ନନ୍ଦିଘୋଷ ବ୍ୟୁରୋ: ଆମେରିକାର ଏକ ହାଇସ୍କୁଲରେ ହରର । ଜର୍ଜିଆର ଏକ ହାଇସ୍କୁଲରେ ଗୁଳିମାଡ଼ । ସହପାଠୀ ଓ ଶିକ୍ଷକଙ୍କୁ ଗୁଳିମାରିଲା ଛାତ୍ର । ଗୁଳିମାଡ଼ରେ ୪ ଜଣଙ୍କର ମୃତ୍ଯୁ ହୋଇଛି । ମୃତକଙ୍କ ମଧ୍ଯକରେ ୨ ଜଣ ଛାତ୍ର ଥିବାବେଳେ ୨ ଜଣ ଶିକ୍ଷକ ରହିଛନ୍ତି । ୯ ଗୁରୁତରଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ତେବେ ଅଭିଯୁକ୍ତ ଜଣକ ସେହି ସ୍କୁଲର ଜଣେ ୧୪ ବର୍ଷର ବାଳକ । ସେ ସେହି ସ୍କୁଲରେ ହିଁ ପାଠ ପଢୁଥିଲା । ହଠାତ ଶ୍ରେଣୀଗୃହରେ ପଶି ଗୁଳି ଚଳାଇବା ଯୋଗୁ ଘଟଣାସ୍ଥଳରେ ହିଁ ୪ ଜଣଙ୍କର ମୃତ୍ଯୁ ହୋଇଛି । ଅଭିଯୁକ୍ତକୁ ଆମେରିକା ପୋଲିସ ଗିରଫ କରିଛି । ଘଟଣାସ୍ଥଳରେ ବହୁ ସଂଖ୍ୟକ ପୁଲିସ୍ ଏବଂ ଆମ୍ବୁଲାନ୍ସ ନିୟୋଜିତ କରାଯାଇଛି। ଗୁଳିମାଡ ପରେ ବିଦ୍ୟାଳୟରୁ ଛାତ୍ରଛାତ୍ରୀ ମାନଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ପୁଲିସ୍ ଘଟଣାରେ ଅଧିକ ତଦନ୍ତ ଜାରି ରଖିଛି ।
ଗୁରୁ ଓ ଶିଷ୍ୟଙ୍କ ପବିତ୍ର ସମ୍ପର୍କ, ଆଜି ପାଳିତ ହେଉଛି ଗୁରୁଦିବସ
ଭୁବନେଶ୍ୱର : ଗୁରୁଙ୍କୁ ନମଣିବ ନର ଗୁରୁ ହିଁ ସାକ୍ଷାତ ଈଶ୍ବର । ଈଶ୍ବରଙ୍କର ଅନ୍ଯ ରୂପ ହେଲେ ଗୁରୁ । ଶିକ୍ଷକଙ୍କ ଭୂମିକାକୁ ମନେ ପକାଇ ସାରା ଆଜି ସାରା ଦେଶ ପାଳୁଛି ପବିତ୍ର ଗୁରୁ ଦିବସ । ଦେଶରେ ପ୍ରତିବର୍ଷ ସେପ୍ଟେମ୍ବର ୫ ତାରିଖରେ ଭାରତର ପୂର୍ବତନ ରାଷ୍ଟ୍ରପତି ସର୍ବପଲ୍ଲୀ ରାଧାକ୍ରୀଷ୍ଣନଙ୍କ ଜନ୍ମତିଥିକୁ ଗୁରୁଦିବସ ଭାବେ ପାଳନ କରାଯାଉଛି । ବିନା ଗୁରୁରେ କେହି କେବେ ସଫଳତାର ଶିଖର ଛୁଇଁପାରିନାହାନ୍ତି । କଞ୍ଚା ମାଟି ପିଣ୍ଡୁଳାକୁ ସୁନ୍ଦର ପ୍ରତିମା ରୂପେ ଗଢିବାରେ ନିରନ୍ତ ଚେଷ୍ଟା କରିଥାନ୍ତି ଗୁରୁ ।
