ନନ୍ଦିଘୋଷ ବ୍ୟୁରୋ: ସୁଭଦ୍ରା ଯୋଜନା ପାଇଁ ଆଧାର ଅପଡେଟକୁ ନେଇ ହଟହଟା ମହିଳା । ଧାଡ଼ିରେ ଜୋତା । ଏପରି ଦୃଶ୍ଯ ଦେଖିବାକୁ ମିଳିଛି ଢେଙ୍କାନାଳ ଭୁବନ ବ୍ଲକ ଆଧାର ଅଫିସ ଆଗରେ । ଢେଙ୍କାନାଳ ଭୁବନ ବ୍ଲକର ୧୮ଟି ପଞ୍ଚାୟତରୁ ମହିଳା ଆସି ଭୁବନ ବ୍ଲକ ଆଧାର କାର୍ଯ୍ୟାଳୟରେ ସକାଳୁ ସକାଳୁ ଲମ୍ବା ଲାଇନ ଦେଖିବାକୁ ମିଳିଛି । ନିଜ ନିଜ ଜୋତା ରଖି ଲାଇନରେ ରହିଛନ୍ତି ହଜାର ହଜାର ମହିଳ। ସୁଭଦ୍ରା ଯୋଜନା ପାଇଁ ରାସନ କାର୍ଡଧାରୀ ଇ- କେୱାଇସି କରିବାକୁ ବାଧ୍ୟ । ହେଲେ କାହାର ଟିପ ଚିହ୍ନ କାମ କରୁନାହି, ତ କାହାର ଆଖି ସ୍କାନ ହୋଇ ପାରୁନାହିଁ । ଏମିତିକି କାହାର ଆଧାର କାର୍ଡ ସହିତ ମୋବାଇଲ ନମ୍ୱର୍ ସଂଯୋଗୀକରଣ ହୋଇନାହିଁ ଅବା କଟିଯାଇଛି । ଯାହାକୁ ଅପଡେଟ କରିବା ପାଇଁ ଆଜି ଭୁବନ ବ୍ଲକ ପରିସର ମଧ୍ୟରେ ପ୍ରବଳ ଖରାରେ ମହିଳାମାନେ ଛୋଟ ଛୁଆଙ୍କୁ ଧରି ନାହିଁ ନଥିବା ହଟହଟା ହେଉଥିବା ଦେଖିବାକୁ ମିଳିଛି । ଏହିଭଳି ପରିସ୍ଥିତି ପରେ ଦାଉ ସାଦିଛି ବିଦ୍ୟୁତ୍ ବିଭାଗ । କାର୍ଯ୍ୟାଳୟରେ ବିଦ୍ୟୁତ୍ ସରବରାହ ବନ୍ଦ ରହିଛି । ଯାହାକୁ ନେଇ ମହିଳା ମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ।
ଶସ୍ତାରେ ମିଳୁଛି ଚୁନା ମାଛ, କିଲୋକୁ ମାତ୍ର ୨୦ ଟଙ୍କା..
ନନ୍ଦିଘୋଷ ବ୍ୟୁରୋ: ବାଙ୍କୀ ବଜାର ନିକଟସ୍ଥ ତାରିଣୀ ଛକରେ କିଲୋ ପ୍ରତି ୨୦ଟଙ୍କାରେ ବିକ୍ରିହେଲା ଚୁନା ମାଛ । ମହାନଦୀ ଜଳସ୍ତର କମିଥିବାରୁ ସ୍ଥାନୀୟ ମତ୍ସ୍ଯଜୀବୀଙ୍କ ଜାଲରେ କ୍ଵିଣ୍ଟାଲ କ୍ଵିଣ୍ଟାଲ ମାଛ ପଡିଥିଲା । ୮ରୁ ୯ କ୍ଵିଣ୍ଟାଲ ମାଛ ଜାଲରେ ପଡ଼ିଥିବା ବେଳେ ,ମାଛ ନଷ୍ଟ ହୋଇଯିବା ଭୟରେ ୨୦ ଟଙ୍କାରେ ମାଛ ବିକ୍ରି କରିଦେଇଛନ୍ତି ମତ୍ସ୍ଯଜୀବୀ । ୨୦ ଟଙ୍କାରେ ମାଛ କିଣିବାକୁ ଲୋକଙ୍କ ପ୍ରବଳ ଭିଡ ଦେଖିବାକୁ ମିଳିଥିଲା । ଜଣେ ଜଣେ ଗ୍ରାହକ ୫ କିଲୋ ଲେଖାଏଁ ମାଛ କିଣିନେଉଥିବା ନେଇ କହିଛନ୍ତି ।
