ନୟାଗଡ଼: ନଦୀରେ ବୁଡ଼ି ଭାଇ ଭଉଣୀ ମୃତ । ନୟାଗଡ଼ ଜିଲ୍ଲା ଇଟାମାଟି ଥାନା ବାଉଅଁଶିଆପଡା ଗାଁରେ ଅଘଟଣ । ମୃତକ ହେଲେ ଦ୍ବିତିକୃଷ୍ଣ ସେଠୀଙ୍କ ୫ବର୍ଷର ପୁଅ ସାଇ ଏବଂ ୧୦ ବର୍ଷର ଝିଅ କାଜଲ୍ । ଗାଁର ତିନି ଶିଶୁ ମିଶି ନିକଟସ୍ଥ କୁସୁମୀ ନଦୀକୁ ଗାଧୋଇବାକୁ ଯାଇଥିଲେ। ଗାଧୋଇବା ବେଳେ ନଦୀରେ ଭାଇ ଭଉଣୀ ବୁଡ଼ି ଯାଇଥିଲେ । ସାଙ୍ଗରେ ଥିବା ଅନ୍ୟ ଜଣେ ଶିଶୁ ପାଟିକରି ଡାକିଥିଲା। ସଙ୍ଗେ ସଙ୍ଗେ ଗ୍ରାମବାସୀ ଭାଇଭଉଣୀଙ୍କୁ ଉଦ୍ଧାର କରି ନୟାଗଡ଼ ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି। ମୃତଦେହ ଦୁଇଟିକୁ ବ୍ଯବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ । ଇଟାମାଟି ପୋଲିସ ଏକ ଅପମୃତ୍ଯୁ ମାମଲା ରୁଜୁ କରି ତଦନ୍ତ ଚଳାଇଛି ।
ଝିଅକୁ ସାବିତ୍ରୀ ଭାର ଦେଇ ଫେରୁଥିବା ବେଳେ ଦୁର୍ଘଟଣାରେ ବାପାଙ୍କ ମୃତ୍ୟୁ
ବାଲେଶ୍ୱର: ଝିଅକୁ ସାବିତ୍ରୀ ଭାର ଦେଇ ଫେରୁଥିବା ବେଳେ ଦୁର୍ଘଟଣାରେ ବାପାଙ୍କ ମୃତ୍ୟୁ। ବାସୁଦେବପୁର ଅନନ୍ତପୁର ବାଲିଛନ୍ଦା ଘାଟ ନିକଟରେ ଘଟିଛି ଅଘଟଣ । ବାଲିମେଣ୍ଢ ଅଞ୍ଚଳର ସୁନୀଲ ବାରିକ ଝିଅର ସାବତ୍ରୀ ଭାର ଦେଇ ଘରକୁ ଫେରୁଥିବା ବେଳେ କୌଣସି ଅଜଣା ଗାଡି ତାଙ୍କୁ ଧକ୍କା ଦେଇଥିଲା । ଫଳରେ ସୁନୀଲଙ୍କର ଘଟଣାସ୍ଥଳରେ ମୃତ୍ୟୁ ହୋଇଛି । ଅନନ୍ତପୁର ଫାଣ୍ଡି ପୋଲିସ ପହଞ୍ଚି ତଦନ୍ତ ଚଳାଇଛି ।
ଦିଲ୍ଲୀରେ ଉତ୍କଟ ଜଳସଙ୍କଟ, ଦିନକୁ ଗୋଟିଏ ଥର ମିଳୁଛି ପାଣି
ନୂଆଦିଲ୍ଲୀ: ଜାତୀୟ ରାଜଧାନୀ ଦିଲ୍ଲୀରେ ଉତ୍କଟ ଜଳସଂକଟ। ତାତି ବଢିବା ସାଙ୍ଗକୁ ଦିଲ୍ଲୀର ବିଭିନ୍ନ ଅଂଚଳରେ ଦେଖାଦେଇଛି ଜଳ ସମସ୍ଯା। ଯୋଗାଣ ପାଇପରେ ଆସୁନି ପାଣି। ପାନୀୟ ଜଳ ପାଇଁ ସନ୍ତୁଳି ହେଉଛନ୍ତି ଲୋକେ। ଅନେକ ଅଂଚଳରେ ଟ୍ଯାଙ୍କର ଯୋଗେ ପାଣି ଯୋଗାଉଛନ୍ତି ଦିଲ୍ଲୀ ସରକାର। ଟ୍ଯାଙ୍କର ଆସିବାରେ ବିଳମ୍ବ ହେବା ମଧ୍ୟ କହୁଛନ୍ତି ଲୋକେ। ଅନେକ ସ୍ଥାନରେ ପ୍ରଦୂଷିତ ପାଣି ଆସୁଥିବାରୁ ସମସ୍ଯା ବଢିଛି। କେବଳ ଦିନକୁ ଗୋଟିଏ ଥର ପାଣି ଆସୁଥିବା ଲୋକେ କହିଛନ୍ତି। ଟ୍ଯାଙ୍କରରେ ଦିଆଯାଉଥିବା ପାଣି ମଇଳା ଥିବା କହିଛନ୍ତି। ପାଣି ନେବାକୁ ଶହ ଶହ ସଂଖ୍ଯାରେ ଲୋକେ ଭିଡ଼ ଲଗାଉଛନ୍ତି। ଗୋଟିଏ ଟ୍ଯାଙ୍କରେ ପାଣି ନେବାକୁ ଶହ ଶହ ସଂଖ୍ଯାରେ ପାଇପ ଲାଗିଛି। ପାଣି ସମସ୍ଯାର ସମାଧାନ କରିବାକୁ ଲୋକେ ଦାବି କରିଛନ୍ତି। ଦିଲ୍ଲୀରେ ପାରଦ ମଧ୍ୟ ଉପରେ ରହିଛି। ମୁଙ୍ଗେଶପୁର ଅଂଚଳରେ ପାରଦ ୪୯ ଡିଗ୍ରୀ ଉପରେ ରେକର୍ଡ ହୋଇଥିଲା।
ଉତ୍ତରାଖଣ୍ଡରରେ ମର୍ମନ୍ତୁଦ ସଡ଼କ ଦୁର୍ଘଟଣା, ଘାଟିକୁ ଖସିଲା ଯାତ୍ରୀବାହୀ ଗାଡ଼ି ୬ ମୃତ
ଉତ୍ତରାଖଣ୍ଡ: ଦେବଭୂମି ଉତ୍ତରାଖଣ୍ଡରେ ମର୍ମନ୍ତୁଦ ସଡ଼କ ଦୁର୍ଘଟଣା। ପାହାଡ଼ରୁ ଖାଲକୁ ଖସିଲା ଯାତ୍ରୀବାହୀ ଗାଡ଼ି। ଘଟଣାସ୍ଥଳରେ ୬ ଜଣଙ୍କ ମୃତ୍ଯୁ ହୋଇଥିବା ବେଳେ ୭ ଜଣ ଗୁରୁତର ଆହାତ ହୋଇଛନ୍ତି। ସେମାନଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଛି। କିଛି ଆହତଙ୍କୁ ହଲଦ୍ଵାନୀ ହସ୍ପିଟାଲରେ ଭର୍ତ୍ତି କରାଯାଇଛି। ନୈନିତାଲ ଜିଲ୍ଲା ଓଖଲକାଣ୍ଡା ନିକଟରେ ଘଟିଛି ଏ ଦୁର୍ଘଟଣା।
ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଆହତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ। ମୃତକଙ୍କ ମଧ୍ୟରେ ଗୋଟିଏ ପରିବାର ୩ ସଦସ୍ୟ ଅଛନ୍ତି। ଏନେଇ ପୋଲିସର ତଦନ୍ତ ଜାରି ରହିଛି ।
ଇମ୍ରାନ ଖାଁଙ୍କ ଲାଗି ବଢିପାରେ ଅଡୁଆ, ଦଳୀୟ ନିର୍ବାଚନ ପ୍ରସଙ୍ଗରେ ଆଜି ଶୁଣାଣି କରିବେ ନିର୍ବାଚନ କମିଶନ
