ଭୁବନେଶ୍ବର : ବିଭିନ୍ନ ରାଜ୍ଯକୁ ମିଳିବ ୩୫ ଲକ୍ଷ ମେଟ୍ରିକ ଟନ ଗହମ । ଏଥିପାଇଁ ଖାଦ୍ୟସୁରକ୍ଷା ଆଇନରେ ସଂଶୋଧନ କରାଯାଇଛି । ଗହମ ଚାଉଳ ଯୋଗାଣ ଅନୁପାତରେ ସଂଶୋଧନ କରି ରାଜ୍ଯକୁ ଗହମ ଯୋଗାଇବାକୁ ନିଷ୍ପତ୍ତି ହୋଇଛି । ଓଡ଼ିଶା ସମେତ ୯ ରାଜ୍ୟକୁ ଗହମ ଯୋଗାଣ ବୃଦ୍ଧି କରାଯାଇଛି । ଓଡ଼ିଶା, ପଶ୍ଚିମବଙ୍ଗ, ଗୁଜୁରାଟ, ମହାରାଷ୍ଟ୍ର,ତାମିଲନାଡୁ, ଉତ୍ତରପ୍ରଦେଶ, ଝାଡଖଣ୍ଡ,ବିହାର ଓ ମଧ୍ୟପ୍ରଦେଶକୁ ମିଳିବ ଗହମ । ଅକ୍ଟୋବର ୨୩ ତାରିଖ ଭିତରେ ରାଜ୍ୟ ଗୁଡିକ ଗହମ ଉଠାଇପାରିବେ ।
ଝାଡାବାନ୍ତିରୁ ମୁକ୍ତି ପାଇବା ପାଇଁ ରାତି ଅଧରେ ହୋମ ଯଜ୍ଞ
ବଲାଙ୍ଗୀର : ଝାଡାବାନ୍ତିରୁ ମୁକ୍ତି ପାଇବା ପାଇଁ ପୂଜାପାଠ। ରାତି ଅଧରେ ହୋମ କରି ରୋଗ ଦୂର କରିବାକୁ ପ୍ରୟାସ। ବଲାଙ୍ଗିର ବଙ୍ଗୋମୁଣ୍ଡା ଜାମତରାରେ ଏଭଳି ଦୃଶ୍ଯ ଦେଖିବାକୁ ମିଳିଛି। ଶତାଧିକ ଲୋକେ ଏକାଠି ହୋଇ ପୂଜା କରିଛନ୍ତି । ଗାଁରେ ଦୀର୍ଘ ଦିନ ହେବ ଝାଡ଼ାବାନ୍ତି ଆତଙ୍କ ଲାଗିରହିଛି । ଅନେକ ଲୋକ ହସ୍ପିଟାଲରେ ଚିକିତ୍ସିତ ହେଉଛନ୍ତି । ତଥାପି ରୋଗ ବ୍ୟାଧି ଦୂର କରିବା ପାଇଁ ପୂଜା ପାଠର ଆଶ୍ରା ନେଇଛନ୍ତି ଲୋକେ । ଗାଁର ଅନେକ ଆକ୍ରାନ୍ତ ବିଭିନ୍ନ ପ୍ରାଇଭେଟ୍ ହସ୍ପିଟାଲରେ ଚିକିତ୍ସିତ ହେଉଛନ୍ତି । ସିନ୍ଧେକେଲା ସିଏଚସିରେ ନୁଆ ଆକ୍ରାନ୍ତ ୩ ଓ ଜାମତରା ଅସ୍ଥାୟୀ ମେଡିକାଲ କ୍ୟାମ୍ପରେ ୨ ଜଣ ନୂଆ ଆକ୍ରାନ୍ତ ଚିକିତ୍ସିତ ହେଉଛନ୍ତି। ମୃତ୍ୟୁ ସଂଖ୍ୟା ୩ରେ ରହିଛି । ଆଗରୁ ଟିଟିଲାଗଡ଼, କଣ୍ଟାବାଞ୍ଜି, ଭବାନୀପାଟଣା, ବଲାଙ୍ଗୀର, ବିଷମକଟକ , ରାୟପୁର ଆଦି ସ୍ଥାନରେ ମଧ୍ୟ ବହୁ ଆକ୍ରାନ୍ତ ଚିକିତ୍ସିତ ହେଉଛନ୍ତି । ଗାଁରେ ଝାଡାବାନ୍ତି ଆକ୍ରାନ୍ତଙ୍କ ସଂଖ୍ଯା ଦିନକୁ ଦିନ ବଢୁଥିବାରୁ ଏବେ ପୂଜା ପାଠ ଉପରେ ଲୋକଙ୍କ ଭରସା।
