ନନ୍ଦିଘୋଷ ବ୍ୟୁରୋ: ବଳଭଦ୍ରଙ୍କ ଆଡପ ମଣ୍ଡପ ବିଜେ ପହଣ୍ଡି ବେଳେ ଘଟିଥିବା ଅଘଟଣ ପାଇଁ ଦୁଃଖ ପ୍ରକାଶ କଲେ ବିଜେଡି ସଭାପତି ନବୀନ ପଟ୍ଟନାୟକ। ଜଗନ୍ନାଥ ପ୍ରେମୀ ଓ ଓଡ଼ିଶାବାସୀଙ୍କ ଦୁଃଖରେ ସେ ମର୍ମାହତ ବୋଲି କହିଛନ୍ତି । ଆହତ ସେବାୟତଙ୍କ ଆଶୁ ଅରୋଗ୍ୟ କାମନା କରିଛନ୍ତି ନବୀନ । ଏଭଳି ସମ୍ବେଦନଶୀଳ ଘଟଣାର ଯେଉଁଭଳି ପୁନରାବୃତ୍ତି ନ ଘଟେ ବୋଲି ସେ ସମସ୍ତଙ୍କୁ ଅନୁରୋଧ କରିଛନ୍ତି।
ନନ୍ଦିଘୋଷ ବ୍ୟୁରୋ: ଆଡପ ମଣ୍ଡପ ବିଜେ ପହଣ୍ଡି ବେଳେ ଘଟିଥିବା ଅଘଟଣ ପରେ ମେଡିକାଲରେ ପହଞ୍ଚି ଆହତଙ୍କ ଅବସ୍ଥା ପଚାରି ବୁଝିଥିଲେ ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡା । ସମସ୍ତ ଆହତଙ୍କ ଅବସ୍ଥା ଭଲ ରହିଥିବା କହିଥିଲେ ଉପ ମୁଖ୍ୟମନ୍ତ୍ରୀ । ସେପଟେ ଆଇନମନ୍ତ୍ରୀ ମଧ୍ୟ ମେଡିକାଲରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ । ଆହତଙ୍କ ଅବସ୍ଥା ପଚାରି ବୁଝିଥିଲେ ଆଇନମନ୍ତ୍ରୀ । ସମସ୍ତେ ଏବେ ସୁସ୍ଥ ଥିବା ବେଳେ ମହା ପ୍ରଭୁଙ୍କ ଦୟା ସମସ୍ତ ଉପରେ ରହିଛି । ଏବେ ସମସ୍ତ ନୀତିକାନ୍ତି ସୁରୁଖୁରୁରେ ଚାଲିଥିବା କହିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ଆଡପ ମଣ୍ଡପ ବିଜେ ପହଣ୍ଡି ବେଳେ ଚାରମାଳରୁ ଖସି ପଡିଥିଲେ ବଳଭଦ୍ର । ଏହି ଅଘଟଣ ପରେ ସ୍ଥିତି ଅନୁଧ୍ୟାନ ପାଇଁ ଉପ ମୁଖ୍ୟମନ୍ତ୍ରୀ ଓ ଆଇନମନ୍ତ୍ରୀଙ୍କୁ ପୁରୀ ଯିବାକୁ ର୍ନିଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଅଘଟଣ ଖବର ପାଇ ବା ପରେ ଦୁଃଖପ୍ରକାଶ କରିବା ସହ ସମସ୍ତ ଆହତଙ୍କ ଆଶୁ ଅରୋଗ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ ।
