ଭୁବନେଶ୍ବର : ଝଟକୁଛି ଟୁଇନସିଟି । ଆଜି ମଣ୍ଡପରେ ମାଆଙ୍କ ସପ୍ତମୀ ପୂଜା । କଟକ ସହରର ବିଭିନ୍ନ ପୂଜା ମଣ୍ଡପରେ ଗତକାଲି ସନ୍ଧ୍ୟାରେ ଦେବୀ ଦୁର୍ଗାଙ୍କ ଷଷ୍ଠୀ ପୂଜା ଅନୁଷ୍ଠିତ ହୋଇଥିଲା । ବେଲ ବରଣୀ ପରେ ମାଆଙ୍କୁ କରାଯାଇଥିଲା ଆବାହନ । ଶୁଭ ସମୟ ପୂଜକ କଳସ ଓ ପୂଜା ସାମଗ୍ରୀ ଧରି ନିକଟରେ ଥିବା ବେଲ ବୃକ୍ଷ ତଳେ ପହଂଚିବା ପରେ ସେଠାରେ ବିଲ୍ବବରଣୀ ପୂଜା ହୋଇଥିଲା ।
ପୂଜାର୍ଚ୍ଚନା ପରେ ମାଆଙ୍କୁ ଆବାହନ କରାଯିବା ସହିତ ବୋଧନ ଓ ଅଧିବାସ ପୂଜା ଅନୁଷ୍ଠିତ ହୋଇଥିଲା । ଆଜି ସକାଳୁ ମାଆଙ୍କୁ ଚକ୍ଷୁଦାନ କରାଯାଇ ସପ୍ତମୀ ପୂଜା ଅନୁଷ୍ଠିତ ହେବ ।
ନନ୍ଦିଘୋଷ ବ୍ୟୁରୋ: ୟୁକ୍ରେନ ଉପରେ ରୁଷର ଜୋରଦାର ହମଲା। ଡ୍ରୋନ ହମଲାରେ ଛାରଖାର ହୋଇଯାଇଛି ରାଜଧାନୀ କିଭ ସହର। ୟୁକ୍ରେନ ଉପରେ ରୁଷ ୫୬୮ ଡ୍ରୋନ୍ ଏବଂ ୪୩ଟି କ୍ଷେପଣାସ୍ତ୍ର ହମଲା କରିଛି । ରୁଷର ଆକ୍ରମଣ ପରେ ୟୁକ୍ରେନରେ ରେଡ୍ ଆଲର୍ଟ ଜାରି କରାଯାଇ । ପୋଲାଣ୍ଡରେ ଏୟାରସ୍ପେସ୍ ବନ୍ଦ କରାଯାଇଛି । ଯେଉଁଥିରେ ଅତି କମରେ ୪ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ଆହତ ହୋଇଛନ୍ତି । ପୋଲାଣ୍ଡ ମଧ୍ୟ ପ୍ରତିଶୋଧ ନେବା ପାଇଁ ଏହାର ବାୟୁସେନାକୁ ପଠାଇଛି । ରୁଷର ଡ୍ରୋନ ଗୁଡିକୁ ୟୁକ୍ରେନ ଖସାଇଥିବା ଦାବି କରିଛି।
୧୨ ଘଣ୍ଟା ଧରି ଚାଲିଥିବା ଏହି ଆକ୍ରମଣରେ ଅନେକ କୋଠା କ୍ଷତିଗ୍ରସ୍ତ ହୋଇଥିବା କହିଛନ୍ତି ରାଷ୍ଟ୍ରପତି ଜେଲେନ୍ସକି। ରୁଷର ଆକ୍ରମଣ ପରେ ପୋଲାଣ୍ଡର ଦୁଇ ସହର ନିକଟରେ ଆକାଶପଥ ବନ୍ଦ କରି ଦେଇଥିଲା। ବିପଦ ଏଡାଇବା ପର୍ଯ୍ୟନ୍ତ ଏହାର ବାୟୁସେନା ଜବାବରେ ଜେଟ୍ ପଠାଇଥିଲା। ଆକ୍ରମଣରେ ଏକ ହାର୍ଟ କ୍ଲିନିକ୍, କାରଖାନା ଏବଂ ଆବାସିକ କୋଠା କ୍ଷତିଗ୍ରସ୍ତ ହୋଇଛି। ଆକ୍ରମଣରେ ୟୁକ୍ରେନର ବିମାନବନ୍ଦର ସମେତ ସାମରିକ ଭିତ୍ତିଭୂମିକୁ ଟାର୍ଗେଟ କରାଯାଇଥିବା କହିଛି ରୁଷ। ଜେଲେନସ୍କି ନାଟୋ ସହଯୋଗୀଙ୍କୁ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରିଛନ୍ତି।
