spot_img
Home Blog Page 1192

ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା ସ୍ଥିତି

ନନ୍ଦିଘୋଷ ବ୍ୟୁରୋ : ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା ସ୍ଥିତି ଦେଖିବାକୁ ମିଳିଛି । ଟ୍ରେନ ବିଳମ୍ବ କାରଣରୁ ଦଳାଚକଟା ସ୍ଥିତି ଉପୁଜିଛି । ଶିବଗଙ୍ଗା ଓ ମଗଧ ଏକ୍ସପ୍ରେସ ସମେତ ଅନେକ ଟ୍ରେନ ବିଳମ୍ବ ହୋଇଛି । ଏହାଯୋଗୁଁ ପ୍ଲାଟଫର୍ମ ନମ୍ବର ୧୨ ଓ ୧୩ରେ ସ୍ଥିତି ଅଣାୟତ୍ତ ହୋଇଥିବା ଦେଖିବାକୁ ମିଳିଛି । ଦଳାଚକଟା ସ୍ଥିତିରେ କେହି ଆହତ ହୋଇ ନଥିବା ସୂଚନା ଥିବା ବେଳେ ହଜାର ହଜାର ଯାତ୍ରୀ ଫସିଥିବା ଜଣାପଡିଛି । ଅନ୍ୟପଟେ ଭିଡ଼ ନିୟନ୍ତ୍ରଣ କରିବାରେ ନାକେଦମ ହୋଇପଡିଲାଣି ପୋଲିସ

ଦମ ଦେଖାଇବ କଂଗ୍ରେସ : ବିଜେପି ସରକାରର ଶାସନ ଗାଦିକୁ ଦୋହଲାଇ ପାଇଁ ବଡ଼ ପ୍ରସ୍ତୁତି

ନନ୍ଦିଘୋଷ ବ୍ୟୁରୋ : ଦମ ଦେଖାଇବ କଂଗ୍ରେସ। ବିଜେପି ସରକାରର ଶାସନ ଗାଦିକୁ ଦୋହଲାଇ ପାଇଁ ବଡ଼ ପ୍ରସ୍ତୁତି। ପିସିସି ସଭାପତି ଦାୟିତ୍ୱ ପରେ ଭକ୍ତ ଦାସଙ୍କ ନେତୃତ୍ୱରେ ରାଜଧାନୀରେ ବିଶାଳ ସମାବେଶ କରିବ କଂଗ୍ରେସ। ରାଜ୍ୟରେ ବଢିଥିବା ମହିଳା ନିର୍ଯାତନା ଓ ବିପର୍ଯ୍ଯସ୍ତ ଆଇନ ଶୃଙ୍ଖଳା ନେଇ ପୂର୍ବରୁ ରାଜ୍ୟବ୍ୟାପୀ ବିକ୍ଷୋଭ କରିଥିଲା ଦଳ।ଏହାପରେ ବିଧାନସଭାରେ ଦଳର ବିଧାୟକ ସରକାରଙ୍କୁ ଘେରିଥିଲେ। କିନ୍ତୁ ମହିଳାଙ୍କୁ ନ୍ୟାୟ ବଦଳରେ କଂଗ୍ରେସ ସଦସ୍ୟଙ୍କୁ ମିଳିଲା ଦଣ୍ଡ। ଯାହାକୁ ନେଇ ବିଧାନସଭାରେ ଏବେବି ପ୍ରତିବାଦ ଜାରି ରହିଛି। ଆସନ୍ତା ୨୭ରେ କଂଗ୍ରେସ ନିଜର ଦମ ଦେଖାଇବାକୁ ଜୋରଦାର ପ୍ରସ୍ତୁତି କରୁଛି। ନାରୀ ସୁରକ୍ଷା ନେଇ ବିଧାନସଭା ଘେରାଉ କରାଯିବ। ରାଜ୍ୟର ବିଭିନ୍ନ ଜିଲ୍ଲାରୁ କଂଗ୍ରେସ କର୍ମୀ ଓ ନେତା ସାମିଲ ହେବେ। ରାଜ୍ୟରେ ପ୍ରାୟ ୪୫ ହଜାରରୁ ଅଧିକ ନାରୀ ନିଖୋଜ ଅଛନ୍ତି।ସରକାର ମହିଳା ସଶକ୍ତ କଥା କହୁଛନ୍ତି। କିନ୍ତୁ ଏହା କଣ ନାରୀ ସୁରକ୍ଷା ବୋଲି ପ୍ରଶ୍ନ କରିଛି କଂଗ୍ରେସ। ବିଜେପି ସରକାରର ୯ ମାସରେ ୧୨.୯ ହାରରେ ମହିଳାଙ୍କ ଉପରେ ହୋଇଛି ଅପରାଧ। ବିଭିନ୍ନ ଥାନାରେ ୧୬ଶହ ମାମଲା ରୁଜୁ ହୋଇଛି। ଆନ୍ଦୋଳନକୁ ସଫଳ କରିବାକୁ ଜନତାଙ୍କୁ ଆହ୍ଵାନ କରିଛି କଂଗ୍ରେସ ।

