ନନ୍ଦିଘୋଷ ବ୍ୟୁରୋ : ସୁଟିଂରେ ଭାରତକୁ ଆଉ ଏକ ପଦକ । ପ୍ଯାରିସ ଅଲିମ୍ପିକ୍ସରେ ବ୍ରୋଜ ଜିତିଛି ଭାରତ। ୧୦ମିଟର ଏୟାର ପିସ୍ତଲ ମିକ୍ସ ଇଭେଣ୍ଟରେ ବ୍ରୋଞ୍ଜ ପଦକ ମିଳିଛି । ସୁଟର ମନୁ ଭାକର ଓ ସରବଜୋତ ସିଂ ଯୋଡ଼ି ଏହି ପଦକ ଜିତିଛନ୍ତି। ଏଯାଏ ସୁଟିଂରେ ଭାରତକୁ ମିଳିଲାଣି ୨ପଦକ। ଅଲିମ୍ପିକ୍ସରେ ସୁଟର ମନୁ ଭାକର ଇତିହାସ ରଚିଛନ୍ତି। ଗୋଟିଏ ଅଲିମ୍ପିକ୍ସରେ ୨ପଦକ ଜିତିବାରେ ପ୍ରଥମ ଭାରତୀୟ ହୋଇଛନ୍ତି ମନୁ ଭାକର। ପୂର୍ବରୁ ପ୍ଯାରିସ୍ ଅଲିମ୍ପିକ୍ସ ମହିଳା ବର୍ଗ ୧୦ ମିଟର ଏୟାର ପିସ୍ତଲ ଇଭେଣ୍ଟରେ ବ୍ରୋଂଜ ଜିତିଥିଲେ ମନୁ ଭାକର।
ରାଜଧାନୀରୁ ନିଖୋଜ, ନିଆଳିରୁ ମୃତଦେହ ଉଦ୍ଧାର
ଭୁବନେଶ୍ୱର : ରାଜଧାନୀରୁ ନିଖୋଜ, ନିଆଳିରୁ ମୃତଦେହ ଉଦ୍ଧାର। ପରିବାର ଆଣିଲେ ହତ୍ୟା ଅଭିଯୋଗ । ମୃତକ ଜଣଙ୍କ ହେଉଛନ୍ତି ବରମୁଣ୍ଡାର ନବଘନ ପାଟ୍ଟଶାଣୀ। ଗତ ୧୭ ତାରିଖରେ ସେ ବରମୁଣ୍ଡାରୁ ନିଜ କାର ଧରି ବାହାରିଥିଲେ। କିନ୍ତୁ ଆଉ ଘରକୁ ଫେରିନଥିଲେ । ପରିବାର ଲୋକେ ପ୍ରଥମେ ଖଣ୍ଡଗିରି ଥାନା ଓ ପରେ ଭରତପୁର ଥାନା ଯାଇ ମିସିଂ ଏଫଆଇଆର ଦେଇଥିଲେ।
ଦିନକ ପରେ ତାଙ୍କ ଗାଡି ଆଉ ଜଣେ ଚଲାଉଥିବା ସ୍ଥାନୀୟ ଲୋକେ ଜାଣିବା ପରେ ସୌଭାଗ୍ୟ ନଗର ଅଞ୍ଚଳରୁ ଗାଡିକୁ ଧରି ଭରତପୁର ପୋଲିସ ଜିମା ଦେଇଥିଲେ । ସେତବେଳେ ଗାଡି ବନ୍ଧକ ରଖି ନବଘନ କିଛି ଟଙ୍କା ଧାର ନେଇଥିବା ପୋଲିସ ଜାଣିବାକୁ ପାଇଥିଲା। ତାଙ୍କର ମୃତଦେହ ନିଆଳି ସ୍ଥିତ ଗୋବିନ୍ଦପୁର ଥାନା ଅଧିନ କନ୍ଦଳ ନଦୀର ଉରାଡ଼ ଠାରୁ ମିଳିଥିଲା। ମୁଣ୍ଡରେ ଓ ବେକରେ କ୍ଷତ ଚିହ୍ନ ଥିଲା। ପ୍ରବଳ ରକ୍ତସ୍ରବ ମଧ୍ୟ ହୋଇଥିଲା । ସେତବେଳେ ଗୋବିନ୍ଦପୁର ପୋଲିସ ତଦନ୍ତ କରି ମଧ୍ୟ ପରିଚୟ ନପାଇବାରୁ ଏକ ଅପମୃତ୍ୟୁ ମାମଲା ରୁଜୁ କରି ପୋଷ୍ଟମର୍ଟମ କରିଥିଲା।
