ନୀଳଗିରି : ସୁନା ବିସ୍କୁଟ ଦେବା କହି ୪ ଲକ୍ଷ ଟଙ୍କା ଠକେଇ ଅଭିଯୋଗରେ ୬ ଜଣକୁ ବାନ୍ଧିଛି ନୀଳଗିରି ପୋଲିସ । ସୁନା ବିସ୍କୁଟ ଦଲାଲଙ୍କ ନିକଟରୁ ୬ ଗୋଟି ମୋବାଇଲ ଫୋନ, ଦୁଇଟି ବାଇକ, ୩ଲକ୍ଷ ୨୯ ହଜାର ଟଙ୍କା ଜବତ କରିଛି ପୋଲିସ । ପୁରୀ ବ୍ରହ୍ମପୁର ଅଞ୍ଚଳରୁ ସଂଗ୍ରାମ କେଶରି ବେହେରା ନାମକ ଜଣେ ସରକାରୀ ଶିକ୍ଷକ ସ୍ୱଳ୍ପ ଟଙ୍କା ମୂଲ୍ୟରେ ସୁନା ନେବା ପାଇଁ ତାଙ୍କର ଜଣେ ସହଯୋଗୀ ବାପି ମଲ୍ଲିକଙ୍କୁ ୩ ମାସ ତଳେ ଯୋଗାଯୋଗ କରିଥିଲେ । ୭ ତାରିଖ ସୁନା ନେବା ପାଇଁ ନୀଳଗିରି ଅଞ୍ଚଳକୁ ଆସିଥିଲେ । ଟଙ୍କା ଦେଇ ସୁନା ନେବା ସମୟରେ ପୂର୍ବ ଯୋଜନା ମୁତାବକ ୩ଜଣ ଯୁବକ ପୋଲିସ ଡ୍ରେସ ପିନ୍ଧି ଶିକ୍ଷକଙ୍କ ନିକଟରୁ ୪ ଲକ୍ଷ ଟଙ୍କା ଓ ଏକ ସୁନା ଚେନ ଲୁଟି ନେଇ ଗାଏବ ହୋଇ ଯାଇଥିଲେ । ପରେ ଶିକ୍ଷକ ଜଣକ ନୀଳଗିରି ଥାନାରେ ଅଭିଯୋଗ ପରେ ନୀଳଗିରି ପୋଲିସ ୬ ଜଣ ଦଲାଲଙ୍କୁ ବାନ୍ଧି ଅଧିକ ତଦନ୍ତ ଚଳାଇଛି । ଏନେଇ ଆଜି ନୀଳଗିରି ଥାନାରେ ଏକ ସାମ୍ୱାଦିକ ସମ୍ମିଳନୀ କରି ସୂଚନା ଦେଇଛନ୍ତି ନୀଳଗିରି ଏସଡିପିଓ ପ୍ରମୋଦ ମଲ୍ଲିକ ।
ଆମରଣ ଅନଶନରେ ବସିଛନ୍ତି ନିଖିଳ ଓଡିଶା ଆୟୁଷ ଛାତ୍ର ସଂଗଠନ
ପୁରୀ : ୮ ଦଫା ଦାବି ପୂରଣ ନେଇ ଗତକାଲି ଠାରୁ ରାଜ୍ୟ ବ୍ୟାପୀ ଆମରଣ ଅନଶନରେ ବସିଛନ୍ତି ନିଖିଳ ଓଡିଶା ଆୟୁଷ ଛାତ୍ର ସଂଗଠନ । ପୁରୀ ଗୋପବନ୍ଧୁ ଆୟୁର୍ବେଦ କଲେଜ ଠାରେ ମଧ୍ୟ ଅନଶନ ଜାରି ରହିଛି । ଆଜି ଜଣେ ଛାତ୍ରଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହୋଇଯାଇଛି । ଛାତ୍ର ଜଣକଙ୍କ ନାମ ନିଗମ ପ୍ରସାଦ ନନ୍ଦ ହୋଇଥିବା ବେଳେ ତାଙ୍କୁ ଚିକିତ୍ସା ପାଇଁ ପୁରୀ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଛାତ୍ରଙ୍କ ଅବସ୍ଥା ଅସୁସ୍ଥ ହୋଇ ଯାଇଥିବାରୁ କଲେଜ ଅଧ୍ୟକ୍ଷ ଓ ପୁରୀ ଉପ ଜିଲ୍ଲାପାଳ ଖବର ପାଇ ଧାରଣାସ୍ଥଳରେ ପହଂଚିଥିଲେ । ପରେ ଆମ୍ବୁଲାନ୍ସ ଯୋଗେ ଅସୁସ୍ଥ ଛାତ୍ରଙ୍କୁ ମେଡିକାଲକୁ ପଠାଯାଇଥିଲା।
