ସୀମାରେ ଉତ୍ତେଜନା ଭିତରେ ୧୭ ନଭେମ୍ବରକୁ ସାମ୍ନାସାମ୍ନି ହେବେ ମୋଦି ଓ ଜିନପିଙ୍ଗ

ନୂଆଦିଲ୍ଲୀ: କରୋନା ସଂକଟ ଭିତରେ ୧୨ତମ ବ୍ରିକ୍ସ ଶିଖର ସମ୍ମିଳନୀ ଚଳିତଥର ଭିଡିଓ କନଫରେନ୍ସିଂରେ ଆୟୋଜିତ ହେବ । ଆସନ୍ତା ନଭେମ୍ବର ୧୭ରେ ଭର୍ଚୁଆଲ୍ ଭାବେ ଆୟୋଜିତ ହେବ ବ୍ରିକ୍ସ ସମ୍ମିଳନୀ । ମିଳିଥିବା ସୂଚନା ମୁତାବକ ସମ୍ମିଳନୀରେ ଭାରତ-ଚୀନ ମଧ୍ୟରେ ଦୀର୍ଘ ଦିନ ଧରି ଲାଗି ରହିଥିବା ସୀମା ବିବାଦ ମଧ୍ୟରେ ଦୁଇଦେଶର ମୁଖିଆ ଆଲୋଚନା କରିବେ ।

କୁହାଯାଉଛି ଏଲଏସିରେ ଉତ୍ତେଜନା ଭିତରେ ନଭେମ୍ବର ୧୭ରେ ପ୍ରଥମ ଥର ଭାରତର ପ୍ରଧାନମନ୍ତ୍ରୀ ପିଏମ୍ ମୋଦି ଓ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ମୁହାଁମୁହିଁ ହେବେ । ତେବେ, ଦୁହିଁଙ୍କ ମଧ୍ୟରେ ଏହି ଆଲୋଚନା ଭିଡିଓ କନଫରେନ୍ସିଂ ଜରିଆରେ ଭର୍ଚୁଆଲ୍ ହେବ ।

ଚଳିତବର୍ଷ ଶିଖର ସମ୍ମିଳନୀରେ ବ୍ରିକ୍ସ ଦେଶର ନେତାଙ୍କ ବୈଠକର ବିଷୟ ବସ୍ତୁ ହେଉଛି- ‘ବୈଷୟିକ ସ୍ଥିରତା, ଅଂଶୀଦାର ସୁରକ୍ଷା ଓ ଅଭିନବ ବିକାଶରେ ବ୍ରିକ୍ସର ଭାଗିଦାରୀ ।’ ୨୦୨୦ ବ୍ରିକ୍ସ ଋଷ ଅଧ୍ୟକ୍ଷତାରେ ଅନୁଷ୍ଠିତ ହେଉଛି । ଏହାର ମୁଖ୍ୟ ଉଦ୍ଦେଶ୍ୟ ବ୍ରିକ୍ସ ଦେଶ ମଧ୍ୟରେ ବହୁପକ୍ଷୀୟ ସହଯୋଗ ପାଇଁ ଲୋକଙ୍କ ଜୀବନ ଧାରଣର ମାନକୁ ବୃଦ୍ଧି କରିବା । ଚଳିତଥର ପାଞ୍ଚୋଟି ପ୍ରମୁଖ ସ୍ତମ୍ଭ- ଶାନ୍ତି ଓ ସୁରକ୍ଷା, ଅର୍ଥବ୍ୟବସ୍ଥା ଓ ରୋଜଗାର, ସାଂସ୍କୃତିକ ଓ ଲୋକଙ୍କ ମଧ୍ୟରେ ନେଣଦେଣ ଉପରେ ରଣନୀତିକ ଭାଗିଦାରୀ ଜାରି ରଖିବା ।

LAC ଉତ୍ତେଜନା ନେଇ ଚାପରେ ବାୟୁସେନା

ଭାରତ ଓ ଚୀନ ସୀମାରେ ଉତ୍ତେଜନା କମ୍ କରିବାକୁ ଦୁଇ ଦେଶ ପକ୍ଷରୁ ଚେଷ୍ଟା କରାଯାଉଛି । ଚୀନର ପ୍ରତିଟି ଚାଲକୁ ମୁକାବିଲା ପାଇଁ ଭାରତୀୟ ବାୟୁସେନା ସତର୍କ ରହିଛି । ଏମିତି ସ୍ଥିତିରେ ଯଦି ଚୀନ ସେନାକୁ ପଛକୁ ହଟାଇବା, ସୀମାରେ ସୈନ୍ୟ ଶକ୍ତି ବଢ଼ାଇବା ବୁଝାମଣାରେ ପଛକୁ ହଟିବା ଆଦି ସ୍ଥିତିକୁ ନେଇ ଭାରତ ପ୍ରସ୍ତୁତ ରହିଛି । ସୂଚନା ଅନୁସାରେ, ବାୟୁସେନା ସୀମାରେ ଆଲର୍ଟ ରହିଛି । ଲଦାଖ ନିକଟର ଚୁମାର ହେଲୀ ଅଞ୍ଚଳରେ ବାୟୁସେନା ବଡ଼ ଧରଣର ପ୍ରସ୍ତୁତି ଚଳାଇଛି । ଏଥିରେ ବର୍ତ୍ତମାନର ପରିସ୍ଥିତି ସହ ଶୀତ ଦିନ ପାଇଁ ପ୍ରସ୍ତୁତି ଚାଲିଛି ।