ଖୋର୍ଦ୍ଧା : ଦିନ ଦ୍ବିପ୍ରହରରେ ଖୋର୍ଦ୍ଧା ମୁକୁନ୍ଦପ୍ରସାଦରେ ହତ୍ଯାକାଣ୍ଡ। ଦିନ ଦ୍ଵିପ୍ରହରରେ ଯୁବକଙ୍କୁ ଖଣ୍ଡାରେ ହାଣି ହତ୍ଯା କଲେ ଦୁର୍ବୃତ୍ତ। ପୂର୍ବ ଶତ୍ରୁତାକୁ କେନ୍ଦ୍ରକରି ଏହି ହତ୍ଯାକାଣ୍ଡ ଘଟିଥିବା ଜଣାପଡିଛି। ସଂଘବଦ୍ଧ ଭାବେ ଗୋଡାଇ ଗୋଡାଇ ଆକ୍ରମଣ କରି ହତ୍ଯା କରିଛନ୍ତି ଦୁର୍ବୃତ୍ତ। ମୃତକ ମୁକୁନ୍ଦପ୍ରସାଦର ଶେଖ୍ ସାଜିଦ ବୋଲି ଜଣାପଡ଼ିଛି। ଖୋର୍ଦ୍ଧା ହସ୍ପିଟାଲରେ ରହିଛି ଶେଖ ସାଜିଦଙ୍କ ମୃତଦେହ। ଦୁଇ ଗୋଷ୍ଠୀ ଭିତରେ ପୂର୍ବରୁ ରହିଥିଲା ତିକ୍ତତା। ଏହାକୁ ନେଇ ଆଜି ଗ୍ଯାରେଜ ଭିତରେ ପଶି ଦୁର୍ବୃତ୍ତ ମାନେ ଶେଖ୍ ସାଜିଦକୁ ହାଣିଛନ୍ତି । ଗତ କିଛି ଦିନ ତଳେ ମୁକୁନ୍ଦପ୍ରସାଦରେ ଦୁଇ ଗୋଷ୍ଠୀଙ୍କ ମଧ୍ୟରେ ଗୋଷ୍ଠୀ ସଂଙ୍ଘର୍ଷ ହୋଇଥିଲା । ଆଜିର ଏହି ହତ୍ୟାକାଣ୍ଡ ପଛରେ ପୂର୍ବର ଗୋଷ୍ଠୀ ସଂଙ୍ଘର୍ଷ କାରଣ ବୋଲି କୁହାଯାଉଛି। ଏହି ହତ୍ୟାକାଣ୍ଡ ପରେ ଖୋର୍ଦ୍ଧା ପରିସ୍ଥିତି ଅଣାୟତ ହୋଇପଡିଛି। ମୃତକଙ୍କ ପକ୍ଷ ଗୋଷ୍ଠୀ ପାଲଟା ଆକ୍ରମଣ ପାଇଁ ପ୍ରସ୍ତୁତ ହେଉଥିବା ଖବର ମିଳିଛି। ଟାୟାର ଜାଳି ଏହି ଗୋଷ୍ଠୀ ବିଭିନ୍ନ ସ୍ଥାନରେ ରାସ୍ତା ରୋକ କରିଛି। ପରିସ୍ଥିତିକୁ ନିୟନ୍ତ୍ରଣ କରିବା ପାଇ ପୋଲିସ ପକ୍ଷରୁ ୭ ପ୍ଲାଟୁନ ଫୋର୍ସ ମୁତୟନ ହୋଇଛି । ବିଭିନ୍ନ ସମ୍ବେଦନଶୀଳ ସ୍ଥାନରେ ସଶସ୍ତ୍ର ପୋଲିସ ମୁତୟନ ହୋଇଛନ୍ତି। ଗତ କିଛିଦିନ ତଳେ ଛଣଗିରିରେ ମଧ୍ଯ ହୋଇଥିଲା ଗୋଷ୍ଠୀ ବିବାଦ। ଦୁଇ ଗୋଷ୍ଠୀ ମୁହାଁମୁହିଁ ହୋଇଥିଲେ। କୁହୁଡିରେ ମଧ୍ୟ ଦୁଇ ଗୋଷ୍ଠୀ ଭିତରେ ସମାନ ବିବାଦ ଦେଖା ଦେଇଥିଲା। ଖୋର୍ଦ୍ଧା ଜିଲ୍ଲାର ବିଭିନ୍ନ ସ୍ଥାନରେ ବାରମ୍ବାର ଏଭଳି ମୁହାଁମୁହିଁ ପରିସ୍ଥିତି ଉପୁଜୁଥିଲେ ମଧ୍ୟ ପ୍ରଶାସନ ସ୍ଥାୟୀ ସମାଧାନ ପାଇଁ ଉଦ୍ଯମ କରୁନଥିବା ଅଭିଯୋଗ ହେଉଛି। । ପରିସ୍ଥିତି ଉତେଜନାପୂର୍ଣ୍ଣ ରହିଥିବା ବେଳେ ଭୁବନେଶ୍ୱର ପଟୁ ମୁକୁନ୍ଦ ପ୍ରସାଦ ଦେଇ ଖୋର୍ଦ୍ଧା ସହରକୁ ରାସ୍ତା ବନ୍ଦ ରହିଛି।
ଇସ୍ରାଏଲ ଉପରେ ୩ ଶହରୁ ଅଧିକ ରକେଟ୍ ମାଡ଼
ଲେବାନନ: ମଧ୍ଯପ୍ରାଚ୍ଯରେ କାୟା ମେଲାଉଛି ଯୁଦ୍ଧ ଘନଘଟା। ଲେବାନନ ଉପରେ ଇସ୍ରାଏଲର ଆକ୍ରମଣ । ଆଉ ଏହାର ଜବାବ ଇସ୍ରାଏଲ ଉପରେ ୩ ଶହରୁ ଅଧିକ ରକେଟ୍ ମାଡ଼ କରି ଦେଇଛି ହେଜବୁଲ୍ଲା । ହେଜବୁଲ୍ଲା ହେଉଛି ଲେବାନନର ଏକ ଆତଙ୍କବାଦୀ ସଂଗଠନ । ଇସ୍ରାଏଲର ସେନା ଶିବିରକୁ ଟାର୍ଗେଟ କରି ଏହି କ୍ଷେପଣାସ୍ତ୍ର ମାଡ଼ କରାଯାଇଛି ।
