ନନ୍ଦିଘୋଷ ବ୍ୟୁରୋ: ଏକ ପରିତ୍ଯକ୍ତ ହେଲିକପ୍ଟରକୁ ନେବା ବେଳେ ଦୁର୍ଘଟଣା। ଉତ୍ତରାଖଣ୍ଡ କେଦାରନାଥରୁ ଗୋଚରକୁ ଏକ ପରିତ୍ଯକ୍ତ ହେଲିକପ୍ଟରକୁ ଏମଆଇ-୧୭ରେ ନେବାବେଳେ ତାହା ଖସିପଡିଛି। ଏକ ଘରୋଇ କମ୍ପାନୀ ଦ୍ବାରା ପରିଚାଳିତ ହେଲିକପ୍ଟରଟି ଲିନଚୋଲି ନିକଟ ମନ୍ଦାକିନୀ ନଦୀ କୂଳେ ପଡିଥିଲା। ଏୟାରଲିଫ୍ଟ କରିବାବେଳେ ତାହା ଖସିପଡିଥିଲା।ଏହି ସୂଚନା ମିଳିବା ପରେ ରାଜ୍ଯ ବିପର୍ଯ୍ୟୟ ପ୍ରଶମନ ଫଣ୍ଡ ବା ଏସଡିଆରଏଫ ପକ୍ଷରୁ ସେଠାକୁ ଏକ ଟିମ ଯାଇ ରେସ୍କ୍ୟୁ ଅପରେସନ କରିଛନ୍ତି। ଏହି ଘଟଣାରେ କେହି ଆହତ ହୋଇ ନାହାନ୍ତି। ପୂର୍ବରୁ ସେହି ହେଲିକପ୍ଟରଟି କେଦାରନାଥ ମନ୍ଦିରୁ ଯାତ୍ରୀମାନଙ୍କୁ ନେବା ଆଣିବା କରୁଥିଲା। ଗତ ଜୁଲାଇ ୧୧ରୁ କେଦାରନାଥକୁ ଯାତ୍ରୀ ଯିବା ସଂଖ୍ଯା ହ୍ରାସ ପାଇଛି। ଗୌରୀକୁଣ୍ଡରୁ କେଦାରନାଥ ରୁଟରେ ଭୂସ୍ଖଳନ ହେବା ଯୋଗୁ ଅନେକ ତୀର୍ଥଯାତ୍ରୀ ଫସିରହିଥିଲେ। ସେମାନଙ୍କୁ ଉଦ୍ଧାର କରିବା ଲାଗି ଏୟାରଫୋର୍ସର ଚିନୁକ ଓ ଏମଆଇ-୧୭ ହେଲିକପ୍ଟର ନିୟୋଜିତ ରହିଛି।
ରାସ୍ତାରେ ଧାନ ତଳି ରୋଇ ପ୍ରତିବାଦ କଲେ ଗ୍ରାମବାସୀ
ନନ୍ଦିଘୋଷ ବ୍ୟୁରୋ: ରାସ୍ତାରେ ଧାନ ତଳି ରୋଇ ପ୍ରତିବାଦ କଲେ ଗ୍ରାମବାସୀ। କାମାକ୍ଷାନଗର ବାଉଁଶପାଳ ବାହାଡା ଗାଁରେ ଏଭଳି ଚିତ୍ର ଦେଖିବାକୁ ମିଳିଛି। କଦର୍ଯ୍ୟ ରାସ୍ତା ପାଇଁ ଲୋକେ ଯିବା ଆସିବାରେ ହନ୍ତସନ୍ତ ହେଉଥିଲେ। ବାରମ୍ବାର ସ୍ଥାନୀୟ ସରପଞ୍ଚ ଓ ପ୍ରଶାସନକୁ ଜଣାଇଥିଲେ। କିନ୍ତୁ ସମସ୍ଯାର ସମାଧାନ ନହେବାରୁ ପ୍ରତିବାଦ କରିଛନ୍ତି ଗ୍ରାମବାସୀ l ବାହାଡା ଗାଁ ମୁଖ୍ୟ ରାସ୍ତା ବର୍ଷାଦିନେ କାଦୁଅ ରେ ଭର୍ତ୍ତି