ଆସନ୍ତା ୨୭ ତାରିଖରେ ବିଜେପି ସତର୍କ ଓ ସଜାଗ ରହିବାକୁ ଚେତାଇଛି କଂଗ୍ରେସ। ରାଜ୍ୟର ମା, ଭଉଣୀ, ମହିଳା ସମସ୍ତେ ନିର୍ଯାତିତ। ବିଧାନସଭାରେ ବାରମ୍ବାର ଆନ୍ଦୋଳନ ସତ୍ତ୍ୱେ ବି ସରକାର ଶୁଣୁନାହାନ୍ତି। ତେଣୁ ବିଧାନସଭା ଘେରାଉ କାର୍ଯ୍ୟକ୍ରମରେ ଅଧିକ ସଂଖ୍ଯାରେ ମହିଳା ଏଥିରେ ସାମିଲ ହେବାକୁ ଆହ୍ୱାନ ଦେଇଛି କଂଗ୍ରେସ । ଆନ୍ଦୋଳନ ଏଭଳି ହେବ ଯାହା ଫଳରେ ମହିଳାଙ୍କ ସ୍ୱାର୍ଥ ରକ୍ଷା କରିବାକୁ ବିଜେପି ସରକାର ବାଧ୍ୟ ହେଵ କହିଛି ଦଳ ।

ଛତୁଆ ଖାଇ ୫ ବର୍ଷର ଝିଅର ମୃତ୍ୟୁ ; ପରିବାରର ଅନ୍ୟ ତିନି ଗୁରୁତର

ନନ୍ଦିଘୋଷ ବ୍ୟୁରୋ : ଛତୁଆ ଖାଇ ୫ ବର୍ଷର ଝିଅର ମୃତ୍ୟୁ। ପରିବାରର ଅନ୍ୟ ତିନି ଗୁରୁତର ହୋଇଛନ୍ତି । ରାମଗିରି ଗ୍ରାମର ଶିବ ଶଙ୍କର ବଡମୁଣ୍ଡିଙ୍କ ପରିବାର ଅଙ୍ଗନବାଡ଼ି କେନ୍ଦ୍ରର ଛତୁଆ ଖାଇଥିଲେ। ତେବେ ପରେ ସମସ୍ତେ ଅସୁସ୍ଥ ହୋଇ ପଡିବା ପରେ ସମସ୍ତଙ୍କୁ ଭର୍ତ୍ତି କରାଯାଇଥିଲା ସେଠାରେ ଶିବ ଶଙ୍କରଙ୍କ ଝିଅର ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ। ଗୁରୁତରଙ୍କୁ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଗୁରୁତରଙ୍କ ମଧ୍ୟରେ ଶିବ ଶଙ୍କରଙ୍କ ବାପା ଅର୍ଜୁନ ବଡ଼ମୁଣ୍ଡି ଅନ୍ୟ ଜଣେ ଶିଶୁ ଗୁରୁତର ଥିବାବେଳେ ୧୩ ବର୍ଷ ବୟସର ଝିଅ ସୁମିତ୍ରା ଅସୁସ୍ଥ ଥିବା ଜଣାପଡ଼ିଛି।

କାଶ୍ମୀରରେ ବଡ଼ ଏନକାଉଣ୍ଟର : ଯବାନଙ୍କ ସହିତ ଚାଲିଛି ଗୁଳି ବିନିମୟ

ନନ୍ଦିଘୋଷ ବ୍ୟୁରୋ : ଜାମ୍ମୁ କାଶ୍ମୀରର କାଠୁଆରେ ବଡ଼ ଧରଣର ଏନକାଉଣ୍ଟର। କିଛି ଆତଙ୍କବାଦୀ ଅନୁପ୍ରବେଶ କରିବାକୁ ଉଦ୍ୟମ କରିବା ବେଳେ ଯବାନଙ୍କ ସହିତ ମୁହାଁମୁହିଁ ହୋଇଛନ୍ତି। ଘମାଘୋଟ ଗୁଳି ବିନିମୟ ଚାଲିଛି। ଅନ୍ତର୍ଜାତୀୟ ସୀମା ରେଖାରେ ହିରାନଗର ସେକ୍ଟରର ସାନ୍ୟାଲ ଗାଁ ନିକଟରେ ସୁରକ୍ଷାକର୍ମୀ ସର୍ଚ୍ଚ ଅପରେସନ କରୁଥିଲେ। କିଛି ଆତଙ୍କବାଦୀ ଲୁଚିଥିବାର ସୂଚନା ପରେ ଏହି ଅପରେସନ ଆରମ୍ଭ ହୋଇଥିଲା।

