ପୁତ୍ର ସନ୍ତାନ ଜନ୍ମ ପରେ ଚାଲିଗଲା ମା’ର ଜୀବନ । ଭୁଲ ଇଂଜେକସନ ଯୋଗୁ ପ୍ରସୂତି ମହିଳାଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟ ନିକଟରେ ଥିବା ଏକ ଘରୋଇ ନର୍ସିଂହୋମରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । ବରୀ ରତ୍ନଗିରି ଅଞ୍ଚଳର ସସ୍ମିତା ଜେନା ନାମକ ଗର୍ଭବତୀ ଘରେଇ ନର୍ସିଂହୋମରେ ଭର୍ତ୍ତି ହୋଇଥିଲେ । ଅସ୍ତ୍ରୋପ୍ରଚାର ପରେ ଶିଶୁ ପୁତ୍ର ଜନ୍ମ ହେଲେ ମଧ୍ୟ ମା’ର ମୃତ୍ୟୁକୁ ନେଇ ଉତେଜନା ପ୍ରକାଶ ପାଇଛି । ଭୁଲ ଇଂଜେକସନ ଓ ତ୍ରୁଟିପୂର୍ଣ ଚିକିତ୍ସା ପାଇଁ ମହିଳାଙ୍କ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ। ଉତ୍ତେଜନା ଯୋଗୁ ଚିକିତ୍ସାଳୟ ମାଲିକ ବାହାର ଗୁଣ୍ଡା ଲଗାଇ ଠେଲାପେଲା ଓ ଧକ୍କା ମାରି ବାହାର କରିଦେବା ଅଭିଯୋଗ କରିଛନ୍ତି ପରିବାର ଲୋକେ । ଗୁଣ୍ଡା ମାନେ କିଏ ତାଙ୍କ ଫଟୋ ସିସି ଫୁଟେଜରୁ ପୋଲିସ ଚିହ୍ନଟ କରୁ ବୋଲି ଦାବି କରିଛନ୍ତି ପରିବାର ଲୋକ। ଏହାସହ ଘରୋଇ ନର୍ସିଂହୋମରେ ସରକାରୀ ଡାକ୍ତରଙ୍କୁ ଘେରି ରହିଛନ୍ତି ସମ୍ପର୍କୀୟ। ଏନେଇ ଯାଜପୁର ଥାନାରେ ଲିଖିତ ଅଭିଯୋଗ କଲେ ମୃତକଙ୍କ ପରିବାର।ଘଟଣାସ୍ଥଳରେ ଯାଜପୁର ଟାଉନ ପୁଲିସ ଉପସ୍ଥିତ ରହି ଘଟଣା ଉପରେ ନଜର ରଖିଛି ।
ରାଜ୍ୟ କ୍ରୀଡ଼ା ଭବିଷ୍ୟତଙ୍କ କଦର୍ଯ୍ୟ ଟ୍ରେନ୍ ଯାତ୍ରା: ପ୍ରତିକ୍ରିୟା ରଖିଲେ ଗଣଶିକ୍ଷାମନ୍ତ୍ରୀ
ରାଜ୍ୟ କ୍ରୀଡ଼ା ଭବିଷ୍ୟତଙ୍କ କଦର୍ଯ୍ୟ ଟ୍ରେନ୍ ଯାତ୍ରା । ସ୍କୁଲ ଗେମ ଖେଳିବା ପାଇଁ ଓଡ଼ିଶାରୁ ଉତ୍ତରପ୍ରଦେଶ ଯାତ୍ରା କରିବା ବେଳେ ସମସ୍ୟାର ସମ୍ମୁଖୀନ ହୋଇଥିଲେ ଖେଳାଳି । ଟିକେଟ କନଫର୍ମ ହୋଇ ନଥିବାରୁ ଟ୍ରେନ୍ ଟଏଲେଟ୍ ପାଖରେ ବସି କରିଥିଲେ ଯାତ୍ରା । ସୋସିଆଲ ମିଡ଼ିଆରେ ଭାଇରାଲ୍ ହେବାରେ ଲାଗିଛି ସେହି ସମୟର ଭିଡ଼ିଓ । ଉତ୍ତରପ୍ରଦେଶରେ ଆୟୋଜିତ ହୋଇଥିଲା ଜାତୀୟ କୁସ୍ତି ଚାମ୍ପିଅନସିପ୍ । ଏଥିରେ ଭାବ ନେବାକୁ ଓଡ଼ିଶା ସ୍କୁଲ କୁସ୍ତିଯୋଦ୍ଧା ଟ୍ରେନରେ ଯାତ୍ରା କରିଥିଲେ । ହେଲେ ଟିକେଟ୍ କନଫର୍ମ ନହେବାରୁ ଟ୍ରେନ ଟଏଲେଟ୍ ନିକଟରେ ବସି ଯାତ୍ରା କରିଥିଲେ ଖେଳାଳି । ଏପରିକି ସେହିଭଳି ଅବସ୍ଥାରେ ମଧ୍ୟ ୟୁପିରୁ ଫେରିଥିଲେ । ଏହି ଚିତ୍ର ସୋସିଆଲ ମିଡ଼ିଆରେ ଭାଇରାଲ ହେବା ପରେ ଚର୍ଚ୍ଚାର ବିଷୟ ପାଲଟିଛି । ଘଟଣାକୁ ନେଇ ଗଣଶିକ୍ଷାମନ୍ତ୍ରୀ ପ୍ରତିକ୍ରିୟା ରଖିଛନ୍ତି । ଭିଡ଼ିଓର ସତ୍ୟାସତ୍ୟ ଉପରେ ସରକାର ଅନୁଧ୍ୟାନ କରିବେ । ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେପଟେ ଏହି ଭିଡିଓ କ୍ଲିପକୁ ସୋସିଆଲ ମିଡ଼ିଆରେ ଦେଖିବା ପରେ ମାଧ୍ୟମିକ ଶିକ୍ଷା ନିର୍ଦ୍ଦେଶକଙ୍କୁ ତଦନ୍ତ କରି ବିସ୍ତୃତ ରିପୋର୍ଟ ଦେବାକୁ ଅତିରିକ୍ତ ଗଣଶିକ୍ଷା ସଚିବ ଚିଠି କରିଛନ୍ତି । ଆସନ୍ତାକାଲି ସୁଦ୍ଧା ଗଣଶିକ୍ଷା ସଚିବଙ୍କ ପାଖରେ ଏହି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି ।
