ବାଲେଶ୍ବର: ଲଗାଣ ବର୍ଷାରେ ବେହାଲ ବାଲେଶ୍ବର। ବିପଦ ସଙ୍କେତ ଉପରେ ପ୍ରଭାବିତ ହେଉଛି ସୁବର୍ଣ୍ଣରେଖା। ରାଜଘାଟ ଠାରେ ବିପଦ ସଙ୍କେତ ୧୦.୩୬ ମିଟର ଥିବା ବେଳେ ଗୁରୁବାର ସକାଳ ୬ ଟା ସୁଦ୍ଧା ୧୦.୮୦ ମିଟରରେ ପାଣି ପ୍ରବାହିତ ହେଉଛି। ସୁବର୍ଣ୍ଣରେଖାରେ ପାଣି କମୁଥିଲେ ସୁଦ୍ଧା ଭୋଇରାଇର ୫୦ ଟି ଗାଁ ଓ ବାଲିଆପାଳ ବ୍ଲକର ୨୫ଟି ଗାଁ ଏବେ ପାଣି ଘେରରେ ରହିଛି। ରାସ୍ତା ଉପରେ ଆଣ୍ଠୁଏ ଆଣ୍ଠୁଏ ପାଣି ଲହଡି ମାରିବା ସହ ବନ୍ଦୀ ଜୀବନ ବିତାଉଛନ୍ତି ଲୋକେ। ଏବଂ ତାହ ସହିତ ଭୋଗରାଇ, ବାଲିଆପାଳ, ଜଳେଶ୍ଵର, ବସ୍ତା, ଅଞ୍ଚଳରେ ଶହ ଶହ ହେକ୍ଟର ଚାଷ ଜମିରେ ବନ୍ୟାଜଳ ପଶି ନଦୀର ଭ୍ରମ ସୃଷ୍ଟି କରୁଛି।
ଯୁବତୀଙ୍କୁ ଗଣଦୁଷ୍କର୍ମ ଅଭିଯୋଗ, ୩ ଦୁଷ୍କର୍ମକାରୀଙ୍କ ମଧ୍ୟରେ ଜଣେ ନାବାଳକ
ସୁନ୍ଦରଗଡ: ସୁନ୍ଦରଗଡ ଜିଲ୍ଲା କୁତ୍ରା ଅଞ୍ଚଳରେ ଚାଞ୍ଚଲ୍ୟ। ଯୁବତୀଙ୍କୁ ଗଣଦୁଷ୍କର୍ମ ଅଭିଯୋଗ। କୁତ୍ରା ଥାନାରେ ଗଣଦୁଷ୍କର୍ମ ନେଇ ଅଭିଯୋଗ କଲେ
ନିଜେ ପୀଡ଼ିତା । ପୀଡିତାଙ୍କ ଅଭିଯୋଗ ପରେ ମାମଲା ରୁଜୁ । ଗତ ୧୬ ତାରିଖରେ ଘଟିଥିଲା ଘଟଣା।
ପୀଡିତା ମଙ୍ଗଳବାର କୁତ୍ରା ଥାନାରେ ଏ ନେଇ ଏତଲା ଦେବା ପରେ କୁତ୍ରା ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଛି। ଯୁବତୀଙ୍କୁ ୩ ଜଣ ଦୁଷ୍କର୍ମ କରିଥିବା ବେଳେ ତାଙ୍କ ମଧ୍ୟରେ ଜଣେ ନାବାଳକ ଥିବା ନେଇ ସୂଚନା ରହିଛି।
ବିହାର ନାୱାଡ ଜିଲ୍ଲାରେ ଅଘଟଣ, ଦଳିତ ବସ୍ତିରେ ୮୦ ଘର ଜାଳିଦେଲେ ବାହୁବଳୀ