ଏପଟେ ପରିବାର ଲୋକେ ଅଧିକ ଖୋଜାଖୋଜି କରିବା ପରେ ସେହି ମୃତଦେହଟି ନବଘନଙ୍କର ବୋଲି ଜାଣିବାକୁ ପାଇଥିଲେ । ଆଙ୍ଗୁଠିରେ ପିନ୍ଧିଥିବା ଏକ ତମ୍ବା ମୁଦିକୁ ଦେଖି ସେ ମୃତଦେହ ଚିହ୍ନଟ କରିଥିଲେ। ଏବେ ତାଙ୍କୁ କେହି ହତ୍ୟା କରିଥିବା ପରିବାର ଲୋକେ ଅଭିଯୋଗ ଆଣିଛନ୍ତି। ଟଙ୍କା କାରବାର କୁ ନେଇ ହତ୍ୟାକାଣ୍ଡ ହୋଇଥିବା ସୂଚନା ଦେଇଛନ୍ତି ପରିବାର ଲୋକେ ।
ପୁଣି ଗୃହରେ ଉଠିଲା ସ୍ବତନ୍ତ୍ର ରାଜ୍ଯ ପାହ୍ଯା ପ୍ରସଙ୍ଗ, ସରକାରଙ୍କୁ ଘେରିଲେ ବିଜେଡି ବିଧାୟକ ଅରୁଣ ସାହୁ
ଭୁବନେଶ୍ୱର : ଓଡ଼ିଶାକୁ ସ୍ବତନ୍ତ୍ର ରାଜ୍ଯ ପାହ୍ଯା ପ୍ରସଙ୍ଗରେ ସରକାରଙ୍କୁ ଘେରିଲେ ବିଜେଡି ବିଧାୟକ ଅରୁଣ ସାହୁ । ଶୂନ୍ଯକାଳରେ ଓଡ଼ିଶାର ହକ୍ ପ୍ରସଙ୍ଗ ଉଠାଇ ରାଜ୍ଯ ସରକାରଙ୍କୁ ପ୍ରଶ୍ନ କରିଛନ୍ତି । ନୀତି ଆୟୋଗ ବୈଠକରେ ଯୋଗ ଦେଇ ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀ କଣ ଦାବି କଲେ ବୋଲି ଅରୁଣ ପ୍ରଶ୍ନ କରିଛନ୍ତି ।
ସ୍ୱତନ୍ତ୍ର ରାଜ୍ୟ ପାହ୍ୟା, ସ୍ୱତନ୍ତ୍ର ଫୋକସ ଷ୍ଟେଟ ନା ସ୍ୱତନ୍ତ୍ର ଆବଣ୍ଟନ, କଣ ଦାବି ରଖିଲେ ? କାରଣ ବିଜେପିର ୨୦୧୪ ନିର୍ବାଚନ ଇସ୍ତାହାରରେ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରତିଶୃତି ଥିଲା । ଯାହା ପରବର୍ତ୍ତୀ ସମୟରେ ଏହାକୁ ହଟାଇ ଦେଇଥିଲା ଦଳ । ଏବେ ନୂଆ ସ୍ୱତନ୍ତ୍ର ଆବଣ୍ଟନର ଯୁଗ ଆସିଛି । ଆନ୍ଧ୍ରପ୍ରଦେଶ ଓ ବିହାରକୁ ସ୍ୱତନ୍ତ୍ର ପ୍ୟାକେଜ ଦିଆଯାଇଛି । ଏପରି ସ୍ଥିତିରେ ଓଡ଼ିଶା ପାଇଁ ସ୍ୱତନ୍ତ୍ର ରାଜ୍ୟ ପାହ୍ୟା ନା ସ୍ୱତନ୍ତ୍ର ଫୋକସ ଷ୍ଟେଟ ନା ସ୍ୱତନ୍ତ୍ର ଆବଣ୍ଟନ ମଗା ଯାଇଛି ତାହା ଗୃହରେ ସ୍ପଷ୍ଟ କରିବାକୁ ଅରୁଣ ସାହୁ ଦାବି କରିଛନ୍ତି ।