ନନ୍ଦିଘୋଷ ବ୍ୟୁରୋ: ପୁଣି ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ଲାଗି ବଢିପାରେ ଅଡୁଆ। ଦଳୀୟ ନିର୍ବାଚନ ପ୍ରସଙ୍ଗରେ ଶୁଣାଣି କରିବେ ପାକିସ୍ତାନ ନିର୍ବାଚନ କମିଶନ। ଏନେଇ ପାକିସ୍ତାନ ତେହରିକ-ଏ-ଇନସାଫ ଅଧ୍ଯକ୍ଷ ବାରିଷ୍ଟର ଗୌହର ଅଲ୍ଲୀ ଖାଁ ଓ ମୁଖପାତ୍ର ରାଉଫ ହାସନଙ୍କୁ ନୋଟିସ ଜାରି କରିଥିଲେ ନିର୍ବାଚନ କମିଶନ। ଗତ ମେ’ ୩୦ ତାରିଖରେ ଏହି ମାମଲାର ଶୁଣାଣି ହେବାର ଥିଲା । ମାତ୍ର କୋର୍ଟରେ ଖଣ୍ଡପୀଠଙ୍କ ସମୟାନୁସାରେ ଏହାକୁ ଜୁନ ୬କୁ ପରିବର୍ତ୍ତିତ କରାଯାଇଥିଲା । ଦଳ ଭିତରେ ହୋଇଥିବା ନିର୍ବାଚନ ପ୍ରସଙ୍ଗରେ ସବିଶେଷ ତଥ୍ଯ ଦାଖଲ କରିବା ଲାଗି ଇସି ନିର୍ଦ୍ଦେଶ ଦେଇଥିଲେ। ସାଂଗଠନିକ ସ୍ଥିତି ହରାଇବା ପରେ ଦଳର ବାସ୍ତବ ତଥ୍ଯଗୁଡିକୁ ଦାଖଲ କରିବାକୁ ପିଟିଆଇକୁ ନିର୍ଦ୍ଦେଶ ଦେଇଥିଲେ ଇସିପି। ଗତ ୨୦୨୩ ଡିସେମ୍ବର ୨୨ରେ ପିଟିଆଇର ନିର୍ବାଚନ ସଙ୍କେତ ବ୍ଯାଟକୁ ରଦ୍ଦ କରିଥିଲେ ନିର୍ବାଚନ କମିଶନ। ପରେ ସୁପ୍ରିମକୋର୍ଟ ପିଟିଆଇକୁ ନିର୍ବାଚନରେ ସାମିଲ ହେବା ଲାଗି ସବୁଜ ସଙ୍କେତ ଦେବା ସହ ସ୍ବାଧୀନ ଭାବେ ଲଢିବା ଲାଗି ନିର୍ଦ୍ଦେଶ ଦେଇଥିଲେ। ଗତ ମାର୍ଚ୍ଚ ୩ରେ ଅନୁଷ୍ଠିତ ହୋଇଥିଲା ପିଟିଆଇର ଦଳୀୟ ନିର୍ବାଚନ।
ଆଜି ସରିବ ଜେଡିଏସର ପୂର୍ବତନ ସାଂସଦ ପ୍ରଜ୍ବଳ ରେବନ୍ନାଙ୍କ ରିମାଣ୍ଡ ଅବଧି
କର୍ଣ୍ଣାଟକ: ଆଜି ସରିବ କର୍ଣ୍ଣାଟକ ଜେଡିଏସର ପୂର୍ବତନ ସାଂସଦ ପ୍ରଜ୍ବଳ ରେବନ୍ନାଙ୍କ ଏସଆଇଟି ହେପାଜତ ଅବଧି। ସେକ୍ସ ଭିଡିଓ ମାମଲାରେ ଜର୍ମାନୀରୁ ଫେରିବା ପରେ ତାଙ୍କୁ ଗିରଫ କରିଥିଲା ଏସଆଇଟି। ବିଦେଶକୁ ଯିବାର ୩୩ ଦିନ ପରେ ତାଙ୍କୁ ଏସଆଇଟି ଗିରଫ କରିଥିଲା। ଗତ ଶୁକ୍ରବାର ଗିରଫ କରାଯିବା ପରେ ତାଙ୍କୁ ୬ ଦିନ ଲାଗି ଏସିଆଇଟି ହେପାଜତକୁ ପଠାଯାଇଥିଲା। ପୂର୍ବତନ ପ୍ରଧାନମନ୍ତ୍ରୀ ଏଚ.ଡି. ଦେବେଗୌଡାଙ୍କ ନାତି ପ୍ରଜ୍ବଳ ।