କିଛିଦିନ ତଳେ ଇରାନରେ ଆତ୍ମଗୋପନ କରିଥିବା ହମାସର ମିଲିଟାରୀ ମୁଖ୍ଯକୁ ହତ୍ଯା କରାଯାଇଥିଲା । ଏଥିରେ ଇସ୍ରାଏଲର ହାତ ଥିବା ଅଭିଯୋଗ କରି ପ୍ରତିଶୋଧ ନେବାକୁ ଖୋଲାଖୋଲି ଘୋଷଣା କରିଥିଲେ ଇରାନ ଓ ହେଜବୁଲ୍ଲା । ସେମାନେ ଆକ୍ରମଣ କରିବା ଆଗରୁ ହିଁ ଲେବାନନରେ ଥିବା ହେଜବୁଲ୍ଲା ସଂଗଠନ ଉପରେ ବୋମା ପକାଇଥିଲା ଇସ୍ରାଏଲ । ଆଉ ଏହି ଆକ୍ରମଣକୁ ନେଇ ଇସ୍ରାଏଲ କହିଛି, ନିଜ ସୁରକ୍ଷା ଦୃଷ୍ଟିରୁ ଏହି ଆକ୍ରମଣ କରାଯାଇଛି । ବାହ୍ଯ ଆକ୍ରମଣକୁ ପ୍ରତିହତ କରିବାକୁ ନିଜ ସୀମାରେ ଇସ୍ରାଏଲ ଯୁଦ୍ଧ ବିମାନ ମଧ୍ଯ ମୁତୟନ କରିଛି । ଏହାସହ ଦେଶରେ ଜରୁରୀ ପରିସ୍ଥିତି ଜାରି କରାଯାଇଛି ।
ସୂଚନାଯୋଗ୍ୟ, ଗତ ଅକ୍ଟୋବର ୭ରେ ଇସ୍ରାଏଲ ଉପରେ ଆକ୍ରମଣ କରିଥିଲା ହମାସ । ଏଥିରେ ପ୍ରାୟ ୧୨ ଶହ ଲୋକଙ୍କ ମୃତ୍ଯୁ ହୋଇଥିଲା । ଶତାଧିକ ଲୋକଙ୍କୁ ବନ୍ଧକ କରି ରଖିଛି ହମାସ । ପାଲଟା ଜବାବରେ ଇସ୍ରାଏଲ ଗାଜା ଉପରେ ସାମରିକ କାର୍ଯ୍ଯାନୁଷ୍ଠାନ ଜାରି ରଖିଛି । ପୂରା ଗାଜା ଧ୍ଵଂସସ୍ତୁପରେ ପରିଣତ ହୋଇଥିବା ବେଳେ ୪୦ ହଜାରରୁ ଅଧିକ ପାଲେଷ୍ଟାଇନବାସୀଙ୍କ ମୃତ୍ଯୁ ଘଟି ସାରିଛି । ଏମାନଙ୍କ ମଧ୍ଯରୁ ଅଧିକାଂଶ ହେଉଛନ୍ତି ଶିଶୁ ଓ ମହିଳା । ଅନ୍ତର୍ଜାତୀୟ ସମୁଦାୟ, ଜାତିସଂଘ, ବିଭିନ୍ନ ମାନବାଧିକାର ସଂଗଠନର ଉଦବେଗ ସତ୍ତ୍ଵେ ଗାଜାର ବେସାମରିକ ଲୋକଙ୍କ ମୃତ୍ଯୁ କମିନାହିଁ।
କଙ୍ଗାରୁ କୋର୍ଟରେ ମହିଳାଙ୍କୁ ଲଣ୍ଡା କଲେ, ମଟନ ଭୋଜି ଖାଇଲେ
ଲଇକେରା: ସ୍ବାମୀ ସବୁଦିନ ମାରଧର କରିବା ସହ ଦେଉଥିଲେ ଅକଥନୀୟ ଅତ୍ୟାଚାର । ନିର୍ଯାତନା ସବୁ ସୀମା ଟପି ଯାଇଥିଲା । ସ୍ବାମୀଙ୍କ ଅତ୍ୟାଚାରକୁ ବିରୋଧ କରି ଥରେ ଉଠାଇ ଦେଲେ ହାତ । ବାସ୍ ସବୁ ଭୁଲ ତାଙ୍କର ହୋଇଗଲା । ଯେଉଁ ସ୍ବାମୀ ପ୍ରତିଦିନ ତାଙ୍କୁ ମାଡ଼ ମାରୁଥିଲେ ସେ ହୋଇଗଲେ ସୁନା ପୁଅ । ସ୍ବାମୀଙ୍କୁ ହାତ ଉଠାଇ ଥିବାରୁ ଗାଁରେ ବସିଲା କଙ୍ଗାରୁ କୋର୍ଟ । ଆଉ ମହିଳାଙ୍କୁ ଲଣ୍ଡା କରିବା ସହ ଭଟନ ଭୋଜି ଖାଇଲେ ପେଟ କାଙ୍ଗାଳି ଗାଁ ଲୋକେ ।
ଏମିତି ଏକ ଅଭିଯୋଗ ଆସିଛି ଝାରସୁଗୁଡା ଜିଲ୍ଲା ଲଇକେରା ଥାନା ରାଉତବାହାଲ ଗାଁରେ । କଙ୍ଗାରୁ କୋର୍ଟରେ ମହିଳାଙ୍କୁ ଲଣ୍ଡା କରାଯାଇଛି । ଏହାସଂ ମଟନ, ଦେଶୀ କୁକୁଡ଼ା ଭୋଜି ମଧ୍ୟ ଖାଇଛନ୍ତି ଲୋକେ । ଏହାସହ ଜରିମାନା ନାଁରେ ୫ ହଜାର ଟଙ୍କା ଦାଦାବଟି ଆଦାୟ କରିଛନ୍ତି ।
