ଭେନେଜୁଆଲା ଉପରେ ଆମେରିକାର ଆକ୍ରମଣ ପରେ ୫ ଦେଶର ମୁଖିଆଙ୍କ ମଧ୍ୟରେ କୋକୁଆ ଭୟ
ନନ୍ଦିଘୋଷ ବ୍ୟୁରୋ: ଭେନେଜୁଆଲା ରାଷ୍ଟ୍ରପତି ନିକୋଲସ ମାଦୁରୋଙ୍କ ବିରୋଧରେ ଆମେରିକାର ସାମରିକ ଅଭିଯାନ ପାରେ ବିଶ୍ବର ୫ ଦେଶର ରାଷ୍ଟ୍ରପତିଙ୍କ ମନରେ କୋକୁଆ ଭୟ ସୃଷ୍ଟି ହୋଇଛି । ଏଥିରେ ଇରାନର ସୁପ୍ରିମ ଲିଡର ଅଲ୍ଲୀ ଖାମେନେଇ ଏବଂ ତାଲିବାନର ହବିତୁଲ୍ଲାହ ଅଖୁନଜାଦାଙ୍କ ନାଁ ଆଗରେ ରହିଛି । ଆମେରିକା କାର୍ଯ୍ୟାନୁଷ୍ଠାନରୁ ନିଜକୁ ଯେକୌଣସି ପ୍ରକାରେ ବଞ୍ଚାଇବାକୁ ଅଖୁନଜାଦା କାନ୍ଧାରରେ ଅଣ୍ଡରଗ୍ରାଉଣ୍ଡ ହୋଇଯାଇଛନ୍ତି । ସେହିପରି ମେକ୍ସିକୋ ରାଷ୍ଟ୍ରପତି ପ୍ରଥମ କଭରରେ ୧୦ ମହିଳା ସୁରକ୍ଷା ଅଧିକାରୀଙ୍କୁ ନିଜ ସହ ରଖିଛନ୍ତି । କଲୋମ୍ବିଆ ରାଷ୍ଟ୍ରପତି ଆମେରିକା ଅପରେସନ ବିରୋଧରେ ଗରିଲା ଯୁଦ୍ଧ କରିବାକୁ ଘୋଷଣା କରିଛନ୍ତି । ଯେକୌଣସି ସ୍ଥିତିର ମୁକାବିଲା କରିବା ପାଇଁ ନିଜ ପାଖରେ ମାରଣାସ୍ତ୍ର ରଖିଛନ୍ତି । ଇରାନ ସୁପ୍ରିମ ଲିଡର ପ୍ଲାନ-ବି ପ୍ରସ୍ତୁତ କରିସାରିଥିବା କୁହାଯାଉଛି । ଆମେରିକା ହାତରୁ ନିଜକୁ ସୁରକ୍ଷିତ ରଖିବାକୁ ଅୟାତୁଲ୍ଲାହ ଅଲ୍ଲୀ ଖାମେନେଇ ଋଷ ପଳାଇ ଯିବାକୁ ଯୋଜନା ରଖିଛନ୍ତି ।
ଆମେରିକା ଭୟରେ ୫ ରାଷ୍ଟ୍ରର ମୁଖିଆଙ୍କ ସ୍ଥିତି କେମିତି ଅଛି ଆସନ୍ତୁ ଜାଣିବା…
ଆଫଗାନିସ୍ତାନ
ତାଲିବାନ ସୁପ୍ରିମ ଲିଡର ଅଖୁନଜାଦା ମଧ୍ୟ ଆମେରିକା ରାଡରରେ ଅଛନ୍ତି । ଅଖୁନଜାଦାଙ୍କୁ ଆମେରିକା ଆତଙ୍କବାଦୀ ଘୋଷଣା କରିଛି । ବଗରାମ ଏୟାରବେସକୁ ନେଇ ଆମେରିକା ନିୟମିତ ତାଲିବାନ ଉପରେ ଚାପ ପକାଉଚି । ହେଲେ ଏହି ଏୟାରବେସକୁ ତାଲିବାନ କୌଣସି ସ୍ଥିତିରେ ଆମେରିକାକୁ ଦେବାକୁ ପ୍ରସ୍ତୁତ ନାହିଁ । ମାଦୁରୋଙ୍କ ଗିରଫଦାରୀ ପାରେ ଅଖୁନଜାଦା ଅଣ୍ଡର ଗ୍ରାଉଣ୍ଡ ହୋଇଯାଇଛନ୍ତି ।