ଜୁଆଆଡ୍ଡାରେ ଚଢ଼ାଉ, ୧୨ଜଣ ଯୁଆଡ଼ି ଗିରଫ
ଜଳେଶ୍ୱର : ବାଲେଶ୍ୱର ଜଳେଶ୍ୱର ଥାନା ଅଂଚଳରେ ଜୁଆଆଡ୍ଡାରେ ଚଢ଼ାଉ। ଭାରତ-ଦକ୍ଷିଣ ଆଫ୍ରିକା ମ୍ୟାଚକୁ ନେଇ ଜୁଆଖେଳ ପାଇଁ ଚାଲିଥିଲା ପ୍ରସ୍ତୁତି। ଖବର ପାଇ ଆଡ୍ଡା ଉପରେ ମାଡ଼ି ବସିଲା ଜଳେଶ୍ଵର ପୋଲିସ । ୧୨ଜଣ ଯୁଆଡ଼ିଙ୍କୁ ଗିରଫ ସହ ୯ ବାଇକ, ନଗଦ ଟଙ୍କା ଓ ୯ଟି ମୋବାଇଲ ଜବତ କରିଛି ପୋଲିସ । ବିଳମ୍ବିତ ରାତିରେ ଝାଡ଼େଶ୍ୱରପୁର ବସ୍ତିରେ ଚଢ଼ାଉ କରିଥିଲା ପୋଲିସ । ଆଇଆଇସି, ତହସିଲଦାର, ଏସଆଇ ଓ ପୋଲିସର ଗୋଟିଏ ଟିମ ଚଢ଼ାଉରେ ସାମିଲ ଥିଲେ। ମମତାଜ ଖାଁଙ୍କ ଘର ଛାତ ଉପରେ ଜୁଆ ଖେଳ ଚାଲିଥିବା ବେଳେ ଧରିଲା ପୋଲିସ। । ମମତାଜ ଖାଁଙ୍କୁ ମାଷ୍ଟର ମାଇଣ୍ଡ କୁହାଯାଉଥିବା ବେଳେ ସେକ ଇର୍ସାଦ ମହମ୍ମଦ ସମେତ ୧୨ ଜୁଆଡିଙ୍କ ନାମରେ ଆଗରୁ ଜାତୀୟ ସ୍ତର ଆଇପିଏଲ ଖେଳରେ ଟଙ୍କା ଲଗାଉଥିବା ଅଭିଯୋଗ ରହିଛି ।
ସରିଲା ବିଧାନସଭାର ଶୀତ ଅଧିବେଶନ, ୧୮ ଦିନ ଆଗରୁ ବିଧାନସଭା ଅନିର୍ଦ୍ଦିଷ୍ଟ କାଳ ଲାଗି ମୁଲତବୀ
ଭୁବନେଶ୍ବର : ସରିଲା ବିଧାନସଭାର ଶୀତ ଅଧିବେଶନ। ୧୮ ଦିନ ଆଗରୁ ବିଧାନସଭା ଅନିର୍ଦ୍ଦିଷ୍ଟ କାଳ ଲାଗି ମୁଲତବୀ ଘୋଷଣା କରାଯାଇଛି। ନଭେମ୍ବର ୨୭ରୁ ଆରମ୍ଭ ହୋଇଥିଲା ଶୀତ ଅଧିବେଶନ। ମାତ୍ର ୧୧ ଦିନ ଚାଲିଲା ଚଳିତ ଶୀତ ଅଧିବେଶନ। ଏଥର ୨୯ ଦିନ ଲାଗି ବିଧାନସଭା ଅଧିବେଶନ ବସିବା ଲାଗି ହୋଇଥିଲା ନିର୍ଦ୍ଧାରଣ। ଏହି ଅଧିବେଶନରେ ଅତିରିକ୍ତ ବ୍ୟୟ ମଞ୍ଜୁରୀ ବିଲ୍ ଗୃହୀତ ହେବା ସହ ମନ୍ତ୍ରୀ ଓ ବିଧାୟକଙ୍କ ଦରମା ବୃଦ୍ଧି ସଂକ୍ରାନ୍ତ ବିଲ୍ ପାରିତ ହୋଇଥିଲା।