ନନ୍ଦିଘୋଷ ବ୍ୟୁରୋ: ତାମିଲନାଡୁ କରୁୁରରେ ଟିଭିକେ ମୁଖ୍ୟ ବିଜୟଙ୍କ ରାଲିରେ ଦଳାଚକଟାରୁ ୪୦ ଜଣଙ୍କ ମୃତ୍ୟୁ ଘଟଣା। ବିଜୟଙ୍କୁ ରାଲି କରିବାକୁ ଅନୁମତି ନଦେବାକୁ ମାଡ୍ରାସ ହାଇକୋର୍ଟଙ୍କ ଦ୍ଵାରସ୍ଥ ଦଳାଚକଟାରେ ଜଣେ ଆହତ। ଦଳାଚକଟାରେ ଆହତ ଜଣେ ବ୍ୟକ୍ତି ମାଡ୍ରାସ ହାଇକୋର୍ଟରେ ଏକ ଆବେଦନ ଦାଖଲ କରିଛନ୍ତି। ଯେଉଁଥିରେ ସେ ଅଭିନେତା ବିଜୟଙ୍କୁ ତାମିଲନାଡୁରେ ରାଲି କରିବାକୁ ଅନୁମତି ନ ଦିଆଯାଉ ବୋଲି କହିଛନ୍ତି ।
ଗତ ଶନିବାର କରୁରରେ ତାମିଲନାଡୁ ଭେଟ୍ରି କାଝାଗମ ଟିଭିକେ ମୁଖ୍ୟ ବିଜୟଙ୍କ ନେତୃତ୍ୱରେ ଏକ ରାଲିରେ ଦଳାଚକଟା ଘଟି ୪୦ ଜଣଙ୍କର ମୃତ୍ୟୁ ଏବଂ ୬୭ ରୁ ଅଧିକ ଆହତ ହୋଇଛନ୍ତି । ତାମିଲନାଡୁ ମୁଖ୍ୟମନ୍ତ୍ରୀ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି । ଘଟଣାକୁ ନେଇ ଅନ୍ୟ ଅଭିନେତା ମୋହନଲାଲ, ମାମୁଟି ଏବଂ ଦକ୍ଷିଣ ଭାରତୀୟ ଅଭିନେତାମାନେ ଦୁଃଖ ପ୍ରକାଶ କରିଛନ୍ତି। ସେପଟେ ଘଟଣାର ବିଚାର ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ସରକାର । ମାମଲାର ସିବିଆଇ ତଦନ୍ତ ଦାବିରେ କୋର୍ଟଙ୍କ ଦ୍ବାରସ୍ଥ ହୋଇଛି ଟିଭିକେ ।
ଦଳାଚକଟା ଘଟଣା ପରେ ନିଜ ଆଡୁ ସହାୟତା ଘୋଷଣା କରିଛନ୍ତି ଅଭିନେତା ବିଜୟ। ରାଜ୍ୟ ସରକାର ବି କରିଛନ୍ତି ସହାୟତା। ଘଟଣା ସଂପର୍କରେ ତାମିଲନାଡୁ ସରକାରଙ୍କୁ ରିପୋର୍ଟ ମାଗିଛନ୍ତି କେନ୍ଦ୍ର ଗୃହ ମନ୍ତ୍ରାଳୟ।…ସେପଟେ ଘଟଣା ପରେ ଅଭିନେତା ବିଜୟଙ୍କୁ ମିଳିଥିଲା ବୋମା ଧମକ। ବୋମା ଧମକ ପରେ ବୋମା ନିଷ୍କ୍ରିୟକାରୀ ଦଳ ପକ୍ଷରୁ ତାଙ୍କ ବାସଭବନକୁ ଯାଇ ଖାନ ତଲାସୀ କରାଯାଇଥିଲା। ତେବେ କୌଣସି ବୋମା ମିଳିନଥିବା ଜଣାପଡିଛି।