ନନ୍ଦିଘୋଷ ବ୍ୟୁରୋ: ବିହାର ନାୱାଡ ଜିଲ୍ଲାରେ ଅଘଟଣ। ଦଳିତ ବସ୍ତିରେ ଗୁଣ୍ଡାଗର୍ଦ୍ଦି କରି ବ୍ୟାପକ ହିଂସାକାଣ୍ଡ ଘଟାଇଛନ୍ତି ବାହୁବଳୀ । ବସ୍ତିରେ ୫୦ ରାଉଣ୍ଡ ଗୁଳିମାଡ କରିବା ସହ ଜାଳିଦେଇଛନ୍ତି ୮୦ ଘର। ନାୱାଡ ଜିଲ୍ଲାର କୃଷ୍ଣ ନଗର ଗାଁର ଘଟଣା। ଏହି ଘଟଣାରେ ଏକ ବଡ ଖବର ସାମ୍ନାକୁ ଆସିଛି । ପୋଲିସ ସୂଚନା ଅନୁଯାୟୀ, ଏହି ହିଂସାକାଣ୍ଡ ଜମି ବିବାଦକୁ ନେଇ ହୋଇଛି । ଏହି ଜମି ବିହାର ସରକାରଙ୍କ ହୋଇଥିବା ବେଳେ ଗୋଟେ ପକ୍ଷ ଲୋକ ଏବାକୁ ନିଜ ଜମି ବୋଲି ଦାବି କରୁଥିବା ବେଳେ ଅନ୍ୟପକ୍ଷ ଲୋକ ମଧ୍ୟ ଏହି ଜମିକୁ ନିଜର ବୋଲି ଦାବି କରିଛନ୍ତି। ଏହାକୁ ନେଇ ବସ୍ତିରେ ହିଂସାକାଣ୍ଡ ଘଟାଇଛନ୍ତି ବାହୁବଳୀ । ଏହି ଘଟଣାକୁ ନେଇ ପୋଲିସ ତଦନ୍ତ ଜାରି ରଖିଛି ।
ଗାଁ ଲୋକ କହିଛନ୍ତି ଯେ, ବୁଧବାର ଦିନ ୧୦୦ ବାହୁବଳୀ ଦଳିତ ବସ୍ତିରେ ଆସି ପହଞ୍ଚିଥିଲେ । ବସ୍ତିରେ ୫୦ ରାଉଣ୍ଡ ଗୁଳିମାଡ କରିବା ସହ ଘର ଗୁଡିକରେ ନିଆଁ ଲଗାଇ ଦେଇଥିଲେ । ଖବର ପାଇ ସ୍ଥାନୀୟ ଅଧିକାରୀ, ଡିଏମ୍ ଓ ପୋଲିସ ଅଧିକାରୀ ଘଟଣା ସ୍ଥଳରେ ପହଞ୍ଚିଥିଲେ । ଏହି ଘଟଣାରେ ପୋଲିସ ୧୦ ଜଣଙ୍କୁ ଗିରଫ କରିଛି ।
ଖରସ୍ରୋତା ନଦୀକୁ ଡେଇଁଲେ ଯୁବତୀ, ବ୍ରିଜ ଉପରେ ରହିଛି ସ୍କୁଟି, ଜୋତା, ମୋବାଇଲ୍ ଫୋନ୍
ଯାଜପୁର: ଯାଜପୁର ଖରସ୍ରୋତା ନଦୀକୁ ଡେଇଁଲେ ଯୁବତୀ। ଖରସ୍ରୋତା ବ୍ରିଜ ଉପରୁ ନଦୀକୁ ଡେଇଁ ମହିଳା ନିଖୋଜ ଥିବା ସୂଚନା ମିଳିଛି। ବ୍ରିଜ ଉପରେ ନିଜର ସ୍କୁଟି ଜୋତା ,ମୋବାଇଲ୍ ଫୋନ୍ ଥୋଇ ଭରା ନଦୀକୁ ଡେଇଁ ପଡ଼ିଥିଲେ ଯୁବତୀ। ତେବେ ମହିଳାଙ୍କ ସ୍କୁଟିରେ କେତେକ ଡକ୍ୟୁମେଣ୍ଟ ଓ କାଗଜ ପତ୍ର ଥିବା ଦେଖିବାକୁ ମିଳିଛି। ଘଟଣାସ୍ଥଳରେ ସଦର ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ଗାଡ଼ି ମୋବାଇଲ୍ ଫୋନ୍ ଜୋତାକୁ ପୋଲିସ ଜବତ କରିଛି ।
ନିଖୋଜ ମହିଳା ମନ୍ଦାକିନୀ ସାମଲ ବୋଲି ଜଣାପଡ଼ିଥିବା ବେଳେ ଘର କେଉଁଠି ଜଣା ପଡ଼ିନାହିଁ। ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି।
ପୂର୍ବଶତ୍ରୁତାରୁ ରାଜଧାନୀରେ ବୋମାମାଡ଼, ଜଣେ ନାବାଳକ ଆହତ
ଭୁବନେଶ୍ୱର: ରାଜଧାନୀରେ ବୋମାମାଡ଼। ବାପୁଜୀନଗର କେଦାରପଲ୍ଲୀ ବସ୍ତିର ଦୁଇଟି ସ୍ଥାନରେ ହୋଇଛି ବୋମାମାଡ଼। ପୂର୍ବଶତ୍ରୁତାରୁ ବୋମାମାଡ଼ ହୋଇଥିବା ସୂଚନା। ଘଟଣାସ୍ଥଳରେ କ୍ୟାପିଟାଲ ଥାନା ପୋଲିସ ପହଞ୍ଚି ଛାନବିନ ଆରମ୍ଭ କରିଛି। କେଦାରପଲ୍ଲୀ ବସ୍ତିର ଲେନ୍ ୧ ଓ ଶିଶୁଭବନ ନିକଟସ୍ଥ ବରହମପୁର ଗଳି ବସ୍ତିରେ ବୋମାମାଡ ହୋଇଛି । ବୋମାମାଡ଼ରେ ଥରି ଉଠିଛି ବାପୁଜୀନଗର। ସିସିଟିଭି ଆଧାରରେ ଦୃର୍ବୁତ୍ତଙ୍କୁ ଖୋଜା ଜାରି ରଖିଛି ପୋଲିସ।
ବୋମାମାଡରେ ଜଣେ ନାବାଳକ ଆହତ ହୋଇଥିବା ବେଳେ କ୍ୟାପିଟାଲ ହସ୍ପିଟାଲରେ ଚିକିତ୍ସା ଜାରି ରହିଛି। ପ୍ରାଥମିକ ସ୍ତରରେ ପତିଆରା ପାଇଁ ଏହି କାଣ୍ଡ ଘଟା ଯାଇଥିବା ସୂଚନା ମିଳିଛି। ସେପଟେ ଘଟଣା ପରେ କ୍ୟାପିଟାଲ ଥାନା ପୋଲିସର ଏକ ସ୍ବତନ୍ତ୍ର ଟିମ୍ ସିସିଟିଭି ଆଧାରରେ ଦୃର୍ବୁତ୍ତଙ୍କୁ ଧରିବା ପାଇଁ ଚାରିଆଡ଼େ ମାରାଥନ୍ ରେଡ ଜାରି ରଖିଛି।
ମୂର୍ତ୍ତି ଭସାଣ ବେଳେ ଦୁଇ ଗୋଷ୍ଠୀ ମୁଁହାମୁହିଁ, ଛୁରା ମାଡ଼ରେ ୩ ଆହତ
ମୟୂରଭଞ୍ଜ: ମୂର୍ତ୍ତି ଭସାଣ ବେଳେ ଦୁଇ ଗୋଷ୍ଠୀ ମୁଁହାମୁହିଁ। ଛୁରା ମାଡ଼ରେ ଉଭୟ ପକ୍ଷର ୩ ଜଣ ଆହତ। ବାରିପଦାରେ ଗଣେଶ ପୂଜା ଭସାଣବେଳେ ଦୁଇ ଗୋଷ୍ଠୀ ମୁଁହାମୁଁହି ହୋଇଥିଲେ। ଆହତ ଦୁଇ ଜଣ ହେଲେ ପିଆରଏମ ହସ୍ପିଟାଲର ସିକ୍ୟୁରୀଟି ଗାର୍ଡ ଚୈତନ୍ୟ ମୁଖୀ ଓ ଅଜୁ ମୁଖୀ। ବୁଧବାର ରାତି ପ୍ରାୟ ୧୦ସମୟରେ ଶୁନଗଡ଼ିଆ ଅଞ୍ଚଳରେ ଗଣେଶ ପୂଜା ମୂର୍ତ୍ତି ଭସାଣି ବେଳେ ରାସ୍ତା ଜାମ ହେବାକୁ ନେଇ ଦୁଇ ଗୋଷ୍ଠୀ ମଧ୍ୟରେ ମୁଁହାମୁହିଁ ହୋଇଥିଲେ। ଯାହାକୁ ନେଇ ଶୁନଗଡ଼ିଆ ଅଞ୍ଚଳର ଆକାଶ ମୁଖୀ ଓ କୁନ୍ଦନ ମୁଖୀ ତାଙ୍କ ସାଙ୍ଗମାନଙ୍କ ସହିତ ଦୁଇ ଜଣଙ୍କୁ ଛୁରା ମାଡ଼ କରିଥିଲେ। ଏହାକୁ ନେଇ ଅନ୍ୟ ଗୋଷ୍ଠୀ ମଧ୍ୟ ପ୍ରତି ଆକ୍ରମଣ କରିଥିଲେ। ଯାହା ଫଳରେ ସମୁଦାୟ ୩ଜଣ ଆହତ ହୋଇଛନ୍ତି। ଏନେଇ ବାରିପଦା ଟାଉନ ଥାନାରେ ଅଭିଯୋଗ ପରେ ଆହତଙ୍କୁ ଚିକିତ୍ସା ଲାଗି ପିଆରଏମ ହସ୍ପିଟାଲରେ ଭର୍ତ୍ତି କରାଯାଇଛି ।
ଟ୍ରକକୁ ଧକ୍କା ଦେଲା ପିକଅପ୍ ଭ୍ଯାନ, ୨ ମୃତ
ଗଞ୍ଜାମ: ଗଞ୍ଜାମ ପିତଳ ଅଞ୍ଚଳରେ ଦୁର୍ଘଟଣା। ଟ୍ରକକୁ ଧକ୍କା ଦେଲା ପିକଅପ୍ ଭ୍ଯାନ। ଏଥିରେ ୨ ଜଣଙ୍କ ମୃତ୍ଯୁ ହୋଇଥିବା ଜଣାପଡିଛି। ଏକ ପନିପରିବା ବୋଝେଇ ପିକଅପ୍ ଭ୍ଯାନ ବ୍ରହ୍ମପୁର ଯାଉଥିବାବେଳେ ଟ୍ରକକୁ ପଛପଟୁ ଧକ୍କା ଦେଇଥିଲା। ଭ୍ଯାନରେ ବସିଥିବା ୨ ଜଣଙ୍କ ମୃତ୍ଯୁ ହୋଇଥିବା ଜଣାପଡିଛି। ଗତ ମଧ୍ୟ ରାତ୍ରିରେ ହିଞ୍ଜିଳି ଥାନା ପିତଳ ଛକ ନିକଟରେ ଘଟିଛି ଏ ଦୁର୍ଘଟଣା।
ଆଜି ମହାକାଶରେ ଜନ୍ମଦିନ ପାଳିବେ ସୁନୀତା ଓ୍ବିଲିୟମ୍ସ
ନନ୍ଦିଘୋଷ ବ୍ୟୁରୋ: ଆଜି ମହାକାଶରେ ଜନ୍ମଦିନ ପାଳିବେ ସୁନୀତା ଓ୍ବିଲିୟମ୍ସ। ଆଜି ତାଙ୍କର ଜନ୍ମଦିନ ହୋଇଥିବାବେଳେ ସେ ଏବେ ଇଣ୍ଟରନ୍ୟାସନାଲ ସ୍ପେସ୍ ଷ୍ଟେସନରେ ରହିଛନ୍ତି । ମହାକାଶରେ ଏହା ହେବ ତାଙ୍କର ଦ୍ଵିତୀୟ ଜନ୍ମଦିନ । ବେରି ଓ୍ବିଲମୋରଙ୍କ ସହ ଆଇଏସଏସକୁ ଯାତ୍ରା କରିଥିବା ସୁନୀତା ବୋଇଂ ଷ୍ଟାରଲାଇନର ସ୍ପେସକ୍ରାଫ୍ଟରେ ଯାନ୍ତ୍ରିକ ତ୍ରୁଟି ଯୋଗୁଁ ଫସି ରହିଛନ୍ତି । ବର୍ତ୍ତମାନ ସୁଦ୍ଧା ସୁନୀତା ମହାକାଶରେ ମୋଟ ୩ ଶହରୁ ଅଧିକ ଦିନ ବିତାଇ ସାରିଲେଣି। ଆସନ୍ତା ଫେବୃଆରୀ ମାସରେ କ୍ରୁ-9 ମିଶନ ଜରିଆରେ ସେମାନଙ୍କୁ ସ୍ପେସ ଏକ୍ସର ସ୍ସେସ ସିପ ସାହାଯ୍ୟରେ ପୃଥିବୀକୁ ଅଣାଯିବା ନେଇ ଘୋଷଣା କରିଛି ନାସା । ଏଥିପାଇଁ ନାସାର ଦୁଇ ମହାକାଶଚାରୀ ପ୍ରସ୍ତୁତି ଆରମ୍ଭ କରିଛନ୍ତି।