ବାପାମାଆଙ୍କ ପରେ ଗୁରୁ ହିଁ ଜୀବନରେ ଆଗକୁ ବଢିବା ପାଇଁ ସଠିକ ମାର୍ଗ ଦେଖାଇଥାଆନ୍ତି । ଶିକ୍ଷା ପ୍ରଦାନ ସହ ଜୀବନକୁ ମାର୍ଜିତ ଓ ଶୃଙ୍ଖଳିତ କରିବାରେ ତାଙ୍କ ଭୂମିକା ଅତ୍ଯନ୍ତ ଗୁରୁତ୍ବପୂର୍ଣ୍ଣ । ଆମ ଭାରତୀୟ ସଂସ୍କୃତି ଗୁରୁ-ଶିଷ୍ଯର ପରମ୍ପରା ଉପରେ ପ୍ରତିଷ୍ଠିତ । ସର୍ବପଲ୍ଲୀ ରାଧାକ୍ରୀଷ୍ଣନ ରାଷ୍ଟ୍ରପତି ଥିବା ସମୟରେ ଛାତ୍ରଛାତ୍ରୀତାଙ୍କର ଜନ୍ମଦିନ ପାଳନ କରିବାକୁ କହିଥିଲେ । ମାତ୍ର ସେ ସେମାନଙ୍କୁ ନିଜ ଜନ୍ମଦିନ ପାଳିବାକୁ ମନା କରିଥିଲେ । ଜନ୍ମଦିନ ପାଳନ କରିବା ଅପେକ୍ଷା ଏହି ଦିନକୁ ଗୁରୁମାନଙ୍କ ଦିବସ ଭାବେ ପାଳନ କରାଗଲେ ତାହା ବଡ଼ ସମ୍ମାନ ହେବ ବୋଲି କହିଥିଲେ । ଶିକ୍ଷାପ୍ରତି ଥିବା ତାଙ୍କ ଅବଦାନକୁ ସମ୍ମାନ ଜଣାଇ ସେବେଠୁ ତାଙ୍କ ଜନ୍ମଦିବସକୁ ଗୁରୁ ଦିବସ ଭାବେ ପାଳନ କରାଯାଉଛି ।
ନଭେମ୍ବର ୧୫ରୁ କଟକ ଐତିହାସିକ ବାଲିଯାତ୍ରା , ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ
କଟକ : ନଭେମ୍ବର ୧୫ରେ ଆରମ୍ଭ ହେବ କଟକ ଐତିହାସିକ ବାଲିଯାତ୍ରା । ଏନେଇ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଆରମ୍ଭ ହୋଇଛି । ଆଜି ଜିଲ୍ଲାପାଳଙ୍କ ଅଧ୍ୟକ୍ଷତାରେ ଗୁରୁତ୍ବପୂର୍ଣ୍ଣ ବୈଠକ ବସିଥିଲା । ଲୋକଙ୍କ ସୁରକ୍ଷା ପାଇଁ ପୋଲିସ, ସିସିଟିଭି, ଆମ୍ବୁଲାନ୍ସ ଯୋଗାଇ ଦିଆଯିବବୋଲି କଟକ ଜିଲ୍ଲାପାଳ ଦତ୍ତାତ୍ରେୟ ଭାଓ ସାହେବ୍ ସିନ୍ଧେ କହିଛନ୍ତି । ଓରମାସ୍ ଷ୍ଟଲ ସଂଖ୍ୟା ବୃଦ୍ଧି ପାଇବ ବୋଲି କହିଛନ୍ତି କଟକ ଜିଲ୍ଲାପାଳ।
କନ୍ନଡ ଆକ୍ଟର ଦର୍ଶନ ଥୁଗୁଦୀପାଙ୍କ ବଢିଲା ଅଡୁଆ, ରେଣୁକାସ୍ଵାମୀ ହତ୍ଯାକାଣ୍ଡରେ ଚାର୍ଜସିଟ୍ ଦାଖଲ
ବେଙ୍ଗାଲୁରୁ : କନ୍ନଡ ସୁପରଷ୍ଟାର ଦର୍ଶନ ଥୁଗୁଦୀପାଙ୍କ ବଢିଲା ଅଡୁଆ। ଦର୍ଶନଙ୍କ ପ୍ରଶଂସକ ରେଣୁକାସ୍ଵାମୀ ହତ୍ଯାକାଣ୍ଡ ଘଟଣାରେ ଚାର୍ଜସିଟ ଦାଖଲ କଲା ପୋଲିସ। ଅଭିନେତା ଦର୍ଶନଙ୍କ ବିରୋଧରେ ଦାଖଲ ହୋଇଥିବା ଚାର୍ଜସିଟରେ ପୋଲିସ ୨ଶହଟି ପ୍ରମାଣ ଥିବା ଉଲ୍ଲେଖ କରିଛି। ଏଥିରେ ଫରେନସିକ୍ ରିପୋର୍ଟ ସହ ରକ୍ତଛିଟାର ମିଳିଛି ପ୍ରମାଣ। ଅଭିନେତ୍ରୀ ପବିତ୍ରା ଗୌଡାଙ୍କ ସ୍ଯାଣ୍ଡଲରେ ମୃତକ ରେଣୁକାସ୍ଵାମୀର ରକ୍ତ ଛିଟା ମିଳିଥିବା ପୋଲିସ ରିପୋର୍ଟରେ ଦର୍ଶାଇଛି। କନ୍ନଡ ଅଭିନେତା ଦର୍ଶନ ଥୁଗୁଦୀପାଙ୍କ ପୋଷାକରେ ମଧ୍ୟ ରେଣୁକାସ୍ଵାମୀଙ୍କ ରକ୍ତଛିଟା ଥିବା ପ୍ରମାଣ ମିଳିଛି।
