spot_img
Home Blog Page 1442

ଦିଲ୍ଲୀରେ ଓଡିଆ ଝିଅକୁ ଗଣବଳାତ୍କାର ଘଟଣା : କେନ୍ଦ୍ର ଓ ରାଜ୍ୟ ସରକାରଙ୍କୁ ଟାର୍ଗେଟ କଲେ ରାଜ୍ଯସଭା ସାଂସଦ ଶୁଭାଶିଷ ଖୁଣ୍ଟିଆ

ନନ୍ଦିଘୋଷ ବ୍ୟୁରୋ: ଦିଲ୍ଲୀରେ ଓଡିଆ ଝିଅକୁ ଗଣବଳାତ୍କାର ଘଟଣାରେ ଉଭୟ କେନ୍ଦ୍ର ଓ ରାଜ୍ଯ ସରକାରଙ୍କୁ ଟାର୍ଗେଟ କରିଛନ୍ତି ବିଜେଡି ରାଜ୍ଯସଭା ସାଂସଦ ଶୁଭାଶିଷ ଖୁଣ୍ଟିଆ । କେନ୍ଦ୍ର ଗୃହ ବିଭାଗର ନାକ ତଳେ ଏପରି ଏକ ସମ୍ବେଦନଶୀଳ ଘଟଣା ଘଟିଗଲା । ସରାଇ କାଲେ ଖାନରେ ୩୪ ବର୍ଷ ବୟସ୍କ ଓଡିଆ ଯୁବତୀଙ୍କୁ ଗଣବଳାତ୍କାର କରାଗଲା । ସେ ଏବେ ଗୁରୁତର ଅବସ୍ଥାରେ ଏମସରେ ଚିକିତ୍ସାଧୀନ । ଅବସ୍ଥା ଏବେ ବି ଉଦବେଗଜନକ । ଯୁବତୀ ଜଣକ ମୃତ୍ଯୁ ସହ ସଂଗ୍ରାମ କରୁଛନ୍ତି । ଘଟଣାରେ ପୋଲିସ ଏପର୍ଯ୍ୟନ୍ତ କାହାରିକୁ ଗିରଫ କରିନାହିଁ । ଏପରି ସ୍ଥିତିରେ ମୁଖ୍ଯମନ୍ତ୍ରୀ ମୋହନ ମାଝୀ ଦୁର୍ଗା ପୂଜା ଆନନ୍ଦରେ ମାତିଛନ୍ତି । ଏପର୍ଯ୍ୟନ୍ତ ଡବଲ ଇଞ୍ଜିନ ସରକାର କିମ୍ବା ବିଜେପି ପକ୍ଷରୁ ଗୋଟିଏ ଧାଡି ବି ପ୍ରତିକ୍ରିୟା ରଖାଯାଇନି ।ଏଥିରୁ ଯାହା ଜଣାପଡୁଛି ରାଜ୍ଯ ସରକାର ଘଟଣାକୁ ନେଇ ଚିନ୍ତିତ ନାହାଁନ୍ତି । ଏପରି ଏକ ସମ୍ବେଦନଶୀଳ ଘଟଣାକୁ ନଜର କରିନାହାଁନ୍ତି । ଏହା କଣ ଓଡିଆ ଅସ୍ମିତା ବୋଲି ରାଜ୍ଯ ସରକାର ଓ ବିଜେପିକୁ ପ୍ରଶ୍ନ କରିଛନ୍ତି ସାଂସଦ ଶୁଭାଶିଷ ଖୁଣ୍ଟିଆ । ଏହି ଘଟଣାରେ ଟିକିନିଖ ତଦନ୍ତ ସହ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଶୁଭାଶିଷ । ପୀଡିତାଙ୍କୁ ନ୍ଯାୟ ମିଳିବା ଉଚିତ ଏବଂ ଏହାସହ ତାଙ୍କୁ ସମସ୍ତ ସହଯୋଗ ଓ ଚିକିତ୍ସା ମିଳିବା ଉଚିତ ବୋଲି ଦାବି କରିଛନ୍ତି ଶୁଭାଶିଷ ।

