ଭୁବନେଶ୍ବର : ଭୁବନେଶ୍ବରରେ ରାଜ୍ୟସ୍ତରୀୟ ଗଣତନ୍ତ୍ର ଦିବସରେ ଜାତୀୟ ପତାକା ଉତ୍ତୋଳନ କରିବେ ରାଜ୍ୟପାଳ । ଅନ୍ୟ ସ୍ଥାନରେ ପତାକା ଉତ୍ତୋଳନ କରିବେ ମନ୍ତ୍ରୀ ଓ ଅନ୍ୟ ଅଧିକାରୀ । କନ୍ଧମାଳରେ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ, ସୁନ୍ଦରଗଡ଼ରେ ପ୍ରଦୀପ ଅମାତ, ପୁରୀରେ ପ୍ରଫୁଲ୍ଲ ମଲ୍ଲିକ, ଜଗତସିଂହପୁରରେ ଅତନୁ ସବ୍ୟସାଚୀ, ସୁବର୍ଣ୍ଣପୁରରେ ଉଷା ଦେବୀ, କେନ୍ଦୁଝରରେ ସାରଦା ନାୟକ, ମୟୂରଭଞ୍ଜରେ ଅଶୋକ ପଣ୍ଡା, ବଲାଙ୍ଗୀରରେ ରଣେନ୍ଦ୍ର ପ୍ରତାପ ସ୍ୱାଇଁ, କଟକରେ ସୁଦାମ ମାର୍ଣ୍ଡି, ଗଞ୍ଜାମରେ ଜଗନ୍ନାଥ ସାରକା, ସମ୍ବଲପୁରରେ ନିରଞ୍ଜନ ପୂଜାରୀ କଳାହାଣ୍ଡିରେ ଟୁକୁନି ସାହୁ, ଅନୁଗୁଳରେ ଅଶ୍ୱିନୀ ପାତ୍ର, ବାଲେଶ୍ୱରରେ ବାସନ୍ତୀ ହେମ୍ବ୍ରମ, ଝାରସୁଗୁଡ଼ାରେ ପ୍ରୀତିରଞ୍ଜନ ଘଡ଼ାଇ, ନୂଆପଡ଼ାରେ ରୀତା ସାହୁ ଓ କୋରାପୁଟରେ ମନ୍ତ୍ରୀ ତୁଷାରକାନ୍ତି ବେହେରା ଜାତୀୟ ପତାକା ଉତ୍ତୋଳନ କରିବେ । ସେହିପରି ବ୍ରହ୍ମପୁରରେ ଦକ୍ଷିଣାଞ୍ଚଳ ଆରଡିସି, ରାଉରକେଲାରେ ଉତ୍ତରାଞ୍ଚଳ ଆରଡିସି ଓ ୧୩ ଜିଲ୍ଲା- ବରଗଡ଼, ଭଦ୍ରକ, ବୌଦ୍ଧ, ଦେବଗଡ଼, ଯାଜପୁର, ଢେଙ୍କାନାଳ, ଗଜପତି, କେନ୍ଦ୍ରାପଡ଼ା, ଖୋର୍ଦ୍ଧା, ନୟାଗଡ଼, ମାଲକାନଗିରି, ନବରଙ୍ଗପୁର ଓ ରାୟଗଡ଼ାରେ ଜିଲ୍ଲାପାଳ ଜାତୀୟ ପତାକା ଉତ୍ତୋଳନ କରିବେ ।
୨୦୨୩ ବର୍ଷ ପାଇଁ ରାଜ୍ୟପାଳ ପୋଲିସ ପଦକ ଘୋଷଣା
ଭୁବନେଶ୍ବର : ୨୦୨୩ ବର୍ଷ ପାଇଁ ରାଜ୍ୟପାଳ ପୋଲିସ ପଦକ ଘୋଷଣା । ୨ ଜଣ ଆଇଜିଙ୍କ ସମେତ ୨୦ ଜଣ ପୋଲିସ କର୍ମଚାରୀ ପାଇବେ ସମ୍ମାନଜନକ ରାଜ୍ୟପାଳ ପଦକ । କାଟାଗୋରି ୧ରେ ପୂର୍ବାଞ୍ଚଳ ଆଇଜି ହିମାଂଶୁ ଲାଲ ଓ କ୍ରାଇମବ୍ରାଞ୍ଚ ଆଇଜି ସଫିନ ଅହମ୍ମଦ ପୋଲିସ ପଦକ ପାଇବେ । ସେହିଭଳି କାଟାଗୋରି ୨ରେ ଗଞ୍ଜାମ ଏସପି ଜଗମୋହନ ମୀନା ଓ ସମ୍ବଲପୁର ଏସପି ମୁକେଶ ଭାମୁ ପାଇବେ ଏହି ପୁରସ୍କାର। କାଟାଗୋରି ୩ରେ ବରିଷ୍ଠ ଓପିଏସ ତଥା ବିପିଏସପିଏର ଅତିରିକ୍ତ ଏସପି ଉଦୟଭାନୁ ମିଶ୍ର, ଏସିପି ମାନସ ଗଡ଼ନାୟକ ଏହି ପୁରସ୍କାର ପାଇବେ । କାଟାଗୋରି ୪ରେ କ୍ରାଇମବ୍ରାଞ୍ଚ ଇନ୍ସପେକ୍ଟର ଅନୀଲ ଆନନ୍ଦ, ଗଞ୍ଜାମ ପାଟପୁର ଥାନା ଇନ୍ସପେକ୍ଟର ସବ୍ୟସାଚୀ ମଲ୍ଲ , ସମ୍ବଲପୁର ଭିଜିଲାନ୍ସ ଡିଭିଜନ ଇନ୍ସପେକ୍ଟର ହେମାମାଳିନୀ ନାୟକ ପାଇବେ ପଦକ ।