ପାଣିରେ ବୁଡିଲା ବାବା ପଞ୍ଚଲିଙ୍ଗେଶ୍ବରଙ୍କ ପୀଠ
ବାଲେଶ୍ବର : ପଞ୍ଚଲିଙ୍ଗେଶ୍ୱର ପୂଜା ମଣ୍ଡପ ଉପରେ ଆଣ୍ଠୁଏ ଉଚ୍ଚର ପାଣି। ପ୍ରବଳ ବର୍ଷା ଯୋଗୁ ଠାକୁରଙ୍କ ଦର୍ଶନ ବନ୍ଦ ରହିଛି। ଲଗାଣ ବର୍ଷାରେ ଓଡିଶା ପ୍ରସିଦ୍ଧ ସ୍ଥାନ ପ୍ରଭାବିତ ହୋଇଥିବା ବେଳେ ଶୈବପୀଠ ପଞ୍ଚଲିଙ୍ଗେଶ୍ୱରରେ ଅତି ପ୍ରଖର ହେଲା ଝରଣା ପାଣି। ପୂଜା ମଣ୍ଡପର ଦୀପ ଜଳିବା ସ୍ଥାନରେ ଚାଲିଲା ଆଣ୍ଠୁଏ ଉଚ୍ଚର ଝରଣା ପାଣି। ଝରଣାର ସ୍ରୋତ ଏତେ ପ୍ରଖର ଯେ ଶିବ ଲିଙ୍ଗ ସ୍ପର୍ଶ କରିବା ଅନିର୍ଦ୍ଧିଷ୍ଟ କାଳ ଯାଏଁ ବନ୍ଦ ରହିଛି । ବାବାଙ୍କୁ ସ୍ପର୍ଶ କରି ନପାରି ରାଜ୍ୟ ବାହାରୁ ଆସିଥିବା ଭକ୍ତ ନିରାଶ ହୋଇ ଫେରିଛନ୍ତି। ବହୁ କଷ୍ଟରେ ଦୂର ଦୂରାନ୍ତରରୁ ଆସିଥିବା ଭକ୍ତ ବର୍ଷା ନେଇ ନାନା ସମସ୍ଯାର ସାମ୍ନା କରିଥିଲେ। ଦର୍ଶନ ବନ୍ଦ ହେବାରୁ କିଛି ଭକ୍ତ ବାବାଙ୍କ ଦର୍ଶନ ନେଇ ଅପେକ୍ଷା କରି ରହିଥିବା ବେଳେ କିଛି ଶ୍ରଦ୍ଧାଳୁ ନିରାଶ ହୋଇ ଫେରିଯାଇଛନ୍ତି । ମନ୍ଦିର ସମେତ ସହରର ବିଭିନ୍ନ ସ୍ଥାନରେ ପାଣି ଜମି ରହିଛି। ଯାତାୟାତରେ ନାନା ସମସ୍ଯା ର ସାମ୍ନା କରୁଛନ୍ତି ଲୋକେ।
୪ ପୋଲିସ କର୍ମଚାରୀଙ୍କର ହେବ ମିଛଧରା ପରୀକ୍ଷା
ଭୁବନେଶ୍ବର : ଭରତପୁର ଥାନା ବିବାଦ ଘଟଣା । ତତ୍କାଳୀନ ଥାନାଧିକାରୀ ଦୀନକୃଷ୍ଣ ମିଶ୍ରଙ୍କ ପରେ ନିଲମ୍ବିତ ଅନ୍ଯ ୪ ପୋଲିସ କର୍ମଚାରୀଙ୍କର ବି ମିଛଧରା ପରୀକ୍ଷା । ସେମାନଙ୍କର ପଲିଗ୍ରାଫ ଟେଷ୍ଟ ପାଇଁ କୋର୍ଟରେ ଆବେଦନ କରିଛି କ୍ରାଇମବ୍ରାଞ୍ଚ । ଏହା ସହ ଆବଶ୍ଯକସ୍ଥଳେ ଲାଏ ଡିଟେକ୍ସନ ଓ ବ୍ରେନ ମ୍ୟାପିଂ ଟେଷ୍ଟ ବି କରାଯିବ । ଏଥିପାଇଁ ନିଲମ୍ବିତ ପୋଲିସ କର୍ମଚାରୀଙ୍କ ସହମତି ମଗାଯାଇଛି । ଖୁବଶୀଘ୍ର ଏନେଇ କୋର୍ଟଙ୍କ ନିଷ୍ପତ୍ତି ଆସିବ । ୪ ନିଲମ୍ବିତ ପୋଲିସ କର୍ମଚାରୀ ହେଲେ SI ବୈଶାଳିନୀ ପଣ୍ଡା, ASI ଶୈଳମୟୀ ସାହୁ, ASI ସାଗରିକା ରଥ ଓ କନଷ୍ଟେବଳ ବଳରାମ ହାଁସଦା । ଗତ ୨୫ ତାରିଖରେ ନିଲମ୍ବିତ ଆଇଆଇସିଙ୍କର ପଲିଗ୍ରାଫ ଟେଷ୍ଟ କରିବାକୁ ଭୁବନେଶ୍ବର SDJM କୋର୍ଟ ଅନୁମତି ଦେଇଥିଲେ । ଖୁବଶୀଘ୍ର ଏକ ସ୍ବତନ୍ତ୍ର ଟିମ୍ ଦୀନକୃଷ୍ଣକୁ ନେଇ ଗୁଜୁରାଟ ଗାନ୍ଧୀନଗର ଗସ୍ତ କରିବ ।
ସଂସଦୀୟ ଷ୍ଟାଣ୍ଡିଂ କମିଟିରେ ସ୍ଥାନ ପାଇଲେ ୭ ବିଜେଡି ସାଂସଦ
ଭୁବନେଶ୍ବର : ସଂସଦୀୟ ଷ୍ଟାଣ୍ଡିଂ କମିଟିରେ ସ୍ଥାନ ପାଇଲେ ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜ । କୋଇଲା, ଖଣି ଓ ଇସ୍ପାତ ସମ୍ପର୍କିତ କମିଟିରେ ମାନସ ମଙ୍ଗରାଜ ସ୍ଥାନ ପାଇଛନ୍ତି । ବିଜେଡିର ୭ ଜଣ ରାଜ୍ଯସଭା ସାଂସଦ ବିଭିନ୍ନ କମିଟିରେ ସ୍ଥାନ ପାଇଛନ୍ତି । ଡ. ସସ୍ମିତ ପାତ୍ର ଯୋଗାଣ ଏବଂ ସୂଚନା ଓ ପ୍ରଯୁକ୍ତିବିଦ୍ଯା କମିଟିରେ ସ୍ଥାନ ପାଇଥିବାବେଳେ ସାର ଓ ରସାୟନ କମିଟିରେ ନିରଞ୍ଜନ ବିଶି, ଶିଳ୍ପ କମିଟିରେ ସୁଲତା ଦେଓ, ଗୃହ ନିର୍ମାଣ ଓ ନଗର ଉନ୍ନୟନ କମିଟିରେ ଦେବାଶିଷ ସାମନ୍ତରାୟ, ରେଳବାଇରେ ଶୁଭାଶିଷ ଖୁଣ୍ଟିଆ ଏବଂ ପ୍ରତିରକ୍ଷା ସମ୍ପର୍କିତ କମିଟିରେ ମୁଜିବୁଲ୍ଲା ଖାନ ସ୍ଥାନ ପାଇଛନ୍ତି ।
ଲୋକସଭା ଭବନରେ ଦୁଇ ଦିନିଆ ଜିଲ୍ଲାପାଳ ସମ୍ମିଳନୀ ଆରମ୍ଭ
ଭୁବନେଶ୍ବର : ଦୁଇ ଦିନିଆ ଜିଲ୍ଲାପାଳ ସମ୍ମିଳନୀ ଆରମ୍ଭ ହୋଇଯାଇଛି । ନୂଆ ସରକାର ଗଠନ ପରେ ପ୍ରଥମ ଜିଲ୍ଲାପାଳ ସମ୍ମିଳନୀକୁ ଗୁରୁତ୍ୱ ଦିଆଯାଉଛି । ଲୋକସେବା ଭବନ କନଭେନସନ୍ ସେଣ୍ଟରରେ ଜିଲ୍ଲାପାଳ ସମ୍ମିଳନୀର ଶୁଭାରମ୍ଭ ହୋଇଛି । ଏହି ସମ୍ମିଳନୀରେ ଉପ ମୁଖ୍ୟମନ୍ତ୍ରୀ, ବିଭିନ୍ନ ବିଭାଗର ମନ୍ତ୍ରୀ ଓ ସଚିବ, ପୋଲିସ ଡିଜି, ମୁଖ୍ୟ ଶାସନ ସଚିବ, ଗୃହ, ରାଜସ୍ବ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଉପସ୍ଥିତ ଥିଲେ । ଆଇନଶୃଙ୍ଖଳା ପରିସ୍ଥିତି ଠାରୁ ଆରମ୍ଭ କରି ଉନ୍ନୟନ ମୂଳକ କାମ, ସରକାରଙ୍କ ଯୋଜନାର ସଠିକ ରୂପାୟନ, ବିପର୍ଯ୍ୟୟ ପରିଚାଳନା , ସୀମା ବିବାଦ ଭଳି ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଛି ।
କଙ୍ଗନା ରାଣାଓ୍ବତଙ୍କ ଫିଲ୍ମ ଏମର୍ଜେନ୍ସିଂ ପାସ୍ ନ ହେବାର କାରଣ କି ଇନ୍ଦିରାଙ୍କ ପ୍ରଶଂସା !
ନୂଆଦିଲ୍ଲୀ : ବଲିଉଡ୍ କୁଇନ୍ କଙ୍ଗନା ରାଣାୱତ ଜଣେ ବିଜେପି ସାଂସଦ। କେନ୍ଦ୍ରରେ ମଧ୍ୟ ବିଜେପି ସରକାରର ଶାସନ ଚାଲିଛି । ଏହା ସତ୍ତ୍ବେ ମଧ୍ୟ ରାଣାଓ୍ବତଙ୍କ ଫିଲ୍ମ ଏମର୍ଜେନ୍ସିଂକୁ ସେନ୍ସର ବୋର୍ଡ ଅଫ୍ କମିଟି ପାସ୍ କରୁନାହାଁନ୍ତି । ପରିସ୍ଥିତି ଏପରି ଯେ କଙ୍ଗନାଙ୍କୁ ବାରମ୍ବାର କୋର୍ଟ ଦୈାଡିବାକୁ ପଡୁଛି । ନିୟମ ଅନୁଯାୟୀ ସେନ୍ସର ବୋର୍ଡ ଫିଲ୍ମଟିର କିଛି ସିନ୍ କାଟି ମୁକ୍ତ କରିବାକୁ ପ୍ରସ୍ତୁତ ଅଛି । ଫିଲ୍ମ ଏମର୍ଜେନ୍ସିଂ ହେଉଛି ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଜୀବନୀ ଉପରେ ଆଧାରିତ ଏକ ଚଳଚ୍ଚିତ୍ର । ଯେଉଁଭଳି ଭାବରେ କଙ୍ଗନା ବିଜେପିର ପ୍ରତିପକ୍ଷଙ୍କ ଉପରେ ନିଆଁ ଲଗାଉଛନ୍ତି, ଲାଗୁଥିଲା ଯେ ଇନ୍ଦିରା ଗାନ୍ଧୀଙ୍କ ଜରୁରୀକାଳୀନ କାର୍ଯ୍ୟକୁ ଦୃଷ୍ଟିରେ ରଖି ଫିଲ୍ମଟି ତିଆରି ହୋଇଥାଇପାରେ। ଅର୍ଥାତ୍ ଫିଲ୍ମରେ ଇନ୍ଦିରା ଗାନ୍ଧୀ ନିଶ୍ଚୟ ବଦନାମ ହୋଇଥିବେ । କିନ୍ତୁ ଇଣ୍ଡିଆନ୍ ଏକ୍ସପ୍ରେସ୍ ଖବରକାଗଜରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଇନ୍ଦିରା ଗାନ୍ଧୀଙ୍କୁ ଏହି ଫିଲ୍ମରେ ବହୁତ ପ୍ରଶଂସା କରାଯାଇଛି ।
