ବରିଷ୍ଠ କଂଗ୍ରେସ ନେତା ଶିବରାଜ ପାଟିଲଙ୍କ ଦେହାନ୍ତ। ୯୦ ବର୍ଷ ବୟସରେ ଶିବରାଜ ପାଟିଲଙ୍କ ପରଲୋକ ଘଟିଛି। ମହାରାଷ୍ଟ୍ର ଲାତୁର ସ୍ଥିତ ବାସଭବନରେ ତାଙ୍କର ଦେହାନ୍ତ ଘଟିଛି। ଦୀର୍ଘ ଦିନ ଧରି ବୟସାଧିକ କାରଣରୁ ଅସୁସ୍ଥ ଥିଲେ। ପୂର୍ବତନ କେନ୍ଦ୍ର ଗୃହମନ୍ତ୍ରୀ ଓ ଲୋକସଭା ବାଚସ୍ପତି ଥିଲେ ଶିବରାଜ ପାଟିଲ। ଶିବରାଜଙ୍କ ଦେହାନ୍ତ ନେଇ ଶୋକ ପ୍ରକାଶ କରିଛନ୍ତି କଂଗ୍ରେସର ଅନେକ ପ୍ରମୁଖ ନେତା। କଂଗ୍ରେସ ସଂସଦୀୟ ଦଳ ନେତା ସୋନିଆ ଗାନ୍ଧି ଶିବରାଜଙ୍କ ଦେହାନ୍ତ ଘଟଣା ଅତି ଦୁଃଖଦ ବୋଲି କହିବା ସହ ଶୋକ ପ୍ରକାଶ କରିଛନ୍ତି। କଂଗ୍ରେସ ସାଂସଦ ଶିବରାଜ ପାଟିଲଙ୍କ ଦେହାନ୍ତରେ ଶୋକ ପ୍ରକାଶ କରିଛନ୍ତି। ସାଂସଦ ରାହୁଲ ଗାନ୍ଧିଙ୍କ ସମେତ ଅନ୍ୟ ବିଶିଷ୍ଟ ନେତା ଶୋକ ପ୍ରକାଶ କରିଛନ୍ତି। ଶିବରାଜଙ୍କ ପରିବାରରେ ପୁଅ ଶୈଳେଶ ପାଟିଲ, ବୋହୂ ଅର୍ଚ୍ଚନା ଓ ଦୁଇ ନାତୁଣୀ ଅଛନ୍ତି।
ମାଲକାନଗିରିରେ ବଢ଼ିଲା ଇଣ୍ଟରନେଟ କଟକଣା
ମାଲକାନଗିରିରେ ବଢ଼ିଲା ଇଣ୍ଟରନେଟ କଟକଣା। ମାଲକାନଗିରି ଜିଲ୍ଲାରେ ଇଣ୍ଟରନେଟ କଟକଣାକୁ ବୃଦ୍ଧି କରାଯାଇଛି। ଆଜି ରାତି ୧୨ଟା ଯାଏ ବଢ଼ିଛି କଟକଣା । ଗ୍ରାଉଣ୍ଡକୁ ଯାଇ ସ୍ଥିତି ପରଖିଥିଲେ ଆରଡିସି ଓ ଜିଲ୍ଲାପାଳ। ଶାନ୍ତି ଫେରାଇ ଆଣିବାକୁ ଲୋକଙ୍କୁ ନିବେଦନ କରିଛନ୍ତି। ଅନ୍ୟପଟେ ଗାଁରେ ଥିରେ ଧିରେ ଶାନ୍ତି ଫେରୁଛି। ଗତକାଲି ଦୁଇ ଗୋଷ୍ଠୀର ନେତାଙ୍କ ସହ ଆଲୋଚନା କରିଥିଲେ ଉପ- ମୁଖ୍ୟମନ୍ତ୍ରୀ କେଭି ସିଂହଦେଓ ଓ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ଦୁଇ ପକ୍ଷର ବିଭିନ୍ନ ଅଭିଯୋଗ ଓ ଦାବି ଶୁଣି ଅଭିଯୋଗ ଓ ସମସ୍ୟାର ସମାଧାନ ପାଇଁ ପଦକ୍ଷେପ ନିଆଯିବ ବୋଲି କେଭି ସଂଦେଓ ଆଶ୍ଵାସନା ଦେଇଛନ୍ତି। ଘଟଣାର ଅନୁଧ୍ୟାନ ପାଇଁ ବିଜେଡିର ୭ ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ ମାଲକାନଗିରି ଯିବେ। ଏମାନଙ୍କ ମଧ୍ୟରେ ମାନସ ମାଡକାମି, ମନୋହର ରନ୍ଧାରୀ, ରମେଶ ମାଝୀ, ପ୍ରଦୀପ ମାଝୀ, ରବି ନନ୍ଦ, ଈଶ୍ବର ପାଣିଗ୍ରାହୀ ଓ ଲକ୍ଷ୍ମୀପ୍ରିୟା ନାୟକ ଘଟଣାସ୍ଥଳକୁ ଯାଇ ତଥ୍ୟ ଅନୁସନ୍ଧାନ କରିବେ। ଅପ୍ରୀତିକର ପରିସ୍ଥିତି ଲାଗି ରହିଥିବାରୁ ମାଲ୍ୟବନ୍ତ ମହୋତ୍ସବକୁ ସ୍ଥଗିତ ରଖାଯାଇଛି। ୧୪ରୁ ୧୮ ତାରିଖ ଯାଏ ହେବାର ଥିଲା ମାଲ୍ୟବନ୍ତ ମହୋତ୍ସବ। ଜାନୁଆରୀ ମାସରେ ହୋଇପାରେ ମାଲ୍ୟବନ୍ତ ମହୋତ୍ସବ।
ଆଜି ବସିବ ଛତିଶା ନିଯୋଗ ବୈଠକ: ଅଧ୍ୟକ୍ଷତା କରିବେ ଶ୍ରୀମନ୍ଦିର ମୁଖ୍ୟ ପ୍ରଶାସକ
ଆଜି ବସିବ ଛତିଶା ନିଯୋଗ ବୈଠକ । ସଂଧ୍ୟା ୫ଟାରେ ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ହେବାକୁ ଥିବା ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ଅଧ୍ୟକ୍ଷତାରେ କରିବେ । ଆସନ୍ତା ୧୬ ତାରିଖ ଠାରୁ ଜାନୁଆରୀ ୧୩ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ପହିଲି ଭୋଗ ନୀତି ନିର୍ଘଣ୍ଟକୁ ବୈଠକରେ ଅନୁମୋଦନ କରାଯିବ। ଜାନୁଆରୀ ୩ ତାରିଖରେ ଦେବାଭିଷେକ ପୂର୍ଣ୍ଣିମା ନୀତି ନିର୍ଘଣ୍ଟ ଓ ଜାନୁଆରୀ ୧୪ ତାରିଖରେ ମକର ସଂକ୍ରାନ୍ତି ନୀତି ନିର୍ଘଣ୍ଟ ନେଇ ବୈଠକରେ ଆଲୋଚନା ହେବ। ସେହିପରି ଇଂରାଜୀ ନୂଆବର୍ଷରେ ଭକ୍ତ ମାନଙ୍କ ଶୃଙ୍ଖଳିତ ଦର୍ଶନ ଉପରେ ଆଲୋଚନା କରାଯିବ । ସେହିପରି ଶ୍ରୀମନ୍ଦିରରେ ଦିବ୍ୟାଙ୍ଗ ଭକ୍ତଙ୍କ ସହଜ ଦର୍ଶନ ବ୍ୟବସ୍ଥା ନେଇ ଆଲୋଚନା ହେବ । ସଭାପତିଙ୍କ ଅନୁମୋଦନ କ୍ରମେ ବୈଠକରେ ଅନ୍ୟାନ୍ୟ ପ୍ରସଙ୍ଗରେ ଆଲୋଚନା ହୋଇପାରେ। ବୈଠକରେ ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା, ଏସପି ପ୍ରତୀକ ସିଂ, ଛତିଶା ନିଯୋଗର ସେବାୟତ ପ୍ରତିନିଧି ଉପସ୍ଥିତ ରହିବେ। ଅନ୍ୟାନ୍ୟ ବରିଷ୍ଠ ପ୍ରଶାସନିକ ଅଧିକାରୀ ମାନେ ମଧ୍ୟ ଉପସ୍ଥିତ ରହିବେ।
ଖୁବ୍ ଶୀଘ୍ର ଭେନେଜୁଏଲା ଉପରେ ସ୍ଥଳଭାଗରେ ହମଲା କରିବ ଆମେରିକା
