କଳିଙ୍ଗ ନଗର ବିସ୍ଥାପିତଙ୍କ ଉପରେ ଆକ୍ରମଣ ମାମଲା, ସରକାରଙ୍କ ଉପରେ ବର୍ଷିଲା ବିଜେଡି

ଭୁବନେଶ୍ୱର : ଏପଟେ ଉତ୍କର୍ଷ ଓଡ଼ିଶା ଚାଲିଛି ସେପଟେ ଏସିଆର ବୃହତ ଷ୍ଟିଲ ହବ୍ କଳିଙ୍ଗ ନଗରରେ ଆଦିବାସୀଙ୍କ ଉପରେ ଅତ୍ୟାଚାର କରାଯାଉଛି । ଆଦିବାସୀଙ୍କ ଆଖିରୁ ଲୁହ ଝରିଲା । ନିଜ ହକ ଦାବିରେ ଧାରଣାରେ ବସିଥିବା ଆଦିବାସୀଙ୍କ ଉପରେ ଅତ୍ୟାଚାର କରାଗଲା । ଭିଟାମାଟି ଦେଇଥିବା ଲୋକଙ୍କୁ ଅସମ୍ମାନ କରାଗଲା । ମହିଳାଙ୍କୁ ଗୋଡେଇ ଗୋଡେଇ ପିଟାଗଲା । ବିଭିନ୍ନ ଦାବି ନେଇ ଧାରଣା ଦେଇଥିବା ଆଦିବାସୀଙ୍କ ସହ ଏଯାଏଁ ଆଲୋଚନା କଲେନି । ରାତି ସାରା ଥଣ୍ଡା କକରରେ ସେମାନେ ବସିଛନ୍ତି । ପାଞ୍ଚ ହଜାର ବିସ୍ଥାପିତଙ୍କୁ କେମିତି ନ୍ୟାୟ ମିଳିବ ବୋଲି ପ୍ରଶ୍ନ କରିଛି ବିଜେଡି ।

ସାମ୍ବାଦିକ ସମ୍ମିଳନୀ କରି କଳିଙ୍ଗ ନଗରରେ ଆଦିବାସୀ ଧାରଣା ପ୍ରସଙ୍ଗରେ ରାଜ୍ୟ ସରକାରଙ୍କୁ ଘେରିଛି ବିଜେଡି । ଯେଉଁମାନେ ଆଦିବାସୀଙ୍କୁ ଗୋଡେଇ ଗୋଡେଇ ମାରିଲେ ସେମାନଙ୍କ ବିରୋଧରେ ତଦନ୍ତ ଦାବି କରିଛି ବିଜେଡି । ଅପରାଗ ସରକାର । ଯେଉଁମାନେ ଅଧିକାର ପାଇଁ ଯାଇଥିଲେ ସେମାନେ ବିସ୍ଥାପିତ । ତାଙ୍କ ଜମିରେ କାରଖାନା ଠିଆ ହୋଇଛି । ସରକାର ଜାଣି ବି ପଦକ୍ଷେପ ନେଇ ନାହାନ୍ତି । ବିସ୍ଥାପିତଙ୍କୁ ନିଯୁକ୍ତି, R & R ନୀତିରେ ପରିବର୍ତ୍ତନ, ମୃତକଙ୍କ ନିକଟ ସମ୍ପର୍କୀୟଙ୍କୁ ନିଯୁକ୍ତି ପାଇଁ ସେମାନେ ଦାବି କରିଥିଲେ । ନିର୍ବାଚନ ପୂର୍ବରୁ ସେମାନଙ୍କ ଦାବି ଶୁଣିବାକୁ ବିଜେପି କହିଥିଲା । ହେଲେ ଏବେ ପ୍ରଶାସନ ଶୁଣୁନି କି ଆଲୋଚନା ବି କରୁନାହାଁନ୍ତି । ସରକାର ଯତ୍ନବାନ ରହିବା ଦରକାର । ନହେଲେ କେମିତି ନିବେଶକ ସୁରକ୍ଷା ପାଇବେ ? ଏମିତି ପରିବେଶରେ କି ନିବେଶ ଆସିବ ବୋଲି ପଚାରିଛି ବିଜେଡି ।

ନ୍ୟାୟ ଦେବାରେ ସରକାର ବିଫଳ । ତେଣୁ ନବୀନ ପଟ୍ଟନାୟକଙ୍କ ନେତୃତ୍ୱରେ ଲଢେଇ ଜାରି ରଖିବ ବିଜେଡି । ଏ ସରକାର ସମୟରେ ଏହା ଦ୍ଵିତୀୟ ଆନ୍ଦୋଳନ । ଓଡ଼ିଶାରେ ଆଇନ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ହୋଇ ଯାଇଛି । ସାଧାରଣ ଲୋକ ରାସ୍ତାରେ ଚାଲିବାକୁ ଭୟ କରୁଛି । ସମସ୍ତେ ଅନୁଭବ କଲେଣି ଯେ ଦାୟିତ୍ୱବାନ ସରକାର ନାହିଁ । ଲୋକ ସୁରକ୍ଷିତ ରୁହନ୍ତୁ । ଶିଳ୍ପ ସପକ୍ଷରେ ବିଜେଡି । ହେଲେ ଶିଳ୍ପ ନାଁରେ ସାଧାରଣ ଲୋକଙ୍କୁ ଅତ୍ୟାଚାରକୁ ବିଜେଡି ଗ୍ରହଣ କରିବ ନାହିଁ ବୋଲି ଚେତାଇ ଦେଇଛି ଦଳ ।