ତାଜମହଲ ପରିସରରେ ଉଡ଼ିଲା ଗେରୁଆ ପତାକା, ହେଲା ଶିବ ଚାଳିଶା ପାଠ

ଆଗ୍ରା: ବିଜୟା ଦଶମୀ ଅବସରରେ ଆଗ୍ରା ତାଜମହଲ ପରିସରରେ ଗେରୁଆ ପତାକା ଉଡ଼ାଇବା ଭିଡିଓ ଭାଇରାଲ୍ ହେଉଛି । ହିନ୍ଦୁବାଦୀ ସଂଗଠନର ଜଣେ କାର୍ଯ୍ୟକର୍ତ୍ତା ତାଜମହଲ ମଧ୍ୟ ପଶି ଗେରୁଆ ପତାକା ଉଡ଼ାଇବା ସହ ଶିବ ଚାଳିଶା ପାଠ କରିଛନ୍ତି । ତେବେ, ଭାଇରାଲ୍ ଭିଡିଓର ସତ୍ୟତା ଜଣାପଡ଼ିନାହିଁ । କିନ୍ତୁ, ଯେଉଁ ପ୍ରକାରେ ପତାକା ଉଡ଼ାଯାଇଛି ତାକୁ ନେଇ ତାଜମହଲ କର୍ତ୍ତୃପକ୍ଷଙ୍କ ଉପରେ ପ୍ରଶ୍ନ ଉଠିଛି ।

ଗେରୁଆ ପତାକା ସହ ଶିବ ଆରାଧନା କରୁଥିବା ଏହି ବ୍ୟକ୍ତି ଜଣଙ୍କ ଆଗ୍ରା ହିନ୍ଦୁ ଜାଗରଣ ମଞ୍ଚର ଯୁବ ଜିଲ୍ଲା ଅଧ୍ୟକ୍ଷ । ସୂଚନା ଅନୁସାରେ ହିନ୍ଦୁ ଜାଗରଣ ମଞ୍ଚର ଯୁବ ଜିଲ୍ଲା ଅଧ୍ୟକ୍ଷ ଗୌରବ ଠାକୁରଙ୍କ ଦ୍ୱାରା ଗତ ୫ ବର୍ଷ ମଧ୍ୟରେ ପ୍ରାୟ ୫ ଥର ତାଜମହଲ ପରିସରରେ ଶିବ ଆରାଧନା ସହ ପତାକା ଉଡ଼ାଯାଇଛି ।

ଗୌରବ ଠାକୁରଙ୍କ ଦାବି ହେଉଛି- ବିଶ୍ୱର ଆଶ୍ଚର୍ଯ୍ୟ ତାଜମହଲ ଏକ ମକବରା (ସମାଧି) ନୁହେଁ, ବରଂ ଏହା ଆରାଧ୍ୟ ଭଗବାନ ଶିବଙ୍କ ପ୍ରାଚୀନ ମନ୍ଦିର ଅଟେ । ତାଙ୍କ କହିବା ଅନୁଯାୟୀ, ସେ ପୂର୍ବରୁ ଶିବଙ୍କ ଆରାଧନା କରିଛନ୍ତି ଏବଂ ଆଗକୁ ମଧ୍ୟ କରିବେ ।

ଗୌରବ ଦାବି କରନ୍ତି- କୁହାଯାଉଥିବା ତାଜମହଲ ପ୍ରକୃତରେ ‘ତେଜୋମହଲ’ ଅଟେ । ଏହି ସତ ଲୋକଙ୍କ ସାମନାକୁ ଆସିବା ଉଚିତ୍ । ତାଙ୍କ ଦାବି ଅନୁସାରେ ଶାହଜହାଁଙ୍କ ଦ୍ୱାରା ତିଆରି ହୋଇଥିବା ତାଜମହଲ କୌଣସି ପ୍ରେମର ପ୍ରତୀକ ନୁହେଁ ବରଂ ହିନ୍ଦୁଙ୍କ ଆସ୍ଥାର କେନ୍ଦ୍ର ।

ଏବେ ଏହି ଭିଡିଓ ଭାଇରାଲ୍ ହେବା ପରେ ତାଜମହଲର ସୁରକ୍ଷା ଉପରେ ପ୍ରଶ୍ନ ଉଠିଛି । ବାରମ୍ବାର ଏଭଳି ଘଟଣା ତାଜମହଲ ପରିସରରେ ଘଟୁଥିବା ବେଳେ ସୁରକ୍ଷା ଏଜେନ୍ସି ପାଇଁ ଏହା ମୁଣ୍ଡବିନ୍ଧାର କାରଣ ପାଲଟିଛି ।