ନନ୍ଦିଘୋଷ ବ୍ୟୁରୋ : ସୁବର୍ଣ୍ଣପୁର ଡୁଙ୍ଗୁରିପାଲିରେ ପିକନିକ୍ ବସ ଦୁର୍ଘଟଣାଗ୍ରସ୍ତ। ସାଲେପାଲି ରାଇସମିଲ ନିକଟରେ ପିକନିକ୍ ଯାଉଥିବା ବସ ଧାନ ବୋଝେଇ ଟ୍ରାକଟରକୁ ପଛ ପଟୁ ଧକ୍କା ଦେଇ ଦୁର୍ଘଟଣା ଗ୍ରସ୍ତ ହୋଇଛି l ପୋଲିସ, ଅଗ୍ନିଶମ ବାହିନୀ ପହଁଚି ପିକନିକ୍ ଆସିଥିବା ଛାତ୍ରଛାତ୍ରୀଙ୍କୁ ଉଦ୍ଧାର କରି ହସ୍ପିଟାଲକୁ ନେଇଛନ୍ତିl ଏଥିରେ ବହୁ ସ୍କୁଲ ଛାତ୍ରଛାତ୍ରୀ ଆହତ ହୋଇଥିବା ସୂଚନା ମିଳିଛି l
କାଶ୍ମୀରରେ ତୁଷାରପାତ ଜାରି ; ଜନଜୀବନ ପ୍ରଭାବିତ
ନନ୍ଦିଘୋଷ ବ୍ୟୁରୋ : କାଶ୍ମୀରରେ ତୁଷାରପାତ ଜାରି। ଭୂସ୍ବର୍ଗର ଅଧିକାଂଶ ଅଞ୍ଚଳରେ ବ୍ୟାପକ ତୁଷାରପାତ ହୋଇଛି। ତୁଷାରପାତ ଯୋଗୁ କାଶ୍ମୀରରେ ଅପରୂପ ଦୃଶ୍ୟର ସମ୍ଭାର ସୃଷ୍ଟି ହୋଇଛି। ଲେହ ସମେତ ଅନ୍ୟାନ୍ୟ ଅଞ୍ଚଳରେ ତୁଷାରପାତ ହେବା ଯୋଗୁ ଜନଜୀବନ ପ୍ରଭାବିତ ହୋଇଛି। ପ୍ରକୃତିର ଅପରୂପ ଦୃଶ୍ୟ ଅବଲୋକନ କରିବା ଲାଗି ପର୍ଯ୍ଯଟକମାନେ ବହୁଳ ସଂଖ୍ୟାରେ କାଶ୍ମୀରରେ ପହଞ୍ଚୁଛନ୍ତି। ଗୁରେଜ ଭାଲି, ୱାରବନ ଭାଲି, ଦକ୍ଷିଣ ଓ ଉତ୍ତର କାଶ୍ମୀର, ସିନ୍ଥେନ ଟପ, ରାଜଦାନ ପାସ୍ ସାଧନା ଟପ, ଜୋଜିଲା, ସୋନମାର୍ଗ, ଲେହ, ପୁଞ୍ଚ, କାରଗିଲ ଆଦି ଅଞ୍ଚଳରେ ତୁଷାରପାତ ଜାରି ରହିଛି। ଗତ ଦୁଇ ମାସ ଧରି କାଶ୍ମୀରରେ ନା ବର୍ଷା ହୋଇଥିଲା ନା ବରଫ ପଡ଼ିଥିଲା। କାଶ୍ମୀରରେ ପ୍ରବଳ ତୁଷାରପାତ ହେବାରୁ ଜନଜୀବନ ପ୍ରଭାବିତ ହୋଇଛି।
ପୁରୀ ସମୁଦ୍ରରେ ପୁଣି ଅଘଟଣ ବୁଡ଼ି ଯାଉଥିଲେ ପର୍ଯ୍ୟଟକ ; ଉଦ୍ଧାର କଲେ ଲାଇଫଗାର୍ଡ …