ବେଙ୍ଗାଲୁରୁ ପୋଲିସ ଦାଖଲ କରିଥିଲା ଚାର୍ଜସିଟରେ ଏହି ସମସ୍ତ ତଥ୍ୟ ଦର୍ଶାଇଛି । ଚାର୍ଜସିଟରେ ପୋଲିସ ୨୩୦ଟି ପ୍ରମାଣ ଦର୍ଶାଇଛି। ପ୍ରତ୍ୟକ୍ଷଦର୍ଶୀଙ୍କ ସୂଚନା ଆଧାରରେ ଏହି ରିପୋର୍ଟ ଦାଖଲ କରିଛି ପୋଲିସ। ଫ୍ଯାନ୍ସ ରେଣୁକାସ୍ଵାମୀଙ୍କୁ ହତ୍ଯା ଅଭିଯୋଗରେ ଗତ ଜୁନ ୧୧ ତାରିଖରେ କନ୍ନଡ ଅଭିନେତା ଦର୍ଶନ ଥୁଗୁଦୀପାଙ୍କୁ ଗିରଫ କରିଥିଲା ପୋଲିସ। ଦର୍ଶନଙ୍କ ସାଥି ପବିତ୍ରା ଗୌଡାଙ୍କୁ ଅଶ୍ଳୀଳ ମେସେଜ କରିବା ଘଟଣାକୁ ନେଇ ରେଣୁକାସ୍ଵାମୀଙ୍କ ହତ୍ଯା କରିଥିବା ଅଭିଯୋଗ ହୋଇଥିଲା। ଦର୍ଶନଙ୍କ କୋଷ୍ଟାର ପବିତ୍ରା ଗୌଡାଙ୍କୁ ମଧ୍ୟ ପୋଲିସ ଗିରଫ କରିଛି। ଏହି ମାମଲାରେ ମୋଟ ୧୯ ଜଣ ଗିରଫ ହୋଇଛନ୍ତି।
ରାଜ୍ୟରେ ପ୍ରବଳ ବର୍ଷା ନେଇ ସତର୍କତା ଜାରି, ୧୮ ଜିଲ୍ଲାକୁ ୟେଲୋ ଆଲର୍ଟ
ଭୁବନେଶ୍ୱର : ଉତ୍ତର ଆନ୍ଧ୍ରପ୍ରଦେଶ ଉପକୂଳରେ ସୃଷ୍ଟି ହୋଇଛି ଆଉ ଏକ ଘୂର୍ଣ୍ଣିବଳୟ। ରାଜ୍ୟରେ ପ୍ରବଳ ବର୍ଷା ନେଇ ପୂର୍ବାନୁମାନ କଲା ଆଞ୍ଚଳିକ ପାଣିପାଗ କେନ୍ଦ୍ର। ୨୪ ଘଣ୍ଟାରେ ଏହା ଲଘୁଚାପର ରୂପ ନେବା ସମ୍ଭାବନା ରହିଛି। ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବା ନେଇ ଆକଳନ କରିଛି ପାଣିପାଗ କେନ୍ଦ୍ର। ଲଘୁଚାପ ପ୍ରଭାବରେ ଆଜିଠାରୁ ଉପକୂଳ ଓ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ସମ୍ଭାବନା ରହିଛି। ୯ ତାରିଖ ପର୍ଯ୍ୟନ୍ତ ବିଭିନ୍ନ ଜିଲ୍ଲାରେ ବଜ୍ରପାତ ନେଇ ସତର୍କତା ଜାରି କରାଯାଇଛି। ଘଡଘଡି ବିଜୁଳି ସହ ବର୍ଷା ନେଇ ୧୮ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର।
ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ, ଗଞ୍ଜାମ, ଗଜପତି, ରାୟଗଡା, କୋରାପୁଟ, ମାଲକାନଗିରି, ନବରଙ୍ଗପୁର, କଳାହାଣ୍ଡି, ନୂଆପଡା ଏବଂ ବଲାଙ୍ଗିରକୁ ସତର୍କତା ଜାରି କରାଯାଇଛି। ଏହି ସବୁ ଜିଲ୍ଲାରେ ୭୦ ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା ହୋଇପାରେ। ସେହିଭଳି ଆସନ୍ତାକାଲି ଦକ୍ଷିଣ ଉପକୂଳରେ ପ୍ରବଳ ବର୍ଷା ସମ୍ଭାବନା ରହିଛି। ଏଥିପାଇଁ ୧୨ଟି ଜିଲ୍ଲାକୁ ବଜ୍ରପାତ ବର୍ଷା ନେଇ ୟେଲୋ ଆଲର୍ଟ ଜାରି କରାଯାଇଛି।
ସେହିଭଳି ୭ ତାରିଖ ଗଣେଶ ପୂଜାରେ ମଧ୍ୟ ପ୍ରବଳ ବର୍ଷା ନେଇ ୯ ଜିଲ୍ଲାକୁ ୟେଲୋ ଆଲର୍ଟ ହୋଇଛି। ବିଶେଷ କରି ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, କେନ୍ଦ୍ରାପଡା, ଯାଜପୁର, ନୟାଗଡ, ଅନୁଗୁଳ ଏବଂ ଢେଙ୍କାନାଳକୁ ସତର୍କତା ଜାରି କରାଯାଇଛି। ଆଜି ସକାଳ ସମୟରେ ଟୁଇନ୍ ସିଟିରେ ପ୍ରବଳ ଖରା ଅନୁଭବ ହୋଇଥିଲେ ମଧ୍ୟ ସନ୍ଧ୍ୟାରେ ଘଡଘଡି ବିଜୁଳି ସହ ବର୍ଷା ସାମାନ୍ୟ ଆଶ୍ବସ୍ତି ଆଣିଛି। ଆସନ୍ତା ୯ ତାରିଖ ପର୍ଯ୍ୟନ୍ତ ବର୍ଷା ହେଲେ ମଧ୍ୟ ଗରମ ଗୁଳୁଗୁଳି ଜାରି ରହିବ ବୋଲି ପାଣିପାଗ କେନ୍ଦ୍ର କହିଛି।
ବସଷ୍ଟାଣ୍ଡ ପାଇଁ ହନ୍ତସନ୍ତ ସାନଖେମୁଣ୍ଡି ବ୍ଲକର ୨୬ଟି ପଞ୍ଚାୟତ ଲୋକ
ନନ୍ଦିଘୋଷ ବ୍ୟୁରୋ: ନିୟମିତ ବସଷ୍ଟାଣ୍ଡ ପାଇଁ ହଇରାଣ ହେଉଛନ୍ତି ସାନଖେମୁଣ୍ଡି ବ୍ଲକର ୨୬ଟି ପଞ୍ଚାୟତ ବାସିନ୍ଦା । ଆମ ବସଷ୍ଟାଣ୍ଡ ନିର୍ମାଣ ପାଇଁ ପୂର୍ବତନ ବିଜେଡି ସରକାର ୫କୋଟି ୪୨ ଲକ୍ଷ ଟଙ୍କାର ଟେଣ୍ଡର କରିଥିଲେ । ଓଡିଶା ପୋଲିସ ହାଉସିଂ ବୋର୍ଡ ଏହାର ଟେଣ୍ଡର ନେଇ କିଛିଦିନ କାମ କରିଥିବା ବେଳେ ବର୍ତ୍ତମାନ କାମ ସଂପୂର୍ଣ୍ଣ ବନ୍ଦ କରିଦେଇଛି । ତେବେ ବିଜେପି ସରକାର ଆସୁ ଆସୁ ବସ ଷ୍ଟାଣ୍ଡ କାମ ବନ୍ଦ ହୋଇଥିବାରୁ ଅସନ୍ତୋଷ ପ୍ରକାଶ କରିଛନ୍ତି ଲୋକେ । ଲୋକଙ୍କ ପ୍ରଶ୍ନ କଣ ସତରେ ଅଧାରେ ରହିଯିବ ବସଷ୍ଟାଣ୍ଡ ଆଶା ?
ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକରେ ୨୬ଟି ପଞ୍ଚାୟତର ୨୦ହଜାରରୁ ଅଧିକ ଲୋକଙ୍କ ପାଇଁ ବସଷ୍ଟାଣ୍ଡ ଟିଏ ନାହିଁ । ପୂର୍ବ ବିଜେଡି ସରକାର ଲୋକଙ୍କ ସୁବିଧା ପାଇଁ ଆମ ବସଷ୍ଟାଣ୍ଡ ଯୋଜନା କରିଥିଲା । ବ୍ଲକରେ ବସଷ୍ଟାଣ୍ଡ ନଥିବା ଯୋଗୁ ପୂର୍ବତନ
ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ପୂର୍ତ୍ତ ବିଭାଗ ଡାକବଙ୍ଗଳା ଠାରେ ବସଷ୍ଟାଣ୍ଡ ନିର୍ମାଣ କାମ ଆରମ୍ଭ କରିଥିଲେ । ୫ କୋଟି ୪୨ଲକ୍ଷରୁ ଅଧିକ ଟଙ୍କାର ଟେଣ୍ଡର କରାଯାଇଥିଲା । ବସଷ୍ଟାଣ୍ଡର ନିର୍ମାଣ ଦାୟିତ୍ଵ ଓଡିଶା ପୋଲିସ ହାଉସିଂ ବୋର୍ଡକୁ ଦିଆଯାଇଥିଲା । ମାର୍ଚ୍ଚ ମାସରେ ବସଷ୍ଟାଣ୍ଡ ନିର୍ମାଣ ପାଇଁ କିଛି ଦିନ କାମ ଆରମ୍ଭ କରି ପାଚେରୀ ଆରମ୍ଭ କରିଥିବା ବେଳେ ବର୍ତ୍ତମାନ କାମ ବନ୍ଦ କରିଦେଇଛି ସଂସ୍ଥା । କାହିଁକି କାମ ବନ୍ଦ ରହିଛି ସେ ନେଇ ସ୍ପଷ୍ଟ କରୁନାହାଁନ୍ତି ନିର୍ମାଣକାରୀ ସଂସ୍ଥା । ବସ ଷ୍ଟାଣ୍ଡ କାମ ବନ୍ଦ ହୋଇଯିବା ପରେ ଅଞ୍ଚଳବାସୀଙ୍କ ମଧ୍ଯରେ ଅସନ୍ତୋଷ ତେଜିବାରେ ଲାଗିଛି ।
ଦିଗପହଣ୍ଡି ଆସିକା ଭାୟା ଶେରଗଡ ଜାତୀୟ ରାଜପଥ ୩୨୬ ରହିଥିବା ବେଳେ ହଜାର ହଜାର ସ୍ଥାନୀୟ ବାସିନ୍ଦାଙ୍କ ଏକମାତ୍ର ଯୋଗାଯୋଗ ମାଧ୍ୟମ ବସ ହୋଇଥିବା ବେଳେ,ବସ ରହିବା ସ୍ଥାନ ନାହିଁ । ଜିଲ୍ଲା ତଥା ଜିଲ୍ଲା ବାହାରୁ ରାତିରେ ବସ ମାଧ୍ୟମରେ ଆସଥିବା ଯାତ୍ରୀ ବସଷ୍ଟାଣ୍ଡ ନଥିବାରୁ ନାନା ଅସୁବିଧାର ସମ୍ମୁଖୀନ ହେଉଛନ୍ତି । ଦିନ ହେଉ କି ରାତି ବସଷ୍ଟାଣ୍ଡ ନଥିବାରୁ ମହିଳାମାନଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଅଞ୍ଚଳରେ ତୁରନ୍ତ ବସଷ୍ଟାଣ୍ଡ ଦରକାର ଥିବା ବେଳେ ନୂଆ ସରକାର ଆସିବା ପରେ କାମ ବନ୍ଦ ହୋଇଯାଇଥିବାରୁ ଅଞ୍ଚଳବାସୀଙ୍କ ଆଶା ମଉଳି ଯାଇଛି । ବସଷ୍ଟାଣ୍ଡ କାର୍ଯ୍ଯ ଶୀଘ୍ର ସାରିବାକୁ ସରକାରଙ୍କୁ ନିବେଦନ କରିଛନ୍ତି ଅଞ୍ଚଳବାସୀ ।
ଟ୍ରେନରୁ ପଡ଼ିଥିଲେ ବି ବର୍ତ୍ତିଗଲା ୫ ବର୍ଷର ଶିଶୁ