ସୂଚନା ଅନୁଯାୟୀ, ପ୍ରଜ୍ବଳ ରେବନ୍ନା ସେକ୍ସ ଭିଡିଓ ମାମଲାରେ ଛନ୍ଦି ହେବା ପରେ କର୍ଣ୍ଣାଟକ ରାଜନୀତିରେ ହୋଇଥିଲା କମ୍ପନ। ଗତ ଏପ୍ରିଲ ୨୮ରେ ପ୍ରାୟ ୩ ହଜାର ସେକ୍ସକ୍ଲିପ ଥିବା ଭିଡିଓ ଲିକ୍ ହେବା ପରେ ଅସୁବିଧାରେ ପଡିଥିଲେ ପ୍ରଜ୍ବଳ। ଏହି ଘଟଣାରେ ମେ’ ୪ ତାରିଖରେ ପ୍ରଜ୍ବଳଙ୍କ ବାପା ଏଚଡି ରେବନ୍ନାଙ୍କୁ ଗିରଫ କରିଥିଲା ଏସଆଇଟି। ସେ ମେ’ ୨୬ରେ ଦେଶ ଛାଡି ଜର୍ମାନୀ ପଳାୟନ କରିଥିଲେ। ଶେଷରେ ମେ’ ୩୧ ତାରିଖରେ ତାଙ୍କୁ ଗିରଫ କରିଥିଲା ଏସଆଇଟି।
ଆଜି ସାବିତ୍ରୀ ଅମାବାସ୍ୟା: ସ୍ବାମୀଙ୍କ ମଙ୍ଗଳ ମନାସୀ ବ୍ରତ ପାଳୁଛନ୍ତି ସଧବା
ଭୁବନେଶ୍ୱର: ଆଜି ସାବିତ୍ରୀ ଅମାବାସ୍ୟା। ସ୍ବାମୀଙ୍କ ମଙ୍ଗଳ ମନାସୀ ବ୍ରତ ପାଳୁଛନ୍ତି ସଧବା। ସ୍ୱାମୀଙ୍କ ଦୀର୍ଘାୟୁ ଓ ଉତ୍ତମ ସ୍ୱାସ୍ଥ୍ୟ କାମନା କରି ମହିଳା ମାନେ ଏହି ବ୍ରତ ପାଳନ କରିଥାନ୍ତି । ସାବିତ୍ରୀ ପୂଜା ପାଇଁ ସକାଳୁ ସକାଳୁ ରାଜ୍ୟର ବିଭିନ୍ନ ପୀଠରେ ଲାଗିଛି ଶ୍ରଦ୍ଧାଳୁଙ୍କ ଭିଡ଼। ମନ୍ଦିରରେ ଚାଲିଛି ପୂଜାର୍ଚ୍ଚନା ।
ଜ୍ୟେଷ୍ଠ ଅମାବାସ୍ୟା ‘ସାବିତ୍ରୀ ଅମାବାସ୍ୟା’ ଭାବରେ ଖ୍ୟାତ ଏବଂ ପ୍ରତି ଓଡ଼ିଆ ଘରେ ଏହା ସଧବା ସ୍ତ୍ରୀମାନଙ୍କର ଏକ ପବିତ୍ର ବ୍ରତ ରୂପେ ପାଳିତ ହୁଏ।ଯମରାଜଙ୍କ ପଛରେ ଯାଇ ସ୍ବାମୀ ସତ୍ୟବାନଙ୍କ ଜୀବନ ଫେରାଇ ଆଣିଥିଲେ ସାବିତ୍ରୀ । ହିନ୍ଦୁ ଶାସ୍ତ୍ରର ସେହି ପୌରାଣିକ କଥାକୁ ମନେ ପକାଇ ସ୍ବାମୀଙ୍କ ଦୀର୍ଘ ଜୀବନ କାମନା କରି ପୂଜା କରୁଛନ୍ତି ବିବାହିତା ମହିଳାମାନେ। ହାତରେ ଭୋଗ, ମନରେ ଉତ୍ସାହ ନେଇ ଦେବାଳୟକୁ ଯାଇଛନ୍ତି ସଧବା। ନୂଆ ଶାଢୀ, ସଙ୍ଖା, ସିନ୍ଦୂର ଓ ଅଳତା ନେଇ ପୂଜାର୍ଚ୍ଚନା କରୁଛନ୍ତି । ଘରେ ଘରେ ବି ସାବିତ୍ରୀଙ୍କ ପ୍ରତିମା ଗଢି ବ୍ରତ କଥା ଗାଇ ପୂଜା କରୁଛନ୍ତି ସଧବା ନାରୀ । ବିଶେଷ କରି ଆମ୍ବ, ପଣସ, ନଡିଆ, ଫୁଟି କାକୁଡି, ତାଳ, ଖଜୁରୀ ଆଦି ଦେଶୀ ଫଳରେ ପୂଜା କରୁଛନ୍ତି।