ସୂଚନା ମୁତାବକ, ସେପ୍ଟେମ୍ବର ୨୬ରେ ସ୍ପେସ-ଏକ୍ସ ସହାୟତାରେ କ୍ରୁ -9 ମିଶନ ଆରମ୍ଭ ହେବ । ନାସାର ଦୁଇ ଜଣ ମହାକାଶଚାରୀଙ୍କୁ ଫାଲକନ-9 ରକେଟ ସାହାଯ୍ୟରେ ଅନ୍ତରୀକ୍ଷ ମହାକାଶ ଷ୍ଟେସନକୁ ପଠାଯିବ । ଉଡ଼ାଣର ପ୍ରାୟ ୬ ଘଣ୍ଟା ପରେ ଉଭୟ ମହାକାଶଚାରୀ ଅନ୍ତର୍ଜାତୀୟ ସ୍ପେସ ଷ୍ଟେସନରେ ପହଞ୍ଚିବେ। ଆସନ୍ତା ଫେବୃଆରୀ ମାସରେ କ୍ରୁ-9 ମିଶନ ଅଧୀନରେ ଡ୍ରାଗନ ଅନ୍ତରୀକ୍ଷ ଯାନ ଜରିଆରେ ମହାକାଶଚାରୀ ପୃଥିବୀକୁ ଫେରିବେ ବୋଲି ଯୋଜନା ରହିଛି।
ଆଜିଠୁ ଭାରତ-ବାଂଲାଦେଶ ଟେଷ୍ଟ ସିରିଜ
ନୂଆଦିଲ୍ଲୀ: ଆଜିଠୁ ଭାରତ-ବାଂଲାଦେଶ ଟେଷ୍ଟ ସିରିଜ। ବାଂଲାଦେଶ ସହିତ ଦୁଇଟି ଟେଷ୍ଟ ଓ ୩ଟି ଟି-ଟ୍ବେଣ୍ଟି ସିରିଜ ଖେଳିବ ଟିମ୍ ଇଣ୍ଡିଆ। ଆଜି ସକାଳ ସାଢେ ୯ଟାରୁ ଚେନ୍ନାଇର ଏମଏ ଚିଦାମ୍ବରମ ଷ୍ଟାଡିୟମରେ ପ୍ରଥମ ଟେଷ୍ଟ ଆରମ୍ଭ ହେବ। ଦୀର୍ଘ ୭ ମାସ ପରେ ପୁଣି ଟେଷ୍ଟ ସିରିଜ୍ ଖେଳିବ ଟିମ୍ ଇଣ୍ଡିଆ। କ୍ଯାପଟେନ ରୋହିତ ଶର୍ମାଙ୍କ ଅଧିନାୟକତ୍ବରେ ଭାରତ ପଡ଼ିଆକୁ ଓହ୍ଲାଇବ ଭାରତ। ଟିମରେ ଯଶସ୍ୱୀ ଜୈସୱାଲ, ଶୁଭମନ ଗିଲ, ବିରାଟ କୋହଲି, କେ.ଏଲ୍ ରାହୁଲ, ଋଷଭ ପନ୍ତ ରବୀନ୍ଦ୍ର ଜାଡେଜା, ରବିଚନ୍ଦ୍ରନ୍ ଅଶ୍ୱିନ୍, କୁଲଦୀପ ଯାଦବ, ମହମ୍ମଦ ସିରାଜ ଓ ଜସପ୍ରୀତ ବୁମ୍ରା ସ୍ଥାନ ପାଇଛନ୍ତି । ବିଶ୍ୱ ଟେଷ୍ଟ ଚାମ୍ପିଅନସିପ ପଏଣ୍ଟ ଟେବୁଲରେ ଏବେ ଏକ ନମ୍ବର ସ୍ଥାନରେ ରହିଛି ଭାରତ। ଏହି ସିରିଜର ଫଳାଫଳ ବିଶ୍ୱ ଟେଷ୍ଟ ଚାମ୍ପିଅନସିପର ପଏଣ୍ଟ ଟେବୁଲକୁ ପ୍ରଭାବିତ କରିବ । ଯଦି ଭାରତ ବାଂଲାଦେଶ ବିପକ୍ଷରେ କ୍ଲିନ ସୁଇପ କରିବ ତେବେ ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ ପାଇଁ ଆଉ ଗୋଟିଏ ପାଦ ଆଗକୁ ବଢିବ । ଗୋଟିଏ ବି ମ୍ୟାଚ ହାରିଲେ ଏକ ନମ୍ବର ସ୍ଥାନରୁ ଖସିଆସିବ ଭାରତ ।