ହୋଇଥାଏ l ସେହି କାଦୁଅ ରାସ୍ତା ଦେଇ ପିଲା ସ୍କୁଲ , କଲେଜ ଯାଆନ୍ତି। ରାସ୍ତା ଖରାପ ଥିବାରୁ ଅନେକ ସମୟରେ ଆମ୍ବୁଲାନ୍ସ ଠାରୁ ଆରମ୍ଭ କରି ଅଗ୍ନିଶମ ଗାଡି ପର୍ଯ୍ୟନ୍ତ ଗାଁ କୁ ପ୍ରବେଶ କରି ପାରେନାହିଁ l ତୁରନ୍ତ ରାସ୍ତା ମରାମତି କରିବାକୁ ଲୋକେ ଦାବି କରିଛନ୍ତି।
ଭିଜିଲାନ୍ସ ଜାଲରେ ଛତ୍ରପୁର ବ୍ଲକ ଶିକ୍ଷା ଅଧିକାରୀ
ନନ୍ଦିଘୋଷ ବ୍ୟୁରୋ: ଭିଜିଲାନ୍ସ ଜାଲରେ ଛତ୍ରପୁର ବ୍ଲକ ଶିକ୍ଷା ଅଧିକାରୀ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗଞ୍ଜାମ ଜିଲ୍ଲା ଛତ୍ରପୁର ବ୍ଲକ ଶିକ୍ଷା ଅଧିକାରୀ ସୀତାରାମ ପାତ୍ରଙ୍କ ଘରେ ରେଡ୍ କରିଛି ଭିଜିଲାନ୍ସ। ଛତ୍ରପୁର ସରକାରୀ କାର୍ଯ୍ୟାଳୟ, ବ୍ରହ୍ମପୁର ସହରର ରାମକୃଷ୍ଣନଗର ଓ ପୋଲସରା ବାସଭବନରେ ଏକାକାଳୀନ ରେଡ କରାଯାଇଛି।
କବର ଖୋଳି ମାଟି ତଳୁ ମହିଳାଙ୍କ ଶବ ବାହାର କଲା ପୋଲିସ
ନନ୍ଦିଘୋଷ ବ୍ୟୁରୋ: ସୁନ୍ଦରଗଡ଼ କୁତ୍ରା ଥାନା ଖତକୁରବାହାଲରେ ଚାଞ୍ଚଲ୍ୟ। ଥାନାରେ ଏତଲା ପରେ କବର ଖୋଳି ମାଟି ତଳୁ ମହିଳାଙ୍କ ଶବ ବାହାର କଲା ପୋଲିସ। ଶାଶୁ ଘର ଲୋକ ଝିଅକୁ ହତ୍ୟା କରିଥିବା ନେଇ ଅଭିଯୋଗ ଆଣିଛନ୍ତି ବାପଘର ଲୋକ। ସୂଚନା ଅନୁସାରେ, ରାଉରକେଲା ନାଲାରୋଡ଼ର ସରିନ, କୁତ୍ରା ଥାନା ଖତକୁରବାହାଲ ଅଞ୍ଚଳର ମନାୱାର ରାଜାଙ୍କୁ ୨୦୧୯ ମସିହାରେ ବିବାହ କରିଥିଲେ। ହେଲେ ଗତ ୨୭ ତାରିଖରେ ସରିନଙ୍କୁ ହାର୍ଟ ଆଟାକ ହୋଇଛି, ତେଣୁ ତାଙ୍କୁ ହସ୍ପିଟାଲ ନେଉଛୁ କହି ଶ୍ବଶୁର ଘର ଲୋକେ ସରିନଙ୍କ ଭାଇ ୱାସିମଙ୍କୁ ଜଣାଇଥିଲେ। ଏହାର କିଛି ସମୟ ପରେ ସରିନଙ୍କର ମୃତ୍ୟୁ ହୋଇଛି ବୋଲି ଖବର ଦେଇଥିଲେ। ଖବର