ଭୁବନେଶ୍ୱର: କିଛିଦିନ ହେଲା ବିରୋଧୀ ଓଡ଼ିଆ ଅସ୍ମିତା କଥା କହି ଚାଲିଛନ୍ତି। ହେଲେ ସେମାନେ ବୁଝି ନାହାନ୍ତି ଯେ ଅସ୍ମିତା କ’ଣ? ଅସ୍ମିତା ମାନେ ରାଜ୍ୟ ଓ ଦେଶ ଉପରେ ମୁଁ ଗର୍ବିତ ନା ନୁହେଁ? ରାଜ୍ୟର ପ୍ରଦର୍ଶନ ଭଲ ନା ନୁହେଁ। ବିରୋଧୀଙ୍କୁ ବିଜେଡି ଏଭଳି ଅସ୍ମିତାର ପାଠ ପଢ଼ାଇଛି।
ଗତ ୨୪ ବର୍ଷ ମଧ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯୋଗୁ ଦେଶରେ ଓଡ଼ିଶାର ନାଁ ଆଗକୁ ଯାଇଛି। ନବୀନ ପଟ୍ଟନାୟକ ମୁଖ୍ଯମନ୍ତ୍ରୀ ହେବା ପୂର୍ବରୁ ଓଡ଼ିଶାକୁ ଗରିବ ରାଜ୍ୟ କୁହାଯାଉଥିଲା। ଐତିହ୍ଯ ଓ ସଂସ୍କୃତି ଗୌରବମୟ ଥିଲେ ମଧ୍ୟ ଆର୍ଥିକ ଏବଂ ଅନ୍ଯ କ୍ଷେତ୍ରରେ ରାଜ୍ଯର ସ୍ଥିତି ଭଲ ନଥିଲା। ରାଜ୍ଯରେ ବାତ୍ୟା ପରିଚାଳନା ହେଉ ନଥିଲା। ଭୋକର ଭୂଗୋଳ ଥିଲା ଓଡ଼ିଶା। ସରକାରୀ କର୍ମଚାରୀ ଦରମା ପାଉ ନଥିଲେ। ପୁଞ୍ଜି ନିବେଶ ନଥିଲା। ଖାଦ୍ୟ ଆସୁଥିଲା ବାହାରୁ । ମୁଣ୍ଡପିଛା ଋଣ ଅଧିକ ଥିଲା। ଦୁର୍ନୀତି ଥିଲା। ବାହାର ରାଜ୍ୟକୁ ଚାକିରି ପାଇଁ ଲୋକ ଯାଉଥିଲେ।
ବର୍ତ୍ତମାନ ସବୁ କ୍ଷେତ୍ରରେ ଅନେକ ଉନ୍ନତି ହୋଇଛି। ୨ ହଜାର ମସିହାରେ ୨ ହଜାର କୋଟି ଟଙ୍କା ଋଣ ଥିଲା। ୨୦୨୩ରେ ୪୩ ହଜାର ୭୩୦ କୋଟି ରାଜସ୍ୱ ବଳକା ଅଛି। ଦୁର୍ନୀତି ନିବାରଣକୁ ସମସ୍ତେ ପ୍ରଶଂସା କରୁଛନ୍ତି। ଖାଦ୍ୟ ବଳକା ରାଜ୍ୟ ଭାବେ ଓଡ଼ିଶା ଦ୍ଵିତୀୟ। ଶକ୍ତି ବଳକା ରାଜ୍ୟ ଓଡ଼ିଶା। କ୍ରୀଡାରେ ଆଗୁଆ ରାଜ୍ୟ। ଓଡ଼ିଶା ଆଡଭାନସଡ ସ୍ପୋର୍ଟ୍ସ ସେଣ୍ଟର। ଭୁବନେଶ୍ୱର ଏବେ ଦ୍ଵିତୀୟ ଆଇଟି କ୍ୟାପିଟାଲ। କୋଭିଡ ସମୟରେ ୧୭ ରାଜ୍ୟକୁ ମାଗଣା ଆକ୍ସିଜେନ ଦେଇଛି ଓଡ଼ିଶା। BSKY, ଡ୍ରିଙ୍କ ଫ୍ରମ ଟ୍ୟାପ, ଜାଗା ମିଶନ, ଫାଇଭ-ଟି ରୂପାନ୍ତର ସ୍କୁଲ, ଦକ୍ଷତା ବିକାଶ, ସ୍କିଲ୍ଡ ଇନ ଓଡ଼ିଶା, ଏସବୁକୁ ନେଇ ଓଡ଼ିଶା ଏବେ ଗୋଟିଏ ବ୍ରାଣ୍ଡ। ଅଧିକ ନିଯୁକ୍ତି, ଆଦିବାସୀ ସଂସ୍କୃତିର ସଂରକ୍ଷଣ, ମିଶନ ଶକ୍ତିରେ ୭୦ ଲକ୍ଷରୁ ଅଧିକ ମହିଳା ଏସଏମଇ ହେବେ। ବିଶ୍ୱ ଓଡ଼ିଆ ସମ୍ମିଳନୀ, ଐତିହ୍ୟ ସଂରକ୍ଷଣରେ ମନ୍ଦିରର ବିକାଶ ହୋଇଛି।
୨୦୨୧-୨୨ରେ ଭାରତର ଅଭିବୃଦ୍ଧି ୮ ଦଶମିକ ୭ ପ୍ରତିଶତ ଥିବା ବେଳେ ଓଡ଼ିଶାର ଅଭିବୃଦ୍ଧି ୧୧ ଦଶମିକ ୫ ଥିଲା। ମହାରାଷ୍ଟ୍ର ପରେ ନିବେଶରେ ଓଡ଼ିଶାର ସ୍ଥାନ ଦ୍ଵିତୀୟ । ମାର୍କେଟ ଋଣ ହୋଇନି। ମୁଖ୍ୟମନ୍ତ୍ରୀଙ୍କ ଯୋଗୁ ଋଣ ଭାର କମିଛି। ଗରିବୀ କମିଛି। ମୁଖ୍ୟମନ୍ତ୍ରୀଙ୍କ ପାଇଁ ଓଡ଼ିଆ ଲୋକ ଗର୍ବ କରୁଛନ୍ତି। ଓଡ଼ିଶାର ଅସ୍ମିତା ଦୁର୍ବଳ ନୁହେଁ ଯେ ହାତ ଲଗାଇ ଦେଲେ ମଉଳି ଯିବ। ବିରୋଧୀ ନିର୍ବାଚନ ପାଇଁ ଏଣୁତେଣୁ କୁହନ୍ତୁ ନାହିଁ। ପ୍ରଶଂସନୀୟ କାମ କରୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଓଡ଼ିଆ ଅସ୍ମିତା ଖରାପ ହେବନି। ଏହା ଦୃଢ଼ ଓ ଚିରସ୍ଥାୟୀ ବୋଲି ବିଜେଡି କହିଛି।