ଘରେ ପଶିଲେ, ସିସିଟିଭିରେ ଶାଢ଼ୀ ପକାଇ ଲୁଟିଲେ

ଉଦଳା: ଚୋରି କରିବାକୁ ପାଇଁ ସିସିଟିଭିକୁ ଶାଢ଼ୀ ପିନ୍ଧାଇଲେ ଲୁଟେରା । ଏମିତି ଘଟଣା ଘଟିଛି ଉଦଳା ଥାନା ଏନଏସି ୪ ନମ୍ବର ଓ୍ବାର୍ଡରେ । ଲୁଟେରା ଦଳ ଘରର କବାଟ ଭାଙ୍ଗି ଘରେ ପଶିଲେ । ଏକ ଶାଢ଼ୀରେ ଗୁଡେଇ ହୋଇ ଭିତରକୁ ଯିବା ପରେ ବାଡିରେ ଶାଢ଼ୀକୁ ସିସିଟିଭି ଉପରେ ପକାଇ ଲୁଟିଲେ ।

ସିସିଟିଭିରୁ ବର୍ତ୍ତିବା ପାଇଁ ଚୋରଙ୍କ ଚାଲାଖି । ଘର ଭିତରେ ପଶିବା ସହ ସିସିଟିଭି ଉପରେ ଶାଢ଼ୀ ଢ଼ାଙ୍କି ଲୁଟ କରିଛନ୍ତି । ଗଡରେଜ ଓ ଆଲମାରୀ ଭାଙ୍ଗି ନଗଦ ଟଙ୍କା ସହ ଲକ୍ଷାଧିକ ଟଙ୍କାର ସୁନା ଅଳଙ୍କାର ଲୁଟି ନେଇଛନ୍ତି । ଲୁଟ କରିବା ପରେ ଦୁର୍ବୃତ୍ତମାନେ ଗୋଟିଏ ସିସିଟିଭି ଭାଙ୍ଗି ଦେବା ସହ ଅନ୍ୟ ଦୁଇଟିର ମୁହଁକୁ ବୁଲାଇ ଦେଇଛନ୍ତି ।

ଖବର ପାଇବା ପରେ ଉଦଳା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏହାସହ ପୋଲିସ ଏକ ଲୁଟ ମାମଲା ରୁଜୁ କରିଛି ।

ରେରା ଆଇନରେ ହେବ ପରିବର୍ତ୍ତନ: ରାଜସ୍ଵ ମନ୍ତ୍ରୀ

ଭୁବନେଶ୍ବର: ରେରା ଆଇନରେ ହେବ ପରିବର୍ତ୍ତନ । ଆଲୋଚନା ପରେ ନିଆଯିବ ନିଷ୍ପତ୍ତି । ଅସୁବିଧା ସମୟରେ ସମସ୍ତ ଜମି ବିକ୍ରି କରିବାର ଆବଶ୍ଯକତା ନାହିଁ । ଜମିର କିଛି ଭାଗ ମଧ୍ୟ ବିକ୍ରି କରି ହେବ । ଏପରି ସୂଚନା ଦେଇଛନ୍ତି ରାଜସ୍ଵ ମନ୍ତ୍ରୀ ସୁରେଶ ପୂଜାରୀ । ଏହାସହ କାମ ନଥାଇ ବାରମ୍ବାର ଅଫିସକୁ ଆଓିଲେ ଦଲାଲ ବୋଲି ବିଚେଚନା କରାଯିବ ବୋଲି କହି ଚେତାବନୀ ଦେଇଛନ୍ତି ମନ୍ତ୍ରୀ ।

