ନନ୍ଦିଘୋଷ ବ୍ୟୁରୋ: ପ୍ରକାଶ ପାଇଲା ଆଇସିସି ତାଲିକା । ବ୍ୟାଟିଂରେ ତିନୋଟି ଯାକ ଫର୍ମାଟରେ ଟପ ୫ ଭିତରେ ରହିଛନ୍ତି ପାକିସ୍ତାନୀ ବ୍ୟାଟ୍ସମ୍ୟାନ ବାବର ଆଜମ । ଦିନିକିଆରେ ବାବର ଆଜମ ଏକ ନମ୍ବର ସ୍ଥାନରେ ରହିଥିବାବେଳେ ଦ୍ବିତୀୟ ସ୍ଥାନରେ ରହିଛନ୍ତି ଭାରତୀୟ ଅଧିନାୟକ ରୋହିତ ଶର୍ମା, ତୃତୀୟ ସ୍ଥାନରେ ଶୁଭମନ ଗିଲ ରହିଥିବାବେଳେ ଚତୁର୍ଥ ସ୍ଥାନରେ ରହିଛନ୍ତି ବିରାଟ କୋହଲି । ଦିନିକିଆ ରାଙ୍କିଂରେ ଟପ ୫ ମଧ୍ୟରେ ତିନିଜଣ ଭାରତୀୟ ଖେଳାଳି ରହିଛନ୍ତି । ଦିନିକିଆରେ ପଞ୍ଚମ ସ୍ଥାନରେ ରହିଛନ୍ତି ଆୟାରଲ୍ୟାଣ୍ଡର ହେନରି ଟ୍ୟକ୍ଟର । ସେହିପରି ଟେଷ୍ଟରେ ବ୍ୟାଟ୍ସମ୍ୟାନଙ୍କ ମଧ୍ୟରେ ଏକ ନମ୍ବର ସ୍ଥାନରେ ରହିଛନ୍ତି ଇଂଲଣ୍ଡର ଜୋ ରୁଟ୍, ଦ୍ବିତୀୟ ସ୍ଥାନରେ ବାବର ଆଜମ ରହିଥିବାବେଳେ ଟପ ୫ରେ ଜଣେ ମଧ୍ୟ ଭାରତୀୟ ଖେଳାଳି ନାହାନ୍ତି । ଅନ୍ୟପଟେ ଟି-୨୦ କଥା ଯଦି କହିବା ତାହେଲେ ଏକ ନମ୍ବର ସ୍ଥାନରେ ଅଷ୍ଟ୍ରେଲୀୟ ଖେଳାଳି ଟ୍ରାଭିସ ହେଡ ଏକ ନମ୍ବର ସ୍ଥାନରେ ରହିଛନ୍ତି । ଦ୍ବିତୀୟ ସ୍ଥାନରେ ରହିଛନ୍ତି ଭାରତୀୟ ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବ । ବାବର ଆଜମ ୫ ନମ୍ବରେ ସ୍ଥାନରେ ରହିଛନ୍ତି ।
ରଙ୍ଗିଲା ସ୍ଵାମୀକୁ ହୋଟେଲରୁ ଧରିଲା ସ୍ତ୍ରୀ
ଭୁବନେଶ୍ୱର : ଏକାଧିକ ବଙ୍ଗୀୟ ଯୁବତୀଙ୍କ ସହ ଅସଂଯତ ଅବସ୍ଥାରେ ଓୟୋ ହୋଟେଲରୁ ସ୍ୱାମୀକୁ ରଙ୍ଗେ ହାତ ଧରିଲା ସ୍ତ୍ରୀ। ଭୁବନେଶ୍ବର ପଟିଆରେ ଥିବା ଏକ ଓୟୋ ହୋଟେଲରେ ରାତି ଅଧରେ ସ୍ତ୍ରୀ ଧରିବା ପରେ ସ୍ବାମୀ ସହ ବଙ୍ଗୀୟ ଯୁବତୀ ଇନଫୋସିଟି ଥାନାରେ ଅଟକ । ମିଳିଥିବା ସୂଚନା ଅନୁସାରେ ପେଶାରେ ରାପର ଥିବା ରୋମିଓ ସ୍ବାମୀ ଜଣକ ଦୁଇ ବଙ୍ଗୀୟ ଯୁବତୀଙ୍କ ସହ ଗୋଟିଏ ଓୟୋ ରୁମରେ ଥିଲେ ।
