ନନ୍ଦିଘୋଷ ବ୍ୟୁରୋ: ନୂଆ ସରକାର ଭତ୍ତା ସହାୟତା ଅର୍ଥରାଶି ବଢ଼ାଇ ବାହା ବାହା ନେଉଥିବା ବେଳେ ତିନି ମାସ ହେବ କଟକ ଚାଉଳିଆଗଞ୍ଜ ଅଞ୍ଚଳର କିଛି ଭିନ୍ନକ୍ଷମ ହିତାଧିକାରୀଙ୍କୁ ସରକାରଙ୍କ ନିର୍ଦ୍ଧାରିତ ୩ ହଜାର ୫ଶହ ଟଙ୍କାର ସହାୟତା ଭତ୍ତା ମିଳୁନାହିଁ। ବାଧ୍ୟ ହୋଇ ସେମାନେ ଆଜି ପରିବାର ସହିତ କଟକ ମହାନଗର ନିଗମ କମିଶନରଙ୍କୁ ଭେଟି ନିଜର ଗୁହାରି ଜଣାଇଛନ୍ତି । ଆଧାରରେ ସମସ୍ୟା ଥିବା ବେଳେ ଅଙ୍ଗୁଳି ଛାପ ମିଶୁ ନାହିଁ ବା ଡିଜିଟାଲ ସାର୍ଟିଫିକେଟ ନାହିଁ ଭଳି ଆଳ ଦେଖାଇ ସେମାନଙ୍କୁ ଫେରାଇ ଦେଉଛନ୍ତି ଫିଲ୍ଡରେ କାମ କରୁଥିବା ଅଧିକାରୀ । ଫଳରେ ଭତ୍ତା ଟଙ୍କା ନ ପାଇ ସେମାନେ ହଇରାଣ ହେଉଛନ୍ତି । ଏ ସବୁ ଗୁହାରି ଶୁଣିବା ପରେ ସାତ ଦିନ ମଧ୍ୟରେ ସମସ୍ୟର ସମାଧାନ କରିବାକୁ ପ୍ରତିଶୃତି ଦେଇଛନ୍ତି ସିଏମସି କମିଶନର।
ପୁଣି ଚାଲିପାରିବେ ଦୁର୍ଘଟଣାରେ ଗୋଡ ହରାଇଥିବା କୁନି ଝିଅ
ନନ୍ଦିଘୋଷ ବ୍ୟୁରୋ: ପୁଣି ଚାଲିପାରିବେ ଦୁର୍ଘଟଣାରେ ଗୋଡ ହରାଇଥିବା କୁନି ଝିଅ । କଟକ ବଡ ମେଡିକାଲର ପ୍ଲାଷ୍ଟିକ ସର୍ଜରୀ ବିଭାଗରେ ବିରଳ ଜରୁରୀକାଳୀନ ଅସ୍ତ୍ରୋପଚାର କରାଯାଇଛି । କଟି ଯାଇଥିବା ଗୋଡ ପୁଣି ଶରୀରେ ଜୋଡିଛନ୍ତି ଡାକ୍ତର । ମୟୂରଭଞ୍ଜ ବେତନଟୀରେ ସଡକ ଦୁର୍ଘଟଣାରେ ନିଜର ବାମଗୋଡ ସଂପୂର୍ଣ୍ଣ ଭାବେ ହରାଇଥିଲେ ୮ ବର୍ଷର କୁନି ଝିଅ ବୈଷ୍ଣବୀ। କଟକ ବଡ ମେଡିକାଲର ତାଙ୍କ ପ୍ଲାଷ୍ଟିକ ସର୍ଜରୀ ବିଭାଗରେ ଜରୁରୀକାଳୀନ ଅସ୍ତ୍ରୋପଚାର କରାଯାଇ କଟିଥିବା ଗୋଡକୁ ପୁଣି ଥରେ ଲଗାଯାଇଛି। ଗତକାଲି ଅପରାହ୍ନରେ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣାରେ ବୈଷ୍ଣବୀର ଗୋଡ ଜଙ୍ଘ ତଳୁ ପୁରା କଟି ଅଲଗା ହୋଇ ଯାଇଥିଲା। ପ୍ରାଥମିକ ଚିକିତ୍ସା କରି ତାକୁ କଟକ ବଡ ମେଡିକାଲକୁ ପଠାଇ ଦେଇଥିଲେ ବେତନଟୀ ଡାକ୍ତରଖାନା କର୍ତ୍ତୃପକ୍ଷ । ଗୁରୁତର ରୋଗୀ ସହ ଗୋଡଟିକୁ ବରଫାବୃତ ଜରିରେ ପ୍ୟାକିଂ କରି ସାଥିରେ ଧରି ଆସିଥିଲେ ପରିବାର ଲୋକ। ଏଠାରେ ରାତି ୧୨ଟାରୁ ରାତି ୩ଟା ପର୍ଯ୍ୟନ୍ତ ଜରୁରୀକାଳୀନ ଅସ୍ତ୍ରୋପଚାର କରାଯାଇଥିଲା। ଅସ୍ତ୍ରୋପଚାର ସରିବା ପରେ ଆଜି ବୈଷ୍ଣବୀର ଚେତା ଆସିବା ପରେ ସେ କଥାବାର୍ତ୍ତା କରୁଛି ଓ ଖାଇବାକୁ ମାଗୁଛି । ଆଉ ୧୫ ଦିନ କାଳ ଏଠାରେ ଚିକିତ୍ସିତ ହେବା ପରେ ଯୋଡା ଯାଇ ଥିବା ଗୋଡରେ ସୁଧାର ଆସିବ ବୋଲି ଆଶା କରାଯାଉଛି ।
ସାବତ ମା’ କଥାରେ ପୁଅକୁ ପେଟ୍ରୋଲ ଢ଼ାଳି ମାରିବାକୁ ଉଦ୍ୟମ କଲା ବାପା
ନନ୍ଦିଘୋଷ ବ୍ୟୁରୋ: ସୁନ୍ଦରଗଡ଼ ଜିଲ୍ଲା ଲହୁଣୀପଡ଼ା ଥାନା ଅନ୍ତର୍ଗତ ତାଳବାହାଳୀ ଗାଁରେ ଅଭାବନୀୟ ଘଟଣା । ସାବତ ମାର ସହଯୋଗରେ ନିଜ ପୁଅକୁ ପେଟ୍ରୋଲ ଢାଳି ନିଆଁଲଗାଇ ମାରି ଦେବାକୁ ବାପା ଉଦ୍ୟମ । ଜଳିଯାଇ ୧୮ ବର୍ଷୀୟ ପୁଅ ଦଶରଥ ଭୂମିଜ ଗୁରୁତର । ରାଉରକେଲା ସରକାରୀ ଡାକ୍ତରଖାନାରେ ଗୁରୁତର ଦଶରଥ ଭୂମିଜଙ୍କର ଚିକିତ୍ସା ଚାଲିଛି । ଗତ ୧୪ ତାରିଖ ରାତିରେ ପୁଅ ଶୋଇଥିବା ସମୟରେ ଦ୍ଵିତୀୟ ପତ୍ନୀଙ୍କ ସହଯୋଗରେ ବାପା ସମରା ଭୂମିଜ ପୁଅ ଉପରେ ପେଟ୍ରୋଲ ଢାଳି ନିଆଁ ଲଗାଇ ଘରର କବାଟ ବନ୍ଦ କରିଦେଇଥିଲା । ବାପା ପେଟ୍ରୋଲ ଢାଳି ଜାଳି ମାରିଦେବାକୁ ଉଦ୍ୟମ କରିଥିବା ପୁଅ ଦଶରଥ ଭୂମିଜ ଅଭିଯୋଗ କରିଛନ୍ତି । ଏ ସମ୍ପର୍କରେ ଲହୁଣୀପଡ଼ା ଥାନାରେ ଅଭିଯୋଗ ପରେ ଲହୁଣୀପଡ଼ା ଥାନା ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛନ୍ତି । ଅନ୍ୟପକ୍ଷରେ ବାପା ଦ୍ଵିତୀୟ ବିବାହ କରିବା ପରେ ଭଲ ପାଉନଥିବା ଓ ବିଭିନ୍ନ ସମୟରେ ମାଡ଼ ମାରୁଥିବା ପୁଅ ଦଶରଥ ଭୂମିଜ ଅଭିଯୋଗ କରିଛନ୍ତି ।
ନିଆଁ ଲିଭାଉଥିବା ବେଳେ ମହିଳା ଜୀବନ୍ତ ଦଗ୍ଧ
ନନ୍ଦିଘୋଷ ବ୍ୟୁରୋ: ନିଆଁ ଲିଭାଉଥିବା ବେଳେ ମହିଳା ଜୀବନ୍ତ ଦଗ୍ଧ । କାମାକ୍ଷାନଗର ମହାବିରୋଡ଼ ଥାନା ଗୋବରୀ ଗାଁରେ ଦୁଃଖଦ ଘଟଣା ଘଟିଛି । ଘର ନିକଟକୁ ଜଙ୍ଗଲ ନିଆଁ ମାଡି ଆସୁଥିବା ବେଳେ ତାହାକୁ ଲିଭାଇବାକୁ ଯାଇ ମହିଳା ଜୀବନ୍ତ ଦଗ୍ଧ ହୋଇଯାଇଛନ୍ତି । ମୃତ ମହିଳା ଜଣକ ହେଲେ ଗୋବରୀ ଗାଁର ବୁଧିନି