ। ପ୍ରାଥମିକ ଶିକ୍ଷକଙ୍କ ଠାରୁ ଆରମ୍ଭ କରି ଯୁକ୍ତ ଦୁଇ ଓ ଡିଗ୍ରୀ କଲେଜର ଅଧ୍ୟାପକ ମାନେ ରାଜରାସ୍ତାକୁ ଓଲ୍ହାଇବେ। ପାଠ ପଢ଼ାଇବା ଛାଡି ବିଧାନସଭା ଆଗରେ ବିକ୍ଷୋଭ କରିବେ ଓ ଧାରଣାରେ ବସିବେ। ଆସନ୍ତା ୨୦ ତାରିଖରେ ରାଜ୍ୟର ପ୍ରାଥମିକ ଶିକ୍ଷକ ମାନେ ହଜାର ହଜାର ସଂଖ୍ୟାରେ ପିଏମଜି ଠାରେ ବିକ୍ଷୋଭ କରିବେ। ସେହିପରି ଅଧ୍ୟାପକ କର୍ମଚାରୀ ମାନେ ମଧ୍ୟ ଆନ୍ଦୋଳନକୁ ଓହ୍ଲାଇବେ । ଯାହାକୁ ନେଇ ଏକ ବିଚିତ୍ର ସ୍ଥିତି ସୃଷ୍ଟି ହେବାକୁ ଯାଉଛି । ସରକାରକୁ ଆସିବା ପୂର୍ବରୁ ବିରୋଧୀ ଦଳରେ ରହି ଦାବି ପୂରଣ ପାଇଁ ବିଜେପି ଯେଉଁ ପ୍ରତିଶୃତି ଦେଇଥିଲା ତାକୁ ପୂରଣ ନକରି ୧୫ ମାସ ହେଲା ସମୟ ଗଡାଇ ଚାଲିଛି । ଯେଉଁଥିପାଇଁ ଏଭଳି ପରିସ୍ଥିତି ସୃଷ୍ଟି ହେବାକୁ ଯାଉଛି ଓ ଆଗକୁ ଏହା ଆହୁରି ବ୍ୟାପକ ହେବ ବୋଲି ବିଭିନ୍ନ ସଂଘ ପକ୍ଷରୁ ଚେତାଇ ଦିଆଯାଇଛି ।
କେବଳ ଶିକ୍ଷକ ଅଧ୍ୟାପକ କିମ୍ବା କର୍ମଚାରୀ ନୁହଁନ୍ତି ବାରମ୍ବାର ପ୍ରତିଶୃତି ଓ ପ୍ରତାରଣାରେ ଅତିଷ୍ଠ ହୋଇ ପଡ଼ିଥିବା ଭିନ୍ନକ୍ଷମ ଶିକ୍ଷକମାନେ ମଧ୍ୟ ନିଜ ପରିବାର ସହ ବିକ୍ଷୋଭ ଓ ଧାରଣାରେ ବସିବାକୁ ନିଷ୍ପତ୍ତି ନେଇଛନ୍ତି। ଆସନ୍ତା ୨୨ ତାରିଖରେ ବିଧାନସଭା ଆଗରେ ଧାରଣା ଦେବେ । ରାଜ୍ୟର ପ୍ରାୟ ଦେଢ଼ ଲକ୍ଷରୁ ଅଧିକ ଭିନ୍ନକ୍ଷମ ପିଲାଙ୍କ ଭବିଷ୍ୟତ ତିଆରି କରୁଥିବା ଭିନ୍ନକ୍ଷମ ଶିକ୍ଷକମାନେ ସରକାରଙ୍କ ପାଖରେ ଗୁହାରି କରି କରି ନିରାଶ ହେବା ପରେ ପରିବାର ସହ ଧାରଣା ଦେବେ । ରାଜ୍ୟରେ ଶିକ୍ଷା ବ୍ୟବସ୍ଥାରେ ଏଭଳି ସ୍ଥିତିକୁ ନେଇ ସରକାରଙ୍କ ଉପରେ ବର୍ଷିଛି ଅଭିଭାବକ ମହାସଂଘ। ନିର୍ବାଚନ ଜିତିବା ପାଇଁ ବହୁ ପ୍ରତିଶୃତି ଓ କୌଣସି କଥା ପୂରଣ ନ ହେବାରୁ ଏଭଳି ହେଉଛି ବୋଲି ମହାସଂଘ ପକ୍ଷରୁ କୁହାଯାଇଛି। ସେପଟେ ଶାସକ ଦଳର କହିବା କଥା ଶିକ୍ଷା ଓ ଶିକ୍ଷକଙ୍କ ପାଇଁ ପଦକ୍ଷେପ ନିଆଯାଉଛି। ଗୋଟିଏ ପଟେ କୌଣସି ଆଲୋଚନା କିମ୍ବା ବିଚାର