କୌଣସି ସୂତ୍ରରୁ ଖବର ପାଇ ତାଙ୍କ ସ୍ତ୍ରୀ ତାଙ୍କୁ ଧରିବା ପାଇଁ ପୋଲିସକୁ ଧରି ସ୍ପଟରେ ପହଞ୍ଚିଥିଲେ । ପହଞ୍ଚିବାପରେ ଯେଉଁ ରୁମରେ ସେମାନେ ଥିଲେ ସେଠାରେ ପହଞ୍ଚି ତାଙ୍କୁ ରଙ୍ଗେ ହାତ ଧରିଥିଲେ । ରୁମ ଭିତରୁ ବହୁ ଆପତ୍ତିଜନକ ସାମଗ୍ରୀ ମିଳିଛି । ଏତଲା ଆଧାରରେ ଇନଫୋସିଟି ଥାନା ପୋଲିସ ଯୁବକ ଓ ଦୁଇ ବଙ୍ଗୀୟ ଯୁବତୀଙ୍କୁ ଅଟକ ରଖି ପଚରାଉଚରା କରିଛି । ରୁମରେ ସେକ୍ସ୍ ରାକେଟ ଚାଲିଥିବା ସନ୍ଦେହ କରାଯାଉଛି । ସେପଟେ ଉକ୍ତ ଯୁବକଙ୍କ ନାଁରେ ଚନ୍ଦ୍ରଶେଖରପୁର ଓ ନନ୍ଦନକାନନ ଥାନାରେ ମଧ୍ୟ ପୂର୍ବରୁ ଅଭିଯୋଗ ଥିବା ଜାଣିବାକୁ ପାଇଛି ପୋଲିସ ।
ସ୍ବାଧୀନତା ଦିବସ ପୂର୍ବରୁ ମାତିଲେ ଆତଙ୍କବାଦୀ ; ଜାମ୍ମୁ ଓ କାଶ୍ମୀରରେ ସେନା ଅଫିସର ସହିଦ
ଶ୍ରୀନଗର : ଜାମ୍ମୁ ଓ କାଶ୍ମୀରର ଡୋଡା ଜିଲ୍ଲା ଅନ୍ତର୍ଗତ ଆସାର ଅଞ୍ଚଳରେ ସହିଦ ସେନା ଅଫିସର। ଯବାନ ଓ ଆତଙ୍କବାଦୀଙ୍କ ମଧ୍ଯରେ ହୋଇଥିବା ଗୁଳିବିନିମୟରେ ପ୍ରାଣ ହରାଇଛନ୍ତି ଅଫିସର। ଏହି ଘଟଣାରେ ଜଣେ ନାଗରିକ ଆହତ ହୋଇଛନ୍ତି। ଆତଙ୍କବାଦୀଙ୍କୁ ଧରିବା ଲାଗି ସେଠାରେ ଚାଲିଛି ସର୍ଚ୍ଚ ଅପରେସନ। ଶିବଗଡ଼-ଆସାର ଅଞ୍ଚଳରେ ଆତଙ୍କବାଦୀ ରହିଥିବା ସୂଚନା ମିଳିବା ପରେ ସେଠାରେ ଯବାନଙ୍କ ପକ୍ଷରୁ କର୍ଡନ କରାଯାଇ ସର୍ଚ୍ଚ ଅପରେସନ କରାଯାଇଥିଲା।
ଆତଙ୍କବାଦୀଙ୍କ ନିକଟରୁ ଏକ ଆମେରିକା ନିର୍ମିତ ଏମ-୪ ଆସଲ୍ଟ ରାଇଫସ ଜବତ ହୋଇଛି। ସ୍ବାଧୀନତା ଦିବସ ଲାଗି ସାରା ଦେଶରେ ସତର୍କତାମୂଳକ ପଦକ୍ଷେପ ନିଆଯାଇଥିବାବେଳେ ଜାମ୍ମୁ ଓ କାଶ୍ମୀରରେ ବି ଅପରେସନ ଜୋରଦାର କରାଯାଇଛି। ନିରାପତ୍ତା ପ୍ରସଙ୍ଗରେ ବରିଷ୍ଠ ଅଧିକାରୀଙ୍କ ସହ ପ୍ରତିରକ୍ଷା ରାଜନାଥ ସିଂଙ୍କ ବୈଠକ ପରେ ଏହି ଆକ୍ରମଣ ଚିନ୍ତା ସୃଷ୍ଟି କରିଛି। ଗତ ମାସରେ କୁପୱାରା ଜିଲ୍ଲାରେ ଆତଙ୍କୀଙ୍କ ଗୁଳିରେ ଜଣେ ଯବାନଙ୍କ ପ୍ରାଣହାନି ଘଟିଥିଲା।
ଖଣି କମ୍ପାନୀଙ୍କଠାରୁ ବକେୟା ରୟାଲଟି ଆଦାୟ କରିପାରିବେ ରାଜ୍ୟ, ଅନୁମତି ପ୍ରଦାନ କଲେ ସୁପ୍ରିମକୋର୍ଟ
ନୂଆଦିଲ୍ଲୀ : ଖଣି ବହୁଳ ରାଜ୍ଯଗୁଡିକ ଲାଗି ଖୁସିର ଖବର। ଏହି ରାଜ୍ଯଗୁଡିକ ସପକ୍ଷରେ ରାୟ ଦେଇଛନ୍ତି ସୁପ୍ରିମକୋର୍ଟ। ଖଣି ବହୁଳ ରାଜ୍ଯଗୁଡିକ ବିଭିନ୍ନ ଖଣି କମ୍ପାନିଙ୍କଠାରୁ ବକେୟା ରୟାଲଟି ଆଦାୟ କରିପାରିବେ ବୋଲି ଅନୁମତି ଦେଇଛନ୍ତି ସର୍ବୋଚ୍ଚ ଅଦାଲତ। ଏପରିକି ବିଗତ ୧ ଏପ୍ରିଲ ୨୦୦୫ରୁ ରାଜ୍ଯମାନେ ଲେଭି ଲାଗୁ କରିପାରିବେ।
