କୋଟିଆ ପ୍ରସଙ୍ଗରେ ରାଜନୀତି କରୁଛି ବିଜେପି, ବର୍ଷିଲେ ସସ୍ମିତ ପାତ୍ର

ଭୁବନେଶ୍ୱର: କୋଟିଆ ପ୍ରସଙ୍ଗରେ ରାଜନୀତି କରୁଛି ବିଜେପି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିଛନ୍ତି ବିଜେଡି ସାଂସଦ ସସ୍ମିତ ପାତ୍ର । ୯ ବର୍ଷ କେନ୍ଦ୍ରମନ୍ତ୍ରୀ ଥାଇ ବି ଆପଣ ଏ ପ୍ରସଙ୍ଗ ଉଠାଇଛନ୍ତି କି ? କେନ୍ଦ୍ରକୁ ହସ୍ତକ୍ଷେପ କରିବାକୁ କେବେ ଅନୁରୋଧ କରିଛନ୍ତି କି ? ଆନ୍ତଃ ରାଜ୍ୟ ପରିଷଦ ବୈଠକରେ କେବେ ଏ ପ୍ରସଙ୍ଗ ଉଠାଇଛନ୍ତି କି ବୋଲି ଧର୍ମେନ୍ଦ୍ରଙ୍କୁ ପ୍ରଶ୍ନ କରିଛନ୍ତି ସସ୍ମିତ ପାତ୍ର ।

ସେହିପରି ବିଜେପିର ବରିଷ୍ଠ ନେତା ବିଶ୍ୱଭୂଷଣ ହରିଚନ୍ଦନ ଆନ୍ଧ୍ରର ରାଜ୍ୟପାଳ ଥିଲେ । ତାଙ୍କ ସହ କେବେ କୋଟିଆ ପ୍ରସଙ୍ଗରେ ଆଲୋଚନା କରିଥିଲେ କି ବୋଲି କହିଛନ୍ତି । ସମସ୍ତେ ଜାଣନ୍ତି ଆପଣ କେବେ ବି କୋଟିଆ ପ୍ରସଙ୍ଗ ଉଠାଇ ନାହାନ୍ତି । କୋଟିଆ ପାଇଁ ଆପଣ କରୁଥିବା ଡ୍ରାମା ସମସ୍ୟାର ସମାଧାନ ନୁହେଁ । ବରଂ କେନ୍ଦ୍ର-ଆନ୍ତଃ ରାଜ୍ୟ ପରିଷଦରେ ସମସ୍ୟାର ସମାଧାନ ହୋଇପାରିବ ।

ଆପଣ ଏଥିପାଇଁ କେନ୍ଦ୍ରକୁ ଥରେ ବି ଅନୁରୋଧ କରିବେ ନାହିଁ । ଗଣମାଧ୍ୟମରେ କେବଳ କୋଟିଆକୁ ନେଇ କେନ୍ଦ୍ରମନ୍ତ୍ରୀ ଡ୍ରାମା କରିବେ ବୋଲି ସସ୍ମିତ ପାତ୍ର କହିଛନ୍ତି । କୋଟିଆ ଓ କୋରାପୁଟବାସୀଙ୍କୁ କେନ୍ଦ୍ରମନ୍ତ୍ରୀ ଭୁଆଁ ବୁଲାଉଛନ୍ତି ବୋଲି କହିଛନ୍ତି ସସ୍ମିତ ପାତ୍ର ।