ରାଜରାସ୍ତାରେ ଧାନ ପକାଇ ଚାଷୀଙ୍କ ପ୍ରତିବାଦ
ବରଗଡ଼ : ବରଗଡ଼ ଗୋଡ଼ଭାଗାରେ NH ଅବରୋଧ କରିଛନ୍ତି ଶହ ଶହ ଚାଷୀ । ରାଜରାସ୍ତାରେ ଧାନ ପକାଇ କରୁଛନ୍ତି ପ୍ରତିବାଦ । ମଣ୍ଡି ଅଚଳାବସ୍ଥାକୁ ନେଇ ରାଜରାସ୍ତାରେ ଦେଖିବାକୁ ମିଳିଛି ଏଭଳି ପ୍ରତିବାଦ । ପ୍ରଶାସନ ସହ ଆଲୋଚନା ବିଫଳ ହେବାପରେ ରାସ୍ତା ଅବରୋଧ କରିଛନ୍ତି ଚାଷୀ । ପ୍ରତିବାଦ ବେଳେ ଦେଖିବାକୁ ମିଳିଥିଲା ଅପ୍ରୀତିକର ପରିସ୍ଥିତି l ଚାଷୀ ପୋଲିସ ମୁହାଁମୁହିଁ ହୋଇଥିଲେ l ଏବେ ସ୍ଥିତି ଶାନ୍ତ ପଡିଥିବା ବେଳେ ପ୍ରଶାସନ ଆନ୍ଦୋଳନରତ ଚାଷୀଙ୍କ ସହ ଆଲୋଚନା କରୁଛି l ବରଗଡ଼ ଉପଜିଲ୍ଲାପାଳ ପ୍ରସନ୍ନ କୁମାର ପାଣ୍ଡେ ଓ ବରଗଡ଼ SDPO ଚାଷୀଙ୍କୁ ବୁଝାସୁଝା କରୁଛନ୍ତି । ରାସ୍ତାର ଦୁଇ ପାର୍ଶ୍ଵରେ ଅଟକି ରହିଛି ଗାଡି ମୋଟର।
ଋଣ କରି ବିବାହ କରିଥିଲେ, ନିଶା ଦେଇ ଲୁଟିନେଲା ନବବଧୂ…
ନନ୍ଦିଘୋଷ ବ୍ୟୁରୋ ; ରାଜସ୍ଥାନର ଧୋଲପୁର ଜିଲ୍ଲାରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ନବବଧୂ ସୁନା, ରୂପା ଅଳଙ୍କାର ଏବଂ ନଗଦ ଟଙ୍କା ନେଇ ପଳାଇଯାଇଛି। ନବବିବାହିତା କନ୍ୟା ନିଜର ବର ଓ ଶ୍ୱଶୁର ଘର ଲୋକଙ୍କୁ ନିଶା ଦେଇ ଚେତାଶୂନ୍ୟ କରିଦେଲା। ଆଉ ସବୁ ଲୁଟି ନେଇ ଚାଲିଗଲା । ବିବାହ ପାଇଁ ଶ୍ବଶୁର ଘର ଲୋକ ଲକ୍ଷେ ୨୦ ହଜାର ଋଣ ଆଣିଥିଲେ ।
ଧୋଲପୁରର ପିଫେରା ଗାଁର ବାସିନ୍ଦା ସୋନୁ ଦୁଇ ଦିନ ପୂର୍ବରୁ ବିବାହ କରିଥିଲେ । ତାଙ୍କ ସ୍ତ୍ରୀକୁ ଘରକୁ ଆଣିଥିଲେ। ସମଗ୍ର ଘର ଆନନ୍ଦରେ ପୂର୍ଣ୍ଣ ହୋଇଯାଇଥିଲା। ପରିବାର ଲୋକ ବହୁତ ଉତ୍ସାହ ଏବଂ ଆଡମ୍ବର ସହିତ ବିବାହ ରୀତିନୀତି ସମାପ୍ତ କରିଥିଲେ। କିନ୍ତୁ ବିବାହ ପରେ କନ୍ୟା ନିଜ ଶ୍ବଶୁର ଘର ଲୋକଙ୍କୁ ନିଶା ଦେଇଥିଲା । ସେମାନେ ଅଚେତ ହୋଇଟିବା ପରେ ସବୁ ନେଇ ଚାଲିଯାଇଥିଲା । ସକାଳେ ଚେତା ଫେରିବା ପରେ ପୋଲିସକୁ ଖବର ଦେଇଥିଲେ ।