୧୭ ବର୍ଷର ଆତ୍ମନିର୍ବାସନ ପରେ ବାଂଲାଦେଶ ଫେରିଲେ ତାରିକ ରେହମାନ
୧୭ ବର୍ଷର ଆତ୍ମନିର୍ବାସନ ପରେ ବାଂଲାଦେଶ ଫେରିଲେ ତାରିକ ରେହମାନ। ବାଂଲାଦେଶ ଜାତୀୟତାବାଦୀ ପାର୍ଟି ବା ବିଏନପିର କାର୍ଯ୍ୟକାରୀ ଅଧ୍ୟକ୍ଷଙ୍କ ଲାଗି ଢାକାରେ ସମବେତ ହୋଇଛନ୍ତି ଲକ୍ଷାଧିକ ସମର୍ଥକ। ବିଭିନ୍ନ କାରଣରୁ ସେ ପ୍ରାୟ ୧୭ ବର୍ଷ ଧରି ଲଣ୍ଡନରେ ଆତ୍ମନିର୍ବାସିତ ଜୀବନ କଟାଉଥିଲେ। ସେ ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ବେଗମ ଖାଲେଦା ଜିଆଙ୍କ ପୁଅ। ଆସନ୍ତା ବର୍ଷ ହେବାକୁ ଯାଉଥିବା ସାଧାରଣ ନିର୍ବାଚନରେ ବିଏନପି ଯୋଗ ଦେବାକୁ ଯାଉଥିବାରୁ କ୍ଷେତ୍ର ପ୍ରସ୍ତୁତ ଲାଗି ତାରିକ ବାଂଲାଦେଶ ଫେରିଛନ୍ତି। ସେ ବିମାନ ବାଂଲାଦେଶ ଏୟାରଲାଇନ୍ସର ଏକ ବିମାନରେ ଲଣ୍ଡନରୁ ଫେରିଛନ୍ତି। ଭାରତ ସପକ୍ଷବାଦୀ ଆୱାମି ଲିଗକୁ ବାଂଲାଦେଶ ସାଧାରଣ ନିର୍ବାଚନ ଲଢିବା ଲାଗି ବାରଣ କରାଯାଇଥିବା ବେଳେ ତାରିକଙ୍କ ସ୍ବଦେଶ ପ୍ରତ୍ୟାବର୍ତ୍ତନ ଗୁରୁତ୍ବପୂର୍ଣ୍ଣ ହୋଇଛି। ସେପଟେ ତାରିକଙ୍କ ମା ବେଗମ ଖାଲେଦା ଜିଆ ବି ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।
ଆସନ୍ତା ଫେବୃଆରୀ ୧୨ରେ ଦେଶରେ ସାଧାରଣ ନିର୍ବାଚନ ହେବାକୁ ଯାଉଥିବା ବେଳେ ତା ପୂର୍ବରୁ ସେ ସ୍ବଦେଶ ଫେରିଛନ୍ତି। ଆୱାମି ଲିଗ୍ ଶାସନ କାଳରେ ତାରିକଙ୍କ ବିରୋଧରେ ଆଇନଗତ ପ୍ରତିବନ୍ଧକ ଲାଗିଥିବାରୁ ସେ ଫେରିପାରୁ ନଥିଲେ। ବିଭିନ୍ନ ହାଇପ୍ରୋଫାଇଲ ମାମଲାରୁ ସେ ଖଲାସ ହେବା ପରେ ତାରିକ ଢାକା ଫେରିଛନ୍ତି। ତାରିକ ଆଜି ଯାଏ କୌଣସି ନିର୍ବାଚନ ଲଢିନାହାନ୍ତି। ୨୦୦୮ରୁ ସେ ଲଣ୍ଡନରେ ବାସ କରିଆସୁଥିଲେ। ସେବଠାରୁ ସେ ଲଣ୍ଡନରୁ ବିଏନପିକୁ ପରିଚାଳନା କରୁଥିଲେ। ୨୦୦୧ରୁ ୨୦୦୬ ଯାଏ ବିଏନପିର ବିବାଦୀୟ ମୁଖ୍ୟ କାର୍ଯ୍ଯାଳୟ ଥିଲା ହାୱା ଭବନ। ସେହି ସମୟରେ ତାରିକ ଦଳର ସବୁ କଥା ବୁଝୁଥିଲେ। ତେବେ ହାୱା ଭବନ ଥିଲା ଅନେକ ଦୁର୍ନୀତି, ରାଜନୈତିକ ହିଂସାର ପ୍ରମୁଖ କେନ୍ଦ୍ର।
ଧାନ କିଣାକୁ ନେଇ ଥମୁନି ବିବାଦ, ଯୋଗାଣ ମନ୍ତ୍ରୀଙ୍କ ବିବାଦୀୟ ବୟାନକୁ ନେଇ ବିରୋଧୀଙ୍କ ତୁମ୍ବିତୋଫାନ
ଧାନ କିଣାକୁ ନେଇ ଥମୁନି ବିବାଦ, ଯୋଗାଣ ମନ୍ତ୍ରୀଙ୍କ ବିବାଦୀୟ ବୟାନକୁ ନେଇ ବିରୋଧୀଙ୍କ ତୁମ୍ବିତୋଫାନ
ନନ୍ଦିଘୋଷ ବ୍ୟୁରୋ: ଧାନକିଣା ଡବଲ ସ୍ପିଡରେ ଚାଲିଛି । ଚଳିତବର୍ଷ ସରକାର ୫ ଲକ୍ଷ ମେଟ୍ରିକ ଟନ ଧାନ ସଂଗ୍ରହ କରିଛନ୍ତି ବୋଲି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି । ରାସ୍ତାରେ ଯେଉଁମାନେ ଆନ୍ଦୋଳନ କରୁଛନ୍ତି ସେମାନେ ଆନ୍ଦୋଳନଜୀବୀ । ଯୋଗାଣ ମନ୍ତ୍ରୀଙ୍କ ଏପରି ବୟାନକୁ ନେଇ ସାରା ରାଜ୍ୟରେ ତୀବ୍ର ପ୍ରତିକ୍ରିୟା ଦେଖାଦେଇଥିବାବେଳେ ବିରୋଧୀ ସରକାରଙ୍କୁ ଘେରିଛନ୍ତି । ମିଛ କହି ଭୋଟ ନେଲା ପରେ ଚାଷୀଙ୍କୁ ଯୋଗାଣ ମନ୍ତ୍ରୀ ଆନ୍ଦୋଳନଜୀବୀ କହିବା ନିହାତି ଅଶୋଭନୀୟ ବୋଲି ବିଜେଡି କହିଛି । କଂଗ୍ରେସ ମଧ୍ୟ ସରକାରଙ୍କୁ କଠୋର ଭାଷାରେ ଟାର୍ଗେଟ କରିଛି ।