ଆଜି ସମ୍ବଲପୁରରେ ଡିଏସଆର୍ ଅଫିସ ପରିଦର୍ଶନ କରିଥିଲେ ମନ୍ତ୍ରୀ । ଏହି ସମୟରେ ସେ କହିଛନ୍ତି, କାମ ନ ଥାଇ ବାରମ୍ବାର ଅଫିସକୁ ଆସିଲେ ଦଲାଲ ବୋଲି ଧରାଯିବ । ସିସିଟିଭି ଫୁଟେଜ ଆଧାରରେ ଫଟୋ ଚିହ୍ନଟ କରି ଡିଏସଆର୍ ଅଫିସ କାନ୍ଥରେ ଲଗାଯିବ । ମନ୍ଦ ଉଦ୍ଦେଶ୍ୟ ରଖି ସେବା ଦେବାରେ ଅବହେଳା କଲେ ଓ ପ୍ରମାଣ ମିଳିଲେ ତୁରନ୍ତ କାର୍ଯ୍ଯାନୁଷ୍ଠାନ ହେବ । ଲୋକଙ୍କୁ ରାଜସ୍ବ ସେବା ଦେବାରେ ଅବହେଳା କଲେ କର୍ମଚାରୀଙ୍କ ବିରୋଧରେ କାର୍ଯ୍ଯାନୁଷ୍ଠାନ ହେବ ବୋଲି ମଧ୍ୟ ମନ୍ତ୍ରୀ କହିଛନ୍ତି । ଅଧିକାରୀଙ୍କୁ ମଧ୍ଯ ସେ ତାଗିଦ୍ କରି ଜନ ସାଧାରଣଙ୍କ ସମସ୍ଯା ଓ ଅଭିଯୋଗ ଶୁଣିଛନ୍ତି ।

ଦୁର୍ଗା ଭସାଣରେ ବାଜିବ ଡିଜେ, ମିଳିଲା ଅନୁମତି

ଭୁବନେଶ୍ବର: ଭୁବନେଶ୍ବରରେ ଆଜି ମାଆ ଜଗତଜନନୀ ଦୁର୍ଗାଙ୍କ ଭସାଣ ଉତ୍ସବ । ହେଲେ ଚଳିତବର୍ଷ ବିନା ଡିଜେରେ ମାଆଙ୍କ ଭସାଣ ପାଇଁ ସରକାର ଘୋଷଣା କରିଥିଲେ । ଅର୍ଥାତ ଭସାଣ ଉତ୍ସବରେ ଡିଜା ବାଜିବା ଉପରେ କଟକଣା ଲଗାଯାଇଥିଲା । ହେଲେ ଡିଜେ ବଜାଇବା ପାଇଁ ରାଜଧାନୀର ପୂଜା କମିଟି ଗୁଡିକୁ ଅନୁମିତ ମିଳିଛି । ଏନେଇ ସୂଚନା ଦେଇଛନ୍ତି ଭୁବନେଶ୍ବର ଡିସିପି ପିନାକ ମିଶ୍ର । ତେବେ କୋର୍ଟଙ୍କ ନିର୍ଦ୍ଦେଶ ଅନୁସାରେ ଡିଜେ ବଜାଇବାକୁ ପୂଜା କମିଟିଗୁଡିକୁ ଅବଗତ କରାଯାଇଥିବା ଡିସିପି ସୂଚନା ଦେଇଛନ୍ତି ।

ଡିସିପି କହିଛନ୍ତି, ଡିଜେ ବଜାଇବାକୁ ଅନୁମତି ଦିଆଯାଇଛି । ହେଲେ ନିୟମ ମୁତାବକ ପୂଜା କମିଟିମାନେ ଡିଜେ ବଜାଇବେ । ଯିଏ ନିୟମ ଅମାନ୍ୟ କରିବ ତାଙ୍କ ବିରୋଧରେ ଆକ୍ସନ ନିଆଯିବ । ଡିଜେ ଗାଡ଼ି ସିଜ୍ କରାଯିବ ବୋଲି ଡିସିପି କହିଛନ୍ତି ।

ଦଳିତ ଶ୍ରମିକଙ୍କୁ ଉଲଗ୍ନ କରି ମାଡ଼ ମରା ଘଟଣା: ଶ୍ରମମନ୍ତ୍ରୀଙ୍କ ସରକାରୀ ବାସଭବନ ଆଗରେ ଯୁବ କଂଗ୍ରେସର ବିକ୍ଷୋଭ