ପୋଲିସ ଖବର ପାଇଁ ଗାଁରେ ପହଞ୍ଚି ଅଚେତ ପରିବାର ସଦସ୍ୟଙ୍କୁ ମେଡିକାଲରେ ଭର୍ତ୍ତି କରିଥିଲେ । ବର୍ତ୍ତମାନ ସେମାନଙ୍କର ଚିକିତ୍ସା ଚାଲିଛି। ଅଭିଯୋଗ ଆଧାରରେ, ପୋଲିସ ତଦନ୍ତ ଜାରି ରହିଛି ।
ବାଲି ଚୋରାଚାଲାଣ ବେଳେ ପୋଲିସକୁ ଆକ୍ରମଣ
ଛେଣ୍ଡିପଦା : ଖଣିଜ ଦ୍ରବ୍ୟ ଚୋରା ଚାଲାଣ ଚଢ଼ାଉ ବେଳେ ଆକ୍ରମଣ କଲେ ବାଲି ମାଫିଆ ।ଅନୁଗୋଳ ଜିଲ୍ଲା ଛେଣ୍ଡିପଦା ଥାନା ଅଞ୍ଚଳରେ ବେଆଇନ ଲଘୁ ଖଣିଜ ଦ୍ରବ୍ୟ ଚୋରା ଚାଲାଣ ହେଉଥିଲା । ଖବର ପାଇ ପୋଲିସ ଓ ଲଘୁ ଖଣିଜ ବିଭାଗର କର୍ମଚାରୀ ମାନେ ଚଢ଼ାଉ କରିଥିଲେ l ଗୋଟିଏ ବେଆଇନ ବାଲି ବୋଝେଇ ଟ୍ରାକ୍ଟରକୁ ଜବତ କରି ଥାନାକୁ ଆଣିଥିବା ବେଳେ ଅନ୍ୟ ଏକ ବାଲି ବୋଝେଇ ଟ୍ରାକ୍ଟରକୁ ଅନ୍ଧାରିକଟା ନିକଟରୁ ଜବତ କରିଥିଲେ l ବେଆଇନ ବାଲି ବୋଝଇ ଟ୍ରାକ୍ଟରକୁ ଥାନାକୁ ଆଣୁଥିବା ବେଳେ ପୁରୁଣାପାଣି ନିକଟରେ ବାଲି ମାଫିଆମାନେ ଅଟକାଇ ପୋଲିସକୁ ମାଡ଼ ମାରି ଜବତ ଟ୍ରାକ୍ଟରକୁ ନେଇ ଫେରାର ହୋଇ ଯାଇଥିଲେ l ଖଣି ବିଭାଗ ପକ୍ଷରୁ ଘଟଣା ସମ୍ପର୍କରେ ଛେଣ୍ଡିପଦା ଥାନାରେ ଲିଖିତ ଅଭିଯୋଗ ହୋଇଛି lଏନେଇ ଛେଣ୍ଡିପଦା ପୋଲିସ ପକ୍ଷରୁ ଚଢ଼ାଉ କରି ଜଣଙ୍କୁ ଅଟକ ରଖି ଘଟଣାର ଛାନବିନ ଚଳାଇଛି l
ନୋବେଲ ଦୌଡ଼ରେ ଆରବ ନେତାଙ୍କ ନାଁ ସାମିଲ ପରେ ବଢ଼ିଲା ଟ୍ରମ୍ପଙ୍କ ଟେନସନ୍
ନନ୍ଦିଘୋଷ ବ୍ୟୁରୋ : ପୁଣି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟେନସନ ବଢିଛି । ନୋବେଲ ଶାନ୍ତି ପୁରସ୍କାର ଜିତିବାର ସ୍ୱପ୍ନରେ ପୁଣି ଥରେ ବାଧା ସୃଷ୍ଟି ହେବା ଭଳି ମନେ ହେଉଛି । ୨୦୨୫ରେ ନୋବେଲ ପୁରଷ୍କାର ହରାଇଥିଲେ । ଆଶ କହିଥିଲେ ଆଗାମୀ ବର୍ଷ ଏକ ପରିବର୍ତ୍ତନ ହେବ । କିନ୍ତୁ ଏବେ ଏହି କାହାଣୀ ନୂଆ ମୋଡ ନେଇଛି ।
