ଭୁବନେଶ୍ବର: ଗତକାଲି ସମ୍ବଲପୁର ବିଧାୟକ ଜୟନାରାୟଣ ମିଶ୍ର ସ୍ବର୍ଗଦ ସମୀର ଦେଙ୍କ ସ୍ମୃତି ସଭାରେ ବିଜେପି ଦଳକୁ ନେଇ ଯାହା କହିଲେ, ତାହା ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି । ଏହାକୁ ନେଇ ବିଜେପିକୁ କଟାକ୍ଷ କରିଛନ୍ତି ବିରୋଧୀ ଦଳ ନେତା ପ୍ରସନ୍ନ ଆଚାର୍ଯ୍ୟ । ବିଜେପିର ନାଁ ନେଇ ନଥିଲେ ବି କହିଛନ୍ତି, କେଉଁ ଦଳରେ ଗୋଷ୍ଠୀ କନ୍ଦଳ ଅଛି, ଗତକାଲି ତାହା ସ୍ପଷ୍ଟ ହୋଇଛି । ଜଣେ ବରିଷ୍ଠ ବିଧାୟକ, ଯାହା କହିଛନ୍ତି, ସେଥିରୁ ଜଣାପଡୁଛି ନିଆଁ କୁହୁଳୁ ନାହିଁ, ବରଂ ନିଆଁ ଲାଗି ଗଲାଣି । ସେ କହିଛନ୍ତି, ବିଜେଡ଼ି ଆଜି ବି ଲୋକପ୍ରିୟ ଅଛି । ସର୍ବାଧିକ ଭୋଟ ପାଇଛି । ଆଗକୁ କ’ଣ ହେଉଛି ଦେଖନ୍ତୁ ।
ସୂଚନାଯୋଗ୍ୟ, ଗତକାଲି ନିଜ ଦଳ ବିରୋଧରେ ବର୍ଷିଥିଲେ ସମ୍ବଲପୁରର ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ର । ସମୀର ଦେଙ୍କ ଶ୍ରଦ୍ଧାଞ୍ଜଳି ସଭାରେ, ରାଜ୍ଯ ସଭାପତି ମନମୋହନ ସାମ,, ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ, ପୂର୍ବତନ ସଭାବତି ସମୀର ମହାନ୍ତି ଏବଂ ରାଜସ୍ବ ମନ୍ତ୍ରୀ ସୁରେଶ ପୂଜାରୀଙ୍କ ଉପସ୍ଥିତିରେ ଜୟ ନାରାୟଣ ମିଶ୍ର କହିଥିଲେ, ଦଳରେ ତାଙ୍କୁ କୋଣଠେସା କରି ରଖାଯାଇଛି । ତାଙ୍କ ବିରୋଧରେ ଲୋକ ଲଗାଯାଇଛି । ଦଳରେ ତାଙ୍କୁ ଯେମିତି ସମ୍ମାନ କି ଗୁରୁତ୍ଵ ମିଳିବା କଥା, ତାହା ମିଳୁନାହିଁ । ସମୀର ଦେଙ୍କୁ ମଧ୍ୟ ସେମିତି କରାଯାଇଥିଲା ବୋଲି କହି ଖୋଲାଖୋଲି ଅସନ୍ତୋଷ ପ୍ରକାଶ କରିଥିଲେ ଜୟ ନାରାୟଣ ।