ଭୁବନେଶ୍ବର: ଶ୍ରମମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆଙ୍କ ସରକାରୀ ବାସଭବନ ସମ୍ମୁଖରେ ଯୁବ କଂଗ୍ରେସର ବିକ୍ଷୋଭ । ଢେଙ୍କାନାଳରେ ଦଳିତ ବର୍ଗର ଶ୍ରମିକଙ୍କୁ ଉଲଗ୍ନ କରି ମାଡ଼ ମାରିବାକୁ ବିରୋଧ କରି ଗର୍ଜିଛି ଯୁବ କଂଗ୍ରେସ । ଯୁବ କଂଗ୍ରେସର ବହୁ କାର୍ଯ୍ୟକର୍ତ୍ତା ମନ୍ତ୍ରୀଙ୍କ ବାସଭବନ ଘେରାଉ କରି ମୁଖ୍ୟମନ୍ତ୍ରୀ ଓ ଶ୍ରମ ମନ୍ତ୍ରୀଙ୍କ ବିରୋଧରେ ଦେଇଛନ୍ତି ସ୍ଲୋଗାନ ।

ପ୍ରଦେଶ ଯୁବ କଂଗ୍ରେସର ବହୁ ନେତା ଓ କାର୍ଯ୍ୟକର୍ତ୍ତା ଫରେଷ୍ଟ ପାର୍କ ଟ୍ରାଫିକ ନିକଟରୁ ଏକ ଶୋଭାଯାତ୍ରାରେ ଆସି ମନ୍ତ୍ରୀଙ୍କ ବାସଭବନ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି । ଶ୍ରମିକଙ୍କ ଉପରେ ଆକ୍ରମଣରେ ରାଜନୈତିକ ସମ୍ପୃକ୍ତି ଅଭିଯୋଗ କରିବା ସହ ତୁରନ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରାଯାଇଛି ।

ମନ୍ତ୍ରୀଙ୍କ ବାସଭବନ ସମ୍ମୁଖରେ ମୁଖ୍ୟମନ୍ତ୍ରୀ ମୋହନ ମାଝୀ, ଶ୍ରମ ମନ୍ତ୍ରୀ ଗଣେଶ ରାମ ଖୁଣ୍ଟିଆଙ୍କ କୁଶ ପୁତ୍ତଳିକା ଦାହ କରାଯାଇଛି । ୭ ଦିନ ମଧ୍ୟରେ ନିର୍ଯାତିତ ଶ୍ରମିକଙ୍କୁ ନ୍ୟାୟ ନ ମିଳିଲେ ମୁଖ୍ୟମନ୍ତ୍ରୀଙ୍କ ବାସଭବନ ସମ୍ମୁଖରେ ବିକ୍ଷୋଭ କରାଯିବା ସହ ଆନ୍ଦୋଳନକୁ ଆହୁରି ଜୋରଦାର କରାଯିବ ବୋଲି ଚେତାବନୀ ଦେଇଛି ଯବୁ କଂଗ୍ରେସ ।