କାଟାଗୋରି ୫ରେ ରାଉରକେଲା ଏସଆଇ ଦିଲ୍ଲୀପ ନାୟକ, ଭୁବନେଶ୍ୱର କମିଶନରେଟ ପୋଲିସ ଏସଆଇ ଯୁଗଳ ଚରଣ ସ୍ୱାଇଁ, ସମ୍ବଲପୁର ଭିଜିଲାନ୍ସ ଡିଭିଜନ ଏସଆଇ ସଞ୍ଜୟ ପଟ୍ଟନାୟକ ପୋଲିସ ପଦକ ପାଇବେ । କାଟାଗୋରି ୬ରେ ଏଏସଆଇ ବିକାଶ ପାତ୍ର, ପ୍ରଜାପତି ମେହେର ଓ ପ୍ରଶାନ୍ତ ବିଶ୍ୱାଳ ପାଇବେ ସମ୍ମାନଜନକ ପଦକ । କାଟାଗୋରି ୭ରେ କନଷ୍ଟେବଳ ରମେଶ ସାହୁ, ସନାତନ ସାହୁ, ନରେଶ ଚୌଧୁରୀ, ଓଏସଏପି ସିପାହୀ ବିଶ୍ୱକର୍ମା ମୁଣ୍ଡା ଓ ସିପାହୀ କେଦାରନାଥ ମିଶ୍ର ରାଜ୍ୟପାଳ ପୋଲିସ ପଦକ ପାଇବାକୁ ମନୋନୀତ ହୋଇଛନ୍ତି ।
ନିର୍ମାଣଧିନ ଘରେ କ୍ଷତାକ୍ତ ମୃତଦେହ ଠାବ, କାରଣ ଅସ୍ପଷ୍ଟ
ବାଲିଗୁଡା : ବାଲିଗୁଡା ଥାନା ପଣଷପଡ଼ି ସାହିରେ ଚାଞ୍ଚଲ୍ୟ । ନିର୍ମାଣଧିନ ଘରେ ବ୍ୟକ୍ତିଙ୍କ କ୍ଷତାକ୍ତ ମୃତଦେହ ଠାବ। ବେକ ଓ ମୁହଁରେ ଅଛି କ୍ଷତ ଚିହ୍ନ। ହତ୍ୟାକାଣ୍ଡ ସନ୍ଦେହ, କାରଣ ଅସ୍ପଷ୍ଟ । ମୃତକ ପଣଷପଡ଼ି ସାହିର ସୁଶାନ୍ତ ପୂଜାରୀ । ନିଜ ଶଳା ରାମସିଂ ପାତ୍ରଙ୍କ ନିର୍ମାଣଧିନ ଘରେ ତାଙ୍କର ମୃତଦେହ ପଡିଛି । ସୁଶାନ୍ତ ରାଜମିସ୍ତ୍ରୀ ଭାବେ କାମ କରନ୍ତି ଓ ସେ ନିଜ ଶଳାଙ୍କ ଘର ନିର୍ମାଣ କାମ ମଧ୍ୟ କରୁଥିଲେ । ସକାଳେ ଘର ନିର୍ମାଣ କାର୍ଯ୍ୟରେ ନିୟୋଜିତ କିଛି ଶ୍ରମିକ କାମ କରିବା ପାଇଁ ସେହି ଘର ନିକଟକୁ ଆସିବା ପରେ ସୁଶାନ୍ତ ପୂଜାରୀଙ୍କ କ୍ଷତାକ୍ତ ମୃତଦେହ ଦେଖିଥିଲେ। ଘଟଣାସ୍ଥଳରେ ବାଲିଗୁଡ଼ା ଥାନା ଅଧିକାରୀ ସୁଶାନ୍ତ ସାହୁଙ୍କ ସମେତ ଅନ୍ୟ କର୍ମଚାରୀ ପହଁଚି ଘଟଣାର ତଦନ୍ତ ଆରମ୍ଭ କରିଛନ୍ତି ।
ଗଇଲୋ ଘାଟି ତଳକୁ ଖସିଲା ମିନି ଟ୍ରକ୍
ଦେବଗଡ଼ : ଗଇଲୋ ଘାଟି ତଳକୁ ଖସିଲା ମିନି ଟ୍ରକ୍ । ଅଳ୍ପକେ ବର୍ତ୍ତିଲେ ଡ୍ରାଇଭର ଓ ହେଲପର୍ l ଦେବଗଡ଼ ଥାନା ଅନ୍ତର୍ଗତ କୈଳାସ – ଲଇମୁରା ରାସ୍ତାରେ ଏହି ଦୁର୍ଘଟଣା ଘଟିଛି । ରାସ୍ତାକଡ଼ର ସୁରକ୍ଷା ବାଡ଼ ଭାଙ୍ଗି ଘାଟି ତଳକୁ ଖସିପଡିଛି ମିନି ଟ୍ରକ୍ । ୨୦୧୭ ଏପ୍ରିଲ ୧୬ ତାରିଖରେ ଯେଉଁ ସ୍ଥାନରେ ବସ ଦୁର୍ଘଟଣାରେ ୨୭ ଜଣ ଯାତ୍ରା କଳାକାରଙ୍କ ଜୀବନ ଯାଇଥିଲା, ସେହି ସ୍ଥାନରେ ହିଁ ସମାନ ଢଙ୍ଗରେ ଦୁର୍ଘଟଣା ଘଟିଛି l ଝରାଗୋଗୁଆ ଗାଁର ଏକ ଫାର୍ମରୁ ମିନି ଟ୍ରକରେ ଅଣ୍ଡା ବୋଝେଇ କରି କେନ୍ଦୁଝର ଅଭିମୁଖେ ଯାଉଥିବା ବେଳେ ଚାଳକ ଭାରସାମ୍ୟ ହରାଇବାରୁ ଗାଡ଼ିଟି ଘାଟି ତଳକୁ ଖସି ଭାଙ୍ଗି ରୁଜି ଚୂରମାର ହୋଇଯାଇଛି ।
ସୌଭାଗ୍ୟବଶତଃ ଡ୍ରାଇଭର କେନ୍ଦୁଝର ନରଣପୁର ଗାଁର ସତ୍ୟଜିତ ସାହୁ ଓ ହେଲପର ସରୋଜ ମାଝୀ ଅଳ୍ପକେ ବିପଦରୁ ବର୍ତ୍ତି ଯାଇଛନ୍ତି l ସ୍ଥାନୀୟ ଲୋକଙ୍କ ସହାୟତରେ ଉଭୟ ଗୁରୁତରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି l
କୃଷ୍ଣଙ୍କୁ ମାରିବାକୁ ମହାରାଜା କଂସର ସବୁ ଯୋଜନା ଫେଲ
ବରଗଡ଼ : ମୃତ୍ୟୁ ଭୟରେ ଆତଙ୍କିତ ମହାରାଜା କଂସ । ଗୋପକୁ ପ୍ରେରିତ ବୀର ରାକ୍ଷସଙ୍କ ମୃତ୍ୟୁ ପରେ ବଢୁଛି ଭୟ । କୃଷ୍ଣଙ୍କୁ ମାରିବାକୁ ସବୁ ଯୋଜନା ଫେଲ ମାରିବା ପରେ ଆସନ୍ନ ଯୁଦ୍ଧ ପାଇଁ ନିଜ ବିଶ୍ବାସୀ ପାତ୍ରମନ୍ତ୍ରୀଙ୍କ ସହ ମନ୍ତ୍ରଣା କରିଛନ୍ତି ମହାରାଜା କଂସ । ପ୍ରବଳ ପ୍ରତାପୀ ଶଙ୍ଖାସୁରକୁ ଗୋପ ପ୍ରେରଣ କରିଛନ୍ତି । ଏହାସହ ନଗର ଭ୍ରମଣ କରି ମୀନାବଜାର ଓ ଓରମାସ ପକ୍ଷରୁ ଆୟୋଜିତ ମେଳା ବୁଲି ଦେଖିଛନ୍ତି । ସେପଟେ ଗୋପରେ ଚାଲିଛି ବାଳକୃଷ୍ଣଙ୍କ ବାଲ୍ୟଲୀଳା । ଗୋପାଳ ବାଳଙ୍କ ସହ ମିଶି ଦଧି ଚୋରି କରିବା ସହ କରୁଛନ୍ତି ଲୀଳା । ଗୋପୀଙ୍କ ବସ୍ତ୍ର ହରଣ କରିଛନ୍ତି ନଟଖଟ କାହ୍ନେୟା ।
କୃଷ୍ଣ ପ୍ରେମରେ ନିଜକୁ ହଜାଇ ଦେଇଛନ୍ତି ଗୋପପୁରବାସୀ । ଆଜି ବରଗଡ଼ ଧନୁଯାତ୍ରାର ସପ୍ତମ ଦିନରେ ନାରଦଙ୍କ ପରାମର୍ଶ କ୍ରମେ ଧନୁଯାତ୍ରାର ଆୟୋଜନ ନେଇ ଘୋଷଣା କରିବେ କଂସ ମହାରାଜା । ଏହାସହ ଛଳନାରେ କୃଷ୍ଣ ବଳରାମଙ୍କୁ ମାରିବାକୁ ମଥୁରା ଆଣିବାକୁ ଅକ୍ରୁରଙ୍କୁ ଗୋପ ପ୍ରେରଣ କରିବେ । ସେପଟେ ଗୋପରେ ରାଧା-କୃଷ୍ଣଙ୍କ ନାବକେଳୀ, ଶଙ୍ଖଚୂଡ଼ ସହ ନନ୍ଦ ଦରବାରରେ ବିଭିନ୍ନ କାର୍ଯ୍ୟକ୍ରମ କରାଯିବ ।