ମହାନ୍ତ । ବୁଧିନିଙ୍କ ଘର ନିକଟରେ ଥିବା ଜଙ୍ଗଲ ରେ କୌଣସି କାରଣରୁ ନିଆଁ ଲାଗିବା ଫଳରେ ଏହା ଚାରିଆଡେ ବ୍ୟାପି ଯାଇଥିଲା । ଧିରେ ଧିରେ ଏହା ବ୍ୟାପି ଜଙ୍ଗଲ ନିକଟରେ ରହୁଥିବା ବୁଧିନିଙ୍କ ଘର ଆଡେ ମାଡି ଆସିଥିଲା । ଫଳରେ ନିଆଁକୁ ଲିଭାଇବା ପାଇଁ ବୁଧିନି ଘର ନିକଟରେ ଥିବା ଏକ କେନାଲ ହୁଡ଼ାରେ ଚଢ଼ି ଯାଇଥିଲେ । କିନ୍ତୁ କୌଣସି କାରଣ ବଶତଃ କେନାଲ ଉପରୁ ବୁଧିନିଙ୍କ ଗୋଡ଼ ଖସି ଯିବାରୁ ସେ ତଳେ ଜଳୁଥିବା ନିଆଁ ଭିତରେ ଖସି ପଡ଼ିଥିଲେ । ନିଆଁର ପ୍ରକୋପ ଏତେ ଭୟଙ୍କର ଥିଲା ଯେ ସେ ତାହା ମଧ୍ୟରୁ ବାହାରି ପାରିନଥିଲେ । ଫଳରେ କିଛି ସମୟ ମଧ୍ୟରେ ସେ ନିଆଁ ମଧ୍ୟରେ ସମ୍ପୂର୍ଣ୍ଣ ଭାବେ ଜୀବନ୍ତ ଦଗ୍ଧ ହୋଇ ଯାଇଥିଲେ । କିଛି ସ୍ଥାନୀୟ ଲୋକ ଏହା ଦେଖି ପୋଲିସକୁ ଖବର ଦେବା ପରେ ମହାବିରୋଡ଼ ପୋଲିସ ଘଟଣା ସ୍ଥଳରେ ପହଞ୍ଚି ଅଧିକ ତଦନ୍ତ ଆରମ୍ଭ କରିଛି ।
ଜଙ୍ଗଲରୁ ମହିଳାଙ୍କ ମୃତଦେହ ଉଦ୍ଧାର, ଦୁଷ୍କର୍ମ କରାଯାଇଥିବା ସନ୍ଦେହ
ନନ୍ଦିଘୋଷ ବ୍ୟୁରୋ: ଜଙ୍ଗଲରୁ ମହିଳାଙ୍କ ମୃତଦେହ ଉଦ୍ଧାର । ମୟୂରଭଞ୍ଜ ଜିଲ୍ଲା ମୋରଡା ଥାନା ଅନ୍ତର୍ଗତ ଏକ ଜଙ୍ଗଲରୁ ମହିଳାଙ୍କ ମୃତଦେହ ଜବତ କରିଛି ପୋଲିସ । ଗତ ୧୪ ତାରିଖ ଦିନ ସ୍ଥାନୀୟ ଲୋକେ ଜଙ୍ଗଲକୁ ପତ୍ର ତୋଳିବା ପାଇଁ ଯାଇଥିବା ବେଳେ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ । ଖବର ପାଇ ମୋରଡା ଥାନା ଅଧିକାରୀଙ୍କ ସହ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ତଦନ୍ତ ଜାରି ରଖିଛି । ଗତ ୧୨ ତାରିଖ ଦିନ ବାପଘରୁ ମହିଳା ଜଣକ କେଉଁଆଡେ ଚାଲିଯାଇଥିବା ଅଭିଯୋଗ କରିଥିଲେ ମୃତ ମହିଳାଙ୍କ ମା’ । ମହିଳା ଜଣଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିବା ପ୍ରାଥମିକ ତଦନ୍ତରୁ ସନ୍ଦେହ କରାଯାଉଛି।
ଗତ ୮ ମାସରେ ଖୋଲା ବଜାରରୁ ୨ ହଜାର କୋଟି ଋଣ