ସେପଟେ ସେହି ଶୂନ୍ଯକାଳରେ ସମାନ ପ୍ରସଙ୍ଗ ଉଠାଇଥିଲେ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ । ସ୍ୱତନ୍ତ୍ର ରାଜ୍ୟ ପାହ୍ୟା ନା ସ୍ୱତନ୍ତ୍ର ଫୋକସ ନା ସ୍ୱତନ୍ତ୍ର ପ୍ୟାକେଜ ଦାବି ହୋଇଛି ତାକୁ ମୁଖ୍ୟମନ୍ତ୍ରୀ ସ୍ପଷ୍ଟ କରିବାକୁ ସେ ଦାବି କରିଥିଲେ । ଓଡ଼ିଶା ଏକ ଆଦିବାସୀ ଓ ପ୍ରାକୃତିକ ବିପର୍ଯ୍ୟୟ ପ୍ରବଣ ରାଜ୍ୟ । ବିଜେପି ୨୦୧୪ ଦଳୀୟ ଇସ୍ତାହାରରେ ସ୍ୱତନ୍ତ୍ର ରାଜ୍ୟ ପାହ୍ୟା କଥା କହିଥିଲା ।ଏବେ କଣ ଦାବି ରଖିଛନ୍ତି ମୁଖ୍ଯମନ୍ତ୍ରୀ ବୋଲି ପ୍ରଶ୍ନ କରିଥିଲେ ରାମଚନ୍ଦ୍ର । ଏହାସହ ପୋଲାଭରମ ପ୍ରସଙ୍ଗରେ କଣ କରିଛନ୍ତି ତାହା ମୁଖ୍ୟମନ୍ତ୍ରୀ ଗୃହରେ ପ୍ରକାଶ କରିବାକୁ ଦାବି କରିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ।
ଯଶଶ୍ରୀ ସିନ୍ଧେ ହତ୍ୟା ଘଟଣା : ହତ୍ୟାକାରୀକୁ ବାନ୍ଧିଲା ମୁମ୍ୱାଇ ପୋଲିସ
ମୁମ୍ୱାଇ : ଯଶଶ୍ରୀ ସିନ୍ଧେ ହତ୍ୟା ଘଟଣାରେ ମୁମ୍ୱାଇ ପୋଲିସକୁ ବଡ଼ ସଫଳତା । ହତ୍ୟାକରୀ ଦାଉଦ ଶେଖକୁ କର୍ଣ୍ଣାଟକର ଗୁଲବର୍ଗାରୁ ଧରିଲା ମୁମ୍ୱାଇ ପୋଲିସ । ସୂଚନା ଅନୁଯାୟୀ, ଯଶଶ୍ରୀ ହତ୍ୟା ଘଟଣାର ଅପରାଧୀକୁ ଧରିବା ପାଇଁ ୪ଟି ଟିମ୍ ପ୍ରସ୍ତୁତ କରିଥିଲା ପୋଲିସ । ଉରଣ ପୋଲିସର ୨ଟି ଟିମ୍ କର୍ଣ୍ଣାଟକରେ ଏବଂ ଆଉ ୨ଟି ଟିମ୍ ମହାରାଷ୍ଟ୍ରରେ ଅପରାଧୀକୁ ଖୋଜିବା ପାଇଁ ଯାଇଥିଲେ । ଏହା ଭିତରେ ଉରଣ ପୋଲିସ ମୋହସିନ ନାମକ ବ୍ୟକ୍ତିକୁ ହେପାଜତରେ ଆଣିଥିଲା । ପୋଲିସ ସୂତ୍ରାନୁଯାୟୀ, ମୋହସିନ ଏବଂ ଯଶଶ୍ରୀ ମଧ୍ୟରେ ପ୍ରେମ ସମ୍ପର୍କ ଥିଲା, ଯାହାକୁ ନେଇ ଦାଉଦ ଶେଖ୍ ଏବଂ ଯଶଶ୍ରୀ ମଧ୍ୟରେ ସର୍ବଦା କଳହ ଲାଗି ରହୁଥିଲା ।
ସୂଚନା ଅନୁଯାୟୀ, ମୁମ୍ୱାଇର ୨୦ ବର୍ଷୀୟା ଯଶଶ୍ରୀ ସିନ୍ଧେଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଥିବା ଘଟଣା ସାମ୍ନାକୁ ଆସିଥିଲା । ଗୁରୁବାରରୁ ନିଖୋଜ ଥିବା ଯଶଶ୍ରୀଙ୍କ ମୃତଦେହ ଶୁକ୍ରବାର କର୍ଣ୍ଣାଟକର ଏକ ପେଟ୍ରୋଲ ପମ୍ପ ନିକଟରୁ ଅତ୍ୟନ୍ତ ଖରାପ ଅବସ୍ଥାରେ ଜବତ କରାଯାଇଥିଲା । ତାଙ୍କ ଶରୀରର ବିଭିନ୍ନ ସ୍ଥାନରେ ଛୁରୀ ମରାଯାଇଥିବା ଜଣାପଡିଥିଲା । ଯାହା ପରେ ତୁରନ୍ତ ଘଟଣାର ତଦନ୍ତ ଆରମ୍ଭ କରିଦେଇଥିଲା ମୁମ୍ୱାଇ ପୋଲିସ । ସିସିଟିଭିରେ କଏଦ ଭିଡିଓ ଆଧାରରେ ମଙ୍ଗଳବାର ହତ୍ୟାକାରୀ ଦାଉଦ ଶେଖକୁ ଗିରଫ କରିଛି ପୋଲିସ ।
ଓଡ଼ିଶା କ୍ଯାଡର ଆଇପିଏସ ଅଫିସର ରାଜେଶ ପଣ୍ଡିତ ସସପେଣ୍ଡ
ଭୁବନେଶ୍ୱର : ନିଲମ୍ବିତ ହେଲେ ଆଇପିଏସ ଅଫିସର ପଣ୍ଡିତ ରାଜେଶ । DIG ଭାବେ ଫାୟାର ସର୍ଭିସ ଓ ହୋମଗାର୍ଡ ଦାୟିତ୍ୱରେ ଥିଲେ ରାଜେଶ ପଣ୍ଡିତ । ୨୦୦୭ ବ୍ୟାଚର ଏହି ଆଇପିଏସଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯାଇଛି ।କ୍ୟାପିଟାଲ ଥାନା ଅଧିନରେ ଗତ ୨୭ ତାରିଖ ରାତିରେ ଘଟିଥିବା ଏକ ଘଟଣାକୁ ନେଇ ତାଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ନେଇଛି ଗୃହ ବିଭାଗ। ଏ ନେଇ ଗୃହ ବିଭାଗ ନିକଟରେ ତଦନ୍ତ ରିପୋର୍ଟ ଦାଖଲ କରିଥିଲେ ଡିଜିପି। ନିଲମ୍ବନ ଅବଧି ସମୟରେ ହେଡ କ୍ବାର୍ଟର ଛାଡି ବିନା ଅନୁମତିରେ ବାହାରକୁ ନଯିବା ପାଇଁ ନିର୍ଦ୍ଦେଶ ଦେଇଛି ଗୃହ ବିଭାଗ।
ପୁଣି କେନ୍ଦ୍ରାପଡ଼ାରେ ଜାଲ ସାର୍ଟିଫିକେଟ ଦେଇ ଚାକିରି
