ଭୁବନେଶ୍ୱର: ଚିନ୍ତା ବଢାଉଛି ଦରଦାମ ବୃଦ୍ଧି । ଦରଦାମ ବୃଦ୍ଧିକୁ ନେଇ ମୁହଁ ଖୋଲିଲେ ବିଭାଗୀୟ ମନ୍ତ୍ରୀ । କଣ୍ଟ୍ରୋଲକୁ ଆସୁଛି ଦରଦାମ । ପିଆଜ ୪୦ ଟଙ୍କା ଭିତରେ ରହିଥିବା ବେଳେ ଆଳୁ ୩୫ ଟଙ୍କା ଭିତରେ ରହିଛି । ନାସିକରୁ ପିଆଜ ଓ ପଶ୍ଚିମବଙ୍ଗରୁ ଆଳୁ ଆସୁଛି । ସେଠି ବି ଦର ଅଧିକ ରହିଛି ।
ବର୍ତ୍ତମାନ ସବୁ ବେପାରୀଙ୍କ ବିଲ ଯାଞ୍ଚ କରାଯାଉଛି । ଖୁଚୁରା ବେପାରୀ ଯଦି ଅଧିକ ଦାମରେ ପନିପରିବା ବିକ୍ରି କରିବେ ତେବେ ତାଙ୍କ ଉପରେ ଆକ୍ସନ ନିଆଯିବ। ଏଥିସହିତ ରାଜ୍ଯର ସବୁ ବ୍ଲକରେ ଖୁବ୍ ଶୀଘ୍ର ଶୀତଳ ଭଣ୍ଡାର ଖୋଲାଯିବ ନେଇ କହିଛନ୍ତି ବିଭାଗୀୟ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ।
ନୂଆଦିଲ୍ଲୀ: ଦିନକୁ ଦିନ ନିଟକୁ ନେଇ ଆସୁଛି ଚାଞ୍ଚଲ୍ଯକର ତଥ୍ଯ। ନିଟ୍ ୟୁଜି ପ୍ରଶ୍ନପତ୍ର ଲିକ୍ ଘଟଣାରେ ଜଣେ ସାମ୍ବାଦିକଙ୍କୁ ଗିରଫ କରିଛି ସିବିଆଇ। ଝାଡ଼ଖଣ୍ଡ ହଜାରିବାଗରୁ ଗିରଫ ସାମ୍ବାଦିକର ନାଁ ଜମାଲୁଦ୍ଦିନ ବୋଲି ସୂଚନା ମିଳିଛି। ସେପଟେ ସିବିଆଇ ପକ୍ଷରୁ ଗୁଜରାଟର ଗୋଧ୍ରା, ଖେଡା, ଆନନ୍ଦ ଓ ଅହମ୍ମଦାବାଦରେ ସର୍ଚ୍ଚ ଅପରେସନ କରିଛି ସିବିଆଇ। ଗତ ଜୁନ୍ ୨୭ରେ ନିଟ-ୟୁଜି ପେପର ଲିକ୍ ମାମଲାରେ ବିହାର ପାଟନାରୁ ପ୍ରଥମେ ୨ ଅଭିଯୁକ୍ତଙ୍କୁ ଗିରଫ କରିଥିଲା ସିବିଆଇ। ସେମାନେ ହେଲେ ମନୀଷ ପ୍ରକାଶ ଓ ଆଶୁତୋଷ। ଆଶୁତୋଷ ସହାୟତାରେ ମନୀଷ ପ୍ରକାଶ ଲର୍ଣ୍ଣ ପ୍ଲେ ସ୍କୁଲ ସହ ସମ୍ପର୍କିତ ଏକ ଛାତ୍ରାବାସରେ ପରୀକ୍ଷାର୍ଥୀମାନଙ୍କୁ ରଖିବା ବ୍ଯବସ୍ଥା କରିଥିଲା। ଗତ ଜୁନ ୨୮ରେ ସିବିଆଇ ଝାଡଖଣ୍ଡ ହଜାରିବାଗର ଓଏସିସି ସ୍କୁଲର ପ୍ରିନ୍ସିପାଲ ଓ ଭାଇସପ୍ରିନ୍ସିପାଲଙ୍କୁ ଗିରଫ କରିଥିଲା।
ନିଟ ପେପର ଲିକ୍ ମାମଲାରେ ସିବିଆଇ ୬ଟି ମାମଲାର ତଦନ୍ତ କରୁଛି। ବିହାର, ଗୁଜରାଟ, ମହାରାଷ୍ଟ୍ର ଓ ରାଜସ୍ଥାନର ୩ଟି ମାମଲାର ତଦନ୍ତ କରୁଛି ସିବିଆଇ। ଏହି ପରୀକ୍ଷାକୁ ନେଇ ଅନେକ ଅନିୟମିତତା ଅଭିଯୋଗ ଆସିଥିଲା। ପରେ ଏହାର ତଦନ୍ତ ଭାର ସିବିଆଇକୁ ଦିଆଯାଇଛି। ଦେଶର ୫୭୧ଟି ସହରର ୪ ହଜାର ୭୫୦ଟି କେନ୍ଦ୍ରରେ ପରୀକ୍ଷା ହୋଇଥିଲା ଏବଂ ୨୪ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେଇଥିଲେ।
ନୂଆଦିଲ୍ଲୀ: ଦିଲ୍ଲୀ ମୁଖ୍ଯମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀର ପ୍ରତିବାଦ। ଦିଲ୍ଲୀରେ ଶୁଭିଲା ଆପ୍ ଗର୍ଜନ। ବିଜେପି ମୁଖ୍ୟାଳୟ ନିକଟରେ ପ୍ରତିବାଦ କରିଛନ୍ତି ଆପ୍ କର୍ମୀ। ଦିଲ୍ଲୀ ମଦନୀତି ମାମଲାରେ ପ୍ରଥମେ ପ୍ରବର୍ତ୍ତନ ନିର୍ଦ୍ଦେଶାଳୟ ଓ ପରେ ସିବିଆଇ କେଜ୍ରିୱାଲଙ୍କୁ ଗିରଫ କରିଥିଲା। ଏହି ଗିରଫ ପ୍ରତିବାଦରେ ଆଜି ବିକ୍ଷୋଭ ପ୍ରଦର୍ଶନ କରିଛନ୍ତି ଆପ୍ କର୍ମୀ। କେନ୍ଦ୍ରୀୟ ଦିଲ୍ଲୀର ଡିଡିୟୁ ମାର୍ଗ ନିକଟରେ ଆପ୍ କର୍ମୀ ବିକ୍ଷୋଭ କରିବାକୁ ଯାଉଥିବା ବେଳେ ସେମାନଙ୍କୁ ଅଟକାଇଛି ପୋଲିସ।
ଆନ୍ଦୋଳନକୁ ଦୃଷ୍ଟିରେ ରଖି ବିଭିନ୍ନ ସ୍ଥାନାରେ ଅର୍ଦ୍ଧସାମରିକବାହିନୀ ମୁତୟନ କରାଯାଇଛି। ବିଭିନ୍ନ ସ୍ଥାନରେ ୧୪୪ ଧାରା ଜାରି କରାଯାଇଛି। ଆପ୍ କର୍ମୀଙ୍କ ଅଭିଯୋଗ-ମିଥ୍ଯା ମାମଲାରେ କେଜ୍ରିୱାଲଙ୍କୁ ଇଡି ଓ ସିବିଆଇ ଗିରଫ କରିଛି।
ଗଜପତି: ଶିକ୍ଷକଙ୍କୁ ମୋହନା ବିଇଓଙ୍କ କଡ଼ା ତାଗିଦ। ଗାଡ଼ି ଚଳାଇବା ବେଳେ ହେଲମେଟ ନପିନ୍ଧିଲେ ହେବ କାର୍ଯ୍ୟାନୁଷ୍ଠାନ। ବନ୍ଦ ହେବ ଦରମା। ଏଭଳି ନିଆରା ପଦକ୍ଷେପ ନେଇଛନ୍ତି ଗଜପତି ଜିଲ୍ଲା ମୋହନା ବ୍ଳକ ଶିକ୍ଷାଧିକାରୀ ନରେନ୍ଦ୍ର ବେହେରା । ବାଇକରେ ବିଦ୍ୟାଳୟ ଯିବା ସମୟରେ ହେଉ କିମ୍ବା ଅନ୍ୟ ସବୁବେଳେ ହେଲମେଟ ପିନ୍ଧିବାକୁ ତାଗିଦ କରିଛନ୍ତି ବିଇଓ। ଏନେଇ ମୋହନା ବ୍ଲକରେ କାର୍ଯ୍ୟରତ ସମସ୍ତ ଶିକ୍ଷକ ଶିକ୍ଷୟିତ୍ରୀଙ୍କୁ ଜଣାଇବା ସହ ସମସ୍ତ ବିଦ୍ୟାଳୟର ପ୍ରଧାନ ଶିକ୍ଷକ, ସିଆରସିସିଙ୍କୁ ନିୟମ ପାଳନ କରିବାକୁ ନିର୍ଦ୍ଦେଶ ଦେଇଛନ୍ତି l ଏଥିସହ ଡିଇଓଙ୍କୁ ଚିଠି ଲେଖି ଅବଗତ କରାଇଛନ୍ତି ବ୍ଲକ ଶିକ୍ଷା ଅଧିକାରୀ। ଯଦି କୌଣସି ଶିକ୍ଷକ, ଶିକ୍ଷୟିତ୍ରୀ ଏହି ନିର୍ଦ୍ଦେଶକୁ ଅବମାନନା କରି ବିନା ହେଲମେଟରେ ବାଇକ ଚଳାଇବାର ନଜରକୁ ଆସନ୍ତି ତେବେ ତାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ। ସମ୍ପୃକ୍ତ ଶିକ୍ଷକଙ୍କ ଗୋଟିଏ ମାସର ଦରମା ବନ୍ଦ ପାଇଁ ପଦକ୍ଷେପ ନିଆଯିବ ।
ଗତ କିଛି ବର୍ଷ ହେଲା ବାଇକ ଦୁର୍ଘଟଣାରେ ଅନେକ ଶିକ୍ଷକଙ୍କ ମୃତ୍ୟୁ ଘଟିଛି । ଦୁର୍ଘଟଣା ଜନିତ ମୃତ୍ୟୁ ରୋକିବାକୁ ଏଭଳି ପଦେକ୍ଷପ ନେଇଥିବା କହିଛନ୍ତି ବିଇଓ।
ନୂଆଦିଲ୍ଲୀ: ଦିଲ୍ଲୀରେ ରେକର୍ଡ ଭାଙ୍ଗୁଛି ବର୍ଷା। ଦୀର୍ଘ ୮୮ ବର୍ଷର ରେକର୍ଡ ଭାଙ୍ଗିଲା ବର୍ଷା। ଗୋଟିଏ ଦିନରେ ଏତେ ପରିମାଣର ବର୍ଷା କେବେ ହୋଇ ନଥିବା ସୂଚନା ମିଳିଛି। ସେପଟେ ଆସନ୍ତା ୫ ଦିନରେ ପୁଣି ଅଧିକ ବର୍ଷା ହେବ ବୋଲି ଆକଳନ କରିଛି ପାଣିପାଗ ବିଭାଗ। ତେଣେ ଦିଲ୍ଲୀରେ ବର୍ଷାଜନିତ ମୃତ୍ଯୁସଂଖ୍ଯା ହୋଇଛି ୬।
ଦ୍ବାରକା, ପାଲମ, ବସନ୍ତ ବିହାର, ବସନ୍ତ କୁଞ୍ଜ, ଗୁରୁଗାଓଁ, ଫରିଦାବାଦ, ମାନେସର ଆଦି ଅଞ୍ଚଳରେ ସ୍ଥିତି ଅଧିକ ଘନୀଭୂତ ହୋଇଛି। ପ୍ରବଳ ବର୍ଷା ଯୋଗୁ ଅନେକ ଅଞ୍ଚଳ ଜଳବନ୍ଦୀ ହୋଇଥିବା ବେଳେ ଅନେକ ଗଛ ଉପୁଡି ପଡିଛି। ବିଦ୍ଯୁତ ସମସ୍ଯା ଜାରି ରହିଥିବା ବେଳେ ଅନେକ ଅଞ୍ଚଳରେ ପାନୀୟ ଜଳ ସମସ୍ଯା ତୀବ୍ର ହୋଇଛି। ରାଜ୍ଯପାଳ ଭିକେ ସକ୍ସେନା ସ୍ଥିତି ସମୀକ୍ଷା କରିଛନ୍ତି। ବହୁ ରାସ୍ତାରେ କାର ବୁଡିଯିବା ଦେଖାଯାଇଛି। ଶହ ଶହ ଯାନବାହନ ରାସ୍ତାରେ ଅଟକି ରହିଛନ୍ତି। ଲକ୍ଷାଧିକ ଲୋକ ଜଳଘେରରେ ରହିଛନ୍ତି।
ସେପଟେ ମହାନଗରୀ ମୁମ୍ବାଇରେ ବି ହୋଇଛି ଜଳବନ୍ଦୀ। ରାସ୍ତାଘାଟରେ ଜମିଛି ପାଣି। ହଜାର ହଜାର ଯାନବାହନ ରାସ୍ତାରେ ଅଟକିଛି। ତଳିଆ ଅଞ୍ଚଳରେ ଲୋକଙ୍କ ଘରେ ପାଣି ପଶିଯାଇଛି।