ନନ୍ଦିଘୋଷ ବ୍ୟୁରୋ : ପୁରୀ ସମୁଦ୍ରରେ ଗାଧୋଇବାବେଳେ ପୁଣି ବୁଡି ଯାଉଥିବା ପର୍ଯ୍ୟଟକଙ୍କୁ ଉଦ୍ଧାର କଲେ ଲାଇଫଗାର୍ଡ। ଲାଇଫଗାର୍ଡ ମାନେ ଦେବଦୂତ ସାଜି ଗଭୀର ସମୁଦ୍ର ଭିତରକୁ ଲମ୍ଫ ମାରି ୪ ପର୍ଯ୍ୟଟକଙ୍କ ଜୀବନ ବଞ୍ଚାଇଛନ୍ତି। ସମସ୍ତ ପର୍ଯ୍ୟଟକ ହେଉଛନ୍ତି ପଶ୍ଚିମବଙ୍ଗ ଅଞ୍ଚଳର। ସେକ୍ଟର ୯ ନମ୍ବର ବେଳାଭୂମିରେ ସ୍ନାନ କରିବା ସମୟରେ ରିପ୍ କରେଣ୍ଟ ସହ ବଡ ଲହଡି ମାଡରେ ଗଭୀର ସମୁଦ୍ର ଭିତରକୁ ଚାଲିଯାଇଥିଲେ। ଖବର ପାଇ ଲାଇଫଗାର୍ଡ ମାନେ ଗଭୀର ସମୁଦ୍ରକୁ ଯାଇ ପର୍ଯ୍ୟଟକଙ୍କୁ ସୁରକ୍ଷିତ ଭାବେ ଉଦ୍ଧାର କରିଛନ୍ତି। ତେବେ ପୁରୀ ବେଳାଭୂମିରେ ଏଭଳି ଉଚ୍ଚ ଲହଡି ମାଡ଼ ଓ ରିପ୍ କରେଣ୍ଟ ଯୋଗୁଁ ପର୍ଯ୍ୟଟକ ମାନେ ପ୍ରତ୍ୟକଦିନ ଗଭୀର ସମୁଦ୍ର ଭିତରକୁ ଚାଲିଯାଉଥିବା ଦେଖିବାକୁ ମିଳିଛି।
ଆମ୍ବୁଲାନ୍ସକୁ ପଛ ପଟୁ ଧକ୍କା ଦେଲା ମାଲ ବୋଝେଇ ଟ୍ରକ ; ରାସ୍ତା କଡ଼କୁ ଓଲଟିଲା ଆମ୍ବୁଲାନ୍ସ
ନନ୍ଦିଘୋଷ ବ୍ୟୁରୋ : ଖୋର୍ଦ୍ଧା ଟାଙ୍ଗୀ ଥାନା କୁହୁଡି ନିକଟରେ ଆମ୍ବୁଲାନ୍ସକୁ ପଛ ପଟୁ ଧକ୍କା ଦେଲା ମାଲ ବୋଝେଇ ଟ୍ରକ । ଭାରସାମ୍ୟ ହରାଇ ରାସ୍ତା କଡ଼କୁ ଓଲଟିଲା ଆମ୍ବୁଲାନ୍ସ । ଚାଳକ ସହ ଦୁଇ ଜଣ ଗୁରୁତର ହୋଇଛନ୍ତି। ଖବର ପାଇ ଟାଙ୍ଗୀ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଗୁରୁତରଙ୍କୁ ଉଦ୍ଧାର କରି ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛି। ରୋଗୀଙ୍କୁ ଭୁବନେଶ୍ୱର ହସ୍ପିଟାଲରେ ଛାଡି ବିଶାଖାପାଟଣା ଫେରିବା ବେଳେ ଗତକାଲି ରାତିରେ ଘଟିଛି ଦୁର୍ଘଟଣା। ପୋଲିସ ଦୁର୍ଘଟଣାଗ୍ରସ୍ତ ଗାଡି ଦୁଇଟିକୁ ଜବତ କରି ତଦନ୍ତ କରୁଛି।
ଆଉ ୯ ଦିନର ମହଲତ ; ଗାଡିର ପ୍ରଦୂଷଣ ସାର୍ଟିଫିକେଟ ନଥିଲେ ଗଣିବେ ୧୦ ହଜାର ଟଙ୍କା ତଣ୍ଡ