ଏବେ ଜଣେ ଆରବ ନେତାଙ୍କ ନାମ ଯୋଡି ହେବାକୁ ନେଇ ଚର୍ଚ୍ଚା ଜୋର ଧରିଛି । ସେ କୌଣସି ସାଧାରଣ ରାଜନେତା ନୁହଁନ୍ତି, ବରଂ ସଂଯୁକ୍ତ ଆରବ ଏମିରେଟ୍ସ ର ରାଷ୍ଟ୍ରପତି ମହମ୍ମଦ ବିନ୍ ଜାଏଦ୍ ଅଲ୍ ନାହ୍ୟାନ୍ (MBZ) । ଏହି ଆରବ ନେତାଙ୍କ ନାମ ଆସିବା ପରେ ଟ୍ରମ୍ପ ଟେନସନ ବଢିବାରେ ଲାଗିଛି ।
କେବଳ ଟ୍ରମ୍ପ ନୁହେଁ, ସମଗ୍ର ବିଶ୍ୱ ଜାଣନ୍ତି ଯେ ଆବ୍ରାହମ ଚୁକ୍ତିନାମା ମଧ୍ୟପ୍ରାଚ୍ୟ ରାଜନୀତିକୁ ହଲାଇ ଦେଇଥିଲା। ଟ୍ରମ୍ପ ଏହି ଐତିହାସିକ ଚୁକ୍ତିନାମା ପାଇଁ ରାଜନୈତିକ ଢାଞ୍ଚା ସ୍ଥାପନ କରିଥିଲେ, କିନ୍ତୁ ଏହାକୁ କାର୍ଯ୍ୟକାରୀ କରିବାର ପ୍ରକୃତ ବିପଦ କିଏ ନେଇଥିଲା? ୟୁଏଇର ରାଷ୍ଟ୍ରପତି। ଇସ୍ରାଏଲ ସହିତ ସମ୍ପର୍କ ସ୍ୱାଭାବିକ କରିବା ପାଇଁ ସାହସିକ ନିଷ୍ପତ୍ତି ନେଇଥିବା ପ୍ରଥମ ପ୍ରମୁଖ ଆରବ ଦେଶ ଥିଲା ୟୁଏଇ।
ଏହି ନିଷ୍ପତ୍ତି ସହଜ ନଥିଲା କାରଣ, ଇରାନ ସମର୍ଥିତ ଗୋଷ୍ଠୀ ଏବଂ ମୁସଲିମ ବ୍ରଦରହୁଡ୍ ଭଳି ଶକ୍ତିର କଡ଼ା ସମାଲୋଚନା ଏବଂ ଚାପ ସତ୍ତ୍ୱେ, ୟୁଏଇ ଶାନ୍ତି ଏବଂ ସ୍ଥିରତାର ପଥ ବାଛିଥିଲା। ଏହି ସମୟରେ, ହୁଥି ବିଦ୍ରୋହୀମାନେ ମଧ୍ୟ ଆବୁଧାବି ଉପରେ ଡ୍ରୋନ୍ ଆକ୍ରମଣ ଆରମ୍ଭ କରିଥିଲେ, କିନ୍ତୁ ଜାଏଦ ଅଲ୍ ନାହୟାନ୍ ଉତ୍ତେଜନା ବୃଦ୍ଧି କରିବା ପରିବର୍ତ୍ତେ ସଂଯମ ଏବଂ ଦୂରଦୃଷ୍ଟି ଦେଖାଇଥିଲେ।