ପାଇ ପରିବାର ଲୋକ ସରିନଙ୍କ ଶାଶୁ ଘରେ ପହଞ୍ଚି ପଚରାଉଚରା କରିଥିଲେ। ହେଲେ ସରିନଙ୍କ ମୃତ୍ୟୁକୁ ନେଇ ଶାଶୁ ଘର ଲୋକଙ୍କ କଥାରେ କୌଣସି ତାଳମେଳ ନଥିବା ପରିବାର ଲୋକ ଅଭିଯୋଗ କରିଛନ୍ତି। ବିଭିନ୍ନ ବାହାନା କରି ତରବରିଆ ଭାବରେ ମଧ୍ୟ ଅନ୍ତିମ ସଂସ୍କାର କରି ଦିଆଗଲା। ଯାହାକୁ ନେଇ ଉଭୟ ପରିବାର ମଧ୍ୟରେ ଝଗଡା ହୋଇଥିଲା। ଘଟଣାକୁ ନେଇ ସରିନଙ୍କ ଭାଇ କୁତ୍ରା ଥାନାରେ ଏତଲଶ ଦେଇଥିଲେ। ଏତଲାକୁ ଭିତ୍ତି କରି ପୋଲିସ ଫରେନସିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚିଥିଲା। ମାଜିଷ୍ଟ୍ରେଟଙ୍କ ଉପସ୍ଥିତିରେ କବରସ୍ଥାନ ଖୋଳି ମହିଳାଙ୍କ ମୃତଦେହ ଜବତ କରାଯାଇଥିଲା। ବ୍ୟବଚ୍ଛେଦ ପରେ ମୃତ୍ୟୁର ଅସଲ କାରଣ ଜଣାପଡିବ। ଘଟଣାର ଉପଯୁକ୍ତ ତଦନ୍ତ ସହ ନ୍ୟାୟ ପ୍ରଦାନ ପାଇଁ ଦାବି କରିଛନ୍ତି ମୃତକଙ୍କ ଭାଇ। ଅନ୍ୟପଟେ ସ୍ତ୍ରୀଙ୍କ ପରିବାର ଲୋକ ଆଣିଥିବା ଅଭିଯୋଗକୁ ଖଣ୍ଡନ କରିଛନ୍ତି ମୃତକଙ୍କ ସ୍ୱାମୀ।
ପାରାଦୀପ CISF ହେପାଜତରେ ୩ ଘାନା ନାଗରିକ
ନନ୍ଦିଘୋଷ ବ୍ୟୁରୋ: ପାରାଦୀପ CISF ହେପାଜତରେ ୩ ଘାନା ନାଗରିକ। ଏକ ଜାହାଜରେ ଲୁଚି ଆସିଥିବା ବେଳେ ଧରାପଡିଛନ୍ତି ୩ ଘାନା ନାଗରିକ। ପାରାଦୀପ ପୋର୍ଟ CQ-2 ବର୍ଥରେ ଜାହାଜ ଲାଗିବା ପରେ ତନାଘନା ଚାଲିଛି । MV ଗ୍ରେଟ୍ ସେଙ୍ଗ ୱେନ ଜାହାଜରେ ତିନି ଜଣଙ୍କୁ ଅଟକ ରଖାଯାଇଛି। ଜାହାଜଟି ହଂକଂର ହୋଇଥିବା ବେଳେ ଜଣାପଡିଛି। ଏହି ଜାହାଜରେ ୨୦ ଜଣ କ୍ରିୟୁ ମେମ୍ବର ଥିବା ବେଳେ, ଘାନା ୩ ନାଗରିକ କିପରି ଆସିଲେ, ସେନେଇ ତଦନ୍ତ ଜାରି ରହିଛି।
ବୁଡ଼ିଲା ମାଲକାନଗିରି କାଙ୍ଗୁରୁକୋଣ୍ଡା ପୋଲ