ଏ ବ୍ରତକଥାର ବାର୍ତ୍ତା ହେଉଛି, ଜ୍ୟେଷ୍ଠ ଅମାବାସ୍ୟା ଦିନ ଯିଏ ସାବିତ୍ରୀଙ୍କ ନାମ ସ୍ମରଣ କରି ବ୍ରତ କରିବ, ସେ ଜନ୍ମେ ଜନ୍ମେ ସଧବା ରହିବ। ପତିପରାୟଣା ଓ ପୁତ୍ରବତୀ ହୋଇ ଅନ୍ତିମକାଳରେ ବୈକୁଣ୍ଠ ପୁରକୁ ଯିବ।
ଟି ୨୦ ବିଶ୍ବକପ, ଆର୍ୟାଲାଣ୍ଡକୁ ୮ ୱିକେଟରେ ହରାଇଲା ଭାରତ
ନନ୍ଦିଘୋଷ ବ୍ୟୁରୋ: ଟି-ଟ୍ବେଣ୍ଟି ବିଶ୍ବକପରେ ଭାରତର ଦମଦାର ଆରମ୍ଭ । ବିଜୟରୁ ଅଭିଯାନ ଆରମ୍ଭ କଲା ଟିମ୍ ଇଣ୍ଡିଆ । ପ୍ରଥମ ମ୍ଯାଚରେ ଆୟର୍ଲାଣ୍ଡ ବିପକ୍ଷରେ ଏକପାଖିଆ ବିଜୟ ହାସଲ କରିଛି ରୋହିତ ବାହିନୀ । ଉଭୟ ବୋଲିଂ ଓ ବ୍ଯାଟିଂରେ କମାଲ କରିବା ସହ ୧୨.୨ ଓଭରରେ ମ୍ଯାଚ ଜିତିନେଇଛି ଭାରତ ।
ପ୍ରଥମେ ବ୍ଯାଟିଂ କରି ମାତ୍ର ୯୬ ରନରେ ଅଲଆଉଟ ହୋଇଯାଇଥିଲା ଆୟର୍ଲାଣ୍ଡ । ହାର୍ଦ୍ଦିକ ପାଣ୍ଡ୍ଯା ୩ଟି ୱିକେଟ ନେଇଥିବାବେଳେ ଅର୍ଶଦୀପ ଓ ବୁମରା ୨ଟି ଲେଖାଏଁ ୱିକେଟ ନେଇଛନ୍ତି । ୯୭ରନର ଲକ୍ଷ୍ଯ ନେଇ ପଡ଼ିଆକୁ ଓହ୍ଲାଇଥିଲା ଟିମ୍ ଇଣ୍ଡିଆ । ରୋହିତ ଶର୍ମା ୩୭ ରନରେ ୫୨ ରନ କରିଥିବାବେଳେ ରିଷଭ ପନ୍ଥ ୨୬ ବଲରେ ୩୬ ରନ କରିଥିଲେ । ଫଳରେ ୨ ୱିକେଟ ହରାଇ ୧୨.୨ ଓଭରରେ ଭାରତ ବିଜୟ ଲାଭ କରିଥିଲା ।
ଏନଡିଏ ବୈଠକରେ ସର୍ବସମ୍ମତ ନେତା ନିର୍ବାଚିତ ହେଲେ ନରେନ୍ଦ୍ର ମୋଦି
ନୂଆଦିଲ୍ଲୀ: ଏନଡିଏ ବୈଠକରେ ସର୍ବସମ୍ମତ ନେତା ନିର୍ବାଚିତ ହୋଇଛନ୍ତି ନରେନ୍ଦ୍ର ମୋଦୀ। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟି ସରକାର ଗଠନ ଲାଗି ଦାବି ଜଣାଇବ ଟିମ୍ ଏନଡିଏ। ସେପଟେ ଏନଡିଏକୁ ଟିଡିପି ମୁଖ୍ଯ ଚନ୍ଦ୍ରବାବୁ ନାଇଡୁ, ବିହାର ମୁଖ୍ଯମନ୍ତ୍ରୀ ନୀତୀଶ କୁମାର ସମର୍ଥନ ଦେବେ ବୋଲି ଲିଖିତ ଭାବେ କହିଛନ୍ତି। ସପ୍ତଦଶ ଲୋକସଭା ଭଙ୍ଗ କରିଛନ୍ତି ରାଷ୍ଟ୍ରପତି।
କେନ୍ଦ୍ର କ୍ଯାବିନେଟର ସୁପାରିସ ଅନୁସାରେ ଲୋକସଭା ଭଙ୍ଗ ହୋଇଛି। ତୃତୀୟ ଥର ଲାଗି ନରେନ୍ଦ୍ର ମୋଦୀଙ୍କ ନେତୃତ୍ବରେ ସରକାର ଗଠନ ଲାଗି ପ୍ରକ୍ରିୟା ଆରମ୍ଭ କରିଛି ଏନଡିଏ। ବୈଠକରେ ଉପସ୍ଥିତ ଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଟିଡିପି ମୁଖ୍ଯ ଚନ୍ଦ୍ରବାବୁ ନାଇଡୁ, ବିହାର ମୁଖ୍ଯମନ୍ତ୍ରୀ ନୀତୀଶ କୁମାର, ଜେଡିୟୁ ନେତା ଲଲନ ସିଂ ପ୍ରମୁଖ ଉପସ୍ଥିତ ଥିଲେ। ନିର୍ବାଚନରେ ଏନଡିଏ ୨୯୨ ଆସନ ପାଇଛି।
ବିଶେଷ କରି ଟିଡିପି ଓ ଜେଡିୟୁ ହୋଇଛନ୍ତି କିଙ୍ଗ ମେକର। ୫୪୩ ଆସନ ମଧ୍ଯରୁ ଏନଡିଏ ୨୯୨ ଆସନ ହାସଲ କରିଛି। ସେପଟେ ଇଣ୍ଡିଆ ମେଣ୍ଟ ପାଇଛି ୨୩୨ ଆସନ। ଯାହାକି ମ୍ଯାଜିକ ନମ୍ବରଠାରୁ ୪୦ଟି କମ। ତେଣେ ରାଷ୍ଟ୍ରପତିଙ୍କୁ ଭେଟି ଇସ୍ତଫା ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସୂଚନା ଅନୁସାରେ ଜୁନ୍ ୮ ରେ ମୋଦି ପୁଣି ଥରେ ପ୍ରଧାନମନ୍ତ୍ରୀ ଭାବେ ଶପଥ ନେଇପାରନ୍ତି।
ଓଡ଼ିଶାର ଉନ୍ନତି ପାଇଁ ଚେଷ୍ଟା ଜାରି ରଖିବାକୁ ବିଧାୟକଙ୍କୁ ନିବେଦନ କଲେ ନବୀନ
ଭୁବନେଶ୍ବର: ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଲେ ନବନିର୍ବାଚିତ ବିଧାୟକ । ଆଜି ଅପରାହ୍ନରେ ନବୀନ ନିବସରେ ପହଞ୍ଚି ନବୀନ ପଟ୍ଟନାୟକଙ୍କୁ ଭେଟିଥିଲେ ଦଳର ସମସ୍ତ ନବନିର୍ବାଚିତ ବିଧାୟକ। ପୁଣି ଜନସେବା କରିବାକୁ ସୁଯୋଗ ଦେଇଥିବାରୁ ସମସ୍ତେ ନବୀନଙ୍କୁ ଧନ୍ୟବାଦ ଜଣାଇଛନ୍ତି । ସମସ୍ତଙ୍କୁ ବିଜୟର ଶୁଭେଚ୍ଛା ଜଣାଇଛନ୍ତି ନବୀନ ପଟ୍ଟନାୟକ । ଏହାସହ ଜନସେବା ଜାରି ରଖିବାକୁ ପରାମର୍ଶ ଦେଇଛନ୍ତି ।