ଦିଲ୍ଲୀରେ ଓଡ଼ିଆ ଯୁବତୀଙ୍କୁ ଗଣ ଦୁଷ୍କର୍ମ ଘଟଣାକୁ ନେଇ ବିଜେପି ଉପରେ ବର୍ଷିଲା ବିଜେଡି

ଭୁବନେଶ୍ବର: ଦିଲ୍ଲୀରେ ଓଡ଼ିଆ ଯୁବତୀଙ୍କୁ ଗଣ ଦୁଷ୍କର୍ମ ଅଭିଯୋଗକୁ ନେଇ ବିଜେପି ସରକାର ଉପରେ ବର୍ଷିଛି ବିଜେଡି । ନିର୍ଭୟା ଘଟଣାରେ ଯାଇଥିଲା ଗୋଟେ ସରକାର । ହେଲେ ସବୁ ଜାଣି ମଧ୍ଯ ବିଜେପିର ଆଚରଣ ଓ ଉଚ୍ଚାରଣରେ ପରିବର୍ତ୍ତନ ଆସିନି । ମହିଳାଙ୍କୁ ପ୍ରାଧାନ୍ୟ ଦେଉଛି ବୋଲି ବିଜେପି ଘୋଷି ହେଉଛି । କିନ୍ତୁ ବିଜେପି ମହିଳାଙ୍କୁ ସମ୍ମାନ ଦିଏ ନାହିଁ କି ସୁରକ୍ଷା ଦିଏନାହିଁ । ଦିଲ୍ଲୀ ଘଟଣାରୁ ଏହା ସ୍ପଷ୍ଟ ବୋଲି କହି ବିଜେପି ଉପରେ ବର୍ଷିଛନ୍ତି ବିଜେଡି ରାଜ୍ୟସଭା ସାଂସଦ ସୁଲତା ଦେଓ ।

ଓଡ଼ିଶାର ଭରତପୁର ଥାନା ଘଟଣା ସାରା ଦେଶ ଦେଖିଲା । ବିଜେପି ଗୋଟେ କଥା କୁହେ, କାମ ଆଉ ଗୋଟେ କରେ । ଓଡ଼ିଶାର ମହିଳାଙ୍କ ସହ ଦୁଷ୍କର୍ମ ପରେ ଚୁପ ରହିଲେ ଆବାସିକ କମିଶନ । ଆଇସିୟୁରେ ବଞ୍ଚିବା ଲାଗି ସଂଘର୍ଷ କରୁଛନ୍ତି ପୀଡିତା । କିନ୍ତୁ ରାଜ୍ୟ ସରକାରଙ୍କ ନିଦ ଭାଙ୍ଗି ନାହିଁ । ପୂଜା ମଣ୍ଡପ ବୁଲୁଛନ୍ତି ସରକାର । ଏମାନଙ୍କର ମହିଳାଙ୍କ ପ୍ରତି ସମବେଦନା ନାହିଁ । ବିଜେପି ସରକାରରେ ମହିଳା ନିଜେ ନିଜକୁ ସୁରକ୍ଷା ଦେବା ଦରକାର । ଏହା ହେଉଛି ଡବଲ ଇଞ୍ଜିନ ସରକାରର ଶାସନ କହି ବର୍ଷିଛନ୍ତି ସୁଲତା ।

ଗୋଟିଏ ଏୟାର ଇଣ୍ଡିଆ ଓ ଦୁଇ ଇଣ୍ଡିଗୋ ବିମାନରେ ବୋମା ଖବର ମିଛ

ନୂଆଦିଲ୍ଲୀ: ୧୪ ଅକ୍ଟୋବର । ଭାରତର ୩ଟି ବିମାନରେ ବୋମା ଥିବା ସୂଚନା । ଫ୍ଲାଇଟ୍ ବାତିଲ । ଗୋଟିଏ ଜରୁରୀ ଅବତରଣ କରିଥିବା ବେଳେ ଆଉ ଦୁଇଟିର ଉଡ଼ାଣ ବାତିଲ । ହେଲେ ଏହି ୩ଟି ବିମାନରେ ବୋମା ଥିବା ଖବର ଗୁଜବ ବୋଲି ଜଣାପଡିଛି । ଯାଞ୍ଚ ପରେ କୌଣସି ବିମାନରୁ ବୋମା ଥିବାର ପ୍ରମାଣ ମିଳିନାହିଁ । ହେଲେ ଏହି ଗୁଜବ ଦ୍ବାରା ବିମାନ ଚଳାଚଳରେ ବିଭ୍ରାଟ ଦେଖା ଦେଇଛି । ଶହ ଶହ ବିମାନ ଚଳାଚଳ ପ୍ରଭାବିତ ହୋଇଥିବା ବେଳେ ହଜାର ହଜାର ଯାତ୍ରୀ ହୀନସ୍ତା ହୋଇଛନ୍ତି ।