ବିମର୍ଶ ନ କରି ଜାତୀୟ ଶିକ୍ଷା ନୀତି ଲାଗୁ ଯୋଗୁ ରାଜ୍ୟରେ ବିରୋଧ ତେଜିବାରେ ଲାଗିଛି । ଏବେ ବିଭିନ୍ନ ବର୍ଗର ଶିକ୍ଷକ ଏକସାଙ୍ଗରେ ଆନ୍ଦୋଳନକୁ ଓହ୍ଲାଇବା ସ୍ୱାଭାବିକ ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନଚିହ୍ନ ଲଗାଇଛି।
ସାର ପାଇଁ ଡହଳବିକଳ ଚାଷୀ: ରାଜରାସ୍ତାକୁ ଓହ୍ଲାଇଲା ବିଜେଡି
ସାର ପାଇଁ ଡହଳବିକଳ ଚାଷୀ । ଆଧାରକାର୍ଡ଼ ଲମ୍ବା ଲାଇନରେ ରଖି ରାତି ରାତି ରହୁଛନ୍ତି ଉଜାଗର । ହେଲେ ମିଳୁନି ସାର । ରାଜ୍ୟ ସରକାରଙ୍କ ସାର ମହଜୁଦ ଦାବି ଧୂଆଁବାଣ । ସାର ସଂକଟ ନେଇ ଆଜି ରାଜଭବନ ଆଗରେ ସରକାରଙ୍କ ବିରୋଧରେ ଗର୍ଜିଛି ବିଜେଡି । ରାଜ୍ୟପାଳଙ୍କୁ ଦେଇଛି ସ୍ମାରକ ପତ୍ର । ସେଥିରେ ପୁଣି ପୋଲିସ ସହ ଧସ୍ତାଧସ୍ତି ସ୍ଥିତି ଦେଖିବାକୁ ମିଳିଛି । ଗୋଟିଏ କି ଦୁଇଟି ଜିଲ୍ଲା ନୁହଁ ସାରା ରାଜ୍ୟରେ ଚାଷୀଙ୍କୁ ମିଳୁନି ସାର । ଫି ଦିନ ରାସ୍ତାରୋକ କରି ଚାଷୀ କରୁଛନ୍ତି ରାସ୍ତାରୋକ । ଅଥଚ ରାଜ୍ୟ ସରକାର ବେଫିକର । ଚାଷୀମାନେ ଘଣ୍ଟାଘଣ୍ଟା ପ୍ୟାକସ୍ ଓ ଲ୍ୟାମ୍ପସ ଆଗରେ ଅପେକ୍ଷା କରି ନିରାଶ ହୋଇ ଫେରୁଛନ୍ତି । ରାଜଭବନ ନିକଟରେ ଧାରଣା ଦେବା ପରେ ବିଜେଡି ନେତାମାନେ ରାଜଭବନ ଅଭିମୁଖେ ବାହାରିଥିଲେ । ହେଲେ ଅଧାବାଟରେ ପୋଲିସ ବ୍ୟାରିକେଡିଂ କରି ବିଜେଡି ନେତା ଓ କର୍ମୀଙ୍କୁ ଅଟକାଇଥିଲା । ବେଶ୍ କିଛ ସମୟ ଧରି ପୋଲିସ ଓ ବିଜେଡି କର୍ମୀଙ୍କ ଭିତରେ ଠେଲାପେଲା ଓ ମୁହାଁମୁହିଁ ପରିସ୍ଥିତି ଉପୁଜିଥିଲା । ଶେଷରେ ବ୍ୟାରିକେଡ୍ ଭାଙ୍ଗି ଆଗକୁ ଯିବାକୁ ବାଧ୍ୟ ହୋଇଥିଲା ବିଜେଡି କର୍ମୀ । କୃଷି ହେଉଛି ଓଡ଼ିଶା ଅର୍ଥନୀତିର ମୁଖ୍ୟ ଆଧାର । ଯାହା ୭୦ ପ୍ରତିଶତରୁ ଅଧିକ ଜନସଂଖ୍ୟାକୁ ଜୀବିକା ପ୍ରଦାନ କରେ । ଦୁଇ ଦଶନ୍ଧି ପୂର୍ବେ ରାଜ୍ୟର ଖାଦ୍ୟ ଆବଶ୍ୟକତା ପୂରଣ କରିବା ପାଇଁ ଓଡ଼ିଶା ଅନ୍ୟ ରାଜ୍ୟ ଉପରେ ନିର୍ଭର କରୁଥିଲା । ହେଲେ ପୂର୍ବତନ ନବୀନ ପଟ୍ଟନାୟକ ସରକାରଙ୍କ ବିଭିନ୍ନ କାର୍ଯ୍ୟକ୍ରମ ଯୋଗୁଁ ଓଡ଼ିଶା ଏକ ବଳକା ଧାନ ଉତ୍ପାଦନକାରୀ ରାଜ୍ୟ ଭାବେ ଜାତୀୟ ସାଧାରଣ ବଣ୍ଟନ ବ୍ୟବସ୍ଥାରେ ଏକ ଗୁରୁତ୍ବପୂର୍ଣ ଭୂମିକା ନିର୍ବାହ କରୁଛି। ହେଲେ ରାଜ୍ୟର କୃଷକଙ୍କ ବିକାଶ ପାଇଁ ଡିଣ୍ଡିମ ପିଟୁଥିବା ରାଜ୍ୟ ବିଜେପି ସରକାରଙ୍କ ସ୍ଥାଣୁତା ଯୋଗୁ କୃଷି କାର୍ଯ୍ୟ ପାଇଁ ରାଜ୍ୟରେ ଏବେ ସୃଷ୍ଟି ହୋଇଛି ଅଭାବନୀୟ ପରିସ୍ଥିତି ବୋଲି ଅଭିଯୋଗ କରିଛି ଦଳ । ଏହାସହ ରାଜ୍ୟପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛି ।…
ସାର ସଂକଟ ନେଇ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ କିଛି ଦିନ ତଳେ କେନ୍ଦ୍ର ସାର ଓ ରସାୟନ ମନ୍ତ୍ରୀଙ୍କୁ ଚିଠି ଲେଖିଥିଲେ । ହେଲେ ଏଯାଏ ସରକାର ଚାଷୀଙ୍କ ଦୁଃଖ ଦୂର କରିବା ପାଇଁ କୌଣସି ଆଖିଦୃଶିଆ ପଦକ୍ଷେପ ନେଇ ନାହାଁନ୍ତି । ରାଜ୍ୟରେ ଆବଶ୍ୟକ ସାର ମହଜୁଦ ନଥିବା ଖୋଦ ସମବାୟ ବିଭାଗ କହିଛି । ଗଞ୍ଜାମ ଜିଲାରେ ୧୯ ହଜାର ୫୬୧ ମେଟ୍ରିକ ଟନ ସାର ପାଇଁ ଇଣ୍ଡେଣ୍ଟ ଦିଆଯାଇଥିଲା । କିନ୍ତୁ ମିଳିଛି ମାତ୍ର ୧୦ ହଜାର ୬୪୦ ମେଟ୍ରିକ ଟନ । ଭଦ୍ରକ ଜିଲ୍ଲା ୬ ହଜାର୧୮୮ ମେଟ୍ରିକ ଟନ ସାର ମାଗିଥିବା ବେଳେ ମିଳିଛି ୮୬୩ ମେଟ୍ରିକ ଟନ । ସେହିପରି ବାଲେଶ୍ବର ଜିଲ୍ଲାରୁ ଇଣ୍ଟେଣ୍ଟ ଆସିଥିଲା ୨୬୦୦ ମେଟ୍ରିକ ଟନ । ଏ ପର୍ଯ୍ୟନ୍ତ ବାଲେଶ୍ବରକୁ ମିଳିଛି ମାତ୍ର ୯୦୦ ମେଟ୍ରିକ ଟନ୍ । ଅନୁଗୁଳ ଜିଲ୍ଲାରେ ୮ ହଜାର ୧୦୦ ମେଟ୍ରିକ ଟନ ସାର ଆବଶ୍ୟକତା ଥିଲାବେଳେ ମିଳିଛି ୪ ହଜାର ୯୫୪ ମେଟ୍ରିକ ଟନ ସାର । ବିଜେଡିର ଆନ୍ଦୋଳନରେ ସାମିଲ ହୋଇଥିଲେ ଚାଷୀ । ପ୍ରଶ୍ନ କରିଛନ୍ତି, ଯଦି ସରକାର ପର୍ଯ୍ୟାପ୍ତ ସାର ମହଜୁଦ ଥିବା ନେଇ ଦାବି କରୁଛନ୍ତି, ତେବେ ସାର କୁଆଡ଼େ ଗଲା ବୋଲି ଚାଷୀମାନେ ପ୍ରଶ୍ନ କରିଛନ୍ତି । କାହିଁକି ସାର କଳାବଜାରୀ ହେଉଛି, ତାକୁ ନେଇ ସରକାରଙ୍କୁ ଚାଷୀକୂଳ ଘେରିଛନ୍ତି ।