ଭୁବନେଶ୍ବର: ମାର୍ଚ୍ଚରୁ ମେ ଜଳିବ ଓଡିଶା । ସ୍ବାଭାବିକ ଠାରୁ ଯଥେଷ୍ଟ ଅଧିକ ରହିବ ପାରଦ । ଗ୍ରୀଷ୍ମପ୍ରବାହ ଦିନସଂଖ୍ୟା ସ୍ବାଭାବିକ ତୁଳନାରେ ଅଧିକ ଦିନ ରହିବ । ସାରା ଓଡିଶା କୁ ଅରେଞ୍ଜ ମାର୍କ ଜାରିକଲା ଆଇଏମଡି । ଗତ ବର୍ଷ ତୁଳନାରେ ଅଧିକ ତାତିବ ଉପକୂଳ ଏବଂ ଆଭ୍ୟନ୍ତରୀଣ ଓଡିଶା । ଗତ ୨୪ ଘଣ୍ଟା ମଧ୍ୟରେ ରାଜ୍ୟରେ ୩୭ ଡିଗ୍ରୀ ତାପାମତ୍ରା ସହ ସବୁଠୁ ଉତତ୍ପ ସହର ପାଲଟିଛି ଝାରସୁଗୁଡା । ସେହିଭଳି ପଛକୁ ରହିଛି ସୁନ୍ଦରଗଡ । ଏଠାରେ ୩୬.୯ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି । ବୌଦ୍ଧ 36.5°C , ବଲାଙ୍ଗୀରରେ 36.5°C, ଟିଟିଲାଗଡ଼ରେ 36.5°C ଓ ସମ୍ବଲପୁରରେ 36.4°C ରେକର୍ଡ କରାଯାଇଛି ।
ସୁପରଷ୍ଟାର ଉତ୍ତମ ମହାନ୍ତିଙ୍କୁ ଝୁରୁଛି ଜନ୍ମମାଟି
ବାରିପଦା : ମୟୂରଭଞ୍ଜ ଜିଲ୍ଲା ଲାଲବଜାରରୁ ସତ୍ୟନଗର ଶ୍ମଶାନ । କେହି କେବେ ଭାବିନଥିଲେ ୭୦ ଦଶକରୁ ଆରମ୍ଭ ହୋଇଥିବା ଏହି ଯାତ୍ରା ୪୮ ବର୍ଷ ଧରି ଲାଗି ରହିବ । କଲେଜ ରଙ୍ଗମଞ୍ଚରୁ ସିଲଭର ସ୍କ୍ରିନ ଯାଏ ସଫଳ ଅଭିଯାନ କିମ୍ବଦନ୍ତୀରେ ପରିଣତ ହେବ । ଓଡିଆ ସିନେମା ଇଣ୍ଡଷ୍ଟ୍ରିରେ ରାଜ କରିବେ । ହେଲେ ତାଙ୍କ ଅଭିନୟ ଆଜି ସରିଯାଇଛି । ଜୀବନର ରଙ୍ଗମଞ୍ଚରୁ ବିଦାୟ ନେଇଛନ୍ତି ଏହି ମହାନ କଳାକାର । ତାଙ୍କ ଅଭିନୟର ଶେଷଦୃଶ୍ଯ ପରେ ପଡିଛି ପରଦା । କିଛି ଦିନର ଅସୁସ୍ଥତା ପରେ ଗୁରୁବାର ରାତିରେ ଉତ୍ତମ ମହାନ୍ତି ଶେଷ ନିଃଶ୍ବାସ ତ୍ୟାଗ କରିଛନ୍ତି । ଅଭିମାନର ସହ ଓଡିଶା ସିନେମା ଶିଳ୍ପକୁ ଆସି ବିଦ୍ୟାରାଣ ପକାଇ ଚାଲିଗଲେ । ଆଉ ତାଙ୍କର ଦେହାନ୍ତକୁ ସହଜରେ ଗ୍ରହଣ କରିପାରୁନାହାଁନ୍ତି ବାରିପଦାବାସୀ । ଛକବଜାର ନିସ୍ତବ୍ଧ , ବନ୍ଧୁ ଓ ସହ କଳାକାରଙ୍କ ଆଖିରୁ ଶୁଖୁନି ଲୁହ । ଉତ୍ତମ ଜଣେ ଭଲ ଅଭିନେତା ସହ ଜଣେ ଭଲ ମଣିଷ ଥିଲେ l ଉତ୍ତମ ମହାନ୍ତିଙ୍କ ପୁତୁରା, ତାଙ୍କୁ ନିଜ ବାପା ତୁଲ୍ୟ ବୋଲି ସମ୍ବୋଧନ କରନ୍ତି । ସେ ଆଜି ନାହାଁନ୍ତି ସତ, ହେଲେ ବାରିପଦା ବାସଭବନ ତାଙ୍କୁ ଝୁରୁଛି।
ବାରିପଦା ଲାଲବଜାରରେ ବାପା ଗୋପାଳ ମହାନ୍ତି, ମା କାମିନୀକୁସୁମା ମହାନ୍ତିଙ୍କ ପୁଅ ଉତ୍ତମ ପିଲା ବେଳୁ ହିଁ ମିଷ୍ଟଭାଷୀ ଓ ମେଳାପୀ । ସ୍କୁଲ ଓ କଲେଜ ସବୁକିଛି ବାରିପଦାରେ ସାରିଛନ୍ତି । ପାଠ ପଢିବା ବେଳୁ ହିଁ ତାଙ୍କର କଳା ପ୍ରତି ରୁଚି ଥିଲା । ଯେଉଁଥିପାଇଁ ଅଭିମାନ ସିନେମାରେ ଡେବ୍ୟୁ କରିବା ପରେ ସେ ପାଠପଢିବାକୁ ଚାଲିଯାଇଥିଲେ । ପାଠ ସାରି ପୁଣି ଥରେ ସେ ଫେରିଥିଲେ ଓଲିଉଡକୁ । ତାଙ୍କର ସ୍ଥାନ ସର୍ବଦା ଅପୂରଣୀୟ ହୋଇ ରହିବ ବୋଲି କହିଛନ୍ତି ଫିଲ୍ମ ନିର୍ମାତା ଅସିତ ପତି ।