ନନ୍ଦିଘୋଷ ବ୍ୟୁରୋ: ଭାରତ ଏସିଆ କପ ଚାମ୍ପିଅନ। ପାକିସ୍ତାନକୁ ହରାଇ ନବମ ଥର ଲାଗି ଏସିଆ କପ ହାତେଇଲା ଭାରତ। ୧୪୬ ରନର ଟାର୍ଗେଟକୁ ଶେଷ ଓଭରରେ ହାସଲ କରିଥିଲା ଟିମ ଇଣ୍ଡିଆ। ତିଲକ ବର୍ମାଙ୍କଙ୍କ ଅପରାଜିତ ୬୯ରନର ବିଜୟ ପାଳି ଖେଳିଥିଲେ। ଶିବମ ଦୁବେ ଦ୍ଵିତୀୟ ସର୍ବାଧିକ ୩୩ ରନ କରିଥିଲେ। ତିଲକ ବର୍ମାଙ୍କୁ ମ୍ୟାନ ଅଫ ମ୍ୟାଚ ଘୋଷଣା କରାଯାଇଥିଲା। ମ୍ୟାନ ଅଫ ଦି ସିରିଜ ହୋଇଥିଲେ ଅଭିଶେକ ଶର୍ମା ।
ତେବେ ଏସିଆ କପ ଟ୍ରଫି ପ୍ରଦାନ ଉତ୍ସବରେ ପାକିସ୍ତାନ କ୍ରିକେଟ ବୋର୍ଡ ଅଧ୍ୟକ୍ଷ ମୋହସିନ ନକଭିଙ୍କ ଠାରୁ ଟ୍ରଫି ଗ୍ରହଣ କରିନଥିଲେ ଭାରତୀୟ ଖେଳାଳି। ବିନା ଟ୍ରଫିରେ ଭାରତୀୟ ଟିମ ବିଜୟ ସେଲିବ୍ରେଶନ ପାଳନ କରିଥିଲା। ଏସିଆ କପରେ ବିଜୟ ନେଇ ବିସିସିଆଇ ପକ୍ଷରୁ ପୁରସ୍କାର ଘୋଷଣା କରାଯାଇଛି। ଟିମ ଇଣ୍ଡିଆ ଲାଗି ୨୧ କୋଟି ଟଙ୍କା ପୁରସ୍କାର ଘୋଷଣା କରିଛି ବିସିସିଆଇ। ଏସିଆ କପରେ ବିଜୟ ନେଇ ଟିମ ଇଣ୍ଡିଆକୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଖେଳ ପଡ଼ିଆରେ ମଧ୍ୟ ଅପରେସନ ସିନ୍ଦୂରର ଝଲକ ଦେଖିବାକୁ ମିଳିଥିଲା ବୋଲି ଏକ୍ସରେ ଟୁଇଟ କରି ଲେଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।
ନନ୍ଦିଘୋଷ ବ୍ୟୁରୋ: ଦିନକ ପରେ କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମାଣିକେଶ୍ବରୀଙ୍କ ପ୍ରସିଦ୍ଧ ଛତର ଯାତ୍ରା। ଯାତ୍ରାରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ। ହଜାର ହଜାର ସଂଖ୍ୟାରେ ମାନସିକଧାରୀ ବଳି ଦେଇ ଆସୁଥିବା ବେଳେ ଏହାକୁ ନେଇ ପ୍ରସ୍ତୁତି ଚାଲିଛି।