କେନ୍ଦ୍ରାପଡ଼ା : ପୁଣି କେନ୍ଦ୍ରାପଡ଼ାରେ ଜାଲ ସାର୍ଟିଫିକେଟ ଦେଇ ଚାକିରି। ନକଲି ଦଶମ ସାର୍ଟିଫିକେଟ ଦେଇ ସିଆରପି ଚାକିରି କରିଥିବା ମହିଳାଙ୍କ ନାଁରେ ବିଡ଼ିଓଙ୍କୁ ଅଭିଯୋଗ। ଡେରାବିଶ ବିଡ଼ିଓଙ୍କ ତଦନ୍ତ ଜାରି। ଜଅଁରା ବାରିମୂଳ ପଞ୍ଚାୟତ ଗରାମ ଗାଁର ଜଣେ ସିଆରପି ଚାକିରି କରୁଥିବା ମହିଳା ରାଜଶ୍ରୀ ପରିଜା ଇଣ୍ଟରଭ୍ୟୁ ଦେବା ବେଳେ ନକଲି ସ୍କୁଲ ସାର୍ଟିଫିକେଟ୍ ଦେଇ ଚାକିରି ପାଇଥିଲେ। ବିଡ଼ିଓ ଅଭିଯୋଗ ଗ୍ରହଣ କରି କେନ୍ଦ୍ରାପଡ଼ା ଜିଲ୍ଲପାଳଙ୍କ ନିର୍ଦ୍ଦେଶରେ ତଦନ୍ତ ଆରମ୍ଭ କରି ନିଶ୍ଚିନ୍ତ କୋଇଲି ବିଇଓଙ୍କୁ ଚିଠି ଲେଖିଛନ୍ତି। ତଦନ୍ତ ରିପୋର୍ଟ ଆସିବା ପରେ ଜାଲିଆତି କରି ଚାକିରି ପାଇଥିବା ରାଜଶ୍ରୀ ପରିଜାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ଡେରାବିଶ ବିଡ଼ିଓ କହିଛନ୍ତି।
ଚନ୍ଦକା ଅଭୟାରଣ୍ୟରେ CRPF ଯବାନଙ୍କ କମ୍ବିଂ ଅପରେସନ ଆରମ୍ଭ
ଭୁବନେଶ୍ୱର : ଶିକାରୀ ଓ କାଠ ମାଫିଆମୁକ୍ତ ହେବ ଚନ୍ଦକା-ଡମପଡ଼ା ଅଭୟାରଣ୍ୟ । ଆଜିଠୁ ଅଭୟାରଣ୍ୟ ଭିତରେ ଆରମ୍ଭ ହେବ CRPF ଯବାନଙ୍କ ମିଳିତ କମ୍ବିଂ ଅପରେସନ । କମ୍ୱିଂରେ ସାମିଲ ହେବେ ୪୫୦ CRPF ଯବାନ । ୧୨ ଦିନ ଧରି ଚାଲିବ ଜଙ୍ଗଲ ଭିତରେ ଟ୍ରେନିଂ। ଜଙ୍ଗଲ ବିଭାଗର ଅଧିକାରୀ ବି ସାମିଲ ହେବେ। ସିଆରପିଏଫ ର ଟ୍ରେନିଂ ସହିତ କମ୍ବିଂଗ ବି ଚାଲିବ। ଜଙ୍ଗଲ ଓ ବନ୍ୟାଜନ୍ତୁର ସୁରକ୍ଷା ସାଙ୍ଗକୁ କାଠ ମାଫିଆ ଓ ବନ୍ୟଜନ୍ତୁ ଶିକାରୀଙ୍କ ପାଇଁ ସତର୍କ ବାର୍ତା ଦେବାକୁ ଏଭଳି ପ୍ରୟାସ ଓଡ଼ିଶାରେ ପ୍ରଥମ।
କେରଳର ଓ୍ବାୟାନାଡରେ ଭୁସ୍ଖଳନ, ମୃତ୍ୟୁ ସଂଖ୍ୟା ୪୭କୁ ବୃଦ୍ଧି ; ମାଟି ତଳେ ଫସି ରହିଛନ୍ତି ଶତାଧିକ