ଲଦାଖ: ଲଦାଖ ପ୍ରକୃତ ନିୟନ୍ତ୍ରଣ ରେଖା ନିକଟରେ ଅଘଟଣ। ଯବାନମାନେ ଦୌଲତ ବେଗ ଓଲଡି ନିକଟରେ ନଦୀ ପାର ହେଉଥିବା ବେଳେ ଭାସିଗଲା ସେନା ଟ୍ଯାଙ୍କ। ନଦୀରେ ଅକସ୍ମାତ ଫ୍ଲାସ ଫ୍ଲଡ ଆସିବାରୁ ଭାସି ଯାଇଥିଲା ଟ୍ଯାଙ୍କ। ଦୁର୍ଘଟଣାରେ ୫ ସୈନ୍ଯଙ୍କ ମୃତ୍ଯୁ ସୂଚନା। ମୃତକଙ୍କ ମଧ୍ଯରେ ଜଣେ ଜୁନିଅର କମିଶନ ଅଫିସର ବା ଜେସିଓ ରହିଥିବା ସୂଚନା ମିଳିଛି। ଜଣେ ଯବାନଙ୍କୁ ଉଦ୍ଧାର କରାଯାଇଛି।
ସୂଚନା ଅନୁଯାୟୀ, ଯବାନମାନେ ଟି-୭୨ ଟ୍ଯାଙ୍କରେ ଟ୍ରେନିଂ ମିସନରେ ଯାଇ ମନ୍ଦିର ମୋର୍ ଇଲାକାରେ ନଦୀ ପାର ହେଉଥିଲେ। ହଟାତ୍ ଫ୍ଲାସ ଫ୍ଲଡ ଆସିବାରୁ ଭାସି ଯାଇଥିଲା ଟ୍ଯାଙ୍କ। ସେଠାରେ ଉଦ୍ଧାର କାର୍ଯ୍ଯ ଜାରି ରହିଛି। ଲେହଠାରୁ ୧୪୮ କିଲୋମିଟର ଦୂରରେ ଘଟିଛି ଅଘଟଣ।
ଏହି ଘଟଣାକୁ ନେଇ ଶୋକବ୍ଯକ୍ତ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ। ଗତ କିଛି ଦିନ ଧରି ଲଦାଖ ଓ ହିମାଚଳ ପ୍ରଦେଶରେ ପ୍ରବଳ ବର୍ଷା ଲାଗି ରହିଛି। ଅନେକ ନଦୀରେ ଫ୍ଲାସ ଫ୍ଲଡ ଆସିବା ଦେଖାଯାଉଛି। କୁଲ୍ଲୁ ଓ କାନୁର ଜିଲ୍ଲାରେ ବ୍ଯାପକ ଲ୍ଯାଣ୍ଡ ସ୍ଲାଇଡ ହେବା ଦେଖିବାକୁ ମିଳୁଛି।
ନୂଆଦିଲ୍ଲୀ: ରାଜଘାଟରେ ମହାତ୍ମା ଗାନ୍ଧୀଙ୍କ ସମାଧୀସ୍ଥଳରେ ଶ୍ରଦ୍ଧାଞ୍ଜଳି ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଏଥିସହ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଏବଂ ପ୍ରଭାତୀ ପରିଡ଼ା ସହ ରାଜଘାଟ ଯାଇ ଶ୍ରଦ୍ଧାଞ୍ଜଳି ଜଣାଇଛନ୍ତି। ରାଜଘାଟରେ ପହଞ୍ଚି ମହାତ୍ମାଗାନ୍ଧୀ ଏବଂ ଅଟଳ ବିହାରୀ ବାଜପେୟୀଙ୍କ ସମାଧିସ୍ଥଳରେ ପୁଷ୍ପମାଲ୍ୟ ଅର୍ପଣ କରିଛନ୍ତି।