ଗତମାସରେ ମାମଲାର ଶୁଣାଣି କରି ସୁପ୍ରିମକୋର୍ଟ କହିଥିଲେ- ଖଣିସମୃଦ୍ଧ ଇଲାକାରୁ ରୟାଲଟି ଆଦାୟ କରିବା ରାଜ୍ଯ ସରକାରଙ୍କ ଅଧିକାର ରହିଛି ବୋଲି କହିଥିଲେ ଅଦାଲତ। ପ୍ରଧାନ ବିଚାରପତି ଜଷ୍ଟିସ ଡି.ୱାଇ. ଚନ୍ଦ୍ରଚୂଡ଼ଙ୍କୁ ନେଇ ଗଠିତ ଖଣ୍ଡପୀଠରେ ୮ ସଦସ୍ୟ ସପକ୍ଷରେ ରାୟ ଦେଇଥିବାବେଳେ ଜଣେ ସଦସ୍ଯ ବିରୋଧ କରିଥିଲେ। ସୁପ୍ରିମକୋର୍ଟଙ୍କ ଏହି ରାୟ ଯୋଗୁ ଓଡିସା, ଝାଡ଼ଖଣ୍ଡ, ପଶ୍ଚିମବଙ୍ଗ, ଛତିଶଗଡ଼, ମଧ୍ଯପ୍ରଦେଶ, ରାଜସ୍ଥାନ ଆଦି ରାଜ୍ଯ ଉପକୃତ ହେବେ।
ମୁଖ୍ଯମନ୍ତ୍ରୀ ଅରବିନ୍ଦ କେଜରିୱାଲଙ୍କ ଅନ୍ତରୀଣ ଜାମିନ ଆବେଦନ ଖାରଜ
ନୂଆଦିଲ୍ଲୀ : ଦିଲ୍ଲୀ ମଦନୀତି ମାମଲା। ମୁଖ୍ଯମନ୍ତ୍ରୀ ଅରବିନ୍ଦ କେଜରିୱାଲଙ୍କ ଅନ୍ତରୀଣ ଜାମିନକୁ ଅଗ୍ରାହ୍ଯ କରିଛନ୍ତି ସୁପ୍ରିମକୋର୍ଟ। ଏହି ମାମଲାରେ ସୁପ୍ରିମକୋର୍ଟ ସିବିଆଇର ଉତ୍ତର ଚାହିଁବା ସହ ମାମଲାର ଶୁଣାଣିକୁ ଆସନ୍ତା ଅଗଷ୍ଟ ୨୩ ଯାଏ ସ୍ଥଗିତ ରଖିଛନ୍ତି। ସୁପ୍ରିମକୋର୍ଟ ଖଣ୍ଡପୀଠ ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଉଜ୍ବଳ ଭୂୟାଁଙ୍କ ଖଣ୍ଡପୀଠ ନିକଟରେ କେଜରିୱାଲଙ୍କ ଓକିଲ ଅଭିଷେକ ମନୁ ସିଂଘଭି କହିଛନ୍ତି କେଜରିୱାଲଙ୍କୁ ଜାମିନ ନ ମିଳିବା ଦୁର୍ଭାଗ୍ଯଜନକ।
ଗତ ଅଗଷ୍ଟ ୫ରେ କେଜରିୱାଲଙ୍କ ଗିରଫକୁ ଯଥାର୍ଥ ଦର୍ଶାଇଥିଲେ ଦିଲ୍ଲୀ ହାଇକୋର୍ଟ। ଗତ ୨୧ ମାର୍ଚ୍ଚରେ ମଦନୀତି ମାମଲାରେ କେଜରିୱାଲଙ୍କୁ ଇଡି ଗିରଫ କରିଥିଲା। ମେ ୧୦ରେ ତାଙ୍କୁ ସୁପ୍ରିମକୋର୍ଟରୁ ଜାମିନ ମିଳିବା ପରେ ଜୁନ ୨ରେ ସରେଣ୍ଡର କରିଥିଲେ। ପରେ ଜୁନ ୨୦ରେ ରାଉସ ଆଭେନ୍ଯୁ କୋର୍ଟ ଜାମିନ ଦେଇଥିଲେ ବି ହାଇକୋର୍ଟ ତାଙ୍କ ଜାମିନକୁ ରଦ୍ଦ କରିଥିଲେ।
ୟୁନୁସ ଓ ମୋଦିଙ୍କ ମଧ୍ୟରେ ହେବାକୁ ଯାଉଛି ସାକ୍ଷାତ, ମାଗିବେ ହିନ୍ଦୁଙ୍କ ଉପରେ ଆକ୍ରମଣର ଜବାବ ?