ଉତ୍ତମ ମହାନ୍ତି ଜଣେ ଦରଦୀ ମଣିଷ ଥିଲେ । ଭଦ୍ର ଓ ଶାନ୍ତ ପ୍ରକୃତିର । ନିଜ ସାହି ପଡିଶାର ସବୁ ଲୋକଙ୍କ ସହ ସାମ୍ବାଦିକଙ୍କ ସହ ତାଙ୍କର ଥିଲା ବେଶ ଘନିଷ୍ଠ ସମ୍ପର୍କ । ଦେହ ଭଲ ଥିବା ପର୍ଯ୍ୟନ୍ତ ସେ ବାରିପଦାରେ ସାଙ୍ଗସାଥିଙ୍କ ସବୁ ସାମାଜିକ କାର୍ଯ୍ୟକ୍ରମରେ ଯୋଗଦେଉଥିଲେ । ତାଙ୍କ ଦେହାନ୍ତ ଖବର ଶୁଣିବା ପରେ ପ୍ରଭୁ ଶ୍ରୀଜଗନ୍ନାଥଙ୍କ ପାଖକୁ ଦଉଡ଼ି ଯାଇଥିଲେ ତାଙ୍କ ସହ ଦିନେ କାମ କରୁଥିବା ସହକଳାକାର ଅନୁପ ଶାହା। ଉତ୍ତମ ସିନା ସମସ୍ତଙ୍କୁ ଛାଡ଼ି ସବୁଦିନ ଚିର ନିଦ୍ରାରେ ଶୋଇଗଲେ କିନ୍ତୁ ତାଙ୍କର ବ୍ୟକ୍ତିତ୍ଵ ପ୍ରତିଟି ବାରିପଦାବାସୀଙ୍କ ମନରେ ଅଲିଭା ଛବି ହୋଇ ରହିଯାଇଛି ।
ଆଇପିଏସ ସ୍ତରରେ ବଡ଼ ଧରଣର ଅଦଳବଦଳ
ଭୁବନେଶ୍ବର : ରାଜ୍ୟ ସରକାର ଶୁକ୍ରବାର ବରିଷ୍ଠ ଆଇପିଏସ୍ ସ୍ତରରେ ଅଦଳବଦଳ କରିଛନ୍ତି । ଡିଜି, ଏଡିଜିପି, ଆଇଜିପି ରାଙ୍କର ଅଧିକାରୀଙ୍କୁ ନୂଆ ଦାୟିତ୍ୱ ପ୍ରେଦାନ କରିଛନ୍ତିରାଜ୍ୟ ସରକାର । ଏହାସହ ଟ୍ୱିନସିଟି ଡିସିପି ଓ ଅନ୍ୟ ଜିଲ୍ଲାଗୁଡ଼ିକର ଏସପିଙ୍କ ବଦଳି କରାଯାଇଛି । ରାଜ୍ୟ ସରକାର ଶୁକ୍ରବାର ବରିଷ୍ଠ ଆଇପିଏସ୍ ସ୍ତରରେ ଅଦଳବଦଳ କରିଛନ୍ତି । ଟ୍ୱିନସିଟି ଡିସିପି ଓ ଅନ୍ୟ ଜିଲ୍ଲାଗୁଡ଼ିକର ଏସପିଙ୍କ ବଦଳି କରାଯାଇଛି । ରାଜ୍ୟ ମାନବାଧିକାର କମିଶନର ସ୍ବତନ୍ତ୍ର ଡିଜି ଭାବେ ଏସ୍.ଏମ୍. ନରୱାଣେଙ୍କୁ ଦାୟିତ୍ବ ପ୍ରଦାନ କରାଯାଇଛି । ଅତିରିକ୍ତ ପୋଲିସ କମିଶନର ଭାବେ ନରସିଂହ ଭୋଳଙ୍କୁ ଦାୟିତ୍ବ ଦିଆଯାଇଛି। ନରସିଂହ ପୂର୍ବରୁ ଅବକାରୀ କମିଶନର ରହିଥିଲେ। ଜୟନାରାୟଣ ପଙ୍କଜଙ୍କୁ ଗୁଇନ୍ଦା ବିଭାଗର ଆଇଜିପି ଭାବରେ ନିଯୁକ୍ତ କରାଯାଇଛି । ଆଇଜିପି ଅପରେସନ ଭାବେ ନିଯୁକ୍ତ ହୋଇଛନ୍ତି ଦୀପକ କୁମାର। ସାର୍ଥକ ଷଡଙ୍ଗୀଙ୍କୁ ସିଆଇଡି ସିବିର ଆଇଜିପି ଭାବେ ବଦଳି କରାଯାଇଛି। ସେହିପରି ବିବେକାନନ୍ଦ ଶର୍ମା ରେଲୱେ ଏସପି ଭାବେ ନିଯୁକ୍ତ ହୋଇଥିବା ବେଳେ ବି ଗଙ୍ଗାଧରଙ୍କୁ ଡିଆଇଜି ସିଆଇଡି ସିବି ଭାବେ ବଦଳି କରାଯାଇଛି । ଚରଣ ସିଂ ମୀନା ହୋଇଛନ୍ତି ଡିଆଇଜି ପ୍ରୋଭିଜନିଂ, ଦକ୍ଷିଣାଞ୍ଚଳ ଆଇଜି ହେଲେ ନିତି ଶେଖର, ଅଖିଳେଶ୍ଵର ସିଂ ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ଭାବେ ବଦଳି ହୋଇଥିବା ବେଳେ ଗୃହରକ୍ଷୀ ଓ ଅଗ୍ନିଶମ ବିଭାଗର ଡିଆଇଜି ଭାବେ ଉମାଶଙ୍କର ଦାଶଙ୍କୁ ବଦଳି କରାଯାଇଛି । ଅଙ୍କିତ କୁମାର ବର୍ମା ଭୁବନେଶ୍ଵର ଅତିରିକ୍ତ ଡିସିପି ହୋଇଥିବା ବେଳେ ରାହୁଲ ଗୋୟଲ ବୌଦ୍ଧ ଏସପି, ନାଗରାଜ ଦେବରକୋଣ୍ଡାଙ୍କୁ କଳାହାଣ୍ଡି ଏସପି ଭାବେ ବଦଳି କରାଯାଇଥିବା ବେଳେ ଅଭିଳାଷ ଜି ହୋଇଛନ୍ତି ବଲାଙ୍ଗୀର ଏସପି ।
ବିଶ୍ୱର ସବୁଠାରୁ ସୁରକ୍ଷିତ ବିମାନ କମ୍ପାନୀରେ କେଉଁ ଦେଶ ଆଗରେ ଅଛି ?