ଏହାପରେ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କରଙ୍କୁ ମୁଖ୍ୟମନ୍ତ୍ରୀ ଓ ଦୁଇ ଉପମୁଖ୍ୟମନ୍ତ୍ରୀ ଭେଟିବା ନେଇ କାର୍ଯ୍ୟକ୍ରମ ରହିଛି। ଅପରାହ୍ନରେ ତ୍ୟାଗରାଜ ନଗରରେ ଥିବା ଜଗନ୍ନାଥ ମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିବେ । ସଂଧ୍ୟାରେ ପ୍ରବାସୀ ଓଡ଼ିଆଙ୍କ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଓ ଦୁଇ ଉପମୁଖ୍ୟମନ୍ତ୍ରୀ ସାମିଲ ହେବେ।
ଭୁବନେଶ୍ୱର: ଦୁର୍ନୀତିକୁ ରୋକିବା ପାଇଁ ନୂଆ ସରକାରଙ୍କ ନୂଆ ଫଣ୍ଡା। ମାସକ ଭିତରେ ସବୁ ଧାନ ମଣ୍ଡିରେ ଲାଗିବ ସିସିଟିଭି। ସିସିଟିଭି ମାଧ୍ୟମରେ ସବୁ ମଣ୍ଡିରେ ଚାଲିଥିବା କାର୍ଯ୍ୟକୁ କରାଯିବ ତଦାରଖ। ମଣ୍ଡିରୁ ମିଲକୁ ଯାଉଥିବା ଗାଡିରେ ଲାଗିବ ଜିପିଏସ୍ । ଗାଡ଼ିରେ ଧାନ କେଉଁ ଆଡ଼କୁ ଯାଉଛି ତାହା ଜଣାପଡ଼ିବ। ଧାନ ମିଲର ପାଖକୁ ଯାଉଛି ନା ବାଟରେ ହେଉଛି ବାଟମାରଣା, ସବୁକୁ କରାଯିବ ତଦାରଖ।
ରାଜ୍ୟରେ ଦୁର୍ନୀତିକୁ ରୋକିବାକୁ କିଛି ଏଭଳି ଢଙ୍ଗରେ ତତ୍ପର ହୋଇଛି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ । ଏନେଇ ବିଭାଗୀୟ ଅଧିକାରୀଙ୍କୁ ମଧ୍ୟ ନିର୍ଦ୍ଦେଶ ଦେଇଛନ୍ତି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।
ନୂଆପଡା: ଦୃଢ଼ ଇଚ୍ଛାଶକ୍ତି ଓ କଠିନ ପରିଶ୍ରମରେ ସବୁକିଛି ସମ୍ଭବ । ଯାହାକୁ ପ୍ରମାଣିତ କରି ଦେଖାଇଛନ୍ତି ନୂଆପଡ଼ାର ୨ ସାହସୀ ଛାତ୍ର । ସାଇକେଲରେ ନୂଆପଡ଼ାରୁ କେଦାରନାଥକୁ ଯାତ୍ରା କରିଛନ୍ତି। ନୂଆପଡ଼ା ଜିଲ୍ଲା କୁମୁନା ବ୍ଲକ ନୂଆଗାଁ ଗ୍ରାମପଞ୍ଚାୟତ କାଲିମାଟିଆ ଗାଁର ସୁନୀଲ କୁମାର ହଂସ ଓ କେଶନ ନାଗ କରିଛନ୍ତି ସାଇକେଲ ଯାତ୍ରା।