ଖୁବ୍ ଶୀଘ୍ର ଭେନେଜୁଏଲା ଉପରେ ସ୍ଥଳଭାଗରେ ହମଲା କରିବ ଆମେରିକା। ଏନେଇ ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ଏଥିଲାଗି ସମସ୍ତ କ୍ଷେତ୍ର ପ୍ରସ୍ତୁତ ହୋଇଥିବା ସୂଚନା ମିଳିଛି। ଡ୍ରଗ ଟ୍ରାଫିକିଂକୁ କେନ୍ଦ୍ର କରି ଆମେରିକା ଏହି ହମଲା କରିବାକୁ ଯାଉଥିବା ଜଣାଯାଇଛି। ଆମେରିକାର ଏହି ଘୋଷଣାକୁ ସମାଲୋଚନା କରିଛନ୍ତି ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋ। ସେପଟେ ଭେନେଜୁଏଲାକୁ ପୂର୍ଣ୍ଣ ସମର୍ଥନ ଜଣାଇଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ। ସେ ମାଦୁରୋଙ୍କ ସହ ଫୋନ ଜରିଆରେ କଥା ହୋଇ ସମସ୍ତ ପ୍ରକାର ସହଯୋଗ କରିବାକୁ ଘୋଷଣା କରିଛନ୍ତି। ଭେନେଜୁଏଲା ବିରୋଧରେ ଆମେରିକାର ପୁଣି କାର୍ଯ୍ୟାନୁଷ୍ଠାନ। ରାଷ୍ଟ୍ରପତି ମାଦୁରୋଙ୍କ ୩ ପୁତୁରା ଓ ତୈଳ ପରିବହନ କରୁଥିବା ୬ଟି ଜାହାଜ ବିରୋଧରେ ଆମେରିକା ଜାରି କରିଛି କଟକଣା। ମାଦୁରୋଙ୍କ ପୁତୁରା ଫ୍ରାଙ୍କୁଇ ଫ୍ଲୋରେସ, କାର୍ଲୋସ ଫ୍ଲୋରେସ ଓ ଏଫ୍ରେନ କାମ୍ପୋଙ୍କ ବିରୋଧରେ କଟକଣା ଜାରି ହୋଇଛି। ଏହି ପଦକ୍ଷେପ ଫଳରେ ଏହି ୩ ଜଣ ଆମେରିକାରେ ରଖିଥିବା କୌଣସି ପ୍ରକାର ସମ୍ପତ୍ତିକୁ ବ୍ୟବହାର କରିପାରିବେ ନାହିଁ। ଏହା ସହ ସେମାନଙ୍କ ସହିତ କୌଣସି ଆମେରିକୀୟ ନାଗରିକ ବା କମ୍ପାନୀ କାରବାର କରିପାରିବେ ନାହିଁ। ତେଣେ ବେଆଇନ ସାମଗ୍ରୀ ପରିବହନ କାରଣ ଦର୍ଶାଇ ଭେନେଜୁଏଲାର ୬ଟି ମାଲବାହୀ ଜାହାଜକୁ ଜବତ କରିଛି ଆମେରିକା।
ଭୁବନେଶ୍ବର ସତ୍ୟବିହାରରେ ଭୟଙ୍କର ଅଗ୍ନିକାଣ୍ଡ: ହୁ ହୁ ହୋଇ ଜଳିଗଲା ବାର୍
ଭୁବନେଶ୍ବର ସତ୍ୟବିହାରରେ ଭୟଙ୍କର ଅଗ୍ନିକାଣ୍ଡ । ଛକରେ ଥିବା ଏକ ବାରରେ ଭୟଙ୍କର ଅଗ୍ନିକାଣ୍ଡ। ହୁ ହୁ ହୋଇ ଜଳିଗଲା ବାର୍ । ଅଗ୍ନିଶମ ବାହିନୀର ଦୀର୍ଘ ଉଦ୍ୟମ ପରେ ନିଆଁକୁ କରାଯାଇଛି ଆୟତ୍ତ। ଚାରି ମହଲା ଉପରେ ଚାଲିଥିବା ହୁକା ବାର ସମ୍ପୂର୍ଣ୍ଣ ଜଳିଯାଇଥିବା ସୂଚନା ମିଳିଛି। ଘଟଣାରେ କେହି ମୃତାହତ ହୋଇ ନଥିବା ସୂଚନା ମିଳିଛି। ବଡ଼କଥା ହେଉଛି ହୁକ୍କା ବାରରେ ଅଗ୍ନି ନିୟନ୍ତ୍ରଣ ଲାଗି କୌଣସି ଯନ୍ତ୍ରପାତି ନଥିଲା। ଅଗ୍ନିକାଣ୍ଡ ଘଟଣାରେ ସ୍ପଷ୍ଟୀକରଣ ରଖିଛି ଅବକାରୀ ବିଭାଗ। ନୋ ଲିମିଟ ଏୟାର ରେଷ୍ଟୁରାଣ୍ଟରେ ନଥିଲା ବାର ଲାଇସେନ୍ସ । କିନ୍ତୁ ସେହି ସ୍ଥାନରେ ମଦ ବାର ସାଙ୍ଗକୁ ହୁକ୍କା ବାର ଚାଲିଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି।
