ଟିଟିଲାଗଡ : ବିଷାକ୍ତ ଖାଦ୍ୟ ଖାଇ ୨୫ ଛାତ୍ରୀ ଅସୁସ୍ଥ। ଟିଟିଲାଗଡ ଖୋଲାନ କସ୍ତୁରବା ଗାନ୍ଧୀ ମହିଳା ମହାବିଦ୍ୟାଳୟ ହଷ୍ଟେଲର ୨୫ଜଣ ଛାତ୍ରୀ ବିଶାକ୍ତ ଖାଦ୍ୟ ଖାଇ ଅସୁସ୍ଥ ହୋଇପଡିଛନ୍ତି। ସମସ୍ତ ଅସୁସ୍ଥ ଛାତ୍ରୀଙ୍କୁ ଖୋଲାନ ଗୋଷ୍ଠୀ ସ୍ଵସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। କସ୍ତୁରବା ଗାନ୍ଧୀ ବିଦ୍ୟାଳୟ ହଷ୍ଟେଲରେ ଥିବା ଛାତ୍ରୀ ମାନେ ଗତ ରାତିରେ ଖାଇସାରିବା ପରେ ୨୫ ଜଣ ଛାତ୍ରୀଙ୍କର ହଠାତ୍ ଝାଡ଼ା,ବାନ୍ତି ହେବାସହ ମୁଣ୍ଡ ବୁଲାଇ ଅସୁସ୍ଥ ହୋଇପଡିଥିଲୋ। ହଷ୍ଟେଲ କର୍ତ୍ତୁପକ୍ଷ ସମସ୍ତ ଅସୁସ୍ଥ ଛାତ୍ରୀଙ୍କୁ ଖୋଲାନ ହସ୍ପିଟାଲରେ ଭର୍ତ୍ତି କରିଥିଲୋ। ହଷ୍ଟେଲରେ କୌଣସି ବିଷାକ୍ତ ଖାଦ୍ୟ ଖାଇ ଏଭଳି ହୋଇଥିବା ଡାକ୍ତର୍ ସୂଚନା ଦେଇଛନ୍ତି। ଅନ୍ୟପଟେ ଘଟଣା ସ୍ଥଳରେ ସ୍ବାସ୍ଥ୍ୟ ଓ ଶିକ୍ଷା ବିଭାଗ ସହ ଅନ୍ୟାନ ବରିଷ୍ଠ ଅଧିକାରୀ ଉପସ୍ଥିତ ରହି ଘଟଣାର ତଦାରଖ କରୁଛନ୍ତି।
ହତ୍ୟା ମାମଲା ୪ ଜଣଙ୍କୁ ଆଜୀବନ କାରାଦଣ୍ଡାଦେଶ
ଭୁବନେଶ୍ବର: ହତ୍ଯା ମାମଲାରେ ଦୋଷୀ ସାବ୍ୟସ୍ତ ୪ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ । ତଥ୍ଯ ପ୍ରମାଣ ସହ ୧୬ ଜଣ ସାକ୍ଷୀଙ୍କ ବୟାନକୁ ଆଧାର କରି ଭୁବନେଶ୍ବର ଏଡିଜେ କୋର୍ଟ ୨ ଏହି ରାୟ ଶୁଣାଇଛନ୍ତି । ସମସ୍ତ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶରେ ଦଣ୍ଡିତ କରିଛନ୍ତି ଅଦାଲତ ।
୨୦୧୭ ମାର୍ଚ୍ଚ ୨ ତାରିଖ ରାତିରେ ଖୋର୍ଦ୍ଧା ଷଣ୍ଢପୁର ଅଞ୍ଚଳରେ ଅନୁପ ବେହେରାଙ୍କୁ ହତ୍ୟା କରାଯାଇଥିଲା । ଦୋକାନରେ ଶୋଇବା ପାଇଁ ଯାଉଥିବା ବେଳେ ହାଲୁ ବେହେରା, କାହ୍ନା ଓରଫ ମୃଣାଲ ବେହେରା, ଗୋପିଆ ଓରଫ ଗୋପିନାଥ ବେହେରା ଏବଂ ନାଲୁ ବେହେରା ସଂଘବଦ୍ଧ ଆକ୍ରମଣ କରି ତାଙ୍କୁ ହତ୍ୟା କରିଥିଲେ ।
