ଓଡ଼ିଶାକୁ ପାକିସ୍ତାନ ସହ ତୁଳନା, ବିଜେପି କହିଲା ଏ ପ୍ରସଙ୍ଗରେ ଆମେ ନାହୁଁ ବୈଜୟନ୍ତଙ୍କ ସହ

ଭୁବନେଶ୍ୱର: ବିବାଦ-ବୈଜୟନ୍ତ-ବକ୍‌ୱାସ୍ । ଏ ତିନୋଟି ଶବ୍ଦ ପରସ୍ପର ସହ ଏଥିପାଇଁ ଜଡ଼ିତ ଯେ, ବୈଜୟନ୍ତ ପ୍ରଥମେ ଓଡ଼ିଶାକୁ ପାକିସ୍ତାନ ସହ ତୁଳନା କଲେ । ସମାଲୋଚନାର ଶିକାର ପରେ ଅର୍ଥ କଦର୍ଥ କହି ଖସି ଯିବାକୁ ଉଦ୍ୟମ କଲେ । ହେଲେ ମାତୃଭୂମି ପ୍ରତି ଅପଶବ୍ଦର ବ୍ୟବହାର କରି ତିଳେ ମାତ୍ର ଅନୁତାପ କଲେ ନାହିଁ । ଯେଉଁ ମାଟି ତାଙ୍କୁ ଓ ତାଙ୍କ ପରିବାରକୁ ପ୍ରତିପତ୍ତିଶାଳୀ କରିଛି, ଯେଉଁ ମାଟି ତାଙ୍କୁ କ୍ଷମତା ଉପଭୋଗ କରିବାର ସୁଯୋଗ ଦେଇଥିଲା, ତାର ଇଜ୍ଜତକୁ ମାଟିରେ ମିଶାଇବାକୁ ପଛାଇଲେ ନାହିଁ ବିଜେପିର ଏହି ରାଷ୍ଟ୍ରୀୟ ନେତା । ଓଲଟି ନିଜ ପତ୍ନୀଙ୍କ ମାଲିକାନାରେ ଥିବା ଚ୍ୟାନେଲର ଓକିଲାତି ପାଇଁ ଏକ ଜାତୀୟ ଗଣମାଧ୍ୟମକୁ ମଧ୍ୟ ଅସ୍ତ୍ର ସଜାଇଲେ ବୈଜୟନ୍ତ । ଏବେ ଏହି ଟ୍ୱିଟର ଟାଇଗରଙ୍କ ବିରୋଧରେ ନିନ୍ଦାର ତାଲିକା ଯେତିକି ବଢୁଛି, ବିଦ୍ରୋହର ସ୍ୱର ବି ସେତିକି ତେଜୁଛି । ଲଢୁଆ ଓଡ଼ିଆ ଜାତି ମୁଣ୍ଡରେ ଅପବାଦ ଲଗାଇଥିବା ବୈଜୟନ୍ତଙ୍କ ବିରୋଧରେ ଏବେ ସବୁଠି ଅସନ୍ତୋଷର ନିଆଁ ।

‘ଜାତିର ଉନ୍ନତି ସେ କାହୁଁ କରିବ ସ୍ୱାର୍ଥେ ଯାର ବ୍ୟସ୍ତ ମନ,

ଶାଗୁଆ ବିଲୁଆ ଚିକିତ୍ସକ ହେଲେ ଶବ କି ପାଇବ ପ୍ରାଣ ?’