ନନ୍ଦିଘୋଷ ବ୍ୟୁରୋ: ରାଜ୍ୟରେ ବଢୁଛି ଋଣ ଭାର । ଚଳିତ ଆର୍ଥିକ ବର୍ଷ ୨୦୨୪-୨୫ର ଗତ ୮ମାସରେ ତଥା ଜୁନ ମାସ ଠାରୁ ଫେବୃଆରୀ ମାସ ଶେଷ ସୁଦ୍ଧା ରାଜ୍ୟ ସରକାର ଖୋଲା ବଜାରରୁ ୨ ହଜାର କୋଟି ଟଙ୍କା ଏବଂ କେନ୍ଦ୍ର ସରକାରଙ୍କ ଠାରୁ ୭ହଜାର ୧୪୯ କୋଟି ୫୬ ଲକ୍ଷ ଟଙ୍କା ଋଣ ଆହରଣ କରିଛନ୍ତି । କେନ୍ଦ୍ର ସରକାରଙ୍କ ଠାରୁ ଆହରଣ କରିଥିବା ଏହି ଋଣ ମଧ୍ୟରୁ ମୁଖ୍ୟତଃ SASCI ସ୍କିମରେ ୫୦ ବର୍ଷୀୟ ସୁଧମୁକ୍ତ ଋଣ ବାବଦକୁ ୮୧୯ କୋଟି ଟଙ୍କା ଋଣ ଅନ୍ତର୍ଭୁକ୍ତ । ଫେବୃଆରୀ ୨୦୨୫ ଶେଷ ସୁଦ୍ଧା ଖୋଲା ବଜାରରୁ ଆହରଣ କରିଥିବା ଋଣର ସୁଧ ଦେୟ ହାରାହାରି ୭ ପ୍ରତିଶତ ରହୁଛି । ଋଣ ବାବଦରେ ଆହରଣ କରାଯାଇଥିବା ଏହି ଧନରାଶିକୁ ସମ୍ପୂର୍ଣ୍ଣ ଭାବରେ ପୁଞ୍ଜି ବିନିଯୋଗ ଓ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ଯଥା ଜଳସେଚନ, ଶକ୍ତି, ସଡକ, ବିପର୍ଯ୍ୟୟ ପରିଚାଳନା, ସହରାଞ୍ଚଳ ଭିତ୍ତିଭୂମି ଇତ୍ୟାଦି ବିକାଶମୂଳକ ପ୍ରକଳ୍ପରେ ବିନିଯୋଗ କରାଯାଉଅଛି ବୋଲି ଗୃହରେ ମୁଖ୍ଯମନ୍ତ୍ରୀ ତଥା ଅର୍ଥମନ୍ତ୍ରୀ ମୋହନ ମାଝୀ ଲିଖିତ ଉତ୍ତର ରଖିଛନ୍ତି । ସୁଧ ହାର କେତେ ରହିବ ଆରବିଆଇ ମୁଦ୍ରାନୀତି କମିଟି ନିର୍ଦ୍ଧାରଣ କରିଥାନ୍ତି । ଦରଦାମ ହ୍ରାସ ଓ ବୃଦ୍ଧି ଉପରେ ରାଜ୍ୟ ସରକାର ନିରନ୍ତର ନଜର ରଖୁଛନ୍ତି ବୋଲି ଗୃହରେ ମୁଖ୍ୟମନ୍ତ୍ରୀ ଲିଖିତ ଉତ୍ତର ରଖିଛନ୍ତି ।
୨୦ ହଜାର ଟଙ୍କା ଲାଞ୍ଚ ନେବାବେଳେ ଧରାପଡ଼ିଲେ ରାଜକନିକା ବ୍ଲକ ମଣ୍ଡଳ ଶିକ୍ଷାଧିକାରୀ କାର୍ଯ୍ୟାଳୟ ଆକାଉଣ୍ଟାଣ୍ଟ୍
ନନ୍ଦିଘୋଷ ବ୍ୟୁରୋ: ଭିଜିଲାନ୍ସ ଜାଲରେ ଆକାଉଣ୍ଟାଣ୍ଟ୍। ବିଦ୍ଯାଳୟର ୧ ଲକ୍ଷ ୯୩ ହଜାର ଟଙ୍କା ଡ୍ରେସ ବିଲ ପାସ୍ କରାଇ ଦେବାକୁ କହି ୨୦ ହଜାର ଟଙ୍କା ଲାଞ୍ଚ ନେବାବେଳେ ଧରାପଡ଼ିଲେ କେନ୍ଦ୍ରାପଡ଼ା ରାଜକନିକା ବ୍ଲକ ମଣ୍ଡଳ ଶିକ୍ଷାଧିକାରୀ କାର୍ଯ୍ୟାଳୟ ଆକାଉଣ୍ଟାଣ୍ଟ୍ ମହମ୍ମଦ ଫିରୋଜ ଖାନ। ନହୁଣି ଗାଁଡ଼ର ବାବା ଦଧିବାମନ ମହିଳା ସ୍ୱୟଂ ସହାୟିକl ଗୋଷ୍ଠୀର ମହିଳାମାନେ ପାଞ୍ଚଟି ବିଦ୍ୟାଳୟରେ ଏଲିମେଣ୍ଟାରୀ ଡ୍ରେସ ବଣ୍ଟନ କରିଥିଲେl ଏହି ଡ୍ରେସ ବିଲ କରିବା ଲାଗି ପୂର୍ବରୁ ୫ ହଜାର ଟଙ୍କା ନେଇଥିଲେ ଫିରୋଜ ଖାନ। ଆଉ ୨ଟି ସ୍କୁଲର ବିଲ କରିବା ଲାଗି ୨୭ ହଜାର ମାଗିଥିଲେ। ଆଜି ବିଲ କରାଇଦେବାକୁ ବିଇଓ କାର୍ଯ୍ୟାଳୟର ଆକାଉଣ୍ଟାଣ୍ଟ ଏମଡି ଫିରୋଜ ଖାନ ଅଶୋକ ବଜାରରେ ବାସୁଦେବ ସାହୁଙ୍କ ଠାରୁ ୨୦ ହଜାର ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ଦ୍ୱାରା ଗିରଫ ହୋଇଛନ୍ତି ।
ଭାଷ୍ୟକାର ହୋଇ କଲେ ଭିଡିଓ, ଗାଭାସ୍କରଙ୍କ ଭଳି କହିଲେ..
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ଓ୍ବିକେଟ କିପର ବ୍ୟାଟ୍ସମ୍ୟାନ ଋଷଭ ପନ୍ତଙ୍କ ଏକ ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ସେ ସୁନିଲ ଗାଭାସ୍କରଙ୍କୁ କପି କରୁଥିବା ଦେଖିବାକୁ ମିଳିଛି । ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜ ସମୟରେ ଏକ ଭୁଲ୍ ସଟ୍ ଖେଳି ଆଉଟ୍ ହୋଇଥିଲେ ପନ୍ତ । ଆଉ ଏହି ସମୟରେ କମେଟ୍ରି କରୁଥିଲେ ଭାରତୀୟ ଦଳର ପୂର୍ବତନ କ୍ରିକେଟର ସୁନୀଲ ଗାଭାସ୍କର । ପନ୍ତ ଆଉଟ୍ ହୋଇ ଆସିବା ପରେ ଗାଭାସ୍କର କହିଥିଲେ ଷ୍ଟୁପିଡ୍, ଷ୍ଟୁପିଡ୍ । ଏମିତି ତିନିଥର ଷ୍ଟୁପିଡ୍ କହିଥିଲେ ଗାଭାସ୍କର । ସେଠାରେ ୨ ଜଣ ଖେଳାଳି ଥିବାବେଳେ କାହିଁକି ଏଭଳି ସଟ୍ ଖେଳି ଆଉଟ୍ ହେଲେ ବୋଲି ସମାଲୋଚନା କରିଥିଲେ ଗାଭାସ୍କର ।
ପନ୍ତଙ୍କୁ ସମାଲୋଚନା କରିଥିବାର ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହୋଇଥିଲା । ଯାହାକୁ ନେଇ ୟୁଜର୍ସମାନେ ମଜାଳିଆ ମଜାଳିଆ କମେଣ୍ଟ ମଧ୍ୟ ଦେଇଥିଲେ । ଆଉ ଏବେ ପନ୍ତ ଏଭଳି କପି କରିଛନ୍ତି । ଭାଷ୍ୟକାରଭାବେ ବସିଛନ୍ତି ଆଉ ସମାନ ଢ଼ଙ୍ଗରେ ଷ୍ଟିୁପିଡ୍ ଷ୍ଟୁପିଡ୍ କହିଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ତେବେ ଏନେଇ ପନ୍ତଙ୍କୁ ପଚରା ଯାଇଥିବାବେଳେ ସେ କହିଥିଲେ କି, ଏହା କେବଳ ସୁଟିଂ ପାଇଁ ।
IPL ୨୦୨୫ : ଆସିଲା ନୂଆ ନିୟମ, ଏହି ମ୍ୟାଚ ପୂର୍ବରୁ ବଦଳିବ ନିୟମ !