ନନ୍ଦିଘୋଷ ବ୍ୟୁରୋ: ରଖେ ହରି ମାରେ କିଏ। ଅଧ ରାତିରେ ଦ୍ରୁତରେ ଗତିରେ ଯାଉଥିବା ଟ୍ରେନରୁ ଖସି ପଡ଼ିଥିଲା ୫ ବର୍ଷର ପିଲାଟିଏ। ଟ୍ରେନ୍ ଟ୍ରାକରେ ସେ ପଡ଼ିଥିଲା। କିଛି ସମୟ ପରେ ସେହି ଟ୍ରାକରେ ଏକ ମାଲଗାଡ଼ି ଯିବା ବେଳେ ଡ୍ରାଇଭର ଦେଖିଥିଲେ, ପିଲାଟିଏ ଧାରଣାରେ ପଡ଼ିଛି। ସାଙ୍ଗେ ସାଙ୍ଗେ ସେ ରେଢ଼ାଖୋଲ ଷ୍ଟେସନକୁ ଖବର ଦେଇଥିଲେ। ଆରପିଏଫ୍ ଆସି ପିଲାଟିକୁ ଉଦ୍ଧାର କରିଥିଲା। ଏବେ ସେ ସୁସ୍ଥ ଅଛି। ଏପରି ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି ରେଢ଼ାଖୋଲ ପାଖରେ। ଗତ ରାତିରେ ଦୁର୍ଗ ପୁରୀ ଇଣ୍ଟରସିଟି ଟ୍ରେନରେ ୫ ବର୍ଷର ପ୍ରୀତିଶପ୍ରଜ୍ଞା ହୋତା ଓ ତାଙ୍କ ପରିବାର ଭୁବନେଶ୍ଵର ଆସୁଥିଲେ। ରାତି ପ୍ରାୟ ୨ଟାରେ ବୋଧହୁଏ ପିଲାଟି ଟୟଲେଟକୁ ଆସି ଥାଇପାରେ । ଏହି ସମୟରେ ସେ ଟ୍ରେନରୁ ଖସି ପଡ଼ିଥିଲା। କିଛି ସମୟ ପରେ ସେହି ଟ୍ରାକରେ ଏକ ମାଲଗାଡ଼ି ଆସିଥିଲା। ଟ୍ରେନ ଡ୍ରାଇଭର ଦେଖିଥିଲେ, ପିଲାଟିଏ ରେଳ ଧାରଣାରେ ପଡି଼ଛି। ସେ ତୁରନ୍ତ ରେଢ଼ାଖୋଲ ଷ୍ଟେସନକୁ ଫୋନ କରିଥିଲେ। ଆରପିଏଫ୍ ଆସି ପିଲାଟିକୁ ଉଦ୍ଧାର କରିଥିଲା। ପରେ ତା ପରିବାରକୁ ହସ୍ତାନ୍ତର କରାଯାଇଛି। ସେ ଏବେ ସୁସ୍ଥ ଅଛି।
ବିଜେପିର ଦଳୀୟ କାର୍ଯ୍ୟକ୍ରମରେ ନିଲମ୍ବିତ ନେତା
ନନ୍ଦିଘୋଷ ବ୍ୟୁରୋ: ନିଲମ୍ଵିତ ହେବା ସତ୍ତ୍ଵେ ଦଳୀୟ କାର୍ଯ୍ୟକ୍ରମରେ ବିଜେପି କର୍ମୀ। ଖୋର୍ଦ୍ଧାରେ ଏହି ଦୃଶ୍ଯ ଦେଖିବାକୁ ମିଳିଛି। ଦଳ ବିରୋଧୀ କାର୍ଯ୍ୟ ଅଭିଯୋଗରେ କିଛି ଦିନ ତଳେ ନିକୁଞ୍ଚ ପଟ୍ଟନାୟକଙ୍କୁ ବିଜେପି ନିଲମ୍ବିତ କରିଥିଲା।କିନ୍ତୁ ଆଜି ଖୋର୍ଦ୍ଧାରେ ହୋଇଥିବା ଏକ କାର୍ଯ୍ୟକ୍ରମରେ ସେ ଯୋଗ ଦେଇଥିବାରୁ ଦେଖାଦେଇଛି ବିବାଦ। ଅଭିଯୋଗ ହୋଇଛି ସାଂସଦ ଅପରାଜିତା ଷଡ଼ଙ୍ଗୀଙ୍କ ପ୍ରଚ୍ଛନ୍ନ ପ୍ରୋତ୍ସାହନରେ ନିକୁଞ୍ଜ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଜିଲ୍ଲା ସଭାପତି ରଶ୍ମି ରଂଜନ ମହାପାତ୍ରଙ୍କ ଅଧ୍ୟକ୍ଷତାରେ ଏହି କାର୍ୟ୍ଯକ୍ରମ ହୋଇଥିଲା। ସାଂସଦ ଅପରାଜିତା