ନନ୍ଦିଘୋଷ ବ୍ୟୁରୋ: ରାତି ଅଧିଆ ଡିଲ କରି ମୋ ଟିକେଟ କାଟିଦେଲେ ଅପରାଜିତା ଷଡ଼ଙ୍ଗୀ । ବିଜେପିର ଭୁବନେଶ୍ବର ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀଙ୍କ ବିରୋଧରେ ଏଭଳି ସଂଗୀନ ଅଭିଯୋଗ ଆଣିଛନ୍ତି ଭୁବନେଶ୍ବର ଉତ୍ତରରୁ ଟିକେଟ ଆଶାୟୀ ଯୁଗାଂଶୁ ପଣ୍ଡା । ଦୁଇଦିନ ତଳେ ଅପରାଜିତା ଯୁଗାଂଶୁଙ୍କୁ ଟିକେଟ ଦେବାକୁ ପ୍ରତିଶୃତି ଦେଇଥିଲେ । ହେଲେ ଦୁଇଦିନ ତଳେ ବିଜେପିରେ ସାମିଲ ହୋଇଥିବା ପ୍ରିୟଦର୍ଶୀ ମିଶ୍ରଙ୍କୁ ଟିକେଟ ଦେଇଛି ଦଳ । ସାମ୍ବାଦିକ ସମ୍ମିଳନୀ କରି ଅପରାଜିତାଙ୍କ ଉପରେ ବର୍ଷିବା ସହ ଅସନ୍ତୋଷ ବଖାଣିଛନ୍ତି ଯୁଗାଂଶୁ । ସେ କହିଛନ୍ତି ସାଂସଦ ଅପରାଜିତାଙ୍କ ପ୍ରତିନିଧି ଭାବେ ସେ ଦୀର୍ଘବର୍ଷ ଧରି କାମ କରିଛନ୍ତି । ପ୍ରାର୍ଥୀ କରିବାକୁ ଅପରାଜିତା ତାଙ୍କୁ ପ୍ରତିଶୃତି ଦେଇଥିଲେ । ଏପରିକି ଗତ ୨୮ ତାରିଖରେ ଟିକେଟ ମିଳିବ ବୋଲି ସେ କହିବା ସହ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦେଇଥିଲେ । ହେଲେ ଅନ୍ଯ ଦଳରୁ ନେତାଙ୍କୁ ଆଣି ରାତିଅଧିଆ ଡିଲ୍ କରି ଟିକେଟ ଦେଇଦେଲେ ବୋଲି ସେ ଅଭିଯୋଗ କରିଛନ୍ତି ।
ବିଜେପିର ସୋର ବିଧାୟକ ପ୍ରାର୍ଥୀ ରାଜେନ୍ଦ୍ର ଦାସଙ୍କୁ ଜୋରଦାର ବିରୋଧ
ସୋର: ବିଜେପିର ସୋର ବିଧାୟକ ପ୍ରାର୍ଥୀ ଭାବେ ରାଜେନ୍ଦ୍ର ଦାସଙ୍କୁ ଜୋରଦାର ବିରୋଧ । ସୋର ନିର୍ବାଚନମଣ୍ଡଳୀର ବିଜେପି ପ୍ରାର୍ଥୀ ଭାବେ ରାଜେନ୍ଦ୍ର ଦାସଙ୍କ ନାଁ ଘୋଷଣା ପରେ ସୋର ବିଜେପିରେ ବିସ୍ପୋରଣ । ବିଧାୟକ ପ୍ରାର୍ଥୀ ଆଶାୟୀ ଥିବା ରାକେଶ ମଲ୍ଲିକଙ୍କ ନେତୃତ୍ୱରେ ଶତାଧିକ କର୍ମକର୍ତ୍ତା ଓ କର୍ମୀଙ୍କର ରାଜୁ ଦାସ ହାଏ ହାଏ, ଛିଃ ଛିଃ ନାରାରେ କମ୍ପିଲା ଉଠିଲା ସୋର ଭାରତୀୟ ଜନତା ପାର୍ଟି ଅଫିସ । ରାଜୁ ଦାସ ଗୋ ବ୍ଯାକ୍ । ବିଜେପିର ବଡ଼ ବଡ଼ିଆଙ୍କ ମନମୁଖୀ କାର୍ଯ୍ୟ ଚଳିବ ନାହିଁ । ଆଜି ଠୁଁ ଅଫିସ ତାଲା ପଡ଼ିବ। ଟିକେଟ ପରିବର୍ତ୍ତନ ଆମର ଦାବି । ଭଦ୍ରକିଆ ଶାସନ ଚଳିବ ନାହିଁ ବୋଲି କହି କର୍ମୀମାନେ ହୋ ହଲ୍ଲା କରିଥିଲେ ।