ଲୁହାରଡ, ମାରଣାସ୍ତ୍ରରେ ଆକ୍ରମଣ କରିଥିଲେ ୪ ଦୋଷୀ । ଗୁରୁତର ଅବସ୍ଥାରେ ଅନୂପଙ୍କୁ ପରିବାର ଲୋକେ ଉଦ୍ଧାର କରି କ୍ୟାପିଟାଲ ହସ୍ପିଟାଲ ଆଣିଥିଲେ । ସେଠାରେ ତାଙ୍କୁ ଡାକ୍ତର ମୃତ ଘୋଷାଣ କରିଥିଲେ। ଏନେଇ ପରିବାର ଲୋକଙ୍କ ଅଭିଯୋଗ ପରେ ପୋଲିସ ମାମଲା ରୁଜୁ କରିବା ସହ ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।
ଦାନ୍ତେଓ୍ବାଡ଼ାରେ ଏନକାଉଣ୍ଟର, ୫ ନକ୍ସଲ ମୃତ
ମାଲକାନଗିରି: ସୀମାନ୍ତ ଛତିଶଗଡ଼ର ଦାନ୍ତେୱାଡାରେ ପୁଣି ଏକ ଏନକାଉଣ୍ଟର । ନିରାପତ୍ତା ବାହିନୀ ଗୁଳିରେ ୫ ନକ୍ସଲଙ୍କ ମୃତ୍ୟୁ । ଦାନ୍ତେୱାଡା-ବିଜାପୁର ସୀମାରେ ହୋଇଥିବା ଏନକାଉଣ୍ଟରରେ ଲାଲଦୁର୍ଗ ପ୍ରତି ବଡ଼ ଧରଣର ଧକ୍କା ସୃଷ୍ଟି ହୋଇଛି ।
ନକ୍ସଲ ବିରୋଧୀ ଅପରେସନ ବେଳେ ଉଭୟ ପକ୍ଷ ମଧ୍ଯରେ ଗୁଳି ବିନିମୟ ଜାରି ରହିଥିଲା । ସକାଳ ୮ଟାରୁ ଆରମ୍ଭ ହୋଇଥିଲା ଅପରସେନ । ୫ ନକ୍ସଲଙ୍କ ମୃତଦେହ ଜବତ କରାଯାଇଛି । ସେମାନଙ୍କ ନିକଟରୁ ବିପୁଳ ଅସ୍ତ୍ରଶସ୍ତର ଜବତ ହୋଇଛି । ଗତ ମାର୍ଚ୍ଚ ୨୦ରେ ବିଜାପୁରରେ ହୋଇଥିବା ବଡ଼ ଧରଣର ଏନକାଉଣ୍ଟରରେ ୩୦ ନକ୍ସଲ ନିହତ ହୋଇଥିଲେ । ଘଟଣାରେ ଜଣେ ଡିଷ୍ଟ୍ରିକ୍ଟ ରିଜର୍ଭ ଯବାନ ସହିଦ ହୋଇଥିଲେ
ଡିଏସପି ପରିଚୟ ଦେଇ ଲୋକଙ୍କୁ ଠକୁଛି ନକଲି ପୋଲିସ, ନନ୍ଦିଘୋଷ ଟିଭି ହାତରେ ଠକର ଫଟୋ
ଭଦ୍ରକ: ଚାକିରି ନକଲି, ହେଲେ ଠାଣି ପୂରା ପୋଲିସ ବାବୁଙ୍କ ପରି । ନିଜକୁ ପୋଲିସ ବିଭାଗର ବଡ଼ ବାବୁ ଦର୍ଶାଇ ଲୋକଙ୍କୁ ଠକୁଥିବା ଏମିତି ଜଣେ ଠକର ଫଟୋ ଲାଗିଛି ନନ୍ଦିଘୋଷ ଟିଭି ହାତରେ । ଠକ ବାବୁ ଜଣଙ୍କ ହେଲେ ଭଦ୍ରକ ଜିଲ୍ଲା ବାସୁଦେବପୁର ଅଞ୍ଚଳର ମାନସ ରଞ୍ଜନ ସେନାପତି । ପୋଲିସ ବୋଲି ପରିଚୟ ଦେବାର ଫଟୋ ଓ କିଛଇ ଦସ୍ତାବିଜ ଏବେ ଭାଇରାଲ ହେବାରେ ଲାଗିଛି ।