ଆଜି ସକାଳୁ ପ୍ରଥମେ ଏୟାର ଇଣ୍ଡିଆ ବିମାନରେ ବୋମା ଥିବା ଖବର ଆସିଥିଲା । ବିମାନଟି ମୁମ୍ବାଇରୁ ଆମେରିକାର ନ୍ୟୁୟର୍କ ଯାଉଥିଲା । ବୋମା ଧମକ ପରେ ବିମାନର ଦିଗ ପରିବର୍ତ୍ତନ କରାଯାଇ ଦିଲ୍ଲୀ ଏୟାରକୋର୍ଟରେ ଜରୁରୀ ଅବତରଣ କରାଯାଇଥିଲା । ଏହାପରେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବିମାନରୁ ବାହାର କରାଯିବା ପରେ ବିମାନର ଯାଞ୍ଚ ହୋଇଥିଲା । ହେଲେ ଫ୍ଲାଇଟରେ ବୋମା ଥିବାର କୌଣସି ସୂଚନା ମିଳିନାହିଁ ।

ଏୟାର ଇଣ୍ଡିଆ ବିମାନ ପରେ ପରେ ଦୁଇଟି ଇଣ୍ଡିଗୋ ବିମାନରେ ବୋମା ଥିବା ଖବର ଆସିଥିଲା । ଯାହା ଚିନ୍ତାକୁ ଆହୁରି ବଢ଼ାଇ ଦେଇଥିଲା । ଗୋଟିଏ ଇଣ୍ଡିଗୋ ବିମାନ ମୁମ୍ବାଇରୁ ମାସକଟ ଯାଉଥିବା ବେଳେ ଅନ୍ୟଟି ଜେଦାହ ଯିବାର ଥିଲା । ବିମାନ ଦ୍ବୟକୁ ସୁରକ୍ଷିତ ସ୍ଥାନକୁ ନେଇ ଯାଞ୍ଚ କରାଯାଇଥିଲା । ହେଲେ ବିମାନରେ ବୋମା ନଥିବା ଓ ଏହା ଏକ ଗୁଜବ ଥିବା ଯାଞ୍ଚ ପରେ ଜଣାପଡିଥିଲା ।

ତେବେ କିଏ ଓ କାହିଁକି ଏମିତି ମିଛ ପ୍ରଚାର କଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏପରି ଖବର ପଛରେ ଆତଙ୍କବାଦୀ ଲିଙ୍କ ଅଛି କି ? ଯଦି ଅଛି, ଆତଙ୍କବାଦୀ ମିଛ ଗୁଜବ ସୃଷ୍ଟି କରି ଭାରତର ସୁରକ୍ଷା ବ୍ୟବସ୍ଥାକୁ ଦେଖି ଅନ୍ୟ କିଛି ଯୋଜନା କରୁନାହାନ୍ତି ତ ? ଏମିତି ଯୋଜନାକୁ ଭାରତ ସରକାର ଓ ଗୁଇନ୍ଦା ବିଭାଗ ହାଲକା ଭାବେ ନନେଇ, ଗୁଜବ ପଛରେ କାହାର  ହାତ ଅଛି ଓ ଏପରି ଗୁଜବ ସୃଷ୍ଟି କରିବା ପଛର କାରଣ କ’ଣ ଖୋଜି ବାହାର କରିବା ଦରକାର ।

