ଡିଆରଡିଓ ପକ୍ଷରୁ ସ୍ୱୟଂ ଚାଳିତ ଯୁଦ୍ଧ ବିମାନର ସଫଳ ପରୀକ୍ଷଣ

ବେଙ୍ଗାଲୁରୁ: ଆତ୍ମନିର୍ଭର ଭାରତ ଦିଗରେ ପ୍ରତିରକ୍ଷା ଗବେଷଣା ଓ ବିକାଶ ସଂସ୍ଥା (ଡିଆରଡିଓ) ଆଉ ଏକ ପାଦେ ଆଗକୁ ବଢିଛି । ସ୍ୱୟଂ ଚାଳିତ ୱିଙ୍ଗ ଟେକ୍ନୋଲୋଜି ଡେମନଷ୍ଟ୍ରେଟରର ସଫଳ ପରୀକ୍ଷଣ କରିଛି ଡିଆରଡିଓ । ବିନା ଚାଳକରେ ଏହି ବିମାନ ଉଡି ସଫଳତା ହାସଲ କରିଛି । ଶୁକ୍ରବାର କର୍ଣ୍ଣାଟକର ଚିତ୍ରଦୁର୍ଗରେ ଏରୋନଟିକାଲ ପରୀକ୍ଷଣ ରେଞ୍ଜରୁ ଏହି ଉଡାଣ ଭରିଥିଲା  । ଏହି ଯୁଦ୍ଧ ବିମାନର ଖାସ କଥା ହେଉଛି ଏହା ସ୍ୱୟଂ ଚାଳିତ ଅଟେ, ଅର୍ଥାତ ବିନା ପାଇଲଟରେ କାମ କରିବ । ଡିଆରଡିଏ ଏହାର ସୂଚନା ଦେଇ କହିଛି ଏହା ସମ୍ପୂର୍ଣ୍ଣ ଭାବେ ଅଟୋମେଟିକ ମୋଡରେ କାର୍ଯ୍ୟ କରିବ । ଏଥିରେ ଟେକ ଅଫ, ୱେ ପଏଣ୍ଟ ନାଭିଗେସନ ଏବଂ ଏକ ସହଜ ଟଚଡାଉନ ସାମିଲ ଅଛି । ଏହି ଜ୍ଞାନକୌଶଳକୁ ବେଙ୍ଗାଲୁରୁର ବିମାନ ବିକାଶ ପ୍ରତିଷ୍ଠାନ ଡିଜାଇନ କରିଛି ।

ଏହି ବିମାନ ଏକ ଛୋଟ ଟର୍ବୋ ଫ୍ୟାନ ଇଞ୍ଜିନ ଜରିଆରେ ଅପରେଟ କରାଯିବ  । ଏଥିରେ ଏୟାରଫ୍ରେମ ସହ ଅଣ୍ଡର କ୍ୟାରେଜ, ଫ୍ଲାଇଟ କଣ୍ଟ୍ରୋଲ ଏବଂ ଏଭିୟୋନିକ୍ସ ସିଷ୍ଟମକୁ ସ୍ୱଦେଶୀ ରୂପରେ ବିକଶିତ କରାଯାଇଛି  । ଯୁଦ୍ଧରେ ଏହା ଲାଭଦାୟକ ସାବ୍ୟସ୍ତ ହେବ  । ବିନା ଜୀବନ କ୍ଷତି ଭୟରେ ଏହା ଯୁଦ୍ଧ ଲଢିପାରିବ । ୨୯ ଜୁନରେ ହାଇସ୍ପିଡ ଏକ୍ସପେଣ୍ଡେବୁଲ ଏରିଏଲ ଟାର୍ଗେଟ (ଏଚଇଏଟି) ଅଭ୍ୟାସର ସଫଳତାପୂର୍ବକ ପରୀକ୍ଷଣ କରାଯାଇଥିଲା  । ଏହାର ଟେଷ୍ଟିଂ ଡିଆରଡିଓ ଓଡିଶାର ଚାନ୍ଦିପୁର କ୍ଷେପଣାସ୍ତ୍ର ଘାଟିରୁ କରାଯାଇଥିଲା । ଏହା ମିସାଇଲକୁ ସିଧା ଟାର୍ଗେଟ କରିବ  ।