ନନ୍ଦିଘୋଷ ବ୍ୟୁରୋ: ପୁଣି ବୁଡ଼ିଲା ମାଲକାନଗିରି କାଙ୍ଗୁରୁକୋଣ୍ଡା ପୋଲ। ଲଗାଣ ବର୍ଷା ହେବାରୁ ପୋଲ ଉପରେ ୨ ଫୁଟର ଜଳ ପ୍ରବାହିତ ହେଉଛି। ଫଳରେ ଜାତୀୟ ରାଜପଥରେ ଯାତାୟାତ ପ୍ରଭାବିତ ହୋଇଛି। ପୋଲ ଉପରେ ହଠାତ୍ ପାଣି ମାଡ଼ି ଆସିବାରୁ ମାଲକାନଗିରିରୁ କାଲିମେଳା, ମୋଟୁ ଏବଂ ଛତିଶଗଡ଼କୁ ଯୋଗାଯୋଗ ବିଛିନ୍ନ ହୋଇଛି। ଉଭୟ ପଟେ ଅନେକ ଯାନବାହାନ ଅଟକି ରହିଛି। ମାଲକାନଗିରି ୩୨୬ ନମ୍ବର ଜାତୀୟ ରାଜପଥର କାକରକଣ୍ଡା ଏବଂ କନ୍ୟାଶ୍ରମ ପୋଲ ଉପରେ ପାଣି ଚାଲୁଥିବାରୁ ଯାତାୟତ ଠପ୍ ହୋଇଛି।
ଏଲନ ମସ୍କଙ୍କୁ ଏମିତି ଶିକ୍ଷା ଦେଲେ ବ୍ରାଜିଲର ଜଜ
ନନ୍ଦିଘୋଷ ବ୍ୟୁରୋ: ପୁଣି ଚର୍ଚ୍ଚାରେ ରହିଛନ୍ତି ଟେସଲା ସିଇଓ ଏଲନ ମସ୍କ । ବ୍ରାଜିଲର ହାଇକୋର୍ଟର ଜଜ ଏକ ଗୁରୁତ୍ବପୂର୍ଣ୍ଣ ରାୟ ଦେବା ସହ ମସ୍କଙ୍କୁ ଚେତାଇ ଦେଇଛନ୍ତି । ବ୍ରାଜିଲରେ ମସ୍କଙ୍କ ସୋସିଆଲ ମିଡିଆ କମ୍ପାନୀ ଏକ୍ସକୁ ସସପେଣ୍ଡ କରିବାକୁ ଆଦେଶ ଦେଇଛନ୍ତି । ଦୀର୍ଘ ମାସେ ଧରି ଉଭୟଙ୍କ ମଧ୍ୟରେ ଲାଗିଥିବା ବିବାଦ ଏହି ରାୟ ଶୁଣାଇବା ପରେ ଆହୁରି ବଢ଼ି ଯାଇଛି ।
କହି ରଖୁଛୁ କି, ଏହା ପୂର୍ବରୁ ଜଷ୍ଟିସ ମୋରିସ ମସ୍କଙ୍କୁ ଚେତାବନୀ ଦେଇଛନ୍ତି । ଯଦି ଆପଣ ୨୪ ଘଣ୍ଟା ମଧ୍ୟରେ ବ୍ରାଜିଲରେ ଆପଣଙ୍କର ସୋସିଆଲ୍ ମିଡିଆ ପ୍ଲାଟଫର୍ମ ପାଇଁ ସ୍ଥାନୀୟ ପ୍ରତିନିଧୀ ନିଯୁକ୍ତ ନକରନ୍ତି, ତେବେ ଆପଣଙ୍କର ସେବା ସ୍ଥଗିତ ରହିବ। ଏହା ପରେ, ବର୍ତ୍ତମାନ ଏହି ନିଷ୍ପତ୍ତି ବାହାରକୁ ଆସିଛି । ଏହି ନିଷ୍ପତ୍ତି ପରେ ମସ୍କ ଏହି ନିର୍ଦ୍ଦେଶ ଦେଇଥିବା ବିଚାରପତିଙ୍କୁ ଟାର୍ଗେଟ କରିଛନ୍ତି।