ଆଜି ଆତ୍ମସମର୍ପଣ କରିପାରନ୍ତି ବିଲକିସ ବାନୋ ଗଣଦୁଷ୍କର୍ମ ଅଭିଯୁକ୍ତ
ନନ୍ଦିଘୋଷ ବ୍ୟୁରୋ : ଆଜି ଜେଲ୍ କର୍ତ୍ତୃପକ୍ଷଙ୍କ ନିକଟରେ ଆତ୍ମସମର୍ପଣ କରିପାରନ୍ତି ବିଲକିସ ବାନୋ ଗଣଦୁଷ୍କର୍ମ ଅଭିଯୁକ୍ତ । ସମସ୍ତ ୧୧ ଅଭିଯୁକ୍ତଙ୍କ ପିଟିସନକୁ ଖାରଜ କରି ୨୧ ତାରିଖ ସୁଦ୍ଧା ଜେଲ୍ କର୍ତ୍ତୃପକ୍ଷଙ୍କ ନିକଟରେ ସରେଣ୍ଡର କରିବା ଲାଗି ଗତ ଶୁକ୍ରବାର ଅର୍ଥାତ ଜାନୁଆରୀ ୧୯ରେ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ । ପୂର୍ବରୁ ମାମଲାର ଶୁଣାଣି କରି ଯେଉଁ ୨୧ ତାରିଖକୁ ସୁପ୍ରିମକୋର୍ଟ ଡେଡଲାଇନ ଶୁଣାଇଥିଲେ ସେହି ତାରିଖ ଅର୍ଥାତ ୨୧ ପୂର୍ବରୁ ଆତ୍ମସମର୍ପଣ ଲାଗି କୋର୍ଟ ନିର୍ଦ୍ଦେଶ ଦେଇଥିଲେ । ସରେଣ୍ଡର ସମୟ ସୀମା ବୃଦ୍ଧି କରିବା ଲାଗି ଅଭିଯୁକ୍ତମାନେ ଯେଉଁ ଆବେଦନ କରିଥିଲେ ତାହାକୁ ଖାରଜ କରିଥିଲେ ସର୍ବୋଚ୍ଚ ଅଦାଲତ । ଗତ ୧୯ ତାରିଖରେ ଜଷ୍ଟିସ ବି.ଭି. ନାଗରତ୍ନା ଓ ଜଷ୍ଟିସ ଉଜ୍ବଳ ଭୂୟାଁ କହିଥିଲେ- ସରେଣ୍ଡର ତାରିଖ ବୃଦ୍ଧି ନେଇ ଯେଉଁ ଆବେଦନ କରାଯାଇଥିଲା ତାହା ବୈଧ ନୁହେଁ । ଯେଉଁ ଅଭିଯୁକ୍ତମାନେ ସରେଣ୍ଡର ତାରିଖ ବଢାଇବା ଲାଗି ଆବେଦନ କରିଥିଲେ ସେମାନେ ବିଭିନ୍ନ ଘରୋଇ କାରଣ, ପୁତ୍ରର ବିବାହ, ଶୀତକାଳୀନ ଅମଳ ଆଦି ପ୍ରସଙ୍ଗ ଉତଥାପନ କରିଥିଲେ । ୨୧ ତାରିଖରେ ସରେଣ୍ଡର କରିବା ପରେ ଅଭିଯୁକ୍ତମାନେ ରିଭ୍ଯୁପିଟିସନ ଦାଖଲ କରିବାର ସୁଯୋଗ ରହିଛି । ସେମାନେ ମହାରାଷ୍ଟ୍ର ସରକାର ନିକଟରେ ପୁନର୍ବାର ସମୀକ୍ଷା ପିଟିସନ ଦାଖଲ କରିବାର ବି ବିକଳ୍ପ ରହିଛି । 
୨୦୦୨ ଗୋଧ୍ରା ଦଙ୍ଗା ମାମଲାରେ ଦୋଷୀ ସାବ୍ୟସ୍ତ ହୋଇ ଆଜୀବନ ଜେଲଦଣ୍ଡ ଭୋଗୁଥିବା ୧୧ଅଭିଯୁକ୍ତଙ୍କୁ ଗୁଜରାଟ ସରକାର ରେମିସନ ପଲିସି ଆଧାରରେ ଗତ ୨୦୨୨ ଅଗଷ୍ଟ ୧୫ରେ ଖଲାସ କରିଦେଇଥିଲେ । ଏହା ବିରୋଧରେ ବିଲକିସ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ । ମାମଲାର ଶୁଣାଣି କରି ଗୁଜରାଟ ସରକାରଙ୍କ ନିଷ୍ପତ୍ତିକୁ ଗତ ଜାନୁଆରୀ ୮ତାରିଖରେ ରଦ୍ଦ କରିଥିଲେ ସୁପ୍ରିମକୋର୍ଟ । ୨୦୦୨ ଦଙ୍ଗା ସମୟରେ ୨୧ ବର୍ଷ ବୟସ୍କା ତଥା ୫ ମାସର ଗର୍ଭବତୀ ବିଲକିସଙ୍କୁ ଗଣଦୁଷ୍କର୍ମ କରାଯିବା ସହ ତାଙ୍କର ୩ ବର୍ଷ ବୟସ୍କା ଝିଅ ସମେତ ୭ଜଣଙ୍କୁ ହତ୍ୟା କରିଥିଲେ ଅଭିଯୁକ୍ତ । ଏହି ୧୧ ଅଭିଯୁକ୍ତ ହେଲେ ବାକାବାଇ ବୋହାନିଆ, ବିପିନ ଚନ୍ଦ୍ର ଯୋଷୀ, କେଶରୀଭାଇ ବୋହାନିଆ, ଗୋବିନ୍ଦ ନାଏ, ଯଶଓ୍ବନ୍ତ ନାଏ, ମିତେଶ ଭଟ୍ଟ, ପ୍ରଦୀପ ମୋର୍ଦିଆ, ରାଧେଶ୍ଯାମ ଶାହ, ରାଜୁଭାଇ ସୋନି, ରମେଶ ଚନ୍ଦନା ଓ ଶୈଳେଶ ଭଟ୍ଟ ।
ଓଡ଼ିଆ ଚଳଚ୍ଚିତ୍ର ନିର୍ଦ୍ଦେଶକ ସୁଧାକର ବସନ୍ତ ସଡ଼କ ଦୁର୍ଘଟଣାରେ ଗୁରୁତର
କଟକ : ଚଳଚ୍ଚିତ୍ର ନିର୍ଦ୍ଦେଶକ ସୁଧାକର ବସନ୍ତଙ୍କ ଗାଡ଼ି ଦୁର୍ଘଟଣାଗସ୍ତ । ଗୁରୁତର ଅବସ୍ଥାରେ ତାଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି । ମଙ୍ଗୁଳି ନିକଟରେ ଦୁର୍ଘଟଣାର ଶିକାର ହୋଇଛନ୍ତି ସୁଧାକର । ଏଥିରେ ସୁଧାକର ବସନ୍ତ ଓ ତାଙ୍କ ଡ୍ରାଇଭର ଗୁରୁତର ଭାବେ ଆହତ ହୋଇଛନ୍ତି । ସୁଧାକରଙ୍କ ମୁଣ୍ଡରେ ଗଭୀର ଆଘାତ ଲାଗିଛି । କଟକ ବଡ଼ ଡ଼ାକ୍ତରଖାନାର ଆଶୁଚିକିତ୍ସା ବିଭାଗରେ ତାଙ୍କର ଚିକିତ୍ସା ଚାଲିଛି । ବିଳମ୍ବିତ ରାତିରେ ସୁଧାକର ବସନ୍ତ ଚଣ୍ଡିଖୋଲ ପଟୁ ଫେରୁଥିବା ବେଳେ ମଙ୍ଗୁଳି ଛକ ନିକଟରେ ଟ୍ରକ ପଛ ପଟୁ ଧକ୍କା ଦେଇଥିଲା ତାଙ୍କ କାର । ସୂଚନା ଅନୁସାରେ ଚଣ୍ଡିଖୋଲ ଆଡୁ କଟକ ଆସୁଥିବାବେଳେ କଟକ ମଙ୍ଗୁଳି ସ୍ଥିତ ବଜରଙ୍ଗୀ ଓ୍ୱେ ବ୍ରିଜ୍ ନିକଟରେ ଦୁର୍ଘଟଣାଗ୍ରସ୍ତ ହୋଇଛି ସୁଧାରକର ବସନ୍ତଙ୍କ ଗାଡି। କାରରେ ଥିବା ତାଙ୍କ ଡ୍ରାଇଭର ମଧ୍ୟ ଗୁରୁତର ହୋଇଛନ୍ତି ।
ଦୁଇ ଜଣଙ୍କୁ ଚିକିତ୍ସା ପାଇଁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି । ଭୋର ୩ଟାରୁ ୪ଟା ମଧ୍ୟରେ ସୁଧାକର ବସନ୍ତଙ୍କ ଗାଡି ଦୁର୍ଘଟଣାଗସ୍ତ ହୋଇଥିବା ଜଣାପଡ଼ିଛି । ମଙ୍ଗୁଳି ଛକ ରାସ୍ତା କଡରେ ଛିଡ଼ା ହୋଇଥିବା ଏକ ସିମେଣ୍ଟ ବୋଝେଇ ଟ୍ରକକୁ ପଛରୁ ଧକ୍କା ଦେଇଥିଲା ସୁଧାକରଙ୍କ କାର । ଦୁର୍ଘଟଣାରେ ସୁଧାକରଙ୍କ କାର୍ ଭାଙ୍ଗି ଚୁରମାର ହୋଇଯାଇଛି । ଚୌଦ୍ଵାର ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ସୁଧାକର ଓ ତାଙ୍କ ଡ଼୍ରାଇଭରଙ୍କୁ କାରକୁ କାଟି ଉଦ୍ଧାର କରିଥିଲେ । ତୁରନ୍ତ ଗୁରୁତର ଅବସ୍ଥାରେ ଦୁଇ ଜଣଙ୍କୁ ଏସସିବିରେ ଭର୍ତ୍ତି କରାଯାଇଛି ।
ଜରୁରୀକାଳୀନ ବୈଠକ ଡାକିଲେ ପାକିସ୍ତାନର କାମଚଳା ପ୍ରଧାନମନ୍ତ୍ରୀ ଅନୱଲ ଉଲ୍ ହକ
ନନ୍ଦିଘୋଷ ବ୍ୟୁରୋ : ଇରାନ ଉପରେ ପାକିସ୍ତାନର ଆକ୍ରମଣ ଘଟଣାକୁ ନେଇ ଜରୁରୀକାଳୀନ ବୈଠକ ଡାକିଲେ ପାକିସ୍ତାନର କାମଚଳା ପ୍ରଧାନମନ୍ତ୍ରୀ ଅନୱଲ ଉଲ୍ ହକ । ଦେଶର ସୁରକ୍ଷା ସ୍ଥିତି ନେଇ ଜାତୀୟ ସୁରକ୍ଷା କମିଟି ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ଅନୱର ଉଲ୍ ହକ । ଆକ୍ରମଣ ଘଟଣା ପରେ ସୁରକ୍ଷା ସ୍ଥିତି ନେଇ ସେ ସମୀକ୍ଷା କରିଛନ୍ତି । ଇରାନ ଉପରେ ପାକିସ୍ତାନର ଡ୍ରୋନ ହମଲା ପରେ ସ୍ଥିତି ଉତ୍ତେଜନାପୂର୍ଣ୍ଣ ରହିଛି । ଉଭୟ ଦେଶ ପଡୋଶୀ ହୋଇଥିବାବେଳେ ଆକ୍ରମଣ ପରେ ଶାନ୍ତି ବଜାୟ ରଖିବାକୁ ଆଲୋଚନା କରିଛନ୍ତି । ପ୍ରଥମେ ପାକିସ୍ତାନ ଉପରେ ଆକ୍ରମଣ କରିଥିଲା ଇରାନ । ପାକିସ୍ତାନର ବଲୁଚିସ୍ତାନରେ ଆତଙ୍କୀ ସଂଗଠନ ଅନୱର ଉଲ୍ ଅଦଲର ଠିକଣା ଉପରେ ଆକ୍ରମଣ କରିଥିଲା କହିଥିଲା ଇରାନ । ଏଥିରେ ଦୁଇ ଶିଶୁଙ୍କ ମୃତ୍ୟୁ ହୋଇଥିଲା । ଆତଙ୍କୀ ସଂଗଠନକୁ ଟାର୍ଗେଟ୍ କରି ଏହି ଆକ୍ରମଣ କରିଥିବା କହିଥିଲା ଇରାନ । ଏହାର ଦୁଇ ଦିନ ପରେ ଇରାନ ଉପରେ ପାକିସ୍ତାନ କରିଥିଲା ହମଲା ।
ଏଥିରେ ୯ ଜଣଙ୍କର ମୃତ୍ୟୁ ଘଟିଛି। ଇରାନ ଉପରେ ପାକିସ୍ତାନ ପ୍ରିସିଜନ୍ ଷ୍ଟ୍ରାଇକ କରିଛି । କିଲର ଡ୍ରୋନ ଓ ରଟେଡ୍ ମାଡ କରିଥିଲା ପାକିସ୍ତାନ । ଦେଶର ସାର୍ବଭୌମତ୍ବ ସହ କେବେ ବି ସାଲିସ କରାଯିବନାହିଁ ବୋଲି କହିଛନ୍ତି ପାକିସ୍ତାନର କାମଚଳା ପ୍ରଧାନମନ୍ତ୍ରୀ ଅନୱର ଉଲ୍ ହକ । ଦୁଇ ଦେଶ ମଧ୍ୟରେ ଶାନ୍ତି ବଜାୟ ରଖିବାକୁ ତେହରାନ ଓ ଇସଲାମାବାଦ ମଧ୍ୟରେ ପଦକ୍ଷେପ ଆବଶ୍ୟକ ବୋଲି ମତପ୍ରକାଶ ପାଇଛି । ଆଲୋଚନା ମାଧ୍ୟମରେ ବିବାଦର ସମାଧାନ ହୋଇପାରିବ ବୋଲି କହିଛନ୍ତି ଉଭୟ ଦେଶର ପ୍ରତିନିଧି।
ଓ୍ବାନ ନେସନ ଓ୍ବାନ ଇଲେକସନ ପାଇଁ ଆସନ୍ତା ସପ୍ତାହରେ ରିପୋର୍ଟ ଦାଖଲ କରିବ ଲ କମିଶନ