ସୁନୀତି ମୁଣ୍ଡଙ୍କୁ ବିଜେପି କାର୍ଯ୍ୟାଳୟରୁ ଧକ୍କା ମାରି ବାହାର କଲେ ମହିଳା ନେତ୍ରୀ
ନନ୍ଦିଘୋଷ ବ୍ୟୁରୋ: ବିଜେପି ମେୟର ପ୍ରାର୍ଥୀ ସୁନୀତି ମୁଣ୍ଡଙ୍କୁ ଧକ୍କା ମାରି ବିଜେପି ପାର୍ଟି ଅଫିସରୁ ବାହାର କଲେ ବିଜେପି ମହିଳା ନେତ୍ରୀ। ବହିଷ୍କୃତ ହେବା ପରେ ଦଳୀୟ ସଭାପତି ମନମୋହନ ସାମଲଙ୍କୁ ଭେଟିବାକୁ ଆସିଥିବା ବେଳେ ପାର୍ଟି ଅଫିସରେ ଦେଖିବାକୁ ମିଳିଲା ଅଭାବନୀୟ ଘଟଣା। ସୁନୀତିଙ୍କୁ ବିଜେପି ମହିଳା ନେତ୍ରୀ ଗୋଡାଇ ଗୋଡ଼ାଇ ରାସ୍ତାରେ ଛାଡ଼ିଲେ। ସେପଟେ ଏଭଳି ଆଚରଣକୁ ନେଇ ସୁନୀତି କହିଛନ୍ତି ଯେ, ମହିଳାଙ୍କୁ ବିଜେପିରେ ସମ୍ମାନ ନାହିଁ।
’ଏମରଜେନ୍ସି’ ବିବାଦ ଭିତରେ ନୂଆ ଫିଲ୍ମର ନାଁ ଘୋଷଣା କଲେ କଙ୍ଗନା, ଜାଣନ୍ତୁ କଣ ରହିପାରେ କାହାଣୀ..
ନନ୍ଦିଘୋଷ ବ୍ୟୁରୋ: କଙ୍ଗନା ରାନାଓ୍ବତଙ୍କ ଅଭିନୀତ ଫିଲ୍ମ ’ଏମରଜେନ୍ସି’ ଏବେ ବେଶ ଚର୍ଚ୍ଚାରେ ରହିଛି । ରିଲିଜ ହେବା ପୂର୍ବରୁ ଫିଲ୍ମର କାହାଣୀକୁ ନେଇ ବିବାଦ ଦେଖିବାକୁ ମିଳିଛି । ପଞ୍ଜାବରେ ଫିଲ୍ମ ରିଲିଜ ହେବାକୁ ବିରୋଧ କରାଯାଇଥିବାବେଳେ ସୋସିଆଲ ମିଡିଆରେ ମଧ୍ୟ ବିଭିନ୍ନ ସମାଲୋଚନା ମାନ କରାଯାଉଥିବା ଦେଖିବାକୁ ମିଳିଛି । ସେପଟେ ଏହାକୁ ନେଇ ଏବେ ଗଣମାଧ୍ୟମର ହେଡଲାଇନ ପାଲଟିଛନ୍ତି କଙ୍ଗନା । ସେପଟେ ଏମରଜେନ୍ସି ରିଲିଜ ତାରିଖ ଅଟକି ଥିବାବେଳେ ଏହାଭିତରେ ନୂଆ ଫିଲ୍ମର ନାମ ଘୋଷଣା କରିଛନ୍ତି । ତାଙ୍କ ନୂଆ ଫିଲ୍ମର ନାମ ରହିଛି ’ଭାରତ ଭାଗ୍ୟ ବିଧାତା’ । ଏହି ଫିଲ୍ମ ଗୁମନାକ ନାୟକଙ୍କ ଉପରେ ଆଧାରିତ । ଏହି ଦେଶାତ୍ମକ ବୋଧକ ଫିଲ୍ମର ଲିଡ ରୋଲରେ ନଜର ଆସିବେ କଙ୍ଗନା ।