ବାଂଲାଦେଶ ନିକଟରେ ପାକିସ୍ତାନ ଗସ୍ତରେ ୨-୦ରେ ଐତିହାସିକ ଟେଷ୍ଟ ସିରିଜ୍ ବିଜୟ ହାସଲ କରିଥିଲା । ସେ ଦୃଷ୍ଟିରୁ ବାଂଲାଦେଶର ଦୃଢ ମନୋବଳ ରହିଛି । ଟିମ ଇଣ୍ଡିଆ ହେଡ୍ କୋଚ୍ ଭାବେ ଗୌତମ ଗମ୍ଭୀରଙ୍କ ବାଂଲାଦେଶ ସିରିଜ୍ ହେବ ପ୍ରଥମ ଟେଷ୍ଟ ସିରିଜ୍ । ତେବେ ଭାରତ ଗତ ୧୨ ବର୍ଷରେ ଘରୋଇ ମାଟିରେ ଟେଷ୍ଟ ସିରିଜ୍ ହାରିନାହିଁ।
ରାସ୍ତା ପାର ହେବା ବେଳେ ପ୍ରଖର ସ୍ରୋତରେ ଭାସି ଗଲେ ୫
ଜଳେଶ୍ବର: ବାଲେଶ୍ବର ଜିଲ୍ଲାରେ ବନ୍ୟା ସ୍ଥିତି ଜଟିଳ । ସୁବର୍ଣ୍ଣରେଖାରେ ବନ୍ୟା ପାଣି ଆସି ଗାଁ ଗଣ୍ଡାରେ ପଶିଛି । ରାସ୍ତା ପାଣିରେ ବୁଡିଛି । କେଉଁଠି ବିଲ କେଉଁଠି ରାସ୍ତା କିଛି ଜଣାପଡୁନାହିଁ । ଏମିତି ସ୍ଥିତିରେ ରାସ୍ତା ପାର ହେଉଥିବା ବେଳେ ପ୍ରଖର ସ୍ରୋତରେ ଭାସି ଯାଇଥିଲେ ୫ ଜଣ ସେମାନଙ୍କୁ ଅଗ୍ନିଶମ କର୍ମଚାରୀମାନେ ଉଦ୍ଧାର କରିଛନ୍ତି । ସେମାନଙ୍କ ମଧ୍ୟରୁ ଜଣଙ୍କ ସ୍ବାସ୍ଥ୍ୟାବାସ୍ଥା ଗୁରୁତର ରହିଛି । ତାଙ୍କୁ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି ।
ସୁବର୍ଣ୍ଣରେଖା ନଦୀରେ ବନ୍ୟା ଆସି ବାଲିଆପାଳ ବ୍ଲକର ୭ଟି ପଞ୍ଚାୟତ ୫୦ରୁ ଅଧିକ ଗାଁ ପାଣି ଘେରରେ ରହିଛି । ଅନେକ ମୁଖ୍ୟ ରାସ୍ତାରେ ୩ରୁ ୪ ଫୁଟ ଉପରେ ପ୍ରବାହିତ ହେଉଛି ବନ୍ୟା ପାଣି । କୁହ୍ଲାଚଡ ଗ୍ରାମରୁ ୨ ଜଣ ପୁରୁଷ ୩ ଜଣ ମହିଳା ରାଶନ ସାମଗ୍ରୀ ପାଇଁ ବାଲିଆପାଳ ଆସୁଥିଲେ । ଏହି ସମୟରେ କୁହ୍ଲାଚଡ ଜାମକୁଣ୍ଡା ରାସ୍ତାରେ ପ୍ରବାହିତ ହେଉଥିବା ପ୍ରଖର ସ୍ରୋତରେ ଭାସି ଯାଇଥିଲେ । ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ସମସ୍ତଙ୍କୁ ଉଦ୍ଧାର କରିଛି ।