ଜେନିଭାରେ ତାଲିବାନ ପ୍ରତିନିଧି ବୟାନ ଦେଇ କହିଛନ୍ତି, ଆମ ଦେଶରେ ଆମେରିକା ଡ୍ରୋନ ଉଡୁଛନ୍ତି । ଏସବୁ ଡ୍ରୋନ ଆମ ନେତା ଅଖୁନଜାଦାଙ୍କୁ ରେକି କରିବାକୁ ଲଗାଯାଇଛି । ଏହି କାରଣରୁ ଆମ ନେତା ଲୁଚିଯାଇଛନ୍ତି । ସୂଚନାଯୋଗ୍ୟ, ଅଖୁନଜାଦା କାନ୍ଧାରରେ ରହିଥାନ୍ତି । ତାଲିବାନ ସିକ୍ରେଟ ଫୋର୍ସ ତାଙ୍କ ସୁରକ୍ଷାରେ ରହିଥାନ୍ତି । ସାଉଥ ଏସିଆ ଟେରୋରିଜିମ ପୋର୍ଟାଲ ଅନୁସାରେ ଅଖୁନଜାଦା ସୁରକ୍ଷିତ କମ୍ପାଉଣ୍ଡରେ ରହିଥାନ୍ତି । ଏହା ପାହାଡ଼ର ବଙ୍କର ଶେପରେ ନିର୍ମାଣ ହୋଇଛି । ତାଙ୍କୁ ସୁରକ୍ଷା ପାଇଁ ୧୦୦୦ ଲୋକ ନିୟୋଜିତ ଅଛନ୍ତି । ଏମାନେ ସିଫ୍ଟରେ କାମ କରିଥାନ୍ତି ।
ମେକ୍ସିକୋ
ଆମେରିକା ଟାର୍ଗେଟରେ ମେକ୍ସିକୋ ରାଷ୍ଟ୍ରପତି ଶିନବାମ ମଧ୍ୟ ଅଛନ୍ତି । ମେକ୍ସିକୋ ଜରିଆରେ ଆମେରିକାକୁ ଡ୍ରଗ୍ସ ଚାଲାଣ ହୋଇଥାଏ ବୋଲି ଟ୍ରମ୍ପ ଅଭିଯୋଗ କରି ଆସୁଛନ୍ତି । ମେକ୍ସିକୋ ରାଷ୍ଟ୍ରପତିଙ୍କ ସୁରକ୍ଷାରେ ୧୦ ଜଣ ମହିଳା ଯବାନଙ୍କ ଏକ ଟିମକୁ ନିୟୋଜିତ କରାଯାଇଛି । ଏହାବାଦ ସେକେଣ୍ଡାରୀ କଭରରେ ୧୦ ପୁରୁଷ ଯବାନ ନିୟୋଜିତ ହୋଇଛନ୍ତି । ମେକ୍ସିକୋ ଆମେରିକା ପ୍ରଭାବର ପ୍ରତିହିତ କରିବାକୁ ନିକଟରେ ରାଷ୍ଟ୍ରୀୟ ସୁରକ୍ଷା ଆଇନ ପାରିତ କରିଛି । ଏହା ଜରିଆରେ ସମସ୍ତ ସୈନ୍ୟବଳକୁ ଏକାଠି କରାଯାଇଛି ।
କଲୋମ୍ବିଆ
