ଯାଜପୁର: ଯାଜପୁର ରୋଡ ପାଣିକୋଇଲି ସୁନା ଦୋକାନରେ ଲୁଟ ଉଦ୍ୟମ ବେଳେ ଗୁଳିମାଡ଼ ଘଟଣା । ମୃତ୍ୟୁ ସଂଖ୍ୟା ଦୁଇକୁ ବୃଦ୍ଧି । ଘଟଣା ସ୍ଥଳରେ ଜଣଙ୍କ ମୃତ୍ୟୁ ଘଟିଥିବା ବେଳେ କଟକ ସ୍ଥାନାନ୍ତର ବେଳେ ସୁନୀଲ ରାୟ ନାମକ ସୁନା ଦୋକାନୀ କର୍ମଚାରୀଙ୍କ ମୃତ୍ୟୁ ଘଟିଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ଲୁଟ କରିବାକୁ ଆସିଥିବା ୩ ଲୁଟେରାଙ୍କ ମଧ୍ୟରୁ ଜଣେ ଫେରାର ହୋଇଯାଇଥିବା ବେଳେ ଦୁଇ ଜଣଙ୍କୁ ଧରି ନିର୍ଧୁମ ମାଡ଼ ମାରିଛନ୍ତି ସ୍ଥାନୀୟ ଲୋକେ । ସେମାନଙ୍କ ମଧ୍ୟରୁ ଜଣଙ୍କ ସ୍ବାସ୍ଥ୍ୟାବସ୍ଥା ଗରୁତର ହୋଇଥିବାରୁ ମେଡିକାଲରେ ଭର୍ତ୍ତି କରାଯାଇଛି ।
ସୂଚନାଯୋଗ୍ୟ, ପାଣିକୋଇଲିରେ ଥିବା ପଣ୍ଡା ଅଳଙ୍କାର ଦୋକାନରେ ଆଜି ଡକାୟତି ଉଦ୍ୟମ ହୋଇଥିଲା । ୩ ଜଣ ଦୁର୍ବୃତ୍ତ ଗୋଟିଏ ବାଇକରେ ଆସି ଲୁଟ ଉଦ୍ୟମ କରିଥିଲେ । ଏହାସହ ଗୁଳିମାଡ଼ କରିଥିଲେ । ଫଳରେ ଦୋକାନକୁ ବିଦ୍ୟୁତ ମରାମତି କାମ କରିବାକୁ ଆସିଥିବା ନୀଳମାଧବ ପଣ୍ଡା ନାମକ ଜଣେ ବିଦ୍ୟୁତ କର୍ମଚାରୀଙ୍କ ସମେତ ଦୁଇଜଣ ଦୋକାନ କର୍ମଚାରୀ ଆହତ ହୋଇଥିଲେ । ଘଟଣା ସ୍ଥଳରେ ନୀଳମାଧବଙ୍କ ମୃତ୍ୟୁ ଘଟିଥିଲା । ଗୁରୁତର ଅବସ୍ଥାରେ ସୁନୀଲ ରାୟଙ୍କୁ କଟକ ସ୍ଥାନାନ୍ତର କରାଯାଉଥିବା ବେଳେ ବାଟରେ ତାଙ୍କ ମୃତ୍ୟୁ ଘଟିଥିବା ଜଣାପଡ଼ିଛି ।
ଅନ୍ୟପକ୍ଷେ ଗୁଳି ମାଡ କରି ଫେରାର ହେବାକୁ ଅଭିଯୁକ୍ତମାନେ ଚେଷ୍ଟା କରୁଥିବା ବେଳେ ଦୁଇ ଜଣଙ୍କୁ ମାଡି ବସିଥିଲେ ସ୍ଥାନୀୟ ଲୋକେ । ଏହାପରେ ଆରମ୍ଭ ହୋଇଯାଇଥିଲା ନିର୍ଧୁମ ମାଡ଼ । ଘଟଣା ସ୍ଥଳରେ ଶହ ଶହ ଲୋକ ରୁଣ୍ଡ ହୋଇଯାଇଥିବା ବେଳେ ଯିଏ ପାରିଲା ଅଭିଯୁକ୍ତଙ୍କୁ ମାଡ଼ ମାରିଥିଲା । ଫଳରେ ଜଣେ ଅଭିଯୁକ୍ତ ଗୁରୁତର ହୋଇଯାଇଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ସହ ଅଭିଯୁକ୍ତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛି । ତେବେ ମେଡିକାଲ ପରିସରରେ ମଧ୍ୟ ଉତ୍ତେଜନା ପ୍ରକାଶ ପାଇଛି । ଉତ୍ତ୍ୟକ୍ତ ଲୋକେ ମେଡିକାଲରେ ପହଞ୍ଚି ହୋହାଲ୍ଲା କରିଛନ୍ତି ।