ଟୋକନ ପାଇଁ ସମ୍ବଲପୁର ବନ୍ଦ । ଧାନ ଉଠୁ ନଥିବାରୁ ବଲାଙ୍ଗୀରରେ ଚାଷୀଙ୍କ ଜିଲ୍ଲାପାଳ ଅଫିସ ଘେରାଉ । କଳାହାଣ୍ଡି, ବରଗଡ ସବୁଠି ଧାନ କିଣାରେ ଅବ୍ୟବସ୍ଥା । ଟୋକନ ସମସ୍ୟା ଓ ଧାନ ଉଠାଣକୁ ନେଇ ଚାଷୀ ହନ୍ତସନ୍ତ ହେଉଥିବା ବେଳେ ସରକାର କିନ୍ତୁ ବେଫିକର । ଧାନ କିଣାକୁ ନେଇ ପୂରା ରାଜ୍ୟରେ ଚାଷୀ ଅସନ୍ତୋଷ ଥିବା ବେଳେ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଦେଇଛନ୍ତି ବିବାଦୀୟ ବୟାନ । ରାସ୍ତାରେ ଆନ୍ଦୋଳନ କରୁଥିବା ଚାଷୀ ହେଉଛନ୍ତି ଆନ୍ଦୋଳନଜୀବୀ । ସେମାନଙ୍କ ପାଦ ତଳୁ ମାଟି ଖସିଯାଇଛି । କିନ୍ତୁ ସୁରୁଖୁରୁରେ ଚାଲିଛି ଧାନ ସଂଗ୍ରହ । ଚଳିତବର୍ଷ ଧାନକିଣା ଡବଲ ସ୍ପିଡରେ ହେଉଥିବା ମନ୍ତ୍ରୀ ଯୁକ୍ତି ବାଢିଛନ୍ତି । ଚଳିତବର୍ଷ ୧୯ ଲକ୍ଷ ୬୮ହଜାର ଚାଷୀ ପଞ୍ଜୀକରଣ କରିଛନ୍ତି । ବର୍ତ୍ତମାନ ସୁଦ୍ଧା ୯ ଲକ୍ଷ ୪୧ ହଜାର ଟୋକନ ଇସ୍ୟୁ ହେବା ସହ ୫ ଲକ୍ଷ ମେଟ୍ରିକ ଟନ ଧାନ ସଂଗ୍ରହ କରିଛନ୍ତି ସରକାର । ବର୍ତ୍ତମାନ ସୁଦ୍ଧା ଲକ୍ଷେ ଚାଷୀ ଧାନ ବିକି ସାରିଲେଣି ବୋଲି ଯୋଗାଣ ମନ୍ତ୍ରୀ କହିଛନ୍ତି । ମନ୍ତ୍ରୀଙ୍କ ସୂଚନା ଅନୁସାରେ ବରଗଡ଼ରେ ୧ ଲକ୍ଷ ୮୦ ହଜାର ୭୮୫ ମେଟ୍ରିକ ଟନ ଧାନ ସଂଗ୍ରହ ସରିଲାଣି । ସମ୍ବଲପୁରରେ ୧ ଲକ୍ଷ ୩୪ ହଜାର ୭୧୮ମେଟ୍ରିକ ଟନ ଧାନ ଉଠି ସାରିଲାଣି । କଳାହାଣ୍ଡି ୯୦ ହଜାର, ନୂଆପଡା ୫୭ ହଜାର ମେଟ୍ରିକ ଟନ ଧାନ ଉଠିଲାଣି ।
ସେପଟେ ଚାଷୀଙ୍କୁ ଯୋଗାଣମନ୍ତ୍ରୀ ଆନ୍ଦୋଳନଜୀବୀ କହିବାକୁ ନେଇ କଡା ଜବାବ ଦେଇଛି ବିଜେଡି । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ଭୋଟ ନେଇସାରିଲା ପରେ ଚାଷୀଙ୍କୁ ବିଜେପି ସରକାର ଆନ୍ଦୋଳନଜୀବୀ କହୁଛି । ଧାନ କିଣାରେ ସମ୍ପୃକ୍ତ ୩ ବିଭାଗ ମଧ୍ୟରେ ସାମଞ୍ଜସ୍ୟ ନାହିଁ । ସରକାର ଧାନ କିଣିବାକୁ ଅକ୍ଷମ । ଚାଷୀଙ୍କୁ ସାହାଯ୍ୟ କରିବାକୁ ଅକ୍ଷମ । ସେ କଥା ସରାକର ଘୋଷଣା କରି ଦିଅନ୍ତୁ ବୋଲି କହିଛି ବିଜେଡି । ଆମେ ମିଛ କଥା କହି ସରକାରକୁ ଆସିଥିଲୁ । ଆମେ ତୁମ କଥା ପୂରଣ କରି ପାରିବୁ ନାହିଁ । ତା’ହେଲେ ଚାଷୀ ତାଙ୍କ ଅନ୍ୟବାଟ ଖୋଜିବେ । ଚାଷୀଙ୍କୁ ମିଛ ପ୍ରତିଶୃତି ଦେବାରୁ ସରକାର ଖ୍ୟାନ୍ତ ହେବା ଦରକାର ବୋଲି ବିଜେଡି । କଂଗ୍ରେସ ମଧ୍ୟ ଚାଷୀ ସମସ୍ୟାକୁ ନେଇ ସରକାରଙ୍କ ଉପରେ ବର୍ଷିଛି ।
ଚଳିତବର୍ଷ ମାସେ ବିଳମ୍ବରେ ଧାନ କିଣା ଆରମ୍ଭ କରିଛନ୍ତି ସରକାର । ମଣ୍ଡିରେ ଚାଷୀ ନାନା ସମସ୍ୟା ଭୋଗୁଥିବା ବେଳେ ଚାଷୀଙ୍କୁ ଟୋକନ ମିଳୁନଥିବାରୁ ପଶ୍ଚିମ ଓଡିଶାରେ ଚାଷୀ ହନ୍ତସନ୍ତ ହେଉଛନ୍ତି । ଏତେ ସବୁ ପରେ ମଧ୍ୟ ସରକାର କହୁଛନ୍ତି ସୁରୁଖୁରୁରେ ଚାଲିଛି ଧାନ କିଣା ।
ଚାପ ପରେ ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ମନା ନିଷ୍ପତ୍ତି ଫେବୃଆରୀ ପହିଲା ଯାଏଁ ଘୁଞ୍ଚାଇଛନ୍ତି ସରକାର
ଚାପ ପରେ ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ମନା ନିଷ୍ପତ୍ତି ଫେବୃଆରୀ ପହିଲା ଯାଏଁ ଘୁଞ୍ଚାଇଛନ୍ତି ସରକାର
ନନ୍ଦିଘୋଷ ବ୍ୟୁରୋ: ଜାନୁଆରୀରୁ ପ୍ରଦୂଷଣ ପ୍ରମାଣପତ୍ର ଧରପଗଡ଼ ଖବର ପ୍ରସାରଣ ପରେ ସାଧାରଣ ଲୋକଙ୍କ ଭିତରେ ଅସ୍ଥିରତା ଦେଖାଦେଇଛି । ସରକାରଙ୍କ ବୈଠକ ପରେ ପରେ ପ୍ରଦୂଷଣ ପ୍ରମାଣପତ୍ର ପାଇବାକୁ ଲମ୍ବା ଲାଇନ ଦେଖିବାକୁ ମିଳୁଥିଲା । ସରକାରଙ୍କ ଏଭଳି ତରବରିଆ ନିଷ୍ପତ୍ତିକୁ ବିରୋଧ ଆରମ୍ଭ କରିଥିଲେ ଜନସାଧାରଣ । ତେବେ ବିଭିନ୍ନ ମହଲରୁ ଚାପ ପରେ ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ମନା ନିଷ୍ପତ୍ତି ଫେବୃଆରୀ ପହିଲା ଯାଏଁ ଘୁଞ୍ଚାଇଛନ୍ତି ସରକାର । ତେବେ ଦଣ୍ଡବିଧାନ ନେଇ ଚାଲିଥିବା ଗୁଜବଠାରୁ ଦୂରରେ ରହିବାକୁ ପରିବହନ ବିଭାଗ ଅନୁରୋଧ କରିଛି ।
ଶେଷରେ ଗାଡ଼ିର ପ୍ରଦୂଷଣ ଯାଞ୍ଚ ପାଇଁ ଜନସାଧାରଣଙ୍କ ସମସ୍ୟାକୁ ଦୃଷ୍ଟିରେ ରଖି ଅବଧି ବୃଦ୍ଧି କରିବାକୁ ବାଧ୍ୟ ହେଲେ ସରକାର । ଦୁଇ ଦିନ ହେବ ପ୍ରଦୂଷଣ ପ୍ରମାଣପତ୍ର ପାଇବାକୁ ଟେଷ୍ଟିଂ ସେଣ୍ଟର ଆଗରେ ଲମ୍ବା ଲାଇନ ଦେଖିବାକୁ ମିଳୁଥିଲା । ଦିନର ଖରା ହେଉ କି ରାତିର ଜାଡ଼, ସବୁ କଷ୍ଟ ସହି ଲୋକେ ପ୍ରଦୂଷଣ ପ୍ରମାଣପତ୍ର ପାଇବାକୁ ଲାଇନ ଲଗାଉଛନ୍ତି । ସରକାରଙ୍କ ବୈଠକ ପରେ ହଠାତ ଜାଣିବାକୁ ମିଳିଥିଲା ଯେ ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ମନା । ଏଥିସହ ୧୦ ହଜାର ଟଙ୍କାର ଜରିମାନା ରହିଛି । ଏନେଇ ସବୁ ଗାଡି ମାଲିକ ବ୍ୟସ୍ତ ବିବ୍ରତ ହୋଇ ଟେଷ୍ଟିଂ ସେଣ୍ଟର ଧାଇଁଲେ । ବର୍ତ୍ତମାନ ଲୋକଙ୍କୁ ଆଉ ଏକ ସୁଯୋଗ ମିଳିଛି । ମୋଟର ଯାନର ପ୍ରଦୂଷଣ ସାର୍ଟିଫିକେଟ୍ ଯାଞ୍ଚ ନେଇ ଜନସାଧାରଣ ସମ୍ମୁଖୀନ ହେଉଥିବା ସମସ୍ୟାକୁ ଅନୁଧ୍ୟାନ କରି ‘ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ମନା ଲାଗୁ ନିଷ୍ପତ୍ତିକୁ ଘୁଞ୍ଚାଯାଇଛି । ପୂର୍ବରୁ ଜାନୁଆରୀରୁ ଏହାକୁ ଲାଗୁ ପାଇଁ ନିଷ୍ପତ୍ତି ହୋଇଥିଲା । ତେବେ ଜନସାଧାରଣଙ୍କ ଦାବିକୁ ଦୃଷ୍ଟିରେ ରଖି ବାଣିଜ୍ୟ ଓ ପରିବହନ ବିଭାଗ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିର୍ଦ୍ଦେଶକ୍ରମେ ଏହାକୁ ଫେବୃଆାରୀ ପହିଲାକୁ ଘୁଞ୍ଚାଯାଇଛି । ଏହି ଅବଧି ମଧ୍ୟରେ ମୋଟର ଯାନ ଆଇନ ଅନୁଯାୟୀ ବୈଧ ପ୍ରଦୂଷଣ ପ୍ରମାଣ ପତ୍ର ନଥିବା ଯାନମାନେ ପ୍ରଦୂଷଣ ଯାଞ୍ଚ କରାଇ ନେବାକୁ ବିଭାଗ ପକ୍ଷରୁ ଅନୁରୋଧ କରାଯାଇଛି । ଫେବ୍ରୁଆରୀ ପହିଲା ପୂର୍ବରୁ କୌଣସି ପେଟ୍ରୋଲ ପମ୍ପରେ କାହାକୁ ମଧ୍ୟ ପ୍ରଦୂଷଣ ସାର୍ଟିଫିକେଟ ପାଇଁ ଇନ୍ଧନ ଦେବାକୁ ମନା କରାଯାଇପାରିବ ନାହିଁ । ଏହି ସମୟରେ ପ୍ରଦୂଷଣ ସାର୍ଟିଫିକେଟ ସଂକ୍ରାନ୍ତରେ ବ୍ୟାପକ ସଚେତନତା କାର୍ଯ୍ୟକ୍ରମ ଗ୍ରହଣ କରିବାକୁ ନିଷ୍ପତ୍ତି ହୋଇଛି ।
ସମୟ ସୀମା ବୃଦ୍ଧି ଖବର ପାଇବା ପରେ ବି ଲୋକଙ୍କ ଲାଇନ କମିନି । ଯେଉଁଥି ପାଇଁ ବୈଧ ପ୍ରଦୂଷଣ ପ୍ରମାଣପତ୍ର ନଥିଲେ ଇନ୍ଧନ ମନା ପ୍ରସଙ୍ଗରେ କୌଣସି ଗୁଜବର ଶିକାର ହୋଇ ବିବ୍ରତ ନହେବାକୁ ଜନସାଧାରଣଙ୍କୁ ଅନୁରୋଧ କରିଛି ପରିବହନ ବିଭାଗ । ନିୟମର ଅନୁପାଳନ କରୁଥିବା ମୋଟରଯାନ ବ୍ୟବହାରକାରୀଙ୍କ ପାଇଁ କିଛି ବି ଚିନ୍ତା କରିବା ଆବଶ୍ୟକ ନାହିଁ । ଏହା କେବଳ ନିୟମ ଉଲ୍ଲଙ୍ଘନକାରୀଙ୍କ ଉପରେ ଅଙ୍କୁଶ ଲଗାଇବାକୁ ପଦକ୍ଷେପ ନିଆଯାଇଛି ବୋଲି ସରକାରଙ୍କ ପକ୍ଷରୁ କୁହାଯାଇଛି ।