ମସ୍କ କହିଛନ୍ତି କି, ଏଭଳି ନିର୍ଦ୍ଦେଶ ଦେଇଥିବା ଜଜ ଜଣେ ମନ୍ଦ ଶାସକ । ସେ ବ୍ରାଜିଲରେ ଗଣତନ୍ତ୍ରକୁ ହତ୍ୟା କରିବା ପାଇଁ ଚେଷ୍ଟା କରୁଛନ୍ତି । ରାଜନୈତିକ ଉଦ୍ଦେଶ୍ୟ ସେ ଏଭଳି ମନ୍ଦ ନିଷ୍ପତ୍ତି ନେଇଛନ୍ତି ।
ତେବେ ଏହି ବିବାଦ ଏପ୍ରିଲ ମାସରୁ ଆରମ୍ଭ ହୋଇଛି । ବିଚାରପତି ମୋରିସ ଅନୁସନ୍ଧାନ କରିବା ସହ କହିଥିଲେ କି, ଏକ୍ସରେ ମିଛ ତଥ୍ୟ ପ୍ରଚାର କରାଯାଉଛି । ଏହି ସୋସିଆଲ ମିଡିଆ ସାଇଟ ଜରିଆରେ ଭୁଲ ତଥ୍ୟ ଦେଇ ବହୁ ଆକାଉଣ୍ଟକୁ ପ୍ରୋତ୍ସାହିତ କରାଯାଉଛି । ଏହି କାରଣରୁ ପ୍ରଥମେ କିଛି ଗୃପକୁ ବନ୍ଦ କରାଯାଇଥିଲା । ପରେ ଚେତାବନୀ ଦେଇଥିଲେ । ଆଉ ନଶୁଣିବା ପରେ ,ଭଳି ନିଷ୍ପତ୍ତି ନେଇଥିବା କୁହାଯାଇଛି ।
ଗାମୁଛା ଲଗାଇ ଝୁଲିପଡିଲେ ହାବିଲଦାର
ନନ୍ଦିଘୋଷ ବ୍ୟୁରୋ: ବେକରେ ଗାମୁଛା ଲଗାଇ ଝୁଲିପଡିଲେ ହାବିଲଦାର। କଟକ ଓଏମପି ସ୍ଥିତ ଷଷ୍ଠ ବାଟାଲିୟନ ପରିସରରେ ଥିବା କୋଠରୀରୁ ମିଳିଲା ମୃତଦେହ। ମୃତ ହାବିଲଦାର ଜଣଙ୍କ ହେଲେ ତ୍ରିଲୋଚନ ସେଠି। ଯାଜପୁର ବରୀ ଅଞ୍ଚଳର ତ୍ରିଲୋଚନ। ଦୀର୍ଘ ଦିନ ହେବ ତ୍ରିଲୋଚନଙ୍କର ପାରିବାରିକ ଅଶାନ୍ତି ଲାଗିରହିଥିଲା। ଅଧିକାଂଶ ସମୟ ସେ ମାନସିକ ଚାପରେ ରହୁଥିଲେ। ତ୍ରିଲୋଚନ ଦୀର୍ଘ ଦିନ ଧରି କଟକରେ କାମ କରୁଥିଲେ। ସେ ବିବାହ କରି ପରିବାର ସହିତ ରହୁଥିଲେ ହଁ ଅନ୍ୟ ମହିଳାଙ୍କ ସହିତ ତାଙ୍କର ପ୍ରେମ ସମ୍ପର୍କ ଥିବା ଅଭିଯୋଗ ହୋଇଥିଲା। ପରିବାର ନୂଆବଜ଼ାର ଅଞ୍ଚଳରେ ଭଡାରେ ରହୁଥିଲେ। ଅଧିକାଂଶ ସମୟ ଘରକୁ ନଯାଇ ସେ ବାରାକରେ ରହୁଥିଲେ। ଗତକାଲି ସେ ଏସସିବି ମେଡିକାଲରୁ ଡ୍ୟୁଟି ସାରି ବାଟାଲିୟନ ଆସିଥିଲେ। ରାତି ଖାଇବା ଖାଇ ଶୋଇବାକୁ ଯାଇଥିଲେ। ଆଜି ତାଙ୍କର ମୃତ ଶରୀର ରୁମ ରୁ ମିଳିଛି।ଚାଉଳିଆଗଞ୍ଜ ପୋଲିସ ବାଟାଲିୟନରେ ପହଂଚି ତଦନ୍ତ ଆରମ୍ଭ କରିଛି।
