ଭୁଶୁଡୁଛି ଲାଲ ଦୁର୍ଗ॥ ଛତିଶଗଡ ଗରିଆବନ୍ଧରେ ୯ ନକ୍ସଲଙ୍କ ଆତ୍ମ ସମର୍ପଣ। ଅସ୍ତ୍ରଶସ୍ତ୍ର ସହ ଗରିଆବନ୍ଧ ପୋଲିସ ନିକଟରେ ଆତ୍ମ ସମର୍ପଣ କରିଛନ୍ତି ନକ୍ସଲ। ଏମାନଙ୍କ ନାଁରେ ମୋଟ ୪୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ଥିଲା। ୩ଟି AK-୪୭, ଦୁଇଟି SLR ଓ ଗୋଟିଏ ୩୦୩-କାଲିବର ରାଇଫଲ୍ ସମେତ ଛଅଟି ସ୍ୱୟଂଚାଳିତ ଅସ୍ତ୍ରଶସ୍ତ୍ର ଜବତ ହୋଇଛି । ଛତିଶଗଡ଼ର ଗରିଆବନ୍ଧ ଜିଲ୍ଲାରେ ମାଓ ବିରୋଧୀ ଅଭିଯାନରେ ଏକ ବଡ଼ ସଫଳତା ମିଳିଛି। ସିନାପାଲି ଏବଂ SDK କ୍ଷେତ୍ର କମିଟିରେ ସକ୍ରିୟ ଥିଲେ ଏହି ନଅ ଜଣ ହାର୍ଡକୋର ନକ୍ସଲ। ଆତ୍ମସମର୍ପଣ କରିଥିବା ନକ୍ସଲଙ୍କ ମଧ୍ୟରେ ଅଞ୍ଜୁ ଓରଫ କବିତା, ସୋନି ଓରଫ ବୁଦ୍ରି ଓ ଡମରୁ ଅଛନ୍ତି। ଏମାନଙ୍କ ନାଁରେ ୮ ଲକ୍ଷ ପୁରସ୍କାର ରାଶି ଥିଲା।ସମସ୍ତଙ୍କୁ ପୁନର୍ବାସ ଯୋଜନାରେ ଥଇଥାନ କରାଯିବ।
ସୁନ୍ଦରଗଡ଼ ଜିଲ୍ଲା ଜଲଦା ନିକଟରେ ଦୁର୍ଘଟଣାଗ୍ରସ୍ତ ହୋଇଥିବା ବିମାନର ଅଂଶବିଶେଷ ଯିବ କାନାଡ଼ା
ସୁନ୍ଦରଗଡ଼ ଜିଲ୍ଲା ଜଲଦା ନିକଟରେ ଦୁର୍ଘଟଣାଗ୍ରସ୍ତ ହୋଇଥିବାର ବିମାନର ଅଂଶବିଶେଷ ଯିବ କାନାଡ଼ା। ଏଥିପାଇଁ କାନାଡ଼ାରୁ ଆସୁଛି ସ୍ଵତନ୍ତ୍ର କଣ୍ଟେନର। ରାଉରକେଲାରେ ଏହି କଣ୍ଟେନର ପହଞ୍ଚିଵା ପରେ ଆସନ୍ତା ୨୪ ତାରିଖରେ ତାକୁ କଣ୍ଟେନରରେ କାନାଡା ନିଆଯିବ। ଗୋଟିଏ କଣ୍ଟେନରରେ ଇଞ୍ଜିନ ଓ ଆଉ ଏକ କଣ୍ଟେନରରେ ପାର୍ଟସ ନିଆଯିବ। ବର୍ତ୍ତମାନ ଇଣ୍ଡିଆ ଓ୍ଵାନ ଏୟାର ର ୪ ଜଣ ଇଞ୍ଜିନିୟର ଦୁର୍ଘଟଣା ସ୍ଥଳରେ ପହଞ୍ଚି ବିମାନ ଇଞ୍ଜିନ, ଯନ୍ତ୍ରାଂଶ ଓ ପାର୍ଟସ ଖୋଲୁଛନ୍ତି। ଗତ ୧୦ ତାରିଖରେ ଭୁବନେଶ୍ଵରରୁ ରାଉରକେଲା ଅଭିମୁଖେ ଯାଉଥିବାବେଳେ ବିମାନ VT-KSS-17-102 ଦୁର୍ଘଟଣାଗ୍ରସ୍ତ ହୋଇଥିଲା ବିମାନରେ ଦୁଇ ପାଇଲଟଙ୍କ ସମେତ ୬ ଜଣ ଯାତ୍ରୀ ଥିଲେ । ରାଉରକେଲା ପହଞ୍ଚିବାକୁ ଥିଲା ଆଉ ମାତ୍ର ୧୦ କିଲୋମିଟର ଥିବା ବେଳେ ବିମାନରେ ଯାନ୍ତ୍ରୀକ ତୃଟି ଦେଖାଦେଇଥିଲା । ପାଇଲଟ ବିମାନର ଜରୁରୀ ଅବତରଣ କରିଥିଲେ। ..ସେପଟେ ସୁସ୍ଥ ହେଲେ ପାଇଲଟ ନବୀନ କାଡ଼ଙ୍ଗା। ସେ ଜୟ ପ୍ରକାଶ ହସ୍ପିଟାଲର ଚିକିତ୍ସିତ ହେଉଥିଲେ। ଆଜି ଡିସଚାର୍ଜ ହୋଇ ହସ୍ପିଟାଲରୁ ଘରକୁ ଯିବେ।
ନିଶା ବେପାରର ହବ୍ ପାଲଟିଛି ଓଡ଼ିଶା: ଗୋଆରୁ ଓଡିଶାକୁ ଲମ୍ବିଛି ଚେର
ନିଶା ବେପାରର ହବ୍ ପାଲଟିଛି ଓଡ଼ିଶା। ଗୋଆରୁ ଓଡିଶାକୁ ଲମ୍ବିଛି ଚେର । ଚାଲାଣ ହେଉଛି ଦାମୀ ନିଶା ଦ୍ରବ୍ୟ । ଖବର ପାଇବା ପରେ ବ୍ୟାପକ ରେଡ଼ କଲା ଇଡି । ଆନ୍ତର୍ଜାତୀୟ ନିଶା କାରବାରରେ ମିଳିଥିଲା ଓଡିଶା ଲିଙ୍କ । ଚଢ଼ାଉ ବେଳେ ଜବତ ହୋଇଛି ବିପୁଳ ନିଶା ସାମଗ୍ରୀ। ମନି ଲଣ୍ଡରିଂ ମାମଲାର ତଦନ୍ତ କରିବା ବେଳେ ଏହାର ସୁରାଗ ମିଳିଥିଲା। ଓଡ଼ିଶା ସମେତ ୭ ରାଜ୍ୟର ୨୬ ଟି ସ୍ଥାନରେ ଚଢ଼ାଉ ହୋଇଛି । ନଗଦ ୩ କୋଟି ଟଙ୍କା ସହ ଜବତ ହୋଇଛି ବିପୁଳ ନିଶାଦ୍ରବ୍ୟ। ମାଫିଆଙ୍କୁ ଧରିବାକୁ ଓ ସେମାନଙ୍କ ସମ୍ପତ୍ତି ବାଜ୍ୟାପ୍ତି ନେଇ ପ୍ରୟାସ ଚାଲିଛି। ସେପଟେ ନିଶା ମାଫିଆଙ୍କ ପାଇଁ ଗଳା ବାଟ ପାଲଟିଛି ଭୁବନେଶ୍ୱର ବିମାନବନ୍ଦର। ଅନ୍ୟ ସ୍ଥାନକୁ ନିଶାଦ୍ରବ୍ୟ ଚାଲାଣ ହେଉଥିଲେ ମଧ୍ୟ ଭାୟା ପାଲଟିଛି ଭୁବନେଶ୍ୱର ବିମାନବନ୍ଦର।
ଭୁବନେଶ୍ଵର ୧ ନମ୍ଵର ହାଟରେ ପୁଣି ଅଗ୍ନିକାଣ୍ଡ: ଜଳିଗଲା ୪୦ରୁ ଅଧିକ ଦୋକାନ
ଭୁବନେଶ୍ଵର ୧ ନମ୍ଵର ହାଟରେ ପୁଣି ଅଗ୍ନିକାଣ୍ଡ। ଗତ ରାତିରେ ନିଆଁ ଲାଗି ୪୦ରୁ ଅଧିକ ଦୋକାନ ଜଳି ଯାଇଛି। ୧ କୋଟିରୁ ଅଧିକ ଟଙ୍କାର ସଂପତ୍ତି ପୋଡ଼ି ପାଉଁଶ। ସୂଚନା ଅନୁସାରେ ରାତି ପ୍ରାୟ ଦେଢ଼ ଟାରେ ନିଆଁ ଲାଗିଥିଲା। ଗ୍ୟାସ ସିଲିଣ୍ଡରରୁ ଏହା ଆରମ୍ଭ ହୋଇଥିବା କୁହାଯାଉଛି। ଅଗ୍ନିଶମ ବାହିନୀ ଆସି ନିଆଁକୁ ଆୟତ୍ତ କରିଛି। ତଥାପି ୪୦ରୁ ଅଧିକ ଦୋକାନ ପୁରା ଜଳି ପୋଡ଼ି ପାଉଁଶ ହୋଇଛି। ଆଜି ସକାଳେ ବିଏମସି ମେୟର ସୁଲୋଚନା ଦାସ ଓ ବିଏମସି କମିଶନର ଚଞ୍ଚଳ ରାଣା ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି। ଭୁବନେଶ୍ଵର ୧ ନମ୍ଵର ହାଟରେ ବାରମ୍ଵାର ନିଆଁ ଲାଗୁଛି। ଦୋକାନୀମାନେ ଏସଓପି ପାଳନ କରୁନଥିବା କୁହାଯାଇଛି। ତା ସହିତ ଦରକାରଠାରୁ ଅଧିକ ପଲିଥିନ ରଖୁଛନ୍ତି। ଜରି ପାଲ ଟାଣି ରାସ୍ତାକୁ ଢାଙ୍କି ଦେଉଥିବାରୁ ମଧ୍ୟ ସମସ୍ୟା ହେଉଥିବା କୁହାଯାଇଛି।
ଖୋର୍ଦ୍ଧା ପରିଛଳ ଜାମୁସାହି ଗୁଳିକାଣ୍ଡ ଘଟଣା ; ଦୁର୍ବୃତ୍ତ ଏବେ ବି ଫେରାର
ନନ୍ଦିଘୋଷ ବ୍ୟୁରୋ : ଖୋର୍ଦ୍ଧା ପରିଛଳ ଜାମୁସାହି ଗୁଳିକାଣ୍ଡ ଘଟଣାରେ ଦୁର୍ବୃତ୍ତ ଏବେ ବି ଫେରାର। ବିଭିନ୍ନ ଦିଗକୁ ନେଇ ତଦନ୍ତ ଜାରି ରହିଛି । ଗତକାଲି ରାତିରେ ବାସୁଦେବ ପରିଡ଼ାଙ୍କୁ ଗୁଳି କରି ହତ୍ୟା କରିଥିଲେ ଅଭିଯୁକ୍ତ । ଖୋର୍ଦ୍ଧା ମେଡିକାଲରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ଘଟଣା ସ୍ଥଳରେ ଖୋକା ପଡ଼ିଛି । ଦୁର୍ବୃତ୍ତ ମାନେ ଏକ ବାଇକରେ ଆସି ଫାୟରିଂ କରି ଫେରାର ହୋଇଯାଇଛନ୍ତି । ଘଟଣା ସ୍ଥଳରେ ବାଇକ ଛାଡ଼ି ଚମ୍ପଟ ମାରିଛନ୍ତି ଅଭିଯୁକ୍ତ । ବେଆଇନ ଖଣି କାରବାରକୁ ନେଇ ଗୁଳିମାଡ଼ ହୋଇଥିବା ସୂଚନା ରହିଛି । …. ଗତ ସନ୍ଧ୍ୟା ରେ ସେ ଶୌଚ ହେବାକୁ ଯାଇଥିବା ବେଳେ ଚାରି ଜଣ ଦୁବୃର୍ତ୍ତ ଦୁଇଟି ବାଇକ୍ ରେ ଆସି ଅତି ନିକଟ ରୁ ଫାୟାରିଂ କରିଥିଲେ। ସ୍ଥାନୀୟ ଲୋକ ଙ୍କ ସହାୟତାରେ ବାସୁଦେବଙ୍କୁ ଖୋର୍ଦ୍ଧା ମେଡିକାଲ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କଲେ। ଘଟଣା ସ୍ଥଳ ରେ ଖୋକା ପଡ଼ିଛି। ଦୁର୍ବୃତ୍ତ ମାନେ ଏକ motorcycle ରେ ଆସି ଫାୟରିଂ କରି ଫେରାର ହୋଇଯାଇଛନ୍ତି। ଘଟଣା ସ୍ଥଳ ରେ ବୁଲେଟ ମୋଟର ସାଇକେଲ ଛାଡ଼ି ଯାଇଛନ୍ତି। ପୋଲିସ ର ତଦନ୍ତ ଜାରି। ପୋଲିସ ଅପରାଧୀ ଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ରେଡ କରିଛି।
କଟକରେ ରାସ୍ତା ଉପରେ ଲହଡ଼ି ମାରୁଛି ନର୍ଦ୍ଦମା ପାଣି ; ଦୁର୍ଦ୍ଦଶାରେ ୱାର୍ଡ ନଂ ୧୦ ଓ ୧୨ ବାସିନ୍ଦା
ନନ୍ଦିଘୋଷ ବ୍ୟୁରୋ : ବିନା ବର୍ଷାରେ କଟକରେ ରାସ୍ତା ଉପରେ ଲହଡ଼ି ମାରୁଛି ନର୍ଦ୍ଦମା ପାଣି । ଦୁର୍ଦ୍ଦଶାରେ ୱାର୍ଡ ନଂ ୧୦ ଓ ୧୨ ବାସିନ୍ଦା । ଯିବା ଆସିବା କରିବା ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ସ୍ଥାନୀୟ ଲୋକେ । ଗତ ଦୁଇ ମାସ ଧରି ଏହି ଅଞ୍ଚଳରେ ଡ୍ରେନ କାର୍ଯ୍ୟ ଜାରି ରହିଥିବା ବେଳେ ଏହାର ପରିଚାଳନାରେ ଗୁରୁତର ତ୍ରୁଟି ଦେଖାଦେଇଛି । ବିଭାଗୀୟ ଅବହେଳା ଯୋଗୁଁ ନର୍ଦ୍ଦମା ପାଣି ନିଷ୍କାସିତ ହୋଇ ନପାରି ରାସ୍ତାକୁ ମାଡ଼ି ଆସୁଛି । ଏହି ଦୁର୍ଗନ୍ଧମୟ ପରିବେଶ ମଧ୍ୟରେ ଛୋଟ ପିଲାମାନେ ସ୍କୁଲ ଯିବା ଆସିବା କରିବା ଏକପ୍ରକାର ବିପଜ୍ଜନକ ହୋଇପଡ଼ିଛି । ଜଣେ ସ୍କୁଲ ଛାତ୍ରୀ ନର୍ଦ୍ଦମାରେ ଭାରସାମ୍ୟ ହରାଇ ପଡ଼ି ଯାଇଥିଲେ । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ଦେଖା ଦେଇଥିଲା । ଏହି ସମସ୍ୟା ସମ୍ପର୍କରେ ସେମାନେ ବାରମ୍ବାର ସ୍ଥାନୀୟ ଜନପ୍ରତିନିଧି ଏବଂ ସିଏମସି କର୍ତ୍ତୃପକ୍ଷଙ୍କୁ ଗୁହାରି ଜଣାଇଛନ୍ତି । ମାତ୍ର ଦୁଇ ମାସ ବିତିଯାଇଥିଲେ ସୁଦ୍ଧା ପ୍ରଶାସନ ପକ୍ଷରୁ କୌଣସି ଠୋସ୍ ପଦକ୍ଷେପ ନିଆଯାଉ ନାହିଁ। କେବଳ ପ୍ରତିଶ୍ରୁତିରେ କାମ ଚାଲିଥିବା ବେଳେ ବାସ୍ତବରେ ସ୍ଥିତି ସଂଗୀନ ହେବାରେ ଲାଗିଛି। ଯଦି ଆଗାମୀ କିଛି ଦିନ ମଧ୍ୟରେ ଏହି ସମସ୍ୟାର ସ୍ଥାୟୀ ସମାଧାନ ନହୁଏ, ତେବେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବା ସହ ‘ରାସ୍ତା ରୋକ୍’ କରିବେ ବୋଲି ଚେତାବନୀ ଦେଇଛନ୍ତି ।