ଅଭିଯୋଗ ଅନୁସାରେ ଗାଁର ମହେନ୍ଦ୍ର କିସାନ ପ୍ରତିଦିନ ପତ୍ନୀଙ୍କୁ ମାଡ ମାରିବା ସହ ଗାଳିଗୁଲଜ କରୁଥିଲେ । ଦିନେ ଅତ୍ୟାଚାର ସହି ନପାରି ମହେନ୍ଦ୍ର କିସାନଙ୍କୁ ହାତ ଉଠାଇ ଦେଇଥିଲେ ତାଙ୍କ ପତ୍ନୀ । ଏହି ଘଟଣାକୁ ନେଇ ମହେନ୍ଦ୍ର ଜାତି ସମାଜର ଦ୍ୱାରସ୍ଥ ହୋଇଥିଲେ । ଜାତି ସମାଜର ବିଶିଷ୍ଠ ନ୍ୟାୟ ଦେବା ନାଁରେ ମହିଳାଙ୍କ ମୁଣ୍ଡରେ ସବୁ ଦୋଷ ଝାଡି ଦେଲେ ।
ମାଆକୁ ନିର୍ଯାତନା ଦିଆଯାଉଥିବା ଶୁଣିବା ପରେ ମହିଳାଙ୍କ ପୁଅ ଘଟଣା ସ୍ଥଳରେ ପହଞ୍ଚି ଥାନାରେ ଅଭିଯୋଗ କରିଛନ୍ତି । ପୋଲିସ ଏକ ମାମଲା ରୁଜୁ କରି ୪ ଜଣଙ୍କୁ ଅଟକ ରଖି ତଦନ୍ତ ଚଳାଇଛି ।
ସୁନାଖଣି ଆଡ଼ସ ପଞ୍ଚାୟତବାସୀଙ୍କ ମନରେ ଭରି ଦେଇଛି ଦୁଃଖ, ରାତିରେ ଲୋକଙ୍କୁ ହେଉନି ନିଦ
ରିଆମାଳ: ଦେବଗଡ଼ ଜିଲ୍ଲା ରିଆମାଳ ବ୍ଲକ ଆଡ଼ସ ପଞ୍ଚାୟତବାସୀଙ୍କ ନିଦ ହଜି ଯାଇଛି । ଯେବେଠାରୁ ପଞ୍ଚାୟତ ଅଞ୍ଚଳରେ ସୁନା ଖଣି ଥିବା ସରକାର ଘୋଷଣା କରିଛନ୍ତି ସେବେଠାରୁ ଲୋକଙ୍କ ଆଖିକୁ ନିଦ ନାହିଁ । ଆପଣ ଭାବୁଥିବେ ନିଜ ଘରଡିହ ତଳେ ସୁନାଖଣି ଥିବା ଖୁସିରେ ଲୋକେ ଶୋଉ ନାହାନ୍ତି । ହେଲେ ଏହା ସତ ନୁହେଁ । ସୁନାଖଣି କଥା ଜଣାପଡ଼ିବା ପରେ ବିସ୍ଥାପିତ ହେବା କଥା ଚିନ୍ତା କରି ଆଖିରୁ ନିଦ ହଜି ଯାଇଛି ।
ସୂଚନାଯୋଗ୍ୟ, ଦେବଗଡ଼ର ଆଡସ ପଞ୍ଚାୟତ ଏକ ବ୍ରାଣ୍ଡ ପାଲଟି ଯାଇଛି । କେବଳ ରାଜ୍ୟ ନୁହେଁ, ଦେଶ ବିଦେଶରେ ଏବେ ଏହି ପଞ୍ଚାୟତର ନାଁ । କାରଣ ପଞ୍ଚାୟତର ମାଟି ତଳେ ରହିଛି ସୁନାଖଣି । ସରକାରଙ୍କ ଘୋଷଣା ପରେ ଗାଁରେ ହେଉ କି ଛକ ବଜାରରେ ସବୁଠି କେବଳ ସୁନାଖଣି ଚର୍ଚ୍ଚା । ହେଲେ ଏହି ଚର୍ଚ୍ଚା ପଞ୍ଚାୟତବାସୀଙ୍କୁ ଖୁସି ଦେବା ବଦଳରେ ସେମାନଙ୍କ ହୃଦୟରେ ଭରିଦେଇଛି ଦୁଃଖ । ସୁନା ଖଣିରୁ ଉତ୍ତୋଳନ କାର୍ଯ୍ୟ ଆରମ୍ଭ ହେଲେ ସେମାନଙ୍କୁ ବିସ୍ଥାପିତ ହେବା ଆଶଙ୍କା ଘାରିଛି । ଏପରିକି ରାତିରେ ନିଦ ହେଉ ନଥିବା ବୟୋଜେଷ୍ଠ ବ୍ୟକ୍ତିମାନେ କହିଛନ୍ତି ।
ବିଧାନସଭାରେ ଆଡସ ପଞ୍ଚାୟତରେ ସୁନାଖଣି ବାହାରିବା ଘଟଣା ଆଲୋଚନା ହେବା ପରେ ଆଗକୁ ଏହାର ନିଲାମୀ କରାଯିବା ନେଇ ମନ୍ତ୍ରୀଙ୍କ ଘୋଷଣା ଅଞ୍ଚଳବାସୀଙ୍କ ମନରେ ଛନକା ଭରି ଦେଇଛି । ଏବେ ପିଲାଛୁଆଙ୍କ ଭବିଷ୍ୟତକୁ ନେଇ ସନ୍ଦିହୀନ ହୋଇପଡ଼ିଛନ୍ତି ପଞ୍ଚାୟତବାସୀ ।
ସୁଭଦ୍ରା ଯୋଜନା ଧୂଆଁବାଣ, ବିଜେପି ଲୋକଙ୍କୁ ଭୂଆଁ ବୁଲାଉଛି: ବିଜେଡି
ଭୁବନେଶ୍ବର: ରାଜ୍ୟ ସରକାରଙ୍କ ସୁଭଦ୍ରା ଯୋଜନା ନେଇ ବର୍ଷିଲା ବିଜେଡି । କହିଲା ସୁଭଦ୍ରା ଯୋଜନା ପାଣିରେ ଗାର ଓ ଧୂଆଁବାଣ । ଯୋଜନକୁ ନେଇ ଲୋକଙ୍କୁ ଭୂଆଁ ବୁଲାଉଛି ବିଜେପି । ଭୋଟ ସମୟରେ ମହିଳାଙ୍କୁ ଆଶା ଦେଖାଇଥିଲେ ବର୍ଷକୁ ୫୦ ହଜାର ଟଙ୍କା ଦେବେ । ଏମିତି କି ସମସ୍ତ ମହିଳାଙ୍କୁ ଦେବାକୁ ଇସ୍ତାହାରରେ କହିଥିଲେ । ହେଲେ ଏଥିରେ ୬୦ ବର୍ଷରୁ ଅଧିକ ମହିଳାଙ୍କୁ ବଞ୍ଚିତ କରାଗଲା । ଏହାସହ ୧୫୦୦ ଟଙ୍କା ମାସିକ ଆଧାରରେ ହେଲେ ଆଶା, ଅଙ୍ଗନବାଡି ମହିଳା ପ୍ରମୁଖ ସୁଭଦ୍ରା ଯୋଜନା ପାଇବେନି। ଋଣ କରି ଯେଉଁମାନେ ଲକ୍ଷପତି ଦିଦି ହୋଇଛନ୍ତି ସେମାନେ ବି ବଞ୍ଚିତ ହେବେ ।
ବଡ଼ କଥା ହେଲା ଏବେ ସୁଭଦ୍ରା ଯୋଜନାରେ ପାଞ୍ଚ ହଜାର ଟଙ୍କା ଲେଖାଏଁ ୨ ଥର ଦେବେ । ଏଥିରେ ମହିଳାମାନେ କି ବ୍ୟବସାୟ କରିବେ ବୋଲି ବିଜେଡି ପ୍ରଶ୍ନ କରିଛି । ୭୦ ଲକ୍ଷ ମହିଳା ପୂର୍ବ ମୁଖ୍ୟମନ୍ତ୍ରୀଙ୍କ ସମୟରେ ଲକ୍ଷପତି ଦିଦି ହୋଇଥିଲେ । ପ୍ରତ୍ୟେକ ମହିଳା ସୁଭଦ୍ରା ଯୋଜନା ପାଇବେ ବୋଲି ଆଶା ରଖିଥିଲେ । କିନ୍ତୁ ଏହା ଏବେ ପାଣିର ଗାର ହୋଇଛି ।
ଅହଂକାରୀ ସରକାର
ଗତକାଲି ମୁଖ୍ୟମନ୍ତ୍ରୀ ମୋହନ ମାଝୀ ଓଡ଼ିଆଙ୍କ ଆରାଧ୍ୟ ଜଗନ୍ନାଥ ଏବଂ ବଡ଼ ଠାକୁର ବଳଭଦ୍ରଙ୍କ ସହ ନିଜକୁ ଓ ଉପମୁଖ୍ୟମନ୍ତ୍ରୀ କେଭି ସିଂଦେଓଙ୍କୁ ତୁଳନା କରିଥିଲେ । ଜଗତର ନାଥ ଜଗନ୍ନାଥଙ୍କ ସହ ନିଜକୁ ମୁଖ୍ୟମନ୍ତ୍ରୀ ତୁଳନା କରିବା ଏହା ତାଙ୍କ ଅହଂକାରକୁ ଦର୍ଶାଉଛି ବୋଲି ବିଜେଡି କହିଛି । ଏମାନଙ୍କୁ ଲୋକେ କେବେ କ୍ଷମା ଦେବେନି । ଏହା ସରକାରଙ୍କ ବିଫଳତା । ଲୋକଙ୍କୁ ଠକିଛନ୍ତି ସରକାର, ଏହା ସାଧାରଣ ଲୋକଙ୍କ ପାଖକୁ ଗଲାଣି। ଲୋକେ ଏମାନଙ୍କୁ ଉଚିତ ଜବାବ ଦେବେ ।
ବିଜେପି ଏକ ବେପାରୀ ସଂସ୍ଥା
ବିଜୁଳି ବିଲକୁ ନେଇ ବିଜେପିକୁ ବେପାରୀ ସଂସ୍ଥା କହି କଟାକ୍ଷ କରିଛି ବିଜେଡି । ଦଳ ପକ୍ଷରୁ କୁହାଯାଇଛି, ନିର୍ବାଚନୀ ଇସ୍ତାହାରରେ ୩୦୦ ୟୁନିଟ ମାଗଣା ବିଜୁଳି କଥା କହିଥିଲେ । ହେଲେ ଯାଏଁ ଗୋଟିଏ ୟୁନିଟ ମଧ୍ୟ ସାଧାରଣ ଚାଷୀ ପାଖକୁ ଗଲାନି । ଏହା ଏକ ବେପାରୀ ସଂସ୍ଥା ଭଳି ଚାଲିଛନ୍ତି । କେତେ ଲାଭ କେତେ କ୍ଷତି ହିସାବ କରୁଛନ୍ତି । ସେହିପରି ଭତ୍ତା ୩ ହଜାର ୫ ଶହ ଦେବେ କହିଥିଲେ । ଏବେ କେବଳ ୮୦ ବର୍ଷରୁ ଊର୍ଦ୍ଧ୍ବ ଲୋକଙ୍କୁ ଦେବେ ବୋଲି ନିଷ୍ପତ୍ତି ନେଇଛନ୍ତି। ଯାହାକି ସ୍ପଷ୍ଟ କରୁଛି ଲୋକଙ୍କୁ ଠକିବା ଛଡ଼ା ଏମାନଙ୍କୁ କିଛି ଜଣାନାହିଁ ବୋଲି କହିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ।