ନନ୍ଦିଘୋଷ ବ୍ୟୁରୋ: ଶୁଣିଲେ ଦେହ କମ୍ପିଯାଉଛି, ଦେଖିଲେ ଛାତି ଫାଟିଯାଉଛି । ଶ୍ରୀଜିଉଙ୍କ ଆଡପ ବିଜେ ସମୟରେ ଘଟିଯାଇଛି ବଡ଼ ଅଘଟଣ । ପହଣ୍ଡି ସମୟରେ ମୁହଁମାଡ଼ି ପଡ଼ିଗଲେ ବଡ଼ଭାଇ ବଳଭଦ୍ର । ରଥରୁ ଓହ୍ଲାଇବାବେଳେ ଖସିପଡ଼ିଲେ ବଡ଼ଠାକୁର । ସେବାୟତମାନଙ୍କ ହାତରୁ ଚାରମାଳ ଆଗକୁ ହାମୁଡ଼େଇ ପଡ଼ିଗଲେ ମହାପ୍ରଭୁ । ରାତି ପ୍ରାୟ ସାଢେ ୮ଟା ସମୟରେ ସୁଦର୍ଶନଙ୍କ ପହଣ୍ଡି ସରିଥାଏ । ପରେପରେ ଆରମ୍ଭ ହୋଇଥିଲା ବଡ଼ଠାକୁର ବଳଭଦ୍ରଙ୍କ ପହଣ୍ଡି ।ଚାରମାଳ ଉପରେ ମହାପ୍ରଭୁ ବଡ଼ଠାକୁରଙ୍କ ହଡ଼ପନାୟକ ସେବା ଓ ପତିମହାପାତ୍ରଙ୍କ ବନ୍ଦାପନା ନୀତି ସମ୍ପାଦନ କରାଯାଇଥିଲା । ଭାବର ଠାକୁର, ଜୀବନ୍ତ ଠାକୁରଙ୍କୁ ପହଣ୍ଡି କରି ଆଣୁଥିଲେ ସେବାୟତ । ଗୋଟି ପହଣ୍ଡିରେ ରଥ ଉପରୁ ଆଡପ ବିଜେ କରୁଥିଲେ ବଡ଼ଠାକୁର । ସମସ୍ତେ ବଡ଼ଠାକୁରଙ୍କ ଆଖିକୁ ଚାହିଁରହିଥିଲାବେଳେ ଘଟିଯାଇଥିଲା ବିରାଟ ଅଘଟଣ । ରଥ ଉପରୁ ଓହ୍ଲାଉ ଓହ୍ଲାଉ ହଠାତ ମୁହଁମାଡ଼ି ପଡ଼ିଯାଇଥିଲେ ବଡ଼ଠାକୁର । ସେବାୟତମାନଙ୍କ ହାତରୁ ଖସିଯାଇ ଚାରମାଳ ଆଗକୁ ହାମୁଡ଼େଇ ଖସିପଡ଼ିଥିଲେ । କେହିକିଛି ବୁଝିବା ଆଗରୁ ଶ୍ରୀମନ୍ଦିରର ମୁରବୀ, ରଥଯାତ୍ରାର ମୁରବୀ ମୁହଁମାଡ଼ି ତଳେ ଖସିପଡ଼ିଥିଲେ । ବରିଷ୍ଠ ସେବାୟତ କହିଛନ୍ତି ବନ୍ଦାପନା ପରେ ମହାପ୍ରଭୁଙ୍କ ପହଣ୍ଡି ଆରମ୍ଭ ହୋଇଥିଲା । ପହଣ୍ଡି ସମୟରେ ଏକ ଡୋରକୁ ବନ୍ଦାଯାଇ ଥାଏ । ହେଲେ ବଡ଼ଠାକୁରଙ୍କ ପହଣ୍ଡି ସମୟରେ ଡୋରଟି ବନ୍ଧା ହୋଇନଥିବାରୁ ଏଭଳି ବଡ଼ ଅଘଟଣ ଘଟିଗଲା । ସେବାୟତଙ୍କ ଗୋଡ଼ ଖସିଯିବାରୁ ବଡ଼ଠାକୁରଙ୍କୁ ଧରିରଖିବା ସହଜ ହୋଇନଥିଲା । ମହାପ୍ରଭୁ ହେଉଛନ୍ତି ଭାବର ଓ ଜୀବନ୍ତ ଠାକୁର । ତାଙ୍କ ଇଚ୍ଛା ବିନା ପତ୍ରଟେ ବି ହଲେନାହିଁ । ତେବେ କାହିଁକି ମୁହଁମାଡ଼ି ପଡ଼ିଗଲେ ବଡ଼ ଠାକୁର ? କିଛି ଅଶୁଭ ସଂକେତ ଦେଇଗଲେ ବି ମହାପ୍ରଭୁ ବଳଭଦ୍ର ? ସଂସ୍କୃତି ବିଷାରଦଙ୍କ ମତରେ ଏଭଳି ବଡ଼ ଅଘଟଣ କିଛି ବଡ଼ ଅଶୁଭର ସଂକେତ ହୋଇପାରେ । ବୋଧହୁଏ ବଡଠାକୁରଙ୍କ ପ୍ରତି ଶ୍ରଦ୍ଧା ଓ ଭକ୍ତିରେ କୌଣସି କମି ରହିଯାଇଥାଇପାରେ ବୋଲି ଗବେଷକ ମତ ଦେଇଛନ୍ତି ।