ଆଜିଠୁ ଚିଲିକାରେ ହେବ ଡ଼ଲଫିନ ଗଣନା ; ଗଣନା ୩ ଦିନ ପର୍ଯ୍ୟନ୍ତ ଚାଲିବ
ନନ୍ଦିଘୋଷ ବ୍ୟୁରୋ : ଆଜିଠୁ ଚିଲିକାରେ ହେବ ଡ଼ଲଫିନ ଗଣନା । ଗଣନା ୩ ଦିନ ଧରି ୨୨ ତାରିଖ ପର୍ଯ୍ୟନ୍ତ ଚାଲିବ । ଡ଼ଲଫିନ ଗଣନା ପାଇଁ ୨ଟି ରେଂଜର ୩ ସେକ୍ଟରରେ ରହିବେ ୧୮ ଟିମ । ସାତପଡ଼ାରେ ୮ଟି ଓ ବାଲୁଗାଁରେ ୧୦ଟି ଟିମ ଗଣନା କାର୍ଯ୍ୟରେ ନିୟୋଜିତ ହୋଇଥିବା ବେଳେ ପ୍ରତି ଟିମରେ ୫ରୁ ୬ଜଣଙ୍କ ସମେତ ଦୁଇ ଜଣ ଡଙ୍ଗା ଚାଳକ ରହିବେ । ଏହି ଗଣନାରେ ୧୩୦ ରୁ ଉର୍ଦ୍ଧ ବିଭାଗୀୟ କର୍ମଚାରୀ,ସ୍ବେଛାସେବୀ,ବମ୍ବେ ନାଚୁରାଲ ହିଷ୍ଟ୍ରି ଅଫ ସୋସାଇଟି,ଓଡିଶା ବନ୍ୟପ୍ରାଣୀ ବିଭାଗ କର୍ମଚାରୀ,ସିଡିଏ କର୍ମଚାରୀ,ଓୟୁଏଟି ଛାତ୍ରଛାତ୍ରୀ ଅଣସରକାରୀ ସଂସ୍ଥା କର୍ମଚାରୀ ମାନେ ସାମିଲ ହେବେ। ଏଥିସହିତ ସ୍ଥାନୀୟ ମତ୍ସ୍ୟଜୀବୀ ଓ ବିଭିନ୍ନ ଡଙ୍ଗା ଚାଳକ ସଂଘ ମାନେ ସହଯୋଗ କରିବେ। ମାନଚିତ୍ର, ଜିପିଏସ,ବାଇନାକୁଲାର,ସ୍ପୋଟିଂ ସ୍କୋପ,ୱାକିଟକି,ନୋଟ ବୁକ ବ୍ୟବହାର କରାଯିବ। ଗଣନା ସମୟରେ ଚିଲିକାରେ ମସ୍ୟଜୀବୀ ଓ ଯାତ୍ରୀବାହୀ ଡଙ୍ଗା ଚଳାଚଳ ସମ୍ପୂର୍ଣ୍ଣ ନିଷେଦ୍ଧ ରହିବ l
ନିୟନ୍ତ୍ରଣ ହେବ ବୁଲା କୁକୁରଙ୍କ ସଂଖ୍ୟା: ଅଣ୍ଟା ଭିଡ଼ିଲା ବ୍ରହ୍ମପୁର ମହାନଗର ନିଗମ
ନିୟନ୍ତ୍ରଣ ହେବ ବୁଲା କୁକୁରଙ୍କ ସଂଖ୍ୟା, କମିବ ଭୟ । ABC ପାଇଁ ଅଣ୍ଟା ଭିଡ଼ିଲା ବ୍ରହ୍ମପୁର ମହାନଗର ନିଗମ । ଦୀର୍ଘଦିନ ଧରି ଅଚଳ କେନାଲ ହୋଇଛି କାର୍ଯ୍ୟକ୍ଷମ । ଘରୋଇ ସଂସ୍ଥା ସହଯୋଗରେ ଆରମ୍ଭ ହେଲା ଆନିମଲ ବାର୍ଥ କଣ୍ଟ୍ରୋଲ । ବୁଲା କୁକୁରଙ୍କ ଦୌରାତ୍ମରେ ଆତଙ୍କିତ ସହରବାସୀ । ପ୍ରତିଦିନ କୁକୁର କାମୁଡ଼ା ସଂଖ୍ୟା ବଢୁଥିବାବେଳେ ଦୁର୍ଘଟଣା ବି ଘଟୁଛି । ଏନେଇ କୋର୍ଟ ନିର୍ଦ୍ଦେଶ ପରେ ଏବେ କୁକୁର ବନ୍ଧ୍ୟାକରଣ ପାଇଁ ଆରମ୍ଭ ହୋଇଛି ଯୋଜନା । ଦୀର୍ଘଦିନ ଧରି ଅଚଳ ହୋଇ ପଡ଼ିଥିବା କେନେଲକୁ ଏକ ଘରୋଇ ସଂସ୍ଥା ଜରିଆରେ ଆରମ୍ଭ କରାଯାଇଛି । ପ୍ରଶାସନର ଏହି ପଦକ୍ଷେପକୁ ସ୍ବାଗତ କରିଛନ୍ତି ସହରବାସୀ ।
୨୦୧୬ ରେ କୁକୁରଙ୍କ ବନ୍ଧ୍ୟାକରଣ ପାଇଁ ନିର୍ମିତ ହୋଇଥିଲା କେନେଲ ହାଉସ । କୁକୁର ବନ୍ଧ୍ୟାକରଣ ପାଇଁ କର୍ମଚାରୀ ଓ ପ୍ରାଣୀ ବିଶେଷଜ୍ଞଙ୍କ ଅଭାବ ଯୋଗୁଁ କାର୍ଯ୍ୟକ୍ରମ ଆରମ୍ଭ ହୋଇ ପାରିନଥିଲା । ତେବେ ପୁଣି ଏବେ ନିର୍ମାଣ ହୋଇଥିବା ଗୃହକୁ ପୁନରୁଦ୍ଧାର କରିଛି । ଆବଶ୍ୟକୀୟ ସରଞ୍ଜାମ ପଶୁ ଚିକିତ୍ସାଳୟକୁ ପ୍ରଦାନ କରାଯାଇଛି। ବେଙ୍ଗଳୁରୁର ଘରୋଇ ସଂସ୍ଥା ଆଶ୍ରାକୁ ଏହାର ଦାୟିତ୍ୱ ଦିଆଯାଇଛି । ସଂପୃକ୍ତ ସଂସ୍ଥା ବୁଲା କୁକୁର ଧରି ଅସ୍ତ୍ରୋପଚାର କରିବା ପରେ ଛାଡିବ । ଏହି କାର୍ଯ୍ୟକ୍ରମ ୬ ମାସ ଧରି ଚାଲିବାକୁ ଥିବା ବେଳେ ଦିନକୁ ପ୍ରାୟ ୨୦ଟି କୁକୁରର ବନ୍ଧ୍ୟାକରଣ କରାଯିବ। ଏଥିପାଇଁ ପ୍ରତି କୁରୁର ପିଛା ୧୮ ଶହ ଟଙ୍କା ଖର୍ଚ୍ଚ କରାଯିବ । ବନ୍ଧ୍ୟାକରଣ ହୋଇଥିବା କୁକୁରଙ୍କୁ ଚିହ୍ନଟ କରିବା ପାଇଁ ସେମାନଙ୍କ କାନରେ ସ୍ୱତନ୍ତ୍ର ଇୟର ନୋଜ୍ କରାଯିବ। ପ୍ରାଥମିକ ପର୍ଯ୍ୟାୟରେ ସହରେ ଥିବା ୧୧ ହଜାରରୁ ଅଧିକା କୁକୁର ରହିଥିବା ବେଳେ ପ୍ରତ୍ୟେକ ମାସରେ ପ୍ରାୟ ୫ରୁ ୬ ଶହ କୁକୁରଙ୍କ ବନ୍ଧ୍ୟାକରଣ କରାଯିବ । ବନ୍ଧ୍ୟାକରଣ କାର୍ଯ୍ୟକ୍ରମ ପୁଣି ଆରମ୍ଭ ହୋଇଥିବାରୁ ସହରରେ କୁକୁର କାମୁଡ଼ା ରୋଗୀଙ୍କ ସଂଖ୍ୟା କମିବା ଆଶା କରାଯାଇଛି ।
ଫାଟିଲା ଗ୍ୟାସ୍ ପାଇପ: ଦୀର୍ଘ ଦୁଇଘଣ୍ଟା ଧରି ମରାମତି ପରେ ସ୍ବାଭାବିକ ହେଲା ଗ୍ୟାସ ଯୋଗାଣ
ଡ୍ରୋଜର ମାଡ଼ରେ ଫାଟିଲା ଗ୍ୟାସ୍ ପାଇପ । ଗ୍ୟାସ୍ ଲିକ୍ ପରେ ଅଞ୍ଚଳରେ ଆତଙ୍କ । ସଙ୍କେତ ଥିବା ସତ୍ତ୍ବେ ଚାଲିଥିଲା ଖନନ । ତଦନ୍ତ ପାଇଁ କମ୍ପନୀ କର୍ତ୍ତୃପକ୍ଷଙ୍କ ଚେତାବନୀ । କଟକ ସିଡିଏ ୧୦ ନମ୍ବର ପରିବା ମାର୍କେଟ । ସମୟ ସକାଳ ପାଖାପାଖି ୧୦ଟା । ହଠାତ ମାଟିତଳୁ ଲିକ ହେବାକୁ ଲାଗିଲା ରନ୍ଧନ ଗ୍ୟାସ । ଗନ୍ଧ ଓ ଶବ୍ଦ ଯୋଗୁଁ ଆତଙ୍କରେ ଦୌଡ଼ିଲେ ଦୋକାନୀ ଓ ସ୍ଥାନୀୟ ଲୋକେ । ଖବର ପାଇ ତୁରନ୍ତ କମ୍ପାନୀ ଅଧିକାରୀ ପହଞ୍ଚି ଆରମ୍ଭ କରିଥିଲେ ତଦନ୍ତ । ଅଗ୍ନୀଶମ ଓ ଗ୍ୟାସ କମ୍ପାନୀ କର୍ମଚାରୀ କଣ୍ଟ୍ରୋଲ ରୁମରୁ ଗ୍ୟାସ ବନ୍ଦ କରି ଲାଗିଥିଲେ ମରାମତି କାମରେ ।
ଏକ ପେଟ୍ରୋଲ ପମ୍ପ ପରିସରରେ କମ୍ପାଉଣ୍ଡ ୱାଲ ନିର୍ମାଣ ପାଇଁ ଡ୍ରୋଜରରେ ଗଛକୁ ତାଡ଼ିବାବେଳେ ଘଟିଥିଲା ଏପରି ଘଟଣା । ମାଟିତଳେ ଯାଇଥିବା ଗ୍ୟାସ ପାଇପ ଡ୍ରୋଜର ମାଡ଼ରେ ଫାଟି ଯିବାରୁ ଅଞ୍ଚଳରେ ବ୍ୟାପୀ ଯାଇଥିଲା ଗ୍ୟାସ । ଦିର୍ଘ ଦୁଇଘଣ୍ଟା ଧରି ମରାମତି ପରେ ସ୍ବାଭାବିକ ହୋଇଥିଲା ଗ୍ଯାସ ଯୋଗାଣ । ଗାତ ଖୋଳିବା ସ୍ଥାନରେ ଗ୍ୟାସ ପାଇପଲାଇନ ଯାଇଥିବା ସଂଙ୍କେତ ଦିଆଯାଇଥିଲା । ଏହା ସତ୍ତ୍ବେ ସେଠାରେ କିପରି ନିର୍ମାଣ କାମ ଚାଲିଥିଲା ସେନେଇ ତଦନ୍ତ ହେବ ବୋଲି କହିଛନ୍ତି ଗ୍ୟାସ କମ୍ପାନୀ କର୍ତ୍ତୃପକ୍ଷ । ଘରକୁ ସୁଲଭ ମୂଲ୍ୟ ଓ ନିରନ୍ତର ଗ୍ୟାସ ଯୋଗାଇ ଦେବାକୁ ସହରରେ ଚାଲିଛି ଭୂତଳ ଗ୍ୟାସ ଯୋଗାଣ । ତେଣୁ ଏହାର ସୁରକ୍ଷାକୁ ପ୍ରାଥମିକତା ଦେବାକୁ ସାଧାରଣରେ ଦାବି ହୋଇଛି ।
ଛତିଶଗଡ଼ ଦାଦାଗିରି ଯୋଗୁଁ ଶଂକଟରେ ଓଡ଼ିଶାର ଜୀବନ ରେଖା