ସାଧାରଣତଃ ବର୍ତ୍ତମାନ ପର୍ଯ୍ୟନ୍ତ କୁହାଯାଉଥିଲା ଯେ ଶିଖମାନଙ୍କ ଆପତ୍ତି କାରଣରୁ ଫିଲ୍ମ ଏମର୍ଜେନ୍ସିଂ ରିଲିଜରେ ବିଳମ୍ବ ହେଉଛି । କିନ୍ତୁ ବର୍ତ୍ତମାନ ଏହି ରିପୋର୍ଟ ପରେ ଲାଗୁଛି ଯେ ଫିଲ୍ମଟି ରିଲିଜ ହେବାରେ ବାଧା ସୃଷ୍ଟି ହେବାର କାରଣ ହେଉଛି ଇନ୍ଦିରା ଗାନ୍ଧୀଙ୍କ ପ୍ରତି ଜନସାଧାରଣଙ୍କ ମଧ୍ୟରେ ସହାନୁଭୂତି ସୃଷ୍ଟି କରିବା । ସେପ୍ଟେମ୍ବର ୬ ରେ ଏହି ଫିଲ୍ମ ରିଲିଜ ହେବାକୁ ଥିଲା ବେଳେ, ସେନସର ବୋର୍ଡର ଆପତ୍ତି ଯୋଗୁଁ ଫିଲ୍ମଟି ବିଳମ୍ବ ହୋଇଛି । ପ୍ରକାଶ ଥାଉକି, ସେଣ୍ଟ୍ରାଲ୍ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ୍ (ସିବିଏଫ୍ସି) ଗୁରୁବାର ବମ୍ବେ ହାଇକୋର୍ଟଙ୍କୁ ସୂଚନା ଦେଇଛନ୍ତି ଯେ ରିଲିଜ୍ ହେବା ପୂର୍ବରୁ କଙ୍ଗନା ରାଣାୱତଙ୍କ ଫିଲ୍ମ ଏମର୍ଜେନ୍ସିଂର କିଛି ଦୃଶ୍ୟ କଟାଯିବା ଦରକାର ।
ଏହି ଚଳଚ୍ଚିତ୍ରଟି ଇନ୍ଦିରା ଗାନ୍ଧୀଙ୍କ ପ୍ରତି ସହାନୁଭୂତି ସୃଷ୍ଟି କରିଛି
ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଜୀବନୀ ଉପରେ ଆଧାରିତ ଅଭିନେତ୍ରୀ ତଥା ବିଜେପି ସାଂସଦ କଙ୍ଗନା ରାଣାଓ୍ବତଙ୍କ ଫିଲ୍ମ ଏମର୍ଜେନ୍ସିଂ । ତେବେ ଏହି ଚଳଚ୍ଚିତ୍ରର ଲେଖକ ତଥା ଅଭିନେତା ଜଣେ ବିଜେପି ନେତା ହୋଇଥିବାରୁ ଏହା ସ୍ପଷ୍ଟ ଯେ ଲୋକମାନେ ଭାବୁଛନ୍ତି ଯେ ଏହି ଚଳଚ୍ଚିତ୍ରରେ କେବଳ ଇନ୍ଦିରା ଗାନ୍ଧୀଙ୍କ ଜୀବନର ନକାରାତ୍ମକ ଦିଗ ଦେଖାଯାଇଥାନ୍ତା । କିନ୍ତୁ ଇଣ୍ଡିଆନ୍ ଏକ୍ସପ୍ରେସର ଏକ ରିପୋର୍ଟରେ ଐତିହାସିକ ମଖଖାନ୍ ଲାଲ କହିଛନ୍ତି ଯେ ଇନ୍ଦିରା ଗାନ୍ଧୀଙ୍କ ଜୀବନୀ ଉପରେ କଂଗ୍ରେସ ମଧ୍ୟ ଏହାଠାରୁ ଭଲ ଚଳଚ୍ଚିତ୍ର ନିର୍ମାଣ କରିପାରି ନଥାନ୍ତା । ପ୍ରଫେସର ଲାଲ କହିଛନ୍ତି ଯେ ଏହି ଚଳଚ୍ଚିତ୍ରରେ ତଥ୍ୟଗୁଡିକ କୈାଣସି ପରିବର୍ତ୍ତନ କରାଯାଇ ନାହିଁ ଏବଂ ଫିଲ୍ମଟି ଦେଖିବା ପରେ ଲୋକଙ୍କର ଇନ୍ଦିରା ଗାନ୍ଧୀଙ୍କ ପ୍ରତି ସହାନୁଭୂତି ବଢିବ । ସୂଚନାଯୋଗ୍ୟ ଯେ ଏହି ଫିଲ୍ମ ଏପର୍ଯ୍ୟନ୍ତ ରିଲିଜ୍ ହୋଇନାହିଁ। କିମ୍ବା ଏହି ଚଳଚ୍ଚିତ୍ରର କୈାଣସି ପ୍ରେସ୍ ସମୀକ୍ଷା ହୋଇନାହିଁ ।
ଅନ୍ଧବିଶ୍ବାସର ଜଘନ୍ଯ ପରିଣତି , ଦୁଇ ବୃଦ୍ଧଙ୍କ ମୁଣ୍ଡରେ ବିଷ୍ଠା ଢାଳିଲେ ଉତ୍ତ୍ଯକ୍ତ ଲୋକେ
ନୂଆପଡା : ଅନ୍ଧବିଶ୍ବାସର ଜଘନ୍ଯ ପରିଣତି । ଗୁଣିଗାରେଡ଼ି ସନ୍ଦେହରେ ଦୁଇ ବୃଦ୍ଧଙ୍କ ମୁଣ୍ଡରେ ବିଷ୍ଠା ଢାଳିଲେ ଉତ୍ତ୍ଯକ୍ତ ଲୋକେ । ନୂଆପଡ଼ା ଜିଲ୍ଲା ବୋଡେନ ଥାନା ଅଞ୍ଚଳରେ ଘଟିଛି ଏଭଳି ବର୍ବର କାଣ୍ଡ । ଗୁଣି ସନ୍ଦେହରେ ଡୁମେରପଦର ଗାଁର ଦୁଇ ବୃଦ୍ଧଙ୍କ ମୁଣ୍ଡରେ ବିଷ୍ଠା ଢାଳିବା ସହ ମୁହଁରେ ଲଙ୍କାଗୁଣ୍ଡ ମାରିଥିଲେ ଦୁର୍ବୃତ୍ତ । ଏଭଳି ନିର୍ଯାତନାର ଶିକାର ହୋଇଛନ୍ତି ଡୁମେରପଦର ଗାଁର ୬୫ ବର୍ଷୀୟ ଭୋଜରାମ ରଣା ଓ ୬୦ ବର୍ଷୀୟ ଗୋବର୍ଦ୍ଧନ ରଣା । ଅଭିଯୋଗ ଅନୁସାରେ ଡୋଟୋ ଗାଁର ଲଳିତ ରଣାଙ୍କ ଝିଅଙ୍କର ସ୍ବାସ୍ଥ୍ଯବସ୍ଥା ଖରାପ ଥିଲା । ଯେତେ ଚିକିତ୍ସା କରିଥିଲେ ବି ଝିଅଟି ସୁସ୍ଥ ହୋଇନଥିଲା । ଏଣୁ କେହି ଗୁଣି କରିଥିବା ପରିବାର ଲୋକ ସନ୍ଦେହ କରିଥିଲେ । ଦୁଇଦିନ ତଳେ ଗାଁରେ ବୈଠକ କରି ଭୋଜରାମ ଓ ଗୋବର୍ଦ୍ଧନଙ୍କୁ ଡକାଇଥିଲେ । କିନ୍ତୁ ଉଭୟ ବୈଠକକୁ ଆସି ନଥିଲେ । ଏହାକୁ ନେଇ ଲଳିତଙ୍କ ପରିବାର ଅସନ୍ତୋଷ ବ୍ୟକ୍ତ କରିଥିଲେ । ବୁଧବାର ରାତିରେ କିଛି ଯୁବକ ଭୋଜରାମ ଓ ଗୋବର୍ଦ୍ଧନଙ୍କ ଘରେ ପଶି ନିସ୍ତୁକ ମାଡ଼ ମାରିଥିଲେ । ପରେ ମୁଣ୍ଡରେ ବିଷ୍ଠା ଢାଳିବା ସହ ମୁହଁରେ ଲଙ୍କାଗୁଣ୍ଡ ବୋଳିଦେଇଥିଲେ । ଘଟଣାକୁ ନେଇ ସାରା ରାଜ୍ଯରେ ଚାଞ୍ଚଲ୍ଯ ଖେଳିଯାଇଥିବାବେଳେ ଥାନାରେ ଅଭିଯୋଗ ହୋଇଛି । ପୋଲିସ ୯ ଜଣଙ୍କ ନାଁରେ ମାମଲା ରୁଜୁ କରି ତଦନ୍ତ କରୁଛି ।
ନରହନ୍ତା ଦନ୍ତାକୁ ଟ୍ରାଙ୍କୁଲାଇଜ କଲା ବନବିଭାଗ
ବାରିପଦା : ଟ୍ରାଙ୍କୁଲାଇଜ ହେଲା ନରହନ୍ତା ଦନ୍ତା । ମୟୂରଭଞ୍ଜ ଜିଲ୍ଲା ବାରିପଦା ବନଖଣ୍ଡ ଅଧୀନ ବେତନଟୀରେ ମାତିଥିବା ଗୋଠଛଡ଼ା ଦନ୍ତାହାତୀକୁ ଟ୍ରାଙ୍କୁଲାଇଜ କରି କପିଳାଶ ଥଇଥାନ କେନ୍ଦ୍ରକୁ ଅଣାଯାଇଛି । ଏହି ଦନ୍ତା ଆକ୍ରମଣରେ ୩ ଦିନରେ ୪ ଜଣଙ୍କ ଜୀବନ ଯାଇଥିବା ବେଳେ ୪ ଜଣ ଗୁରୁତର ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ୨୪ ତାରିଖ ରାତିରେ ଝାଡ଼ଖଣ୍ଡରୁ ଓଡ଼ିଶା ସୀମାରେ ପଶିଥିଲା ଏହି ଦନ୍ତା । ସୀମାନ୍ତବର୍ତ୍ତୀ ଶୁଳିଆପଦା ବ୍ଲକରେ ବ୍ୟାପକ ଫସଲ ଉଜାଡ଼ିବା ସହ ବିଭିନ୍ନ ସ୍ଥାନରେ ଲୋକଙ୍କୁ ଆକ୍ରମଣ କରିଥିଲା । ଗତକାଲି ରାତିରେ ଦନ୍ତାଟି ବାରିପଦା ବ୍ଲକ୍ ବିସିପୁର ପଞ୍ଚାୟତ ବାଦଲସାହି ନିକଟରେ ବୁଲୁଥିବାବେଳେ ବନବିଭାଗ ଟ୍ରାଙ୍କୁଲାଇଜ୍ କରିଥିଲା । ପରେ ହାତୀଟି ଜଙ୍ଗଲ ଭିତରକୁ ଦୌଡ଼ି ପଳାଇଥିଲା । ପ୍ରାୟ ଘଣ୍ଟାଏ ପରେ ନିଶ୍ଚେତକ ପ୍ରଭାବରେ ହାତୀଟି ଅଚେତ ହୋଇଯାଇଥିଲା । ବନ ବିଭାଗ ଏକ ଗାଡ଼ିରେ ତାକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିଲା । ନିଶ୍ଚେତକ ପ୍ରଭାବ କମିବାପରେ ତାକୁ କାବୁ କରିବା ପାଇଁ ଆସାମରୁ ତାଲିମପ୍ରାପ୍ତ ମାହୁନ୍ତଙ୍କୁ ନିୟୋଜିତ କରାଯିବ ।
ପଞ୍ଜାବରେ ସୁନୀଲ ଜାଖରଙ୍କ ଇସ୍ତଫା ବିଜେପି ପାଇଁ ପଡିବ କି ଭାରି ?