ସେପଟେ ଶତ୍ରୁତା କାରଣରୁ ବାରରେ ନିଆଁ ଲଗାଇଦିଆଯାଇଥିବା ଆଶଙ୍କା କରାଯାଉଛି। କିଛିଦିନ ତଳେ ବାରକୁ ନେଇ ଗଣ୍ଡଗୋଳ ହୋଇଥିବା ଜଣାପଡିଛି। ଚାରି ମହଲା ବିଶିଷ୍ଟ ବାରରେ କିପରି ଅଗ୍ନିକାଣ୍ଡ ଘଟିଲା ତାହାର ଚାଲିଛି ଛାନବିନ। ଅଗ୍ନିକାଣ୍ଡ ଯୋଗୁ ରସୁଲଗଡ଼ଠାରୁ ପଳାଶୁଣୀ ଯାଏ ରାସ୍ତା ହୋଇଯାଇଥିଲା ଜାମ। ଅଗ୍ନିକାଣ୍ଡ ଯୋଗୁ ବିପୁଳ କ୍ଷୟକ୍ଷତି ଘଟିଥିବା ଆଶଙ୍କା କରାଯାଉଛି। ଅଗ୍ନିକାଣ୍ଡ ଘଟଣା ପରେ ସେଠାରେ ଶହ ଶହ ଲୋକ ଜମା ହୋଇଥିବା ଦେଖିବାକୁ ମିଳିଛି।
ଗତ ଡିସେମ୍ବର ୬ରେ ଗୋଆର ଏକ ନାଇଟ କ୍ଲବରେ ଭୟାବହ ଅଗ୍ନିକାଣ୍ଡ ଘଟିବା ପରେ ଓଡ଼ିଶାରେ ମଧ୍ୟ ବାର ଓ ପବର ଅଗ୍ନି ନିରାପତ୍ତା ସାର୍ଟିଫିକେଟ ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଥିଲା। ନିଜେ ଏ ସମ୍ପର୍କରେ ଅଗ୍ନିଶମ ଡିଜି ସୂଚନା ଦେଇଥିଲେ । କିନ୍ତୁ ନିର୍ଦ୍ଦେଶ ପରେ ଆଜି ଏହି ଅଘଟଣ ଅଗ୍ନିଶମ ବିଭାଗ ପାଇଁ ଚ୍ୟଲେଞ୍ଜ ସୃଷ୍ଟି କରିଛି । ଗୋଆ ବିର୍ଚ୍ଚ ବାଇ ନାଇଟ କ୍ଲବରେ ଘଟିଥିବା ଅଘଟଣରେ ଯାଇଥିଲା ୨୫ଜଣଙ୍କ ଜୀବନ।
ଆସନ୍ତା ବର୍ଷ ଫେବ୍ରୁଆରୀ ୧୨ ତାରିଖରେ ହେବ ବାଂଲାଦେଶ ନିର୍ବାଚନ
ଆସନ୍ତା ବର୍ଷ ଫେବ୍ରୁଆରୀ ୧୨ ତାରିଖରେ ହେବ ବାଂଲାଦେଶ ନିର୍ବାଚନ । ତ୍ରୟୋଦଶ ଜାତୀୟ ସଂସଦ ପାଇଁ ଫେବ୍ରୁଆରି ୧୨ ତାରିଖରେ ହେବ ନିର୍ବାଚନ। ମୁଖ୍ୟ ନିର୍ବାଚନ କମିଶନର୍ ଏହି ଘୋଷଣା କରିଛନ୍ତି। ଦେଶରେ ମୁକ୍ତ ଓ ଗଣତାନ୍ତ୍ରିକ ଭୋଟିଂ ହେବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ବିଶ୍ଵକୁ ବାଂଲାଦେଶ ଦେଖାଇବ ଯେ, ବାଂଲାଦେଶ ଗଣତନ୍ତ୍ରରେ ବିଶ୍ଵାସ କରେ। ଫେକ୍ ନ୍ୟୁଜ୍ ଓ ଗୁଜବ ପ୍ରତି ସତର୍କ ରହିବାକୁ ଲୋକଙ୍କୁ ସେ ଆହ୍ଵାନ ଦେଇଛନ୍ତି। ଏହା ଏକ ଚ୍ୟାଲେଞ୍ଜ ବୋଲି ସେ କହିଛନ୍ତି। ୩୦୦ ଆସନ ବିଶିଷ୍ଟ ସଂସଦ ପାଇଁ ଫେବ୍ରୁଆରି ୧୨ ତାରିଖରେ ନିର୍ବାଚନ ହେବ। ଡିସେମ୍ଵର ୨୯ ହେଉଛି ନାମାଙ୍କନ ଦାଖଲର ଶେଷ ଦିନ। ଜାନୁଆରି ୪ ତାରିଖ ଯାଏ ଯାଞ୍ଚ କରାଯିବ ନାମାଙ୍କନ ପତ୍ର। ଜାନୁଆରି ୨୦ ଭିତରେ ନାମାଙ୍କନ ପ୍ରତ୍ୟାହାର କରାଯାଇପାରିବ। ତା ପରେ ଆସିବ ଚୂଡ଼ାନ୍ତ ପ୍ରାର୍ଥୀ ତାଲିକା। ଫେବ୍ରୁଆରି ୧୨ ତାରିଖରେ ହେବ ନିର୍ବାଚନ। ନିର୍ବାଚନ ତାରିଖ ଘୋଷଣା ସହିତ ନିର୍ବାଚନ ପ୍ରକ୍ରିୟା ଆରମ୍ଭ ହୋଇ ଯାଇଛି। ଗତ ବର୍ଷ ଶେଖ ହସିନା ସରକାରର ପତନ ପରେ ଏହି ନିର୍ବାଚନ ହେଉଛି। ଅରାଜକତା ହେବା ପରେ ଗତ ବର୍ଷ ଅଗଷ୍ଟ ୫ ତାରିଖରେ ହସିନା ସରକାରର ପତନ ହୋଇଥିଲା। ତା ପରେ ମଧ୍ୟ ବହୁ ଦିନ ଯାଏ ଚାଲିଥିଲା ହିଂସାକାଣ୍ଡ, ହତ୍ୟା ଓ ଅରାଜକତା। ଦେଶର ଭବିଷ୍ୟତ କଣ ହେବ, ଗଣତନ୍ତ୍ର ଫେରିବ କି ନାହିଁ, କେବେ ନିର୍ବାଚନ ହେବ, ମୁକ୍ତ ଓ ଅବାଧ ନିର୍ବାଚନ ହୋଇପାରିବ ତ, ସେ ନେଇ ସନ୍ଦେହ ହୋଇଥିଲା॥ ଏବେ ନିର୍ବାଚନ ତାରିଖ ଘୋଷଣା ହେବା ସହିତ ସେସବୁ ଚର୍ଚ୍ଚାର ଅବସାନ ହୋଇଛି।
ବିଭିନ୍ନ ରାଜ୍ୟରେ SIR ଅବଧି ବଢ଼ିଲା
ବିଭିନ୍ନ ରାଜ୍ୟରେ ଏସଆଇଆର୍ ଅବଧି ବଢ଼ିିଛି। ସଂପୃକ୍ତ ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କ ଅନୁରୋଧ କ୍ରମେ ନିର୍ବାଚନ କମିଶନ ଏହି ସମୟ ବୃଦ୍ଧି କରିଛନ୍ତି। ତାମିଲନାଡୁ, ଗୁଜରାଟ, ମଧ୍ଯପ୍ରଦେଶ, ଛତିଶଗଡ଼, ଆଣ୍ଡାମାନ ନିକୋବର ଓ ଉତ୍ତର ପ୍ରଦେଶ ପାଇଁ ଆଜି ଥିଲା ଶେଷ ଦିନ। କିନ୍ତୁ ନିର୍ବାଚନ କମିଶନ ଏହାକୁ ବୃଦ୍ଧି କରିଛନ୍ତି। ତାମିଲନାଡୁ ଓ ଗୁଜରାଟରେ ଏହା ୧୪ ତାରିଖରେ ଶେଷ ହେବ। ସଂଶୋଧିତ ତାଲିକା ପ୍ରକାଶ ପାଇବ ୧୯ ତାରିଖରେ। ସେହପରି ମଧ୍ୟପ୍ରଦେଶ, ଛତିଶଗଡ଼ ଓ ଆଣ୍ଡାମାନ ନିକୋବଲରେ ଏହା ଶେଷ ହେବ ୧୮ ତାରିଖରେ। ସଂଶୋଧିତ ତାଲିକା ପ୍ରକାଶ ପାଇବ ୧୯ ତାରିଖରେ। ଉତ୍ତରପ୍ରଦେଶରେ ଏସଆଇଆର୍ ଶେଷ ହେବ ୨୬ ତାରିଖରେ। ସଂଶୋଧିତ ଭୋଟର ତାଲିକା ପ୍ରକାଶ ପାଇବ ଡିସେମ୍ବର ୩୧ ତାରିଖରେ।
ଓଡ଼ିଶାର ପର୍ଯ୍ୟଟନ ବିକାଶ ନେଇ ରାଜ୍ୟସଭାରେ ସାଂସଦ ମାନସ ମଙ୍ଗରାଜଙ୍କ ପ୍ରଶ୍ନ
