ବସ୍ତା: ପାଣିରେ ବୁଡି ଦୁଇ ଶିଶୁକନ୍ୟାଙ୍କ ମୃତ୍ୟୁ । ଘଟଣା ଘଟିଛି ବସ୍ତା ଥାନା ପଣିଶାପଡ଼ା ଗାଁରେ । ପୋଖରୀରେ ବୁଡ଼ି ଦୁଇ ଶିଶୁକନ୍ୟାଙ୍କ ମୃତ୍ୟୁ ଘଟିଛି । ଦୁଇ ମୃତକଙ୍କ ବୟସ ୫ ବର୍ଷ ଲେଖାଏଁ । ଉଭୟଙ୍କୁ ପୋଖରୀରୁ ଉଦ୍ଧାର କରାଯାଇ ମେଡିକାଲ ନିଆଯାଇଥିଲା । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି ।
ସୂଚନା ଅନୁସାରେ, ପଣିଶାପଡ଼ା ଗାଁର ଦିଲ୍ଲୀପ କୁମାର ଦାସ ଏବଂ ମାନସ ନନ୍ଦଙ୍କ ଦୁଇ ଝିଅ ଘର ପାଖ ବାଡ଼ିରେ ଖେଳୁଥିଲେ । ଏହି ସମୟରେ ପରିବାର ଲୋକଙ୍କ ଅଜାଣତରେ ପାଖରେ ଥିବା ପୋଖରୀକୁ ଚାଲିଯାଇ ବୁଡ଼ି ଯାଇଥିଲେ । ପିଲା ଦୁହିଁଙ୍କୁ ନଦେଖି ପରିବାର ଲୋକେ ଖୋଜାଖୋଜି କରିବା ବେଳେ ପୋଖରୀରେ ଭାସୁଥିବା ଦେଖିଥିଲେ । ଏହାପରେ ଉଭୟଙ୍କୁ ପୋଖରୀରୁ ଉଦ୍ଧାର କରିବା ପରେ ଜଣଙ୍କୁ ବସ୍ତା ଓ ଅନ୍ୟ ଜଣକୁ ରାସଗୋବିନ୍ଦପୁର ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଉଭୟଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ୨ ଶିଶୁକନ୍ୟାଙ୍କ ମୃତ୍ୟୁକୁ ନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