କଲୋମ୍ବିଆ ଉପରେ ମଧ୍ୟ ଆମେରିକା ଆକ୍ରମଣର ଭୟ ଘାରିଛି । ଭେନେଜୁଆଲା ପରି କଲୋମ୍ବିଆକୁ ମଧ୍ୟ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଧମକ ଦେଇ ସାରିଛନ୍ତି । କଲୋମ୍ବିଆ ରାଷ୍ଟ୍ରପତି ଗେସ୍ତୋଓ୍ବା ପେଟ୍ରୋ କହିଛନ୍ତି, ତାଙ୍କ ଦେଶ ଆମେରିକା ସହ ଗରିଲା ଯୁଦ୍ଧ କରିବ । ସେ ନିଜେ ଅସ୍ତ୍ର ଉଠାଇବେ ବୋଲି ମଧ୍ୟ କହିଛନ୍ତି । ଆମେରିକାକୁ ଅଟକାଇବା ପାଇଁ ଭେଜେନୁଆଲା ସୀମାରେ କଲୋମ୍ବିଆ ରାଡର ସିଷ୍ଟମ ଆକ୍ଟିଭ କରି ଦେଇଛି ।
ଇରାନ
ଭେନେଜୁଆଲା ଉପରେ ଆମେରିକା ଆକ୍ରମଣ ପରେ ଇରାନ ସୁପ୍ରିମ ଲିଡର ଅୟାତୁଲ୍ଲାହ ଅଲ୍ଲୀ ଖାମେନେଇ ସତର୍କ ହୋଇଯାଇଛନ୍ତି । ଖାମେନେଇଙ୍କ ସୁରକ୍ଷା ୟୁନିଟ-୧ କରିଥାଏ । ଏହାର ନାଁ ବଲୀ-ଏ-ଉମ୍ର ଫୋର୍ସ । ଏହା ଇରାନର କୁଖ୍ୟାତ ଇସଲାମିକ ରିବୋନ୍ୟୁସନାରୀ ଗାର୍ଡ ଫୋର୍ସ (IRGC)ର ସବୁଠାରୁ ପ୍ରମୁଖ ଓ ରହସ୍ୟମୟ ୟୁନିଟ ଅଟେ । ୧୯୮୦ ଦଶକ ମଧ୍ୟରେ ଏହି ୟୁନିଟର ସ୍ଥାପନା ହୋଇଥିଲା । ବର୍ତ୍ତମାନ ଏଥିରେ ଅତ୍ୟାଧୁନିକ ଟ୍ରେନିଂ ନେଇଥିବା ୧୨ ହଜାର ସୈନିକ ଅଛନ୍ତି । ଏମିତି ବି ଶୁଣିବାକୁ ମିଳୁଛି, ଯଦି ଆମେରିକା ଆକ୍ରମଣ କଲା ତେବେ ଖାମେନେଇ ଋଷ ପଳାଇବେ । ଦ ଟାଇମ୍ସ ମ୍ୟାଗେଜିନ ଅନୁସାରେ, ଖାମେନେଇ ମସ୍କୋ ଯିବା ନେଇ ଚର୍ଚ୍ଚା ହେଉଛି । ହେଲେ ଇରାନ ତରଫରୁ ଏନେଇ ସରକାରୀ ସ୍ତରରେ କୌଣସି ସୂଚନା ଦିଆଯାଇନି ।
କ୍ୟୁବା
ଭେନେଜୁଆଲା ଆକ୍ରମଣ ପରେ ସବୁଠାରୁ ଅଧିକ ଟେନସନରେ ରହିଛନ୍ତି କ୍ୟୁବା ରାଷ୍ଟ୍ରପତି । କାରଣ ମାଦୁରୋଙ୍କ ସୁରକ୍ଷା କ୍ୟୁବାର ସୁକ୍ୟୁରିଟି ଟିମ୍ କରୁଥିଲା । ତଥ୍ୟ ଅନୁସାରେ ମାଦୁରୋଙ୍କୁ ବଞ୍ଚାଇବାକୁ କ୍ୟୁବାର ୩୨ ଯବାନଙ୍କ ମୃତ୍ୟୁ ଘଟିଥିଲା । କ୍ୟୁବା ରାଷ୍ଟ୍ରପତି ଡିୟାଜ-କୋନଲଙ୍କ ସୁରକ୍ଷା ମଧ୍ୟ ଏହି ଟିମ୍ କରୁଛି । କ୍ୟୁବା ରାଷ୍ଟ୍ରପତିଙ୍କ ଫାଷ୍ଟ କଭରରେ ସବୁବେଳେ ୮ ଜଣ ସୁରକ୍ଷାକର୍ମୀ ରହିଥାନ୍ତି ।