ରାଜ୍ୟରେ ପର୍ଯ୍ୟଟନ ଭିତ୍ତିଭୂମି ବିକାଶ ପାଇଁ ରାଜ୍ୟ ସରକାର କେନ୍ଦ୍ରକୁ କଣ ପ୍ରସ୍ତାବ ଦେଇଛନ୍ତି? ସ୍ବଦେଶ ଦର୍ଶନ, ପ୍ରସାଦ ଯୋଜନାରେ ଓଡ଼ିଶାକୁ କେନ୍ଦ୍ର ସରକାର କେତେ ପାଣ୍ଠି ଦେଇଛନ୍ତି? ରାଜ୍ୟର ପର୍ଯ୍ୟଟନ ଭିତ୍ତିଭୂମି ବିକାଶକୁ ତ୍ବାରାନ୍ବିତ କରିବାକୁ କେନ୍ଦ୍ର ସରକାରଙ୍କ ପଦକ୍ଷେପ କଣ? ରାଜ୍ୟର ପର୍ଯ୍ୟଟନ ବିକାଶ ନେଇ ଆଜି ରାଜ୍ୟସଭାରେ ବିଜେଡି ସାଂସଦ ମାନସ ମଙ୍ଗରାଜ କେନ୍ଦ୍ର ପର୍ଯ୍ୟଟନ ମନ୍ତ୍ରୀ ଗଜେନ୍ଦ୍ର ସିଂ ଶେଖାୱାତଙ୍କୁ ଅଣତାରକା ପ୍ରଶ୍ନ ପଚାରିଥିଲେ। ଉତ୍ତରରେ କେନ୍ଦ୍ରମନ୍ତ୍ରୀ କହିଛନ୍ତି, ହୀରାକୁଦ ଓ ସାତକୋଶିଆ ପର୍ଯ୍ୟଟନ ସ୍ଥଳୀର ବିକାଶ ପାଇଁ ୨୦୨୪-୨୫ ଆର୍ଥିକ ବର୍ଷ ସୁଦ୍ଧା କେନ୍ଦ୍ର ସରକାର ୧୩୧ କୋଟି ୯୨ ଲକ୍ଷ ଟଙ୍କା ପ୍ରଦାନ କରିଛନ୍ତି। ଭାରତ ସରକାର ରାଜ୍ୟମାନଙ୍କ ପର୍ଯ୍ୟଟନ ସ୍ଥଳୀର ଭିତ୍ତିଭୂମି ବିକାଶ ପାଇଁ ସ୍ବତନ୍ତ୍ର ଆର୍ଥିକ ସହାୟତା ପାଣ୍ଠି ଯୋଗାଇଥାନ୍ତି। ସ୍ବଦେଶ ଦର୍ଶନ ଟୁ-ପଏଣ୍ଟ ଜିରୋ ବା ଏସଡି-୨ ଯୋଜନା ଅନ୍ତର୍ଗତ ରାଜ୍ୟ ପଠାଇଥିବା ବିସ୍ତୃତ ପ୍ରକଳ୍ପ ଆଧାରରେ କେନ୍ଦ୍ର ସହାୟତା ପାଣ୍ଠି ପ୍ରଦାନ କରୁଛନ୍ତି। ଓଡ଼ିଶା ସରକାରଙ୍କ ପ୍ରସ୍ତାବ ଆଧାରରେ ସିବିଡିଡି ଓ ପ୍ରସାଦ ଯୋଜନାରେ ଅନେକ ପର୍ଯ୍ୟଟନ ସ୍ଥଳୀର ବିକାଶ କାମ ଚାଲୁ ରହିଛି। ନିୟମିଚ ବ୍ୟବଧାନରେ କେନ୍ଦ୍ର ସରକାର ରାଜ୍ୟମାନଙ୍କରେ ଚାଲୁ ରହିଥିବା ପର୍ଯ୍ୟଟନ ସ୍ଥଳୀର ଭିତ୍ତିଭୂମି ବିକାଶ ନେଇ ସମୀକ୍ଷା କରୁଛନ୍ତି।
ଡଲାର ତୁଳନାରେ ଭାରତୀୟ ଟଙ୍କା ମୂଲ୍ୟରେ ରେକର୍ଡ ହ୍ରାସ
ଡଲାର ତୁଳନାରେ ଭାରତୀୟ ଟଙ୍କା ତଳିତଳାନ୍ତ। ଆଜି ଲକ୍ଷ୍ମୀଙ୍କ ବାରରେ ଟଙ୍କା ମୂଲ୍ୟରେ ରେକର୍ଡ ହ୍ରାସ। ଗୋଟିଏ ଡଲାରର ମୂଲ୍ୟ ହୋଇଛି ୯୦ ଟଙ୍କା ୫୨ ପଇସା। ଗୋଟିଏ ପଟେ ଆମେରିକା ସହ ଭାରତ ଟାରିଫ ଚୁକ୍ତିନାମା ନେଇ ଆମେରିକାର କୂଟନୈତିକ ଅଧିକାରୀମାନେ ଦିଲ୍ଲୀରେ ଆଲୋଚନା ଲାଗି ପହଞ୍ଚିଥିବା ବେଳେ ଟଙ୍କା ମୂଲ୍ୟ ହ୍ରାସ ଭାରତୀୟ ଆମଦାନୀ ବଜାରକୁ ପ୍ରଭାବିତ କରିଛି। ତୈଳ ଓ ସୁନା ଆମଦାନୀ ଉପରେ ଭାରତ ସରକାରଙ୍କୁ ଅଧିକ ଟଙ୍କା ଗଣିବାକୁ ପଡ଼ିବ। ଭାରତୀୟ ମୁଦ୍ରାର ବିନିମୟ ମୂଲ୍ୟ ଦିନକୁ ଦିନ ହ୍ରାସ ହେଉଥିବାରୁ ଭାରତୀୟ ରିଜର୍ଭ ବ୍ୟାଙ୍କ ଉପରେ ଚାପ ବଢିବାକୁ ଲାଗିଛି। କେବଳ ୨୦୨୫ରେ ଡଲାର ତୁଳନାରେ ଭାରତୀୟ ମୁଦ୍ରା ୫ ପ୍ରତିଶତ ହ୍ରାସ ପାଇଲାଣି। କେବଳ ଟଙ୍କା ନୁହେଁ ତୁର୍କୀର ଲିରା ଓ ଆର୍ଜେଣ୍ଟିନାର ପେସୋର ବି ଘାଟା ଘଟିଛି। ଏହି ଦୁଇ ରାଷ୍ଟ୍ରରେ ମୁଦ୍ରାର ମୂଲ୍ଯ ୭ ପ୍ରତିଶତ ହ୍ରାସ ପାଇଛି। ଭାରତୀୟ ସାମଗ୍ରୀ ଉପରେ ୫୦ ପ୍ରତିଶତ ଆମେରିକୀୟ ଟାରିଫ ଏହି ଘାଟାର ପ୍ରମୁଖ କାରଣ ହୋଇଥିବା କୁହାଯାଉଛି।
ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ସହ ଭାରତର ସକରାତ୍ମକ କଥାବାର୍ତ୍ତାର ଅଭାବର ପ୍ରଭାବ ଭାରତୀୟ ମୁଦ୍ରା ଉପରେ ପଡିଥିବା ସୂଚନା ମିଳିଛି। ୨୦୧୧ରେ ଡଲାର ଅନୁପାତରେ ଭାରତୀୟ ମୁଦ୍ରାର ମୂଲ୍ୟ ୫୦ ପ୍ରତିଶତ ବଢିଛି। ଡଲାର ଓ ଭାରତୀୟ ମୁଦ୍ରା ମଧ୍ୟରେ ସମନ୍ବୟ ରକ୍ଷା କରିବା ଲାଗି ରିଜର୍ଭ ବ୍ୟାଙ୍କ ଗଭର୍ଣ୍ଣର ସଞ୍ଜୟ ମାଲହୋତ୍ରା ଓ ଆରବିଆଇ ଅଧିକାରୀମାନେ ଆଲୋଚନା କରୁଥିବା ସୂଚନା ମିଳିଛି। ଉଭୟ ଆଭ୍ୟନ୍ତରୀଣ ଓ ଅନ୍ତର୍ଜାତୀୟ ବଜାରରେ ଆରବିଆଇର ହସ୍ତକ୍ଷେପ ପରେ ହିଁ ମୁଦ୍ରା ମୂଲ୍ଯ ସ୍ଥିତିରେ ସୁଧାର ଆସିବା କୁହାଯାଉଛି। ମୁଦ୍ରା ମୂଲ୍ୟରେ ସ୍ଥିରତା ଆଣିବା ଲାଗି ସିଙ୍ଗାପୁର, ଦୁବାଇ ଓ ଲଣ୍ଡନରେ କାର୍ଯ୍ୟରତ ବିଭିନ୍ନ ପ୍ରମୁଖ ବ୍ୟାଙ୍କ ସହ ବ୍ୟାଙ୍କ ଫର ଇଣ୍ଟରନ୍ୟାସନାଲ ସେଟେଲମେଣ୍ଟ ଜରିଆରେ ଆରବିଆଇ ହସ୍ତକ୍ଷେପ କରୁଥିବା ଜଣାଯାଇଛି। ସେପଟେ ଦିଲ୍ଲୀ ବାଣିଜ୍ୟଭବନସ୍ଥିତ କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରାଳୟରେ ପହଞ୍ଚିଛନ୍ତି ଆମେରିକାର ବାଣିଜ୍ୟ ପ୍ରତିନିଧି। ଦୁଇ ଦେଶ ମଧ୍ୟରେ ଉଚ୍ଚସ୍ତରୀୟ ଆଲୋଚନା ଲାଗି ଆମେରିକାର ବାଣିଜ୍ୟ ସଂକ୍ରାନ୍ତ ଡେପୁଟୀ ଆମ୍ବାସାଡର ରିକ ସୁଇଜର ଭାରତ ଆସିଛନ୍ତି।
ଚିନ୍ତା ବଢ଼ାଉଛି ଦିଲ୍ଲୀ ପ୍ରଦୂଷଣ: ସଂସଦ ଅଧିବେଶନକୁ ଅନ୍ୟତ୍ର ସ୍ଥାନାନ୍ତର କରିବାକୁ ରାଜ୍ୟସଭା ସାଂସଦ ମାନସ ମଙ୍ଗରାଜଙ୍କ ଦାବି