ନୂଆଦିଲ୍ଲୀ : ବାଂଲାଦେଶରେ ଗାଦି ବଦଳ ପରେ ଏବେ ଦେଶରେ ମହମ୍ମଦ ୟୁନୁସଙ୍କ ହାତରେ ଦେଶର କମାଣ୍ଡ ଅଛି । ଏହା ମଧ୍ୟରେ ବାଂଲାଦେଶରେ ଚାଲିଥିବା ଉତ୍ତେଜନା ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ରମୋଦୀ ଏବଂ ୟୁନୁସଙ୍କ ମଧ୍ୟରେ ଏକ ଭେଟଘାଟ ହୋବାକୁ ଯାଉଛି । ମୋଦି ନୋବେଲ ବିଜେତା ୟୁନୁସଙ୍କୁ BIMSTEC ସମ୍ମିଳନୀରେ ସାକ୍ଷାତ ହୋଇପାରନ୍ତି ବୋଲି ସୂଚନା ରହିଛି । ସେପ୍ଟେମ୍ୱରରେ ବ୍ୟାଙ୍କକ୍ ଠାରେ BIMSTEC ସମ୍ମିଳନୀ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି ।
ଥାଇଲ୍ୟାଣ୍ଡ ଆସନ୍ତା ମାସରେ BIMSTEC ସମ୍ମିଳନୀ ଆୟୋଜିତ କରୁଛି । ଭାରତ, ବାଂଲାଦେଶ, ଥାଇଲ୍ୟାଣ୍ଡ, ଭୁଟାନ, ନେପାଲ, ଶ୍ରୀଲଙ୍କା ଏବଂ ମିଆଁମାରକୁ ନେଇ ଗଠିତ ଏହି ବହୁପକ୍ଷୀୟ ସଂଗଠନର ଗୁରୁତ୍ୱ ଗତ କିଛି ବର୍ଷ ମଧ୍ୟରେ ବୃଦ୍ଧି ପାଇଛି । ଏହି ସମ୍ମିଳନୀରେ ମହମ୍ମଦ ୟୁନୁସ ସହ ନରେନ୍ଦ୍ର ମୋଦୀ ବାଂଲାଦେଶରେ ହିନ୍ଦୁଙ୍କ ଆକ୍ରମଣ ପ୍ରସଙ୍ଗରେ ଆଲୋଚନା କରିପାନ୍ତି ବୋଲି କୁହାଯାଉଛି ।
ଭାରତ ସୀମା ପାର କରିବାକୁ ଚେଷ୍ଟା କରୁଥିବା ବାଂଲାଦେଶୀଙ୍କୁ ଗରଫ କରାଯାଇଛି । ଏମାନେ ଦେଶରେ ଚାଲିଥିବା ହିଂସା ଏବଂ ରାଜନୈତିକ ଅସ୍ଥିରତା ଠାରୁ ବଞ୍ଚିବା ପାଇଁ ଭାରତ ଆସିବାକୁ ଚେଷ୍ଟା କରୁଥିଲେ । ଏହା ଛଡା ସୀମାରେ ଏବେ ବି ଶହ ଶହ ଲୋକ ଭାରତରରେ ପ୍ରବେଶ କରିବାକୁ ଅନୁମତି ମାଗୁଛନ୍ତି । ବାଂଲାଦେଶରେ ଥିବା ସ୍ୱଳ୍ପ ସଂଖ୍ୟକ ହିନ୍ଦୁଙ୍କ ଉପରେ ହେଉଥିବା ହିଂସାକୁ ନେଇ ଭାରତ ସରକାର ମଧ୍ୟ ଚିନ୍ତାରେ ।
ପାକିସ୍ତାନ ଠାରୁ ଟସରେ ସ୍ୱର୍ଣ୍ଣ ଖଚିତ ରଥ ଜିତିଥିଲା ଭାରତ