ଏହି ସମୟରେ ଗୁଳି ବିନିମୟ ଆରମ୍ଭ ହୋଇଥିଲା। ସେହି ସ୍ଥାନକୁ ଅଧିକ ସୁରକ୍ଷାକର୍ମୀ ପଠା ଯାଇଛି। କିଛି ଦିନ ହେଲା ବିଶେଷ କରି ଶୀତ କମିବା ପରେ ଜାମ୍ମୁ କାଶ୍ମୀରରେ ବଢ଼ିଛି ଆତଙ୍କବାଦୀଙ୍କ ଅନୁପ୍ରବେଶ। ସେନାର ତଥ୍ୟ ଅନୁସାରେ ୨୦୨୪ରେ ୭୫ ଆତଙ୍କବାଦୀ ନିହତ ହୋଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ପାକିସ୍ତାନୀ। ସୀମା ସେପଟରୁ ଭାରତରେ ଅନୁପ୍ରବେଶ ବେଳେ ସେମାନେ ନିହତ ହୋଇଛନ୍ତି।

ଓଡ଼ିଶା ପ୍ରଗତିରେ ଏବେ ବି ନମ୍ବର ୱାନ ନବୀନ ମଡେଲ

ନନ୍ଦିଘୋଷ ବ୍ୟୁରୋ : ଓଡ଼ିଶାର ପ୍ରଗତିରେ ନବୀନ ମଡେଲ ଏବେ ବି ଚର୍ଚ୍ଚାରେ । ୨୦୧୭ରୁ ୨୦୨୨ର ମୁଣ୍ଡ ପିଛା ଆୟ ବୃଦ୍ଧିରେ ଏକାଧିକ ଡବଲ ଇଞ୍ଜିନ ସରକାରଙ୍କୁ ପଛରେ ପକାଇଥିଲା ଓଡ଼ିଶା । ସାରାଦେଶରେ ଅନ୍ୟରାଜ୍ୟ ତୁଳନାରେ ଓଡ଼ିଶା ରାଜ୍ୟର ନିଟ୍ ଘରୋଇ ଉତ୍ପାଦ ଅନୁପାତରେ ମୁଣ୍ଡ ପିଛା ଆୟ ବଢାଇଥିଲା ୨୨.୯୯ ପ୍ରତିଶତ ।  ଏହି କଥା ପ୍ରକାଶ କରିଛି ଦେଶର ଏକ ପ୍ରତିଷ୍ଠିତ ସର୍ଭେ ସଂସ୍ଥା ଇଣ୍ଡିଆନ୍ ଟେକ୍ ଆଣ୍ଡ ଇନ୍ଫ୍ରା ।  ବିଜେଡି ଶାସନରେ ନଥିଲେ ବି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଶାସନ ଅମଳ କଥା ଏବେ ବି ଚର୍ଚ୍ଚାରେ । ପୂର୍ବ ସରକାର ସମୟରେ ଲୋକଙ୍କ ପାଇଁ ହୋଇଥିବା ଜନକଲ୍ୟାଣକାରୀ ଯୋଜନାର ନଜିର ଭାରତ ସରକାରଙ୍କ ନୀତି ଆୟୋଗ ଅନ୍ୟରାଜ୍ୟକୁ ଅନୁପାଳନ ନେଇ ସୁପାରିଶ କରିଥିଲେ । ଖାଦ୍ୟ ସୁରକ୍ଷାଠାରୁ ଆରମ୍ଭ କରି ସ୍ବାସ୍ଥ୍ୟ, ସହରାଞ୍ଚଳ ଗରିବଙ୍କୁ ରୋଜଗାର ଏବଂ  ମହିଳାଙ୍କ ଆର୍ଥିକ ବିକାଶ ନେଇ ନବୀନ କରିଥିଲେ ବହୁବିଧ ଯୋଜନା।

ସର୍ଭେ ଅନୁଯାୟୀ ତେଲଙ୍ଗାନା ମୁଣ୍ଡ ପିଛା ଆୟ ବୃଦ୍ଧିରେ ପ୍ରଥମ ସ୍ଥାନରେ ରହିଛି । ତାମିଲନାଡ଼ୁ ଦ୍ବିତୀୟ ଓ କର୍ଣ୍ଣାଟକ ତୃତୀୟ ସ୍ଥାନରେ ରହିଛି । ଓଡ଼ିଶାର ସ୍ଥାନ ରହିଛି ଚାରି ନମ୍ବରରେ । ବିଜେପି ଶାସିତ ରାଜ୍ୟ ମଧ୍ୟପ୍ରଦେଶ ଓ ଉତ୍ତରପ୍ରଦେଶ ରାଜ୍ୟ ବି ନିଟ୍ ମୁଣ୍ଡ ପିଛା ଆୟ ବୃଦ୍ଧିରେ ଓଡ଼ିଶା ସମକକ୍ଷ ହୋଇପାରିନଥିଲେ । ଗରିବଙ୍କୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା, ମୁକ୍ତା ଯୋଜନା, ନିର୍ମାଣ ଶ୍ରମିକଙ୍କୁ ସାମାଜିକ ସୁରକ୍ଷା ଯୋଜନାରେ ଅନ୍ତର୍ଭୁକ୍ତ କରି ଆର୍ଥିକ ଅନଗ୍ରସରଙ୍କ ଆୟ ବୃଦ୍ଧିରେ ବଡ଼ ଭୂମିକା ରହିଥିବା ନବୀନ ମଡେଲ୍ ବୋଲି ବୁଦ୍ଧିଜୀବୀ କହିଛନ୍ତି ।

ରାଜ୍ୟର ପ୍ରଗତିରେ ପୂର୍ବ ସରକାରଙ୍କ ଅବଦାନକୁ ଏବେ ବି ଲୋକ ମନେପକାଉଛନ୍ତି । ମହାମାରୀ ହେଉ କି ବାତ୍ୟା ଭଳି ଦୁର୍ବିପାକ- ନବୀନଙ୍କ ଜିରୋ କାଜୁଆଲଟି ମନ୍ତ୍ର ଆଜି ବି ଜାତୀୟ ଓ ଅନ୍ତରାଷ୍ଟ୍ରୀୟ ସ୍ତରରେ ଉଦାହରଣ ଦିଆଯାଉଛି ।

 

ଆସନ୍ତାକାଲି ନୟାଗଡ କଣ୍ଟିଲୋ ଗସ୍ତରେ ଆସିବେ ରାଷ୍ଟ୍ରପତି ; ସୁରକ୍ଷା ବ୍ୟବସ୍ଥାକୁ କଡାକଡି

ନନ୍ଦିଘୋଷ ବ୍ୟୁରା : ଆସନ୍ତାକାଲି ନୟାଗଡ କଣ୍ଟିଲୋ ଗସ୍ତରେ ଆସିବେ ରାଷ୍ଟ୍ରପତି । ଏଥିପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆସନ୍ତାକାଲି ମଧ୍ୟାହ୍ନ ସାଢେ ୧ଟା ସମୟରେ ପ୍ରଥମେ ଭୁବନେଶ୍ବର ବିମାନବନ୍ଦରରେ ପହଞ୍ଚିବେ ଏବଂ ସେଠାରୁ ସ୍ବତନ୍ତ୍ର ହେଲିକପ୍ଟର ଯୋଗେ କଣ୍ଟିଲୋ ନୀଳମାଧବ ମନ୍ଦିର ଗସ୍ତ କରିବେ । ସେଠାରେ ପୂଜା କରିବା ପରେ ଅନ୍ୟ କାର୍ଯ୍ୟକ୍ରମରେ ଯୋଗଦେବେ । କଣ୍ଟିଲୋ ନୀଳମାଧବଙ୍କ ଦର୍ଶନ କରିବା ପରେ ଜଗନ୍ନାଥ ସଂସ୍କୃତିର ମୂଳପୀଠ ତଥା ଭାପୁର ବ୍ଲକ ଅଧୀନ କାଳିଆପଲ୍ଲୀ ଜଙ୍ଗଲ ମଧ୍ୟରେ ଶବର ରାଜା ବିଶ୍ବାବସୁ ଓ ଲଲିତାଙ୍କ ଜନ୍ମମାଟି ପରିଦର୍ଶନ କରିବେ ।

ଏହାପରେ କାଳିଆପଲ୍ଲୀ ଗ୍ରାମରେ ଥିବା ଶବର ରାଜା ବିଶ୍ବାବସୁଙ୍କ ପୀଠ ପରିଦର୍ଶନ କରିବା ସହ ବିଶ୍ବଶାନ୍ତି ମହାଯଜ୍ଞର ପୂର୍ଣ୍ଣାହୁତି କାର୍ଯ୍ୟକ୍ରମରେ ଯୋଗଦେବେ । ଶେଷରେ ବିଶ୍ବାବସୁ ଶବର ସମାଜ ଦ୍ବାରା ଆୟୋଜିତ ସାଧାରଣ ସଭାରେ ଯୋଗଦେବେ । ରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି ଆଇନଶୃଙ୍ଖଳା ବ୍ୟବସ୍ଥା, ଅସ୍ଥାୟୀ ହେଲିପ୍ୟାଡ ଓ ଅନ୍ୟାନ୍ୟ ବ୍ୟବସ୍ଥା ପରିଚାଳନା ନେଇ ସ୍ଥିତି ସମୀକ୍ଷା କରିଛନ୍ତି ନୟାଗଡ଼ ଜିଲାପାଳ ଓ ଏସ୍‌ପି । ବ୍ୟାପକ ପୋଲିସ ଫୋର୍ସ ମୁତୟନ କରାଯିବା ସହ କାରକେଡ ବ୍ୟବସ୍ଥା କଡାକଡି କରାଯାଇଛି । ୧୨ ପ୍ଲାଟୁନ୍ ଫୋର୍ସ ସହ ୩ DCP ସୁରକ୍ଷା ଦାୟିତ୍ବରେ ରହିବେ । ଗନ୍ତବ୍ୟସ୍ଥଳ ମାନଙ୍କରେ ସୁରକ୍ଷା ବ୍ୟବସ୍ଥା ସହ ଟ୍ରାଫିକ ନିୟନ୍ତ୍ରଣ ଦାୟିତ୍ୱରେ ବଛା ବଛା ଅଫିସରଙ୍କୁ ଦାୟିତ୍ୱ ଦିଆଯାଇଛି ବୋଲି ସୂଚନା ଦେଇଛନ୍ତି ଭୁବନେଶ୍ୱର ଡିସିପି ।

ଶ୍ରମଜୀବୀଙ୍କ ସ୍ୱର ସାଜିବ ବିଜୁ ଶ୍ରମିକ ସାମୁଖ୍ୟ ; ରାଜ୍ୟ ସରକାରଙ୍କ ଉପରେ ଗର୍ଜିଲା ବିଜେଡି

ନନ୍ଦିଘୋଷ ବ୍ୟୁରୋ : ଶ୍ରମିକ ବିରୋଧୀ ସାଜିଛି ବିଜେପି ସରକାର । ଶ୍ରମିକଙ୍କ ସ୍ବର ସାଜିବ ବିଜୁ ଶ୍ରମିକ ସାମୁଖ୍ୟ । ମାଆମାନଙ୍କୁ ଭୁତାଇ ରାଜରାସ୍ତାରେ ବସାଇଦେଲା ଲୋକଙ୍କ ସରକାର । ମିଶନଶକ୍ତି ଦୌଡିବା ନାଁରେ ପଙ୍ଗୁ କରିଦେଲା । ମେ ୧ ରାଜ୍ୟବ୍ୟାପି ଶ୍ରମିକ ଦିବସ ପାଳିବ ବିଏସଏସ । ବିଜୁ ଶ୍ରମିକ ସାମୁଖ୍ୟ ରାଜ୍ୟ ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକରେ ମାନସ ମନ୍ଥନ । ଶ୍ରମିକମାନଙ୍କ ହକ ଓ ନାର୍ଯ୍ୟ ଦାବି ଲାଗି ତିଆରି ହେଲା ରୋଡ ମ୍ଯାପ୍ । ବିଜେପି ସରକାରରେ ଖାଦ୍ଯ ସୁରକ୍ଷା ଆଇନରେ ୨୦ ଲକ୍ଷ୍ୟରୁ ଉର୍ଦ୍ଧ୍ବ ସାଧାରଣ ଲୋକ ବଞ୍ଚିତ ହେବେ । ନିର୍ମାଣ ଶ୍ରମିକ ଓ ପରିବହନ ଶ୍ରମିକ ବୋର୍ଡ ପରି ଅନେକ ବୋର୍ଡ କାର୍ଯ୍ୟକାରୀ ହେଉ ନାହିଁ । ଆଶା, ପାଚିକା, ଅଙ୍ଗନବାଡି, ମିଶନଶକ୍ତି, ଇସି, ଏମବିକେ ଭଳି ଏକାଧିକ ଶ୍ରମଜୀବୀ ସଂର୍ଘଷ ଓ ସଂକଟରେ ଗତି କରୁଛନ୍ତି । ନବୀନ ପଟ୍ଟନାୟକଙ୍କ ସରକାର ଥିବାବେଳେ ଯେଉଁସବୁ ସୁବିଧା ପାଉଥିଲେ, ଆଜି ସେମାନେ ପାଉ ନାହାନ୍ତି । ତେଣୁ ଶ୍ରମଜୀବୀଙ୍କୁ ନ୍ୟାୟ ଦେବା ପାଇଁ ବିଜୁ ଶ୍ରମିକ ସାମୁଖ୍ୟ ବଡ଼ଧରଣର ଆନ୍ଦୋଳନକୁ ଓହ୍ଲାଇବ ।

ରାଜ୍ୟରେ ହୁ ହୁ ଦରଦାମ ବଢିବାରେ ଲାଗିଛି । ହେଲେ ଡବଲ ଇଞ୍ଜିନ ସରକାର ଶ୍ରମିକମାନଙ୍କ ଦୁଃଖ ଓ ଦରମା ବୃଦ୍ଧି କଥା ଭୁଲି ଯାଇଛି । ରାଜ୍ୟରୁ ଅନ୍ୟ ରାଜ୍ୟକୁ ଶ୍ରମିକ ଭାବରେ କାର୍ଯ୍ୟ କରିବାକୁ ଯାଇ ଅକାଳରେ ମୃତ୍ୟୁ ହେଉଛି । ଏଥିରେ ରୋକ ଲଗାଇବା ପାଇଁ ଜାତୀୟ ସ୍ତରର ଆଇନ ଲାଗୁ କରାଯାଉଛି । ଏପରି ଏକାଧିକ ସମସ୍ଯାକୁ ନେଇ ରାଜ୍ୟ ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକରେ ଆଲୋଚନା ହୋଇଛି ।