ଆଖିରୁ ନିଦ ହଜାଉଛି ଦିଲ୍ଲୀ ପ୍ରଦୂଷଣ। ଦିନକୁ ଦିନ ବିଗିଡୁଛି ସ୍ଥିତି। ଏକ୍ୟୁଆଇ ରହୁଛି ୪୦୦ରୁ ୫୦୦। ଦିଲ୍ଲୀବାସୀ ଜୀବନ ମରଣ ସହ କରୁଛନ୍ତି ସଂଘର୍ଷ। ପିଲାଙ୍କଠାରୁ ଆରମ୍ଭ କରି ବୃଦ୍ଧବୃଦ୍ଧାଙ୍କ ସ୍ବାସ୍ଥ୍ୟ ସମସ୍ୟା ହେଉଛି ସାଂଘାତିକ। ସପ୍ତାହ ସପ୍ତାହ ଧରି ଲାଗି ରହିଛି ଅବସ୍ଥା। ସେପଟେ ପ୍ରଦୂଷଣ ଲାଗି ଗଭୀର ଚିନ୍ତାବ୍ୟକ୍ତ କରିଛନ୍ତି ରାଜ୍ୟସଭା ସାଂସଦ ମାନସ ମଙ୍ଗରାଜ। ଏପରିକି ସଂସଦର ଶୀତ ଓ ବଜେଟ ଅଧିବେଶନକୁ ଅନ୍ୟତ୍ର ସ୍ଥାନାନ୍ତର କରିବା ଲାଗି ସେ ଦାବି କରିଛନ୍ତି। ଓଡ଼ିଶା ଭଳି ଏକ ପ୍ରାକୃତିକ ବିପର୍ଯ୍ୟୟ ରାଜ୍ୟରୁ ଆସିଥିବାରୁ ଦିଲ୍ଲୀ ପ୍ରଦୂଷଣର ଅବସ୍ଥାକୁ ବୁଝିପାରୁଛି ବୋଲି କହିଛନ୍ତି ସାଂସଦ । ପ୍ରତିବର୍ଷ ଏପରି ସ୍ଥିତି ସୃଷ୍ଟି ହେଉଥିବାବେଳେ ସେହି ସମୟରେ ସଂସଦର ଅଧିବେଶନ ଚାଲୁଥିବାରୁ ସାଂସଦ, ଅଫିସର, ଡ୍ରାଇଭର, ପରିମଳ କର୍ମଚାରୀଙ୍କୁ ପ୍ରଦୂଷଣ ସହ ଯୁଝିବାକୁ ପଡୁଛି । ଯେପର୍ଯ୍ୟନ୍ତ ଦିଲ୍ଲୀ ନିରାପଦ ସାବ୍ୟସ୍ତ ନହୋଇଛି ସେ ଯାଏଁ ଏହି ଦୁଇ ଅଧିବେଶନକୁ ଅନ୍ୟ ସହରକୁ ସ୍ଥାନାନ୍ତର ଲାଗି ସେ ପ୍ରସ୍ତାବ ଦେଇଛନ୍ତି। ଭୁବନେଶ୍ବର ହାଇଦ୍ରାବାଦ, ଗାନ୍ଧୀନଗର, ବେଙ୍ଗାଲୁରୁ, ଡେରାଡୁନ ପରି ସହରର ବି ଉଦାହରଣ ଦେଇଛନ୍ତି। ଏଥିରେ କୌଣିସି ରାଜନୈତିକ ଉଦ୍ଦେଶ୍ୟ ନାହିଁ । ସଂସଦ ନେତୃତ୍ବ ନେବା ଦରକାର ।
ଦିଲ୍ଲୀରେ ୧୦ ବର୍ଷ ଧରି ଏହି ଅବସ୍ଥା ଜାରି ରହିଛି। ଏଥିଲାଗି ଦିଲ୍ଲୀ ପ୍ରଶାସନ ସମେତ ବିଭିନ୍ନ ଆଇନ କାର୍ଯ୍ୟକାରୀ ସଂସ୍ଥାଙ୍କୁ ପ୍ରମୁଖ ଭୂମିକା ଗ୍ରହଣ କରିବାକୁ ପଡିବ ବୋଲି କହିଛନ୍ତି ବିଶେଷଜ୍ଞ। ଦିଲ୍ଲୀରେ ପ୍ରଦୂଷଣ ଯୋଗୁ ଶ୍ବାସପ୍ରଶ୍ବାସ ଜନିତ ଅନେକ ରୋଗ ହେଉଛି। ଏଥିଲାଗି ଜରୁରୀ ପଦକ୍ଷେପ ନେବା ଦରକାର। ସ୍ବଚ୍ଛ ପରିବେଶ ବର୍ତ୍ତମାନ ଜରୁରୀ। ରାଜଧାନୀରେ ପ୍ରଦୂଷଣର ସ୍ଥାୟୀ ସମାଧାନ ଲାଗି ପ୍ରୟାସ କରାଯାଉନାହିଁ ବୋଲି କହିଛନ୍ତି ଆପ। ପ୍ରତିବର୍ଷ ବିଗିଡୁଛି ଦିଲ୍ଲୀ ସ୍ଥିତି। ଦୃଶ୍ୟମାନ ଦୂରତା ହ୍ରାସ ସହ ରୋଗରେ ସଢୁଛନ୍ତି ବାସିନ୍ଦା। ଜାତୀୟ ରାଜଧାନୀରେ ଜନଜୀବନର ସୁରକ୍ଷା ହେଉଛି ପ୍ରାଥମିକ କର୍ତ୍ତବ୍ୟ।