ପରିବହନ ସେବା ସମ୍ବନ୍ଧୀୟ କୌଣସି ସୂଚନା ପାଇଁ ୨୪ ଘଣ୍ଟିଆ ଟୋଲ୍ ଫ୍ରି ନମ୍ବର- ୧୮୦୦୩୪୫୧୦୭୩ରେ ଯୋଗାଯୋଗ କରିବା ପାଇଁ ଅନୁରୋଧ କରିଛି ପରିବହନ ବିଭାଗ । ପରିବେଶ ସୁରକ୍ଷା ଭଳି ମହତ ଉଦ୍ଦେଶ୍ୟକୁ ଦୃଷ୍ଟିରେ ରଖି ମୋଟର ଯାନ ଆଇନ ଆଧାରରେ ସବୁ ପଦକ୍ଷେପ ଗ୍ରହଣ କରାଯାଇଛି ।
ହାଇକୋର୍ଟଙ୍କ ନିର୍ଦ୍ଦେଶ ପରେ ଚେତିଲା ବାଲେଶ୍ବର ପ୍ରଶାସନ, ମାଟିରେ ମିଶିଲା ୧୮୮ ବ୍ୟବସାୟୀଙ୍କ ଦୁଇ ମହଲା କୋଠା
ହାଇକୋର୍ଟଙ୍କ ନିର୍ଦ୍ଦେଶ ପରେ ଚେତିଲା ବାଲେଶ୍ବର ପ୍ରଶାସନ, ମାଟିରେ ମିଶିଲା ୧୮୮ ବ୍ୟବସାୟୀଙ୍କ ଦୁଇ ମହଲା କୋଠା
ନନ୍ଦିଘୋଷ ବ୍ୟୁରୋ: ହାଇକୋର୍ଟଙ୍କ ନିର୍ଦ୍ଦେଶ ପରେ ଚେତିଲା ପ୍ରଶାସନ । ସରକାରୀ ଜାଗା ଉଚ୍ଛେଦ ସହ ରାସ୍ତା ପ୍ରସସ୍ତିକରଣ ପାଇଁ ଆରମ୍ଭ ହେଲା ପ୍ରକ୍ରିୟା । ବାଲେଶ୍ବର ରେଲୱେ ଷ୍ଟେସନ ଛକଠାରୁ ଫକୀର ମୋହନ ଗୋଲେଇ ପର୍ଯ୍ୟନ୍ତ ଜବରଦଖଲ ଉଚ୍ଛେଦ କରିଛି ପ୍ରଶାସନ । ବୁଲଡୋଜର ମାଡ଼ରେ ୩ ମାର୍କେଟ କମ୍ପ୍ଲେକ୍ସର ୧୮୮ ବ୍ୟବସାୟୀଙ୍କ ଦୁଇ ମହଲା କୋଠା ମାଟିରେ ମିଶିଛି । ବିକାଶକୁ ସ୍ବାଗତ କରାଯାଇଥିଲେ ସୁଦ୍ଧା ଦୋକନୀଙ୍କୁ ଥଇଥାନ କରିବାକୁ ଅନୁରୋଧ କରିଛନ୍ତି ବ୍ୟବସାୟୀ ଓ ସ୍ଥାନୀୟ ବୁଦ୍ଧିଜୀବୀ ।
ବାଲେଶ୍ବରରେ ଦୂର ହେବ ଟ୍ରାଫିକ ସମସ୍ୟା । ଗହଳିରୁ ମିଳିବ ମୁକ୍ତି, ପ୍ରଶସ୍ତ ହେବ ରାସ୍ତା । କୋର୍ଟଙ୍କ ନିର୍ଦ୍ଦେଶ ପରେ ଚେତିଲା ପ୍ରଶାସନ । ଆରମ୍ଭ ହେଲା ଜବର ଦଖଲ ଉଚ୍ଛେଦ । ବୁଲଡୋଜର ମାଡ଼ରେ ମାଟିରେ ମିଶିଲା ଦୋକାନୀଙ୍କ କୋଠା । ବାଲେଶ୍ୱର ଜିଲ୍ଲାର ମୁଖ୍ୟରାସ୍ତା ଓଟି ରୋଡର ରେଲୱେ ଷ୍ଟେସନ ଛକରୁ ଫକୀର ମୋହନ ଗୋଲେଇ ଛକ ଯାଏଁ ରାସ୍ତା ପ୍ରଶସ୍ତ ନଥିବାରୁ ନାହିଁ ନଥିବା ଅସୁବିଧା ଭୋଗୁଥିଲେ ଲୋକେ । ସରକାରୀ ଜାଗାର ଦୀର୍ଘଦିନ ଧରି ବ୍ୟବସାୟୀମାନେ ମାଡ଼ି ବସି ଦୋକାନ କରିଥିବାରୁ ସୃଷ୍ଟି ହେଉଥିଲା ଗୁରୁତର ଟ୍ରାଫିକ ସମସ୍ୟା । ଏନେଇ ବାରମ୍ବାର ଦାବି ପରେ ଜବରଦଖଲ ଉଚ୍ଛେଦ ପାଇଁ ନିର୍ଦ୍ଦେଶ ଦେଇଥିଲେ କୋର୍ଟ । ସଦର ଭାସ୍କରଗଞ୍ଜ ୟୁନିଟ ୧୦ ଅଧୀନରେ ୪୦୫ ନମ୍ବର ପ୍ଲଟର ସମସ୍ତ ଅଞ୍ଚଳ ଭାଙ୍ଗିବାକୁ ହାଇକୋର୍ଟଙ୍କ ନିର୍ଦ୍ଦେଶ ପରେ ବୁଲିଛି ବୁଲଡୋଜର ।
ରାସ୍ତା ଜବରଦଖଲ ଯୋଗୁଁ ରେଳ ଷ୍ଟେସନ, ହସ୍ପିଟାଲ ଯିବାକୁ ନୟାନ୍ତ ହେଉଥିଲେ ଲୋକେ । ତେଣୁ ରାସ୍ତାର ପାର୍ଶ୍ଵରେ ୨୭୮ରୁ ଅଧିକ ଦୋକାନୀଙ୍କୁ ଉଚ୍ଛେଦ କରିବାକୁ ପ୍ରଶାସନ ନିଷ୍ପତ୍ତି ନେଇଛି । ୩ଟି ମାର୍କେଟ କମ୍ପ୍ଲେକ୍ସର ୧୮୮ ବ୍ୟବସାୟୀଙ୍କ ଦୁଇ ମହଲା କୋଠାକୁ ସମ୍ପୂର୍ଣ୍ଣ ରୂପେ ଭଙ୍ଗା ଯାଇଛି । ଜିଲ୍ଲାପାଳଙ୍କ ତତ୍ତ୍ଵବଧାନରେ, ୪ ପ୍ଲାଟୁନ ପୋଲିସ ଉପସ୍ଥିତିରେ ୧୨ରୁ ଅଧିକ ଜେସିବି ଉଚ୍ଛେଦ କାମରେ ନିୟୋଜିତ ହୋଇଛି । ତେବେ ରାସ୍ତାର ମଝିରୁ ୧୮ ମିଟର ଓସାର ଭାଙ୍ଗିବାକୁ ନାପସନ୍ଦ କରିଛନ୍ତି ବୁଦ୍ଧିଜୀବୀ । ବିକାଶକୁ ସ୍ବାଗତ କରିଥିଲେ ବି ବ୍ୟବସାୟୀଙ୍କୁ ଥଇଥାନ କରିବାକୁ ବାଦି କରିଛନ୍ତି । ତେବେ ସ୍ଥାନୀୟ ଅଞ୍ଚଳଟି ମ୍ୟୁନିସିପାଲଟି ଅନ୍ତର୍ଗତ ହୋଇଥିବା ହେତୁ ପରବର୍ତ୍ତୀ ସମୟରେ ଖାଲି ସ୍ଥାନରେ ବ୍ୟବସାୟୀକରଣ ମାର୍କେଟ କମ୍ପ୍ଲେକ୍ସ ନିର୍ମାଣ ପାଇଁ ବ୍ୟବସ୍ଥା କରାଯିବ ବୋଲି ଜିଲ୍ଲାପାଳ କହିଛନ୍ତି ।
ନାବାଳକଙ୍କୁ ଘାରିଛି ଭାଇଗିରି ନିଶା, ପରିବର୍ତ୍ତିତ ଜୀବନଶୈଳୀରେ ବଞ୍ଚିବାକୁ ସାଜୁଛନ୍ତି କ୍ରିମିନାଲ
ନାବାଳକଙ୍କୁ ଘାରିଛି ଭାଇଗିରି ନିଶା, ପରିବର୍ତ୍ତିତ ଜୀବନଶୈଳୀରେ ବଞ୍ଚିବାକୁ ସାଜୁଛନ୍ତି କ୍ରିମିନାଲ
ନନ୍ଦିଘୋଷ ବ୍ୟୁରୋ: ଆଇନକୁ ହାତକୁ ନେଉଛନ୍ତି ନାବାଳକ । ଭାଇ ବନିବା ପାଇଁ କରୁଛନ୍ତି ଭିଡିଓ ଭାଇରାଲ । ପରିବର୍ତ୍ତିତ ଜୀବନଶୈଳୀରେ ବଞ୍ଚିବା ପାଇଁ ବାରମ୍ବାର ଆଇନକୁ ହାତକୁ ନେଉଛନ୍ତି । POCSO କେସ କମାଇବା ପାଇଁ ବାରମ୍ବାର ପୋଲିସ ପକ୍ଷରୁ ସଚେତନତା କରାଯାଉଥିବା ବେଳେ ନିତିଦିନର ଘଟଣା ଏବେ ଚିନ୍ତାର କାରଣ ସାଜିଛି । ସେପଟେ ବାଳ ସୁଧାର ଗୃହ ନଥିବାରୁ ତଦନ୍ତକାରୀ ସଂସ୍ଥାର ବଢୁଛି ମୁଣ୍ଡବିନ୍ଧା ।
ଲକ୍ଜରି ଲାଇଫ ଷ୍ଟାଇଲ ପାଇଁ କ୍ରିମିନାଲ ବନୁଛନ୍ତି ନାବାଳକ । ପାଠପଢ଼ା ବୟସରେ ଭିଆଉଛନ୍ତି ନାରକୀୟ କାଣ୍ଡ । ନାବଳକଙ୍କୁ ସୁଧାର ଗୃହରେ ଛାଡିବା ଏବେ ବଡ଼ ଚ୍ୟାଲେଞ୍ଜ । ରାଜଧାନୀରେ ବାଳ ସୁଧାର ଗୃହ କରିବା ପାଇଁ ଦାବି । କୋମଳ ମତି ବୟସରେ ଏମାନଙ୍କ କାଣ୍ଡ ଦେଖିଲେ, ଛାତି ଥରି ଉଠିବ । ଗତ ୩୧ ଅକ୍ଟୋବରରେ ଘଟିଥିବା ଦୁଇଟି ଘଟଣା ଚିନ୍ତା ବଢ଼ାଇଛି । ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ୧୪ ବର୍ଷୀୟ ନାବାଳକକୁ ଅପହରଣ କରି ନିସ୍ତୁକ ମାଡ଼ ମାରୁଥିବା ଭିଡିଓ ଭାଇରାଲ ହୋଇଥିଲା l ଧଉଳି ଥାନା ଗୋପୀନାଥପୁର କୃଷ୍ଣପୁର ଗ୍ରାମର ୧୪ ବର୍ଷୀୟ ନାବାଳକଙ୍କୁ ପୂର୍ବ ଶତ୍ରୁତାକୁ କେନ୍ଦ୍ରକରି ସ୍ଥାନୀୟ ଅଞ୍ଚଳର କିଛି ଯୁବକ ଏକ ନିକାଞ୍ଚନ ସ୍ଥାନକୁ ନେଇ ମାରପିଟ କରିଥିଲେ l ପୋଲିସ ଘଟଣାରେ ୭ ଜଣଙ୍କୁ ଗିରଫ କରିଥିବା ବେଳେ ଅଧିକାଂଶ ଥିଲେ ନାବାଳକ । ସମାନ ଢଙ୍ଗରେ ସେହିଦିନ ଏୟାରଫିଲ୍ଡ ଥାନା ଅଞ୍ଚଳରେ ତ୍ରିକୋଣୀୟ ପ୍ରେମକୁ ନେଇ ହୋଇଥିଲା ଫାଇଟ । ଆଉ ଫାଇଟର ସାଜିଥିଲେ କୋମଳମତି ପିଲା । ଏଭଳି ଅନେକ ଘଟଣା ଏବେ ପୋଲିସ ପାଇଁ ପାଲଟିଛି ମୁଣ୍ଡବିନ୍ଧା ।
ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ବାଳ ଅପରାଧୀଙ୍କୁ କାବୁ କରିବା ପରେ ଭୁବନେଶ୍ୱରରେ ବାଳ ସୁଧାର ଗୃହ ନଥିବାରୁ ସେମାନଙ୍କୁ ବ୍ରହ୍ମପୁର କିମ୍ବା ଅନୁଗୁଳ ନେବାକୁ ପଡୁଛି । ୩ ବର୍ଷରୁ କମ ଦଣ୍ଡାଦେଶ ଥିବା କେସରେ ସେମାନଙ୍କ ବିରୋଧରେ ଏତଲା ମଧ୍ୟ ହୋଇପାରୁନାହିଁ । ପ୍ରତିମାସରେ ୨୦ରୁ ଊର୍ଦ୍ଧ୍ବ ବାଳ ଅପରାଧୀ ଭୁବନେଶ୍ୱର ୟୁପିଡ଼ିରୁ ଧରାପଡୁଥିବା ବେଳେ ସେମାନଙ୍କୁ ସୁଧାର ଗୃହକୁ ପଠାଇବା କଷ୍ଟକର ହୋଇପଡୁଛି । ଗତ ୧୭ ତାରିଖରେ ଭୁବନେଶ୍ୱର ଅବକାରୀ ଟିମ କନ୍ଧମାଳରୁ ଆସୁଥିବା ବିପୁଳ ଗଞ୍ଜେଇ ଜବତ କରିଥିଲା । ୪ ଜଣ ଅଭିଯୁକ୍ତଙ୍କୁ ଧରିଥିବା ବେଳେ ସେମାନଙ୍କ ଭିତରୁ ଦୁଇଜଣ ଥିଲେ ନାବାଳକ । ସେମାନଙ୍କୁ ସୁଧାର ଗୃହରେ ଛାଡିବା ପାଇଁ ଶେଷରେ ଅବକାରୀ ବିଭାଗକୁ ନୟାନ୍ତ ହେବାକୁ ପଡିଥିଲା ।