ନନ୍ଦିଘୋଷ ବ୍ୟୁରୋ : ନିକଟରେ ଆମେରିକାର ଚିକାଗୋର ମିଡୱେ ବିମାନବନ୍ଦରରେ ଏକ ବଡ଼ ଦୁର୍ଘଟଣାକୁ ଏଡାଇ ଦିଆଯାଇଛି। ସାଉଥ୍ୱେଷ୍ଟ ଏୟାରଲାଇନ୍ସର ଏକ ବୋଇଂ ୭୩୭-୮ଏଚ୍୪ ବିମାନ ଅବତରଣ ପାଇଁ ରନୱେ ନିକଟକୁ ଆସୁଥିବା ବେଳେ ହଠାତ୍ ବାମ ପାର୍ଶ୍ୱରୁ ଏକ ଘରୋଇ ଜେଟ୍ ଆସି ରନୱେ ଅତିକ୍ରମ କରିବାକୁ ଲାଗିଲା। କିନ୍ତୁ ବୋଇଂ ବିମାନର ପାଇଲଟଙ୍କ ତ୍ୱରିତ ପ୍ରତିକ୍ରିୟା ଏବଂ ଦକ୍ଷତା, ଏହି ସମ୍ଭାବ୍ୟ ଦୁର୍ଘଟଣାକୁ ଏଡାଇ ଦେଇଥିଲା। ସେ ତୁରନ୍ତ ବିମାନଟିକୁ ଉପରକୁ ଟାଣି ଆଣି ଦ୍ରୁତ ଗତିରେ ବେଗ ବଢ଼ାଇ ଦେଲେ, ଯାହା ଫଳରେ ଏକ ବଡ଼ ଦୁର୍ଘଟଣାକୁ ଏଡାଇ ଦିଆଯାଇଥିଲା ।
ସାରା ବିଶ୍ୱରେ ଏପରି ଅନେକ ବିମାନ ଦୁର୍ଘଟଣା ଏବଂ ଏହାର ଭୟଙ୍କର ଘଟଣା ସାମ୍ନାକୁ ଆସିଛି। ପ୍ରତିଦିନ, ଆମେ ଖବରରେ ବିମାନ ଦୁର୍ଘଟଣା ସମ୍ପର୍କରେ ଖବର ଶୁଣିବାକୁ ପାଉଛୁ, ଯାହା ଯାତ୍ରୀଙ୍କ ମନରେ ସୁରକ୍ଷା ସମ୍ପର୍କରେ ପ୍ରଶ୍ନ ଉଠାଇଛି। ଏପରି ପରିସ୍ଥିତିରେ, କେଉଁ ଏୟାରଲାଇନ୍ସ ସବୁଠାରୁ ସୁରକ୍ଷିତ , ତାହା ଜାଣିବା ଗୁରୁତ୍ୱପୂର୍ଣ୍ଣ ।
ଏକ ରିପୋର୍ଟରେ ୨୦୨୪ ମସିହାର ସବୁଠାରୁ ନିର୍ଭରଯୋଗ୍ୟ ଏବଂ ସୁରକ୍ଷିତ ବିମାନ କମ୍ପାନୀଗୁଡ଼ିକର ତାଲିକା ପ୍ରକାଶ କରାଯାଇଛି। ଏହି ତାଲିକାରେ, ଭାରତ ଏବଂ ଚୀନର ବିମାନ କମ୍ପାନୀଗୁଡ଼ିକୁ ପଛରେ ପକାଇ ଅନ୍ୟ ଅନେକ ଦେଶର ବିମାନ କମ୍ପାନୀଗୁଡ଼ିକ ଶୀର୍ଷ ସ୍ଥାନ ହାସଲ କରିଛି। ଏହି ଏୟାରଲାଇନ୍ସ ଗୁଡ଼ିକ କେବଳ ସମୟାନୁବର୍ତ୍ତୀ ନୁହଁନ୍ତି ବରଂ ସୁରକ୍ଷା ମାନଦଣ୍ଡ ମଧ୍ୟ ପୂରଣ କରନ୍ତି।
ରିପୋର୍ଟ ଅନୁସାରେ, ଏରୋମେକ୍ସିକୋ (ମେକ୍ସିକୋ)କୁ ୨୦୨୪ ର ସବୁଠାରୁ ନିର୍ଭରଯୋଗ୍ୟ ବିମାନ କମ୍ପାନୀ ଭାବରେ ବିବେଚନା କରାଯାଇଛି। ଏହା ପରେ, ସାଉଦି ଆରବର ସାଉଦିଆ, ଆମେରିକାର ଡେଲଟା ଏୟାରଲାଇନ୍ସ, ଚିଲିର LATAM ଏୟାରଲାଇନ୍ସ ଏବଂ କାତାରର କାତାର ଏୟାରୱେଜ୍ ଏହି ତାଲିକାର ଶୀର୍ଷରେ ଅଛନ୍ତି।
୨୦୨୪ ର ଶ୍ରେଷ୍ଠ ୧୦ ଟି ନିରାପଦ ବିମାନ କମ୍ପାନୀ
ଏମଏକ୍ସ ଏରୋମେକ୍ସିକୋ (ମେକ୍ସିକୋ) ଏସଏ ସାଉଦିଆ (ସାଉଦି ଆରବ) ୟୁଏସ ଡେଲ୍ଟା ଏୟାରଲାଇନ୍ସ (ଆମେରିକା) ସିଏଲ LATAM ଏୟାରଲାଇନ୍ସ (ଚିଲି) କ୍ୟୁଏ କାତାର ଏୟାରୱେଜ୍ (କତାର) ବିଆର ଆଜୁଲ (ବ୍ରାଜିଲ) ସିଓ ଆଭିଆନକା (କଲମ୍ବିଆ) ଇଏସ ଆଇବେରିଆ (ସ୍ପେନ୍) ଏସଇ SAS (ସ୍ୱିଡେନ) ୟୁଏସ ୟୁନାଇଟେଡ୍ ଏୟାରଲାଇନ୍ସ (ଆମେରିକା) ।
ଏହି ଏୟାରଲାଇନ୍ସ ଗୁଡ଼ିକରେ ସବୁଠାରୁ ସୁରକ୍ଷିତ କ’ଣ ରହିଛି ?
ଏହି ବିମାନ କମ୍ପାନୀଗୁଡ଼ିକ ସୁରକ୍ଷା ମାନଦଣ୍ଡ ସହିତ କୌଣସି ସାଲିସ କରନ୍ତି ନାହିଁ। ପ୍ରତ୍ୟେକ ଉଡ଼ାଣ ସୁରକ୍ଷିତ ହେବା ପାଇଁ ପାଇଲଟ ଏବଂ କର୍ମଚାରୀମାନଙ୍କୁ ନିରନ୍ତର ତାଲିମ ଦିଆଯାଇଥାଏ। ଏଠାରେ ବ୍ୟବହୃତ ବିମାନଗୁଡ଼ିକ ନୂତନ ଏବଂ ଆଧୁନିକ ପ୍ରଯୁକ୍ତିବିଦ୍ୟାରେ ସଜ୍ଜିତ । ଯାହା ଉଡ଼ାଣକୁ ଅଧିକ ସୁରକ୍ଷିତ ଏବଂ ଆରାମଦାୟକ କରିଥାଏ। ସେମାନଙ୍କର ବିମାନଗୁଡ଼ିକ ଠିକ୍ ସମୟରେ ଉଡ଼ାଣ ଏବଂ ଅବତରଣ କରେ, ତେଣୁ ଯାତ୍ରୀମାନଙ୍କୁ କୌଣସି ବିଳମ୍ବର ସମ୍ମୁଖୀନ ହେବାକୁ ପଡ଼େ ନାହିଁ। ବିଗତ ବର୍ଷଗୁଡ଼ିକରେ, ଏହି ଏୟାରଲାଇନ୍ସର ଉଡ଼ାଣ ସହିତ ବହୁତ କମ୍ କିମ୍ବା କୌଣସି ଦୁର୍ଘଟଣା ଘଟିନାହିଁ। ସୁରକ୍ଷା ସହିତ, ଯାତ୍ରୀମାନଙ୍କର ସୁବିଧା ଏବଂ ଆରାମର ମଧ୍ୟ ଧ୍ୟାନ ଦିଆଯାଏ । ଯାହା ଯାତ୍ରାକୁ ସହଜ ଏବଂ ସୁନ୍ଦର କରିଥାଏ।
ଉତ୍ତର ଭାରତରେ ପ୍ରକୃତିର ମହାତାଣ୍ଡବ, ତିନି ରାଜ୍ୟରେ ପ୍ରଭାବିତ ହୋଇଛନ୍ତି ହଜାର ହଜାର ଲୋକ
ନନ୍ଦିଘୋଷ ବ୍ୟୁରୋ ; ଉତ୍ତରାଖଣ୍ଡ, ଜାମ୍ମୁ ଓ କାଶ୍ମୀର ଏବଂ ହିମାଚଳ ପ୍ରଦେଶରେ ପ୍ରକୃତିର ତାଣ୍ଡବ। ତିନି ରାଜ୍ଯରେ ପ୍ରଭାବିତ ହୋଇଛନ୍ତି ହଜାର ହଜାର ଲୋକ। କେଉଁଠି ହିମସ୍ଖଳନ ତ କେଉଁଠି ଭୂସ୍ଖଳନ। କେଉଁଠି ବି ପ୍ରବଳ ବର୍ଷା ଯୋଗୁ ଯାତାୟତ ବାଧାପ୍ରାପ୍ତ। ଉତ୍ତରାଖଣ୍ଡର ବଦ୍ରିନାଥରେ ହିମସ୍ଖଳନ ଯୋଗୁ ୬୦ ଶ୍ରମିକ ପୋତିହୋଇଯାଇଥିବା ସୂଚନା ମିଳିଛି। ତେବେ ସେମାନଙ୍କ ମଧ୍ଯରୁ ୩୨ ଜଣଙ୍କୁ ଉଦ୍ଧାର କରାଯାଇଛି। ମାନା ଗ୍ରାମ ଓ ମାନା ପାସ୍ ମଧ୍ଯରେ ରହିଥିବା ବିଆରଓ ନିକଟରେ ଏହି ଅଘଟଣ ଘଟିଛି। ଶ୍ରମିକମାନେ ଏକ ଘରୋଇ ଏଜେନ୍ସିରେ କାମ କରୁଥିଲେ। ଘଟଣାସ୍ଥଳରେ ଏନଡିଆରଏଫ, ଏସଡିଆରଏଫ, ଆଇଟିବିପି ଉଦ୍ଧାର କାର୍ଯ୍ୟ ଚଳାଇଛନ୍ତି। ଆହତ ଶ୍ରମିକଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି। ହିମସ୍ଖଳନ ଯୋଗୁ ଗୌଚର, ସହସ୍ରଧାରା, ଡେରାଡୁନରେ ରେସ୍କ୍ଯୁ ଟିମଙ୍କୁ ପ୍ରସ୍ତୁତ ରଖାଯାଇଛି। ସେପଟେ ହିମାଚଳ ପ୍ରଦେଶ କୁଲୁରେ ଫ୍ଲାସ୍ ଫ୍ଲଡ ହୋଇଛି। ପବଳ ସ୍ରୋତରେ ଅନେକ ସ୍ଥାନରେ ଭୂସ୍ଖଳନ ହୋଇଥିବାବେଳେ ଅନେକ ଗାଡି ପୋତି ହୋଇଯାଇଛି। ଅଦିନିଆ ବର୍ଷାଜନିତ ତାଣ୍ଡବରେ କୁଲୁରେ ଜନଜୀବନ ହୋଇଛି ବିପର୍ଯ୍ୟସ୍ତ। ତେଣେ ଜାମ୍ମୁ ଓ କାଶ୍ମୀରର କାଠୁଆରେ ବି ପ୍ରକୃତି ରଚିଛି ତାଣ୍ଡବ। ଫ୍ଲାସ ଫ୍ଲଡ ଯୋଗୁ ହୋଇଥିବା ଭୂସ୍ଖଳନରେ ୧୧ ଶ୍ରମିକ ପୋତି ହୋଇଯାଇଛନ୍ତି। ସେମାନଙ୍କୁ ଉଦ୍ଧାର ଲାଗି ଚେଷ୍ଟା ଜାରି ରହିଛି।
ହିମାଚଳ ପ୍ରଦେଶ କୁଲୁରେ ବାଦଲଫଟା ବର୍ଷା, ଯୋଗାଯୋଗ ବିଚ୍ଛିନ୍ନ
ନନ୍ଦିଘୋଷ ବ୍ୟୁରୋ ; ହିମାଚଳ ପ୍ରଦେଶ କୁଲ୍ଲୁ ଅଂଚଳରେ ବାଦଲଫଟା ବର୍ଷାରୁ ନାହିଁ ନଥିବା ସ୍ଥିତି। ମୂଷଳଧାରାରେ ବର୍ଷାରୁ ଭୂସ୍ଖଳନ ସହ ବନ୍ୟା ପରିସ୍ଥିତି ସୃଷ୍ଟି ହୋଇଛି। ପ୍ରବଳ ବର୍ଷାରେ ପାଣିରେ ଭାସିଗଲା କାର। ତଳିଆ ଅଂଚଳରେ ପାଣି ଭରି ଯାଇଛି। ଜନଜୀବନ ଅସ୍ତବ୍ୟସ୍ତ ହୋଇପଡିଛି। ପ୍ରମୁଖ ସଡ଼କ ସମେତ ରାଜପଥକୁ ବନ୍ଦ କରାଯାଇଛି। ନଦୀ ଆଖପାଖ ରହୁଥିବା ଲୋକଙ୍କ ପାଇଁ ଆଲର୍ଟ ଜାରି କରିଛି ପ୍ରଶାସନ। ଲଗାତାର ତିନି ଦିନ ଧରି ଲାଗି ରହିଛି ବର୍ଷା। ହିମାଚଳପ୍ରଦେଶରେ କମରେ ୨ଶହରୁ ଅଧିକ ରାସ୍ତାକୁ ବନ୍ଦ କରାଯାଇଛି। କୁଲ୍ଲୁ, ଲାହୋଲ-ସ୍ପିତି, କିନ୍ନୋର, ଚମ୍ବା ଏବଂ ଶିମଲା ଜିଲ୍ଲାରେ ଅନେକ ଅଂଚଳ ବାହ୍ୟ ଅଂଚଳରୁ ବିଚ୍ଛିନ୍ନ ହୋଇଯାଇଛି। ଚମ୍ବା ଓ ଚମୋଲିରେ ସ୍କୁଲକୁ ବନ୍ଦ କରିବାକୁ ପଡିଛି। ତେବେ ସିବିଏସଇ ପରୀକ୍ଷା ନିର୍ଦ୍ଧାରିତ ସମୟରେ ହେଉଛି।.
