ନୂଆଦିଲ୍ଲୀ : ଇଲେକ୍ଟୋରାଲ ବଣ୍ଡ ସ୍କାମର ଏସଆଇଟି ତଦନ୍ତ ପ୍ରସଙ୍ଗ । ଆଜି ଏହି ମାମଲାର ଶୁଣାଣି କରିବେ ସୁପ୍ରିମକୋର୍ଟ । ବିଭିନ୍ନ ରାଜନୈତିକ ଦଳଙ୍କୁ କର୍ପୋରେଟ ହାଉସ ଦେଇଥିବା ଚାନ୍ଦା କ୍ଷେତ୍ରରେ ଅନିୟମିତତା ଅଭିଯୋଗ କ୍ରମେ ସୁପ୍ରିମକୋର୍ଟରେ ଦାୟର ହୋଇଥିଲା କେତେକ ମାମଲା । ଇଲେକ୍ଟୋରାଲ ବଣ୍ଡ କ୍ଷେତ୍ରରେ ହୋଇଥିବା ଜାଲିଆତିର ବିଚାର ବିଭାଗ ସୁପରଭିଜନରେ ତଦନ୍ତ ଲାଗି କୋର୍ଟରେ ହୋଇଥିଲା ଆବେଦନ ।

ଏହି ବ୍ଯବସ୍ଥା ସମ୍ପୂର୍ଣ୍ଣ ଅସ୍ବଚ୍ଛ ହୋଇଥିବା ସହ ଏହା ଅସାମ୍ବିଧାନିକ ବୋଲି ଦର୍ଶାଇ ଗତ ଫେବ୍ରୁଆରୀ ୧୫ରେ ଏହାକୁ ହଟାଇଦେଇଥିଲେ ସୁପ୍ରିମକୋର୍ଟ । ସିଜେଆଇ ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡ଼ ମାମଲାର ଶୁଣାଣି କରିବେ । ଇଲେକ୍ଟୋରାଲ ବଣ୍ଡ ପ୍ରସଙ୍ଗରେ ପିଟିସନର କମନ କଜ ଓ ସେଣ୍ଟର ଫର ପବ୍ଲିକ ଇଣ୍ଟେରେଷ୍ଟ ଲିଟିଗେସନ ବା ସିପିଆଇଏଲ ପକ୍ଷରୁ ଲଢୁଛନ୍ତି ଆଇନଜୀବୀ ପ୍ରଶାନ୍ତ ଭୂଷଣ । ପିଟିସନରକାରୀ ଦର୍ଶାଇଥିଲେ ଯେ ୨୦୧୮ରୁ ଚାଲିଆସିଥିବା ଏହି ବ୍ଯବସ୍ଥାରୁ ସ୍ପଷ୍ଟ ହେଉଛି ଯେ ରାଜନୈତିକ ଦଳ, କର୍ପୋରେଟ ହାଉସ, ସରକାରୀ କର୍ମଚାରୀ, ସରକାରଙ୍କ ଅଧୀନରେ କାର୍ଯ୍ୟ କରୁଥିବା ବିଭିନ୍ନ ସଂସ୍ଥା ମଧ୍ଯରେ ଡୋନେସନ ପରି ଏକ ସାଲିସଯୁକ୍ତ ବ୍ଯବସ୍ଥା ଚାଲିଛି ଯାହାକି ସମ୍ବିଧାନର ଧାରା ୧୪ଓ ଧାରା ୨୧ରୁ ଉଲ୍ଲଂଘନ କରୁଛି ।

ଏହା ସହ ତଦନ୍ତକାରୀ ସଂସ୍ଥା କବଳରୁ ରକ୍ଷା ପାଇବା ତଥା ଅନ୍ଯାନ୍ଯ ସୁବିଧା ଲାଗି ବିଭିନ୍ନ ଘରୋଇ କମ୍ପାନି ପ୍ରୋଟେକ୍ସନ ମନି ବାବେ ରାଜନୈତିକ ଦଳକୁ ଚାନ୍ଦା ଦେବାର ନଜିର ରହିଛି ବୋଲି ପିଟିସନରେ ଦର୍ଶାଯାଇଥିଲା । ଏପରିକି ତିନି ବର୍ଷରେ ପ୍ରାୟ ୨୦ଟି କମ୍ପାନି ବିଭିନ୍ନ ରାଜନୈତିକ ଦଳଙ୍କୁ ୧୦୦ କୋଟି ଟଙ୍କା ଦେଇଛନ୍ତି । ଏହା ସହ ଏହି ଦୁର୍ନୀତି ପ୍ରକ୍ରିୟାରେ ଇଡି, ସିବିଆଇ, ଆଇଟିର ପରୋକ୍ଷ ଭୂମିକା ରହିଛି ବୋଲି ପିଟିସନରକାରୀ ଦର୍ଶାଇଥିଲେ । ଇଲେକ୍ଟୋରାଲ ବଣ୍ଡ ବ୍ଯବସ୍ଥାରେ ଷ୍ଟେଟବ୍ଯାଙ୍କ ଶାଖାରୁ ୧ ହଜାର, ୧୦ ହଜାର, ୧ ଲକ୍ଷ, ୧ କୋଟି ଟଙ୍କାର ବଣ୍ଡ କ୍ରୟ ବ୍ଯବସ୍ଥା ରହିଥିଲା । ବଣ୍ଡର କୌଣସି ଲିମିଟ ନଥିଲା । ଏହି ବ୍ଯବସ୍ଥାରେ ବିଦେଶୀ କମ୍ପାନିଗୁଡିକ ବି ବଣ୍ଡ କ୍ରୟ କରିପାରୁଥିଲେ ।

ମାତ୍ର ଗତ ଫେବ୍ରୁଆରୀ ୧୫ରେ ୫ ଜଣିଆ ଖଣ୍ଡପୀଠ ଏହାକୁ ଅସାମ୍ବିଧାନିକ ଦର୍ଶାଇ ରଦ୍ଦ କରିଥିଲେ । ୧୨ ଏପ୍ରିଲ ୨୦୧୯ରୁ କ୍ରୟ କରାଯାଇଥିବା ବଣ୍ଡକୁ ମାର୍ଚ୍ଚ ୬ ସୁଦ୍ଧା ଇସିଙ୍କ ନିକଟରେ ଦାଖଲ କରିବାକୁ ଷ୍ଟେଟବ୍ଯାଙ୍କକୁ ନିର୍ଦ୍ଦେଶ ଦେଇଥିଲେ ଅଦାଲତ । ସବୁଠାରୁ ଅଧିକ ୧୩୬୫ କୋଟି ଟଙ୍କା ଚାନ୍ଦା ଦେଇଥିଲା ତାମିଲନାଡୁର ଫ୍ଯୁଚର ଗେମିଂ ଆଣ୍ଡ ହୋଟେଲ ସର୍ଭିସ । ଦ୍ବିତୀୟରେ ଥିଲା ହାଇଦ୍ରାବାଦର ମେଘା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟ୍ରକଚର । ଏହି ସଂସ୍ଥା କେବଳ ବିଜେପିକୁ ଦେଇଥିଲା ୯୬୬ କୋଟି । ତୃତୀୟରେ ଥିଲା ଠାଣେର କ୍ବିକ ସପ୍ଲାଏ ଚେନ ।