ବୈଠକରେ ବିଜୁ ଶ୍ରମିକ ସାମୁଖ୍ୟର ରାଜ୍ୟ ସଭାପତି ପ୍ରଫୁଲ୍ଲ ସାମଲ, ମହାସଚିବ ସୁବାସ ସିଂ, ଉପସଭାପତି ପ୍ରିତିରଞ୍ଜନ ଘଡେ଼ଇ, ରାଜ୍ୟ ମୁଖ୍ୟ ସଂଯୋଜକ ଆଶାକର୍ମୀ ସ୍ୱରୂପ କୁମାର ଦାସଙ୍କ ସମେତ ଅଙ୍ଗନବାଡିର ରାଜ୍ଯ ସଭାପତି, ଆଶା ସାମୁଖ୍ୟ ସଭାନେତ୍ରୀ, ପାଚିକା ସଂଘର ସଭାପତି ଓ ରାଜ୍ୟ ସମ୍ପାଦକ, ଅଟୋ ଚାଳକ ମହାସଂଘର ସମ୍ପାଦକ ପ୍ରମୁଖ ଯୋଗ ଦେଇଥିଲେ ।

ଓଡ଼ିଶା ପାଣି ଉପରେ ଛତିଶଗଡ଼ର ଆଖି, ମହାନଦୀ ପରେ ଇନ୍ଦ୍ରାବତୀ ଜଳ ନେବାକୁ ଚାଲିଛି ଚକ୍ରାନ୍ତ

ନନ୍ଦିଘୋଷ ବ୍ୟୁରୋ : ମହାନଦୀ ପରେ ଇନ୍ଦ୍ରାବତୀ ଚକ୍ରାନ୍ତ । ଓଡ଼ିଶା ପାଣି ଉପରେ ପଡ଼ୋଶୀ ରାଜ୍ଯର ଆଖି । ଆଇନ ଭାଙ୍ଗୁଛନ୍ତି ଛତିଶଗଡ଼ ସରକାର । ସ୍ଥିତି ଅନୁଧ୍ଯାନ କଲା ବିଜେଡି ଫ୍ଯାକ୍ଟ ଫାଇଣ୍ଡିଂ ଟିମ୍ । ଇନ୍ଦ୍ରାବତୀର ଶାଖା ହେଉଛି ଯୋହଁରା ନଦୀ । ୨୦୦୩ରେ CWC ପକ୍ଷରୁ ଉଭୟ ସରକାର ୫୦ ଭାଗ ଲେଖାଏଁ ପାଣି ନେବାକୁ ଚୁକ୍ତି ହୋଇଥିଲା । କିନ୍ତୁ ନୂଆ ସରକାର ଆସିବା ପରେ ଏହି ଚୁକ୍ତିକୁ ଖିଲାପ କରାଯାଇଛି । କିଛିଦିନ ହେବ ଯୋହଁରା ନଦୀ ମୁହାଣରେ ବାଲି ବନ୍ଧ କରି ଛତିଶଗଡ଼ ଆଡ଼କୁ ପାଣି ନେବାକୁ ଚାଲିଛି ଚକ୍ରାନ୍ତ । ଏହାକୁ ନେଇ କୋଟପାଡ଼ ବ୍ଲକର ୮ ପଞ୍ଚାୟତର ଚାଷୀମାନଙ୍କ ମଧ୍ୟରେ ଛନକା ପଶିଛି । ପ୍ରତିବାଦରେ ୮ ପଞ୍ଚାୟତର ବହୁ ଚାଷୀ ବାଲି ବନ୍ଧକୁ ଭାଙ୍ଗି ଦେଇଛନ୍ତି । ପୂର୍ବତନ ଜଳ ସମ୍ପଦ ମନ୍ତ୍ରୀ ରବି ନାରାୟଣ ନନ୍ଦଙ୍କ ନେତୃତ୍ବରେ ବିଜେଡିର ଏକ ଫ୍ଯାକ୍ଟ ଫାଇଣ୍ଡିଂ ଟିମ ଯୋହଁରା ମୁହାଣରେ ପହଞ୍ଚି ସ୍ଥିତି ଅନୁଧ୍ଯାନ କରିଛନ୍ତି।