କେବଳ ଏହି ଘଟଣା ନୁହେଁ, ଜଟଣୀରେ ବର୍ଷକ ତଳେ ହୋଇଥିବା ମର୍ଡର ଓ ଗୋପାଳପୁର ଗଣଦୁଷ୍କର୍ମ ଘଟଣାରେ ମଧ୍ୟ ନାବାଳକଙ୍କ ସମ୍ପୃକ୍ତି ସାମ୍ନାକୁ ଆସିଛି । ଯାହାକୁ ନେଇ ପୂର୍ବରୁ ଉଦବେଗ ପ୍ରକାଶ କରିଛି NCRB ।
ଓଡ଼ିଶାର ପରବର୍ତ୍ତୀ ମୁଖ୍ୟ ଶାସନ ସଚିବ ହେବେ ଅନୁ ଗର୍ଗ, ରାଜ୍ୟ ପାଇବ ପ୍ରଥମ ମହିଳା ମୁଖ୍ୟ ଶାସନ ସଚିବ
ଓଡ଼ିଶାର ପରବର୍ତ୍ତୀ ମୁଖ୍ୟ ଶାସନ ସଚିବ ହେବେ ଅନୁ ଗର୍ଗ, ରାଜ୍ୟ ପାଇବ ପ୍ରଥମ ମହିଳା ମୁଖ୍ୟ ଶାସନ ସଚିବ
ନନ୍ଦିଘୋଷ ବ୍ୟୁରୋ: ଓଡ଼ିଶାର ପରବର୍ତ୍ତୀ ମୁଖ୍ୟ ଶାସନ ସଚିବ ହେବେ ଅନୁ ଗର୍ଗ । ରାଜ୍ୟର ପ୍ରଥମ ମହିଳା ମୁଖ୍ୟ ଶାସନ ସଚିବ ଭାବେ ଜାନୁଆରୀ ପହିଲାରୁ ଦାୟିତ୍ବ ଗ୍ରହଣ କରିବେ ଅନୁ । ଏବେ ଉନ୍ନୟନ କମିଶନର ତଥା ଜଳ ସମ୍ପଦ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଭାବେ କରୁଛନ୍ତି କାମ ।
୧୯୯୧ ବ୍ୟାଚର ଆଇଏଏସ୍ ଅଫିସର ଝାରସୁଗୁଡାର ଉପ ଜିଲ୍ଲାପାଳ ଭାବେ କାର୍ଯ୍ୟ ଆରମ୍ଭ କରିଥିଲେ । ଏହା ପରେ କଳାହାଣ୍ଡି ଉପ ଜିଲ୍ଲାପାଳ ଓ ଏଡିଏମ୍ ଦାୟିତ୍ବ ତୁଲାଇବା ପରେ ୧୯୯୬ ମସିହାରେ ବରଗଡ଼ ଜିଲ୍ଲାପାଳ ଭାବେ ଦାୟିତ୍ବ ନେଇଥିଲେ । ସମ୍ବଲପୁର ଜିଲ୍ଲାପାଳ ଭାବେ ମଧ୍ୟ କାର୍ଯ୍ୟ କରିଛନ୍ତି ଅନୁ । ୧୯୯୮ରୁ ୨୦୦୦ ମସିହା ପର୍ଯ୍ୟନ୍ତ ଦିଲ୍ଲୀରେ ଉପ ଆୟୁକ୍ତ କମିଶନର ଭାବେ କାମ କରିଛନ୍ତି । ୨୦୦୨ରୁ ୨୦୧୨ ଯାଏଁ ସ୍ବାସ୍ଥ୍ୟ ବିଭାଗର ବିଭିନ୍ନ ପଦବୀରେ ଦାୟିତ୍ବ ତୁଳାଇଥିଲେ । ୨୦୧୨ରୁ ୨୦୧୫ ଯାଏଁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ଯୁଗ୍ମ ସଚିବ ଭାବେ କାର୍ଯ୍ୟ କରିଥିଲେ । କେନ୍ଦ୍ର ସରକାରଙ୍କ ହସ୍ତତନ୍ତ ମନ୍ତ୍ରଣାଳୟର ଯୁଗ୍ମ ସଚିବ ଭାବେ ଦାୟିତ୍ବ ତୁଳାଇଥିଲେ ଅନୁ ।
୨୦୧୭ରେ ଓଡ଼ିଶା ଫେରିବା ପରେ ପ୍ରମୁଖ ସଚିବ ଭାବେ କାର୍ଯ୍ୟ ତୁଳାଇଥିଲେ । ଏହାପରେ ୨୦୨୦ରୁ ଜଳସମ୍ପଦ ବିଭାଗର ପ୍ରମୁଖ ଶାସନ ସଚିବ ଭାବେ କାର୍ଯ୍ୟ ଜାରି ରଖିଛନ୍ତି । ୨୦୨୨ରେ ଅତିରିକ୍ତ ମୁଖ୍ୟ ଶାସନ ସଚିବ ପାହ୍ୟକୁ ଉନ୍ନିତ ହୋଇଥିଲେ । ଏବେ ଜଳସମ୍ପଦ ବିଭାଗ ସହ ଉନ୍ନୟନ କମିଶନର ଦାୟିତ୍ବରେ ରହିଛନ୍ତି । ପ୍ରଥମ ମହିଳା ମୁଖ୍ୟ ଶାସନ ସଚିବ ଭାବେ ତାଙ୍କ ଉପରେ ଅନେକ ଦାୟିତ୍ବର ଆହ୍ବାନ ରହିବ । ଏବେ ମୁଖ୍ୟ ଶାସନ ସଚିବ ଥିବା ମନୋଜ ଆହୁଜାଙ୍କ କାର୍ଯ୍ୟକାଳ ୨୦୨୫ ଡିସେମ୍ବର ୩୧ରେ ସରିବ ।
ରାତି ପାହିଲେ କ୍ରିସମାସ, କନ୍ଧମାଳରେ ଲୋକଙ୍କ ମଧ୍ୟରେ ଉତ୍ସାହ
ରାତି ପାହିଲେ କ୍ରିସମାସ, କନ୍ଧମାଳରେ ଲୋକଙ୍କ ମଧ୍ୟରେ ଉତ୍ସାହ