ମଙ୍ଗଳବାର ନୂଆ ଫିଲ୍ମର ନାମ ସୋସିଆଲ ମିଡିଆ ସାଇଟ ଏକ୍ସରେ ପୋଷ୍ଟ କରିଛନ୍ତି । ଫିଲ୍ମର ପ୍ରଯୋଜକ ଏବଂ ନିଦ୍ଦେଶକଙ୍କ ନାମ ମଧ୍ୟ ସାମାନାକୁ ଆସିଛି । ଏହି ଫିଲ୍ମର ନିର୍ଦ୍ଦେଶନା ଭାର ସମ୍ଭାଳିବେ ମନୋଜ ତାଡ଼ପିଆ । ସେ କାହାଣୀ ରଚନା ମଧ୍ୟ କରିଛନ୍ତି । ତେବେ ଏହି ଫିଲ୍ମଟି ଦର୍ଶକଙ୍କ ମହଲରେ ବେଶ ଆଦୃତ ହେବ ବୋଲି କହିଛନ୍ତି କଙ୍ଗନା ।
ପାକିସ୍ତାନ ମାଟିରେ ଘରୋଇ ଦଳକୁ ଧୂଳି ଚଟାଇଲା ବାଂଲାଦେଶ
ନନ୍ଦିଘୋଷ ବ୍ୟୁରୋ: ଘରୋଇ ମାଟିରେ ହାରିଲା ପାକିସ୍ତାନ । ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜକୁ ୨-୦ ମୂଳ ପୋଛ କରି ନେଇଛି ବାଂଲାଦେଶ । ନୂଆ ଇତିହାସ ରଚିବା ସହ ପାକିସ୍ତାନକୁ ହରାଇ ଏବେ ବାଂଲାଦେଶ ନୂଆା କିର୍ତ୍ତୀମାନ ସ୍ଥାପନ କରିଛି । ପାକିସ୍ତାନର ପରାଜୟ ପରେ ଏବେ ସମାଲୋଚନାର ଶିକାର ହେଉଛନ୍ତି ଖେଳାଳି । ଦେଶର ଅଭିଜ୍ଞ ଖେଳାଳିମାନେ ଏବେ କଡ଼ା ସମାଲୋଚନା କରିବା ଆରମ୍ଭ କରି ଦେଇଛନ୍ତି । ତେବେ କହି ରଖୁଛୁ କି, କେବେ ମଧ୍ୟ ପାକିସ୍ତାନଠାରୁ ଟେଷ୍ଟ ମ୍ୟାଚ ଜିତିନଥିଲା ବାଂଲାଦେଶ । ଏଣୁ ପାକିସ୍ତାନରେ ଖେଳାଯାଉଥିବା ସିରିଜରେ ସହଜରେ ଖେଳ ଆରମ୍ଭ କରିଥିଲା ପାକିସ୍ତାନ । ମାତ୍ର ବାଂଲାଦେଶ ଖେଳାଳିଙ୍କ ଲଢ଼ୁଆ ପ୍ରଦର୍ଶନ ଏବେ ଦଳ ବିଜୟର ମୁଖ୍ୟ କାରଣ ହୋଇଛି । ଦ୍ବିତୀୟ ମ୍ୟାଚଟି ବାଂଲାଦେଶ ୬ ଓ୍ବିକେଟରେ ଜିତି ନେଇଛି । ବାଲାଂଦେଶୀ ବ୍ୟାଟ୍ସମ୍ୟାନ ଲିଟନ ଦାସ ପ୍ଲେୟାର ଅଫ ଦ ମ୍ୟାଚ ବିବେଚିତ ହୋଇଛନ୍ତି ।
`ରାଜ୍ଯ ବିଜେପିରେ ଅଛନ୍ତି କୁଚକ୍ରୀ ଓ ଷଡ଼ଯନ୍ତ୍ରକାରୀ’: ସୁନୀତ ମୁଣ୍ଡ୍
ନନ୍ଦିଘୋଷ ବ୍ୟୁରୋ: ବିଜେପିରୁ ନିଲମ୍ବିତ ଭୁବନେଶ୍ବର ମେୟର ପ୍ରାର୍ଥୀ ସୁନୀତି ମୁଣ୍ଡଙ୍କ ବିସ୍ଫୋରକ ବୟାନ । ରାଜ୍ଯ ବିଜେପିରେ ଅଛନ୍ତି କୁଚକ୍ରୀ ଓ ଷଡ଼ଯନ୍ତ୍ରକାରୀ । କେନ୍ଦ୍ରୀୟ ବିଜେପି ଢାଞ୍ଚାରେ କାମ କରୁନି ରାଜ୍ଯ ବିଜେପି । ଦଳରେ ପକ୍ଷପାତିତା ଓ ପ୍ରୀୟାପ୍ରୀତିପୋଷଣ ଚାଲିଥିବା କହି ବିଜେପିର