ଦୁୂଇ ବିଧାୟକଙ୍କୁ ଘେରିଲେ ସରପଞ୍ଚ ଓ ସମିତି ସଭ୍ୟ
ପୁରୁଷୋତ୍ତମପୁର : ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ବ୍ଳକରେ ଅନୁଷ୍ଠିତ ବିକଶିତ ଗାଁ ବିକଶିତ ଓଡ଼ିଶା କାର୍ଯ୍ୟକ୍ରମରେ ଅଭାବନୀୟ ଘଟଣା । କାର୍ଯ୍ୟକ୍ରମ ଆରମ୍ଭରୁ କବିସୂର୍ଯ୍ୟନଗର ବିଧାୟକ ପ୍ରତାପ ନାୟକ ଓ ଖଲ୍ଲିକୋଟ ବିଧାୟକ ପୂର୍ଣ୍ଣଚନ୍ଦ୍ର ସେଠୀଙ୍କୁ ଘେରିଲେ ସରପଞ୍ଚ ଓ ସମିତି ସଭ୍ୟ । ପ୍ରଶ୍ନ ବାଣରେ ଘାଇଲା ହେଲେ ଦୁଇ ବିଧାୟକ । ପଞ୍ଚାୟତରେ ଉନ୍ନତିମୂଳକ କାର୍ଯ୍ୟ ଠିକ୍ ଭାବେ ହେଉନଥିବା ଅଭିଯୋଗ କରିଥିଲେ ବିଭିନ୍ନ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ । ଶିକୁଳା ପଞ୍ଚାୟତରେ ମନରେଗା ଯୋଜନାରେ କାର୍ଯ୍ୟ ହେଉନାହିଁ । ଏନେଇ ବାରମ୍ବାର ଜିଲ୍ଲା ପ୍ରଶାସନକୁ ଜଣାଇଥିଲେ ସୁଦ୍ଧା କୌଣସି ସୁଫଳ ମିଳିପାରୁନାହିଁ । ଶିକୁଳାରେ ଉନ୍ନୟନ କାମ ନହେବା ପଛରେ କବିସୂର୍ଯ୍ୟନଗର ବିଧାୟକ ପ୍ରତାପ ନାୟକଙ୍କ ହାତ ରହିଛି । ବିଧାୟକଙ୍କର ବିନା ଅନୁମତିରେ କନିଷ୍ଠ ଯନ୍ତ୍ରୀ ଓ ସହକାରୀ ଯନ୍ତ୍ରୀ ମାନେ ଶିକୁଳାରେ କୌଣସି କାମ କରିବାକୁ ମନା କରୁଛନ୍ତି । ସେହିପରି ଆଛୁଲି ପଞ୍ଚାୟତରେ ମଧ୍ୟ ଦୀର୍ଘ ମାସ ଧରି କୌଣସି ଉନ୍ନୟନ ମୂଳକ କାର୍ଯ୍ୟ ହେଉନଥିବା ଅଭିଯୋଗ ହୋଇଛି । ଅନେକ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ମାନେ ନିଜ ଅଞ୍ଚଳରେ ଉନ୍ନୟନ କାମ ଠିକ୍ ସମୟରେ ହେଉନଥିବା ନେଇ ଅସନ୍ତୋଷ ପ୍ରକାଶ କରିବା ସହ ଦୁଇ ବିଧାୟକ ମାନେ ଏନେଇ ପଦକ୍ଷେପ ନେବା ନିମନ୍ତେ ଦାବି କରିଥିଲେ ।
ମୁଖ୍ୟମନ୍ତ୍ରୀଙ୍କ ଅଫିସକୁ ବୋମାରେ ଉଡାଇ ଦେବାକୁ ଧମକ
ମୁମ୍ବାଇ : ମୁଖ୍ୟମନ୍ତ୍ରୀଙ୍କ ଅଫିସକୁ ବୋମାରେ ଉଡାଇ ଦେବାକୁ ଧମକ। ପାକିସ୍ତାନୀ ନମ୍ବରରୁ ଆସିଛି ମହାରାଷ୍ଟ୍ର ସିଏମ ଦେବେନ୍ଦ୍ର ଫଡନଭିସଙ୍କୁ ଏହି ଧମକ। ମୁମ୍ବାଇ ଟ୍ରାଫିକ ୱାଟ୍ସଆପରେ ଆସିଛି ଏହି ମେସେଜ। ଆଲର୍ଟ ଜାରି କରି ତଦନ୍ତ ଆରମ୍ଭ କଲା ମୁମ୍ବାଇ ପୋଲିସ। ମିଳିଥିବା ଧମକ ନେଇ କେନ୍ଦ୍ର ଗୃହମନ୍ତ୍ରାଳୟକୁ ସୂଚନା ଦେଇଛନ୍ତି ରାଜ୍ୟ ସରକାର। ମେସେଜରେ ମୁଖ୍ୟମନ୍ତ୍ରୀ କାର୍ଯ୍ୟଆଳୟ ଉପରେ ଆକ୍ରମଣ କରିବାକୁ ଧମକ ଦିଆଯାଇଛି। ଏହି ମେସେଜ ଦେଇଥିବା ବ୍ଯକ୍ତି ନିଜ ନାମ ଶାହବାଜ ହୁମାୟୁନ ବୋଲି ଜଣାଇଛି। ସୂଚନା ମିଳିବା ପରେ ତୁରନ୍ତ ଆଲର୍ଟ ଜାରି କରି ତଦନ୍ତ ଆରମ୍ଭ କରିଛି ମୁମ୍ବାଇ ପୋଲିସ। କେନ୍ଦ୍ର ଗୃହ ମନ୍ତ୍ରାଳୟର ସୁରକ୍ଷା ବିଭାଗକୁ ଏହି ସୂଚନା ଦିଆଯାଇଛି। ମହାରାଷ୍ଟ୍ର ପୋଲିସ ଏବଂ କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ମିଳିତ ଯାଞ୍ଚ ଆରମ୍ଭ ହୋଇଛି। ପୂର୍ବରୁ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ମଧ୍ୟ ମିଳିଥିଲା ଧମକ। ଏହି ମାମଲାରେ ମୁମ୍ବାଇର ଗୋରେଗାଓଁ ଏବଂ ଜେଜେ ମାର୍ଗ ପୋଲିସ ସମେତ ଅନେକ ସରକାରୀ ଅଫିସକୁ ଏହି ଧମକ ଆସିଥିଲା। ଏଥିରେ ଅଭିଯୁକ୍ତକୁ ଗିରଫ କରିଥିଲା ପୋଲିସ ।