ନନ୍ଦିଘୋଷ ବ୍ୟୁରୋ: ଶ୍ରୀଜିଉଙ୍କ ଆଡ଼ପ ବିଜେ ସମୟରେ ଅଘଟଣ।ପହଣ୍ଡିବେଳେ ଖସିପଡ଼ିଲେ ବଡ଼ଭାଇ ବଳଭଦ୍ର। ସେବାୟତଙ୍କ ହାତରୁ ଖସିପଡ଼ିଲେ ବଡ଼ ଠାକୁର। ଚାରମାଳ ଆଗକୁ ଝୁଙ୍କି ପଡିଲେ ବଳଭଦ୍ର। ୫ ଜଣ ସେବାୟତ ଆହତ ହୋଇଥିବା ସୂଚନା ମିଳିଛି । ଆହତ ସେବାୟତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଛି ।
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆକୁ ମିଳିଲେ ନୂଆ କୋଚ୍ । ଗୌତମ ଗମ୍ଭୀରଙ୍କ ନାମରେ ବାଜିଲା ମୋହର । ଗମ୍ଭୀର ଟିମ ଇଣ୍ଡିଆର ନୂଆ କୋଚ ଭାବେ ଦାୟିତ୍ବ ନେବା ନେଇ ଏକ୍ସରେ ସୂଚନା ଦେଲେ ବିସିସିଆଇ ସଚିବ ଜୟ ଶାହା । ରାହୁଲ ଦ୍ରାବିଡଙ୍କ କାର୍ଯ୍ୟକାଳ ସରିଥିବାବେଳେ ନୂଆ କୋଚ କିଏ ହେବେ ତାକୁ ନେଇ ଚର୍ଚ୍ଚା ହେଉଥିଲା । ତେବେ ଗମ୍ଭୀରକୁ ଗୁରୁ ଦାୟିତ୍ବ ମିଳିଛି । ସେ ପ୍ରଥମଥର ପାଇଁ କୋଚିଂ ଦେବାକୁ ଯାଉଛନ୍ତି । ଏହାପୂର୍ବରୁ ସେ ଲକ୍ଷ୍ନୌ ସୁପର ଜିଏଣ୍ଟ ଏବଂ କୋଲକାତା ନାଇଟ ରାଇଡର୍ସର ମେଣ୍ଟରଭାବେ କାମ କରିଛନ୍ତି । ଚଳିତ ବର୍ଷ କୋଲକାତା ନାଇଟ ରାଇଡର୍ସ ଚାମ୍ପିୟନ ହୋଇଥିଲା । ଅନ୍ୟପଟେ ଲକ୍ଷ୍ନୌରେ ଗମ୍ଭୀର ଦାୟିତ୍ବ ନେଇଥିବାବେଳେ ଦଳ ଗୋଟିଏଥର ଫାଇନାଲ ଖେଳିଥିବାବେଳେ ପରବର୍ଷ ପ୍ଲେଅଫରେ ସ୍ଥାନ ପକ୍କା କରିଥିଲା । ଏଣୁ ସେ ଟିମ ଇଣ୍ଡିଆର ଏହି ଗୁରୁ ଦାୟିତ୍ବ ତୁଲାଇ ପାରିବେ ବୋଲି କ୍ରିକେଟ ବିଶେଷଜ୍ଞମାନେ ମତ ଦେଇଛନ୍ତି ।