ଓଡ଼ିଆ ଯୁବତୀଙ୍କ ଗଣଦୁଷ୍କର୍ମ ଘଟଣା: ଦିଲ୍ଲୀ ପୋଲିସ କମିଶନରଙ୍କ ସହ କଥା ହେଲେ ଓଡ଼ିଶା ଡିଜିପି

ଭୁବନେଶ୍ବର: ଦିଲ୍ଲୀରେ ଓଡ଼ିଆ ଯୁବତୀଙ୍କୁ ଗଣଦୁଷ୍କର୍ମ ନେଇ ଦିଲ୍ଲୀ ପୋଲିସ କମିଶନର ସଞ୍ଜୟ ଆରୋରାଙ୍କ ସହ ଆଲୋଚନା କଲେ ଓଡିଶା ଡିଜିପି ୱାଇ.ବି. ଖୁରାନିଆ । ଡିସିପି ରବି କୁମାର ସିଂ ନିଜେ ତଦନ୍ତ ଭାର ନେଇଥିବା ଡିଜିପିଙ୍କୁ କହିଛନ୍ତି ଦିଲ୍ଲୀ ପୋଲିସ କମିଶନର । ସିସିଟିଭି ଫୁଟେଜ ଆଧାରରେ ତଦନ୍ତ ଚାଲିଛି । ତଦନ୍ତ ବେଳେ ପୀଡିତା ଜଣେ ନର୍ସିଂ ଗ୍ରାଜୁଏଟ ବୋଲି ଜଣାପଡିଛି । ସେ ମୁର୍ମୁଷୁ ଅବସ୍ଥାରେ ହସ୍ପିଟାଲରେ ଆଡ଼ମିଟ ହୋଇଥିବାରୁ ପୋଲିସ କୌଣସି ସୁରାକ ତାଙ୍କ ଠାରୁ ପାଇପାରିନାହିଁ । ଗତ ୧ ମାସ ହେଲା ପୀଡିତାଙ୍କ ମୋବାଇଲ ହଜିଯାଇଥିବା ପୋଲିସ ନିକଟରେ ଅଭିଯୋଗ ହୋଇଥିଲା । ଘଟଣା ଘଟିବା ପୂର୍ବ ଦିନ ଏକ ଏଟିଏମ ନିକଟରେ ପୀଡିତା ଶୋଇଥିବା ଜାଣିବାକୁ ପାଇଛି ଦିଲ୍ଲୀ ପୋଲିସ । ଏ ନେଇ ଓଡିଶା ପୋଲିସକୁ ମଧ୍ୟ ଅବଗତ କରିଛି ଦିଲ୍ଲୀ ପୋଲିସ ।

ଘଟଣାର ୩ ଦିନ ପରେ ତତ୍ପର ହୋଇଛି ଓଡିଶା ପୋଲିସ । ଘଟଣାକୁ ଗୁରୁତର ସହିତ ନିଆଯାଇଛି ବୋଲି ଓଡିଶା ପୋଲିସ ପକ୍ଷରୁ କୁହାଯାଇଛି । ଡିଜିଙ୍କ ଅଫିସ ତରଫରୁ କୁହାଯାଇଛି ଯେ ଓଡ଼ିଶା ପୋଲିସ ପୀଡ଼ିତାଙ୍କ ପରିବାର ଓ ଦିଲ୍ଲୀ ପୋଲିସ ସହିତ ଯୋଗାଯୋଗରେ ଅଛି । ତଦନ୍ତ କେମିତି ହେଉଛି, କେତେ ବାଟ ଯାଇଛି, ତା’ ଉପରେ ବି ନଜର ରଖାଯାଇଛି । ପୀଡ଼ିତାଙ୍କ ପରିବାର ଲୋକେ ଦିଲ୍ଲୀ ଯିବାର ବ୍ୟବସ୍ଥା କରାଯାଉଛି । ବାକି ସବୁ ବ୍ୟବସ୍ଥା କରାଯାଉଥିବା ଡିଜିପିଙ୍କ ଅଫିସ ତରଫରୁ କୁହାଯାଇଛି ।