ସେୟାର ମାର୍କେଟ କ୍ରାସ, ଦିନକରେ ନିବେଶକଙ୍କ ପ୍ରାୟ ୯ ଲକ୍ଷ କୋଟି ସ୍ଵାହା
ଭୁବନେଶ୍ବର : ଫେବୃଆରୀର ଶେଷ ଦିନରେ ସେୟାର ମାର୍କେଟ କ୍ରାସ। ଲଗାତର ପଞ୍ଚମ ମାସ ଲାଗି ଖସିଛି ଭାରତୀୟ ସେୟାର ବଜାର। ସେନସେକ୍ସ ୧୪୧୪ ପଏଣ୍ଟ ଖସି ୭୩ ହଜାର ୧୯୨ ପଏଣ୍ଟରେ ବନ୍ଦ ହୋଇଛି। ସେହିପରି ୨୨ ହଜାର ୨ଶହ ପଏଣ୍ଟ ତଳେ ବନ୍ଦ ହେଲା ନିଫଟି। ସେୟାର ବଜାରରେ ଦିନକରେ ନିବେଶକଙ୍କ ପ୍ରାୟ ୯ ଲକ୍ଷ କୋଟି ଟଙ୍କା ସ୍ଵାହା ହୋଇଯାଇଛି। ଲଗାତାର ୫ ମାସ ମଧ୍ୟରେ ନିବେଶକ ସେୟାର ବଜାରରେ ୮୫ ଲକ୍ଷ କୋଟି ହରାଇଲେଣି। ସୂଚକାଙ୍କ ହ୍ରାସରେ ୨୯ ବର୍ଷର ରେକର୍ଡ ଭାଂଗିଲା ନିଫଟି। ୧୯୯୬ରେ ଲଗାତାର ୫ ମାସ ଧରି ନିଫଟି ହ୍ରାସ ପାଇଥିଲା। ଏହାର ୨୯ ବର୍ଷ ପରେ ପୁଣି ନିଫଟିରେ ଭାରି ହ୍ରାସ ଦେଖିବାକୁ ମିଳିଛି। ୧୯୯୬ ନଭେମ୍ବରରେ ନିଫଟିରେ ଅତ୍ୟଧିକ ହ୍ରାସ ଦେଖିବାକୁ ମିଳିଥିଲା। ଲଗାତାର ୫ ମାସ ମଧ୍ୟରେ ନିଫଟି ୨୬ ପ୍ରତିଶତ ତଳକୁ ଖସିଥିଲା। ତେବେ ଏବେ ଯେଉଁ ହ୍ରାସ ଜାରି ରହିଛି, ସେଥିରେ ୧୧. ୬୮ ପ୍ରତିଶତ ଖସିଛି ନିଫଟି। ପୂର୍ବତନ ହ୍ରାସ ତୁଳନାରେ ବର୍ତ୍ତମାନର ହ୍ରାସ କମ ରହିଛି। ବିଏସଇରେ ତାଲିକାଭୁକ୍ତ କମ୍ପାନୀ ଗୁଡିକର ସେୟାର ୮୫ ଲକ୍ଷ କୋଟି ଖସି ୩୯୩ ଲକ୍ଷ କୋଟି ରହିଛି। ସେୟାର ମାର୍କେଟ ହ୍ରାସର କାରଣ ଅନେକ ରହିଛି। ତେବେ ମୁଖ୍ୟତଃ ବିଶ୍ଵ ବଜାରରେ ଟ୍ରେଡ୍ ୱାର ମୁଖ୍ୟ ବୋଲି କୁହାଯାଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାନାଡା ଓ ମେକ୍ସିକୋ ଉପରେ ଲଗାଇଥିବା ୨୫ ପ୍ରତିଶତ ଟାରିଫ୍ ଆସନ୍ତା ୪ ମାର୍ଚ୍ଚରୁ ଲାଗୁ କରିବାକୁ ଘୋଷଣା କରିଥିଲେ। ତେବେ ଏହାକୁ ୨ ମାର୍ଚ୍ଚରୁ ଲାଗୁ କରିବାକୁ ସଙ୍କେତ ଦେଇଛି ଆମେରିକା। ଏହାକୁ ନେଇ ବିଶ୍ଵ ବଜାରରେ ହଲଚଲ ହୋଇଛି। ଏହାସହ ଚୀନ ସାମଗ୍ରୀ ଉପରେ ୧୦ ପ୍ରତିଶତ ଅତିରିକ୍ତ କର ଲଗାଇଛି ଆମେରିକା।ଯାହାକୁ ନେଇ ବିଶ୍ଵ ବଜାରରେ ଟ୍ରେଡ୍ ୱାରର ଆଶଂକା ବଢିଛି। ଟ୍ରମ୍ପ ରାଷ୍ଟ୍ରପତି ହେବା ପରେ ଦେଶ ଦେଶ ମଧ୍ୟରେ ଏହି ବାଣିଜ୍ୟ ଯୁଦ୍ଧ ଆହୁରି ତୀବ୍ର ହୋଇଛି। ଅନ୍ୟପଟେ ଏସିଆ ସେୟାର ବଜାରରେ ମଧ୍ୟ ଦେଖାଦେଇଥିବା ମାନ୍ଦାବସ୍ଥା ସେୟାର ମାର୍କେଟ୍ ହ୍ରାସ ହେବା ଅନ୍ୟ ଏକ କାରଣ ବୋଲି କୁହାଯାଉଛି। ଆମେରିକା ସେୟାର ବଜାରରେ ମାନ୍ଦାବସ୍ଥା ସ୍ଥିତି ସାରା ଦୁନିଆର ସେୟାର ମାର୍କେଟ କ୍ରାସ ହେବାର ମଧ୍ୟ ଆଉ ଏକ କାରଣ ବୋଲି ବିଶେଷଜ୍ଞ କହୁଛନ୍ତି।