ନନ୍ଦିଘୋଷ ବ୍ୟୁରୋ: ଭୁବନେଶ୍ବର ରସୁଲଗଡ଼ ଛକରେ ଅଭାବନୀୟ ଦୃଶ୍ଯ । ମୁଖ୍ଯମନ୍ତ୍ରୀ ମୋହନ ମାଝୀଙ୍କ କାରକେଡ ଆଗରେ ହଙ୍ଗାମା କଲେ ମହିଳା । ରସୁଲଗଡ଼ ଛକରେ ହଠାତ ଜଣେ ମହିଳା ରାସ୍ତା ମଝିକୁ ଆସିଯାଇ କାରକେଡ ଅଟକାଇବାକୁ ଚେଷ୍ଟା କରିଥିଲେ । ମହିଳାଙ୍କ ପାଇଁ କିଛି ସମୟ ମୁଖ୍ଯମନ୍ତ୍ରୀଙ୍କ କାରକେଡ ଅଟକିଯାଇଥିଲା । ପରେ ପୋଲିସ ସଂପୃକ୍ତ ମହିଳାଙ୍କୁ ହଟାଇବା ପରେ ମୁଖ୍ଯମନ୍ତ୍ରୀଙ୍କ କାରକେଡ ଆଗକୁ ଯାଇଥିଲା । ଅଭିଯୋଗ ଅନୁସାରେ ମୁଖ୍ଯମନ୍ତ୍ରୀ ମୋହନ ମାଝୀଙ୍କ ଗସ୍ତ ପାଇଁ ରସୁଲଗଡ଼ ଛକରେ ଅଧଘଣ୍ଟା ହେଲା ପୋଲିସ ଯାତାୟାତ ବନ୍ଦ କରିଥିଲା । ଫଳରେ ଲୋକମାନେ ରାସ୍ତାରେ ଅଟକିରହିଥିଲେ । ଏହି ସମୟରେ ସଂପୃକ୍ତ ମହିଳା ମେଡିକାଲ କାମ ଅଛି କହି ଯିବାକୁ ଚାହିଁଥିଲେ । ହେଲେ ପୋଲିସ ତାଙ୍କୁ ଛାଡ଼ିନଥିଲା । ଫଳରେ ମହିଳାଜଣଙ୍କ ମୁଖ୍ଯମନ୍ତ୍ରୀଙ୍କ କାରକେଡ ଆଗକୁ ଆସିଯାଇଥିଲେ । ଏହାପରେ ମହିଳାଙ୍କୁ ସମର୍ଥନ ଜଣାଇ ଉପସ୍ଥିତ ଲୋକମାନେ ମଧ୍ଯ ଗାଡ଼ିର ହର୍ଣ୍ଣ ବଜାଇ ପ୍ରତିବାଦ କରିଥିଲେ ।
ନନ୍ଦିଘୋଷ ବ୍ୟୁରୋ: ବଂଶଧାରା ନଦୀ ସ୍ରୋତରେ କ୍ଷୟ ହେବାରେ ଲାଗିଛି ଅନେକ ଚାଷ ଜମି । ଚାଷ କରିବାକୁ ଆଉ ଦେଖାଯାଉନାହିଁ ଜମି । ଶହ ଶହ ଏକର ଚାଷଜମି କ୍ଷୟ ପାଇଲାଣି । ଜମିର ପରିମାଣ କେବଳ ଜମି ପଟ୍ଟାରେ ସୀମିତ ରହିଛି । ଯାହାକୁ ନେଇ ଚିନ୍ତାରେ ଭାରାକ୍ରାନ୍ତ କାଶୀନଗର ବ୍ଲକ ବଂଶଧାରା ନଦୀ ଉପକୂଳର ଅନେକ ଗାଁ ଲୋକେ।
ଧୀରେ ଧୀରେ ଉଭେଇ ଯାଉଛି ଚାଷଜମି। ଚାଷ କରିବାକୁ ଆଉ ଦେଖାଯାଉନାହିଁ ଜମି । ବଂଶଧାରା ନଦୀ ସ୍ରୋତରେ ଲୀନ ହେଲାଣି ପାଞ୍ଚ ଶହ ଏକରରୁ ଅଧିକ ଚାଷ ଜମି । କାଶୀନଗର ସହର ଓ କିଡିଗାଁ ସମେତ ଖାଣ୍ଡବା ପଞ୍ଚାୟତର ପାଲସିଂ, ଖାଣ୍ଡବା ,ସାରା, ବାଡିଗାଁ, ପୁରୁତିଗୁଡା ଏବଂ ବୁଦୁରା ପଞ୍ଚାୟତର ଗୈାରୀ, ଭାନ୍ନା, କିତିଙ୍ଗି ଭଳି ଗାଁ ବଂଶଧାରା ନଦୀ କୂଳରେ ଅବସ୍ଥିତ। ନଦୀର ଗତିପଥ ପରିବର୍ତ୍ତନ ଫଳରେ ଖରସ୍ରୋତ ଯୋଗୁଁ ଏହି ସବୁ ଗାଁ ପଟ କୂଳ ଖାଇବାରେ ଲାଗିଛି । ପ୍ରତି ବର୍ଷ ନଦୀରେ ବନ୍ଯା ଆସିଲେ ୨୦ ରୁ ୩୦ ଫୁଟ କୂଳ ଲଙ୍ଘି ନଦୀରେ ଲୀନ ହୋଇ କ୍ଷୟ ଯାଉଛି ଚାଷଜମି। ପ୍ରକୃତିର କୋପରେ କ୍ଷତିଗ୍ରସ୍ତ ହେଉଛନ୍ତି ଚାଷୀ । କମିବାରେ ଲାଗିଛି କୃଷି ଉତ୍ପାଦନ । ଯାହାକୁ ନେଇ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି ଚାଷୀକୂଳ। ଅନ୍ୟ ପଟେ ନଦୀ ଆରପଟ ଆନ୍ଧ୍ର ପକ୍ଷରୁ ସ୍ଥାନେ ସ୍ଥାନେ ଆଡ଼ିବନ୍ଧ ନିର୍ମାଣ କରୁଥିବାରୁ ଜଳସ୍ରୋତ ଓଡ଼ିଶା ମୁହାଁ ହୋଇଥିବା ଅଭିଯୋଗ ହୋଇଛି।
ନଦୀ ଉପକୂଳର ଚାଷୀଙ୍କ ଜମି ପରିମାଣ ଜମି ପଟ୍ଟାରେ ହିଁ ସୀମିତ ରହିଛି। ପଟ୍ଟାର ସରହଦ ଅନୁସାରେ ଜମି ଦେଖାଯାଉନାହିଁ। ସଙ୍କୁଚିତ ହୋଇଯାଇଛି ଜମି ପରିମାଣ। ବଂଶଧାରା ନଦୀ ସ୍ରୋତରେ ହଜିଗଲାଣି ପାଞ୍ଚଶହ ଏକରରୁ ଅଧିକ ଜମି । ଯାହା ଚିନ୍ତାର ବିଷୟ ପାଲଟିଛି। କାଶୀନଗର ତହସିଲର ନଥିପତ୍ରକୁ ନଜର ପକେଇଲେ ଚକିତ କରୁଛି ପ୍ରକୃତ ସ୍ଥିତି। ଗୋଟିଏ ଉଦାହରଣ ଯଥେଷ୍ଟ । ଓଡିଶା ସୀମାର କାଶୀନଗର ଅନ୍ତର୍ଗତ ଆଭିଲାମା ମୈାଜାର ଅନେକ ପଦର ଜମି ନଦୀ ଆରପଟ ଅର୍ଥାତ୍ ଆନ୍ଧ୍ର ପରିସୀମାରେ ରହିଛି। ଏ ସଂପର୍କରେ ଜାଣିବା ପରେ ୨୦୦୩ରେ ଦିବଙ୍ଗତ ପାରଳାଖେମୁଣ୍ଡି ବିଧାୟକ ତ୍ରିନାଥ ସାହୁଙ୍କ ନେତୃତ୍ୱରେ ନିଜ ଅଧିକାରକୁ ଆଣି ଆମ୍ବ କାଜୁ ଓ ବିଭିନ୍ନ ବୃକ୍ଷ ରୋପଣ କରିଥିଲେ ପଟ୍ଟାଧାରୀ। କିନ୍ତୁ ଦୀର୍ଘ ବର୍ଷ ଧରି ଏଠାରେ ଜଙ୍ଗଲୀ ହାତୀଙ୍କ ଆଡ୍ଡାସ୍ଥଳୀ ପୁଣି ନଦୀ ପାର ହୋଇ ଜମି ଚାଷ କରିବା କଷ୍ଟକର ହେଉଥିବାରୁ କାଳକ୍ରମେ ଏହା ଆନ୍ଧ୍ରର କବଜାକୁ ଚାଲିଯାଇଛି । ତେବେ କ୍ଷତିଗ୍ରସ୍ତ ଚାଷୀଙ୍କୁ ଅନ୍ୟତ୍ର ଚାଷ ଜମି ଯୋଗାଇବା ସହ ଏହାର ସ୍ଥାୟୀ ସମାଧାନ ପାଇଁ ରାଜ୍ୟ ସରକାର ହସ୍ତକ୍ଷେପ କରିବାକୁ ଦାବି ହୋଇଛି।
ନନ୍ଦିଘୋଷ ବ୍ୟୁରୋ: ଛାତ୍ରଛାତ୍ରୀ ମାନଙ୍କୁ ଗୁଣାତ୍ମକ ଶିକ୍ଷାଦେବାକୁ ସରକାର ଅନୁକୂଳ ପରିବେଶ ସାଙ୍ଗକୁ ଆକର୍ଷୀଣୀୟ ସ୍କୁଲର ବ୍ଯବସ୍ଥା କରୁଛନ୍ତି । କିନ୍ତୁ ଏ ସବୁ ବର୍ତ୍ତମାନ କାଗଜପତ୍ରରେ ଶୋଭା ପାଉଥିବା ବେଳେ ବାସ୍ତବିକ ଚିତ୍ର ଅଲଗା । ଯାହା କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ମଙ୍ଗଲପୁରର ପ୍ରାଥମିକ ବିଦ୍ଯାଳୟ ଦେଖିଲେ ବାରି ହୋଇପଡୁଛି ।
କଳାହାଣ୍ଡି ଜିଲ୍ଲା ଜୟପାଟଣା ଗୋଷ୍ଠୀ ଶିକ୍ଷା କାର୍ଯ୍ଯାଳୟ ଅଧୀନରେ ଥିବା ମଙ୍ଗଳପୁର କଲୋନି ପଡ଼ାର ପ୍ରାଥମିକ ବିଦ୍ୟାଳୟ । ୩ ବର୍ଷ ହେବ ବିଦ୍ଯାଳୟଟି ଭାଙ୍ଗିଯାଇଛି । କାଳେ ସ୍କୁଲଟି ପୁରା ଭୁଷୁଡି ପଡିବ ସେହି ଭୟରେ ପାଖରେ ଥିବା ମିଶନ ଶକ୍ତି ଓ ପିଇଓ କ୍ବାଟରରେ ଚାଲିଛି ପାଠପଢ଼ା । ସ୍କୁଲରେ ସମୁଦାୟ ୫୭ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । ହେଲେ ଶ୍ରେଣୀ ଗୃହ ନ ଥିବାରୁ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ଯନ୍ତ ପିଲା ଗୋଟିଏ କୋଠରୀରେ ବସି ପାଠ ପଢୁଛନ୍ତି । ଫଳରେ ବାଧାପ୍ରାପ୍ତ ହେଉଛି ଶିକ୍ଷାଦାନ।
ତିନି ବର୍ଷ ହେଲା ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳାଯାଉଛି । ସ୍କୁଲ ଘର ଭଲଥିବା ସମୟରେ ପ୍ରାୟ ୧୩୫ ଜଣ ପିଲା ପଢୁଥିଲେ । ବର୍ତ୍ତମାନ ସ୍କୁଲର ଏଭଳି ସ୍ଥିତି ଯୋଗୁଁ ଆର୍ଥିକ ଅନଟନ ଥିଲେ ମଧ୍ଯ ଘରୋଇ ସ୍କୁଲରେ ପିଲାଙ୍କୁ ପଢାଇବାକୁ ବାଧ୍ଯ ହେଉଛନ୍ତି ଅଭିଭାବକ । ନୂତନ ସ୍କୁଲ ଘର ପାଇଁ ଗ୍ରାମବାସୀ ଓ ପ୍ରଧାନ ଶିକ୍ଷକ ଅନେକ ଥର ବ୍ଲକ ପ୍ରଶାସନଠୁ ଆରମ୍ଭ କରି ଜିଲ୍ଲାପାଳଙ୍କୁ ମଧ୍ୟ ଲିଖିତ ଭାବେ ଜଣାଇଛନ୍ତି ହେଲେ ଆଜି ଯାଏଁ କିଛି ସୁଫଳ ମିଳି ପାରିନାହିଁ । ସେପଟେ ଖୁବ୍ ଶୀଘ୍ର ସ୍କୁଲ କାମ କରାଯିବ ବୋଲି ଜୟପାଟଣା ବିଡିଓ କହିଛନ୍ତି ।