ନନ୍ଦିଘୋଷ ବ୍ୟୁରୋ : ଆଉ ୯ ଦିନର ମହଲତ। ଗାଡିର ପ୍ରଦୂଷଣ ସାର୍ଟିଫିକେଟ ନଥିଲେ ନୂଆ ବର୍ଷରୁ ଗଣିବେ ୧୦ ହଜାର ଟଙ୍କା ତଣ୍ଡ। ଜାନୁଆରୀ ୧ ତାରିଖରୁ ୩୧ ତାରିଖ ପର୍ଯ୍ୟନ୍ତ ସଡ଼କ ସୁରକ୍ଷା ମାସରୁ ମୋଟର ଯାନ ଆଇନ ଉଲଂଘନ ନେଇ କଡ଼ାକଡ଼ି ହେବ ଯାଞ୍ଚ। ପୂର୍ବରୁ ମୋଟର ଯାନ ଅଧିନିୟମରେ ଗାଡିର PUCC ବାଧ୍ୟତାମୂଳକ ଥିବା ବେଳେ ପୋଲିସ ଓ ପରିବହନ ବିଭାଗ ରାଜ୍ୟରେ ଏହାର ଯାଞ୍ଚ କଡ଼ାକଡ଼ି କରିନଥିଲେ। ଦିଲ୍ଲୀ ପରେ ଓଡ଼ିଶା ସହର ମାନଙ୍କରେ ପ୍ରଦୂଷଣ ମାତ୍ରା ବଢୁଥିବାରୁ ଆଇନର ବ୍ୟବସ୍ଥାକୁ କଡ଼ାକଡ଼ି କରିବାକୁ ଯାଉଛନ୍ତି ସରକାର । ଗତକାଲି ଭୁବନେଶ୍ବର ସ୍ଥିତ ଆରଟିଓ-୧ କାର୍ଯ୍ୟାଳୟରେ ପେଟ୍ରୋଲ ଡିଲର ଆସୋସିଏସନ, ତୈଳ କମ୍ପାନୀ ଓ ପରିବହନ ବିଭାଗ ଅଧିକାରୀଙ୍କ ଭିତରେ ଏକ ବୈଠକ ଅନୁଷ୍ଠିତ ହୋଇଥିଲା। ସମସ୍ତ ଗାଡ଼ିର ପୂଦୂଷଣ ସାର୍ଟିଫିକେଟ କିଭଳି ମିଳିପାରିବ ସେନେଇ ବ୍ୟବସ୍ଥା କରିବାକୁ ବୈଠକରେ ବିସ୍ତୃତ ଆଲୋଚନା କରାଯାଇଥିଲା। ପ୍ରଥମ ଥର ଉଲଂଘନ କରିଥିବା ଗାଡି ଚାଳକଙ୍କୁ କିଛି ମାତ୍ରାରେ କୋହଳ କରିବାର ବ୍ୟବସ୍ଥା ଥିଲେ ବି PUCC ସାର୍ଟିଫିକେଟ ନବୀକରଣ ନକରିଥିବା ଗାଡ଼ି ମାଲିକ ତୁରନ୍ତ PUCC ସାର୍ଟିଫିକେଟ କରାଇନେବାକୁ ପରିବହନ କମିଶନର ଅପିଲ୍ କରିଛନ୍ତି।
କାଲିଠୁ ଦୁଲୁକିବ ବରଗଡ଼ ; ସର୍ବ ବୃହତ ଖୋଲା ରଙ୍ଗମଞ୍ଚରେ ଶୁଭିବ ମହାରାଜ କଂସଙ୍କ ଅଟ୍ଟ ହାସ୍ୟ