ନନ୍ଦିଘୋଷ ବ୍ୟୁରୋ: ଆସନ୍ତାକାଲି ବଡଦିନ । ଯୀଶୁଖ୍ରୀଷ୍ଟଙ୍କ ଧରାବତରଣ ପାଇଁ ସଭିଙ୍କ ମନରେ ଉତ୍ସାହ । ସଜେଇ ହେଲାଣି ଗୀର୍ଜା ଘର । କ୍ରିସମାସ ପାଇଁ ସାରା ରାଜ୍ୟରେ ପ୍ରସ୍ତୁତି ଚାଲିଥିବା ବେଳେ କନ୍ଧମାଳରେ ଦେଖିବାକୁ ମିଳିଛି ଉତ୍ସାହ । ଦୋକାନରୁ ରଙ୍ଗବେରଙ୍ଗର ଆଲୋକମାଳା କିଣି ନେଉଛନ୍ତି ଲୋକେ ।
କନ୍ଧମାଳ ଜିଲ୍ଲା ଫୁଲବାଣୀର ମିରାକେଲ ଚର୍ଚ୍ଚ, ବାପଟିଷ୍ଟ୍ ଚର୍ଚ୍ଚ, କ୍ୟାଥୋଲିକ ଚର୍ଚ୍ଚରେ ସାଜସଜା ଶେଷ ପର୍ଯ୍ୟାୟରେ ପହଞ୍ଚିଛି । ଖ୍ରୀଷ୍ଟ ବିଶ୍ଵାସୀମାନେ ନିଜ ଘର ଦ୍ଵାର ସଫାସୁତରା କରି ବିଭିନ୍ନ ରଙ୍ଗରେ ରଙ୍ଗେଇ ସାରିଲେଣି । ବଡଦିନ ପାଇଁ ଦୋକାନ ବଜାରରେ ଲୋକଙ୍କ ଭିଡ ଜମୁଛି । କିଏ ଘରକୁ ସଜେଇବା ପାଇଁ ରଙ୍ଗ ବେରଙ୍ଗର ଆଲୋକମାଳା କିଣି ନେଉଛି ତ ଆଉ କିଏ ପରିବାରର ସମସ୍ତ ସଦସ୍ୟଙ୍କ ପାଇଁ ପୋଷାକପତ୍ର କିଣି ନେଉଛନ୍ତି ।
କନ୍ଧମାଳ ଜିଲ୍ଲାରେ ଧୁମଧାମରେ ପାଳନ କରାଯାଏ ବଡଦିନ । ପର୍ବକୁ ଶାନ୍ତିଶୃଙ୍ଖଳାରେ ସାରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଶାନ୍ତି କମିଟି ବୈଠକ ଅନୁଷ୍ଠିତ ହୋଇଯାଇଛି । ବୈଠକରେ ଜିଲ୍ଲାର ସମସ୍ତ ଜନ ପ୍ରତିନିଧି ଓ ପ୍ରଶାସନିକ ଅଧିକାରୀ ଓ ବୁଦ୍ଧିଜୀବୀ ସାମିଲ ହୋଇଥିଲେ ।
୧୮ ବର୍ଷର ନିର୍ବାସନ ପରେ ବାଂଲାଦେଶ ଫେରିବେ ତାରିକ ରେହମାନ
୧୮ ବର୍ଷର ନିର୍ବାସନ ପରେ ବାଂଲାଦେଶ ଫେରିବେ ତାରିକ ରେହମାନ
ନନ୍ଦିଘୋଷ ବ୍ୟୁରୋ: ଲଣ୍ଡନରେ ଦୀର୍ଘ ୧୮ ବର୍ଷର ଆତ୍ମନିର୍ବାସନ ପରେ ବାଂଲାଦେଶ ଫେରିବେ ତାରିକ ରେହମାନ । ତାରିକ ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ତଥା ବାଂଲାଦେଶ ଜାତୀୟ ପାର୍ଟି ନେତା ଖାଲେଦା ଜିଆଙ୍କ ପୁଅ । ଆସନ୍ତାକାଲି ଢାକାରେ ପହଞ୍ଚିବେ ୬୦ ବର୍ଷ ବୟସ୍କ ତାରିକ । ଆସନ୍ତା ଫେବ୍ରୁଆରୀ ୧୨ରେ ଦେଶରେ ସାଧାରଣ ନିର୍ବାଚନ ହେବାକୁ ଯାଉଥିବା ବେଳେ ସେ ସ୍ବଦେଶ ଫେରୁଛନ୍ତି । ମା’ ଖାଲେଦା ଜିଆ ଗୁରୁତର ଅବସ୍ଥାରେ ଅଛନ୍ତି । ତାଙ୍କ ପାଖକୁ ତାରିକ ଫେରୁଛନ୍ତି ।
ତେବେ ଖାଲେଦାଙ୍କ ଦଳୀୟ ଭୂମିକା ତାରିକ ନିର୍ବାହ କରିବେ ବୋଲି କର୍ମୀ ଆଶା ପ୍ରକାଶ କରିଛନ୍ତି । ଦୁଇ ଦଶନ୍ଧି ପରେ ବି ବାଂଲାଦେଶ ସାଧାରଣ ନିର୍ବାଚନରେ ଅଂଶଗ୍ରହଣ କରିପାରେ ବିଏନପି । ଆୱାମି ଲିଗ୍ ଶାସନ କାଳରେ ତାରିକଙ୍କ ବିରୋଧରେ ଆଇନଗତ ପ୍ରତିବନ୍ଧକ ଲାଗିଥିବାରୁ ସେ ଫେରିପାରୁ ନଥିଲେ । ବିଭିନ୍ନ ହାଇପ୍ରୋଫାଇଲ ମାମଲାରୁ ସେ ଖଲାସ ହୋଇଥିବାରୁ ସେ ଢାକା ଫେରିବେ । ଆସନ୍ତା ନିର୍ବାଚନରେ ଶେଖ ହସିନାଙ୍କ ଦଳ ଆୱାମି ଲିଗ୍ ନିର୍ବାଚନ ଲଢିପାରିବ ନାହିଁ ବୋଲି ୟୁନୁସ ସରକାର ନିଷେଧାଦେଶ ଜାରି କରିସାରିଛନ୍ତି । ତାରିକ ଆଜି ଯାଏଁ କୌଣସି ନିର୍ବାଚନ ଲଢି ନାହାନ୍ତି । ୨୦୦୮ରୁ ସେ ଲଣ୍ଡନରେ ରହି ବିଏନପିକୁ ପରିଚାଳନା କରୁଛନ୍ତି । ୨୦୦୧ରୁ ୨୦୦୬ ଯାଏଁ ବିଏନପିର ବିବାଦୀୟ ମୁଖ୍ୟ କାର୍ଯ୍ୟାଳୟ ଥିଲା ହାୱା ଭବନ । ସେହି ସମୟରେ ତାରିକ ଦଳର ସବୁ କଥା ବୁଝୁଥିଲେ । ତେବେ ହାୱା ଭବନ ଥିଲା ଅନେକ ଦୁର୍ନୀତି, ରାଜନୈତିକ ହିଂସାର ପ୍ରମୁଖ କେନ୍ଦ୍ର ।