ଗୃହ ବିଭାଗର ଏକ ପ୍ରମୋସନ ଲେଟର ସୋସିଆଲ ମିଡ଼ିଆରେ ଭାଇରାଲ ହେଉଛି । ଏଥିରେ ଦେଖିବାକୁ ମିଳୁଛି ମାନସ ରଞ୍ଜନ ସେନାପତିଙ୍କର କୁଆଡ଼େ ଡେପୁଟି ଏସପି ଭାବେ ପ୍ରମୋସନ ହୋଇଛି । ଏହି ଅର୍ଡରକୁ ନିଜ ସୋସିଆଲ ମିଡ଼ିଆ ଆକାଉଣ୍ଟରେ ସେୟାର କରିଥିଲା ଅଭିଯୁକ୍ତ ।
ଏହି ନୋଟିଫିକେସନର ସତ୍ୟତା ବର୍ତ୍ତମାନ ତଦନ୍ତ ସାପେକ୍ଷ । ସେପଟେ ଫେସବୁକ ଓ ଇନଷ୍ଟାଗ୍ରାମରେ ମଧ୍ୟ ଅନେକ ଫଟୋ ସେୟାର କରିଛନ୍ତି ଅଭିଯୁକ୍ତ । ଡିସିପି ଅଫିସ ସହ ଭଦ୍ରକ ଜିଲ୍ଲାରେ ବିଭିନ୍ନ ସ୍ଥାନରେ ଫଟୋ ଉଠାଇ ନକଲି ପୋଲିସ ଜଣଙ୍କ ନିଜକୁ ଅସଲି ବୋଲି ପ୍ରମାଣିତ କରିବାକୁ ଚାହୁଁଥିବା ଜାଣିବାକୁ ପାଇଛି ପୋଲିସ ।
ନାରୀ ନିର୍ଯାତନା ଓ ଆଇନଶୃଙ୍ଖଳା ସ୍ଥିତିର ଲମ୍ବା ତାଲିକା ଦେଖାଇ ରାଜ୍ୟ ସରକାରଙ୍କୁ କଂଗ୍ରେସର ଟାର୍ଗେଟ
ଭୁବନେଶ୍ବର: ଓଡ଼ିଶାରେ ମହିଳା ଅସୁରକ୍ଷିତ । ବଢ଼ି ଚାଲିଛି ନାରୀ ନିର୍ଯାତନା । ରାଜ୍ୟ ବିଜେପି ସରକାର ନିଦା ବିଷ୍ଣୁ ସାଜିଛନ୍ତି । ଅପରାଧୀକ କାର୍ଯ୍ୟକଳାପ ଚରମସୀମାରେ ପହଞ୍ଚିଛି । ଏମିତି କିଛି ଅଭିଯୋଗ କରିବା ସହ ଅପରାଧ ଓ ନାରୀ ନିର୍ଯାତନାର ଲମ୍ବା ତାଲିକା ଦେଖାଇ ରାଜ୍ୟ ବିଜେପି ସରକାରଙ୍କୁ ଟାର୍ଗେଟ କରିଛି କଂଗ୍ରେସ୍ ।
କେନ୍ଦ୍ରାପଡ଼ା ଜିଲ୍ଲାରେ ନାବାଳିକାଙ୍କ ଆତ୍ମହତ୍ୟା । କୋରାପୁଟ ଲକ୍ଷ୍ମୀପୁରରେ ନାବାଳିକାଙ୍କୁ ଦୁଷ୍କର୍ମ । ମୟୂରଭଞ୍ଜରେ ଗଣଦୁଷ୍କର୍ମ । ମାଲକାନଗିରି ଚିତ୍ରକୋଣ୍ଡାରେ ନାବାଳିକାଙ୍କ ସନ୍ତାନ ପ୍ରସବ । ପୁରୀ ପିପିଲିରେ ବି ନାବାଳିକା ଗର୍ଭବତୀ । କେନ୍ଦୁଝରରେ ଘଟିଥିବା