ଗୁମର ଖୋଲିଦେଇଛନ୍ତି ସୁନୀତି । ନିଲମ୍ବନ ନେଇ ବିଜେପି ନେତୃବୃନ୍ଦଙ୍କ ଉପରେ ପ୍ରବଳ ବର୍ଷିବା ସହ ସେ କହିଛନ୍ତି, ନିଲମ୍ବନର ସତ ଜାଣିବାକୁ ରାଜ୍ଯ ପ୍ରଭାରୀଙ୍କ ପାଖକୁ ଚିଠି ଲେଖିଥିଲି । ବନ୍ତ ଥାନାରେ ହୋଇଥିବା ମାମଲା ଯୋଗୁ କାର୍ଯ୍ଯାନୁଷ୍ଠାନ ହୋଇଥିବା ସଂଗଠନ ସମ୍ପାଦକ ଜଣାଇଛନ୍ତି । ହେଲେ ଥାନାରେ ହୋଇଥିବା ମାମଲା ସମ୍ପୂର୍ଣ୍ଣ ମିଛ । ଅସତ୍ଯ ମାମଲାରେ କାର୍ଯ୍ଯାନୁଷ୍ଠାନ ଗ୍ରହଣ କରାଯାଇଛି । ବିଜେପି ସାଂସଦ ଓ ବିଧାୟକଙ୍କ ନାଁରେ ଅନେକ ଏତଲା ରହିଛି । ସେମାନଙ୍କ ବିରୋଧରେ କାହିଁକି କାର୍ଯ୍ଯାନୁଷ୍ଠାନ ହେଉନି ବୋଲି ପ୍ରଶ୍ନ ଉଠାଇଛନ୍ତି ସୁନୀତି । ଥାନାରେ ମାମଲା ରୁଜୁ ହେଲେ କଣ ଦଳୀୟ ଶୃଙ୍ଖଳା ଭଙ୍ଗ ହୁଏ କି ବୋଲି ସୁନୀତି ପ୍ରଶ୍ନ କରିବା ସହ କିଛି କୁଚକ୍ରୀ ତାଙ୍କୁ ଦଳରୁ ବିଦା କରିଥିବା ଅଭିଯୋଗ କରିଛନ୍ତି । ନିଲମ୍ବନ ନିଷ୍ପତ୍ତି ବିରୋଧରେ ଦିଲ୍ଲୀରେ କଥା ଉଠାଇବି ବୋଲି କହିଛନ୍ତି ସୁନୀତି ।
ପଶ୍ଚିମବଙ୍ଗ ବିଧାନସଭାରେ ସର୍ବସମ୍ମତି କ୍ରମେ ଗୃହୀତ ହେଲା ଅପରାଜିତା ମହିଳା ଓ ଶିଶୁ ବିଲ୍
ନନ୍ଦିଘୋଷ ବ୍ୟୁରୋ: ପଶ୍ଚିମବଙ୍ଗ ବିଧାନସଭାରେ ସର୍ବସମ୍ମତି କ୍ରମେ ଗୃହୀତ ହେଲା ଅପରାଜିତା ମହିଳା ଓ ଶିଶୁ ବିଲ୍ (ପଶ୍ଚିମବଙ୍ଗ ଅପରାଧ ଆଇନ ଓ ସଂଶୋଧନ)- ୨୦୨୪। ବିଲରେ ଦୁଷ୍କର୍ମ ଓ ଯୌନ ନିର୍ଯାତନା ଅପରାଧ ଲାଗି ମୃତ୍ଯୁଦଣ୍ଡ ବ୍ଯବସ୍ଥା ରହିଛି। ମହିଳା ଓ ଶିଶୁଙ୍କୁ ଅଧିକ ସୁରକ୍ଷା ଦେବା ତଥା ଦୁଷ୍କର୍ମ ଓ ଯୌନ ସମ୍ପର୍କିତ ଅପରାଧ ରୋକିବା ଉଦ୍ଦେଶ୍ଯରେ ଅଣାଯାଇଛି ବିଲ୍। ଆଜି ରାଜ୍ଯ ସରକାର ଏହି ବିଲ୍ ଆଣିବା ପରେ ବିଭିନ୍ନ ଦଳ ପକ୍ଷରୁ କରାଯାଇଥିଲା ଆଲୋଚନା। ପରେ ବିଲ୍ ଗୃହୀତ ହୋଇଥିଲା। ଏହି ବିଲକୁ ରାଜ୍ଯପାଳଙ୍କ ନିକଟକୁ ପଠାଯିବ। ବିଲ୍ ଗୃହୀତ ହେବା ଦ୍ବାରା ପଶ୍ଚିମବଙ୍ଗ ହୋଇଛି ପ୍ରଥମ ରାଜ୍ଯ ଯିଏ କି ଦୁଷ୍କର୍ମ, ଗଣଦୁଷ୍କର୍ମ ଓ ଯୌନ ନିର୍ଯାତନା ସମ୍ପର୍କିତ କେନ୍ଦ୍ରୀୟ ଆଇନରେ ପରିବର୍ତ୍ତନ ଆଣିଛି। ଏହି ବିଲକୁ ଐତିହାସିକ ଓ ମଡେଲ ବୋଲି କହିଛନ୍ତି ମୁଖ୍ଯମନ୍ତ୍ରୀ ମମତା ବାନାର୍ଜୀ। କୋଲକାତା ଆରଜି କର ମେଡିକାଲ କଲେଜ ଛାତ୍ରୀ ଦୁଷ୍କର୍ମ ଓ ହତ୍ଯା ଘଟଣାରେ ଏହି ଧରଣର ବିଲ୍ ଆଣିବାକୁ ଘୋଷଣା କରିଥିଲେ ମମତା। ଏହି ବିଲ୍ ଯୋଗୁ କେନ୍ଦ୍ରୀୟ ଆଇନରେ ରହିଥିବା କେତେକ ଗଳିଆବାଟକୁ ବନ୍ଦ କରିଦିଆଯାଇପାରିବ। ମାନବିକତା ଓ ସାମାଜିକ ସଂସ୍କାର ବିରୋଧରେ ଦୁଷ୍କର୍ମ ଏକ ଅଭିଶାପ ବୋଲି କହିଛନ୍ତି ମମତା। ଏହି ବିଲକୁ ସମର୍ଥନ କରିଥିଲା ବିଜେପି। ବିଲ୍ ଆଗତ କରିବା ଲାଗି ଗତ ସୋମବାରଠାରୁ ବସିଥିଲା ବିଧାନସଭାର ସ୍ବତନ୍ତ୍ର ଅଧିବେଶନ। ମମତା କହିଛନ୍ତି ଉତ୍ତରପ୍ରଦେଶ ଓ ଗୁଜରାଟରେ ମହିଳାଙ୍କ ବିରୋଧରେ ଅପରାଧ ହାର ଅଧିକ ରହିଛି। ହେଲେ ପଶ୍ଚିମବଙ୍ଗରେ ମହିଳାମାନେ ଏଣିକି ନ୍ଯାୟ ପାଇପାରିବେ।
ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଗିରଫ କଲାନି ମଙ୍ଗୋଲିଆ
ନନ୍ଦିଘୋଷ ବ୍ୟୁରୋ: ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଗିରଫ କଲାନି ମଙ୍ଗୋଲିଆ । ବରଂ ଗାର୍ଡ ଅଫ ଅନର ଦେଇ କରିଛି ଭରପୂର ସ୍ବାଗତ । ୟୁକ୍ରେନ ଆକ୍ରମଣକୁ ନେଇ ଗତବର୍ଷ ଆନ୍ତର୍ଜାତିକ ଅପରାଧୀ କୋର୍ଟ ବା ଆଇସିସି ପକ୍ଷରୁ ତାଙ୍କ ବିରୋଧରେ ଗିରଫ ପରଓ୍ବାନା ଜାରି ସତ୍ତ୍ବେ ଆଇସିସି ସଦସ୍ଯ ରାଷ୍ଟ୍ର ମଙ୍ଗୋଲିଆ ଗସ୍ତ କରିଛନ୍ତି ପୁଟିନ । ମଙ୍ଗୋଲିଆ ରାଜଧାନୀ ଉଲାନାବାତାରରେ ପୁଟିନଙ୍କୁ ଦିଆଯାଇଛି ଗାର୍ଡ ଅଫ ଅନର । ଆଇସିସିର ଗିରଫ ପରଓ୍ବାନାକୁ ଫୁ କରି ପୁଟିନ ଏହି ଗସ୍ତ କରିଛନ୍ତି । ସେପଟେ ପୁଟିନଙ୍କୁ ଅଟକ ରଖିବା ଲାଗି ଆହ୍ବାନ ଦେଇଛନ୍ତି ପାଶ୍ଚାତ୍ଯ ରାଷ୍ଟ୍ର, ୟୁକ୍ରେନ ଓ ଅନ୍ଯାନ୍ଯ ମାନବାଧିକାର ସଂଗଠନ । ୟୁକ୍ରେନରୁ ଶିଶୁମାନଙ୍କୁ ବେଆଇନ ଚାଲାଣ କରିବା ଅଭିଯୋଗରେ ପୁଟିନଙ୍କ ବିରୋଧରେ ଗିରଫ ପରଓ୍ବାନା ଜାରି କରିଥିଲା ଆଇସିସି । ସେପଟେ ଯଦି ମଙ୍ଗୋଲିଆ ପୁଟିନଙ୍କୁ ଗିରଫ ନ କରେ ତେବେ ସେପରି କିଛି ଘଟିବାର ସମ୍ଭାବନା ନାହିଁ ବୋଲି କୁହାଯାଇଛି । ଉଭୟ ରୁଷିଆ ଓ ଚୀନ ସହ ମଙ୍ଗୋଲିଆର ଉତ୍ତମ ସମ୍ପର୍କ ରହିଛି । ଏହା ସହ ସୋଭିଏତ କାଳରୁ ବି ରୁଷିଆର ବନ୍ଧୁ ରାଷ୍ଟ୍ର ଭାବେ ମଙ୍ଗୋଲିଆ ଜଣାଶୁଣା । ୧୯୯୧ରେ ସୋଭିଏତ ରୁଷିଆର ପତନ ପରଠାରୁ ଉଭୟ କ୍ରେମଲିନ ଓ ବେଜିଂ ମଧ୍ଯରେ ସୁସମ୍ପର୍କ ରଖିଆସିଛି ମଙ୍ଗୋଲିଆ । ଏପରିକି ୟୁକ୍ରେନ ଉପରେ ଆକ୍ରମଣ ନେଇ ରୁଷିଆକୁ ସମାଲୋଚନା କରି ନଥିଲା ମଙ୍ଗୋଲିଆ । ଏହା ସହ ଜାତିସଂଘରେ ରୁଷିଆ ବିରୋଧୀ ଭୋଟରେ ବି ମଙ୍ଗୋଲିଆ ବିରତ ରହିଥିଲା । ଗତ ୨୦୨୩ ମାର୍ଚ୍ଚରେ ପୁଟିନଙ୍କ ବିରୋଧରେ ଗିରଫ ପରଓ୍ବାନା ଜାରି କରିଥିଲା ଆଇସିସି । ଅଭିଯୋଗ ଅନୁସାରେ ୟୁକ୍ରେନରୁ ହଜାର ହଜାର ଶିଶୁଙ୍କୁ ରୁଷିଆ ନିଜ ଦେଶକୁ ନେଇଯାଉଛି । ସେପଟେ କ୍ରେମଲିନ କହୁଛି ୟୁକ୍ରେନର ଯେଉଁ ଅଞ୍ଚଳକୁ ରୁଷିଆ କବଜା କରୁଛି ସେହି ଅଞ୍ଚଳର ଶିଶୁଙ୍କ ସୁରକ୍ଷା ଲାଗି ସେମାନଙ୍କୁ ରୁଷିଆ ନିଆଯାଉଛି । ବଡ଼କଥା ହେଉଛି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ଯାହୁଙ୍କ ବିରୋଧରେ ଆଇସିସି ଯେଉଁ ଗିରଫ ପରଓ୍ବାନା ଜାରି କରିଥିଲା ତାହାକୁ ସମର୍ଥନ କରିଥିବା ୯୩ଟି ରାଷ୍ଟ୍ର ମଧ୍ଯରେ ଥିଲା ମଙ୍ଗୋଲିଆ ।
ହାଇକୋର୍ଟ ବେଞ୍ଚ : ଦିନକ ଭିତରେ ୟୁ ଟର୍ଣ୍ଣ ମାରିଲେ ରାଜ୍ୟ ସରକାର
ଭୁବନେଶ୍ବର: ଦିନକ ଭିତରେ ୟୁ ଟର୍ଣ୍ଣ ମାରିଲେ ରାଜ୍ୟ ସରକାର। ହାଇକୋର୍ଟ ପ୍ରସଙ୍ଗରେ ସରକାର ୟୁ ଟର୍ଣ୍ଣ ମାରିଛନ୍ତି। ଗତକାଲି ମୁଖ୍ୟମନ୍ତ୍ରୀ ଗୃହରେ ଅବଗତ କରିଥିଲେ, ସୁପ୍ରିମକୋର୍ଟଙ୍କ ରାୟ ଅନୁସାରେ ରାଜ୍ୟର କୌଣସି ସ୍ଥାନରେ ବେଞ୍ଚ ପ୍ରତିଷ୍ଠାର ଯଥାର୍ଥତା ନାହିଁ। ବିଜେଡି ବିଧାୟକ କଳିକେଶ ସିଂହଦେଓଙ୍କ ପ୍ରଶ୍ନରେ ଲିଖିତ ଉତ୍ତର ରଖିଥିଲେ ମୋହନ ମାଝୀ।