ଉତ୍କଳ ଗୌରବ ମଧୁସୂଦନ ଦାସଙ୍କ ଅମରବାଣୀକୁ ଆଜି ଏଥିପାଇଁ ମନେପକାଇବାକୁ ବାଧ୍ୟ ହେଉଛୁ ଯେ, ଯେତେବେଳେ ଜଣେ ସ୍ୱାର୍ଥରେ ଅନ୍ଧ ହୋଇଯାଏ, ସେ ଜାତି ଓ ନିଜ ମାତୃଭୂମିକୁ ସମ୍ମାନ ଦେବାକୁ ଭୁଲିଯାଏ । ହୀନ ରାଜନୀତିର ସୂତ୍ରଧର ବୈଜୟନ୍ତ ପଣ୍ଡା ଯାହାର ଜ୍ୱଳନ୍ତ ଉଦାହରଣ । ଏକାଧିକ ଥର ଓଡ଼ିଶା ମାଟିରୁ ନିର୍ବାଚିତ ହୋଇବି ସ୍ୱାର୍ଥପରତାରେ ସବୁସୀମା ଟପି ଯାଇଛନ୍ତି ବିଜେପିର ଏହି ନେତା । ନିଜ ପାରିବାରିକ ନ୍ୟୁଜ୍ ଚ୍ୟାନେଲର ଇମେଜ ବଞ୍ଚାଇବାକୁ ଯାଇ ରକ୍ତମୁଖା ହୋଇଯାଇଛନ୍ତି ବୈଜୟନ୍ତ । ଓଡ଼ିଶାର ଆଇନ୍ ବ୍ୟବସ୍ଥାକୁ ପାକିସ୍ତାନ ସହ ତୁଳନା କରିଛନ୍ତି । ତାଙ୍କର ଏହି ମତକୁ ବିରୋଧ କରି ଝାରସୁଗୁଡ଼ାର ଖିଦମତ କମିଟି,  ସଙ୍ଗିନୀ ପରି ଅନେକ ସାମାଜିକ ସଙ୍ଗଠନ ଝାରସୁଗୁଡା ରେଳ ଷ୍ଟେସନ ଆଗରେ ବୈଜୟନ୍ତଙ୍କ କୁଶପୁତ୍ତଳିକା ଦାହ କରିଛନ୍ତି । ବୈଜୟନ୍ତ ରାଜନୈତିକ ଲାଭ ପାଇଁ ଓଡ଼ିଶାର ମାନ ମହତ୍ତ ଉପରେ କଟାକ୍ଷ କରିବା ସହ ମାନ୍ୟବର ମୁଖ୍ୟମନ୍ତ୍ରୀଙ୍କ ଛବିକୁ ମଳିନ କରିବାକୁ ଉଦ୍ୟମ କରିଥିବା ସଂଗଠନ ପକ୍ଷରୁ କୁହାଯାଇଛି । ସେପଟେ ସମ୍ବଲପୁର ଗୋଲ ବଜାର ଛକରେ ଘଟଣାକୁ ନିନ୍ଦା କରି କୁଶ ପୁତ୍ତଳିକା ଦାହ କରିଛି ସ୍ୱାଭିମାନ ଓଡ଼ିଶା ।

ନିନ୍ଦା ଅପବାଦର ପୋଖରୀରେ ବୁଡ଼ ପକାଇ ସାରିବା ପରେ ବି ଏ ପୂର୍ବତନ ସାଂସଦଙ୍କ ନିର୍ଲଜତା ସମସ୍ତଙ୍କୁ ଚକିତ କରିଛି । ଓଲଟି ଅର୍ଥ କଦର୍ଥର ଯୁକ୍ତି ବାଢୁଛନ୍ତି ଏ ନେତା । ଯାହାକୁ ଦଳମତ ନିର୍ବିଶେଷରେ ସମସ୍ତେ ନିନ୍ଦା କରିଛନ୍ତି । ଏନେଇ ଯୁବ ଓଡ଼ିଶା ଅଭିଯାନ ପକ୍ଷରୁ କ୍ୟାପିଟାଲ ଥାନାରେ ବୈଜୟନ୍ତ ପଣ୍ଡାଙ୍କ ବିରୋଧରେ ଏତଲା ସହ ଦେଶଦ୍ରୋହ ମାମାଲା ରୁଜୁ ପାଇଁ ଦାବି କରାଯାଇଛି । ଏପରିକି ଏ ପ୍ରସଙ୍ଗରେ ମାପିଚୁପି ବୟାନ ରଖୁଥିବା ବିଜେପି ଆଜି ଜଟିଳ ପରିସ୍ଥିତିରେ ପଡ଼ିଥିଲା । ଶେଷରେ ବୈଜୟନ୍ତଙ୍କ ସହ ଆମେ ନାହୁଁ ବୋଲି କହିଥିଲେ ବିଜେପି ନେତା ।

ଜନପ୍ରତିନିଧିଙ୍କ ଭିଡିଓ ଭାଇରାଲ, ନାବାଳିକା ଗଣଦୁଷ୍କର୍ମ ଓ ସାରୁଅ ଜମି କେଳେଙ୍କାରୀ ଭଳି ଏକାଧିକ ମାମାଲାରେ ଛନ୍ଦି ହୋଇଛନ୍ତି ବୈଜୟନ୍ତଙ୍କ ପରିବାର । ମଳିନ ଛବି ସତେଜ କରିବାକୁ ହୀନ ଉଦ୍ୟମ କରି ଏବେ ଏକ୍ସପୋଜ୍ ହୋଇଛନ୍ତି । ପୂର୍ବରୁ ଦଳବିରୋଧୀ କାର୍ଯ୍ୟ ପାଇଁ ବିଜେଡିରେ କଣଠେସା ହୋଇଥିଲେ । ବିଜେପି ସହ ଭିତ୍ତିରି ସମ୍ପର୍କ କଥା ଉଠାଇ ଚର୍ଚ୍ଚିତ ହୋଇଥିଲେ ରାଜନୀତିର ଏ ବିଭୀଷଣ । ପରେ ନିଷେଦ୍ଦାଞ୍ଚଳରେ ଅଣଓଡ଼ିଆ ବନ୍ଧୁଙ୍କ ସହ ହେଲିକପ୍ଟର ଉଡ଼ାଇ ବି ସମାଲୋଚନାର ଶିକାର ହୋଇଥିଲେ । ତଥାପି ଏ ବିଜ୍ଞ ନେତାଙ୍କ ମାନସିକତାରେ ଆସୁନି ସୁଧାର ।