ନନ୍ଦିଘୋଷ ବ୍ୟୁରୋ: ଆଉ ମାତ୍ର ଦିନ କେଇଟା ବାକି ରହିଛି । ଆରମ୍ଭ ହେବ ବିଶ୍ବର ସବୁଠାରୁ ଧନୀ କ୍ରିକେଟ ଲିଗ୍ ଆଇପିଏଲ । ତେବେ ମ୍ୟାଚ ପୂର୍ବରୁ ଫ୍ୟାନ୍ସଙ୍କ ମଧ୍ୟରେ ଉତ୍କଣ୍ଠା ଲାଗି ରହିଛି ଆଉ ଏବେଠାରୁ ସୋସିଆଲ ମିଡିଆରେ ନିଜର ପ୍ରିୟ ଦଳ ପାଇଁ ଭିଡିଓ ମଧ୍ୟ ବନାଉଛନ୍ତି । ତେବେ ପ୍ରତିବର୍ଷ କିଛି ନୂଆ ନିୟମମାନେ ଆଇପିଏଲରେ ଦେଖିବାକୁ ମିଳିଥାଏ । ତେବେ ଆଇପିଏଲ ୨୦୨୫ ଆରମ୍ଭ ହେବା ପୂର୍ବରୁ ଦଳମାନେ ନିୟମ ଅନୁସାରେ କିଛି ନୂଆ ଖେଳାଳିଙ୍କୁ ସାମିଲ କରୁଛନ୍ତି । କେକେଆରର ପେସର ବୋଲର ଉମ୍ରାନ ମଲ୍ଲିକ ଫିଟନେସ ପରୀକ୍ଷାରେ ଫେଲ୍ ହେବା ପରେ ଚଳିତ ସିଜିନରୁ ବାଦ ପଡ଼ିଛନ୍ତି । ତେବେ ତାଙ୍କ ସ୍ଥାନରେ ଚେତନ ସାକାରିଆଙ୍କୁ ଦଳରେ ସାମିଲ କରିଛି କେକେଆର ଫ୍ରାଞ୍ଚାଇଜ୍ ।
IPL ରେ ବଦଳ ନିୟମ କଣ ?