ନୂଆଦିଲ୍ଲୀ : ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ମହାଆଡ଼ମ୍ୱରରେ ସ୍ୱାଧୀନତା ଦିବସ ପାଳିବ ଭାରତ । ୧୯୪୭ ମସିହାରୁ ଅଗଷ୍ଟ ୧୪ରେ ପାକିସ୍ତାନ ଏବଂ ୧୫ରେ ଭାରତର ସ୍ୱାଧୀନତା ଦିବସ ପାଳନ କରାଯାଏ । ପାକିସ୍ତାନ ଏବଂ ଭାରତ ଅଲଗା ତ ହେଲେ କିନ୍ତୁ ସେ ସମୟରେ ଦୁଇ ଦେଶ ମଧ୍ୟରେ ଅନେକ ଜିନିଷ ବିଭାଜନ ମଧ୍ୟ କରାଯାଇଥିଲା । ଏହାକୁ ଜିନିଷ ବିଭାଜନକୁ ନେଇ ଏକ ରୋଚକ କାହାଣୀ ମଧ୍ୟ ରହିଛି ।
୧୯୪୭ ମସିହାରେ ଯେତେବେଳେ ଭାରତ ଏବଂ ପାକିସ୍ତାନ ମଧ୍ୟରେ ବିଭାଜନ ହୋଇଥିଲା, ସେତେବେଳେ ଦିଲ୍ଲୀର ଦୁଇ ଜଣଙ୍କୁ ସମ୍ପତ୍ତି ବଣ୍ଟନ , ଏହାର ସର୍ତ୍ତାବଳୀ ଏବଂ ସର୍ତ୍ତ ସ୍ଥିର କରିବାର ଦାୟିତ୍ୱ ଦିଆଯାଇଥିଲା। ଏଥିରେ ଭାରତର ପ୍ରତିନିଧୀ ଥିଲେ ଏଚ୍ ପଟେଲ ଏବଂ ପାକିସ୍ତାନର ଚୌଧୁରୀ ମହମ୍ମଦ ଅଲିଙ୍କୁ ନିଜ ଦେଶର ପକ୍ଷ ଉପସ୍ଥାପନ କରି ବିଭାଜନ କାର୍ଯ୍ୟକୁ ସରଳ କରିବାର ଅଧିକାର ଦିଆଯାଇଥିଲା। ଭୂମିଠାରୁ ସେନା ପର୍ଯ୍ୟନ୍ତ ସବୁକିଛି ଭାରତ ଏବଂ ପାକିସ୍ତାନ ମଧ୍ୟରେ ବିଭକ୍ତ ହୋଇଥିଲା ।
ଏହି ବିଭାଗ ମଧ୍ୟରୁ ଗୋଟିଏ ହେଲା ରାଜ୍ୟପାଳ ଜେନେରାଲଙ୍କ ବଡିଗାର୍ଡ ରେଜିମେଣ୍ଟ। ଏହି ରେଜିମେଣ୍ଟର ବିଭାଜନ ଶାନ୍ତିପୂର୍ଣ୍ଣ ଭାବରେ ହୋଇଥିଲା, କିନ୍ତୁ ରେଜିମେଣ୍ଟର ପ୍ରସିଦ୍ଧ ରଥ ସମ୍ପର୍କରେ ଉଭୟ ପକ୍ଷ ମଧ୍ୟରେ କୌଣସି ଚୁକ୍ତି ହୋଇନଥିଲା। ବାସ୍ତବରେ ଉଭୟ ଦେଶ ଏହାକୁ ନିଜ ସହିତ ରଖିବାକୁ ଚାହୁଁଥିଲେ। ଏଭଳି ପରିସ୍ଥିତିରେ ରାଜ୍ୟପାଳ ଜେନେରାଲଙ୍କ ବଡିଗାର୍ଡର ତତ୍କାଳୀନ କମାଣ୍ଡାର ଏବଂ ତାଙ୍କ ଡେପୁଟି ଏହି ବିବାଦର ସମାଧାନ ପାଇଁ ଏକ ମୁଦ୍ରାରେ ଟସ୍ କରାଯାଇଥିଲା। ଏଥିରେ ଭାରତ ଟସ୍ ଜିତିଥିଲା ଏବଂ ଏହି ରାଜକୀୟ ରଥ ଭାରତର ଅଂଶକୁ ଆସିଥିଲା।
ଏହି ରଥଟି ସୁନା ଫଏଲ୍ ଦ୍ୱାରା ଆଚ୍ଛାଦିତ ଥିଲା । ବ୍ରିଟିଶ ଶାସନ କାଳରେ ଏହି ଘୋଡା ଚାଳିତ ଗାଡି ଭାଏସରାୟଙ୍କୁ ଦିଆଯାଇଥିଲା। ସ୍ୱାଧୀନତା ପୂର୍ବରୁ ଇଂରେଜ ଭାଏସରାୟ ଏହାକୁ ଚଳାଉଥିଲେ। ଭାରତ ଏହି ରଥ ଜିତିବା ପରେ ଏହି ରଥକୁ ପ୍ରଥମ ଥର ପାଇଁ ଗଣତନ୍ତ୍ର ଦିବସ ଅବସରରେ ଭାରତର ପ୍ରଥମ ରାଷ୍ଟ୍ରପତି ରାଜେନ୍ଦ୍ର ପ୍ରସାଦ ବ୍ୟବହାର କରିଥିଲେ।