ନନ୍ଦିଘୋଷ ବ୍ୟୁରୋ : କାଲିଠୁ ଦୁଲୁକିବ ବରଗଡ଼। ସର୍ବ ବୃହତ ଖୋଲା ରଙ୍ଗମଞ୍ଚରେ ଶୁଭିବ ମହାରାଜ କଂସଙ୍କ ଅଟ୍ଟ ହାସ୍ୟ। ବରଗଡ଼ ପାଲଟିବ ମଥୁରାନଗରୀ, ଗୋପପୁର ପାଲଟିବ ଅମ୍ବାପାଲି। ବରଗଡ଼ ଧନୁଯାତ୍ରା ଚଳିତଥର ୭୮ ବର୍ଷରେ ପଦାର୍ପଣ କରୁଥିବା ବେଳେ ଏହା ଜାନୁଆରୀ ୩ ତାରିଖ ପର୍ଯ୍ୟନ୍ତ ଦୀର୍ଘ ୧୧ ଦିନ ଧରି ଚାଲିବ । ଯାହାକୁ ନେଇ ସାରା ବରଗଡ଼ ସହର ଚଳଚଂଚଳ । ଏଥିପାଇଁ ବରଗଡ଼ ହାଟପଦା ଠାରେ ମହାରାଜ କଂସଙ୍କ ପ୍ରାୟ ୮୦ଫୁଟ ଉଚ୍ଚତା ଏବଂ ୧୨୦ ଫୁଟ ପ୍ରସ୍ଥର ରାଜଦରବାର ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚିଛି। ଚଳିତବର୍ଷ କଂସଙ୍କ ରାଜଦରବାରକୁ ଜୈସଲମେର ଦୁର୍ଗ ରୂପରେ ସଜାଯାଇଛି। ସେହିପରି ସ୍ଥାନୀୟ ଲୋକମଣ୍ଡପ ପଡ଼ିଆରେ ମହାରାଜ କଂସଙ୍କ ରଙ୍ଗ ମହଲର ନିର୍ମାଣ ଚାଲିଛି। ଏଥର ରଙ୍ଗ ମହଲକୁ ଜୟପୁର ପ୍ୟାଲେସର ରୂପ ଦିଆଯାଉଥିବାରୁ ଅଧିକ ଆକର୍ଷଣୀୟ ହେବ ବୋଲି କମିଟି ପକ୍ଷରୁ ସୂଚନା ଦିଆଯାଇଛି। ବରଗଡ଼ର ପ୍ରାୟ ସାତ କିଲୋମିଟର ପରିଧି ମଧ୍ୟରେ ବିଭିନ୍ନ ମଂଚରେ ଏହି ଧନୁଯାତ୍ରା ମହୋତ୍ସବ ଅନୁଷ୍ଠିତ ହେବ। କଂସ ଦରବାର, ରଂଗମହଲ ଓ ନନ୍ଦ ଦରବାରରେ ପ୍ରତିଦିନ ଧନୁଯାତ୍ରାର ଦୃଶ୍ୟଗୁଡ଼ିକ ଅଭିନୀତ କରାଯିବ। ଏହାକୁ ଦୃଷ୍ଟିରେ ରଖି କମିଟି ଏହି ତିନୋଟି ମଂଚର ସାଜସଜ୍ଜା ଉପରେ ଅଧିକ ଗୁରୁତ୍ୱ ଦେଇଛି। ସେହିପରି ମୀନା ବଜାର ପଡିଆରେ ବାହାର ବ୍ୟବସାୟୀଙ୍କ ପାଇଁ ଜମି ଆଲର୍ଟମେଣ୍ଟ ହୋଇସାରିଛି। ସେହିପରି ସହରର ପ୍ରବେଶ ଦ୍ଵାରରେ ଧନୁଯାତ୍ରା ସ୍ଥାୟୀ ତୋରଣ ନିର୍ମାଣ କରାଯିବା ସହ ସହରର ମୁଖ୍ୟ ରାସ୍ତା ଗୁଡ଼ିକୁ ପ୍ରଶସ୍ତ କରାଯାଇଛି। ୧୯୦ ଟି ସାଂସ୍କୃତିକ ଦଳ ମଞ୍ଚ ଗୁଡ଼ିକରେ ତାଙ୍କ କଳା ପ୍ରଦର୍ଶନ କରିବେ।
ବାଂଲାଦେଶରେ ଓ ଭାରତ ମଧ୍ୟରେ ବଢିଲା ତିକ୍ତତା ; ନୂଆଦିଲ୍ଲୀ ଭିସା ସେଣ୍ଟର ବନ୍ଦ କଲା ବାଂଲାଦେଶ