ମରୁଭୂମି ପାଲଟିବ କି ଚିରସ୍ରୋତା ମହାନଦୀ । ଛତିଶଗଡ଼ ଦାଦାଗିରି ଯୋଗୁଁ ଶଂକଟରେ ଓଡ଼ିଶାର ଜୀବନ ରେଖା । କମିବାରେ ଲାଗିଛି ହୀରାକୁଦର ଜଳସ୍ତର । ଜଳଭଣ୍ଡାରକୁ ଆସୁଛି ମାତ୍ର ୬୨୫ ଘନଫୁଟ ପାଣି । ପ୍ରମାଦ ଗଣିଲେଣି ନଈକୁଳିଆ ଗାଁ ଲୋକେ । ଭଲଭାବେ ଦେଖନ୍ତୁ । ଇଏ ହେଉଛି ହୀରାକୁଦ ଠାରୁ ମାତ୍ର ୧୦ କିଲୋମିଟର ଦୂରରୁ ମହାନଦୀର ଦୃଶ୍ୟ । ଯେଉଁଠି ଦିନେ ଅକାତ କାତ ପାଣି ଥିଲା ଆଜି ସେହି ସ୍ଥାନ ଲାଗୁଛି ଯେମିତି ମରୁଭୂମି । ଛତିଶଗଡ଼ର ମନମାନି ଯୋଗୁଁ ଆଜି ଶଂକଟରେ ଓଡ଼ିଶାର ଜୀବନ ରେଖା ଚିରସ୍ରୋତା ମହାନଦୀ । ଯାହାକୁ ନେଇ କ୍ଷୋଭ ପ୍ରକାଶ କରିଛନ୍ତି ବିଜେଡି ବରିଷ୍ଠ ଉପସଭାପତି ପ୍ରସନ୍ନ ଆଚାର୍ଯ୍ଯ । ସବୁବେଳେ ଏକପାଖିଆ ନିଷ୍ପତ୍ତି ନେଉଛି ଛତିଶଗଡ । ବିନା ଅନୁମତିରେ ପାଣି ରୋକୁଛି କିନ୍ତୁ ରାଜ୍ୟ ସରକାର ଓ କେନ୍ଦ୍ର ସରକାର ଚୁପ୍ କାହିଁକି ବୋଲି ସେ ପ୍ରଶ୍ନ କରିଛନ୍ତି ।
ମହାନଦୀ ଜଳ ବିବାଦ ସମାଧାନ ପାଇଁ ଗଠନ ହେଲା ମହାନଦୀ ଟ୍ରିବ୍ୟୁନାଲ । ହେଲେ ଆଜି ପର୍ଯ୍ୟନ୍ତ କୌଣସି ନିର୍ଯାସ ବାହାରି ପାରିଲା ନାହିଁ । ଅନ୍ୟପଟେ ତ୍ରିବ୍ୟୁନାଲ ଦେଇଥିବା ଗାଇଡ ଲାଇନକୁ ଛତିଗଡ ମାନୁନାହିଁ । ଅଣ ମୌସୁମୀ ସମୟରେ ସମସ୍ତ ଵ୍ୟାରେଜ ର ସମସ୍ତ ଗେଟ୍ ବନ୍ଦ୍ କରିଦେଇଥିବାରୁ ଡିସେମ୍ବର ମାସରୁ ଜୁନ ମାସ ପର୍ଯ୍ୟନ୍ତ ଓଡ଼ିଶାକୁ ବୁନ୍ଦାଏ ପାଣି ମିଳୁନାହିଁ । ଚଳିତବର୍ଷର ସବୁ ରେକର୍ଡ ଭାଙ୍ଗି ମାତ୍ର ୬୨୫ ଘନଫୁଟ ପାଣି ପ୍ରବେଶ କରୁଛି । ଯାହାକୁ ନେଇ ଚିନ୍ତାରେ ପଡିଲେଣି ନଈକୂଳିଆବାସୀ । ବର୍ତ୍ତମାନ ୧୦ ହଜାର ଘନଫୁଟ ପାଣି ଆବଶ୍ୟକ ରହିଥିବା ବେଳେ ମାତ୍ର ୬୧୫ ଘନଫୁଟ ପାଣି ଆସୁଥିବାରୁ ବଢ଼ିଛି ଶଂକଟ । ତେଣୁ ଉଭୟ ରାଜ୍ୟ ଆପୋଷ ବୁଝାମଣା ନକରିବା ପର୍ଯ୍ୟନ୍ତ ଏହି ସମସ୍ୟାର ସମାଧାନ ହୋଇପାରିବ ନାହିଁ ବୋଲି କହିଛନ୍ତି ବୁଦ୍ଧିଜୀବୀ । ତୁରନ୍ତ ସମସ୍ୟାରେ ସମାଧାନ ନହେଲେ ଆଗାମୀ ଦିନରେ ମହାନଦୀ ଏକ ବାଲିଚର ପାଲଟିବା ଆଶଂକା ସୃଷ୍ଟି ହୋଇଛି ।