ଭୁବନେଶ୍ୱର: ରାଜଭବନ ନିକଟ ପେଟ୍ରୋଲ ପମ୍ପ ବିସ୍ଫୋରଣ ଘଟଣାରେ କମିଶନ୍ରେଟ୍ ପୋଲିସର ତଦନ୍ତ ଜାରି । ଫରେନ୍ସିକ୍ ଟିମ୍ ଓ କ୍ୟାପିଟାଲ ଥାନା ପକ୍ଷରୁ ସ୍ୱତନ୍ତ୍ର ତଦନ୍ତକାରୀ ଟିମ୍ ଘଟଣାସ୍ଥଳରେ ତଦନ୍ତ କରୁଛନ୍ତି । ପୂର୍ବରୁ ଆଇଓସିଏଲ ପକ୍ଷରୁ ଆସିଥିବା ସ୍ୱତନ୍ତ୍ର ବୈଷୟିକ ଟିମ୍ ତଦନ୍ତ କରିଥିଲେ । ତଦନ୍ତ ରିପୋର୍ଟ ଆଜି କମିଶନରେଟ ପୋଲିସକୁ ପ୍ରଦାନ କରିବା ସମ୍ଭାବନା ରହିଛି। ଘଟଣାରେ ଜଣଙ୍କର ମୃତ୍ୟୁ ହୋଇଥିବାବେଳେ ଅନ୍ୟଜଣେ ଗୁରୁତର ଅବସ୍ଥାରେ କଟକ ଏସ୍ସିବି ମେଡିକାଲରେ ଚିକିତ୍ସାଧୀନ ଅଛନ୍ତି। ବିସ୍ଫୋରଣ ସମୟରେ ସେଠାରେ କାର୍ଯ୍ୟରତ ସୀମାଞ୍ଚଳ ପରିଡ଼ା ନିଖୋଜ ଥିବା ତାଙ୍କ ପରିବାର ପକ୍ଷରୁ ଅଭିଯୋଗ ହୋଇଛି । ତାହାର ତଦନ୍ତ କମିଶନରେଟ ପୋଲିସ କରୁଥିଲେ ମଧ୍ୟ ସୀମାଞ୍ଚଳଙ୍କ ସମ୍ପର୍କରେ ଏପର୍ଯ୍ୟନ୍ତ କୌଣସି ସୂଚନା ମିଳିନାହିଁ। ସେପଟେ ପେଟ୍ରୋଲ ପମ୍ପରେ ଗଚ୍ଛିତ ସମସ୍ତ ପେଟ୍ରୋଲିୟମ ଦ୍ରବ୍ୟକୁ ସୁରକ୍ଷିତ ଭାବେ ଅନ୍ୟତ୍ର ସ୍ଥାନାନ୍ତର କରାଯାଇଛି। ଗତରାତିରୁ ସମ୍ପୃକ୍ତ ଅଞ୍ଚଳକୁ ବିପଦମୁକ୍ତ ଘୋଷଣା କରାଯିବା ପରେ ରାସ୍ତାରେ ଚଳପ୍ରଚଳ ସ୍ୱାଭାବିକ ହୋଇଛି।