ନନ୍ଦିଘୋଷ ବ୍ୟୁରୋ : ବାଂଲାଦେଶରେ ଓ ଭାରତ ମଧ୍ୟରେ ବଢିଲା ତିକ୍ତତା। ନୂଆଦିଲ୍ଲୀ ଦୂତାବାସରେ ଭିସା ସେଣ୍ଟର ଓ କନସୁଲେଟରେ ଭିସା ସେବା ବନ୍ଦ କରି ଦେଇଛି ବାଂଲାଦେଶ। ଅନିବାର୍ଯ୍ୟ କାରଣରୁ ଭିସା ସେବା ବନ୍ଦ କରାଯାଇଥିବା ବାଂଲାଦେେଶ ପକ୍ଷରୁ କୁହାଯାଇଛି। ଏହା ଆଗରୁ ଚଟ୍ଟଗ୍ରାମରେ ଥିବା ଭିସା ସେଣ୍ଟରକୁ ବନ୍ଦ କରିଦେଇଥିଲା ଭାରତ। ଜଣେ ହିନ୍ଦୁ ଦୀପୁ ଦାସଙ୍କ ହତ୍ୟା କରାଯାଇଥିଲା। ଏହା ସହିତ ହିନ୍ଦୁଙ୍କୁ ବାଂଲାଦେଶରେ ଲଗାତର ଭାବେ ଆକ୍ରମଣ କରାଯାଉଛି। ହସିନା ସରକାରର ପତନ ପରେ ବିଗିଡ଼ିଛି ନୂଆଦିଲ୍ଲୀ ଓ ଢାକା ମଧ୍ୟରେ ସଂପର୍କ। ଏଇ କିଛି ଦିନ ହେଲା ବାଂଲାଦେଶରେ ପୁଣି ଅରାଜକତା ଦେଖା ଦେବା ପରେ ସ୍ଥିତି ଆହୁରି ସଂଗୀନ ହୋଇଛି। ଛାତ୍ର ନେତା ସରିଫ୍ ଉସମାନ ହାଦିଙ୍କୁ ଗୁଳି କରି ହତ୍ୟା କରିବା ପରେ ସ୍ଥିତି ବିଗିଡ଼ି ଯାଇଛି। ଗତକାଲି ଆଉ ଜଣେ ନେତା ବାଂଲାଦେଶର ନ୍ଯାସନାଲ ସିଟିଜେନ୍ସ ପାର୍ଟିର ମହମ୍ମଦ ମୋତାଲେବ ସିକଦରଙ୍କୁ ଗୁଳିମାଡ଼ ହୋଇଛି । ବାଂଲାଦେଶ ଜଳୁଛି, ସ୍ଥିତି ସୁଧୁରିବାର ନାଁ ନେଉନି।
ଆଜି ବଲାଙ୍ଗୀରର ପ୍ରସିଦ୍ଧ ଶୁଲିଆ ଯାତ୍ରା । ପରମ୍ପରା ଆଗରେ ହାର ମାନିଲା ଆଧୁନିକ ସଭ୍ୟତା
ନନ୍ଦିଘୋଷ ବ୍ୟୁରୋ : ଆଜି ବଲାଙ୍ଗୀରର ପ୍ରସିଦ୍ଧ ଶୁଲିଆ ଯାତ୍ରା । ପରମ୍ପରା ଆଗରେ ହାର ମାନିଲା ଆଧୁନିକ ସଭ୍ୟତା । ଆଧୁନିକ ସସ୍କୃତି ପରମ୍ପରା ବନାମ୍ ବିଶ୍ବାସ ବଳରେ ଶହ ଶହ ପଶୁପକ୍ଷୀଙ୍କ ରକ୍ତରେ ରକ୍ତ ରଞ୍ଜିତ ହେବ ଶୁଲିଆ ପିଠ I ଦେଓଗାଁ ବ୍ଲକ ଖଇରଗୁଡାର ବଡଖଳା ଓ କୁମରିଆ ସାନଖଳା ଶୁଳିଆ ପୀଠରେ ପାଳିତ ହେଉଛି ଶୁଳିଆ ଯାତ୍ରା । ପରମ୍ପରା ନାଁରେ ବଳି ପଡିବେ ହଜାର ହଜାର ସଂଖ୍ୟାରେ ପଶୁପକ୍ଷୀ । ଭୋରରୁ ମୁଖ୍ୟ ପୂଜକ ଓ ଦେହୁରି ମାନେ ପାରମ୍ପରିକ ଅସ୍ତ୍ରଶସ୍ତ୍ର ଧରି ଗାଁରୁ ଏକ ଶୋଭାଯାତ୍ରାରେ ଆସି ସୁଲିଆ ପୀଠରେ ପହଞ୍ଚି ପୂଜାର୍ଚ୍ଚନା କରିଛନ୍ତି I ଆଉ କିଛି ସମୟ ପରେ ସୁଲିଆ ବୁଢ଼ା ପୀଠରେ ପାଟ ବଳି ପଡ଼ିବ I ତା ପରେ ମାନସିକଧାରୀ ମାନେ ମାନସିକ ଅନୁସାରେ ଆଣିଥିବା ପୋଢ଼, ବେତା, କୁକୁଡ଼ା, ବତକ ବଳି ପଡିବ। ସେହିପରି କୁମୁରିଆର ସାନ ଖଳାରେ ମଧ୍ୟ ବଳି ପଡିବIପ୍ରତିବର୍ଷ ପୌଷ ମାସ ଶୁକ୍ଳପକ୍ଷର ପ୍ରଥମ ମଙ୍ଗଳବାର ଶୁଲିଆ ଯାତ୍ରା ଅନୁଷ୍ଠିତ ହୋଇଥାଏ I ପ୍ରତିବର୍ଷ ଭଲି ଚଳିତ ବର୍ଷ ମଧ୍ୟ ଆଦିବାସୀ ପରମ୍ପରା ଅନୁସାରେ ଶୁଲିଆ ଯାତ୍ରାରେ ବଳି ପଡୁଛିI
MNREGAର ନାମ ପରିବର୍ତ୍ତନକୁ ସାରା ଦେଶରେ ଜୋରଦାର ବିରୋଧ
ନନ୍ଦିଘୋଷ ବ୍ୟୁରୋ: ମହାତ୍ମାଗାନ୍ଧୀ ନିଶ୍ଚିନ୍ତ କର୍ମ ନିଯୁକ୍ତି ଯୋଜନା ବା ମନରେଗା ନାମକରଣ ବଦଳାଇବା ଓ ଯୋଜନାର ରୂପରେଖ ବିକୃତ କରିବା ପ୍ରତିବାଦରେ ସାରା ଦେଶରେ ପ୍ରତିବାଦ ଜୋର ଧରିଛି । ଭୁବନେଶ୍ବର ଓ କଟକରେ ବିଭିନ୍ନ ଦଳ ପକ୍ଷରୁ ଜୋରଦାର ପ୍ରତିବାଦ ଦେଖିବାକୁ ମିଳିଛି । ରାଜାରସ୍ତାରେ ୪ ବାମପନ୍ଥୀ ଦଳ ବିକ୍ଷୋଭ ଓ ପ୍ରତିବାଦ ସଭା କରିଥିବା ବେଳେ ମହାତ୍ମା ଗାନ୍ଧୀଙ୍କ ପ୍ରତିମୂତ୍ତି ତଳେ ଧାରଣା ଦେଇ ବିକ୍ଷୋଭ କରିଛି କଂଗ୍ରେସ ।
MNREGAର ନାମ ପରିବର୍ତ୍ତନକୁ ସାରା ଦେଶରେ ଜୋରଦାର ବିରୋଧ । ଦିଲ୍ଲୀଠାରୁ ପଲ୍ଲୀ ସବୁଠି ପ୍ରତିବାଦର ସ୍ବର । ଜାତିର ପିତାଙ୍କୁ ଅପମାନ ସହ ଯୋଜନାର ରୂପରେଖ ବିକୃତ କରିବା ଉଦ୍ୟମ ଅଭିଯୋଗ । ଭୁବନେଶ୍ୱର ଜିଲ୍ଲା କଂଗ୍ରେସ ସଭାପତି ପ୍ରକାଶ ଚନ୍ଦ୍ର ଜେନାଙ୍କ ସଂଯୋଜନାରେ ଶତାଧିକ କର୍ମୀ ଓ ନେତା ଜୟଦେବବିହାର ସ୍ଥିତ ମହାତ୍ମାଗାନ୍ଧୀ ପାର୍କରେ ଥିବା ଗାନ୍ଧୀଙ୍କ ପ୍ରତିମୂର୍ତ୍ତୀ ତଳେ ବସି ପ୍ରତିବାଦ କରିଛନ୍ତି । ୨୦୦୫ ରେ ଆରମ୍ଭ ହୋଇଥିବା ମନରେଗା କାର୍ଯ୍ୟକ୍ରମ ପରେ ଏହା ଏକ କର୍ମ ନିଯୁକ୍ତି ଆଇନରେ ପରିଣତ ହୋଇଥିଲା । କାର୍ଯ୍ୟକାରୀ ହେବାର ୨୦ ବର୍ଷ ପରେ ମହାତ୍ମା ଗାନ୍ଧୀ ଙ୍କ ନାମକୁ ହଟାଇ ଭିବି ଜି ରାମ ଜି କରିଛନ୍ତି ସରକାର । ସେପଟେ ଏହାକୁ ତୁରନ୍ତ ପ୍ରତ୍ୟାହାର ନକଲେ ଆନ୍ଦୋଳନକୁ ଜୋରଦାର କରିବାକୁ ଚେତାବନୀ ଦେଇଛି କଟକ ଜିଲ୍ଲା କଂଗ୍ରେସ ଏବଂ ନଗର କଂଗ୍ରେସ କମିଟି ।
ସେପଟେ ଭିବି ଜି ରାମ ଜି ବିଲ ପ୍ରତ୍ୟାହାର ଓ ମନରେଗା ଆଇନ ସୁରକ୍ଷା ଦାବି ନେଇ ରାଜରାସ୍ତାକୁ ଓହ୍ଲାଇଛି ବାମପନ୍ଥୀ । ଭୁବନେଶ୍ୱର ମହାତ୍ମା ଗାନ୍ଧୀ ମାର୍ଗରେ CPIM, CPI, CPMIL ଓ ଲିବେରେସନ ଫରୱାର୍ଡ଼ ବ୍ଲକର ଶତାଧିକ ନେତା ଓ କର୍ମୀ ସାମିଲ ହୋଇ ପ୍ରତିବାଦ କରିଛନ୍ତି । ସେପଟେ ମନରେଗା ଯୋଜନା ନାମ ପରିବର୍ତ୍ତନ, ବିଧାୟକ ମାନଙ୍କ ଦରମା ଓ ଭତ୍ତା ବୃଦ୍ଧି ଏବଂ ଅତିରିକ୍ତ ବିଦ୍ୟୁତ୍ ସୁରକ୍ଷା ଶୁଳ୍କକୁ ବିରୋଧ କରି କଟକ ଜିଲ୍ଲାପାଳଙ୍କ ଅଫିସ ଆଗରେ ବାମଦଳ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି ।
କେନ୍ଦ୍ର ସରକାର ତୁରନ୍ତ ମନରେଗାକୁ କାର୍ଯ୍ୟକାରୀ କରି ଗ୍ରାମାଞ୍ଚଳ ଲୋକଙ୍କୁ ଅନ୍ୟୁନ ବର୍ଷକୁ ୨ ଶହ ଦିନ କର୍ମ ନିଯୁକ୍ତି, ମଜୁରୀ ପାରିଶ୍ରମିକ ବୃଦ୍ଧି, କାର୍ଯ୍ୟ ନ ପାଇଲେ ଶ୍ରମିକଙ୍କୁ ବେରୋଜଗାର ଭତ୍ତା ପ୍ରଦାନ ଦାବିରେ ରାଉରକେଲାରେ ମଧ୍ଯ ବିକ୍ଷୋଭ କରିଛି ଦଳ।