ଛାତ୍ରବୃତ୍ତି ବନ୍ଦ କରିଦେଲେ
ଛାତ୍ରବୃତ୍ତିକୁ ନେଇ ମଧ୍ୟ ଦଳ ବିଜେପି ସରକାରକୁ ଟାର୍ଗେଟ କରିଛି । ଦଳ ପକ୍ଷରୁ କୁହାଯାଇଛି, ପୂର୍ବ ସରକାର ଛାତ୍ରଛାତ୍ରୀଙ୍କ ବୃତ୍ତିର ବ୍ୟବସ୍ଥା କରିଥିଲେ । ଛାତ୍ରଙ୍କ ପାଇଁ ୯ ହଜାର ଓ ଛାତ୍ରୀଙ୍କ ପାଇଁ ୧୦ ହଜାର ଟଙ୍କାର ବ୍ୟବସ୍ଥା କରିଥିଲେ ପୂର୍ବ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ହେଲେ ଏହା ଏବେ ବନ୍ଦ ହୋଇଯାଇଛି ।
ILS ବୈଜ୍ଞାନିକ ସନ୍ଦିପ ମିଶ୍ର ଆତ୍ମହତ୍ୟା କରିନାହାନ୍ତି, ହୃଦରୋଗରେ ପରଲୋକ
ଭୁବନେଶ୍ବର: ଆଇଏଲଏସ ବୈଜ୍ଞାନିକ ସନ୍ଦିପ ମିଶ୍ରଙ୍କ ପରଲୋକ । ହୃଦରୋଗରେ ତାଙ୍କର ପରଲୋକ ଘଟିଛି । ତାଙ୍କ ମୃତ୍ୟୁ ଆତ୍ମହତ୍ୟା ବୋଲି ପୋଲିସ ପ୍ରଥମେ କହିଥିଲା । ହେଲେ ତାଙ୍କ ମୃତ୍ୟୁ ହୃଦରୋଗ କାରଣରୁ ହୋଇଥିବା ଜଣାପଡିଛି । ସ୍ତନ କର୍କଟ ରୋଗ ଚିକିତ୍ସା କ୍ଷେତ୍ରରେ ତାଙ୍କର ଥିଲା ଉଲ୍ଲେଖନୀୟ ଅବଦାନ ।
ପରିବାର ଲୋକେ ସନ୍ଦିପଙ୍କ ମୃତ୍ୟୁର କାରଣ ସ୍ପଷ୍ଟ କରିଛନ୍ତି । ପରିବାର ପକ୍ଷରୁ କୁହାଯାଇଛି ପ୍ରଥମେ ଫୁଡ୍ ପଏଜନ ଓ ପରେ ହୃଦରୋଗ ସମସ୍ୟାରୁ ଚାଲିଗଲା ଜୀବନ । ୫୬ ବର୍ଷ ବୟସରେ ଗତକାଲି କ୍ୟାପିଟାଲ ହସ୍ପିଟାଲରେ ହୃଦରୋଗରେ ତାଙ୍କର ମୃତ୍ୟୁ ଘଟିଥିବା ପରିବାର ଲୋକେ କହିଛନ୍ତି । ସନ୍ଦୀପଙ୍କ ବିୟୋଗରେ ପରିବାରରେ ଶୋକର ଛାୟା ଖେଳିଯାଇଛି ।
ଆଇଏଲଏସର ଜଣେ ସୁନାମଧନ୍ୟ ବୈଜ୍ଞାନିକ ଥିଲେ ସନ୍ଦୀପ ମିଶ୍ର । ବିଦେଶରୁ ପାଠ ପଢା ଶେଷ ପରେ ୨୦୦୬ ମସିହାରୁ ସତ୍ୟନଗରରେ ରହୁଥିଲେ । ତାଙ୍କର ପତ୍ନୀ ଓ ୧୦ ବର୍ଷର ପୁଅ ମଧ୍ୟ ରହିଛନ୍ତି । ସ୍ତନ କର୍କଟ ରୋଗ ଚିକିତ୍ସା କ୍ଷେତ୍ରରେ ତାଙ୍କର ଅବଦାନ ଥିଲା ଉଲ୍ଲେଖନୀୟ । ଖବର ପାଇବା ପରେ ସ୍ଥାନୀୟ ଲୋକେ ଘରେ ପହଞ୍ଚିଛନ୍ତି । ଖାରବେଳନଗର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି । କ୍ୟାପିଟାଲ ହସ୍ପିଟାଲରେ ମୃତଦେହ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
ବିଜେଡ଼ି ବିଧାୟକ ପ୍ରଶିକ୍ଷଣ ଶିବିରରେ ଯୋଗଦେବାକୁ ଶଂଖ ଭବନରେ ପହଞ୍ଚିଲେ ଦଳ ସଭାପତି ନବୀନ ପଟ୍ଟନାୟକ
