ରାମପୁର(ଉତ୍ତର ପ୍ରଦେଶ): ସମାଜବାଦୀ ପାର୍ଟି ନେତା ଆଜମ ଖାନଙ୍କୁ ୨୦୧୯ ନିର୍ବାଚନ କାଳର ଭାଷଣ ମହଙ୍ଗା ପଡ଼ିଛି । ରାମପୁରର ଏମପି-ଏମଏଲଏ ଅଦାଲତ ୨୦୧୯ର ଘୃଣାସୃଷ୍ଟିକାରୀ ଭାଷଣ ମାମଲାରେ ତାଙ୍କୁ ୩ ବର୍ଷର ଜେଲ ଦଣ୍ଡାଦେଶ ଶୁଣାଇଛି । ୨୦୧୯ ଲୋକସଭା ନିର୍ବାଚନ କାଳରେ ଆଜମ ଏକ ସଭାରେ ଗୋଟିଏ ସମ୍ପ୍ରଦାୟ ବିରୋଧରେ ଘୃଣା ସୃଷ୍ଟିକାରୀ ଭାଷଣ ଦେଇଥିଲେ ବୋଲି ଅଭିଯୋଗ ହୋଇଥିଲା ।
ଅଦଲାତ ଆଜମଙ୍କୁ ତିନି ବର୍ଷ କାରାଦଣ୍ଡରେ ଦଣ୍ଡିତ କରିବା ସହିତ ୨୫ ହଜାର ଟଙ୍କାର ଜରିମାନା ଦେବାକୁ ଆଦେଶ ଦେଇଛନ୍ତି । ୧୦ଥରର ବିଧାୟକ ଓ ୨ ଥର ସାଂସଦଙ୍କ ରାଜନୈତିକ କ୍ୟାରିୟର ଅଦାଲତର ଏହି ଆଦେଶ ପ୍ରଶ୍ନବାଚୀ ଲଗାଇବାର ଆଶଙ୍କା ସୃଷ୍ଟି ହୋଇଛି । କାରଣ ଦଣ୍ଡାଦେଶ ପରେ ଆଜମ ଆଉ ନିର୍ବାଚନ ଲଢି ପାରିବେ ନାହିଁ । ଏହା ସହିତ ବିଧାନସଭାରେ ତାଙ୍କ ସଦସ୍ୟତା ମଧ୍ୟ ରଦ୍ଦ ହୋଇଯିବ ।
ଲୋକ ପ୍ରତିନିଧି ଆଇନ ଅନୁସାରେ ଯଦି କୌଣସି ବିଧାୟକ ଦୁଇ ବର୍ଷରୁ ଅଧିକ କାରାଦଣ୍ଡରେ ଦଣ୍ଡିତ ହୁଅନ୍ତି ତେବେ ତାଙ୍କ ସଦସ୍ୟତା ରଦ୍ଦ ହେବ ।ଏହା ପୂର୍ବରୁ ଅଯୋଧ୍ୟାର ଗୋଇସାଇଗଞ୍ଜ ବିଧାନସଭାରୁ ବିଜେପି ବିଧାୟକ ଖବ୍ବୁ ତିୱାରୀଙ୍କୁ ନିଜ ବିଧାୟକ ପଦବୀ ହରାଇବାକୁ ପଡ଼ିଥିଲା । କାରଣ ଅଦାଲତ ତାଙ୍କୁ ଦୁଇ ବର୍ଷର ଅଧିକ କାରାଦଣ୍ଡରେ ଦଣ୍ଡିତ କରିଥିଲେ ।