୪ କିଲୋମିଟର ଚାଲି ଚାଲି ଆସି ଜିଲ୍ଲାପାଳଙ୍କ ଅଭିଯୋଗ ଶୁଣାଣି ପ୍ରକୋଷ୍ଠ ବାହାରେ ବସି ପାଠ ପଢ଼ିଲେ ଛାତ୍ରଛାତ୍ରୀ
ନନ୍ଦିଘୋଷ ବ୍ୟୁରୋ: ୪ କିଲୋମିଟର ଚାଲି ଚାଲି ଆସିଲେ, ଜିଲ୍ଲାପାଳଙ୍କ ଅଭିଯୋଗ ଶୁଣାଣି ପ୍ରକୋଷ୍ଠ ବାହାରେ ତଳେ ବସିଲେ ଆଉ ପାଠ ପଢିଲେ ଛାତ୍ରଛାତ୍ରୀ। ବିଦ୍ୟାଳୟ କୁ ବଞ୍ଚାଇବା ପାଇଁ ଏଭଳି ନିଆରା ଢଙ୍ଗରେ ପ୍ରତିବାଦ କରିଛନ୍ତି ଛାତ୍ରଛାତ୍ରୀ। ଏହି ଚିତ୍ର ସାମ୍ନାକୁ ଆସିଛି ଉଦଳା ଠାରେ ଚାଲିଥିବା ଜିଲ୍ଲାପାଳଙ୍କ ଜନ ଶୁଣାଣି ଶିବିରରୁ। ଗୋପବନ୍ଧୁନଗର ବ୍ଲକ ପୁରଡ଼ିହି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ୧୩୦ ଛାତ୍ର ଛାତ୍ରୀ ପାଠ ପଢ଼ନ୍ତି। ହେଲେ ପୂର୍ବରୁ ବିଦ୍ୟାଳୟରେ ଶ୍ରେଣୀ ଗୃହ ଅଭାବ ନେଇ ଆନ୍ଦୋଳନ କରିବା ପରେ ତିନି ଗୋଟି ଅସ୍ଥାୟୀ ଶ୍ରେଣୀ ଗୃହ ତିଆରି କରାଯାଇଥିଲା। କିନ୍ତୁ ଆସନ୍ତାକାଲି ଉକ୍ତ ବିଦ୍ୟାଳୟ ଭଙ୍ଗା ଯିବା ନେଇ ବିଦ୍ୟାଳୟକୁ ନୋଟିସ ଆସିବା ପରେ ତାତିଛନ୍ତି ଛାତ୍ରଛାତ୍ରୀ। ଯାହାକୁ ନେଇ ଛାତ୍ରଛାତ୍ରୀ ମାନେ ୪ କିଲୋମିଟର ଚାଲି ଚାଲି ଆସି ଉଦଳା ଠାରେ ଚାଲିଥିବା ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିର ନିକଟରେ ପହଞ୍ଚିଥିଲେ। ଶିବିର ନିକଟରେ ପହଂଚିବା ପରେ ଭିତରେ ଜିଲ୍ଲା ଅଭିଯୋଗ ଶୁଣାଣି କରିଥିବା ବେଳେ ଛାତ୍ର ଛାତ୍ରୀ ମାନେ ଶିବିର ବାହାରେ ବସି ବହି ଖୋଲି ପାଠ ପଢିଥିଲେ। ବିଦ୍ୟାଳୟ ଭାଙ୍ଗିଦେଲେ ଆମେ କେଉଁଠି ପଢ଼ିବୁ ବୋଲି କହିବା ସହିତ ଆମ ବିଦ୍ୟାଳୟ ଭାଙ୍ଗିବା ନ ଅଟକିଲେ ଆମେ ରାଜରାସ୍ତାରେ ପାଠ ପଢ଼ିବୁ ବୋଲି କହିଛନ୍ତି ଆନ୍ଦୋଳନ ରତ ଛାତ୍ର ଛାତ୍ରୀ।