ହତ୍ୟାକାଣ୍ଡରେ ବିଜେପି ନେତାଙ୍କ ସମ୍ପୃକ୍ତି ରହିଛି । ରାଜ୍ୟରେ ୪୪ ହଜାର ମହିଳା ଓ ଶିଶୁ ନିଖୋଜ । ଗତ ୯ ମାସରେ ବିଜେପି ସରକାରରେ ରାଜ୍ୟର ସ୍ଥିତି ଅତି ସାଂଘାତିକ । ଆଇନଶୃଙ୍ଖଲା ସମ୍ପୂର୍ଣ୍ଣ ବିପର୍ଯ୍ୟସ୍ତ । ଏପରି ଅଭିଯୋଗର ଲମ୍ବା ତାଲିକା ଗଣାଇ ରାଜ୍ଯ ସରକାରଙ୍କୁ ଟାର୍ଗେଟ କରିଛନ୍ତି କଂଗ୍ରେସର ଜାତୀୟ ମୁଖପାତ୍ର ସୁପ୍ରିୟା ଶ୍ରୀନେତ ।
ସେ କହିଛନ୍ତି, ଅପରାଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉନାହିଁ । ଆଦିବାସୀଙ୍କ ବିରୋଧରେ ଚାଲିଛି ଷଡ଼ଯନ୍ତ୍ର । ହେଲେ ଅନ୍ୟାୟ ବିରୋଧରେ କଂଗ୍ରେସ ସଂଗ୍ରାମ ଜାରି ରଖିବ । ସେ ଦାବି କରି କହିଛନ୍ତି, ବିଧାନସଭାରେ ସର୍ବଦଳୀୟ ସମିତି ଗଢାଯାଉ । ମହିଳାଙ୍କ ଭବିଷ୍ୟତ ସୁରକ୍ଷା, ସ୍ୱାବଲମ୍ବୀ ପାଇଁ ପଦକ୍ଷେପ ନିଆଯାଉ । ସେହିପରି କଂଗ୍ରେସ ସହ ହାତାହାତି, ବିଧାୟକଙ୍କୁ ସସପେଣ୍ଡ କଲେ କଂଗ୍ରେସ ଚୁପ ରହିବନି ବୋଲି ଚେତାଇ ଦେଇଛନ୍ତି ସୁପ୍ରିୟା ।
ରାଉରକେଲା ବିମାନ ବନ୍ଦରର ସମ୍ପ୍ରସାରଣ ଓ ଉନ୍ନତିକରଣ ପାଇଁ ସର୍ଭେ ଆରମ୍ଭ
ରାଉରକେଲା: ରାଉରକେଲା ବିମାନବନ୍ଦରର ହେବ ସମ୍ପ୍ରସାରଣ ଓ ଉନ୍ନତିକରଣ । ଏଥିପାଇଁ ଏୟାରପୋର୍ଟ ଅଥରିଟି ଅଫ ଇଣ୍ଡିଆ ପକ୍ଷରୁ ସର୍ଭେ କାମ ଆରମ୍ଭ ହୋଇଛି । ଏୟାରପୋର୍ଟ ଅଥରିଟି ଅଫ ଇଣ୍ଡିଆର ୬ ଜଣିଆ ଟିମ ରାଉରକେଲା ବିମାନ ବନ୍ଦରରେ ପହଞ୍ଚି ସର୍ଭେ କରୁଛନ୍ତି ।
ରାଉରକେଲା ବିମାନ ବନ୍ଦରର ସମ୍ପ୍ରସାରଣ ଓ ଉନ୍ନତିକରଣ କାର୍ଯ୍ୟ ପାଇଁ ରାଉରକେଲା ସହରବାସୀ ଦୀର୍ଘ ବର୍ଷ ହେଲା ଦାବି କରି ଆସୁଛନ୍ତି । ରାଉରକେଲା ବିମାନ ବନ୍ଦରକୁ 4C ଲାଇସେନ୍ସ ପ୍ରଦାନ କରିବା ସହ ଇନଷ୍ଟ୍ରୁମେଣ୍ଟ ଲାଣ୍ଡିଙ୍ଗ ସିଷ୍ଟମ, ନାଇଟ ଲାଣ୍ଡିଙ୍ଗ ସିଷ୍ଟମ କରିବା ପାଇଁ ଦାବି ହେଉଛି । ରାଉରକେଲା ସହରବାସୀଙ୍କ ବାରମ୍ବାର ଆନ୍ଦୋଳନ ଓ ଦାବି ପରେ ସର୍ଭେ କାମ ଆରମ୍ଭ ହୋଇଛି ।