ନନ୍ଦିଘୋଷ ବ୍ୟୁରାେ : କେରଳର ଓ୍ବାୟାନାଡ ଜିଲ୍ଲା ମେପ୍ପଡି ନିକଟସ୍ଥ ପାହାଡିଆ ଅଞ୍ଚଳରେ ଭୁସ୍ଖଳନ । କିଛି ସମୟ ବ୍ୟବଧାନରେ ଏକାଧିକ ସ୍ଥାନରେ ଭୁସ୍ଖଳନ ଘଟିଛି । ଏଥିରେ ୪୭ ଜଣଙ୍କ ମୃତ୍ୟୁ ହୋଇଥିବା ବେଳେ ଏବେବି ୧୦୦ରୁ ଅଧିକ ମାଟି ତଳେ ଫସିରହିଥିବା ନେଇ ଆଶଙ୍କା କରାଯାଉଛି । ସେପଟେ ପାଖାପାଖି ୪୦୦ ଘର ମାଟିରେ ପୋତି ଯାଇଥିବାରୁ ଅନେକ ପରିବାର ବେଘର ହୋଇଯାଇଛନ୍ତି । ପ୍ରବଳ ବର୍ଷା ଯୋଗୁଁ ମାଟି ଧସିଯାଇଥିବା ବେଳେ ଉଦ୍ଧାର କାର୍ଯ୍ୟ ଜାରି ରହିଛି ।
ସୂଚନା ଅନୁଯାୟୀ ଆଜି ଭୋର ସମୟରେ କେରଳର ଓ୍ବାୟାନାଡ ଜିଲ୍ଲାର ପାହାଡିଆ ଅଞ୍ଚଳରେ ପ୍ରବଳ ବର୍ଷା ଜାରି ରହିଥିବା ବେଳେ ଏକାଧିକ ସ୍ଥାନରେ ଭୂସ୍ଖଳନ ହୋଇଥିଲା । ଉଦ୍ଧାର କାର୍ଯ୍ୟରେ KSDMA ଓ NDRF ନିୟୋଜିତ ଅଛନ୍ତି। ସେହିପରି ଉଦ୍ଧାର କାର୍ଯ୍ୟ ପାଇଁ MI 17 ଓ ALH ହେଲିକପ୍ଟରକୁ ଘଟଣା ସ୍ଥଳକୁ ପଠାଯାଇଛି। ସେପଟେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଥିବା ବେଳେ ପ୍ରବଳ ବର୍ଷା ଯୋଗୁ ଉଦ୍ଧାର କାର୍ଯ୍ୟ ବାଧା ସୃଷ୍ଟି ହେଉଛି ।
ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେରଳ ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି ଏବଂ ଯଥା ସମ୍ଭବ ସହାୟତା ପାଇଁ ପ୍ରତିଶ୍ରୁତି ମଧ୍ୟ ଦେଇଛନ୍ତି । ଏଥି ସହିତ ପିଏମଓ ଅଫିସରଙ୍କ ପକ୍ଷରୁ ମୃତକଙ୍କ ପରିବାରଙ୍କୁ ଅନୁକମ୍ପା ରାଶି ପ୍ରଦାନ କରିବାକୁ ମଧ୍ୟ ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ରାଷ୍ଟ୍ରୀୟ ସହାୟତା କୋଷରୁ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଅନୁକମ୍ପା ରାଶି ଏବଂ ଆହତଙ୍କୁ ୫୦ ହଜାର ଟଙ୍କା ସହାୟତା ରାଶି ପ୍ରଦାନ କରିବାକୁ ଘୋଷଣା କରାଯାଇଛି ।
