ଏହି ବ୍ୟକ୍ତି ନେଲେ ୧୦୦ କୋଟି ତମ ଟିକା
ନୂଆଦିଲ୍ଲୀ: କରୋନା ବିରୋଧୀ ଲଢ଼େଇରେ ଭାରତ ଆଜି ଇତିହାସ ରଚିଛି । ବିଶ୍ବର ସବୁଠାରୁ ବଡ଼ ଗଣତନ୍ତ୍ର ଦେଶରେ ଲାଗିଛି ୧୦୦ କୋଟି କରୋନା ଡୋଜ୍ । ଏ ସମ୍ପର୍କରେ ତ ଆପଣ ଜାଣିସାରିଥିବେ । ହେଲେ ଜାଣିଛନ୍ତି କି କିଏ ସେ ବ୍ୟକ୍ତି, ଯିଏ ଏହି ୧୦୦ କୋଟି ତମ ଟିକା ନେଇଛନ୍ତି । ଆସନ୍ତୁ ଜାଣିବା ତାଙ୍କ ସମ୍ପର୍କରେ ।
ଦିଲ୍ଲୀର ରାମ ମନୋହର ଲୋହିଆ ହସ୍ପିଟାଲରେ ଯେତେବେଳେ ୧୦୦ କୋଟି ତମ ଟିକା ଲଗାଗଲା, ଦେଶରେ ଉତ୍ସବର ମାହୋଲ ଆରମ୍ଭ ହୋଇଯାଇଥିଲା । ଏହି ଟିକା ନେଇଥିଲେ ଅରୁଣ ରାୟ । ମଜାଦାର କଥା ହେଲା ଦିନେ ଭାରତୀୟ ଟିକାକୁ ବିଶ୍ବାସ କରୁନଥିବା ଅରୁଣଙ୍କ ଭାଗ୍ୟରେ ଆସିଥିଲା ଏହି ଐତିହାସିକ ଟିକା । ଅରୁଣ ପ୍ରଧାନମନ୍ତ୍ରୀଙ୍କ ନିର୍ବାଚନ ମଣ୍ଡଳୀ ବାରାଣସୀର ବାସିନ୍ଦା ।
ଅରୁଣ ଜଣେ ଦିବ୍ୟାଙ୍ଗ ବ୍ୟକ୍ତି । ସେ ଟିକା ନେବାକୁ ରାମ ମନୋହର ଲୋହିଆା ହସ୍ପିଟାଲରେ ରେଜିଷ୍ଟ୍ରେସନ କରିଥିଲେ । ଟିକା ନେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋହି ସେଠାରେ ତାଙ୍କୁ ସାକ୍ଷାତ କରିଥିଲେ । ଏପର୍ଯ୍ୟନ୍ତ କାହିଁକି ଟିକା ନେଇ ନଥିଲ ବୋଲି ପିଏମ୍ ଯେତେବେଳେ ପଚାରିଥିଲେ ତାଙ୍କ ଉତ୍ତର ଶୁଣି ସମେସ୍ତ ଆଶ୍ଚର୍ଯ୍ୟ ହୋଇଯାଇଥିଲେ । ଟିକା ପ୍ରତି ତାଙ୍କର ବିଶ୍ବାସ ନଥିଲା ବୋଲି ସେ ପ୍ରଧାନମନ୍ତ୍ରୀଙ୍କୁ କହିଥିଲେ । ଦେଶରେ ଟିକାକରଣ ୭୦ କୋଟି ପାର ହେବା ପରେ ସେ ଟିକା ନେବାକୁ ନିଷ୍ପତ୍ତି ନେଇଥିଲେ ।
ପ୍ରଧାନମନ୍ତ୍ରୀଙ୍କ ସହ ଦେଖା ହୋଇଥିଲେ ବି ସେ ତାଙ୍କ ସହ ଗୋଟେ ସେଲଫି ନେଇ ପାରିନଥିବାରୁ ମନ ଦୁଃଖ କରିଛନ୍ତି ।
ଅରୁଣ କହିଛନ୍ତି, ସେ ଯେତେବେଳେ ଦିଲ୍ଲୀ ତାଙ୍କ ସାଙ୍ଗ ପାଖକୁ ଆସିଥିଲେ ସେତେବେଳେ ଦେଶରେ ୭୦ କୋଟି ଟିକା ଲାଗିଥିଲା । ସେତେବେଳେ ସେ ମନ ସ୍ଥିର କରିନେଇଥିଲେ ୧୦୦ କୋଟି ଟିକାଟି ସେ ହିଁ ଲଗାଇବେ । ତାଙ୍କ ସାଙ୍ଗ ରେଜିଷ୍ଟ୍ରେସନ କରିବାକୁ କହିଥିଲେ । ଏହାପରେ ଅରୁଣ ରାମ ମନୋହର ଲୋହିଆ ହସ୍ପିଟାଲରେ ଟିକା ପାଇଁ ରେଜିଷ୍ଟ୍ରେସନ କରାଇଥିଲେ ।