ଗତ ମେ’ ୧୬ ତାରିଖରୁ ନିଜ ଗାଁରୁ ସାଇକଲ ଯାତ୍ରା ଆରମ୍ଭ କରି ୪୩ ଦିନ ପରେ ବାବା କେଦାରନାଥ ଧାମରେ ପହଞ୍ଚିଛନ୍ତି ଏହି ଦୁଇ ସାହାସୀ ଛାତ୍ର। ପ୍ରଥମେ ନିଜ ଗାଁରୁ ବାହାରିବା ପରେ ମା’ ସମଲେଇ ଠାକୁରାଣୀ ପରେ ପୁରୀରେ ମହାପ୍ରଭୁ ଜଗନ୍ନାଥଙ୍କୁ ଦର୍ଶନ ପରେ ଯାତ୍ରା ଆରମ୍ଭ କରିଥିଲେ। ମାତ୍ର ୪୩ ଦିନ ଭିତରେ ୩୦୦୦ କି.ମି ସାଇକେଲ ଚଳାଇ କେଦାରନାଥ ଧାମରେ ପହଞ୍ଚି ସମସ୍ତଙ୍କୁ ଆଚମ୍ବିତ କରିଛନ୍ତି ଏହି ଦୁଇ ଛାତ୍ର। ଏମାନଙ୍କ କହିବା ଅନୁଯାଇ ବାବା କେଦାରନାଥ ତାଙ୍କ ପାଖକୁ ଆସିବା ପାଇଁ ସ୍ୱପ୍ନାଦେଶ ଦେଇଥିଲେ। ଆଉ ତାଙ୍କରି ଆଦେଶ ପାଇ ବୋହୂ ଝଡ଼ ଝଞ୍ଜା ଭିତରେ ଖରା, ବର୍ଷା ଓ ଶୀତ ସହି ଜଙ୍ଗଲ ପାହାଡ ଡେଇଁ ଆସି ପହଂଚିଛନ୍ତି କେଦାରନାଥ ଧାମରେ ।
ପୁରୀ: ଜ୍ବରରୁ ଉପସମ ପାଇଁ ମହାପ୍ରଭୁଙ୍କୁ ଲାଗି ହେଉଛି ଓଷ । ସୁଦୁସୁଆରଙ୍କ ଦ୍ୱାରା ପ୍ରସ୍ତୁତ ସ୍ୱତନ୍ତ୍ର ଓଷୁଅ ମହାବାହୁଙ୍କ ଅଙ୍ଗରେ ଲାଗି କରାଯାଉଛି । ମଧ୍ୟାହ୍ନଧୂପ ନୀତି ପରେ ଶୁଦ୍ଧ ସୁଆରମାନେ ଝୁଣା, ତେଲ ଓ ବିଭିନ୍ନ ଚେରମୂଳିରେ ପ୍ରସ୍ତୁତ କରିଥିବା ଓଷୁଅକୁ ଦଇତାପତି ସେବକମାନେ ମହାପ୍ରଭୁଙ୍କ ଶ୍ରୀଅଙ୍ଗରେ ଲାଗି କରୁଛନ୍ତି । ଗତକାଲି ଠାରୁ ଆରମ୍ଭ ହୋଇଥିବା ଏହି ଦିବ୍ୟ ଲେପନ ଆଜି ଓ କାଲି ଯାଏଁ ଚାଲିବ ।
ରାଜବୈଦ୍ୟଙ୍କ ପରାମର୍ଶରେ ଆୟୁର୍ବେଦିକ ପଦ୍ଧତିରେ ଚାଲିଛି ଚିକିତ୍ସା । ଦଶମୀଦିନ ଦଶମୁଳ ମୋଦକ ସେବନ ପରେ ସୁସ୍ଥ ହେବେ ଶ୍ରୀବିଗ୍ରହ । ସେପଟେ ଜୁଲାଇ ୭ ତାରିଖରେ ବିଶ୍ୱପ୍ରସିଦ୍ଧ ଘୋଷଯାତ୍ରା । ବଡଭାଇ, ଭଉଣୀଙ୍କୁ ସାଙ୍ଗରେ ନେଇ ନବଦିନାତ୍ମକ ଯାତ୍ରାରେ ଶ୍ରୀଗୁଣ୍ଡିଚା ଯାତ୍ରା କରିବେ ଚତୁର୍ଦ୍ଧା ବିଗ୍ରହ । ସେଥିପାଇଁ ୩ ରଥର ପ୍ରାୟ ୯୦ ପ୍ରତିଶତ ନିର୍ମାଣ କାର୍ଯ୍ୟ ଶେଷ ହୋଇଛି । ପାରାଭାଡ଼ି ଉଠି ଖପୁରି ବସିବା ପରେ ସିଂହାସନ ଓ ପ୍ରଭା କାର୍ଯ୍ୟ ଜାରି ରହିଅଛି । ତିନି ରଥର ଖପୁରୀ, ପାର୍ଶ୍ଵଦେବ ଦେବୀଙ୍କ ରଙ୍ଗ କାମ ଚାଲିଛି । ରୂପକାର ସେବକ ଖୋଦେଇ କରୁଥିବା ବେଳେ ଚିତ୍ରକର ସେବକମାନେ ରଥର ବାହ୍ୟ ଅଂଶ ଗୁଡ଼ିକରେ ରଙ୍ଗ ଦେଉଛନ୍ତି।