ମଧ୍ୟପ୍ରାଚ୍ୟର ଅନେକ ଦେଶ ସେମାନଙ୍କର ରାଜନୈତିକ ଲଢ଼େଇରେ ଫସି ରହିଥିବା ବେଳେ, MBZ ୟୁଏଇକୁ ଏକ ଉଚ୍ଚ-ପ୍ରଯୁକ୍ତିବିଦ୍ୟା, ଭବିଷ୍ୟତ ପାଇଁ ପ୍ରସ୍ତୁତ ରାଷ୍ଟ୍ରରେ ପରିଣତ କରିଥିଲା। ଏହା ମଙ୍ଗଳ ଗ୍ରହକୁ ଏକ ମିଶନ ପଠାଇବାରେ ପ୍ରଥମ ଆରବ ଦେଶ ହୋଇଥିଲା । ଶାନ୍ତିପୂର୍ଣ୍ଣ ପରମାଣୁ ଶକ୍ତିର ଅଗ୍ରଣୀ ହୋଇଥିଲା । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ମଧ୍ୟପ୍ରାଚ୍ୟରେ AIରେ ଦ୍ୱିତୀୟ ସର୍ବବୃହତ ନିବେଶକ ହୋଇଥିଲା। ଏହି ଦୃଷ୍ଟିକୋଣ ୟୁଏଇକୁ ଏକ ତୈଳ ଅର୍ଥନୀତିରୁ ଏକ ନବସୃଜନଶୀଳ ରାଷ୍ଟ୍ରରେ ପରିଣତ କରିଥିଲା।
ଯଦି ଏପରି କୌଣସି ଜିନିଷ ଅଛି ଯାହା ବିଶ୍ୱର ଦୃଷ୍ଟିରେ MBZ କୁ ଅଲଗା କରିଛି, ତାହା ହେଉଛି ଗାଜା ପ୍ରତି ତାଙ୍କର ବିଶାଳ ଏବଂ ଦ୍ରୁତ ମାନବିକ ପ୍ରତିକ୍ରିୟା। ଯେତେବେଳେ ବିଶ୍ୱ କେବଳ ସାହାଯ୍ୟ ପଠାଇବା ବିଷୟରେ ପ୍ରତିଶ୍ରୁତି ଦେଉଥିଲା । ୟୁଏଇ କାମ ଆରମ୍ଭ କରିବାରେ କୌଣସି ସମୟ ନଷ୍ଟ କରିନଥିଲା। ଅପରେସନ୍ ଗାଲାଣ୍ଟ ନାଇଟ୍ ୩ ଅଧୀନରେ, ୟୁଏଇ ଗାଜାକୁ ଲକ୍ଷେ ଟନ୍ ରୁ ଅଧିକ ରିଲିଫ୍ ସାମଗ୍ରୀ, ୨.୫୭ ବିଲିୟନ ଡଲାର ସହାୟତା, ଶହ ଶହ ବିମାନ, ଜାହାଜ ଏବଂ ହଜାର ହଜାର ଟ୍ରକ୍, ପ୍ରତିଦିନ ୨ ନିୟୁତ ଗ୍ୟାଲନ୍ ସ୍ୱଚ୍ଛ ପାଣି ଉତ୍ପାଦନ କରୁଥିବା ଛଅଟି ବଡ଼ ଜଳ ପ୍ଲାଣ୍ଟ, ୨୦୦ ଶଯ୍ୟା ବିଶିଷ୍ଟ ଏକ କ୍ଷେତ୍ର ହସ୍ପିଟାଲ ଏବଂ ପ୍ରାୟ ୩ହଜାର ଆହତ ଲୋକଙ୍କୁ ଚିକିତ୍ସା ପାଇଁ ୟୁଏଇକୁ ଆଣିଛି।
କାରଣ ବର୍ତ୍ତମାନ ପର୍ଯ୍ୟନ୍ତ, ବିଶ୍ୱ ଟ୍ରମ୍ପଙ୍କୁ ଆବ୍ରାହମ ଚୁକ୍ତିର ମୁଖ୍ୟ ଚେହେରା ବୋଲି ମାନିଥିଲା। କିନ୍ତୁ ବର୍ତ୍ତମାନ, MBZଙ୍କ ଭୂମିକା ଏବଂ ତାଙ୍କର ମାନବିକ ପ୍ରୟାସ ତାଙ୍କୁ ସବୁଠାରୁ ପ୍ରଭାବଶାଳୀ ଶାନ୍ତି ନେତାଙ୍କ ମଧ୍ୟରେ ପ୍ରତିଷ୍ଠା କରିଛି।
ପୁଡୁଚେରୀରେ ସୁପରଷ୍ଟାର ବିଜୟଙ୍କ ରାଲି