ରଣପୁରରୁ ବିଜେପି ପ୍ରାର୍ଥୀ ତାପସ ରଞ୍ଜନ ମାର୍ଥାଙ୍କ ପ୍ରାର୍ଥୀତ୍ବକୁ ବିରୋଧ
ରଣପୁର: ବନାଗ୍ନି ପରି ମାଡ଼ୁଛି ବିଜେପି ବିଦ୍ରୋହ ନିଆଁ । ଟିକେଟ ଘୋଷଣା ପରେ ଗୋଟିଏ ପରେ ଗୋଟିଏ ନିର୍ବାଚନମଣ୍ଡଳିରେ ଦେଖିବାକୁ ମିଳୁଥି ତୀବ୍ର ଅସନ୍ତୋଷ । ନୟାଗଡ଼ ଜିଲ୍ଲା ରଣପୁର ବିଜେପିରେ ଗୋଷ୍ଠୀକନ୍ଦଳ ଦେଖିବାକୁ ମିଳିଛି। ବିଜେପି ପ୍ରାର୍ଥୀ ତାପସ ରଞ୍ଜନ ମାର୍ଥାଙ୍କୁ ହୋଇଛି ଜୋରଦାର ବିରୋଧ । ପୂର୍ବତନ ବିଧାୟିକା ସୁରମା ପାଢୀଙ୍କ ଟିକେଟ କଟିବା ପରେ ଖଡଗହସ୍ତ ହୋଇଛନ୍ତି ଅସନ୍ତୁଷ୍ଟ ଗୋଷ୍ଠୀ । ଜାଗା ବ୍ଯବସାୟୀ ତାପସଙ୍କ ପ୍ରାର୍ଥିତ୍ବଙ୍କୁ ଜୋରଦାର ବିରୋଧ ସହ ବିଜେପି କାର୍ଯ୍ୟାଳୟ ଆଗରେ ବିକ୍ଷୋଭ କରିଛନ୍ତି ବିଜେପି କର୍ମୀ ।
ପ୍ରଦୀପ ପାଣିଗ୍ରାହୀଙ୍କ ବିରୋଧରେ ବିଷ ଉଗାରିଲେ ମୋହନା ଅଞ୍ଚଳର ଭୋଟର
ଗଜପତି: ପ୍ରଦୀପ ପାଣିଗ୍ରାହୀଙ୍କ ବିରୋଧରେ ବିଷ ଉଗାରିଲେ ମୋହନା ଅଞ୍ଚଳର ଭୋଟର । ବ୍ରହ୍ମପୁର ଲୋକସଭା ଆସନର ବିଜେପି ପ୍ରାର୍ଥୀ ପ୍ରଦୀପ ପାଣିଗ୍ରାହୀଙ୍କ ବିରୋଧରେ ଗଜପତି ଜିଲ୍ଲା ମୋହନା ଅଞ୍ଚଳର ଲୋକ ବିଷ ଉଗାରିଛନ୍ତି । ଜଣେ ଦୁର୍ନୀତିଖୋର ଓ ଜନବିରୋଧୀ ନେତାଙ୍କୁ ବିଜେପି ପ୍ରାର୍ଥୀ କରିଥିବାରୁ ଲୋକମାନେ କଡ଼ା ଭାଷାରେ ସମାଲୋଚନା କରିବା ସହ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି । ପ୍ରଦୀପ ପାଣିଗ୍ରାହୀଙ୍କ ପାଇଁ ଲୋକ ହୋଇଛନ୍ତି ହିନସ୍ଥା। ୨୦୧୭ ମସିହା ପଞ୍ଚାୟତ ନିର୍ବାଚନ ବେଳେ ବିଜେଡିର ଗଜପତି ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱରେ ଥିଲେ ପ୍ରଦୀପ ପାଣିଗ୍ରାହୀ । ସେତେବେଳେ ସ୍ଥାନୀୟ ନେତାଙ୍କୁ ଅଣଦେଖା କରି ନିଜ ଇଚ୍ଛାରେ କାର୍ଯ୍ୟ କରିଥିଲେ । ପ୍ରଦୀପ ପାଣିଗ୍ରାହୀଙ୍କ ଯୋଗୁ ବିଜେଡି ମୋହନାରେ ପରାଜିତ ହୋଇଥିଲା । ୨୦୧୯ ସାଧାରଣ ନିର୍ବାଚନରେ ମଧ୍ୟ ନେତାଙ୍କଠାରୁ ଲାଞ୍ଚ ନେଇ ଟିକେଟ ଦେଇଥିଲେ ପ୍ରଦୀପ ପାଣିଗ୍ରାହୀ । ଯାହା ଫଳରେ ବିଜେଡି ହାତରୁ ଗଜପତି ଜିଲ୍ଲାର ୨ଟି ଆସନ ଚାଲିଥିଲା । ଏହାପରେ ଦୁର୍ନୀତି ଅଭିଯୋଗ ବିଜେଡିରୁ ତଡ଼ା ଖାଇଥିଲେ ପ୍ରଦୀପ ପାଣିଗ୍ରାହୀ । ଏଭଳି ଦୁର୍ନୀତିଗ୍ରସ୍ତ ନେତାଙ୍କୁ ବିଜେପି ବ୍ରହ୍ମପୁର ସାଂସଦ ପ୍ରାର୍ଥୀ କରିଥିବାରୁ ଆଗାମୀ ନିର୍ବାଚନରେ ମୋହନା ଅଞ୍ଚଳବାସୀ ଉଚିତ ଜବାବ ଦେବେ ବୋଲି ଚେତାବନୀ ଦେଇଛନ୍ତି ।
ବିଜେପି ପାର୍ଟି ଅଫିସରେ ଗଣ୍ଡଗୋଳ
ଭୁବନେଶ୍ବର: ପୁଣିଥରେ ପଦାରେ ପଡ଼ିଲା ବିଜେପିର ଗୋଷ୍ଠୀ କନ୍ଦଳ। ବିଜେପି ପାର୍ଟି ଅଫିସରେ ଗଣ୍ଡଗୋଳ । ଧର୍ମଶାଳା ବିଧାନସଭା ଆସନ ପାଇଁ ପ୍ରାର୍ଥୀତ୍ବକୁ ନେଇ ଗଣ୍ଡଗୋଳ । ବିଜେପି ରାଜ୍ୟ କାର୍ଯ୍ୟାଳୟରେ ହିମାଂଶୁଙ୍କ ଗୋଷ୍ଠୀର ହଙ୍ଗାମା । ଧର୍ମଶାଳାରୁ ସ୍ମୃତିରେଖା ପହିଙ୍କୁ ପ୍ରାର୍ଥୀ କରିଥିଲା ଦଳ । ଏହାକୁ ବିରୋଧ କରି ପାର୍ଟି ଅଫିସରେ ତୁମୁଳକାଣ୍ଡ ଦେଖା ଦେଇଛି ।
ନରସିଂହ ମିଶ୍ରଙ୍କ ଆସନରେ ନିର୍ବାଚନ ଲଢ଼ିବେ ପୁଅ ସମରେନ୍ଦ୍ର
ନନ୍ଦିଘୋଷ ବ୍ୟୁରୋ: ପ୍ରକାଶ ପାଇଛି କଂଗ୍ରେସର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା । ୪୭ ବିଧାନସଭା ଏବଂ ୮ ଲୋକସଭା ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରିଛି ଦଳ । ତେବେ ଏହି ତାଲିକାରେ ପ୍ରକାଶ ପାଇଛି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ରଙ୍କ ପୁଅଙ୍କ ନାମ । ସମରେନ୍ଦ୍ରଙ୍କୁ ବଲାଙ୍ଗୀର ଆସନରୁ ପ୍ରାର୍ଥୀ କରିଛି କଂଗ୍ରେସ । ସେ ଏହି ଆସନରୁ ପ୍ରାର୍ଥୀ ହୋଇଥିବାବେଳେ ଲଢ଼େଇ ଜୋରଦାର ହେବ ବୋଲି କୁହାଯାଉଛି । ଏଠାରେ ବିଜେଡି କଳିକେଶ ସିଂଦେଓଙ୍କୁ ପ୍ରାର୍ଥୀ କରିଛି । ଏଣୁ ଉଭୟଙ୍କ ମଧ୍ୟରେ କଡା ଟକ୍କର ହେବ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି । ୨୦୧୪ ଏବଂ ୨୦୧୯ରେ ଏହି ଆସନରୁ ନରସିଂହ ମିଶ୍ର ବିଜୟୀ ହୋଇଥିବାବେଳେ ପୁଅଙ୍କ ଉପରେ ଏହାର ପ୍ରଭାବ ପଡ଼ିପାରେ । ସେପଟେ କଳିକେଶଙ୍କ ସଂଗଠନ ଦୃଢ଼ ଥିବାରୁ ବାପାଙ୍କ ଆସନକୁ ପୁଅ ରଖି ପାରିବେ କି ନାହିଁ ତାକୁ ନେଇ ଖଟିରେ ଆରମ୍ଭ ହୋଇଛି ଚର୍ଚ୍ଚା ।
୫ ସଂସଦୀୟ କ୍ଷେତ୍ରରେ ସ୍ପଷ୍ଠ ହେଲା ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀଙ୍କ ନାମ
ନନ୍ଦିଘୋଷ ବ୍ୟୁରୋ: ରାଜ୍ୟର ୪ ଲୋକସଭା ଆସନ ପାଇଁ ପ୍ରମୁଖ ତିନି ଦଳ ପ୍ରାର୍ଥୀ ଘୋଷଣା କରିଛନ୍ତି । ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀ ଘୋଷଣା କରିବା ପରେ ୫ ଆସନରେ ସାମ୍ନାକୁ ଆସିଛି ସ୍ପଷ୍ଟ ଚିତ୍ର । ସୁନ୍ଦରଗଡ଼ରେ ବିଜେଡି ଡ଼ ଦିଲୀପ ତିର୍କୀଙ୍କୁ ପ୍ରାର୍ଥୀ କରିଥିବା ବେଳେ ବର୍ତ୍ତମାନର ସାଂସଦ ଜୁଏଲ ଓରାମଙ୍କୁ ବିଜେପି ପୁଣିଥରେ ପ୍ରାର୍ଥୀ କରିଛି। କଂଗ୍ରେସ ଜନାର୍ଦ୍ଦନ ଦେହୁରୀଙ୍କୁ ଲୋକସଭା ପ୍ରାର୍ଥୀ କରିଛି। କଳାହାଣ୍ଡିରୁ ବିଜେଡିର ଲମ୍ବୋଦର ନିଆଲ, ବିଜେପିର ମାଳବିକା କେଶରୀ ଦେଓ ଓ କଂଗ୍ରେସର ଦ୍ରୌପଦୀ ମାଝୀ ଲୋକସଭା ପ୍ରାର୍ଥୀ ହୋଇଛନ୍ତି । ନବରଙ୍ଗପୁରରୁ ପ୍ରଦୀପ ମାଝୀ ବିଜେଡିର ପ୍ରାର୍ଥୀ ହୋଇଥିବାବେଳେ ବିଜେପିରୁ ବଳଭଦ୍ର ମାଝୀ ଓ କଂଗ୍ରେସରୁ ଭୁଜବଳ ମାଝୀ ପ୍ରାର୍ଥୀ ହୋଇଛନ୍ତି । ସେହିପରି କନ୍ଧମାଳରୁ ବିଜେଡିର ଅଚ୍ଯୁତ ସାମନ୍ତ, ବିଜେପିର ସୁକାନ୍ତ ପାଣିଗ୍ରାହୀ ଓ କଂଗ୍ରେସର ଅମୀରଚାନ୍ଦ ନାୟକଙ୍କ ମଧ୍ଯରେ ଟକ୍କର ହେବ। କୋରାପୁଟରୁ କାଳେରାମ ମାଝିଙ୍କୁ ବିଜେପି ପ୍ରାର୍ଥୀ କରିଥିବା ବେଳେ, କୌଶଲ୍ୟା ହିକକାଙ୍କୁ ବିଜେଡି ଏବଂ ସପ୍ତଗିରି ଉଲାକାଙ୍କୁ କଂଗ୍ରେସ ପ୍ରାର୍ଥୀ କରିଛି।