ନନ୍ଦିଘୋଷ ବ୍ୟୁରୋ : ଓ୍ବାନ ନେସନ ଓ୍ବାନ ଇଲେକସନ ପ୍ରସଙ୍ଗ । ଆସନ୍ତା ସପ୍ତାହରେ ରିପୋର୍ଟ ଦାଖଲ କରିବ ଲ କମିଶନ । କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରାଳୟ ଏବଂ ଏକ ଉଚ୍ଚସ୍ତରୀୟ କମିଟି ନିକଟରେ ଦାଖଲ ହେବ ରିପୋର୍ଟ । ଓ୍ବାନ ନେସନ ଓ୍ବାନ ଇଲେକସନ ଲାଗି ସାମ୍ବିଧାନିକ ସଂଶୋଧନ ସବୁଠାରୁ କଷ୍ଟସାଧ୍ଯ ପ୍ରକ୍ରିୟା ବୋଲି କମିଶନ ବିଚାର କରିଥିବା କୁହାଯାଇଛି । ତେବେ ଯେଉଁ ସବୁ ପ୍ରତିବନ୍ଧକ ଆସିବ ସେସବୁର ସମାଧାନ ଲାଗି ଦୃଷ୍ଟି ଦିଆଯାଇଥିବା ସୂଚନା ମିଳିଛି । ଓ୍ବାନ ନେସନ ଓ୍ବାନ ଇଲେକସନ କମିଟିର ନେତୃତ୍ବ ନେଇଛନ୍ତି ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ । ଗତବର୍ଷ ସେପ୍ଟେମ୍ବରରେ ଗଠିତ ହୋଇଥିଲା ଏହି କମିଟି । ସାରା ଦେଶରେ ଉଭୟ ଲୋକସଭା ଓ ବିଧାନସଭା ନିର୍ବାଚନ ଏକ ସଂଗରେ କରିବା ଲାଗି ଏହି କମିଶନ ବିଭିନ୍ନ ଦିଗକୁ ନେଇ ସମୀକ୍ଷା କରୁଛି । ଯଦି ଏକ ସମୟରେ ନିର୍ବାଚନ କରାଯାଏ ତେବେ ପ୍ରାୟ ୧୮ଟି ରାଜ୍ୟ ପ୍ରଭାବିତ ହେବା ସମ୍ଭାବନା ରହିଛି । ଏକ ସମୟରେ ଉଭୟ ବିଧାନସଭା ଓ ଲୋକସଭା ନିର୍ବାଚନ କରିବା ଲାଗି ୧୯୮୩ରେ ନିର୍ବାଚନ କମିଶନ ପ୍ରସ୍ତାବ ଦେଇଥିଲେ । ମାତ୍ର ବିଭିନ୍ନ କାରଣରୁ ତାହା ଦାନା ବାନ୍ଧିପାରିନାହିଁ ।
ମେ ୧୯୯୯ରେ ଜଷ୍ଟିସ ବି.ପି. ଜୀବନ ରେଡ୍ଡୀଙ୍କ ନେତୃତ୍ବାଧୀନ ଲ କମିଶନ ନିଜର ୧୭୦ତମ ରିପୋର୍ଟରେ ଦର୍ଶାଇଥିଲେ- ଦେଶରେ ଏକ ସମୟରେ ଉଭୟ ବିଧାନସଭା ଓ ଲୋକସଭା ନିର୍ବାଚନ କରାଯିବାର ଆବଶ୍ଯକତା ରହିଛି । ଦେଶରେ ଏକସଂଗରେ ନିର୍ବାଚନ ଲାଗି ନିର୍ବାଚନ କମିଶନ ସମ୍ପୂର୍ଣ୍ଣ ପ୍ରସ୍ତୁତ ଥିବା ନେଇ ୨୦୨୨ରେ କହିଥିଲେ ମୁଖ୍ଯ ନିର୍ବାଚନ କମିଶନର ସୁଶୀଳ ଚନ୍ଦ୍ରା । ୨୦୨୨ ଡିସେମ୍ବରରେ ଏକସଙ୍ଗରେ ନିର୍ବାଚନ ଲାଗି ମଧ୍ୟ ବିଭିନ୍ନ ଅଂଶୀଦାର ଯଥା ରାଜନୈତିକ ଦଳ, ନିର୍ବାଚନ କମିଶନ, ଅମଲାତନ୍ତ୍ର, ଶିକ୍ଷାବିତ, ବିଶେଷଜ୍ଞଙ୍କ ମତାମତ ଜାଣିବାକୁ ଚାହିଁଥିଲେ ଲ କମିଶନ । ବର୍ତ୍ତମାନ ଏହି ପ୍ରସ୍ତାବକୁ ବିରୋଧ କରୁଛନ୍ତି ଆମା ଆଦମୀ ପାର୍ଟି, ଶିବସେନା ଉଦ୍ଧବ ଗୋଷ୍ଠୀ, ତୃଣମୂଳ କଂଗ୍ରେସ । ସେମାନଙ୍କ ମତରେ ଏକସଂଗରେ ନିର୍ବାଚନ କରାଯିବା ଅର୍ଥ ସଂସଦୀୟ ଗଣତନ୍ତ୍ରକୁ ଧ୍ବଂସ କରିବା । ପୂର୍ବରୁ ଏହି ପ୍ରସଙ୍ଗରେ ବିଭିନ୍ନ କ୍ଷେତ୍ରରୁ ମତାମତ ଚାହିଁଛି ଓ୍ବାନ ନେସନ ଓ୍ବାନ ଇଲେକସନ କମିଟି ।
ଶିକ୍ଷକ ନିଯୁକ୍ତିକୁ ନେଇ ନାଟକ କରୁଛନ୍ତି ଧର୍ମେନ୍ଦ୍ର
ଭୁବନେଶ୍ବର: ଶିକ୍ଷକ ନିଯୁକ୍ତି ସଂକ୍ରାନ୍ତରେ ସବୁ ଜାଣି ଅଜଣା ହେବାର ନାଟକ କରୁଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କେନ୍ଦ୍ର ସରକାରଙ୍କ ମିନିରତ୍ନ ସଂସ୍ଥା କରିଛି ଶିକ୍ଷକ ନିଯୁକ୍ତି । ଟୁଇଟ ଜରିଆରେ ଧର୍ମେନ୍ଦ୍ରଙ୍କୁ ଏପରି ଜବାବ ଦେଇଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ।
ଧର୍ମେନ୍ଦ୍ରଙ୍କ ଉଦ୍ଦେଶ୍ୟରେ ସେ କହିଛନ୍ତି, ‘ସେ ବୋଧେ ଜାଣିନାହାନ୍ତି କିମ୍ବା ଜାଣି ନାଟକ କରୁଛନ୍ତି । ଶିକ୍ଷକ ନିଯୁକ୍ତିର ପୂରା ପ୍ରକ୍ରିୟା ଧର୍ମେନ୍ଦ୍ରଙ୍କ ନିଜ ସଂସ୍ଥା ଇଡିସିଆଇଏଲ ଜରିଆରେ କରାଯାଉଛି । ଯାହା ଧର୍ମେନ୍ଦ୍ରଙ୍କ ମନ୍ତ୍ରାଳୟ ଅଧୀନରେ କାର୍ଯ୍ୟ କରୁଛି । ଏହି କେନ୍ଦ୍ରୀୟ ସଂସ୍ଥା ଇଡିସିଆଇଏଲ ମିନି ରତ୍ନ ବର୍ଗରେ ଆସୁଛି । ସେ କ’ଣ କହିବାକୁ ଚାହୁଁଛନ୍ତି ଯେ, ତାଙ୍କ ନିଜସ୍ବ ସଂସ୍ଥା ଇଡିସିଆଇଏଲ ନିଯୁକ୍ତି ପ୍ରକ୍ରିୟାରେ ଜାଲିଆତି କରିଛି ?’
ପ୍ରଣବ ପୁଣି ଦର୍ଶାଇଛନ୍ତି, ‘ଇଡିସିଆଇଏଲ କେନ୍ଦ୍ରୀୟ ବିଦ୍ୟାଳୟଠାରୁ ଆରମ୍ଭ କରି ଜବାହର ନବୋଦୟ ବିଦ୍ୟାଳୟ, ଏମସ, ଭାରତୀୟ ସେନା ଓ ଅନ୍ୟାନ୍ୟ ସଂସ୍ଥା ଲାଗି ହଜାର ହଜାର ସଂଖ୍ୟାରେ ନିଯୁକ୍ତି କରିଥାଏ । ସେଠି ମଧ୍ୟ କ’ଣ ଅନିୟମିତତା ହୋଇଥିବା କହିବାକୁ ଚାହୁଁଛନ୍ତି ?’
ଆଗକୁ କହିଛନ୍ତି, ତାଙ୍କ ନିଜ ସଂସ୍ଥା ନିଯୁକ୍ତି କରିଛି । ହେଲେ କିଛି ନବୁଝି ଡାହା ମିଛ ଓ ନିରାଧାର କଥା କହିବାରେ ଧର୍ମେନ୍ଦ୍ରଙ୍କ ଅହେତୁକ ଆଗ୍ରହ ଦେଖି ଲୋକେ ହସିବା ଆରମ୍ଭ କଲେଣି । ଲାଗୁଛି ମାହାଲ ମାଣ୍ଡାକୁ ସୃଷ୍ଟି କରିବାରେ ଧର୍ମେନ୍ଦ୍ରଙ୍କ ବଡ଼ ଭୂମିକା ରହିଛି ।