ଟ୍ରମ୍ପଙ୍କ ଗୋଲ୍ଡ କାର୍ଡ ଭିସା ନେବାକୁ ନାହିଁ ନଥିବା ଆଗ୍ରହ, ଗୋଟିଏ ଦିନରେ ଏକ ହଜାରରୁ ଅଧିକ ବିକ୍ରି
ଓ୍ବାସିଂଟନ: ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଦ୍ବାରା ଆରମ୍ଭ କରାଯାଇଥିବା ଗୋଲ୍ଡ କାର୍ଡ ବା ଗୋଲଡେନ ଭିସା ପ୍ରତି ନାହିଁ ନଥିବା ଆଗ୍ରହ । କାର୍ଡ ପିଛା ୫ ନିୟୁତ ଡଲାର ବିନିମୟରେ ଆମେରିକାର ସ୍ଥାୟୀ ନାଗରିକତ୍ବ ଓ ଇଚ୍ଛାଧୀନ ନାଗରିକତ୍ବ ସ୍କିମ ପ୍ରତି ଲୋକେ ଦେଖାଉଛନ୍ତି ଆଗ୍ରହ । ଗୋଟିଏ ଦିନରେ ୧ ହଜାରରୁ ଅଧିକ ଗୋଲ୍ଡ କାର୍ଡ ବିକ୍ରି ହୋଇଥିବା ସୂଚନା ଦେଇଛନ୍ତି ବାଣିଜ୍ୟ ସଚିବ ହୋଓ୍ବାର୍ଡ ଲୁଟନିକ ।
ଆମେରିକାର ଏହି ନୂଆ ନିୟମ ଯୋଗୁଁ ଗୋଟିଏ ଦିନରେ ୫ ବିଲିୟନ ଡଲାର ଆୟ ହୋଇଥିବା ସୂଚନା ମିଳିଛି । ଗୋଲ୍ଡ କାର୍ଡ ସିଟିଜେନସିପ ନିୟମ ଆଧାରରେ ଯେଉଁ ବିଦେଶୀ ଧନୀ ନିବେଶକ ୫ ମିଲିୟନ ଡଲାର ଦେଇପାରିବେ ସେମାନଙ୍କୁ ଆମେରିକାରେ ସ୍ଥାୟୀ ନାଗରିକତ୍ବ ମିଳିବା ଲାଗି କ୍ଷେତ୍ର ପ୍ରସ୍ତୁତ ହେବ । ଦୀର୍ଘକାଳୀନ ରହଣୀ ଲାଗି ଗୋଲ୍ଡ କାର୍ଡ ସୁବିଧା ଦେଉଥିବା ହେତୁ ଅନେକ ବୈଧ ପ୍ରବାସୀ ଉପକୃତ ହେବେ । ନୂଆ ନିୟମ ଅନୁସାରେ ଆମେରିକାର ପ୍ରାୟ ୨୭ ନିୟୁତ ଲୋକ ଗୋଲ୍ଡ କାର୍ଡ ହାସଲ କରିବାର ସାମର୍ଥ୍ୟ ରହିଛି । ଏହି କାର୍ଡ ବ୍ୟକ୍ତି ପିଛା ପ୍ରଦାନ କରାଯାଇପାରିବ । ଅର୍ଥାତ ଜଣେ ବ୍ୟକ୍ତି ଚାହିଁଲେ ପତ୍ନୀ, ସନ୍ତାନ ଓ ପରିବାର ସଦସ୍ୟଙ୍କ ଲାଗି କ୍ରୟ କରିପାରିବେ । ଭାରତୀୟ ମୁଦ୍ରାରେ ୫ ନିୟୁତ ଡଲାରର ମୁଖ୍ୟ ପ୍ରାୟ ୪୩ କୋଟି ଟଙ୍କା ହେଉଥିବାରୁ ଅନେକ ଭାରତୀୟ ଏହି କାର୍ଡ ହାସଲ କରିପାରନ୍ତି ।