ଓଡ଼ିଶାର ଉନ୍ନତି ପାଇଁ ସଦାସର୍ବଦା ଚେଷ୍ଟା ଜାରି ରଖିବାକୁ ସମସ୍ତ ବିଧାୟକଙ୍କୁ ନିବେଦନ କରିଛନ୍ତି । ୨୪ ବର୍ଷ ତଳେ ରାଜ୍ୟ ୭୦ ପ୍ରତିଶତ ଗରିବୀ ରେଖାତଳେ ରହିଥିବା ବେଳେ ଆଜି ୧୦ ପ୍ରତିଶତକୁ ଖସି ଆସିଛି । ଏହା ବିଜେଡି ଶାସନ କାଳରେ ସମ୍ଭବ ହୋଇଛି । ଏଭଳି ଭାବେ ଲୋକଙ୍କ ସୁଖଦୁଃଖର ସାଥୀ ହୋଇ ରହିବାକୁ ପରାମର୍ଶ ଦେଇଛନ୍ତି ନବୀନ ।
ସେପଟେ ବରିଷ୍ଠ ନେତାଙ୍କୁ ନେଇ କମିଟି ଗଠନ କରାଯିବ । ଏହି କମିଟି ପରାଜୟର ବିଭିନ୍ନ କାରଣ ବିଷୟରେ ସମୀକ୍ଷା କରିବ ବୋଲି କହିଛନ୍ତି ବିଜେଡି ବିଧାୟକ ଅରୁଣ ସାହୁ । ଏହାସହ ଦଳ କିଭଳି ଆଗକୁ ବଢିବ, ବରୋଧୀ ଦଳର କ`ଣ ଭୂମିକା ରହିବ ସେନେଇ ଆଲୋଚନା କରାଯାଇଥିବା ସେ କହିଛନ୍ତି । ଆଜିର ଏହି ସକ୍ଷାତକାରରେ ବିଂଝାରପୁର ବିଧାୟିକା ପ୍ରମିଳା ମଲ୍ଲିକ, ରେଙ୍ଗାଳି ବିଧାୟକ ସତ୍ୟନ୍ଦ୍ର ହରିପାଲ, ଜୟଦେବ ବିଧାୟକ ନବ ମଲ୍ଲିକ, ବାଙ୍କୀ ବିଧାୟକ ଦେବି ତ୍ରିପାଠୀ, ଭଣ୍ଡାରିପୋଖରୀ ବିଧାୟକ ସଂଜୀବ ମଲ୍ଲିକ ନବୀନ ନିବାସରେ ଉପସ୍ଥିତ ରହିଥିଲେ ।
ଆଠମଲ୍ଲିକ ବିଧାୟକ ନଳିନୀ ପ୍ରଧାନ ଦେବଗଡ଼ ବିଧାୟକ ରିମାଞ୍ଚ ରଞ୍ଜନ ବିଶ୍ୱାଳ, ଭୋଗରାଇ ବିଧାୟକ ଗୌତମ ବୁଧଦାସ, ରାଜନଗର ବିଧାୟକ ଧ୍ରୁବ ସାହୁ, ବାଲିଗୁଡା ଚକ୍ରମଣି କହଁର, ଘସିପୁରା ବିଧାୟକ ବଦ୍ରି ପାତ୍ର, ଆନନ୍ଦପୁର ବିଧାୟକ ଅଭିମନ୍ୟୁ ସେଠି, ବରୀ ବିଧାୟକ ବିଶ୍ୱରଞ୍ଜନ ମଲ୍ଲିକ, ସାଲେପୁର ବିଧାୟକ ପ୍ରଶାନ୍ତ ବେହେରା, ଖରିଆର ବିଧାୟକ ଅଧିରାଜ ପାଣିଗ୍ରାହୀ, କଟକ ଚୌଦ୍ୱାର ବିଧାୟକ ସୌଭିକ ବିଶ୍ୱାଳ, ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା ପ୍ରମୁଖ ମଧ୍ୟ ଉପସ୍ଥିତ ରହିଥିଲେ ।