ନନ୍ଦିଘୋଷ ବ୍ୟୁରୋ : କାର୍ଯ୍ୟକାଳ ଶେଷ ହେବା ପୂର୍ବରୁ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ବିବାଦୀୟ ପଦକ୍ଷେପ। ପୁଅ ହଣ୍ଟରଙ୍କୁ ନିଶ୍ଚିତ ଜେଲଦଣ୍ଡରୁ ବଞ୍ଚାଇଛନ୍ତି ବାପା। ବନ୍ଧୁକ ଓ କର ଠକେଇ ମାମଲାରେ ରାଷ୍ଟ୍ରପତି ପୁଅଙ୍କୁ ଦେଇଛନ୍ତି ରାଜକ୍ଷମା। ପରିବାର ଲାଗି କୌଣସି କ୍ଷମତାର ପ୍ରୟୋଗ କରିବେ ନାହିଁ ବୋଲି ବାଇଡେନ ଯେଉଁ ପ୍ରତିଶ୍ରୁତି ଦେଇଥିଲେ ତାହାକୁ ନିଜେ ଉଲ୍ଲଂଘନ କରିଛନ୍ତି।

ଗତ ଜୁନ ମାସରେ ବାଇଡେନ ସ୍ପଷ୍ଟ ରୂପରେ ପୁଅକୁ କ୍ଷମା କିମ୍ବା ଦଣ୍ଡ କମ କରିବାକୁ ମନା କରିଦେଇଥିଲେ । ଯେତେବେଳେ ତାଙ୍କ ପୁଅ ବନ୍ଧୁକ ମାମଲାରେ ମୋକଦ୍ଦମାର ସାମ୍ନା କରିବାକୁ ପଡିଥିଲା ସେତେବେଳେ ସେ କହିଥିଲେ ନ୍ୟାୟିକ ଫଇସଲାକୁ ସେ ସମ୍ମାନ କରିବେ ଏବଂ ତାଙ୍କ ନିଷ୍ପତ୍ତିକୁ ପାଳନ କରିବେ । ଏହା ସହିତ ସେ କହିଥଲେ ହଣ୍ଟରଙ୍କୁ ସେ କେବେ କ୍ଷମା କରିବେନି । ହେଲେ ଆଜି ସେ ଦେଇଥିବା ପ୍ରତିଶୃତିରୁ ଓହରିଛନ୍ତି ।

ନଭେମ୍ବର ୮ରେ ହ୍ବାଇଟ ହାଉସରେ ବାଇଡେନ ପୁଅ ହଣ୍ଟରଙ୍କ କ୍ଷମା ଯାଚିକାରେ ହସ୍ତାକ୍ଷର କରିଥିଲେ ଏବଂ ଆରୋପ ଲଗାଇଥିଲେ ମୋ ବିରୁଦ୍ଧରେ ଏକ ରାଜନୈତିକ ଷଡଯନ୍ତ୍ର କରାଯାଇଛି ।  ଅନେକ ରାଜନୈତିକ ପ୍ରତିଦ୍ୱନ୍ଦ୍ୱୀ ପରୋକ୍ଷରେ ମୋତେ ଆକ୍ରମଣ କରିବା ପାଇଁ ଏମିତି ଷଡଯନ୍ତ୍ର ରଚିଥିଲେ । ଯଦି କୌଣସି ଯୁକ୍ତିଯୁକ୍ତ ବ୍ୟକ୍ତି ହଣ୍ଟର ମାମଲାର ତଦାରଖ କରିବ କୌଣସି ସିନ୍ଧାନ୍ତରେ ଉପନୀତ ହୋଇପାରିବ ନାହିଁ । ଏହି ଷଡଯନ୍ତ୍ରରେ ହଣ୍ଟର ମୋ ପୁଅ ହେଇଥିବାରୁ ତାକୁ ଚୟନ କରାଯାଇଥିଲା ।ମୁଁ ଆଶା କରୁଛି ଆମେରିକୀୟମାନେ ବୁଝିବେ କାହିଁକି ଜଣେ ପିତା ଏବଂ ରାଷ୍ଟ୍ରପତି ଏହି ନିଷ୍ପତ୍ତି ନେଇଛନ୍ତି ।

୨୦୧୮ରେ ଆଗ୍ନେୟାସ୍ତ୍ର କ୍ରୟ କରିବା ଅଭିଯୋଗରେ ହଣ୍ଟରକୁ ଡେଲୱାଲ ଫେଡେରାଲ କୋର୍ଟରେ ଦୋଷୀ ସାବ୍ୟସ୍ତ କରାଯାଇଥିଲା। ୨୦୧୪ ଜାନୁୟାରୀ ୧ରୁ ୨୦୨୪ ଡିସେମ୍ବର ୧ ପର୍ଯ୍ୟନ୍ତ ହଣ୍ଟର ବାଇଡେନ କରିଥିବା ସମସ୍ତ ଦୋଷୀରୁ ତାଙ୍କୁ ମୁକ୍ତ କରାଯାଇଛି। ଏହି ସମୟସୀମା ମଧ୍ୟରେ ସେ ଯେଉଁ ଦୋଷତ୍ରୁଟି ବା ଅପରାଧ କରିଛନ୍ତି ସେସବୁରୁ ତାଙ୍କୁ ବାଇଡେନ ରାଜକ୍ଷମା ପ୍ରଦାନ କରିଛନ୍ତି। ବେଆଇନ ଭାବରେ ବନ୍ଧୁକ ରଖିବା, ଟିକସ ଠକିବା ସହିତ ପାରିବାରିକ ବିବାଦ ନେଇ ତାଙ୍କ ବିରୋଧରେ ମକଦ୍ଦମା ଚାଲିଥିଲା। ସେ ଡ୍ରଗ୍ସ ଦ୍ଵାରା ମଧ୍ୟ କବଳିତ ହୋଇଥିଲେ।

ଏକ ବିବୃତିରେ ସେ କହିଛନ୍ତି- ହଣ୍ଟରଙ୍କୁ କ୍ଷମା ପ୍ରଦାନ ଲାଗି ସେ ଏକ ନିର୍ଦ୍ଦେଶନାମାରେ ସ୍ବାକ୍ଷର କରିଛନ୍ତି। ତେବେ ପୁଅଙ୍କୁ ଟାର୍ଗେଟ କରାଯାଇ ତାଙ୍କ ବିରୋଧରେ ମାମଲା ଦାୟର ହୋଇଥିବାରୁ ସେ ଏହି ପଦକ୍ଷେପ ନେଇଛନ୍ତି। ଡେଲୱାରେ ଓ କାଲିଫର୍ଣ୍ଣିଆରେ ପୁଅ ହଣ୍ଟରଙ୍କ ନାମରେ ଦୁଇଟି ମାମଲା ରହିଥିଲା। ହଣ୍ଟର ଜଣେ ନିଶାଡି ହୋଇଥିବାବେଳେ ସେ ଏଥିରୁ କ୍ରମଶଃ ଉପଶମ ଲାଭ କରୁଛନ୍ତି। ରିପବ୍ଲିକାନଙ୍କ ଟାର୍ଗେଟରେ ବି ସେ ରହିଛନ୍ତି। ୨୦୧୮ରେ ଏକ ଆଗ୍ନେୟାସ୍ତ୍ର କ୍ରୟ କରିବା ଅଭିଯୋଗରେ ଡେଲୱାଲ ଫେଡେରାଲ କୋର୍ଟରେ ଗତ ଜୁନ ମାସରେ ଦୋଷୀ ସାବ୍ଯସ୍ତ ହୋଇଥିଲେ ହଣ୍ଟର।