ଆଦାନୀ କମ୍ପାନୀ ତରଫରୁ ଅନୁଷ୍ଠିତ ଗ୍ରାମସଭା ପାଲଟିଲା ରଣକ୍ଷେତ୍ର
ସୁନ୍ଦରଗଡ : ଆଦାନୀ କମ୍ପାନୀ ତରଫରୁ ଅନୁଷ୍ଠିତ ଗ୍ରାମସଭା ପାଲଟିଲା ରଣକ୍ଷେତ୍ର । କମ୍ପାନି ସମର୍ଥକ, ବିସ୍ଥାପିତ ମୁହାମୁହିଁ । ବାଡ଼ିଆପିଟା, ଟଣାଓଟରା, ଚୌକି ଭାଙ୍ଗି ପ୍ରବଳ ବିରୋଧ । ସୁନ୍ଦରଗଡ଼ ହେମଗିରି ବ୍ଲକର ବିଜାହାନ କୋଇଲା ଖଣି ପାଇଁ ଆଜି ଆଦାନୀ କମ୍ପାନୀ ପକ୍ଷରୁ ପ୍ରଥମ ଗ୍ରାମସଭା ରଖାଯାଇଥିଲା । ବିଜାହାନ ଗାଁ କଲ୍ୟାଣ ମଣ୍ଡପରେ ଗ୍ରାମସଭା ପାଇଁ ଏକାଠି ହୋଇଥିଲେ ଲୋକେ । ହେଲେ ଗ୍ରାମସଭା ଆରମ୍ଭରୁ ବିରୋଧ ପ୍ରଦର୍ଶନ ଦେଖିବାକୁ ମିଳିଥିଲା । କ୍ଷତିପୂରଣ, ଥଇଥାନ ଓ ପୁନର୍ବାସ ତଥା ନିଯୁକ୍ତି ନେଇ କମ୍ପାନୀ ଆଗୁଆ ଲିଖିତ ସୂଚନା ନଦେଇ ସିଧାସଳଖ ଗ୍ରାମସଭା କରୁଥିବା ଅଭିଯୋଗ କରି ବିସ୍ଥାପିତ ପ୍ରବଳ ବିରୋଧ କରିଥିଲେ। ଏପରିକି ପୁଲିସ ସହ ମଧ୍ଯ ଠେଲାପେଲା ହୋଇଥିଲା। ଏହା ସତ୍ତ୍ବେ ସରପଞ୍ଚଙ୍କ ମାଧ୍ଯମରେ ଗ୍ରାମସଭା କରାଇନେବାକୁ କମ୍ପାନୀ ଉଦ୍ଯମ କରୁଥିବା ଦେଖି ବିରୋଧକାରୀ ତାତିଥିଲେ। ସ୍ଥିତି ବିଗୁଡ଼ୁଥିବା ଦେଖି ହେମଗିର ଗୋଷ୍ଠୀ ଉନ୍ନୟନ ଅଧିକାରୀ ଗ୍ରାମସଭାକୁ ବାତିଲ ଘୋଷଣା କରିଥିଲେ । ପୂର୍ବରୁ ବିଜାହାନ ଅଞ୍ଚଳରେ ଜଙ୍ଗଲ ଉଜାଡ଼ି ବଲାଙ୍ଗୀର ଗନ୍ଧମାର୍ଦ୍ଦନରେ କ୍ଷତିପୂରକ ବନୀକରଣ କରିବାକୁ ଯୋଜନା କରୁଥିବା ଅଭିଯୋଗରେ ଆଦାନି ଲୋକଙ୍କ ବିରୋଧର ସମ୍ମୁଖୀନ ହୋଇରହିଛି । ଏଭଳି ସ୍ଥିତିରେ ଆଜି ପ୍ରଥମ ଗ୍ରାମସଭା ବାତିଲକୁ ନେଇ ଆଦାନିର କାରସାଦି ପୁଣି ଚର୍ଚ୍ଚାକୁ ଆସିଛି । ଆଦାନି ମହାନଦୀ ମାଇନ୍ସ ଆଣ୍ଡ ମିନେରାଲ୍ସ କମ୍ପାନିକୁ ୨୦୨୨ରେ ହେମଗିର ବ୍ଲକ୍ ବିଜାହାନ କୋଇଲା ଖଣି ଆବଣ୍ଟିତ ହୋଇଛି । ଖଣି ପାଇଁ ଝାରପଲମ ପଞ୍ଚାୟତ ବିଜାହାନ ଗାଁରୁ ୨୫୦.୦୧୦ ଏକର ଓ ଭୋଗରାକଛାରରୁ ୧୮୮.୨୦୦ ଏକର ରୟତି ଜମି ଅଧିଗ୍ରହଣ କରିବାକୁ ଜିଲ୍ଲାପାଳଙ୍କ ନିର୍ଦ୍ଦେଶରେ ଆଜି ବିଜାହାନ ଗାଁରେ ଗ୍ରାମସଭା ଡକାଯାଇଥିଲା । ହେମଗିର ଏବିଡିଓଙ୍କ ଉପସ୍ଥିତିରେ ଝାରପଲମ ସରପଞ୍ଚ ଚନ୍ଦ୍ରବ ମାଝୀଙ୍କ ଅଧ୍ଯକ୍ଷତାରେ ସଭା ଆରମ୍ଭ ହେବା କ୍ଷଣି ବିସ୍ଥାପିତମାନେ କମ୍ପାନୀର କ୍ଷତିପୂରଣ,ଥଇଥାନ ଓ ପୁନର୍ବାସ ପ୍ଯାକେଜ ନେଇ କାହିଁକି ଆଗୁଆ ସୂଚନା ଦେଲେନି ବୋଲି ପ୍ରଶ୍ନ କରିଥିଲ । ପରେ ଗ୍ରାମସଭା ବାତିଲ ଦାବି କରିଥିଲେ। କିଛି ସମର୍ଥକ ବିସ୍ଥାପିତଙ୍କୁ ବିରୋଧ କରିବାରୁ ପାଟିତୁଣ୍ଡ ହୋଇଥିଲା। ପରେ ଦେଖୁ ଦେଖୁ ଠେଲାପେଲା, ମାଡ଼ପିଟ, ଚୌକି ଭଙ୍ଗାରୁଜା ମଧ୍ଯରେ ସଭାସ୍ଥଳ ରଣକ୍ଷେତ୍ର ପାଲଟି ଯାଇଥିଲା। କମ୍ପାନୀ ବିସ୍ଥାପିତଙ୍କୁ ଭଣ୍ଡାଉଥିବା ଅଭିଯୋଗ କରି ବିସ୍ଥାପିତ ଆଦାନି ଗୋ ବ୍ଯାକ୍ ନାରା ଦେଇଥିଲେ।