କଂଗ୍ରେସର ବରିଷ୍ଠ ନେତା ସୁରେଶ କୁମାର ରାଉତରାୟଙ୍କୁ ପୁଣିଥରେ କାରଣ ଦର୍ଶାଅ ନୋଟିସ ଜାରି କଲା କଂଗ୍ରେସ
ଭୁବନେଶ୍ବର: କଂଗ୍ରେସର ବରିଷ୍ଠ ନେତା ତଥା ବିଧାୟକ ସୁରେଶ କୁମାର ରାଉତରାୟଙ୍କୁ ପୁଣିଥରେ କାରଣ ଦର୍ଶାଅ ନୋଟିସ ଜାରି କରିଛି ରାଜ୍ଯ କଂଗ୍ରେସ। ତାଙ୍କ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବନି ବୋଲି ନୋଟିସ କରାଯାଇଛି। ତାଙ୍କ ପୁଅ ତଥା ବିଜେଡି ପ୍ରାର୍ଥୀ ମନ୍ମଥ ରାଉତରାୟଙ୍କ ସପକ୍ଷରେ ଭୋଟ ମାଗିବାରୁ କଂଗ୍ରେସ ପକ୍ଷରୁ ତାଙ୍କୁ ନୋଟିସ କରାଯାଇଛି। ଏନେଇ ସୁରେଶ ଅସନ୍ତୋଷ ପ୍ରକାଶ କରିବା ସହ ଅନ୍ଯ କୌଣସି ଦଳ ପାଇଁ ପ୍ରଚାର କରିବେ ନାହିଁ ବୋଲି ସ୍ପଷ୍ଟ କରିଛନ୍ତି। କିନ୍ତୁ ବାପା-ପୁଅର ସମ୍ପର୍କରେ କଂଗ୍ରେସ ବାଧା ସୃଷ୍ଟି କରିପାରିବ ନାହିଁ ବୋଲି କହିଛନ୍ତି ସୁର। ସେପଟେ ସୁରଙ୍କ ସପକ୍ଷରେ ବାହାରିଛନ୍ତି ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହିନିପତି। ସୁରଙ୍କୁ କାରଣ ଦର୍ଶାଅ ନୋଟିସ ଜାରି କରାଯିବା ଉଚିତ ନୁହେଁ। ପିସିସି ସଭାପତି ତୁରନ୍ତ ନୋଟିସ ପ୍ରତ୍ଯାହାର କରିବାକୁ ସେ ଦାବି କରିଛନ୍ତି। ପିସିସି ସଭାପତି କହିଛନ୍ତି ମୋର ବିଶ୍ବାସ ତାରା ଅନ୍ଯ ଦଳରୁ ପ୍ରଚାର କରିବେ ନାହିଁ। ନୋଟିସ ପ୍ରତ୍ଯାହାର ନେଇ ଏଆଇସିସି ନିଷ୍ପତ୍ତି ନେବ।
ନଜର ପକାନ୍ତୁ କଂଗ୍ରେସର କେଉଁ ବିଧାନସଭା ଆସନରୁ କାହାକୁ ମିଳିଲା ଟିକେଟ୍
ନନ୍ଦିଘୋଷ ବ୍ୟୁରୋ: ବିଜେଡି ଏବଂ ବିଜେପି ପରେ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛି କଂଗ୍ରେସ । ସେହିପରି ୪୭ ବିଧାନସଭା ପ୍ରାର୍ଥୀ ଘୋଷଣା କରିଛି କଂଗ୍ରେସ । ପଦ୍ମପୁର- ଟଙ୍କଧର ସାହୁ, ବିଜେପୁର- କିଶୋର ଦଫାଦର, ବରଗଡ଼- ନିପନ କୁମାର