ଦିନକ ପରେ ମା’ ମାଣିକେଶ୍ବରୀଙ୍କ ପ୍ରସିଦ୍ଧ ଛତର ଯାତ୍ରା । ଚଳଚଞ୍ଚଳ କଳାହାଣ୍ଡି ଜିଲ୍ଲା । ମୂଳାଷ୍ଟମୀ ଦିନ ଭବାନୀପାଟଣା ରାଜପ୍ରସାଦରେ ଥିବା ମାଣିକେଶ୍ବରୀ ପୀଠରେ ମୁଣ୍ଡବସା ଠାରୁ ଆରମ୍ଭ କରି ମହାଷ୍ଟମୀ ପର୍ଯ୍ୟନ୍ତ ସ୍ବତନ୍ତ୍ର ପୂଜାର୍ଚ୍ଚନା କରାଯାଇଥାଏ । ମାନସିକଧାରୀମାନେ ଦେବୀଙ୍କ ପାଖରେ ଅର୍ପଣ କରିଥାନ୍ତି ବିଳି। ରକ୍ତରଞ୍ଜିତ ହୋଇଯାଏ ଯାତ୍ରାସ୍ଥଳୀ । ଏହାସହ ଶାନ୍ତିର ପ୍ରତୀକ ଭାବେ ଶହ ଶହ ପାରାକୁ ଦେବୀଙ୍କ ଛତର ଉପରେ ଉଡ଼ାଇବାର ପରମ୍ପରା ରହିଛି । ଭିଡକୁ ଦୃଷ୍ଟିରେ ରଖି ଜିଲ୍ଲା ପୋଲିସ ପ୍ରଶାସନ ପକ୍ଷରୁ ପ୍ରସ୍ତୁତି ଜୋରଦାର କରାଯାଇଛି। ସୁରକ୍ଷା ବ୍ୟବସ୍ଥା ପାଇଁ ୧୦ ପ୍ଲାଟୁନ ପୋଲିସ ଫୋର୍ସ ମୁତୟନ ହେବା ସହ ସିସିଟିଭି ବ୍ୟବସ୍ଥା କରାଯାଇଛି।
ପ୍ରତିବର୍ଷ ଆଶ୍ୱିନ ମୂଳାଷ୍ଟମୀ ତିଥିରେ ମାଣିକେଶ୍ଵରୀଙ୍କ ମସ୍ତକ ସ୍ଥାପନ ପୂର୍ବକ ନବକଳେବର କରା ଯାଇଥାଏ। ମହାଷ୍ଟମୀର ମଧ୍ୟରାତ୍ରୀରେ ସ୍ଵତନ୍ତ୍ର ଗୁପ୍ତ ପୂଜା ପରେ ମା’ଙ୍କ ବିଜୟ ପ୍ରତିମା ଛତରକୁ ନେଇ ଯାତ୍ରା ଆରମ୍ଭ ହୁଏ। ପଶ୍ଚିମ ଉପକଣ୍ଠରେ ଥିବା ଫାଶି ଡଙ୍ଗର ନିକଟରେ ଥିବା ଜେନାଖାଲକୁ ନିଆଯାଏ। ଜେନାଖାଲରେ ସ୍ଵତନ୍ତ୍ର ଗୁପ୍ତ ରୀତିନୀତିରେ ପୂଜାର୍ଚ୍ଚନା ପରେ ମନ୍ଦିର ଅଭିମୂଖେ ଯାତ୍ରା ଆରମ୍ଭ ହୁଏ । ଦେବୀଙ୍କ ଛତର ମନ୍ଦିରରେ ପହଞ୍ଚିବା ପରେ ବୁଢ଼ାରଜାଙ୍କ ନିକଟରେ ନବାନ୍ନ ଭୋଗ ଅର୍ପଣ କରି ଲୋକେ ନବାନ୍ନ ଭକ୍ଷଣ କରିଥାନ୍ତି । ଛତରଯାତ୍ରାରେ ରକ୍ତରଞ୍ଜିତ ହେବ ଜେନାଖାଲ । ସେପଟେ ବଳିପ୍ରଥା ରୋକିବାକୁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଗ୍ରହଣ କରାଯାଇଛି।