ନନ୍ଦିଘୋଷ ବ୍ୟୁରୋ : କରୁର ଦଳାଚକଟା ଘଟଣା ପରେ ପ୍ରଥମ ଥର ଲାଗି ଅଭିନେତା ବିଜୟଙ୍କ ପୁଣି ମେଗାରାଲି। ପୁଡୁଚେରୀରେ ହୋଇଥିବା ସମାବେଶରେ ସାମିଲ ହୋଇଛନ୍ତି ସହସ୍ରାଧିକ କର୍ମୀ। କରୁର ପରି ଘଟଣା ନଘଟିବା ଲାଗି ସଭାସ୍ଥଳରେ ସୁରକ୍ଷା ବ୍ଯବସ୍ଥା କଡ଼ାକଡ଼ି କରାଯିବା ସହ ଯାଞ୍ଚ ବ୍ଯବସ୍ଥା ପ୍ରତି ଗୁରୁତ୍ବ ଦିଆଯାଇଛି। ସେପଟେ ରାଲି ଭିତରକୁ ଜଣେ ବନ୍ଧୁକଧାରୀ ପ୍ରବେଶ କରିବା ବେଳେ ତାକୁ ସୁରକ୍ଷା କର୍ମୀ ଅଟକ ରଖିଥିବା ସୂଚନା ମିଳିଛି। କରୁର ଦଳାଚକଟାରେ ୪୧ ଜଣଙ୍କ ମୃତ୍ୟୁ ଘଟିବା ପରେ କିଛି ମାସ ଲାଗି ଟିଭିକେ ରାଲି କରି ନଥିଲା। ସଭାସ୍ଥଳୀରେ ବିଜୟ ପହଞ୍ଚିବା ପରେ ସମର୍ଥକମାନେ ବ୍ଯାରିକେଡ ଉପରେ ଚଢ଼ି ତାଙ୍କ ନିକଟକୁ ଦୌଡ଼ିଯିବା ଦେଖାଯାଉଥିଲା। ସମାବେଶ ପୂର୍ବରୁ ପୁଡୁଚେରୀ ପୋଲିସ ସବିଶେଷ ଆଡଭାଇଜରୀ ଜାରି କରିଥିଲା। ପୋଲିସ ଓ ପ୍ରଶାସନ ପକ୍ଷରୁ ସତର୍କ ଦୃଷ୍ଟି ରଖାଯାଇଥିଲା। ପଡୋଶୀ ତାମିଲନାଡୁରୁ ଯେପରି ସମର୍ଥକମାନେ ରାଲିକୁ ଯାଇପାରିବେ ନାହିଁ ସେଥିପ୍ରତି ଦୃଷ୍ଟି ଦେଇଥିଲା ପୋଲିସ। ସଭାସ୍ଥଳୀକୁ ଯିବା ବାଲି କ୍ୟୁଆର କୋଡ ବି ବ୍ଯବହାର ହୋଇଥିଲା। ପାର୍କିଂ ସ୍ଥଳ ପ୍ରତି ଧ୍ୟାନ ଦିଆଯାଇଥିଲା। ପୂର୍ବରୁ ରୋଡସୋ ଲାଗି ବିଜୟ ଅନୁମତି ମାଗିଥିଲେ ବି ପ୍ରଥମ ତାହାକୁ ଦିଆଯାଇ ନଥିଲା। ମାତ୍ର ପରେ ୫ ହଜାର ଲୋକଙ୍କ ଲାଗି ପୋଲିସ ଅନୁମତି ଦେଇଥିଲା।
ନାତୁଣୀଙ୍କୁ ଦୁଷ୍କର୍ମ : ଜେଜେବାପାଙ୍କୁ ୨୦ ବର୍ଷ ଜେଲ
ନନ୍ଦିଘୋଷ ବ୍ୟୁରୋ : ଆନ୍ଧ୍ରପ୍ରଦେଶରେ ଜଣେ ଜେଜେବାପାଙ୍କୁ ୨୦ ବର୍ଷ ଜେଲଦଣ୍ଡ ହୋଇଛି । ନାତୁଣୀଙ୍କୁ ଦୁଷ୍କର୍ମ କରିବା ମାମଲାରେ ତାଙ୍କୁ ଏହି ଦଣ୍ଡାଦେଶ ହୋଇଛି । ୫୯ ବର୍ଷୀୟ ଜେଜେବେପାଙ୍କୁ ୨୦ ବର୍ଷ ଜେଲଦଣ୍ଡ ସହ ୫ ହଜାର ଟଙ୍କା ଜରିମାନା ମଧ୍ୟ କରାଯାଇଛି । ଘଟଣା ଘଟାଇବା ପରେ ଜେଜେବାପା ଫେରାର ହୋଇଯାଇଥିଲେ । ପୀଡିତା ତାଙ୍କ ମାଆଙ୍କୁ ସବୁ କଥା କହିଥିଲେ, ଯିଏ ପରେ ପୋଲିସରେ ଅଭିଯୋଗ କରିଥିଲେ।