ଆହ୍ଲାବାଦ ଓ ଦିଲ୍ଲୀ ହାଇକୋର୍ଟ ବିଚାରପତି ଥିବାବେଳେ ଜଷ୍ଟିସ ଯଶଓ୍ବନ୍ତ ବର୍ମା ଦେଇଥିବା ରାୟର ପୁନଃ ସମୀକ୍ଷା ଦାବି
ନନ୍ଦିଘୋଷ ବ୍ୟୁରୋ: ଦିନକୁ ଦିନ ବଢ଼ିବାରେ ଲାଗିଛି ଜଷ୍ଟିସ ଯଶଓ୍ବନ୍ତ ବର୍ମାଙ୍କ ଅଡୁଆ । ତାଙ୍କ ବିରୋଧରେ ଅଧିକ କ୍ଷୁବ୍ଧ ହୋଇଛି ଆହ୍ଲାବାଦ ହାଇକୋର୍ଟ ବାର୍ ଆସୋସିଏସନ । ଆହ୍ଲାବାଦ ଓ ଦିଲ୍ଲୀ ହାଇକୋର୍ଟରେ ବିଚାରପତି ଥିବାବେଳେ ଜଷ୍ଟିସ ଯଶଓ୍ବନ୍ତ ଦେଇଥିବା ସମସ୍ତ ରାୟର ପୁନଃ ସମୀକ୍ଷା ଲାଗି ଦାବି କରିଛି ବାର୍ ଆସୋସିଏସନ । ଏହାସହ ଜଷ୍ଟିସ ଯଶଓ୍ବନ୍ତଙ୍କୁ ତୁରନ୍ତ ବହିଷ୍କାର କରିବା ଲାଗି ପଦକ୍ଷେପ ନେବା ପାଇଁ ଦାବି କରିଛନ୍ତି ବାର୍ ଆସୋସିଏସନ ସଭାପତି ଅନିଲ ତିଓ୍ବାରୀ ।
ଗତ ମାର୍ଚ୍ଚ ୧୪ ତାରିଖରେ ଘରୁ ଟଙ୍କା ମିଳିବା ପରେ ଜଷ୍ଟିସ ଯଶଓ୍ବନ୍ତଙ୍କୁ ଆହ୍ଲାବାଦ ହାଇକୋର୍ଟକୁ ପଠାଇବା ଲାଗି ସୁପ୍ରିମକୋର୍ଟ କଲେଜିୟମର ନିଷ୍ପତ୍ତି ପରଠାରୁ ତାଙ୍କ ବିରୋଧରେ ସ୍ବର ବଢିବାରେ ଲାଗିଛି । ଟଙ୍କା ମିଳିବା ଘଟଣା ପରେ ହାଇକୋର୍ଟ ଓ ସୁପ୍ରିମକୋର୍ଟଙ୍କ ନୈତିକତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିବା କହିଛନ୍ତି ତିଓ୍ବାରୀ । ସେ ଆହୁରି କହିଛନ୍ତି, ଜଷ୍ଟିସ ଯଶଓ୍ବନ୍ତଙ୍କ ପ୍ରସଙ୍ଗରେ ସମ୍ବିଧାନ ପ୍ରତି ଆଘାତ ଲାଗିଛି । କୌଣସି ହାଇକୋର୍ଟରେ ତାଙ୍କୁ ନିଯୁକ୍ତି ଦେବା ବିପଜ୍ଜନକ ସାବ୍ୟସ୍ତ ହେବ । ସେପଟେ ଜଷ୍ଟିସ ଶୀଲ ନାଗୁ, ଜଷ୍ଟିସ ଜିଏସ ସାନ୍ଧୱାଲିଆ ଓ ଜଷ୍ଟିସ ଅନୁ ଶିବରମଣଙ୍କୁ ନେଇ ଗଠିତ ୩ ଜଣିଆ ଖଣ୍ଡପିଠ ଜଷ୍ଟିସ ଯଶଓ୍ବନ୍ତଙ୍କ ବିରୋଧରେ ଚଳିତ ସପ୍ତାହରେ ତଦନ୍ତ ଆରମ୍ଭ କରିବ ବୋଲି ସୂଚନା ମିଳିଛି ।