ନନ୍ଦିଘୋଷ ବ୍ୟୁରୋ: ପାର୍ବଣ ପାଇଁ ଉତ୍ସବ ମୁଖର ଗାଁଠୁ ସହର । ଚାଲିଛି ମାଙ୍କ ନବରାତ୍ରୀ ପୂଜା । ବିଭିନ୍ନ ଶକ୍ତି ପୀଠ ଠାରୁ ଆରମ୍ଭ କରି ପୂଜା ମଣ୍ଡପରେ ମା’ଙ୍କ ହେଉଛି ସ୍ବତନ୍ତ୍ର ପୂଜାନୀତି। ବିଭିନ୍ନ ଶକ୍ତି ପୀଠରେ ମାଁଙ୍କ ଆରାଧନା କରାଯାଉଛି । ସେହିଭଳି ଏକ ପୀଠ ହେଉଛି ପାରଳାଖେମୁଣ୍ଡିର ଦାଣ୍ଡୁମାଳା ମନ୍ଦିର । ଏହି ପୀଠ ବର୍ଷରେ ମାତ୍ର ୯ ଦିନ ପାଇଁ ଖୋଲା ଯାଇଥାଏ । ମାଁଙ୍କ ନିକଟରେ ପୂଜା କଲେ ମନସ୍କାମନା ପୂରଣ ହୋଇଥାଏ ବୋଲି ବିଶ୍ବାସ ରହିଛି।
ପାରଳାଖେମୁଣ୍ଡି ଦାଣ୍ଡୁମାଳା ମା ଠାକୁରାଣୀଙ୍କ ପୀଠ । ରହିଛି ସ୍ବତନ୍ତ୍ରତା । ବର୍ଷ ସାରା ମନ୍ଦିର ବନ୍ଦ ରହୁଥିବା ବେଳେ ଦଶହରାରେ ୯ ଦିନ ପୂଜାର୍ଚ୍ଚନା କରାଯାଇଥାଏ। ଦଶହରା ବିଳମ୍ବିତ ରାତିରେ ଘଟ ଯାତ୍ରାରେ ଆଣି ମାଁଙ୍କ ପୀଠରେ ଏକ ନଡିଆକୁ ଘଟରେ ରଖି ପୁଣି ବନ୍ଦ କରିଦିଆଯାଏ । ବର୍ଷେ ପରେ ଏହି ନଡ଼ିଆକୁ ଭୋଗରେ ଲାଗି କରାଯାଇଥାଏ । ବର୍ଷ ବର୍ଷ ଧରି ଏହି ପରମ୍ପରା ଚାଲି ଆସିଥିବା ବେଳେ ମାଁ ଙ୍କ ମହିମାରୁ କୌଣସି ବର୍ଷ ନଡ଼ିଆ ଖରାପ ହୋଇ ନଥାଏ ବୋଲି ବିଶ୍ବାସ ରହିଛି। ଏହି ସମୟରେ ମାଙ୍କ ପୂଜାର୍ଚ୍ଚନା କଲେ ସମସ୍ତ ମନସ୍କାମନା ପୂରଣ ହେଉଥିବା ବିଶ୍ବାସ ରହିଛି।
ପୀଠକୁ ନେଇ ଅନେକ କିମ୍ବଦନ୍ତୀ ରହିଛି। ପଣ୍ଡିତଙ୍କ କହିବା ଅନୁସାରେ, ଦାଣ୍ଡୁମାଳା ହେଉଛନ୍ତି ୬୪ଯୋଗିନୀଙ୍କ ପ୍ରତିନିଧି । ନବରାତ୍ରରେ ତାଙ୍କ ନିକଟରେ ଅସ୍ତ୍ରଶସ୍ତ୍ର ପୂଜା ହେଉଥିଲା । ତାଙ୍କୁ ନିମନ୍ତ୍ରଣ କରି ଆଣିବା ବେଳେ ବିଭିନ୍ନ ପ୍ରକାର ବଳି ପ୍ରଦାନ କରାଯାଉଥିଲା । ତାଙ୍କ ସହ ଆସୁଥିବା ୬୪ ଯୋଗିନୀଙ୍କୁ ସନ୍ତୁଷ୍ଟ କରିବା ପାଇଁ ଏହି ସ୍ଥାନରେ ପୂଜାର୍ଚ୍ଚନା କରାଯାଉଥିଲା । ତାଙ୍କ ପ୍ରତିନିଧି ଭାବେ ଏହି ସ୍ଥାନରେ ଦାଣ୍ଡୁମାଳାଙ୍କୁ ରଖାଯାଇଥିଲା ।