ହେଲେ ଆଜି ପୁଣି ମୋହନ ମାଝୀ ଗୃହକୁ ଅବଗତ କରିଛନ୍ତି, ହାଇକୋର୍ଟ ବେଞ୍ଚ ପ୍ରସ୍ତାବ ବିଚାରାଧୀନ ଅଛି। ନ୍ୟାୟ ପ୍ରଦାନ ପାଇଁ ରାଜ୍ୟ ସରକାର ବଦ୍ଧପରିକର। ଗତକାଲି ମୋହନ ମାଝୀ ଯେଉଁ ମନ୍ତବ୍ୟ ଦେଇଥିଲେ, ତାକୁ ଜୋରଦାର ବିରୋଧ ହୋଇଥିଲା। ଏପରିକି ପଶ୍ଚିମ ଓଡ଼ିଶାରେ ଅସନ୍ତୋଷର ନିଆଁ ତେଜିଥିଲା। କାରଣ ବିରୋଧୀ ଦଳ ଆସନରେ ବିଜେପି ଥିବା ବେଳେ ହାଇକୋର୍ଟ ବେଞ୍ଚ ସପକ୍ଷରେ ଥିଲା । କିନ୍ତୁ ସରକାରକୁ ଆସିବା ପରେ ଆଭିମୁଖ୍ୟରେ କାହିଁକି ପରିବର୍ତ୍ତନ ବୋଲି ପ୍ରଶ୍ନ ଉଠିଥିଲା। ଏପରିକି ବିଜେଡି ମଧ୍ଯ ମୁଖ୍ୟମନ୍ତ୍ରୀଙ୍କୁ କଟାକ୍ଷ କରିଥିଲା।
ସେପଟେ ନିଜେ ବିଜେପି ବିଧାୟକ ଜୟ ନାରାୟଣ ମିଶ୍ର ପ୍ରଶ୍ନ କରିଥିଲେ, ବେଞ୍ଚ କାହିଁକି ହେବନି। ଏହାକୁ ନେଇ ଦଳ ଓ ବିଜେପି ସରକାର ଅଡୁଆରେ ପଡ଼ିଥଲେ। ଏହା ପରେ ଆଜି ନିଜ ମତ ପରିବର୍ତ୍ତନ କରିଛନ୍ତି କି ମୁଖ୍ୟମନ୍ତ୍ରୀ । କଳିକେଶ ସିଂହଦେଓ କହିଛନ୍ତି, ଆମେ କେତେ ଦିନ ଆଉ ଏହାକୁ ବିଚାରାଧୀନ ରଖିବା। ମୁଖ୍ୟମନ୍ତ୍ରୀ ଗୃହକୁ ପ୍ରତିଶୃତି ଦିଅନ୍ତୁ, ପଶ୍ଚିମ ଓଡି଼ଶାରେ ସ୍ଥାୟୀ ବେଞ୍ଚ ହେବ। ସେପଟେ କଂଗ୍ରେସ ବିଧାୟକ ଦଳ ନେତା ରାଜନ ଏକ୍କା କହିଛନ୍ତି, ମୁଖ୍ୟମନ୍ତ୍ରୀଙ୍କ କଥାରେ ସ୍ପଷ୍ଟତା ନାହିଁ। ସୁପ୍ରିମକୋର୍ଟ ଯାହା କୁହନ୍ତୁ, ଓଡ଼ିଶା ଲୋକଙ୍କ ଆବଶ୍ୟକତା ଦେଖିବା କଥା। ଲୋକଙ୍କୁ ଦ୍ୱନ୍ଦ୍ୱରେ ନ ପକାଇ ନେତୃତ୍ୱ ନିଅନ୍ତୁ ମୁଖ୍ୟମନ୍ତ୍ରୀ।
ବଢୁଛି ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ଅଡୁଆ, ହସିନାଙ୍କ ବିରୋଧରେ ୮୯ ମାମଲା