ଭୁବନେଶ୍ବର: ବିଜେଡିର ପ୍ରଶିକ୍ଷଣ କାର୍ଯ୍ୟକ୍ରମକୁ ଉଦଘାଟନ କରିବାକୁ ଶଙ୍ଖ ଭବନରେ ପହଞ୍ଚିଲେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ । ସେ କାର୍ଯ୍ୟକ୍ରମକୁ ଉଦଘାଟନ କରିବା ସହ ଏଥିରୁ ନୂଆ କରି ଜିତିଥିବା ବିଧାୟକଙ୍କୁ ବିଧାନସଭା, ଏହାର କାର୍ଯ୍ୟ ଶୈଳୀ ସମ୍ପର୍କରେ ଜାଣିବାକୁ ପାଇବେ ବୋଲି ନବୀନ କହିଛନ୍ତି । ଏହାସହ ସେ ରାଜ୍ୟର ବିଜେପି ସରକାରଙ୍କୁ କଟୁ ସମାଲୋଚନା କରିଛନ୍ତି ।
ବିଧାନସଭା ପକ୍ଷରୁ ଆୟୋଜିତ ଏହି ପ୍ରଶିକ୍ଷଣ କାର୍ଯ୍ୟକ୍ରମର ରାଜନୈତିକ ଉଦ୍ଦେଶ୍ୟ ଥିଲା ଏବଂ ଏହା ନିଜ ରାଜ୍ୟରେ ମୁଖ୍ୟମନ୍ତ୍ରୀଙ୍କୁ ଯଥେଷ୍ଟ ସମ୍ମାନ ଦେଇ ନଥିଲା। ତେଣୁ ବିଧାନସଭା ପକ୍ଷରୁ ଆୟୋଜିତ ପ୍ରଶିକ୍ଷଣ କାର୍ଯ୍ୟକ୍ରମରୁ ବିଜେଡି ଓହରିଯାଇଥିଲା ବୋଲି ସେ କହିଛନ୍ତି ।
ସୂଚନାଯୋଗ୍ୟ, ନିବନିର୍ବାଚିତ ବିଧାୟକମାନଙ୍କୁ ବିଧାନସଭାରେ କାର୍ଯ୍ୟ ପ୍ରଣାଳୀ ଓ କାର୍ଯ୍ୟ ପରିଚାଳନାର ନିୟମ ସମ୍ପର୍କରେ ଅବଗତ କରାଇବା ପାଇଁ ଓରିଏଣ୍ଟେସନ୍ କାର୍ଯ୍ୟକ୍ରମ ଆୟୋଜନ କରାଯାଏ । କେବଳ ଗୃହର ସୁରୁଖୁରୁରେ ପରିଚାଳନା ପାଇଁ ନୁହେଁ ବରଂ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ସରକାରଙ୍କୁ ଉତ୍ତରଦାୟୀ କରିବା ପାଇଁ ଏହି ନିୟମ ପ୍ରଣୟନ କରାଯାଇଛି । ତେଣୁ ଜଣେ ବିଧାୟକ ଭାବରେ ନିଜର କର୍ତ୍ତବ୍ୟକୁ ଠିକ୍ ଭାବରେ ନିର୍ବାହ କରିବା ପାଇଁ ଆପଣଙ୍କୁ ନିୟମ- ଉପଦେଶ, ପରମ୍ପରା, ପରମ୍ପରା ସହିତ ଭଲ ଭାବରେ ଅନୁସରଣ କରିବାକୁ ପଡିବ ।
ସମ୍ବିଧାନ ସଭାରେ ଭାରତ କାହିଁକି ସଂସଦୀୟ ଶାସନକୁ ପସନ୍ଦ କରେ ତାହାର କାରଣ ବର୍ଣ୍ଣନା କରି ଡ. ବିଆର ଆମ୍ବେଦକର କହିଥିଲେ ଯେ ସଂସଦୀୟ ଗଣତନ୍ତ୍ରରେ ସରକାର ବିଧାନସଭା ପାଇଁ ଗ୍ରହଣୀୟ ହୋଇଥିବା ବେଳେ ରାଷ୍ଟ୍ରପତି ଶାସନ ବ୍ୟବସ୍ଥା ବିଧାନସଭାରେ ଉତ୍ତରଦାୟୀ ନକରି କାର୍ଯ୍ୟନିର୍ବାହୀର ସ୍ଥିରତା ଉପରେ ଆଧାରିତ ।
ବିଧାନସଭା ପ୍ରତି ସରକାରଙ୍କ ଉତ୍ତରଦାୟିତ୍ୱ ପ୍ରଶ୍ନ ପଚାରିବା, ମୁଲତବୀ ଓ ଅନାସ୍ଥା ପ୍ରସ୍ତାବ, ଦୃଷ୍ଟି ଆକର୍ଷଣ ନୋଟିସ୍, ସ୍ବତନ୍ତ୍ର ଇତ୍ୟାଦି ଅନେକ ପ୍ରସ୍ତାବ ଆଗତ କରି ପ୍ରୟୋଗ କରାଯାଏ। ଏଗୁଡ଼ିକ ଅନ୍ୟ।ନ୍ୟ ଆଇନଗତ ଉପକରଣର ଏକ ଅଂଶ ଯାହାକୁ ଆପଣ ସମସ୍ତେ ସରକାରଙ୍କୁ ଉତ୍ତରଦାୟୀ କରିବା ପାଇଁ ପ୍ରଭାବଶାଳୀ ଭାବରେ ବ୍ୟବହାର କରିବା ଉଚିତ୍ | ଏହାବ୍ୟତୀତ ଜନସାଧାରଣଙ୍କ ବିଭିନ୍ନ ସମସ୍ୟା ଉଠାଇବାରେ ଶୂନ୍ୟକାଳର ସମ୍ପୂର୍ଣ୍ଣ ଉପଯୋଗ କରିବା ଉଚିତ୍ ।