କେରଳ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ (KSDMA)ସୂଚନା ଅନୁଯାୟୀ, ଭୂସ୍ଖଳନ ନେଇ ଖବର ପାଇବା ପରେ ତୁରନ୍ତ ଅଗ୍ନିଶମ ବାହିନୀ ଓ ଏନଡିଆରଏଫ ଟିମ ପ୍ରଭାବିତ ଅଞ୍ଚଳରେ ପହଞ୍ଚି ସେଠାରେ ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି । ଭୂସ୍ଖଳନରେ ଆହତ ୫୦ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ପ୍ରବଳ ବର୍ଷା ସମୟରେ ଭୋର ପ୍ରାୟ ୧ଟାରେ ମୁଣ୍ଡାକ୍କାଇ ଟାଉନରେ ପ୍ରଥମ ଭୂସ୍ଖଳନ ଘଟିଥିଲା। ମୁଣ୍ଡାକ୍କାଇରେ ଉଦ୍ଧାର କାର୍ଯ୍ୟ ଚାଲିଥିଲା ବେଳେ ସକାଳ ପ୍ରାୟ ୪ଟାରେ ଚୁରଲ ମାଲାର ଏକ ସ୍କୁଲ ନିକଟରେ ଦ୍ୱିତୀୟ ଭୂସ୍ଖଳନ ଘଟିଲା।ବର୍ତ୍ତମାନ ସମସ୍ତ ଅଞ୍ଚଳରେ ଉଦ୍ଧାର କାର୍ଯ୍ୟ ଜାରିରହିଛି।
କେରଳ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (ସିଏମଓ) କହିଛି ଯେ, ହେଲ୍ପଲାଇନ ନମ୍ବର ଜାରି କରାଯାଇଛି ଏବଂ ଉଦ୍ଧାର କାର୍ଯ୍ୟରେ ବାୟୁସେନା ନିୟୋଜିତ କରାଯାଇଛି। ସିଏମଓ କହିଛନ୍ତି, ପ୍ରବଳ ବର୍ଷା ପରେ ୱାଏନାଡରେ ଭୂସ୍ଖଳନ ଘଟିଛି। ସ୍ୱାସ୍ଥ୍ୟ ବିଭାଗ- ଜାତୀୟ ସ୍ୱାସ୍ଥ୍ୟ ମିଶନ ନିୟନ୍ତ୍ରଣ କକ୍ଷ ଖୋଲିଛି ଏବଂ ଜରୁରୀକାଳୀନ ସହାୟତା ପାଇଁ ହେଲପଲାଇନ ନମ୍ବର ଜାରି କରାଯାଇଛି।
ହାୱାଡା-ମୁମ୍ବାଇ ଏକ୍ସପ୍ରେସ ଲାଇନଚ୍ଯୁତ, ୨ ଯାତ୍ରୀ ମୃତ ଓ ଦେଢଶହରୁ ଅଧିକ ଆହତ
ନନ୍ଦିଘୋଷ ବ୍ୟୁରୋ : ହାୱଡା-ମୁମ୍ବାଇ ଏକ୍ସପ୍ରେସ ଟ୍ରେନ ଲାଇନଚ୍ଯୁତ। ଝାଡ଼ଖଣ୍ଡର ବାରାବମ୍ବୋ ନିକଟରେ ଲାଇନଚ୍ଯୁତ ହୋଇଛି ହାୱଡା ମୁମ୍ବାଇ ଏକ୍ସପ୍ରେସ। ଟ୍ରେନର ୧୮ଟି ବଗି ଲାଇନଚ୍ଯୁତ ହୋଇଛି। ଏକ ମାଲବାହୀ ଗାଡ଼ିକୁ ଧକ୍କା ଦେଇ ଟ୍ରେନ ଲାଇନଚ୍ଯୁତ ହୋଇଥିବା ଜଣାପଜିଛି। ଦୁର୍ଘଟଣାରେ ୨ ଜଣଙ୍କ ମୃତ୍ଯୁ ହୋଇଥିବାବେଳେ ୧୫୦ରୁ ଅଧିକ ଆହତ ହୋଇଥିବା ସୂଚନା ମିଳିଛି। ଭୋର ପ୍ରାୟ ୩ଟା ୪୫ ମିନିଟ ସମୟରେ ଲାଇନଚ୍ଯୁତ ହୋଇଥିଲା ଏହି ଟ୍ରେନ। ଆହତଙ୍କୁ ଉଦ୍ଧାର ଲାଗି ଘଟଣାସ୍ଥଳରେ ଏକାଧିକ ଆମ୍ବୁଲାନ୍ସ ପହଞ୍ଚିବାରେ ଲାଗିଛନ୍ତି। ଆହତଙ୍କୁ ଉଦ୍ଧାର କରି ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି। ଘଟଣାସ୍ଥଳ ଅଭିମୁଖେ ଏନଡିଆରଏଫର ଟିମ ବାହାରିଛି। ଟ୍ରେନ ଲାଇନଚ୍ଯୁତ ନେଇ ରେଲୱେ ପକ୍ଷରୁ ହେଲପଲାଇନ ନମ୍ବର ଜାରି ହୋଇଛି।
ଟାଟାନଗର ହେଲ୍ପଲାଇନ ନମ୍ବର- ୦୬୫୭୨୨୯୦୩୨୪
ଚକ୍ରଧରପୁର -୦୬୫୮୭୨୩୮୦୭୨
ରାଉରକେଲା – ୦୬୬୧୨୫୦୧୦୭୨
ହାୱଡା – ୯୪୩୩୩୫୭୯୨୦
ରାଞ୍ଚି- ୦୬୫୧୨୭୮୭୧୧୫
ଦଶମ ଶ୍ରେଣୀ ଛାତ୍ରର କଟୁରୀ ଚୋଟରେ ନବମ ଶ୍ରେଣୀ ଛାତ୍ର ଆହତ
ଅନୁଗୁଳ : ଦଶମ ଶ୍ରେଣୀ ଛାତ୍ରର କଟୁରୀ ଚୋଟରେ ନବମ ଶ୍ରେଣୀ ଛାତ୍ର ଆହତ । ସ୍କୁଲ ଛୁଟି ବେଳେ ସାଇକେଲ ଷ୍ଟାଣ୍ଡରେ ସାଇକେଲ ରଖିବାକୁ ଗଣ୍ଡଗୋଳ । ଅନୁଗୁଳ ସରକାରୀ ଉଚ୍ଚ ବିଦ୍ୟାଳୟରେ ରାଧାରମଣପଡା ଅଞ୍ଚଳର ଜଣେ ନବମ ଶ୍ରେଣୀର ଛାତ୍ର ଓ ହାତିଶାଳପଡା ଅଂଚଳର ଦଶମ ଶ୍ରେଣୀରେ ପଢ଼ୁଥିବା ଜଣେ ଛାତ୍ରଙ୍କ ମଧ୍ୟରେ କିଛିଦିନ ପୂର୍ବରୁ ସାଇକେଲ ଷ୍ଟାଣ୍ଡରେ ସାଇକେଲ ରଖିବାକୁ ନେଇ ଝଗଡା ହୋଇଥିଲା ।
ଆଜି ସ୍କୁଲ ଛୁଟି ହେବା ପରେ ପରେ ସ୍କୁଲ ଫାଟକ ଆଗରେ ନବମ ଶ୍ରେଣୀ ଛାତ୍ର ଜଣଙ୍କ ଘରକୁ ଯାଉଥିବା ବେଳେ ତାଙ୍କୁ ହଠାତ୍ ଏକ ମାଂସ କଟା କଟୁରୀରେ ଦଶମ ଶ୍ରେଣୀ ଛାତ୍ର ଜଣକ ଆକ୍ରମଣ କରିଥିଲା । ମୁଣ୍ଡରେ କଟୁରୀ ଚୋଟ ଯୋଗୁଁ ଆହତ ଛାତ୍ରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ପରିବାର ଲୋକ ଏନେଇ ଅନୁଗୁଳ ଥାନାରେ ଲିଖିତ ଅଭିଯୋଗ କରିଛନ୍ତି ।