ନନ୍ଦିଘୋଷ ବ୍ୟୁରୋ: ଧାନକଟା ସମୟରେ ମାଡ଼ିଆସିଲା ବନ୍ୟା ପାଣି। ହେକ୍ଟର ହେକ୍ଟର ଚାଷଜମିରେ ଲହଡ଼ି ମାରୁଛି ବନ୍ୟା ଜଳ। ଭାସୁଛି ପାଚିଲା ଧାନ । ଧାର କରଜ କରି ଚାଷ କରିଥିବା ଚାଷୀ ଏବେ ଚିନ୍ତାରେ। କେନ୍ଦ୍ରାପଡା ଜିଲ୍ଲା ମାର୍ଶାଘାଈ ବ୍ଲକ କରାଣ୍ଡିଆ ପାଟଣା ଗାଁରେ ବ୍ୟାପକ ଫସଲ ନଷ୍ଟ ହୋଇଛି। ସେପଟେ ଲଗାଣ ବର୍ଷା ଚାଷୀର ମେରୁଦଣ୍ଡ ଦୋହଲାଇ ଦେଇଛି ।
ଦାଉ ସାଧିଲା ବନ୍ୟାପାଣି। ଉଜାଡି ଦେଲା ଚାଷୀର ସୁନା ଫସଲ । ଋଣ ଶୁଝିବା ଚିନ୍ତାରେ ଚଷାପୁଅ । କେନ୍ଦ୍ରାପଡା ଜିଲ୍ଲା ମାର୍ଶାଘାଈ ବ୍ଲକ କରାଣ୍ଡିଆ ପାଟଣା ଗାଁରେ ବ୍ୟାପକ ଫସଲ ନଷ୍ଟ । ଲୁଣା ଓ କରାଣ୍ଡିଆ ନଦୀରେ ଚଳିତ ବର୍ଷ ତିନିଥର ବନ୍ୟା ଆସି ଧାନ ଫସଲ ଉଜାଡ଼ି ଦେଇଛି। ଯୁଆଡେ ଚାହିଁବ ଚାଷ ଜମିରେ ପାଣି ହିଁ ପାଣି। ସୃଷ୍ଟି କରୁଛି ଚିଲିକାର ଭ୍ରମ।ପ୍ରାୟ ୨ଶହ ହେକ୍ଟର ଜମିରେ ପାଚିଲା ଧାନ ଫସଲ ସହିତ ରୁଆ ହୋଇଥିବା ୬୦ ହେକ୍ଟରରୁ ଅଧିକ ଜମିରେ ସାରଦ ଧାନ ଫସଲ ବନ୍ୟା ପାଣିରେ ବୁଡି ପଚିଷଢି ନଷ୍ଟ ହୋଇଯାଇଛି। ସ୍ଥିତି ଏପରି ହୋଇଛି ପାଚିଲା ଧାନ ଜମିରେ ଡଙ୍ଗା ଚାଲୁଛି। ଆଉ ଧାନ ପାଣିରେ ବୁଡି ରହିବା ଫଳରେ ଗଜା ହୋଇଗଲାଣି।
ଧାର କରଜ କରି ଶହ ଶହ ହେକ୍ଟର ଜମିରେ ଧାନ ଫସଲ ଚାଷ କରିଥିଲେ କରାଣ୍ଡିଆ ପାଟଣା ଗାଁର ଚାଷୀ। ହେଲେ ନଦୀରେ ବନ୍ୟା ଆସି ଧାନ ଫସଲକୁ ସମ୍ପୁର୍ଣ୍ଣ ନଷ୍ଟଭ୍ରଷ୍ଟ କରିଛି। ରୁଆ ହୋଇଥିବା ସାରଦ ଧାନ ଫସଲ ମଧ୍ଯ ପଚିଶଢି ଯାଇଥିବା ଚାଷି ଅଭିଯୋଗ କରିଛନ୍ତି। ତେଣୁ ସରକାର ତୁରନ୍ତ କ୍ଷୟକ୍ଷତିର ଆକଳନ କରି କ୍ଷତିପୂରଣ ଦେବାକୁ ଦାବି କରିଛନ୍ତି ଚାଷୀ।