ଚଣ୍ଡୀଗଡ : ପଞ୍ଜାବରେ ନିର୍ବାଚନ ପୂର୍ବରୁ ବିଜେପିକୁ ବଡ ଝଟକା । ବିଜେପିର ରାଜ୍ୟ ସଭାପତି ସୁନୀଲ ଜାଖର ତାଙ୍କ ପଦରୁ ଇସ୍ତଫା ଦେଇଛନ୍ତି । କିନ୍ତୁ ସୁନୀଲ ଜାଖରଙ୍କ ଇସ୍ତଫା ଗ୍ରହଣ କରିନାହାଁନ୍ତି ହାଇକମାଣ୍ଡ ।
ଗତ କିଛି ମାସ ମଧ୍ୟରେ , ଜାଖର ରାଜ୍ୟ କାର୍ଯ୍ୟନିର୍ବାହୀ ଅଧିକାରୀଙ୍କ ଗୁରୁତ୍ୱପୂର୍ଣ୍ଣ ବୈଠକଠାରୁ ନିଜକୁ ଦୂରେଇ ରଖୁଥିଲେ । ତେବେ ଏବେ ଇସ୍ତଫା ନେଇ ସୁନୀଲ ଜାଖର ନୀରବତା ବଜାୟ ରଖିଛନ୍ତି । କୁହାଯାଉଥିଲା ଯେ ଲୋକସଭା ନିର୍ବାଚନରେ ହାରିବା ସତ୍ତ୍ୱେ ରାବଣୀତ ସିଂ ବିଟୁଙ୍କୁ କେନ୍ଦ୍ର ମନ୍ତ୍ରୀ କରାଯିବା ପାଇଁ ଜାଖର ରାଗିଛନ୍ତି । ବିଜେପି ବିଟୁକୁ ରାଜସ୍ଥାନରୁ ରାଜ୍ୟସଭାକୁ ପଠାଇଛି ।
ସୂଚନାନୁସାରେ , ୨୦୨୪ ଲୋକସଭା ନିର୍ବାଚନର ଗୋଟିଏ ବର୍ଷ ପୂର୍ବରୁ ପଞ୍ଜାବ ବିଜେପିରେ ଏକ ବଡ ପରିବର୍ତ୍ତନ ହୋଇଥିଲା । ତା’ପରେ ଦଳ ପଞ୍ଜାବ ୟୁନିଟର ଦାୟିତ୍ବ ପୂର୍ବତନ କଂଗ୍ରେସ ନେତା ସୁନୀଲ ଜାଖରଙ୍କୁ ଦେଇଥିଲା । ପଞ୍ଜାବ କଂଗ୍ରେସର ଅନ୍ୟତମ ପ୍ରମୁଖ ନେତା ଜାଖର ପଞ୍ଜାବ ବିଧାନସଭା ନିର୍ବାଚନରେ କଂଗ୍ରେସର ପରାଜୟ ପରେ ମେ ୨୦୨୨ ରେ ବିଜେପିରେ ଯୋଗ ଦେଇଥିଲେ । ସେ ଜାତୀୟ ସଭାପତି ଜେପି ନଡ୍ଡାଙ୍କ ଉପସ୍ଥିତିରେ ଦଳରେ ଯୋଗ ଦେଇଥିଲେ । ଅତୀତରେ ଜାଖର ଦୁଇଥର ଆବୋହରରୁ ବିଧାୟକ ଏବଂ ଥରେ ଗୁରୁଦାସପୁର ନିର୍ବାଚନମଣ୍ଡଳୀରୁ ସାଂସଦ ରହିଛନ୍ତି । ଜାଖର ମଧ୍ୟ ୨୦୨୧ ପର୍ଯ୍ୟନ୍ତ ଚାରି ବର୍ଷ ପର୍ଯ୍ୟନ୍ତ ରାଜ୍ୟ କଂଗ୍ରେସ ସଭାପତି ଭାବରେ କାର୍ଯ୍ୟ କରିଥିଲେ ।