ପ୍ରଥମେ ପ୍ରଥମେ ଭାରତର ରାଷ୍ଟ୍ରପତି ଏହି ରଥରେ ସମସ୍ତ ସମାରୋହକୁ ଯାଉଥିଲେ ଏବଂ ୩୩୦ ଏକର ବିଶିଷ୍ଟ ରାଷ୍ଟ୍ରପତି ଭବନରେ ବୁଲୁଥିଲେ। ପରେ ସୁରକ୍ଷା କାରଣରୁ ଏହାର ବ୍ୟବହାର ଧୀରେ ଧୀରେ ହ୍ରାସ ପାଇଗଲା | ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ହତ୍ୟା ପରେ ସୁରକ୍ଷାକୁ ଦୃଷ୍ଟିରେ ଏହି ରଥର ବ୍ୟବହାର ସମ୍ପୂର୍ଣ୍ଣ ବନ୍ଦ କରାଯାଇଥିଲା ଏବଂ ରାଷ୍ଟ୍ରପତି ବୁଲେଟ୍ ପ୍ରୁଫ୍ ଗାଡିରେ ହିଁ ଯିବା ଆସିବା କଲେ ।
ବିଧାନସଭାରେ ଦିଗଦର୍ଶନ ନାଁରେ ଦଳୀୟ କାର୍ଯ୍ୟକ୍ରମ କହି ବର୍ଷିଲା ବିଜେଡି
ଭୁବନେଶ୍ୱର : ବିଧାନସଭାରେ ବିଧାୟକଙ୍କୁ ଦିଗଦର୍ଶନ ନାଁରେ ଦଳୀୟ କାର୍ଯ୍ୟକ୍ରମ କହି ବର୍ଷିଲା ବିଜେଡି। ଓଡ଼ିଶା ବିଧାନସଭା ସଚିବାଳୟ ପକ୍ଷରୁ ଏହି କାର୍ଯ୍ଯକ୍ରମ ପାଇଁ ସଚିବ ଏକ ପତ୍ର ଦେଇଛନ୍ତି। ନିବ ନିର୍ବାଚିତ ବିଧାୟକଙ୍କ ନିମନ୍ତେ ଏକ ପ୍ରଶିକ୍ଷଣ ଶିବିର ଅନୁଷ୍ଠିତ ହେବ ବୋଲି ଦର୍ଶାଯାଇଛି। ତେବେ ଏହି କାର୍ଯ୍ୟକ୍ରମରେ ବିଧାନସଭା ପରମ୍ପରା ଭଙ୍ଗ ହେଉଥିବା ବିଜେଡି ଅଭିଯୋଗ କରିଛି।
ଦଳୀୟ କାର୍ଯ୍ୟାଳୟଠାରେ ଏକ ସାମ୍ବାଦିକ ସମ୍ମିଳନୀରେ ଦଳର ବରିଷ୍ଠ ନେତା ପ୍ରତାପ ଦେବ କହିଛନ୍ତି ଯେ, ପରମ୍ପରା ଅନୁସାରେ ମୁଖ୍ଯମନ୍ତ୍ରୀ କିମ୍ବା ବାଚସ୍ପତି ଏହି କାର୍ଯ୍ୟକ୍ରମର ଉଦଘାଟନ ଓ ଉଦଯାପନୀ ଅତିଥି ହେବା କଥା। କିନ୍ତୁ ପତ୍ର ଅନୁସାରେ ଗୃହର ସଦସ୍ୟ ନଥିଲେ ଵି ଧର୍ମେନ୍ଦ୍ର ପ୍ରଧାନ କିପରି ଉଦଘାଟନ କରିବେ ତାକୁ ନେଇ ପ୍ରଶ୍ନ ଉଠାଇଛି ବିଜେଡି।