ନନ୍ଦିଘୋଷ ବ୍ୟୁରୋ: ବରମୁଣ୍ଡା ଓଭରବ୍ରିଜ ଉପରେ ସିରିଜ ଦୁର୍ଘଟଣା କଲା ମିଲର । କଙ୍କ୍ରିଟ୍ ବୁହା ହେଉଥିବା ମିଲର ଗାଡି, ଅନ୍ୟ ଦୁଇଟି ଗାଡିର ପଛ ପଟକୁ ଧକ୍କା ଦେଇଥିଲା । ଅଳ୍ପକେ ଦୁଇ ଗାଡି ଡ୍ରାଇଭର ବଞ୍ଚି ଯାଇଥିବା ବେଳେ, ଗାଡି ଗୁଡିକ ସମ୍ପୂର୍ଣ୍ଣ ଭାଙ୍ଗି ଯାଇଚି । ଦୁର୍ଘଟଣା କାରଣରୁ ଲମ୍ବା ଲମ୍ବା ଧାଡିରେ ଗାଡି ସବୁ ଅଟକି ରହିଚି । ସେପଟେ ଅଳ୍ପକେ ବର୍ତ୍ତୀ ଯାଇଥିବା ଲୋକ କହିଛନ୍ତି ଭାଗବାନ ବଞ୍ଚାଇ ଦେଲେ, ହେଲେ ମିଲର ଡ୍ରାଇଭର ଙ୍କ ବେପରୁଆ ଗାଡି ଚାଳନା ପାଇଁ ଏମିତି ଦୁର୍ଘଟଣା ଘଟିଲା ବୋଲି କରିଛନ୍ତି ଅଭିଯୋଗ । ଘଟଣା ସ୍ଥଳରେ ଖଣ୍ଡଗିରି ପୋଲିସ ପହଂଚି ମିଲର ଗାଡିକୁ ଯବତ କରିବା ସହିତ ଡ୍ରାଇଭରଙ୍କ ଥାନାକୁ ନେଇଛି ।
ନନ୍ଦିଘୋଷ ବ୍ୟୁରୋ: ନିକଟରେ ଆମେରିକା ରାଷ୍ଟ୍ରପତି ଡୋଲାନ୍ଡ ଟ୍ରମ୍ପଙ୍କୁ ସାକ୍ଷାତ କରିଛନ୍ତି ସରିଫ ଏବଂ ପାକିସ୍ତାନ ସେନା ମୁଖ୍ୟ ଅସୀମ ମୁନୀର । ତେବେ ଉଭୟ ଏକ ବାକ୍ସ ଧରି ଟ୍ରମ୍ପଙ୍କୁ ଦେଖାଉଥିବାର ଫଟୋ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଏହା ଦେଖାଯାଉଛି ଯେ ସେ ପାକିସ୍ତାନୀ ଖଣିରୁ ଧାତୁ, ବିରଳ ମାଟି ଏବଂ ମୂଲ୍ୟବାନ ପଥର ଧାରଣ କରିଥିବା ଏକ ଉପହାର ଦେଉଛନ୍ତି। ଏହା ଦ୍ୱାରା ଅନୁମାନ କରାଯାଉଛି ଯେ ଅସୀମ ମୁନିର ପାକିସ୍ତାନର ସମ୍ପଦ ଟ୍ରମ୍ପଙ୍କୁ ବିକ୍ରି କରିବାକୁ ପ୍ରସ୍ତୁତ।
Seems like @POTUS was presented with a gift of metals, rare earth, and precious stones from 🇵🇰’s mines during his recent meeting with PM Sharif and Field Marshal Munir. pic.twitter.com/F1BIrpRidD
— Uzair Younus عُزیر یُونس (@UzairYounus) September 27, 2025