ଯୋହଁରା ନଦୀ ପାଣିକୁ କୌଣସି ପରିସ୍ଥିତିରେ ଛାଡିବେ ନାହିଁ ବୋଲି କହିଛନ୍ତି ବିଜେଡି ନେତା । ଡବଲ ଇଞ୍ଜିନ ସରକାର ପଦକ୍ଷେପ ନନେଲେ ଆଗାମୀ ଦିନରେ ଆନ୍ଦୋଳନ ତୀବ୍ରତର କରିବାକୁ ଚେତାବନୀ ଦେଇଛନ୍ତି । ସରକାର ଓଡ଼ିଶାର ଚାଷୀଙ୍କୁ ପାଣି ନ ଛାଡ଼ିବାକୁ ଏପରି ବନ୍ଧ କରୁଥିବା ଦେଖିବାକୁ ମିଳିଛି । ଯାହାକି ଡବଲ ଇଞ୍ଜିନ ସରକାରଙ୍କ ଚାଷୀ ମାରଣା ନୀତିକୁ ପଦାରେ ପକାଇଛି । ଏହି ପ୍ରସଙ୍ଗ ବିଧାନସଭାରେ ଉଠାଇବ ବୋଲି କହିଛି ବିଜେଡି।

ମୁସ୍କାନ ଠାରୁ ସମ୍ପର୍କ ତୁଟାଇଲେ ବାପା-ମା’; କହିଲେ, ତା’ସହ ଆମର କୌଣସି ସମ୍ପର୍କ ନାହିଁ….

ନନ୍ଦିଘୋଷ ବ୍ୟୁରୋ : ଉତ୍ତରପ୍ରଦେଶ ମେରଟର ହତ୍ୟାକାଣ୍ଡ ଘଟଣାକୁ ନେଇ ଏବେ ସବୁଠି ଚର୍ଚ୍ଚା ଜୋରଧରିଛି । ସୌରଭ ରାଜପୁତଙ୍କ ହତ୍ୟା ଘଟଣାରେ ଏବେ ନୂଆ ତଥ୍ୟ ସାମ୍ନାକୁ ଆସିଛି । ହତ୍ୟାକାଣ୍ଡରୁ ମୁଖ୍ୟ ଆରୋପୀ ମୁସ୍କାନକୁ ଏବେ ତାଙ୍କ ନିଜ ପରିବାର ତରଫରୁ ମଧ୍ୟ କୌଣସି ସାହାରା ମିଳୁନାହିଁ । ବରଂ ତାଙ୍କ ବାପା ମା’ ସ୍ପଷ୍ଟ ଭାବେ କହିଛନ୍ତି କି, ମୁସ୍କାନ ସହ ତାଙ୍କର କୌଣସି ସମ୍ପର୍କ ନାହିଁ । କି ସେ ତାକୁ ଭେଟିବାକୁ କେବେ ବି ଜେଲକୁ ଯିବେନି ଓ ତା ପାଇଁ କୌଣସି ପ୍ରକାର ଆଇନ ଅନୁଯାୟୀ କେଶ୍ ଲଢିବେ ନାହିଁ । ଅନ୍ୟପଟେ ଜେଲରେ ବନ୍ଦୀଥିବା ମୁସ୍କାନ ନିଜ ପାଇଁ ସରକାରୀ ଓକିଲ ପାଇଁ ଅନୁରୋଧ କରିଛନ୍ତି ।

ଏହି ଘଟଣାକୁ ନେଇ ମୁସ୍କାନର ବାପା ନିଜ ବୟାନରେ କହିଛନ୍ତି କି, ମୁସ୍କାନ ସହ ସବୁ ସମ୍ପର୍କ ସେ ଶେଷ କରିଦେଇଛନ୍ତି । ସେ ତା ପାଇଁ କୌଣସି କେସ୍ ଲଢିବେ ନାହିଁ । ଅନ୍ୟପଟେ ତାଙ୍କ ନିଜ ମା ମଧ୍ୟ ସମାନ ବୟାନ ଦେଇଛନ୍ତି ଏବଂ କହିଛନ୍ତି, ସତ୍ୟ ପାଇଁ କେସ୍ ଲଢାଯାଏ , ଏପରି ଘଟଣା ପାଇଁ ନୁହେଁ । ସେ ଆହୁରି ମଧ୍ୟ କହିଛନ୍ତି କି, ସେ ସିନା ମୁସ୍କାନର ପ୍ରକୃତ ମାଆ କିନ୍ତୁ ମୁସ୍କାନ ନିଜ ମାଉସୀ ସହ ଅଧିକ ନିଜର ଭାବେ, ଏଥିପାଇଁ ସେ ତାକୁ ସାବତ ମାଆ ବୋଲି ମାନେ ।

ସୂଚନା ମୁତାବକ, ମୁସ୍କାନ ଜେଲ ପ୍ରଶାସନକୁ ଅନୁରୋଧ କରିଛି କି, ତା କେସ୍ ଲଢିବା ପାଇଁ ସରକାରୀ ଓକିଲ ଦିଆଯାଉ । କାରଣ ତା ପରିବାର ତରଫରୁ ଏପର୍ଯ୍ୟନ୍ତ କେହି ଭେଟିବା ପାଇଁ ଆସିନାହାନ୍ତି କି, କୌଣସି ପ୍ରକାର ଆଇନ ସହାୟତା ମିଳିନାହିଁ । ଅନ୍ୟପକ୍ଷେ, ଜେଲ୍ ପ୍ରଶାସନ ନିୟମାନୁଯାୟୀ ମୁସ୍କାନର ଦାବିକୁ ବିଚାର କରି କୋର୍ଟରେ ସରକାରୀ ଓକିଲ ପାଇଁ ଚିଠି ପଠାଇଛନ୍ତି ।