ସେହିପରି ଗୃହର ସଦସ୍ଯ ନଥିବା ସତ୍ତ୍ବେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ମଧ୍ଯ ଏହି କାର୍ଯ୍ୟକ୍ରମରେ ଯୋଗଦେବେ ତାକୁ ନେଇ ଉଠିଛି ପ୍ରଶ୍ନ। ଏହା ବାଚସ୍ପତିଙ୍କ ପଦ ମର୍ଯ୍ୟାଦାକୁ କ୍ଷୁଣ୍ଣ କରୁଛି ବୋଲି ବିଜେଡି କହିଛି। ପରମ୍ପରା ଭଙ୍ଗ ହେଲେ ବିଜେଡି ବିଧାୟକମାନେ ଏହି କାର୍ଯ୍ୟକ୍ରମରେ ଦୂରେଇ ରହିବେ ବୋଲି ବରିଷ୍ଠ ନେତା ପ୍ରତାପ ଦେବ ଓ ଗଣେଶ୍ବର ବେହେରା କହିଛନ୍ତି। ସେହିଭଳି ଏହି କାର୍ଯ୍ୟକ୍ରମରେ ବିରୋଧୀ ଦଳ ନେତାଙ୍କୁ ଉପଯୁକ୍ତ ସମ୍ମାନ ଦିଆଯାଇ ନଥିବା ବିଜେଡି ଅଭିଯୋଗ କରିଛି।
ସ୍ବାଧୀନତା ଦିବସ ଉପଲକ୍ଷେ ରାଷ୍ଟ୍ରପତି ପଦକ ଘୋଷଣା : ଓଡ଼ିଶାରୁ ୧୩ ଜଣଙ୍କୁ ମିଳିବ ପୋଲିସ ପଦକ
ଭୁବନେଶ୍ୱର : ଓଡ଼ିଶାର ୧୩ ଜଣଙ୍କୁ ମିଳିବ ପୋଲିସ ପଦକ। ସ୍ବାଧୀନତା ଦିବସ ଉପଲକ୍ଷେ ରାଷ୍ଟ୍ରପତି ପଦକ ଘୋଷଣା କରାଯାଇଛି। ଓଡ଼ିଶାରୁ ୧୩ ଜଣ ପାଇବେ ରାଷ୍ଟ୍ରପତି ପୋଲିସ ପଦକ। କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ପୋଲିସ ମେଡାଲ ଘୋଷଣା କରାଯାଇଛି। ଅଗ୍ନିସେବା ଲାଗି ଓଡ଼ିଶାର ୨ ଜଣଙ୍କୁ ଏମଏସଏମ ମିଳିବ। ହୋମଗାର୍ଡ ଓ ସିଭିଲ ଡିଫେନ୍ସର ୨ ଜଣଙ୍କୁ ପିଏସଏମ, ହୋମଗାର୍ଡ ଓ ସିଭିଲ ଡିଫେନ୍ସର ୨ ଜଣଙ୍କୁ ଏମଏସଏମ, କରେକସନାଲ ସର୍ଭିସ ଲାଗି ଓଡ଼ିଶାର ଜଣଙ୍କୁ ଏମଏସଏମ ମିଳିବ।
ଉଲ୍ଲେଖନୀୟ ସେବା ଲାଗି ରାଷ୍ଟ୍ରପତି ପାଇବେ ଅତିରିକ୍ତ ମହାନିର୍ଦ୍ଦେଶକ ସୁରେଶ ଦେବଦତ୍ତ ସିଂ ଓ ଡିଏସପି ସଚ୍ଚିଦାନନ୍ଦ ରଥ। ହୋମଗାର୍ଡ କମ୍ପାନି କମାଣ୍ଡର ପ୍ରକାଶ ଚନ୍ଦ୍ର ସାହୁ ଓ ଓ ସିଭିଲ ଡିଫେନ୍ସ ଭଲ୍ଯୁଣ୍ଟିୟର ସୀମାଞ୍ଚଳ କୁଣ୍ଡୁଙ୍କୁ ମିଳିବ ମେଡାଲ। ମେରିଟୋରିଅସ ସେବା ମେଡାଲ ପାଇବେ ଡେପୁଟି କମାଣ୍ଡାଣ୍ଟ କୌଶିକ କୁମାର ନାୟକ, ଡିଏସପି ସନତ କୁମାର ନାଥଶର୍ମା, ଡିଏସପି କବିତା ସାହୁ, କନଷ୍ଟେବଳ ପ୍ରମୋଦ କୁମାର ମହାନ୍ତ, ସବଇନ୍ସପେକ୍ଟର ପ୍ରଦ୍ଯୁମ୍ନ କୁମାର ନନ୍ଦ, ଆସିଷ୍ଟାଣ୍ଟ ସବଇନସ୍ପପେକ୍ଟର ବାବୁଲା ସାମଲ, କନେଷ୍ଟବଳ ହରିବନ୍ଦୁ ଭତ୍ରା, ହାବିଲଦାର