ହ୍ୱାଇଟ୍ ହାଉସର ଏହି ଫଟୋ ବହୁତ ବିତର୍କ ସୃଷ୍ଟି କରିଛି। କୁହାଯାଉଛି ଯେ ପାକିସ୍ତାନୀ ସେନା ମୁଖ୍ୟ ଅସୀମ ମୁନିର ବେଲୁଚିସ୍ତାନ, ଖାଇବର ପଖତୁନଖ୍ୱା ଇତ୍ୟାଦିରେ ଥିବା ବିରଳ ଖଣିଜ ପଦାର୍ଥର ଅଧିକାର ଟ୍ରମ୍ପଙ୍କୁ ହସ୍ତାନ୍ତର କରି ପାକିସ୍ତାନକୁ ଆମେରିକାକୁ ବିକ୍ରି କରିଦେଇଛନ୍ତି। ଏହା ଉଲ୍ଲେଖନୀୟ ଯେ ଏପର୍ଯ୍ୟନ୍ତ ଚୀନର ଏହି କ୍ଷେତ୍ରଗୁଡ଼ିକରେ ସ୍ୱତନ୍ତ୍ର ଅଧିକାର ଥିଲା ଏବଂ ଏହାର କମ୍ପାନୀଗୁଡ଼ିକ ସେଠାରେ କାର୍ଯ୍ୟ କରୁଥିଲେ। ଟ୍ରମ୍ପ ଜଣେ ବ୍ୟବସାୟୀ, ଏବଂ ବାଣିଜ୍ୟ କ୍ଷେତ୍ରରେ ସେ ପାକିସ୍ତାନକୁ ଆମେରିକାର ସବୁଠାରୁ ଭଲ ବନ୍ଧୁ ବୋଲି କହିବାରେ କୌଣସି ଆଶ୍ଚର୍ଯ୍ୟର କଥା ନୁହେଁ।
ନନ୍ଦିଘୋଷ ବ୍ୟୁରୋ: ଖୋର୍ଦ୍ଧା ଜିଲ୍ଲା ବାଲୁଗାଁ ଅଞ୍ଚଳର ପ୍ରତିଷ୍ଠିତ ବ୍ୟବସାୟୀ ସୁଶୀଲ ସୁବୁଦ୍ଧିଙ୍କୁ ଅପହରଣ ଘଟଣାରେ ୪ ଜଣଙ୍କୁ ଗିରଫ କଲା ଟାଙ୍ଗୀ ପୋଲିସ । ୧୬ ନମ୍ବର ଜାତୀୟ ରାଜପଥ ଟାଙ୍ଗୀ ନିକଟସ୍ଥ ଚାନ୍ଦପୁର ଥାନା କଟରା ପଲୀ ଗାଁ ଭିତରୁ ୪ ଅପହରଣ କାରୀ ସହ କାରକୁ ଜବତ କରାଯାଇଛି । ବହୂ ମାରଣାସ୍ତ୍ର ସହ ଅପହରଣ କାରୀ ଗିରଫ ହୋଇଛନ୍ତି । ଗତକାଲି ରାତି ପାଖାପାଖି ସାଢେ ୧୧ଟା ବେଳେ ସୁଶୀଲ ବାଲୁଗାଁ ଆଇଡିବିଆଇ ବ୍ୟାଙ୍କ ତଳେ ଥିବା ତାଙ୍କ ବ୍ୟବସାୟ ପ୍ରତିଷ୍ଠାନ ବନ୍ଦ କରି ଏକ ସ୍କୁଟି ଡ଼ିକିରେ ୨୦ ଲକ୍ଷରୁ ଅଧିକ ଟଙ୍କା ନେଇ ଘରକୁ ଫେରୁଥିଲେ । ଏହି ସମୟରେପାଟଣା ସାହି ସ୍କୁଲ ନିକଟରେ ଏକ କାରରେ କିଛି ଦୁର୍ବୁତ୍ତ ସୁଶୀଲଙ୍କୁ ଅପହରଣ କରି ନେଇଯାଇଥିଲେ । ଏହା ସହ ସ୍କୁଟି ମଧ୍ୟ ନେଇଯାଇଥିଲେ ଅପହରଣ କାରୀ । ଏନେଇ ଅଭିଯୋଗ ପରେ ୧୬ ନମ୍ବର ଜାତୀୟ ରାଜପଥରେ ଟାଙ୍ଗୀ ଓ ବାଲୁଗାଁ ପୋଲିସ ଅପହରଣ କାରୀଙ୍କ ଗାଡିକୁ ପିଛା କରିଥିଲେ । ଟାଙ୍ଗୀ ଚାନ୍ଦପୁର ନିକଟ କଟରା ପଲୀ ନିକଟରେ ଅପହରଣ କାରୀ କାର ସହ ଗାଁ ଭିତରକୁ ପଶି ଯାଇଥିଲେ । ତେବ ଗ୍ରାମାବସୀଙ୍କ ସହାୟତାରେ ୪ ଜଣ ଅପହରଣକାରୀଙ୍କୁ ଟାଙ୍ଗୀ ପୋଲିସ ଧରିବାରେ ସଫଳ ହୋଇଛି । ଘଟଣାରେ ଅଧିକ ତଦନ୍ତ କରୁଛି ପୋଲିସ ।