ନନ୍ଦିଘୋଷ ବ୍ୟୁରୋ: ଦିଲ୍ଲୀର ଜଣେ ୨୦ ବର୍ଷ ବୟସ୍କା ବ୍ୟକ୍ତିଙ୍କୁ ତାଙ୍କ ପଡ଼ୋଶୀରେ ରହୁଥିବା ନାବାଳିକାଙ୍କ ସମ୍ପର୍କୀୟମାନେ ଅପହରଣ କରିନେଇଥିବାର ଅଭିଯୋଗ । ପୀଡିତା ଜଣକ ହିମାଂଶୁ ଶର୍ମା ବୋଲି ଜଣାପଡିଛି। ତାଙ୍କ ମା ’ରଜନୀ ଶର୍ମା ନାବାଳିକାଙ୍କ ମା’ ସମେତ ୮ଜଣଙ୍କ ବିରୋଧରେ ରବିବାର ବାଗପାଟ କୋଟୱାଲି ପୋଲିସ ଷ୍ଟେସନରେ ଅଭିଯୋଗ କରିଥିଲେ। ଏଫଆଇଆରରେ ନାମିତ ଦୁଇଜଣଙ୍କୁ ଗିରଫ କରାଯାଇଛି ବୋଲି ପୋଲିସ କହିଛି। ବାଗପାଟର ଡେପୁଟି ପୋଲିସ୍ ଅଧୀକ୍ଷକ ହରିଶ ଭଦୁରିଆ କହିଛନ୍ତି ଯେ ଆମେ ଦୁଇ ଜଣଙ୍କୁ ଗିରଫ କରିଛୁ ଏବଂ ଅନ୍ୟମାନଙ୍କୁ ଧରିବା ପାଇଁ ଚଢାଉ କରାଯାଉଛି। ହିମାଂଶୁଙ୍କ ମାମୁଁ ଅନୀଲ ଶର୍ମା କହିଛନ୍ତି ଯେ ତାଙ୍କ ଭଣଜାଙ୍କୁ ଶନିବାର ଦିନ ତାଙ୍କ ପଡୋଶୀରେ ରହୁଥିବା ଅଜୟ ପାଲ ଏବଂ ତାଙ୍କ ସଂପର୍କୀୟ ମାନେ ଅପହରଣ କରି ନେଇଥିଲେ । କୁହାଯାଉଛି ଯେ ହିମାଂଶୁ ଜୁନ୍ ୨୭ରେ ପଡୋଶୀ ନାବାଳିକାକୁ ବଳାତ୍କାର କରିଥିଲେ ଏବଂ ପରେ ତାଙ୍କୁ ବ୍ଲାକମେଲ କରୁଥିଲେ।
“ଆମେ ଏଫ୍ଆଇଆର୍ ଦାଖଲ କରି ଦୁଇ ଜଣଙ୍କୁ ଗିରଫ କରିଛୁ। ଆମେ ଏଫ୍ଆଇଆର୍ ରେ ଥିବା ଚାର୍ଜଗୁଡିକ ଯାଞ୍ଚ କରୁଛୁ | ଶବବ୍ୟବଛେଦ ରିପୋର୍ଟକୁ ପରୀକ୍ଷା କରିବା ପରେ ପିଟିପିଟି ହତ୍ୟା କରାଯାଇଥିବା ସ୍ପଷ୍ଟ ହୋଇଛି ବୋଲି ବାଗପାଟ କୋଟୱାଲି ପୋଲିସ ଷ୍ଟେସନ ଆଇାଇସି ସଞ୍ଜୀବ କୁମାର କହିଛନ୍ତି। ହିମାଂଶୁଙ୍କ ମାମୁଁ ଅନିଲ କୁମାର ଶର୍ମା ଦାବି କରିଛନ୍ତି ଯେ “ ଆମକୁ ପୂର୍ବରୁ ସେହି ପଡୋଶୀ ମହିଳା କହିଥିଲେ ଯେ ହିମାଂଶୁଙ୍କୁ ହତ୍ୟା କରାଯାଇଛି ଏବଂ ତାଙ୍କ ମୃତଦେହ ବାଗପାଟ ଗାଁ ଜଙ୍ଗଲରେ ଫୋପାଡି ଦେଇଛୁ | ଆମେ ସେଠାକୁ ଯିବା ପରେ ହିମାଂଶୁଙ୍କୁ ଅର୍ଦ୍ଧ-ସଚେତନ ଅବସ୍ଥାରେ ପାଇଲୁ | ଆମେ ସଙ୍ଗେ ସଙ୍ଗେ ତାଙ୍କୁ ସ୍ଥାନୀୟ ଡାକ୍ତରଖାନାକୁ ନେଇଥିଲୁ ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା ବୋଲି ମାମୁଁ କହିଛନ୍ତି। ହିମାଂଶୁଙ୍କ ମା ’ଅନ୍ୟମାନଙ୍କ ସହ ରବିବାର ସକାଳେ ବାଗପାଟ କୋଟୱାଲି ଏସପିଙ୍କ ନିକଟରେ ଅଭିଯୋଗ କରିଛନ୍ତି ଯେ, ସ୍ଥାନୀୟ ପୋଲିସ ଅପରାଧୀଙ୍କୁ ସୁରକ୍ଷା ଦେଉଛି ଏବଂ ପୁଅର ହତ୍ୟା ପାଇଁ ଦାୟୀ ବ୍ୟକ୍ତିଙ୍କୁ ଶୀଘ୍ର ଗିରଫ କରା ନ ଗଲେ ବିରୋଧ ପ୍ରଦର୍ଶନ କରାଯିବ ବୋଲି ଧମକ ଦେଇଛନ୍ତି।
ନନ୍ଦିଘୋଷ ବ୍ୟୁରୋ: ଚାଲିଥିଲା ସ୍କୁଲ୍, ଅସୁସ୍ଥ ହୋଇପଡିଲେ ୧୨ ଛାତ୍ରୀ। ସମସ୍ତ ଛାତ୍ରୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଏଭଳି ଏକ ଅଭାବନୀୟ ଘଟଣା ଘଟିଛି ଆନନ୍ଦପୁର ଉପଖଣ୍ଡ କେଶଦୁରାପାଳ ଜନମଙ୍ଗଳ ହାଇସ୍କୁଲରେ। ପାଖାପାଖି ଦିନ ୧୧ଟା ସୟରେ କ୍ଲାସ୍ ଚାଲିଥିବାବେଳେ ୯ମ ଓ ୧୦ ଶ୍ରେଣୀ ରୁ ଜଣକ ପରେ ଜଣେ ଏମିତି ୧୨ଜଣ ଛାତ୍ରୀ ଅସୁସ୍ଥ ହୋଇପଡିଲେ। ଛାତିରେ ଯନ୍ତ୍ରଣା ଅନୁଭବ କରିବା ସହ ନିଶ୍ବାସ ନେବାରେ କଷ୍ଟ ଅନୁଭବ ହେବାରୁ ବିଦ୍ଯାଲୟ ଶିକ୍ଷକ ମାନେ ତାଙ୍କୁ ତୁରନ୍ତ ନିକଟସ୍ଥ କେଶଦୂରାପାଳ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେଠାରୁ ପୁଣିଥରେ ସମସ୍ତ ଛାତ୍ରୀଙ୍କୁ ଆମ୍ବୁଲାନ୍ସ ଯୋଗେ ଆନନ୍ଦପୁର ଉପଖଣ୍ଡ ମୁଖ୍ଯ ଚିକିତ୍ସାଳୟ ଠାରେ ଭର୍ତ୍ତି କରାଯାଇଛି । ଗତ ଶନିବାର ଦିନ ଠିକ୍ ଏହିଭଳି ଅସୁସ୍ଥ ଅବସ୍ଥାରେ ୨-୩ ଜଣ ଛାତ୍ରୀ ମେଡିକାଲ ରେ ଭର୍ତି ହୋଇ ସୁସ୍ଥ ହେବାପରେ ଘରକୁ ଫେରିଥିବା ଅବିଭାବକ କହିଛନ୍ତି। ପୂନର୍ବାର ସ୍କୁଲ ରେ ଏଭଳି ଘଟଣା ପାଇଁ ଚିନ୍ତା ବ୍ଯକ୍ତ କରିଛନ୍ତି ଅବିଭାବକ । ତେବେ ଛାତ୍ରୀଙ୍କ ସେଭଳି କିଛି ବିଶେଷ ସ୍ବାସ୍ଥଗତ ସମସ୍ଯା ନଥିବା କହିଛନ୍ତି ମେଡିକାଲ ସୁପରିଟେଣ୍ଡେଣ୍ଟ।