ତୋଫାନ ବେହେରା, ପ୍ରାଣକୃଷ୍ଣ ଲେଙ୍କା, ସୁରେଶ ଚନ୍ଦ୍ର ରାଉତ। ଅଗ୍ନିସେବା କ୍ଷେତ୍ରରେ ଉଲ୍ଲେଖନୀୟ ସେବା ଲାଗି ମେଡାଲ ପାଇବେ ନିରଞ୍ଜନ ଜେନା ଓ ସୁକାନ୍ତ କୁମାର ବେହେରା। ସେହିପରି ଜେଲର ରତିକାନ୍ତ ଶୁକ୍ଲାଙ୍କୁ ବି ମିଳିବ ମେଡାଲ।
କୋଲକାତା ଛାତ୍ରୀଙ୍କୁ ଦୁଷ୍କର୍ମ ଓ ହତ୍ଯା ଘଟଣା : ଦେଶବ୍ଯାପୀ ଆନ୍ଦୋଳନ ଜାରି
କୋଲକାତା : କୋଲକାତା ଆରଜି କର ମେଡିକାଲ କଲେଜ ଆଣ୍ଡ ହସ୍ପିଟାଲରେ ଡାକ୍ତରୀ ପିଜି ଛାତ୍ରୀଙ୍କୁ ଦୁଷ୍କର୍ମ ପରେ ହତ୍ଯା ଘଟଣା। ଦେଶର ବିଭିନ୍ନ ସ୍ଥାନରେ ଜାରି ପ୍ରତିବାଦ ଆନ୍ଦୋଳନ। ଡାକ୍ତର ସଂଘ ପକ୍ଷରୁ ଆନ୍ଦୋଳନ ପ୍ରତ୍ଯାହାର ହେଲା ବୋଲି ଗତକାଲି ଘୋଷଣା କରାଯାଇଥିଲେ ବି ଏହି ଆନ୍ଦୋଳନ ଜାରି ରହିବ ବୋଲି କହିଛି ଦିଲ୍ଲୀ ଏମସ ଆବାସିକ ଡାକ୍ତର ସଂଘ। ଫଳରେ ଆଜି ଦିଲ୍ଲୀ, ମୁମ୍ବାଇ ସମେତ ବିଭିନ୍ନ ସ୍ଥାନରେ ଆନ୍ଦୋଳନ ଜାରି ରହିଛି।
ଗତକାଲି କେନ୍ଦ୍ର ସ୍ବାସ୍ଥ୍ଯମନ୍ତ୍ରୀ ଜେ.ପି. ନଡ୍ଡାଙ୍କ ସହ ଆଲୋଚନା ପରେ ଆନ୍ଦୋଳନ ପ୍ରତ୍ଯାହାର କରାଗଲା ବୋଲି କହିଥିଲା ଆବାସିକ ଡାକ୍ତର ସଂଘ ବା ଫୋର୍ଡା । ଏହା ସହ ମେଡିକାଲ କର୍ମଚାରୀଙ୍କ ଉପରେ ହେଉଥିବା ଆକ୍ରମଣକୁ ପ୍ରତିହତ କରିବା ଲାଗି କେନ୍ଦ୍ରୀୟ ସ୍ବାସ୍ଥ୍ଯସେବା ସୁରକ୍ଷା ଆଇନ ଲାଗୁ କରାଯିବ ବୋଲି କହିଥିଲେ ନଡ୍ଡା। ସେପଟେ ଏହି ଆନ୍ଦୋଳନ ଜାରି ରହିବ ବୋଲି କହିଛି ସର୍ବଭାରତୀୟ ମେଡିକାଲ ସଂଘ ବା ଏଫଏଆଇଏମଏ।
ସେହିପରି ଏହି ଆନ୍ଦୋଳନ ଜାରି ରହିବ ବୋଲି କହିଛନ୍ତି ମହାରାଷ୍ଟ୍ର ଆବାସିକ ଡାକ୍ତର ସଂଘ, ତେଲଙ୍ଗାନା ଓ ଆନ୍ଧ୍ରପ୍ରଦେଶ ଜୁନିଅର ଡାକ୍ତର ସଂଘ, ପାଟନା, ଭବୁନେଶ୍ବର, ଋଷିକେଶ, ମଙ୍ଗଳଗିରି ଏମସ ଡାକ୍ତର ସଂଘ, ବେଙ୍ଗାଲୁରୁ ନିମହାନ୍ସ, ପିଜିଆଇ ଚଣ୍ଡୀଗଡ଼, କେଜିଏମୟୁ ଲକ୍ଷ୍ମୌ ଆଦି ଡାକ୍ତର ସଂଘ ପକ୍ଷରୁ ଆନ୍ଦୋଳନ ଚାଲିବ ବୋଲି ଘୋଷଣା କରାଯାଇଛି।