ଆଇପିଏଲରେ ବଦଳ ନିୟମ ରହିଛି । ଯଦି ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ କୌଣସି ଖେଳାଳି ଆହତ ହୁଅନ୍ତି ତାହେଲେ ତାଙ୍କ ବଦଳରେ ଫ୍ରାଞ୍ଚାଇଜ୍ ମାନେ ଅନ୍ୟ ଖେଳାଳିଙ୍କୁ ଦଳରେ ସାମିଲ୍ କରିପାରିବେ । ତେବେ ଏହା ମାତ୍ର ପ୍ରଥମ ୧୨ଟି ଲିଗ୍ ମ୍ୟାଚ ପୂର୍ବରୁ ପ୍ରଯୁଜ୍ୟ । ପୂର୍ବରୁ ଏହା ୭ଟି ମ୍ୟାଚ୍ ରହିଥିଲା । ମାତ୍ର ଏବେ ଏହା ୧୨କୁ ବୃଦ୍ଧି କରାଯାଇଛି । ବଦଳ ଖେଳାଳିଙ୍କ ପାଇଁ ଦୁଇଟି ସର୍ତ୍ତ ରହିଛି। ପ୍ରଥମତଃ, ଆପଣ ଯେଉଁ ଖେଳାଳିଙ୍କୁ ବଦଳ ଭାବରେ ଆଣୁଛନ୍ତି ତାଙ୍କୁ ପଞ୍ଜିକୃତ ଉପଲବ୍ଧ ଖେଳାଳି ପୁଲ୍ (RAPP) ରେ ଅନ୍ତର୍ଭୁକ୍ତ କରାଯିବା ଉଚିତ। ଦ୍ୱିତୀୟ ସର୍ତ୍ତ ହେଉଛି ବଦଳ ଖେଳାଳିଙ୍କ ଫିସ୍ ସେହି ଖେଳାଳିଙ୍କ ଫିସ୍ ଠାରୁ ଅଧିକ ହୋଇପାରିବ ନାହିଁ ଯାହାଙ୍କ ସ୍ଥାନରେ ତାଙ୍କୁ ଦଳରେ ସାମିଲ କରାଯାଇଛି।
ବିସିସିଆଇ ନିୟମ ଅନୁଯାୟୀ, ବଦଳ ଖେଳାଳିଙ୍କ ଫିସ୍ ଦଳର ଚଳିତ ସିଜନର ଦରମା କ୍ୟାପରେ ଯୋଡାଯାଏ ନାହିଁ। ତଥାପି, ଯଦି ତାଙ୍କର ଚୁକ୍ତି ପରବର୍ତ୍ତୀ ସିଜନ ପାଇଁ ବୃଦ୍ଧି କରାଯାଏ, ତେବେ ତାଙ୍କର ଫିସ୍ ଦରମା ସୀମାରେ ଯୋଡାଯିବ। ଦଳଗୁଡ଼ିକୁ ସ୍କ୍ୱାଡ୍ ନିୟମ ପାଳନ କରିବାକୁ ପଡିବ ଏବଂ ଖେଳାଳିଙ୍କ ସଂଖ୍ୟା ମଧ୍ୟ ନିର୍ଦ୍ଧାରିତ ସୀମା ମଧ୍ୟରେ ରଖିବାକୁ ପଡିବ। ଯଦି ବଦଳ ଖେଳାଳିଙ୍କ ଚୁକ୍ତିନାମା ଭବିଷ୍ୟତ ଋତୁ ପାଇଁ ବୃଦ୍ଧି କରାଯାଏ, ତେବେ ତାଙ୍କୁ ଅନ୍ୟ ଯେକୌଣସି ଦଳ ସଦସ୍ୟଙ୍କ ପରି ସମାନ ବ୍ୟବହାର କରାଯିବ।
ଜିଓ କ୍ରିକେଟ୍ ଅଫର୍ : ଜିଓ ହଟଷ୍ଟାରରେ ମାଗଣାରେ ଦେଖନ୍ତୁ ଆଇପିଏଲ
ମୁମ୍ବାଇ: କ୍ରିକେଟ ପ୍ରେମୀଙ୍କ ପାଇଁ ଖୁସି ଖବର, ଜିଓ ବର୍ତ୍ତମାନ ଏବଂ ନୂତନ ଗ୍ରାହକଙ୍କ ପାଇଁ ଆଣିଛି ଏକ ସ୍ୱତନ୍ତ୍ର ଅଫର । ୨୯୯ ଟଙ୍କା କିମ୍ବା ତା’ଠାରୁ ଅଧିକ ମୂଲ୍ୟର ପ୍ଲାନ୍ ସହିତ ନୂତନ ଜିଓ ସିମ୍ ସଂଯୋଗ ନେଇ କିମ୍ବା ଅତି କମରେ ୨୯୯ ଟଙ୍କା ମୂଲ୍ୟର ପ୍ଲାନ୍ ରିଚାର୍ଜ କରି ଜିଓ ଗ୍ରାହକମାନେ ଜିଓହଟଷ୍ଟାରରେ ମାଗଣାରେ ଆଇପିଏଲ କ୍ରିକେଟ୍ ସିଜିନ୍ ଉପଭୋଗ କରିପାରିବେ।