ଦାସ, ଭଟଲି- ବ୍ରହ୍ମା ମହାକୁଡ଼, ବ୍ରଜରାଜନଗର- କିଶୋର ପଟେଲ, ତଳସରା- ପ୍ରବୋଧ ତିର୍କୀ, ସୁନ୍ଦରଗଡ଼- ସୁଧାରାଣୀ ରାଉଡ଼ିଆ, ରଘୁନାଥପାଲି- ଗୋପାଳ ଦାସ, ରାଉରକେଲା- ବୀରେନ୍ଦ୍ରନାଥ ପଟ୍ଟନାୟକ ପ୍ରାର୍ଥୀ ହୋଇଛନ୍ତି । ରାଜଗାଙ୍ଗପୁର- ରାଜନ ଏକ୍କା, ଲୋଇସିଂହା- ଓମ୍ ପ୍ରକାଶ କୁମ୍ଭାର, ପାଟଣାଗଡ଼- ଅନୀଲ ମେହେର, ବଲାଙ୍ଗୀର- ସମରେନ୍ଦ୍ର ମିଶ୍ର, କଣ୍ଟାବାଞ୍ଜି- ସନ୍ତୋଷ ସିଂ ସାଲୁଜା, ନୂଆପଡ଼ା- ଶରତ ପଟ୍ଟନାୟକ ପ୍ରାର୍ଥୀ ହୋଇଛନ୍ତି । ଉମରକୋଟ- ସନରାଜ ଗଣ୍ଡ, ଝରିଗାଁ- ହରାବତୀ ଗଣ୍ଡ, ନବରଂଗପୁର- ଦିଲ୍ଲୀପ ପ୍ରଧାନୀ, ଡାବୁଗାଁ- ଲିପିକା ମାଝୀ, ଲାଞ୍ଜିଗଡ଼- ବଳଭଦ୍ର ମାଝୀ, ଜୁନାଗଡ଼- ତୁଳେଶ୍ୱର ନାଏକ, ଧର୍ମଗଡ଼- ରଶ୍ମିରେଖା ରାଉତ, ଭବାନୀପାଟଣା- ସାଗର ଚରଣ ଦାସ, ନର୍ଲା- ଭକ୍ତ ଚରଣ ଦାସ, ବାଲିଗୁଡ଼ା- ସୁରଡ଼ା ପ୍ରଧାନ, ଜି ଉଦୟଗିରି- ପ୍ରଫୁଲ୍ଲ ଚରଣ ପ୍ରଧାନ, ଫୁଲବାଣୀ- ପ୍ରତିଭା କଅଁର, କଣ୍ଟାମାଳ- ମନୋଜ ଆଚାର୍ଯ୍ୟ, ବୌଦ୍ଧ- ନବକୁମାର ମିଶ୍ର, ଭଂଜନଗର- ପ୍ରଶାନ୍ତ ବିଶୋଇ, ପୋଲସରା- ଅଗସ୍ତି ବରାଡ଼, କବିସୂର୍ଯ୍ୟନଗର- ଚିରଞ୍ଜୀବ ବିଶୋଇ, ସୋରଡ଼ା- ହରେକୃଷ୍ଣ ରଥ, ସାନଖେମୁଣ୍ଡି- ରମେଶ ଚନ୍ଦ୍ର ଜେନା, ଚିକିଟି- ରବୀନ୍ଦ୍ରନାଥ ଦ୍ୟାନସାମନ୍ତରାୟ, ମୋହନା- ଦାଶରଥି ଗମାଙ୍ଗ, ପାରଳାଖେମୁଣ୍ଡି- ବିଜୟ ପଟ୍ଟନାୟକ, ଗୁଣୁପୁର- ସତ୍ୟଜିତ ଗମାଙ୍ଗ, ବିଷମକଟକ- ନୀଳମାଧବ ହିକକା, ରାୟଗଡ଼ା- କାଡ୍ରାକା ଆଲାପାସ୍ୱାମୀ, ଲକ୍ଷ୍ମୀପୁର- ପବିତ୍ର ସାଉଁଟା, କୋଟପାଡ଼- ଅନାମ ଦିଆନଙ୍କୁ ପ୍ରାର୍ଥୀ ଭାବେ ଘୋଷଣା କରାଯାଇଛି । ସେହିପରି ଜୟପୁରରୁ- ତାରା ବାହିନୀପତି, କୋରାପୁଟ- କୃଷ୍ଣଚନ୍ଦ୍ର କୁଲଦୀପ, ପଟ୍ଟାଙ୍ଗୀ- ରାମଚନ୍ଦ୍ର କଦମ, ମାଲକାନଗିରି- ମାଲା ମାଢ଼ୀ ଓ ଚିତ୍ରକୋଣ୍ଡା- ମଙ୍ଗୁ ଖିଲଙ୍କୁ ପ୍ରାର୍ଥୀ କରାଯାଇଛି ।