ଷଡ଼ଙ୍ଗୀ ଯୋଗ ଦେଇ ଏଥିରେ ସଦସ୍ୟ ଅଭିଯାନ ସମ୍ପର୍କରେ ସୂଚନା ଦେଇଥିଲେ। ସସପେଣ୍ଡ ହୋଇଥିବା କର୍ମୀ କେମିତି ଦଳୀୟ କାର୍ଯ୍ୟକ୍ରମରେ ଯୋଗ ଦେଲେ ବୋଲି ପ୍ରଶ୍ନ ହେବାରୁ ସାଂସଦ ଏହାକୁ ଏଡ଼ାଇ ଚାଲି ଯାଇଥିଲେ। ସେପଟେ କିନ୍ତୁ ଜିଲ୍ଲା ସଭାପତି ଥିଲେ ଅସହାୟ। ପ୍ରଶ୍ନ ଶୁଣି କିଂକର୍ତ୍ତବ୍ୟ ବିମୁଢ଼ ହୋଇ ସେ କହିଥିଲେ, ପରିବାର କଥା। ନିକୁଞ୍ଚଙ୍କୁ କେହି ଡାକି ନାହାନ୍ତି। କିନ୍ତୁ ଯଦି ଆସିଛନ୍ତି, କଣ କରାଯିବ।
ହରିୟାଣା ବିଧାନସଭା ନିର୍ବାଚନ : ବିଜେପି ଜାରି କଲା ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା
ନନ୍ଦିଘୋଷ ବ୍ୟୁରୋ: ହରିୟାଣା ନିର୍ବାଚନ ଲାଗି ବିଜେପି ଜାରି କଲା ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା। ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକାରେ ମୋଟ ୬୭ ଜଣକ ନାଁ ପ୍ରକାଶ ପାଇଛି। ୯୦ ଆସନ ବିଶିଷ୍ଟ ବିଧାନସଭା ପାଇଁ ପ୍ରଥମ ପର୍ଯ୍ଯାୟରେ ୬୭ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି। ଏହି ତାଲିକାରେ ମୁଖ୍ୟମନ୍ତ୍ରୀ ନାଏବ ସୈନି ଅଛନ୍ତି। ସେ ଲଡ଼ବା ଆସନରୁ ଲଢ଼ିବେ। ଏହି ପରି ଅନୀଲ ଭିଜ୍ ଅମ୍ବାଲାରୁ ଲଢ଼ିବେ। ସେପେଟେ ବିଧାନସଭା ନିର୍ବାଚନ ପାଇଁ ପରସ୍ପର ମଧ୍ୟରେ ହାତ ମିଳାଇଛନ୍ତି ଦୁଷ୍ୟନ୍ତ ସିଂହ ଓ ଚନ୍ଦ୍ରଶେଖର ଆଜାଦ। ସେମାନଙ୍କ ଦଳ ଜେଜେପି ଓ ଆଜାଦ ସମାଜ ପାର୍ଟି ମଧ୍ୟରେ ମେଣ୍ଟ ହୋଇଛି। ଉଭୟେ ଏକାଠି ହୋଇ ନିର୍ବାଚନ ଲଢ଼ିବେ। ଆଗରୁ ବିଜେପି ସହିତ ସରକାରରେ ଥିଲେ ଦୁଷ୍ୟନ୍ତ ସିଂହ। କିଛି ଦିନ ଆଗରୁ ବିଜେପି ସହିତ ସଂପର୍କ ଛିନ୍ନ କରିଥିଲେ ଏବଂ ଏବେ ଆଜାଦଙ୍କ ସହିତ ମେଣ୍ଟ କରିଛନ୍ତି।
ରେଭେନ୍ସା ବିଶ୍ଵବିଦ୍ୟାଳୟ ନାମ ପରିବର୍ତ୍ତନ ପ୍ରସଙ୍ଗ, କ୍ଯାମ୍ପସରେ ଦୁଇ ଛାତ୍ରଗୋଷ୍ଠୀ ମୁହାଁମୁହିଁ
