ଭଙ୍ଗା ହାତର ଯନ୍ତ୍ରଣା ସତ୍ତ୍ୱେ ଭାଙ୍ଗିନି ମନୋବଳ: କରୋନା ଯୋଦ୍ଧା ଭାବେ ଜାରି ରଖିଛନ୍ତି ଲଢ଼େଇ

ଭଦ୍ରକ: ଭଙ୍ଗା ହାତର ଯନ୍ତ୍ରଣା ସତ୍ତ୍ୱେ ହାର ମାନିନି ମନୋବଳ । ମହାମାରୀର ମହାସଂଗ୍ରାମରେ କରୋନା ଯୋଦ୍ଧା ଭାବେ ଜାରି ରଖିଛନ୍ତି ଲଢ଼େଇ । ଭଙ୍ଗା ହାତର ଯନ୍ତ୍ରଣା ସତ୍ତ୍ୱେ ଲୋକଙ୍କ ସୁରକ୍ଷା ପାଇଁ ନିଜର କର୍ତ୍ତବ୍ୟ ସମ୍ପାଦନ କରୁଛନ୍ତି ପୋଲିସ କର୍ମଚାରୀ । ବର୍ତ୍ତମାନ କରୋନା ମହାମାରୀ ପାଇଁ ଚାରିଆଡେ ଜାରି ରହିଛି ଲକ ଡାଉନ ଓ ସଟଡାଉନ କଟକଣା । ଆଉ କଟକଣାକୁ କଡ଼ାକଡ଼ି ଭାବେ ଲାଗୁ କରବା ସହ ଲୋକଙ୍କ ସଚେତନ କରିବାରେ ଲାଗି ପଡ଼ିଛନ୍ତି ପୋଲିସ କର୍ମଚାରୀ ।

ଏହି ସମୟରେ ସମସ୍ତେ ନିଜର ସୁରକ୍ଷା ପାଇଁ ଘରେ ରହିଥିବା ବେଳେ, ପୋଲିସ ଲୋକଙ୍କ ସୁରକ୍ଷା ପାଇଁ ନିଜର କର୍ତ୍ତବ୍ୟ ସମ୍ପାଦନ କରୁଛି । ନିଜର ହାତ ଭାଙ୍ଗି ଯାଇ ଅସ୍ତ୍ରୋପ୍ରଚାର ହୋଇଥିଲେ ମଧ୍ଯ, ଯନ୍ତ୍ରଣା ସମୟରେ ନିଜର କର୍ତ୍ତବ୍ୟ କରୁଛନ୍ତି ଭଦ୍ରକର ଜଣେ ପୋଲିସ କର୍ମଚାରୀ । ପୁରୁଣାବଜାର ଥାନାରେ ଏଏସଆଇ ଭାବେ କାର୍ଯ୍ୟକରୁଛନ୍ତି ପ୍ରଶାନ୍ତ କୁମାର  ବଳ । କରୋନା ସମୟରେ ଭଦ୍ରକ ପୋଲିସ ପକ୍ଷରୁ ଦିଆଯାଇଥିବା ଦାୟିତ୍ୱର ସହ  ବିଭିନ୍ନ ଛକ ଛକ ମାନଙ୍କରେ ଡ୍ୟୁଟି କରୁଛନ୍ତି ପ୍ରଶାନ୍ତ । କିଛି ମାସ ତଳେ ନିଜ ବାଇକରେ ଯାଉଥିବା ବେଳେ ଦୁର୍ଘଟଣାର ଶିକାର ହୋଇ, ହାତଟି ଭାଙ୍ଗି ଯାଇଥିଲା  । ଡାକ୍ତରଙ୍କ ନିକଟରେ ହାତ ଦେଖାଇ ଅସ୍ତ୍ରୋପ୍ରଚାର କରିଥିଲେ । ପରେ ସଂକ୍ରମଣ ବଢ଼ିଯିବାରୁ ଯନ୍ତ୍ରଣା ପାଇଥିଲେ । ପରେ ପୁଣି ଡାକ୍ତରଙ୍କୁ ଦେଖାଇ ମେଡିସିନ୍ ଖାଉଛନ୍ତି ।

ଦୀର୍ଘ ମାସ ଧରି ଛୁଟିରେ ଥିଲେ ପ୍ରଶାନ୍ତ । କିନ୍ତୁ ଏଯାଏଁ ସମ୍ପୂର୍ଣ୍ଣ ଭାବେ ସୁସ୍ଥ ହୋଇନାହାନ୍ତି । ତଥାପି କୋଭିଡ ସମୟରେ ଡ୍ୟୁଟି କରୁଥିବା ନଜରକୁ ଆସିଛି । ନିଜ ଭଙ୍ଗା ହାତଟି ଯନ୍ତ୍ରଣା ହେଉଥିଲେ ମଧ୍ଯ ନିଜ କର୍ତ୍ତବ୍ୟରେ ସେ ଅବହେଳା କରିନାହାନ୍ତି । ହାତ ଭାଙ୍ଗି କଷ୍ଟ ତ ଲାଗୁଛି, କିନ୍ତୁ ଏହି ମହାମାରୀ ସମୟରେ ଲୋକଙ୍କ ସୁରକ୍ଷା ପାଇଁ କଷ୍ଟକୁ ଭୂକ୍ଷେପ ନ କରି ଡ୍ୟୁଟି କରିଚାଲିଛନ୍ତି । ଆଜି ଖୋଦ ଏସପି ପାଟ୍ରୋଲିଂ କରୁଥିବା ସମୟରେ ପ୍ରଶାନ୍ତ ସହ କଥା ହୋଇଥିଲେ । ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିବା ସହ ବିଶ୍ରାମ କଥା ବୁଝିଥିଲେ ।