ନନ୍ଦିଘୋଷ ବ୍ୟୁରୋ: ବଢୁଛି ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ଅଡୁଆ । ଦାୟର ହେବାରେ ଲାଗିଛି ଗୋଟିଏ ପରେ ଗୋଟିଏ ମାମଲା । ତାଙ୍କ ବିରୋଧରେ ବର୍ତ୍ତମାନ ଆଉ ୫ଟି ନୂଆ ହତ୍ଯା ମାମଲା ରୁଜୁ ହୋଇଛି । ଫଳରେ ହସିନାଙ୍କ ବିରୋଧରେ ଦାୟର ହୋଇଥିବା ମାମଲା ସଂଖ୍ଯା ପହଞ୍ଚିଛି ୮୯ରେ । ଢାକ୍କାର ଚିଫ ମେଟ୍ରୋପଲିଟାନ ମାଜିଷ୍ଟ୍ରେଟଙ୍କ ନିକଟରେ ଏହି ମାମଲା ରୁଜୁ ହୋଇଛି ।
ସାରା ଦେଶରେ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯିବା ପରେ ଗତ ଅଗଷ୍ଟ ୫ରେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଭାରତ ଚାଲିଆସିଥିଲେ ହସିନା । କୋଟା ବିରୋଧୀ ଆନ୍ଦୋଳନ ବେଳେ ୫ ଜଣଙ୍କୁ ହତ୍ଯା ଘଟଣାରେ ହସିନା, ପୂର୍ବତନ କ୍ଯାବିନେଟ ମନ୍ତ୍ରୀ, ଦଳର ସାଧାରଣ ସମ୍ପାଦକ ଓ ଅନ୍ଯ ୩୩୯ ଜଣଙ୍କ ବିରୋଧରେ ୫ଟି ହତ୍ଯା ମାମଲା ରୁଜୁ ହୋଇଛି । ଏହି ହିଂସାକାଣ୍ଡରେ ପ୍ରାଣ ହରାଇଥିଲେ ୬୦୦ରୁ ଅଧିକ ଲୋକ ।
ହସିନାଙ୍କ ଇସ୍ତଫା ପରେ ନୋବେଲ ବିଜେତା ମହମ୍ମଦ ୟୁନୁସଙ୍କ ନେତୃତ୍ବରେ ଗଠିତ ହୋଇଛି ଅନ୍ତରୀଣ ସରକାର । ସେପଟେ ଆତଙ୍କବାଦୀ ସଂଗଠନ ହେଫାଜତ-ଇ-ଇସଲାମର ନେତା ମାମୁନୁଲ ହକଙ୍କ ସହ ୟୁନୁସଙ୍କ ସାକ୍ଷାତକୁ ନେଇ ବଢିଛି ବିବାଦ । ଏହି ଭେଟଘାଟ ବେଳେ ନିର୍ବାଚନ ସଂସ୍କାର ଓ ନିର୍ବାଚନ ନେଇ ଆଲୋଚନା ହୋଇଥିବା ସୂଚନା ମିଳିଛି । ବଡକଥା ହେଉଛି ହେଫାଜତ-ଇ-ଇସଲାମ ସଂଗଠନ ଭାରତ ବିରୋଧରେ ସର୍ବଦା ମନ୍ତବ୍ଯ ଦେଇଆସୁଛି । ହସିନାଙ୍କ ରାଜତ୍ବ ସମୟରେ ହିଂସାକୁ ପ୍ରୋତ୍ସାହନ ଦେଉଥିବା ଅଭିଯୋଗରେ ଗିରଫ ହୋଇଥିଲେ ମାମୁନୁଲ । ମାତ୍ର ହସିନା ସରକାରର ପତନ ପରେ ତାଙ୍କୁ ମୁକ୍ତି ଦିଆଯାଇଛି । ସେହିପରି ଦେଶର ସର୍ବବୃହତ ଇସଲାମିକ ପାର୍ଟି ତଥା ଭାରତ ବିରୋଧୀ ସଂଗଠନ ଜମାଏତ-ଇ-ଇସଲାମି ସଂଗଠନ ଉପରେ ଜାରି ହୋଇଥିବା ନିଷେଧାଦଶକୁ ହଟାଇ ନେଇଛନ୍ତି ସରକାର ।