ଶୁକ୍ରବାର ରାତିରେ ଦିଲ୍ଲୀରେ ଜଣେ ଓଡ଼ିଆ ଯୁବତୀଙ୍କୁ ଗଣଦୁଷ୍କର୍ମ କରାଯିବାର ଅଭିଯୋଗ ହୋଇଥିଲା । ସେ ଗୁରୁତର ଅବସ୍ଥାରେ ଦିଲ୍ଲୀ ଏମସରେ ଚିକିତ୍ସିତ ହେଉଛନ୍ତି । ହେଲେ ପ୍ରଥମରୁ ଯେତେ ତତ୍ପରତା ପ୍ରକାଶ ପାଇଥିବାର ଥିଲା ସରକାରଙ୍କ ତରଫରୁ ସେତିକି ତତ୍ପରତା ଦେଖିବାକୁ ମିଳି ନଥିଲା । ଏହାକୁ ନେଇ ପ୍ରଶ୍ନ ଉଠାଇଥିଲେ ବିଜେଡି ସାଂସଦ ମାନସ ମଙ୍ଗରାଜ । ଏହା ପରେ ରାଜ୍ୟ ସରକାର ଚେତିଥିବା ପରି ମନେ ହେଉଛି ।

ଭସାଣ ପାଇଁ ଆସୁଥିବା ବେଳେ ଓଲଟିଲା ମ୍ୟୁଜିକାଲ ଟିମ୍ ଗାଡି

କାମାକ୍ଷାନଗର: ଭସାଣ ପାଇଁ କାମାକ୍ଷାନଗର ଆସୁଥିବା ବେଳେ ଡିଭାଇଡରରେ ପିଟି ହୋଇ ଓଲଟିଲା ମ୍ୟୁଜିକାଲ ଟିମ୍ ଗାଡି । ୫ ଜଣ ଆହତ ହୋଇଥିବା ବେଳେ ୨ ଜଣ ଅବସ୍ଥା ଗରୁତୁର ରହିଛି ।

କାମାକ୍ଷାନଗରରେ ଦଶହରା ଭସାଣ ପାଇଁ ଯାଜପୁର ମଙ୍ଗଳପୁରରୁ ଶିବମ ମ୍ୟୁଜିକାଲ ଟିମର ସଦସ୍ୟମାନେ ଆସୁଥିଲେ । ଡିଭାଇଡରରେ ପିଟି ହୋଇ ଗାଡି ଓଲଟି ପଡିଥିଲା । ଡ୍ରାଇଭରଙ୍କ ଆଖି ଲାଗିଯିବାରୁ ଦୁର୍ଘଟଣା ଘଟିଥିଲା ସୂଚନା ମିଳିଛି । ଆମ୍ବୁଲାନ୍ସ ଯୋଗେ ସମସ୍ତଙ୍କୁ କାମାକ୍ଷାନଗର ମେଡିକାଲରେ ଭର୍ତ୍ତି କରାଯାଇଥିଲା ।

ଦଶହରା ବୁଲି ଫେରିବା ବେଳେ ଦୁର୍ଘଟଣା, ଦୁଇ ସାଙ୍ଗ ମୃତ

ବାଙ୍କୀ: ଦଶହରା ଦେଖିବାକୁ ଯାଇ ଆଉ ଘରକୁ ଫେରିଲେନି ଦୁଇ ସାଙ୍ଗ । ଦୁର୍ଘଟଣାରେ ଚାଲିଗଲା ଦୁଇ ଜଣଙ୍କ ଜୀବନ । ଘଟଣା ଘଟିଛି ବାଙ୍କୀ ମୁରାରିପୁର ଛକ ନିକଟରେ ।

ମିଳିଥିବା ସୂଚନା ଅନୁସାରେ, ଭଗିପୁର ଗାଁର ବିଭୁତି ନାୟକ ଏବଂ ବାଦଲ ଜେନା ଦଶହରା ମେଢ଼ ଦେଖିବାକୁ ବାଙ୍କୀ ଡମପଡା ଯାଇଥିଲେ । ସେଠାରେ ଦଶହରା ମେଢ଼ ଦେଖି ବୁଲାବୁଲି କରିବା ପରେ ଘରକୁ ଫେରୁଥିଲେ । ମୁରାରିପୁର ଛକ ନିକଟରେ ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଏକ ଗଛରେ ପିଟି ହୋଇଯାଇଥିଲେ । ଘଟଣାସ୍ଥଳରେ ଉଭୟଙ୍କ ମୃତ୍ୟୁ ଘଟିଛି ।