ପ୍ରହସନ ପାଲଟିଛି ବିଧବା ଭତ୍ତା, ୧୦ ବର୍ଷ ପରେ ବି ଯୋଜନାରୁ ବଞ୍ଚିତ ହିତାଧିକାରୀ

ନନ୍ଦିଘୋଷ ବ୍ୟୁରୋ : ପ୍ରହସନ ପାଲଟିଛି ବିଧବା ଭତ୍ତା । ଏଯାଏଁ ଯୋଜନାରୁ ବଞ୍ଚିତ ହୋଇଛନ୍ତି ହିତାଧିକାରୀ । ସ୍ବାମୀ ଆରପାରିକୁ ଯବାର ୧୦ ବର୍ଷ ବିତିଲାଣି । ହେଲେ ଆଜି ପର୍ଯ୍ୟନ୍ତ ସରକାରୀ ସହାୟତାରୁ ବାଦ ପଡିଛନ୍ତି ଚନ୍ଦୁରି ପାତ୍ର । ଏବେ ତାଙ୍କୁ ୬୧ ବର୍ଷ । ଏବେ ବି ସେ ଭତ୍ତା ପାଇଁ ସରପଞ୍ଚଙ୍କ ଠାରୁ ଜିଲ୍ଲାପାଳଙ୍କ ନିକଟକୁ ଦୌଡି ଦୌଡି ନୟାନ୍ତ ହୋଇଛନ୍ତି । ନରସିଂହପୁର ବ୍ଲକ ସାଗର ଗାଁର ଚନ୍ଦୁରି ମହାପାତ୍ରଙ୍କ ଏହି କାହାଣୀ ଶୁଣି ଯେକେହିବି ଦୁଃଖ ପ୍ରକାଶ କରୁଛନ୍ତି । ଖାଲି ଭତ୍ତା ନୁହଁ ମୁଣ୍ଡକୁ ଛାତଟିଏ ବି ନଥିବା ଅଭିଯୋଗ କରିଛନ୍ତି ମହିଳା । ତାଙ୍କୁ ଘର ଖଣ୍ଡେ ସହ ଭତ୍ତା ପାଇଁ ସ୍ଥାନୀୟ ଲୋକେ ମଧ୍ୟ ଦାବି କରିଛନ୍ତି ।

ସରକାରୀ ଅଧିକାରୀ ପଂଚାୟତ ସ୍ତରରେ ଲୋକଙ୍କ ସୁବିଧା ଅସୁବିଧା ବୁଝୁ ନଥିବାରୁ ସରକାରୀ ଯୋଜନାରୁ ଅନେକ ହିତାଧିକାରୀ ବାଦ ପଡୁଥିବା ଅଭିଯୋଗ ହୋଇଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। କେବଳ ଚନ୍ଦୁରି ନୁହନ୍ତି ନରସିଂହପୁର ବ୍ଲକର ଅନେକ ହିତାଧିକାରୀ ଏଥିରୁ ବଞ୍ଚିତ ହୋଇ ଦୁର୍ଦ୍ଦିନ ରେ ଦିନ କାଟୁଛନ୍ତି। ସେପଟେ ନରସିଂହପୁର ବିଡ଼ିଓ କହିଛନ୍ତି ଘଟଣାର ତଦନ୍ତ କରି ତୁରନ୍ତ ଭତ୍ତା ପାଇନଥିବା ହିତାଧୀକାରୀ ମାନଙ୍କୁ ଟଙ୍କା ଯୋଗାଇବାର ବ୍ଯବସ୍ଥା କରାଯିବ।

ନରସିଂହପୁର ବ୍ଲକର ବିଭିନ୍ନ ଗାଁରେ ଓ ପଂଚାୟତ ସ୍ତରରେ ଭତ୍ତା ଟଙ୍କାରୁ ବଞ୍ଚିତ ହୋଇ ନାନାଦି ଦୁଃଖ ଭୋଗୁଛନ୍ତି ଭିନ୍ନକ୍ଷମ ଓ ବିଧବା ମହିଳା ମାନେ । ତୁରନ୍ତ ଏସବୁର ସମାଧାନ କରି ସେମାନଙ୍କୁ ଭତ୍ତା ଟଙ୍କା ଯୋଗାଇ ଦେବାର ଆବଶ୍ଯକତା ରହିଛି ବୋଲି ସାଧାରଣରେ ଦାବି ହୋଇଛି।