ଏହି ମାମଲାଟି ବିଜୟନଗରମର ଗଜୁଲାରେଗାରେ ସାମ୍ନାକୁ ଆସିଥିଲା, ଯେଉଁଠାରେ ଅଗଷ୍ଟ ମାସରେ, ୫୯ବର୍ଷୀୟ ବୋଣ୍ଡାପାଲି ସତ୍ୟ ରାଓ ତାଙ୍କ ନିଜ ନାତୁଣୀକୁ ଦୁଷ୍କର୍ମ କରିଥିଲେ। ପୀଡିତାଙ୍କ ବାପାମାଆ ବାହାରେ ଥିବା ସମୟରେ ଏବଂ ସେ ତାଙ୍କ ଜେଜେମାଆଙ୍କ ସହିତ ଏକୁଟିଆ ଥିବା ସମୟରେ ସେ ଏହି ଅପରାଧ କରିଥିଲେ। ସତ୍ୟ ରାଓ ଏହାର ସୁଯୋଗ ନେଇ ତାଙ୍କୁ ଦୁଷ୍କର୍ମ କରିଥିଲେ। ପୀଡିତାଙ୍କ ମାଆ ଫେରି ଆସିବା ପରେ ସେ ତାଙ୍କ ମାଆଙ୍କୁ ଘଟଣା ବିଷୟରେ କହିଥିଲେ।
ଘଟଣା ପରେ ସତ୍ୟ ରାଓ ଫେରାର ହୋଇ ଯାଇଥିଲେ। କିଛି ସମୟ ପରେ, ଝିଅର ମାଆ ଘରକୁ ଫେରି ତାଙ୍କ ଝିଅ କାନ୍ଦୁଥିବାର କାରଣ ପଚାରିଲେ। ତା’ପରେ ସେ ତାଙ୍କ ମାଆଙ୍କୁ କହିଲେ ଯେ ତାଙ୍କ ଜେଜେବାପା ତାଙ୍କୁ ଦୁଷ୍କର୍ମ କରିଛନ୍ତି। ଏଥିରେ ଆଶ୍ଚର୍ଯ୍ୟ ହୋଇ ପୀଡିତା ମହିଳା ପୋଲିସରେ ତାଙ୍କ ଶ୍ୱଶୁରଙ୍କ ବିରୋଧରେ ଅଭିଯୋଗ କରିଥିଲେ। ପରେ ତଦନ୍ତ ଆରମ୍ଭ ହୋଇଥିଲା ଏବଂ ଅଭିଯୁକ୍ତ ଜେଜେବାପାଙ୍କୁ ଗିରଫ କରାଯାଇଥିଲା।
ପରବର୍ତ୍ତୀ ସମୟରେ, ଡିଏସ୍ପି ଆର. ଗୋବିନ୍ଦ ରାଓଙ୍କ ତତ୍ତ୍ୱାବଧାନରେ ମହିଳା ପୋଲିସ ଷ୍ଟେସନର ଏସଆଇ ସିରିଶା ପୋକ୍ସୋ ଆଇନ ଅନୁଯାୟୀ ଏକ ମାମଲା ରୁଜୁ କରି କୋର୍ଟରେ ହାଜର କରିଥିଲେ। ଅଭିଯୁକ୍ତକୁ ପରେ ଗିରଫ କରାଯାଇ ରିମାଣ୍ଡରେ ନିଆଯାଇଥିଲା। ଡିସେମ୍ବର ୮ ତାରିଖ ସୋମବାର ଦିନ, ସ୍ୱତନ୍ତ୍ର ପୋକ୍ସୋ କୋର୍ଟ ତାଙ୍କ ରାୟ ଶୁଣାଇ ଅଭିଯୁକ୍ତ ଜେଜେବାପାଙ୍କୁ ୨୦ ବର୍ଷ ସଶ୍ରମ କାରାଦଣ୍ଡ ଏବଂ ୫ ହଜାର ଜରିମାନା ଶୁଣାଇଥିଲେ। ପୀଡିତାଙ୍କ ପୁନର୍ବାସ ପାଇଁ ୫ ଲକ୍ଷ କ୍ଷତିପୂରଣ ମଧ୍ୟ ଘୋଷଣା କରାଯାଇଥିଲା ।