ଏହି ଅସୀମିତ କ୍ରିକେଟ୍ ଅଫରରେ, ଗ୍ରାହକମାନେ ଟିଭି କିମ୍ବା ମୋବାଇଲରେ ୯୦ ଦିନର ମାଗଣା ଜିଓ ହଟଷ୍ଟାର ସବସ୍କ୍ରିପସନ୍ ପାଇବେ ଏବଂ ତାହା ମଧ୍ୟ ୪କେ ଗୁଣବତ୍ତାରେ । ଏହାର ଅର୍ଥ ହେଉଛି ଗ୍ରାହକମାନେ ୨୨ ମାର୍ଚ୍ଚରୁ ଆରମ୍ଭ ହେଉଥିବା ଆଇପିଏଲ କ୍ରିକେଟ ସିଜିନ ମାଗଣାରେ ଉପଭୋଗ କରିପାରିବେ । ଜିଓ ହଟଷ୍ଟାର ପ୍ୟାକ୍ ୨୨ ମାର୍ଚ୍ଚ, ୨୦୨୫ ଠାରୁ ଅର୍ଥାତ୍ ଆଇପିଏଲ କ୍ରିକେଟ ସିଜିନର ଉଦଘାଟନୀ ମ୍ୟାଚ୍ ଦିନରୁ ୯୦ ଦିନ ପାଇଁ ବୈଧ ରହିବ ।
ଏହା ସହିତ, ଜିଓ ଘର ପାଇଁ ଜିଓଫାଇବର କିମ୍ବା ଜିଓ ଏୟାରଫାଇବରର ମାଗଣା ଟ୍ରାଏଲ୍ ସଂଯୋଗ ମଧ୍ୟ ପ୍ରଦାନ କରିବ। ଅଲ୍ଟ୍ରା-ଫାଷ୍ଟ ଇଣ୍ଟରନେଟର ମାଗଣା ଟ୍ରାଏଲ୍ ସଂଯୋଗ ୫୦ ଦିନ ପାଇଁ ମାଗଣା ରହିବ । ଗ୍ରାହକମାନେ ୪କେ ଗୁଣବତ୍ତାରେ ଇମର୍ସିଭ୍ କ୍ରିକେଟ୍ ଦେଖିବାର ଅନୁଭୂତି ସହିତ ଶ୍ରେଷ୍ଠ ହୋମ ଏଣ୍ଟେରଟେନମେଣ୍ଟ ବା ଘରୋଇ ମନୋରଞ୍ଜନର ମଧ୍ୟ ମଜା ନେଇପାରିବେ । ଜିଓଫାଇବର କିମ୍ବା ଜିଓଏୟାରଫାଇବରର ମାଗଣା ଟ୍ରାଏଲ୍ ସଂଯୋଗ ସହିତ ୮୦୦+ ଟିଭି ଚ୍ୟାନେଲ୍, ୧୧+ ଓଟିଟି ଆପ୍, ଅସୀମିତ ୱାଇଫାଇ ମଧ୍ୟ ମିଳିବ ।
ଗ୍ରାହକମାନେ ଏହି ଅଫରର ଲାଭ ୧୭ ମାର୍ଚ୍ଚରୁ ୩୧ ମାର୍ଚ୍ଚ, ୨୦୨୫ ମଧ୍ୟରେ ଉପଲବ୍ଧ କରିପାରିବେ। ଏହି ଅଫରର ଲାଭ ପାଇବା ପାଇଁ, ବର୍ତ୍ତମାନର ଜିଓ ସିମ୍ ବ୍ୟବହାରକାରୀଙ୍କୁ ଅତି କମରେ ୨୯୯ ଟଙ୍କା କିମ୍ବା ଅଧିକ ମୂଲ୍ୟର ପ୍ଲାନ ରିଚାର୍ଜ କରିବାକୁ ପଡିବ । ଅନ୍ୟ ପକ୍ଷରେ ନୂତନ ଜିଓ ସିମ୍ ଗ୍ରାହକମାନଙ୍କୁ ୨୯୯ ଟଙ୍କା କିମ୍ବା ତା’ଠାରୁ ଅଧିକ ମୂଲ୍ୟର ପ୍ଲାନ୍ ସହିତ ନୂତନ ଜିଓ ସିମ୍ ନେବାକୁ ପଡିବ । ୧୭ ମାର୍ଚ୍ଚ ପୂର୍ବରୁ ରିଚାର୍ଜ କରିଥିବା ଗ୍ରାହକମାନେ ମଧ୍ୟ ୧୦୦ ଟଙ୍କାର ଆଡ-ଅନ୍ ପ୍ୟାକ୍ ନେଇ ଏହି ଅଫରର ଲାଭ ଉଠାଇପାରିବେ।