ନନ୍ଦିଘୋଷ ବ୍ୟୁରୋ: ରେଭେନ୍ସା ବିଶ୍ଵବିଦ୍ୟାଳୟ ନାମ ପରିବର୍ତ୍ତନ ବିବାଦ। ଅନ୍ଧକାର ହେଲା ରେଭେନ୍ସା ବିଶ୍ୱବିଦ୍ୟାଳୟ। ୟୁନିଭର୍ସିଟି ନାମ ପରିବର୍ତ୍ତନକୁ ନେଇ ଘନେଇଲା ବିବାଦ। ପୁରାତନ ଛାତ୍ର ଓ ବିଭିନ୍ନ ଛାତ୍ର ସଙ୍ଗଠନ ପକ୍ଷରୁ ବିଶ୍ୱବିଦ୍ୟାଳୟରେ ମସାଲ ଶୋଭାଯାତ୍ରା ସମୟରେ ମୁହାଁମୁହିଁ ହେଲେ ଏବିଭିପି ଓ ଅନ୍ୟାନ୍ୟ ଛାତ୍ର ସଗଠନ। ନିୟମ ଅନୁସାରେ ସନ୍ଧ୍ୟା ୬ଟା ପରେ ବାହାର ଲୋକ ପ୍ରବେଶ ନିଷେଧ ଥିଲେ ସୁଦ୍ଧା ଅଣଛାତ୍ର ପ୍ରବେଶକୁ ବାରଣ କରି ଏଭଳି ପରିସ୍ଥିତି ସୃଷ୍ଟି ହୋଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଁଚି ବୁଝାସୁଝା କରିବା ପରେ ଶାନ୍ତ ପଡିଥିଲେ ଛାତ୍ର। ତେବେ ରେଭେନ୍ସା ନାଁ ପରିବର୍ତ୍ତନ ପ୍ରସଙ୍ଗରେ ସେଭ ରେଭେନ୍ସା ଲିଗାସି ଫୋରମ ପକ୍ଷରୁ ରେଭେନ୍ସା କ୍ୟାମ୍ପସରେ ବିଶାଳ ମଶାଲ ଶୋଭାଯାତ୍ରା କରାଯାଇଥିଲା। ନାଁ ପରିବର୍ତ୍ତନ ବୟାନକୁ ବିରୋଧ କରି ଶତାଧିକ ପୂର୍ବତନ ଓ ବର୍ତ୍ତମାନର ରେଭେନ୍ସା ଛାତ୍ରଛାତ୍ରୀ ମଶାଲ ଧରି କ୍ୟାମ୍ପସରୁ ବାହାରି ରାଣୀହାଟ ଛକରୁ କଲେଜ ଛକ ପର୍ଯ୍ୟନ୍ତ ପରିକ୍ରମା କରିଥିଲେ। ତେବେ ଆନ୍ଦୋଳନ ନିଆଁରେ ଜଲୁଛି ରେଭେନ୍ସା। ରେଭେନ୍ସା ବିଶ୍ୱବିଦ୍ୟାଳୟର ନାମ ପରିବର୍ତ୍ତନ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉକ୍ତି ପରେ ରେଭେନ୍ସା ବିଶ୍ୱବିଦ୍ୟାଳୟ ପରିସରରେ ବିରୋଧ ଜାରି ରହିଛି। ବିଭିନ୍ନ ଛାତ୍ରସଙ୍ଘ ପକ୍ଷରୁ ବିରୋଧ ପ୍ରକ୍ରିୟା ଜାରି ରହିଛି। ସେହିପରି ବିଶ୍ୱବିଦ୍ୟାଳୟ ପାଠ ପଡ଼ୁଥୁବା ଛାତ୍ରଛାତ୍ରୀମାନେ ମଧ୍ୟ ଏହାକୁ ତୀବ୍ର ବିରୋଧ କରିଥିଲେ। ଓଡ଼ିଆ ସ୍ଵତନ୍ତ୍ର ପ୍ରଦେଶ ଗଠନ , ସ୍ୱାଧୀନତା ସଂଗ୍ରାମ ଓ ଓଡ଼ିଆ ଜାତି ର ଇତିହାସ ସହ ଜଡିତ ରହିଛି ଏହି ବିଶ୍ୱବିଦ୍ୟାଳୟ । ରେଭେନ୍ସାକୁ ଜଣେ ବ୍ୟକ୍ତି ହିସାବରେ ଦେଖୁଛନ୍ତି କେନ୍ଦ୍ରମନ୍ତ୍ରୀ । କିନ୍ତୁ ଏହା ଅନୁଷ୍ଠାନ। ଯାହା କେବେବି ଗ୍ରହଣୀୟ ନୁହେଁ। ଏହି ବିଶ୍ୱବିଦ୍ୟାଳୟ ଆମ ରାଜ୍ୟ ଦେଶ ପାଇଁ ଅନେକ ବ୍ୟକ୍ତିତ୍ବ ନିର୍ମାଣ କରିଛି। ତେଣୁ ଏହି କଥା କୁ ଫେରେଇ ନେବା ପାଇଁ କହିଛନ୍ତି ଆନ୍ଦୋଳନରତ ଛାତ୍ର।