ସଂସଦରେ କଙ୍ଗନାଙ୍କ ପାଇଁ ସ୍ଥାନ ନାହିଁ : ରୋବର୍ଟ ଭଦ୍ରା
ନନ୍ଦିଘୋଷ ବ୍ୟୁରୋ: ବିଜେପି ସାଂସଦ କଙ୍ଗନା ରଣାଓ୍ବତ ଆଜିକାଲି ବେଶ ଚର୍ଚ୍ଚାରେ ରହୁଛନ୍ତି । ସେ ଫିଲ୍ମ ଏମରଜେନ୍ସି ହେଉ ବା ରାଜନୈତିକ ବୟାନ । ସବୁବେଳେ ଗଣମାଧ୍ୟମରେ ହେଡଲାଇନ ପାଲଟୁଥିବା କଙ୍ଗନାଙ୍କ ଉପରେ ବର୍ଷିଛନ୍ତି କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧିଙ୍କ ସ୍ବାମୀ ରୋବର୍ଟ ଭଦ୍ରା । କୃଷକଙ୍କ ଉପରେ ନିକଟରେ ଦେଇଥିବା ବିବୃତି ପାଇଁ ବର୍ଷିଛନ୍ତି ରୋବର୍ଟ । ସେ କହିଛନ୍ତି କି, କଙ୍ଗନା ଜଣେ ମହିଳା ହୋଇଥିବାରୁ ମୁଁ ତାଙ୍କୁ ସମ୍ମାନ କରେ । କିନ୍ତୁ ସେ ସାଂସଦ ହେବା ପାଇଁ ଯୋଗ୍ୟ ନୁହଁନ୍ତି ତାଙ୍କର ସଂସଦରେ ସ୍ଥାନ ନାହିଁ । ମୁଁ ଭାବୁଛି ସେ ଲୋକଙ୍କ ବିଷୟରେ ଚିନ୍ତା କରନ୍ତି ନାହିଁ । ଏହାସହ ସେ ମହିଳାଙ୍କ କଥା ମଧ୍ୟ ଭାବନ୍ତି ନାହିଁ । ଏହାସହ ରୋବର୍ଟ କହିଛନ୍ତି କି, ସମସ୍ତ ରାଜନୈତିକ ଦଳ ଏକାଠି ହୋଇ ମହିଳାଙ୍କ ସୁରକ୍ଷା ସମ୍ପର୍କରେ ପଦକ୍ଷେପ ନେବା ଉଚିତ ।
ତେବେ କହି ରଖୁଛୁ କି, କୃଷକଙ୍କ ଆନ୍ଦୋଳନକୁ ନେଇ କଙ୍ଗନା ନିଜର ବିବୃତ୍ତିରେ କହିଥିଲେ କି, ଯଦି ଦେଶରେ ଶକ୍ତିଶାଳୀ ସରକାର ନଥାନ୍ତେ ତାହେଲେ ବାଂଲାଦେଶ ଭଳି ପରିସ୍ଥିତି ସୃଷ୍ଟି ହୋଇଥାନ୍ତା । ଯାହାକୁ ନେଇ ଏବେ କଙ୍ଗନାକୁ ବିରୋଧୀମାନେ ଘେରିବା ସହ ସମାଲୋଚନା କରୁଛନ୍ତି ।
ଆଇସିସି ଚାମ୍ପିୟନ୍ସ ଟ୍ରଫି, ପାକିସ୍ତାନ ଯିବନି ଟିମ ଇଣ୍ଡିଆ!