ମିନି ଆସେମ୍ବଲି କୁହାଯାଉଥିବା ଆମ ବିଧାନସଭାର ଅନେକ କମିଟି ମଧ୍ୟରେ କିପରି କାର୍ଯ୍ୟ କରିବାକୁ ହେବ ତାହା ମଧ୍ୟ ଆମକୁ ବୁଝିବାକୁ ପଡିବ । ସେଠାରେ ମଧ୍ୟ ସେହି କମିଟିଗୁଡ଼ିକୁ ପଠାଯାଉଥିବା ଅନେକ ବିଲ୍ ର ଯାଞ୍ଚକୁ ସୁଦୃଢ଼ କରିବାରେ ଆମକୁ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାକୁ ପଡ଼ିବ।
୫୧ ବିଧାୟକ ଥିବା ବିଜେଡି ଏକ ଶକ୍ତିଶାଳୀ ବିରୋଧୀ ଦଳ ଗଠନ କରିଛି। ତେଣୁ ସରକାରଙ୍କୁ ଉତ୍ତରଦାୟୀ କରିବା ପାଇଁ ସେହି ଉପକରଣଗୁଡ଼ିକୁ ବ୍ୟବହାର କରିବା ପାଇଁ ଆମେ କୌଣସି କସରତ ଛାଡିବା ଉଚିତ ନୁହେଁ ।
ଗଣତନ୍ତ୍ରରେ ସରକାର ହେଉଛି ‘ଆମେ ଜନତା’ର ଏବଂ ବିରୋଧୀମାନେ ମଧ୍ୟ ‘ଆମେ ଜନତା’କୁ ଜନାଦେଶ ଦେଉଛନ୍ତି। ତେଣୁ ବିରୋଧୀ ଦଳ ମଧ୍ୟ ସରକାରଙ୍କ ଭଳି ଗୁରୁତ୍ୱପୂର୍ଣ୍ଣ। ସରକାରଙ୍କୁ ଉତ୍ତରଦାୟୀ କରିବା ପାଇଁ ବିରୋଧୀଙ୍କୁ ଅଧିକ ପ୍ରଭାବଶାଳୀ କରିବା ପାଇଁ ଆମକୁ ସର୍ବଦା ସତର୍କ ଓ ସକ୍ରିୟ ରହିବାକୁ ପଡ଼ିବ।
ବାସ୍ତବରେ ଏକ ଜୀବନ୍ତ ବିରୋଧୀ ହିଁ ଗଣତନ୍ତ୍ରର ସର୍ବୋତ୍ତମ ରକ୍ଷକ। ଆପଣମାନଙ୍କ ମଧ୍ୟରୁ ଅନେକ ଅନେକ ଥର ବିଧାୟକ ଅଛନ୍ତି ଏବଂ କେତେକଙ୍କୁ ମନ୍ତ୍ରୀ ଭାବରେ କାର୍ଯ୍ୟ କରିବାର ସୁଯୋଗ ମଧ୍ୟ ମିଳିଛି । ବିଧାନସଭାରେ ବିଧାୟକ ଭାବରେ କାର୍ଯ୍ୟ କରିବାର ଅଭିଜ୍ଞତା ଆପଣଙ୍କ ପାଖରେ ଅଛି । ସେହି ଅଭିଜ୍ଞତା ଆପଣଙ୍କୁ ସରକାରଙ୍କୁ ଉତ୍ତରଦାୟୀ କରିବାରେ ବହୁତ ସାହାଯ୍ୟ କରିବ । ଆପଣ ନୂଆ ଆସୁଥିବା ଲୋକଙ୍କୁ ମଧ୍ୟ ମାର୍ଗଦର୍ଶନ କରିବା ଉଚିତ୍ ।
ଓଡିଶା ବାସୀ ଆମକୁ ବିଧାନସଭାକୁ ପଠାଇଛନ୍ତି. ତେଣୁ ଓଡିଶା ଏବଂ ଓଡିଶା ବାସୀଙ୍କ ସ୍ୱାର୍ଥ ର ସୁରକ୍ଷା ପାଇଁ ଆମେ ଲଢେଇ ଜାରି ରଖିବା. ଜନସାଧାରଣଙ୍କ ସମସ୍ୟାକୁ ଲୋକଲୋଚନକୁ ଆଣିବାରେ କୌଣସି ଆପୋଷ ବୁଝାମଣା ହେବା ଉଚିତ ନୁହେଁ। ମୁଁ ଆଶା କରୁଛି ଓରିଏଣ୍ଟେସନ୍ ପ୍ରୋଗ୍ରାମ ଅତ୍ୟନ୍ତ ଫଳପ୍ରଦ ଏବଂ ଉପଯୋଗୀ ହେବ
ଶଙ୍ଖ ଭବନରେ ନବୀନ, ବିଧାୟକଙ୍କ ପ୍ରଶିକ୍ଷଣ କାର୍ଯ୍ୟକ୍ରମକୁ କରିବେ ଉଦଘାଟନ
ଭୁବନେଶ୍ବର: ଶଙ୍ଖ ଭବନରେ ପହଞ୍ଚିଲେ ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ । ଆଉ କିଛି ସମୟ ପରେ ବିଜେଡି ନବ ନିର୍ବାଚିତ ବିଧାୟକଙ୍କ ପ୍ରଶିକ୍ଷଣ କାର୍ଯ୍ୟକ୍ରମକୁ କରିବେ ଉଦଘାଟନ । ବିଧାନସଭାର କାର୍ଯ୍ୟଶୈଳୀ ବାବଦରେ ଜ୍ଞାନ ଦେବେ ଦଳର ପୁରୁଖା ବିଧାୟକ ଓ ପୂର୍ବତନ ବିଧାୟକ ।
ନୂଆ ବିଧାୟକଙ୍କୁ ଗୃହର ଗରିମା, ଗୃହରେ ଆଲୋଚନା ଶୈଳୀ, କାର୍ଯ୍ୟପନ୍ଥା ବାବଦରେ ପ୍ରଶିକ୍ଷଣ ଦିଆଯିବ । ଗଠନମୂଳକ ବିରୋଧି ଦଳ ଭାବେ ସରକାରଙ୍କୁ ଶାଣିତ ସମାଲୋଚନାର କଳା କୌଶଳ ଶିଖାଯିବ । ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ ବିଧାୟକଙ୍କୁ ପ୍ରଶିକ୍ଷଣ ପ୍ରଦାନ କରିବେ । ମ୍ଯାଟର ଅଫ ପବ୍ଲିକ ଇମ୍ପୋରଟାନ୍ସ ଉପରେ ପ୍ରଶିକ୍ଷଣ ଦେବେ ବିଜେଡି ସଭାପତି ନବୀନ ପଟ୍ଟନାୟକଙ୍କ ରାଜନୈତିକ ସଚିବ ସଂତୃପ୍ତ ମିଶ୍ର । ହାଉସ କମିଟି, ଷ୍ଟାଣ୍ଡିଂ କମିଟି, ସୋସିଆଲ ମିଡିଆ ସମ୍ପର୍କରେ ବି ତାଲିମ ପ୍ରଦାନ କରାଯିବ ।
ILS ବୈଜ୍ଞାନିକ ସନ୍ଦିପ ମିଶ୍ରଙ୍କ ଆତ୍ମହତ୍ୟା
ଭୁବନେଶ୍ବର: ଆଇଏଲଏସ ବୈଜ୍ଞାନିକ ସନ୍ଦୀପ ମିଶ୍ରଙ୍କ ଆତ୍ମହତ୍ୟା । ଭୁବନେଶ୍ୱର ଘରୁ ଉଦ୍ଧାର ହେଲା ମୃତଦେହ । ସ୍ତନ କର୍କଟ ରୋଗ ଚିକିତ୍ସା କ୍ଷେତ୍ରରେ ତାଙ୍କର ଥିଲା ଉଲ୍ଲେଖନୀୟ ଅବଦାନ।
ଆଜି ସକାଳୁ ସନ୍ଦିପଙ୍କୁ ନିଜ ଘରୁ ଉଦ୍ଧାର କରାଯାଇଥିଲା । ଏହାପରେ ତାଙ୍କୁ ତୁରନ୍ତ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ବର୍ତ୍ତମାନ ସନ୍ଦିମଙ୍କ ମୃତଦେହ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପାଇଁ ରଖାଯାଇଛି ।
ପୁଅ ଓ ଝିଅକୁ ଚାକିରି କରାଇ ଦେବାକୁ କହି ମହିଳାଙ୍କ ପାଖରୁ ଲକ୍ଷାଧିକ ଟଙ୍କା ଠକିଥିବା ଅଭିଯୁକ୍ତ କୋର୍ଟ ଚାଲାଣ
ଟିଟିଲାଗଡ଼: ଚାକିରି କରାଇଦେବା ନାଁରେ ଲକ୍ଷାଧିକ ଟଙ୍କା ଠକେଇ । ଠକକୁ ଗିରଫ କରି କୋର୍ଟ ଚାଲାଣ କଲା ଟିଟିଲାଗଡ ପୋଲିସ । ଘଟଣାଟି ଘଟିଛି ଟିଟିଲାଗଡ ବ୍ଲକ ପଡାରେ ।
ଅଭିଯୋଗ ଅନୁସାରେ ଟିଟିଲାଗଡ ବ୍ଲକ ପଡାର ଗୀତାଞ୍ଜଳି ମୁଣ୍ଡାଙ୍କ ଠାରୁ ସୁରଜ ପାଣ୍ଡେ ପୁଅ ଓ ଝିଅକୁ ଚାକିରି କରେଇ ଦେବା ନାଁରେ ୨୪ ଲକ୍ଷ ଟଙ୍କା ନେଇଥିଲା । ଏହାସହ ମୋବାଇଲ ଓ ଏକ ସ୍କୁଟି ମଧ୍ୟ ନେଇଥିଲା । ଝିଅକୁ ANM ନର୍ସିଂ ଓ ପୁଅକୁ ରେଲଓ୍ବେ ଲୋକ ପାଇଲଟରେ ଚାକିରି କରେଇ ଦେବାକୁ କହିଥିଲା । ତେବେ ଗୀତାଞ୍ଜଳିଙ୍କର ସୁରଜ ଉପରେ ସନ୍ଦେହ ହୋଇଥିଲା । ଏନେଇ ସେ ଟିଟିଲାଗଡ଼ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଆଧାର କରି ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ତଦନ୍ତ ବେଳେ ଠକେଇ ପ୍ରମାଣ ମିଳିବା ପରେ ପୋଲିସ ସୁରଜଙ୍କୁ ଗିରଫ କରି କୋର୍ଟ ଚାଲାଣ କରିଛି ।