ନନ୍ଦିଘୋଷ ବ୍ୟୁରୋ: ଆସନ୍ତାବର୍ଷ ପାକିସ୍ତାନରେ ଅନୁଷ୍ଠିତ ହେବାକୁ ଯାଉଛି ଆଇସିସି ଚାମ୍ପିୟନ୍ସ ଟ୍ରଫି । ତେବେ ଭାରତ ପାକିସ୍ତାନ ଯିବ କି ନାହିଁ ଏହାକୁ ନେଇ ବିଭିନ୍ନ ବିତତ୍କମାନ ଦେଖିବାକୁ ମିଳୁଛି । ଭାରତୀୟ ଦଳ ପାକିସ୍ତାନ ନଯିବା ଏକପ୍ରକାର ସୁନିଶ୍ଚିତ ହୋଇଛି । ଜୟ ଶାହା ଆଇସିସିର ଅଧ୍ୟକ୍ଷ ହେବା ପରେ ଏହି ଚର୍ଚ୍ଚା ଦ୍ବିଗୁଣିତ ହୋଇଯାଇଛି । ଜୟ ଶାହା ବିସିସିଆଇ ସଚିବ ଥିବାବେଳେ ସିଧାସଳଖ ଭାରତୀୟ ଦଳ ପାକିସ୍ତାନ ଯିବ ନାହିଁ ବୋଲି ମନା କରିଥିଲେ । ଏବେ ଯଦି ବିସିସିଆଇ ଅଧ୍ୟକ୍ଷ ଚାହିଁବେ ତାହେଲେ ସ୍ଥାନ ବଦଳାଇବାର କ୍ଷମତା ରହିଛି । ଏଣୁ ସେ ଭାରତୀୟ ଦଳ ଖେଳିବାକୁ ଥିବା ମ୍ୟାଚ ଗୁଡ଼ିକ ବଦଳେଇ ପାରନ୍ତି । ତେବେ ଏହାକୁ ନେଇ ପାକିସ୍ତାନର ପୂର୍ବତନ କ୍ରିକେଟରମାନେ ବିଭିନ୍ନ ମତ ଦେଇଛନ୍ତି । ପୂର୍ବତନ କ୍ରିକେଟର ୟୁନୁସ ଖାନ କହିଛନ୍ତି କି, କ୍ରିକେଟର ଆତ୍ମାକୁ ବଞ୍ଚାଇ ରଖିବା ଉଚିତ । ଭାରତୀୟ ଦଳ ପାକିସ୍ତାନ ଆସିଲେ ଭଲହେବ । ଏହାକୁ ଆଇସିସି ଅଧ୍ୟକ୍ଷ ଅନୁମୋଦକ କରିବା ଦରକାର । ତେବେ ଜୟଶାହା ଚଳିତ ଆଇସିସି ଚାମ୍ପିୟନ୍ସ ଟ୍ରଫି ହାଇବ୍ରିଡ ମଡେଲ ଅନୁଷ୍ଠିତ ହେବ ବୋଲି ସ୍ପଷ୍ଠ କରିଛନ୍ତି ।